Category: Lajme

Çdo vit, 1.4 milionë vdekje në Europë humbasin jetën si pasojë e ndotjes dhe ndryshimeve klimatike.

Raporti i fundit i hartuar nga Organizata Botërore e Shëndetësisë bën me dije se vdekjet e lidhura me shkaqe mjedisore përbëjnë afërsisht 15% të barrës së sëmundjeve në rajon.

Rreth 570 000 vdekje mund t’i atribuohen ndotjes së ajrit të ambientit dhe më shumë se 150 000 vdekje nga ndotja e ajrit në banesa.

Sipas ekspertëve 77 milionë njerëzve u mungon qasja në ujë të pijshëm të menaxhuar në mënyrë të sigurt në vitin 2020.

Ndërkohë që vetëm vitin e kaluar 20 000 njerëz vdiqën nga nxehtësia ekstreme në Evropë.

Hapësirat e gjelbra kanë një efekt mbrojtës shëndetësor që mund të zvogëlojë vdekshmërinë nga shkaqet natyrore me gati 1%.

Për të menaxhur këtë situatë ministrat e mjedisit dhe shëndetësisë të rajonit evropian pritet të angazhohen në ndërmarrjen e veprimeve urgjente për të reduktuar atë shifër marramendëse të jetëve të humbura dhe për të mbrojtur mbijetesën tonë në këtë planet.

“20.000 euro për t’u shpenzuar për studime, trajnime ose hapjen e një biznesi pasi të arrijnë moshën 18 vjeç”.

Ky është plani ambicioz i Spanjës për të trajtuar pabarazinë sociale në vend, që pritet t’i kushtojë qeverisë në Madrid rreth 10 miliardë euro ose 0.8% e PBB-së së Spanjës.

Nisma surprizuese u prezantuar nga ministrja e Punës në Spanjë, Yolanda Díaz, pak ditë para zgjedhjeve të përgjithshme të 23 korrikut.

Díaz thotë se paratë që do t’u jepen të rinjve për studim, trajnim ose fillimin e një biznesi do të përkthehen në “barazi mundësish” pavarësisht nga prejardhja familjare ose të ardhurat e njerëzve.

Plani “Sumar” parashikon që shuma rekord të mblidhet duke taksuar ata që fitojnë më shumë se 3 milionë euro në vit, ndërsa pagesa do të nisë në moshën 18 vjeç dhe do të vazhdojë deri në moshën 23 vjeç.

Përveç shumës universale, të rinjtë do të marrin edhe mbështetje administrative për të studiuar, trajnuar ose që të krijojnë biznesin e tyre.

“Nisma ka të bëjë me krijimin e një të ardhmeje për të rinjtë dhe t’u japim atyre mundësinë për të studiuar ose për të filluar një biznes, pa pasur nevojë të varen nga mbiemrat e tyre ose nga familja prej së cilës vijnë“, tha Díaz kur prezantoi planin.

Ministrja, e cila u rrit në një familje të vendosur komuniste, tha se nuk kishte qenë në gjendje të ndiqte ëndrrat e saj për t’u bërë inspektore punësimi, sepse nuk kishte para të mjaftueshme që të përballonte studimet.

“Të bëhesh inspektor punësimi në Spanjë do të duhen rreth pesë vjet. Unë nuk jam inspektore punësimi sepse jam bijë e prindërve të klasës punëtore dhe nuk mund ta arrija kurrë atë që doja. Kjo është një masë rishpërndarëse që do të lejojë të rinjtë e vendit tonë të kenë një të ardhme pavarësisht mbiemrit të tyre”, tha ajo.

Pirja e duhanit në automjete nuk do të lejohet më kur pasagjerë janë fëmijët ose gratë shtatzëna, sipas Ministrisë gjermane të Shëndetësisë.

Ndalimi, i cili është kërkuar prej kohësh nga shtetet federale, parashikohet në projektigjin për ndryshimin e Ligjit për Mbrojtjen e Joduhanpirësve.

Drafti i Ministrit të Shëndetësisë, Karl Lauterbach duhet të koordinohet me ministritë e tjera përpara se të paraqitet në kabinet.

Sipas draftit, ndalimi i pirjes së duhanit, i cili tashmë zbatohet në transportin publik, në të ardhmen duhet të zbatohet edhe në automjete të mbyllura në prani të të miturve apo grave shtatzëna.

Disa shtete federale kanë nisur tashmë nisma që nga viti 2019 për të zbatuar zgjatjen e projektligjit, duke vendosur gjoba deri në 3 000 euro (3 265 dollarë) në rast shkeljeje.

Së fundmi, Dhoma e Lartë e parlamentit gjerman, Bundesrat, vendosi në mars 2022 të paraqesë projektligjin në Dhomën e Ulët, Bundestag.

Qeveria shtetërore e Saksonisë së Ulët, iu referua Qendrës Gjermane të Kërkimit të Kancerit, duke deklaruar se përqendrimi i duhanit në automjete mund të jetë pesë herë më i lartë se në ndonjë bar ose lokal.

Për fëmijët dhe të rinjtë, kjo mund të shkaktojë dëmtime në mushkëri, si dhe sëmundje të frymëmarrjes dhe infeksione të veshit të mesëm.

Lauterbach ka kërkuar zgjatjen e projektligjit që ndalon pirjen e duhanit, duke përfshirë cigaret elektronike dhe produktet e kanabisit, në vendet ku zbatohet ligjërisht.

Komisioni për Shëndetësi nuk ka hedhur në votim Projektligjin për çmimin e produkteve medicinale, për shkak të mospajtimeve të thella mes deputetëve, përfshirë edhe atyre të mazhorancës. Deputetët e Grupit Parlamentar të Lëvizjes Vetëvendosje, por nga radhët e Listës Guxo, kërkuan plotësim-ndryshimin e këtij projektligji, pasi sipas tyre, nuk po përkrahën prodhuesit vendor farmaceutik, gjë të cilën e përkrahën edhe anëtarët e komisionit nga opozita. Mirëpo të kundërtën e thanë deputetët e LVV-së, që potencuan se përmes këtij projektligji do të ketë unifikim të çmimeve të barnave.

Kryetarja e komisionit për shëndetësi, Fatmire Kollçaku, tha se qytetarët do të përfitojnë më së shumti nga ky projektligj.

“Qëllimi i këtij projektligji është që të vendoset një rregullativ dhe për herë të parë të kemi një unifikim të çmimeve dhe një kosto më të përballueshme për qytetarët. Besoj që ky ligj do të ndryshojë shumë për të mirë situatën sa i përket qytetarëve dhe pacientëve që kanë nevojë për barna. Kjo nuk do t’i detyrojë të sillen në barnatore të ndryshme, por kudo që të jenë çmimi do të jetë i unifikuar dhe do të ketë një kontroll më të lartë të cilësisë së barnave”, tha ajo.

Por mëdyshje për të njëjtin shprehu deputeti i mazhorancës, Haxhiu Avdyli, i cili tha se ai nuk po mbështet prodhuesit vendor.

“Ky ligj ka një problem të vogël që ne duhet ta zgjidhim. Deri tani nuk kemi arritur që të zgjidhim, të avancojmë një segment i cili më bën skeptik se a duhet të votojmë sot Projektligjin. Janë shumë elemente të mirë të këtij projektligji, por kemi një mangësi që nuk jemi duke përkrah prodhuesin vendor…Me anë të këtij Projektligji ne nuk jemi duke i bërë favor por jemi duke i bërë disfavor, nuk jemi duke bërë të barabartë me prodhuesit e rajonit, por jemi duke bërë disfavor. Me anë të këtij ligji mund të ndodh të mbyllet një fabrikë shumë prestigjioze që ka mbi 20 milionë euro investim”, deklaroi Avdyli.

Kritik u shpreh edhe deputeti i PDK-së, Bekim Haxhiu, i cili tha se përmes projektligjit për produktet medicinale, krijohet një hapësirë e madhe e manipulimit për çmimet e barnave, derisa shtoi se i njëjti është harmonizuar më shumë me kompanitë jashtë Kosovës.

“Ky ligj shihet se është harmonizuar më shumë me lobuesit e kompanive jashtë Kosovës sesa me vendorët. Dje në këtë sallë sa ishim në grup punues u vë në pah se në draftin e parë ishte i paraparë rregullimi edhe i përcaktimit të çmimit për prodhuesit vendor, që atyre t’iu lejohet e drejta si vend të origjinës të deklarojnë çmimin”, tha ai.

Ndërkaq, deputeti i AAK-së, Shemsedin Dreshaj tha se ky projektligj duhet të ndryshohet pasi nuk përkrahen prodhuesit vendor.

“Prodhuesi vendor nuk është mbështetur sa duhet me këtë ligj dhe mendoj se i njëjti duhet të ketë në konsiderim këtë. Nuk pajtohet që ky ligj të aprovohet sot kësisoj dhe pastaj edhe një herë të marrin ne në dorë. Ligji duhet të jetë i mirë ose të kthehet ose të aprovohet”, deklaroi ai.

Krahas kësaj, komisioni miratoi raportin për mbikëqyrjen e zbatimit të Ligjit për kontrollin e duhanit. Mes tjerash në këtë raport kërkohet edhe plotësim-ndryshimi i këtij projektligji, ku do të përfshihen edhe cigaret elektronike, po ashtu edhe përcaktimi i ambienteve të mbyllura dhe hapura./KP/

Komuna e Podujevës vazhdoi sot aksionin e rrënimit të vilave pa leje në Batllavë, i cili ishte ndërprerë disa muaj më parë.

Në Batllavë do të rrënohen katër vila, të cilat janë ndërtuar pa leje. Kështu bëri të ditur zëdhënësi i Komunës së Podujevës, Fatri Zhitia, i cili u shpreh se aksioni do të vazhdojë deri në rrënimin e katër vilave.

Ai shtoi se procedurat për rrënimin e katër vilave në Batllavë kanë përfunduar.

Në muajin nëntor të vitit të kaluar ka filluar aksioni për rrënimin e vilave pa leje në Batllavë./KP

Kryetari i Aleancës për Ardhmërinë e Kosovës (AAK), Ramush Haradinaj, ka kujtuar Betejën e Morinës në 25-vjetorin e saj.

Haradinaj ka thënë se kjo betejë shënoi një kapitull të ri në luftën çlirimtare në Dukagjin.

“25 vjet më parë, Beteja e Morinës shënoi një kapitull të ri për luftën çlirimtare në Zonën Operative të Dukagjinit. Atë ditë ranë në altarin e lirisë djemtë më të zotë të Ushtrisë Çlirimtare të Kosovës. Rënia e tyre ishte goditje e madhe për rrjedhën e luftës, por ata u bënë frymëzim për mijëra ushtarë të tjerë për t’ju bashkuar radhëve të UÇK-së”, është thënë Haradinaj.

“Lavdi të gjithë atyre që luftuan dhe ranë për lirinë e Kosovës! Respekti dhe mirënjohja për sakrificën e tyre sublime do të jetë i përhershëm!”, është shprehur Haradinaj.

Partia më e madhe opozitare ka dal me një ultimatum për shefin e Qeverisë së Kosovës, Albin Kurti sa i përket zhvillimeve të fundit të krijuar tash e sa muaj në veriun e Kosovës.

Nga Partia Demokratike e Kosovës po vlerësojnë se Albin Kurti i ka dy rrugë për deeskalimin e situatës në veriun e Kosovës.

Betim Gjoshi nga ky subjekt politik ka thënë për Gazeta Blic, se shefi i qeverisë duhet me urgjencë të gjejë modelin ose rrugën për përshkallëzimin e situatës së krijuar në veriun e vendit.

“Qeveria e Kosovës duhet të gjejë zgjidhje për deeskalimin e situatës si shkaktar i kësaj situate”, ka thënë Gjoshi.

Mirëpo, Gjoshi thotë se në rast se vazhdohet me këtë situatë vendi duhet të shkoj në zgjedhje të parakohshme.

“Ose sa me parë duhet të dorëhiqet kjo qeveri dhe vendi të shkojë në zgjedhje”, tha ai.

Por dorëheqjen e Kurti apo rrëzimin e tij nuk po e kërkon vetëm PDK-ja.

Tashmë ka një nismë për mocion mosbesimi ndaj qeverisë së Kosovë të nisur nga Aleanca për Ardhmërinë e Kosovës.

Pak më parë gazeta Blic raporti se nga java e ardhshme do të ketë lëvizje konkrete për rrëzimin e Albin Kurtit nga pozita që mban.

AAK do të hartojë një draft se si mund të duket rrëzimi i qeverisë, ku do të ketë një takim mes shefave të grupeve parlamentare për harmoznimin e atij draft dhe më pas një takim mes tre liderëve të PDK, LDK dhe AAK, Memli Krasniqi, Lumir Abdixhiku dhe Ramush Haradinaj.

Në mesin e mijëra personave të vrarë gjatë luftës në Kosovë janë edhe vëllezërit Bytyqi, tre shqiptarë nga Prizreni me shtetësi amerikane të cilët u vranë në korrik të vitit 1999 në Serbi.

Ndonëse kanë kaluar 24 vjet nga vrasja e tyre, deri sot nuk ka asnjë të dënuar për këtë krim.

Kështu, Ambasada Amerikane në Beograd, në këtë përvjetor të vrasjes së tyre, ka kërkuar përgjegjësi nga shteti i Serbisë.

“Kanë kaluar 24 vjet që kur shtetasit amerikanë Ilir, Mehmet dhe Agron Bytyqi u ekzekutuan derisa ishin të paraburgosur nga policia speciale serbe. Çdo vit që kalon pa u mbajtur askush përgjegjës për këtë krim brutal lufte është një fyerje ndaj shtetit të së drejtës”.

“Shtetet e Bashkuara të Amerikës i bëjnë sërish thirrje Serbisë që të hetojë plotësisht këtë rast dhe të nxjerrë para drejtësisë ata që kanë kryer dhe kanë mbuluar këto vrasje. Ne do të vazhdojmë këtë thirrje deri në vendosjen e drejtësisë”, thuhet në postimin e Ambasadës së ShBA-së në Beograd në Twitter, raporton Klankosova.

Familja Bytyqi, më 2021 i kishte bërë thirrje administratës së presidentit amerikan, Joe Biden që të angazhohet seriozisht për zbardhjen e rastit të vrasjes së vëllezërve Bytyqi në Serbi më 1999.

“Deri më tani, ne jemi thellësisht të zhgënjyer që administrata nuk ka ndërmarrë hapa më seriozë kur mund të bëhej kaq shumë”, thuhej në një komunikatë të familjes Bytyqi.

Agron, Mehmet dhe Yll Bytyqi, shtetas amerikanë me prejardhje nga Kosova, janë arrestuar në vitin 1999 në Serbi, për shkak të, siç kanë thënë zyrtarët serbë, kalimit të paligjshëm të kufirit.

Ata janë liruar nga burgu pasi janë dënuar dhe më pas janë vrarë. Trupat e tyre janë gjetur në një varr masiv, pranë Petrovo Sellos në lindje të Serbisë, në vitin 2001.

“I bëjmë thirrje administratës së presidentit Biden që të fillojë një angazhim serioz për këtë çështje para se të jetë tepër vonë. Presidenti Biden u dha një premtim vëllezërve tanë, familjes sonë dhe komunitetit tonë. Shpresojmë që administrata e tij shpejt ta përmbushë atë premtim”, thuhet në deklaratën e familjes Bytyqi.

Aty theksohet se presidenti i Serbisë, Aleksandar Vuçiq dhe Qeveria e Serbisë, vazhdimisht kanë treguar se janë një aktor jo i besueshëm në këtë çështje “por, zyrtarët e Departamentit të Shtetit refuzojnë të pranojnë këtë fakt”.

Baza e Njësive speciale kundër terrorit të Ministrisë së Brendshme serbe në Petrovo Sello, atëbotë ishte nën komandën e Goran Radosavleviqit-Guri.

Rreth 2 vjet më parë, Serbia e nderoi të njëjtin me një medalje mirënjohjeje.

Radosavleviq është në listën e sanksioneve të SHBA-së pasi dyshohet si i përfshirë në vrasjen e vëllezërve Bytyqi.

Ambasada amerikane në Serbi kishte thënë atëbotë se Radosavleviqi “duhet të përballet me drejtësinë dhe nuk duhet të marrë medalje”.

Më 7 korrik të vitit 2021, Prokuroria për Krime të Luftës në Serbi kishte thënë se ishte duke mbledhur prova të reja me qëllim që të “përcaktohet identiteti” i autorëve të vrasjes së vëllezërve Bytyqi më 1999.

Presidenti i Shqipërisë, Bajram Begaj nga Azerbajxhani, ku po zhvillon vizitë shtetërore me ftesë të homologut të tij, Ilham Aliyev, bëri thirrje sot që Kosova dhe Serbia të respektojnë marrëveshjet për të cilat janë pajtuar.

Në konferencën e përbashkët me presidentin e Azerbajxhanit, u shpreh se prosperiteti dhe jo konflikti duhet të jenë busulla e orientimit të mbarëvarjtjes bilaterale dhe rajonale.

“Shpreha bindjen se stabiliteti rajonal në Ballkanin Perëndimor është element i domosdoshëm. Kosova dhe Serbia janë palë negociuese për zgjidhjen e çdo mosmarrëveshjeje dhe të ndërtimit të një fryme të re bashkëpunimi mes njëri-tjetrit. Respektimi i marrëdhënieve të dakordësuara nga palët si mes tyre dhe në forumet ndërkombëtare duhet të jetë pikë orientimi drejt paqes së qëndrueshme. Prosperiteti dhe jo konflikti duhet të jenë busulla e orientimit të mbarëvarjtjes bilaterale dhe rajonale. Sa më shpejt të ndodhë diçka e tillë aq më dobiprurëse do të jetë për popujt tanë.”, tha Begaj.

Tutje, Begaj foli edhe për turizmin, me ç’rast u shpreh se Shqipëria dhe Azerbajxhani e shohin këtë sektor si përparësi.

Ai po ashtu tha se heqja e vizave është një mënyrë për të afruar popujt.

“Së afërmi do të zhvillohet në Shqipëri java kulturore e Azerbajxhanit. Qytetet e Shqipërisë këto muaj mbushen plot turistë nga e gjithë bota. Ndaj, jam i bindur se java kulturore e Azerbajxahnit do të jetë një festë e vërtetë…Meqë, përmenda turizmin, të dy vendet tona e shohin turizmin përparësi, si një sektor tejet i rëndësishëm për ekonominë. Për këtë arsye, thellimi i bashkëpunimit si dhe prania e invetsimeve azere dhe në drejtimin e turizmit janë të mirëpritura. Heqja e vizave është gjithashtu një mënyrë për të afruar popujt tanë.”, tha ai.

Ndër të tjera, presidenti shqiptar tha se mendon që ka shumë arsye për të qenë krenarë për shënimin e 30-vjetorit të marrëdhënieve diplomatike Shqipëri-Azerbajxhan. Ai tha se marrëdhëniet ndërmjet vendeve janë më të mira se kurrë ndonjëherë.

Ndërkaq, presidenti i Azerbajxhanit, Ilham Aliyev u shpreh ndër të tjera se vizita e presidentit shqiptar, Bajram Begajt do të forcojë marrëdhëniet dypalëshe./KP