Category: Lajme

Sonte në mesnatë do të përmbyllet afati për partitë politike për të njoftuar pjesëmarrjen në zgjedhje ose mospjesëmarrjen dhe deklarimin e koalicioneve.

Që nga hapja e këtij afati më 1 maj dhe deri në mesditën e sotme, KQZ ka pranuar njoftimin për pjesëmarrje në zgjedhje nga 20 parti politike, mospjesëmarrje nga 5 parti politike dhe 1 koalicion i përbërë nga 2 parti politike.

Në detaje rreth këtij afati ka folur zëdhënësi i Komisionit Qendror të Zgjedhjeve, Valmir Elezi.

“Sot, më 7 maj, në orën 24:00, përfundon afati për partitë politike të regjistruara në Kosovë për ta njoftuar KQZ-në për pjesëmarrje ose mospjesëmarrje në zgjedhje dhe formim të koalicioneve. Këto obligime vlejnë vetëm për 53 partitë politike që aktualisht janë pjesë e regjistrit të partive politike të regjistruara në Republikën e Kosovës. Deri më tani (e enjte, 7 maj 2026, ora 12:00) KQZ ka pranuar njoftimin për pjesëmarrje në zgjedhje nga 20 parti politike, mospjesëmarrje nga 5 parti politike dhe 1 koalicion i përbërë nga 2 parti politike”, tha Elezi për Ekonomia Online.

Sipas Elezit, partitë politike që deri në këtë kohë kanë njoftuar pjesëmarrjen në zgjedhje janë: 1. Partia Socialdemokrate; 2. Kosovaki Nevi Romani Partia; 3. Partia Socialdemokrate e Ashkalinjve; 4. Za Slobodu Pravdu i Opstanak; 5. Srpska Lista; 6. Yenilikçi Türk Hareket Partisi; 7. Lidhja Demokratike e Kosovës; 8. Fjala; 9. Lëvizja Përparimtare e Romëve të Kosovës; 10. Partia Rome e Bashkuar e Kosovës – PREBK; 11. Socialdemokratska Unija; 12. Jedinstvena Goranska Partija; 13. Kosova Demokratik Türk Partisi; 14. Nova Demokratska Stranka; 15. Iniciativa e Re Demokratike e Kosovës; 16. Kosovski Savez; 17. Partia Balliste; 18. Partia Qytetare për Mirëqenie Sociale; 19. Partia Liberale Egjiptiane; dhe 20. Aleanca për Ardhmërinë e Kosovës.

Numri i rasteve të konfirmuara të hantavirusit është rritur në pesë tha kreu i Organizatës Botërore të Shëndetësisë.

Tedros Ghebreyesus u tha gazetarëve se janë raportuar tetë raste të virusit, me pesë raste të konfirmuara dhe tre raste të dyshuara, raporton SkyNews.

Lloji i hantavirusit të Andeve – i cili po shkakton këtë shpërthim – ka shumë të ngjarë të transmetohet midis anëtarëve të familjes, partnerëve intimë dhe njerëzve që ofrojnë kujdes mjekësor, thotë ai.

Asnjë nga pasagjerët ose ekuipazhi i mbetur aktualisht në bordin e MV Hondius nuk ka simptoma.

Por është e mundur që të raportohen më shumë raste të virusit për shkak të periudhës së inkubacionit të virusit deri në gjashtë javë, thotë Ghebreyesus.

Një ngjarje tragjike ka tronditur qytetin e Beratit, ku është gjetur pa shenja jete një 30-vjeçar që ishte raportuar i zhdukur prej disa ditësh.

Viktima, banues në lagjen “Çlirimi”, kishte humbur kontaktet me familjen që prej datës 30 prill. Denoncimi për zhdukjen e tij ishte bërë nga i ati pranë autoriteteve policore.

Pas dëshmive të disa banorëve të zonës, të cilët pretenduan se kishin parë të riun të hidhej në lumin Osum, policia dhe forcat e kërkim-shpëtimit nisën një operacion përgjatë rrjedhës së lumit.

Pas disa orësh kërkime intensive, trupi i pajetë i 30-vjeçarit u lokalizua mesditën e sotme pranë fshatit Remanicë./TCh/

Ushtruesja e detyrës së shefes së Zyrës së BE-së në Kosovë, Eva Palatova, ka deklaruar se Kosova nuk mund ta marrë automatikisht statusin e kandidatit për anëtarësim në Bashkimin Evropian, duke theksuar se vendi duhet t’i bindë të 27 shtetet anëtare të BE-së.

Në kuadër të shënimit të Ditës së Evropës, më 9 maj, në një organizim të Zyrës së BE-së në Kosovë, ajo tha se Brukseli pret nga Kosova zgjedhje të lira dhe të drejta, formim të shpejtë të institucioneve dhe avancim të reformave.

“E di, zoti Kryeministër, që ju dëshironi që BE-ja të ecë përpara me aplikimin për anëtarësim, të cilin e dorëzuat gjatë presidencës çeke në Pragë. Ne jemi këtu për t’ju ndihmuar që ta arrini këtë synim të radhës. Por më lejoni të jem e sinqertë, Brukseli nuk mund ta japë thjesht statusin e kandidatit. Ju duhet t’i bindni 27 shtetet anëtare”, tha ajo.

Palatova theksoi se Kosova duhet të vazhdojë të dëshmojë standarde demokratike dhe stabilitet institucional.

“Dhe për këtë, rëndësi kanë këto tri elemente kyçe. Kosova është dhe duhet të mbetet një demokraci e gjallë. Zgjedhjet parlamentare që mbahen saktësisht një muaj nga sot duhet të jenë, përsëri, të lira, të drejta dhe gjithëpërfshirëse”, tha ajo.

Ajo shtoi se Bashkimi Evropian pret krijimin e shpejtë të institucioneve pas zgjedhjeve dhe vazhdimin e reformave.

“Së dyti, shpresojmë të shohim një formim të shpejtë të institucioneve. Një qeveri e bazuar në një shumicë të fortë në kuvend, e aftë të gjenerojë kompromise të fuqishme ndërpartiake, të zgjedhë një president dhe të avancojë me agjendën e reformave. Dhe sigurisht, karakteri shumetnik i Kosovës është me vlerë të madhe për të gjitha shtetet tona anëtare”, tha ajo.

Sipas saj, shtetet anëtare të BE-së po e përcjellin mënyrën se si Kosova i trajton komunitetet joshumicë dhe zbatimin e marrëveshjeve të dialogut.

“Të gjitha kryeqytetet tona vëzhgojnë ruajtjen e tij, angazhimin konstruktiv me të gjitha komunitetet shumicë, në mënyrë që të gjithë kosovarët, pavarësisht përkatësisë etnike, të ndiejnë se kanë një shtëpi dhe perspektivë këtu. Në këtë drejtim, ne mbështetemi në zbatimin e mëtejshëm të marrëveshjes së 14 marsit. Dhe e di, zoti Kryeministër, që ju ia rikonfirmuat këtë përfaqësuesit të lartë edhe këtë javë në Jerevan”, tha ajo.

Palatova shtoi se BE-ja pret zbatim me mirëbesim të marrëveshjeve dhe progres në dialogun e lehtësuar nga Brukseli.

“Ne llogarisim në zbatim me mirëbesim, llogarisim që momentumi që krijon kjo marrëveshje t’i japë një shtysë të mëtejshme zgjidhjeve konkrete dhe progresit në dialogun e ri të lehtësuar. Ne llogarisim që mbi këtë bazë, përmes bashkëpunimit të udhëheqjes së Kosovës në të gjitha partitë politike, statusi i kandidatit të bëhet i prekshëm dhe premtimi nga Samiti i Selanikut i vitit 2003 të bëhet një perspektivë e arritshme. Tani, dua gjithashtu të jem i qartë se Bashkimi Evropian i vitit 2003 nuk është Bashkimi Evropian i vitit 2026”, tha ajo.

Gjatë gjithë luftës kundër Iranit, Pakistani ka qenë një ndërmjetës kyç midis Uashingtonit dhe Teheranit.

Dhe me zhurma pozitive që vijnë nga të dyja palët – jo më pak nga Donald Trump, i cili ka thënë se mendon që një luftë do të “mbarojë shpejt” – ministria e Jashtme e Pakistanit ka nxjerrë një deklaratë të re duke nënvizuar këtë optimizëm.

“Ne presim një marrëveshje sa më shpejt të jetë e mundur”, tha sot zëdhënësi Tahir Andrabi, transmeton Telegrafi.

“Shpresojmë që palët të arrijnë një zgjidhje paqësore dhe të qëndrueshme që do të kontribuojë jo vetëm në paqen në rajonin tonë, por edhe në paqen ndërkombëtare”, shtoi ai.

Por ai nuk dha një afat kohor, duke shtuar se Pakistani nuk do të zbulonte detaje të përpjekjeve diplomatike në vazhdim.

“Ajo që mund t’ju them, dhe kjo është ajo që kam thënë më parë, është se ne mbetemi pozitivë, mbetemi optimistë dhe shpresojmë që zgjidhja të jetë së shpejti”, shtoi ai.

E gjithë kjo pasqyron atë që negociatorët pakistanezë i thanë redaktorit tonë të çështjeve ndërkombëtare, Dominic Waghorn – se është bërë përparim drejt idesë së një “marrëveshjeje me një faqe” midis SHBA-së dhe Iranit, duke u përqendruar në çështjen bërthamore dhe Ngushticën e Hormuzit.

Një operacion i madh i karabinierëve italianë në Napoli ka përfunduar me arrestimin e 14 personave të dyshuar për lidhje me klanin mafioz “Di Lauro” dhe rrjete shqiptare të trafikut të drogës.

Hetimet u koordinuan nga Drejtoria Antimafia e Napolit, e cila zbuloi një rrjet të organizuar ndërkombëtar për shpërndarjen e kokainës dhe hashashit.

Sipas mediave italiane, në krye të grupit dyshohet se ishte 55-vjeçari Raffaele Paolo, i njohur me nofkën “O’ rockets”. Ai dyshohet se kishte rifilluar aktivitetin kriminal pas lirimit nga burgu në vitin 2019, duke organizuar shpërndarjen e drogës në rrugë dhe përmes dërgesave në banesa.

Hetuesit italianë bëjnë të ditur se aktiviteti kriminal shtrihej në disa zona të Napolit dhe përfshinte trafikimin e sasive të mëdha të kokainës. Gjatë operacionit, autoritetet arrestuan edhe gjashtë persona të tjerë dhe sekuestruan disa kilogramë kokainë dhe hashash.

Të arrestuarit përballen me akuza për “organizim kriminal për trafik droge” dhe “posedim droge me qëllim shpërndarjen”, ndërsa hetimet mbulojnë periudhën 2020–2023.

Në mbledhjen e sotme të Zyrës së Rregullatorit për Energji (ZRRE) janë miratuar tri pika që lidhen me tarifat e energjisë elektrike për vitin 2026, përfshirë tarifat për sistemin e transmetimit, sistemin e shpërndarjes dhe furnizimin me shërbim universal, pa ndryshime apo rritje të tarifave për konsumatorët, raporton Ekonomia Online.

Me pesë vota për është miratuar pika e parë e rendit të ditës, shqyrtimi i propozimit për miratimin e Tarifave për Shfrytëzimin e Sistemit të Transmetimit dhe Tregut (KOSTT).

Nga Departamenti i Tarifave, Muharrem Gashi tha se analizat janë bërë në përputhje me kornizën rregullatore në fuqi dhe se ndryshimet në nivelin e shitjeve kanë ndikuar drejtpërdrejt në llogaritjen e tarifave për operatorin e sistemit dhe operatorin e tregut.

“Këto analiza janë bërë në përputhje me pikën e parë të rendit të ditës: shqyrtimi i propozimeve për tarifat për shfrytëzimin e rrjetit të transmetimit dhe tregut, si dhe tarifat për shfrytëzimin e sistemit të transmetimit të tregut. Kostoja e ciklit të operimit të Operatorit të Sistemit të Transmetimit të energjisë elektrike në Kosovë ka ndikuar në tarifat për shfrytëzimin e rrjetit të transmetimit dhe tregut, si dhe tarifat për fondin e burimeve të ripërtëritshme të energjisë, në përputhje me kornizën rregullatore në fuqi. Tarifat për shfrytëzimin e sistemit dhe tregut mbulojnë: Kostot totale të operimit, mirëmbajtjes, investimeve dhe zhvillimit të sistemit të transmetimit. Kjo është në përputhje me vendimin e Bordit të ZRRE-së për të hyrat e lejuara maksimale në vlerë prej 76 milionë e 484 mijë euro për vitin relevant tarifor 2026. Në aplikacionin nga KOSTT-i, shitjet për konsumatorët e kyçur në nivel transmetimi janë paraqitur në 570.7 gigavat orë (GWh), ndërsa pas verifikimit nga ZRRE-ja, ne kemi korrigjuar këtë vlerë në 329 gigavat orë (GWh). Ky ndryshim ka ndikuar drejtpërdrejt në llogaritjen e tarifave për operatorin e sistemit dhe operatorin e tregut. Të hyrat e lejuara maksimale mblidhen përmes tarifave ndaj gjeneratorëve për përdorim të rrjetit në nivel transmetimi dhe shpërndarjes”, tha ai.

Ndërkaq, me pesë vota për është miratuar edhe shqyrtimi i propozimit për miratimin e Tarifave për Shfrytëzimin e Sistemit të Shpërndarjes (KEDS).

Nga Departamenti i Tarifave, Adelina Lokaj tha se tarifat e propozuara synojnë mbulimin e kostove totale të shpërndarjes dhe se, si rezultat i diferencës në nivelin e shitjeve të energjisë, tarifa mesatare ka pësuar rënie prej rreth 2.7 për qind.

“Po vazhdojmë me prezantimin e tarifave për shfrytëzimin e sistemit të shpërndarjes, ku këto tarifa synojnë mbulimin e kostove totale të shpërndarjes në përputhje me të hyrat e lejuara maksimale në vlerë prej 145 milionë e 960 mijë euro për vitin relevant 2026. Në kërkesën e saj, KEDS-i ka propozuar mbajtjen e tarifave aktuale duke u bazuar në një nivel të shitjeve prej 5,581 gigavat për orë, përderisa ZRRE-ja ka marrë në konsideratë bilancin e energjisë elektrike të aprovuar me një nivel të shitjeve prej 5,745 gigavat për orë. Andaj, si rezultat i kësaj diference, tarifa mesatare ka pësuar një rënie rreth 2.7%. Kjo është llogaritur nga Departamenti i Tarifave dhe Çmimeve, e cila ka qenë në raport me kërkesën e KEDS-it që kemi pranuar, edhe që kjo diferencë është reflektuar edhe në tarifat e rrjetit të shpërndarjes sipas niveleve të tensionit. Tarifat janë strukturuar në mënyrë që të reflektojnë vëllimin e konsumit të energjisë dhe një shpërndarje të drejtë të kostove ndërmjet kategorive të konsumatorëve, respektivisht niveleve të tensionit”, tha ajo.

Po ashtu, është miratuar edhe pika për shqyrtimin e propozimit për miratimin e Tarifave për Furnizuesin me Shërbim Universal (KESCO), pa ndryshime apo rritje të tarifave.

Nga Departamenti i Tarifave, Muharrem Gashi tha se ZRRE-ja nuk e ka mbështetur propozimin për ndryshimin e strukturës tarifore dhe ka vlerësuar se një ndryshim i tillë kërkon konsultim publik dhe procedurë të veçantë.

“Në kuadër të aplikacionit, tarifa furnizuese me shërbim universal ka propozuar me ndryshu strukturën tarifore, përkatësisht me eliminimin e diferencimit të ditë/natë dhe tarifave me dy blloqe me një — me aplikuar një tarifë të unifikuar. Ne si ZRRE vlerësojmë se ky ndryshim kërkon një proces të veçantë dhe konsultim publik, për të cilin nuk ka pasur kërkesë nga furnizuesi i shërbimit universal. Prandaj, ZRRE nuk mendon që ky propozim duhet të aprovohet dhe mendojmë që duhet të mbetet pa ndryshuar struktura ekzistuese tarifore dhe niveli i tarifave”, tha ai.

Kryeministri në detyrë, Albin Kurti, ka kërkuar nga Bashkimi Evropian që Kosovës t’i jepet statusi i vendit kandidat dhe të hapen negociatat për anëtarësim, duke thënë se vendi nuk duhet të mbetet prapa në procesin integrues evropian.

Në kuadër të Ditës së Evropës, e cila shënohet më 9 maj, në një ngjarje të organizuar nga Zyra e Bashkimit Evropian në Kosovë, ku u nda edhe Çmimi Europian i Vitit, Kurti tha se Kosova tashmë ka dëshmuar progres në ekonomi, demokraci dhe sundim të ligjit.

“Për Kosovën, Bashkimi Evropian nuk është një realitet i largët apo një grup standardesh që duhen përmbushur. Ai është shtëpia natyrore e shoqërisë sonë, korniza e reformave tona dhe e ardhmja e qytetarëve tanë që tashmë është zgjedhur. Më shumë se 80% e qytetarëve tanë mbështesin anëtarësimin në Bashkimin Evropian, një nga nivelet më të larta të mbështetjes kudo në Evropë”, tha ai.

Kurti theksoi se Kosova ka shënuar progres të konsiderueshëm në disa fusha kyçe, duke përmendur rritjen ekonomike dhe avancimin demokratik.

“Ne kemi bërë përparim të konsiderueshëm në vendin tonë. Kemi një nga normat më të forta të rritjes ekonomike në Evropën Juglindore dhe më të fortën në Ballkanin Perëndimor. Jemi në krye kur bëhet fjalë për avancimin demokratik, qoftë sipas matjeve të World Justice Project, Freedom House, Transparency International apo World Press Freedom Index. Ne jemi gjithashtu vendi më i sigurt në rajonin tonë me nivelin më të ulët të krimit. I gjithë ky përparim mori njohje në rrugën tonë drejt anëtarësimit në Bashkimin Evropian. Pas një dekade pritjeje, ne tashmë gëzojmë liberalizimin e vizave dhe morëm vendimin historik për të aplikuar për anëtarësim në Bashkimin Evropian më 15 dhjetor 2022”, tha ai.

Ai shtoi se Kosova është pjesë e Planit të Rritjes së BE-së dhe po punon në përmbushjen e obligimeve, ndonëse, sipas tij, ekzistojnë pengesa për shkak të mosmiratimit të disa ligjeve në Kuvend.

“Ne jemi pjesë e Planit të Rritjes, ku po bëjmë çdo përpjekje për të zbatuar secilin hap. Ne përballemi me disa sfida këtu, siç e dini mirë, me ligje që ende duhet të miratohen nga Kuvendi. Muajin e kaluar, më 15 prill, shënuam 40 muaj që kur dorëzova aplikimin tonë për anëtarësim në Pragë. Besoj se BE-ja duhet të punojë së bashku për të siguruar statusin e kandidatit për Kosovën dhe hapjen e negociatave të anëtarësimit. Duhet të ketë unitet angazhimi në BE në mënyrë që Kosova të mos mbetet prapa. Ndërkohë, derisa presim vendimin e BE-së, ne po ndërmarrim hapa konkretë për të siguruar që të mos humbet kohë nga ana jonë”, tha ai.

Në fund, Kurti tha se procesi i zgjerimit dhe reformat duhet të ecin paralelisht.

“Premtimi juaj është zgjerimi. Premtimi ynë janë reformat, dhe ne mundemi dhe duhet t’i realizojmë të dyja, kjo është një përgjegjësi e përbashkët”, tha ai.

Ushtruesja e detyrës së presidentes, Albulena Haxhiu, ka dekoruar me titullin “Nderi i Republikës së Kosovës” akademikun e ndjerë, Rexhep Qosja.

“Me nderim të thellë, e kam dekoruar pas vdekjes akademik Rexhep Qosjen me titullin “Nderi i Republikës së Kosovës”. Rexhep Qosja ishte një nga figurat më të rëndësishme të letërsisë, shkencës dhe mendimit shqiptar. Me veprën e tij të gjerë, me qëndrimin e tij publik dhe me përkushtimin ndaj çështjeve të mëdha të kombit, ai la gjurmë të thella në kulturën shqiptare dhe në vetëdijen tonë kombëtare. Ky titull është shenjë mirënjohjeje për një jetë të tërë në shërbim të dijes, lirisë dhe dinjitetit kombëtar. I përjetshëm qoftë kujtimi për të”, tha ajo.

Qosja vdiq më 23 prill të këtij viti dhe u varros në një ceremoni familjare.

Kryeministri në detyrë i Republikës së Kosovës, Albin Kurti, priti në takim Nicole Epting, Përfaqësuese Rajonale e UNHCR për Evropën Qendrore.

Në takim u diskutua për çështjet që lidhen me refugjatët, personat e zhvendosur brenda vendit dhe personat pa shtetësi, si dhe për përgjegjësinë institucionale dhe ndërkombëtare në mbrojtjen e të drejtave dhe dinjitetit të tyre.

Kryeministri në detyrë Kurti e njoftoi përfaqësuesen Epting me politikat dhe programet e Qeverisë së Republikës së Kosovës, të zbatuara nga ministritë e linjës, të cilat adresojnë nevojat dhe të drejtat e këtyre kategorive, përfshirë strehimin, mbështetjen sociale dhe qasjen në shërbime publike.

Gjatë bashkëbisedimit u theksua se trajtimi i këtyre çështjeve duhet të mbetet gjithmonë i udhëhequr nga parimet e të drejtave të njeriut dhe solidaritetit humanitar, duke vendosur njeriun dhe dinjitetin e tij në qendër të politikave publike dhe angazhimit institucional.

Në fund të takimit u diskutua edhe çështja e personave të zhdukur me dhunë gjatë luftës në Kosovë. Kryeministri në detyrë Kurti tha se janë 1565 persona të zhdukur me dhunë nga lufta e fundit dhe, në këtë drejtim, potencoi nevojën e zbatimit të plotë të Deklaratës për Personat e Zhdukur, të dakorduar në Bruksel. Ai nënvizoi se progresi real në këtë proces kërkon hapjen e arkivave nga Serbia, përfshirë atë të Brigadës së 38-të të Motorizuar të Ushtrisë Jugosllave, e cila vazhdon të mbetet e klasifikuar nga autoritetet në Serbi deri në vitin 2044.