Category: Lajme

Një ngjarje e rëndë ka ndodhur në Prizren, ku një grua 80-vjeçare është gjetur pa shenja jete në shtëpinë e saj, ndërsa bashkëshorti i saj 81-vjeçar është arrestuar nën dyshimin për “Vrasje të rëndë”.

Rasti ka ndodhur mëngjesin e 26 gushtit, rreth orës 01:30, ndërsa pas ekzaminimit të vendit të ngjarjes, policia ka ngritur dyshimet se lëndimet në trupin e viktimës mund të jenë shkaktuar nga forca duarthatë.

Lajmin për Sinjalin e ka konfirmuar Zyra për Informim dhe Marrëdhënie me Publikun e Drejtorisë Rajonale të Policisë në Prizren.

Sipas policisë, në vendngjarje kanë dalë patrullat policore dhe ekipi i urgjencës mjekësore, të cilët kanë konstatuar vdekjen e viktimës.

Në shtëpi është gjetur edhe bashkëshorti i saj, i cili është shoqëruar në stacionin policor.

Trupi i pajetë është dërguar në Institutin e Mjekësisë Ligjore në Prishtinë për ekzaminim mjekoligjor.

Ndërkohë, 81-vjeçari është intervistuar në prani të avokatit mbrojtës dhe, me vendim të Prokurorit të Shtetit, është ndaluar për 48 orë.

Sipas evidencave të policisë, çifti nuk ka pasur raste të mëhershme të dhunës të raportuara dhe në momentin e incidentit kanë qenë vetëm në shtëpinë e tyre.

Ministri në detyrë i Punëve të Jashtme dhe Diasporës, Glauk Konjufca, ka thënë se ekziston një probabilitet i madh që të arrihet marrëveshje për zgjedhjen e presidentit të ardhshëm të Kosovës.

Konjufca ka deklaruar se takimi i radhës ndërmjet kryeministrit në detyrë, Albin Kurti, dhe kryetarit të Lidhjes Demokratike të Kosovës, Lumir Abdixhiku, pritet të zhvillohet këtë javë përmes propozimit të emrave konkretë për president.

Konjufca ka bërë të ditur se Vetëvendosje i ka tashmë emrat e saj për këtë pozitë, por nuk ka zbuluar se për cilët persona bëhet fjalë.

“Prej kur Lidhja Demokratike e Kosovës janë të gatshëm për takime dhe tashmë është paralajmëruar që takimi i radhës do të zhvillohet në formën e propozimit të emrave konkret lidhur me presidentin e ardhshëm dhe kjo e bën menjëherë që kjo është një shans e mirë dhe një mundësi e re. Prandaj, besoj se ekziston një probabilitet goxha i madh që të jemi me një president dhe me një marrëveshje për president. Meqenëse kurdo që të takohet kryeministri Kurti me kryetarin Abdixhiku mendoj do të jetë forma e negocimit. Do të takohen përmes propozimit të emrave konkret dhe prej atyre sa tyre emrave konkret unë besoj që prej tyre do të jetë edhe presidentja ose presidenti i ardhshëm i Kosovës. Mua më vjen keq që u humb java e kaluar mendoj se nuk kishte nevojë, mirëpo prapë se prapë e mirëkuptojmë këdo që ka pas nevojë për një kohë shtesë, sepse do duhet ta kuptoni që kjo nuk është një çështje që kaq e thjeshtë, partitë kanë nevojë që të vijnë tek emrat konkret sa i përket asaj se cilët do të jenë përfundimtar që do të propozohen. Lëvizja Vetëvendosje është gati, kryeministri Kurti është gati – emrat i kemi po nuk mund t’i ndaj këtu me juve, dhe LDK-ja besoj që së shpejti do të jetë gati, sepse javën e kaluar tha që kjo javë do të jetë java me të cilën ata do takohen. Kurti ende s’ka ftesë”, ka deklaruar Konjufca.

Gjykata Themelore në Prishtinë ka caktuar datën për shpalljen e aktgjykimit në rastin ndaj ministrit në detyrë të Punëve të Jashtme dhe Diasporës, Glauk Konjufca.

Aktgjykimi do të shpallet më 28 gusht, në orën 13:00.

Konjufca gjatë seancës së sotme nuk e ka pranuar fajësinë, ndërsa mbrojtja e tij ka kërkuar aktgjykim lirues.Rasti lidhet me ngjarjet e 10 gushtit 2016, kur gjatë një seance të Kuvendit të Kosovës ishte hedhur gaz lotsjellës në sallën plenare, duke ndërprerë punimet dhe detyruar deputetët dhe pjesëmarrësit e tjerë të largoheshin për shkak të tymit të krijuar.

Më 26 shkurt 2024, Gjykata Themelore në Prishtinë kishte shpallur aktgjykim lirues ndaj Konjufcës për veprën penale “Përdorimi i armës apo mjetit të rrezikshëm”, duke vlerësuar se nuk ishte provuar se ai e kishte kryer veprën për të cilën akuzohej.

Ndërkaq, për veprën penale “Pengimi i personit zyrtar në kryerjen e detyrës zyrtare”, gjykata kishte refuzuar akuzën për shkak të parashkrimit të ndjekjes penale.

Megjithatë, Gjykata e Apelit e ka prishur këtë vendim dhe e ka kthyer çështjen në rigjykim, duke bërë që rasti të shqyrtohet sërish nga Gjykata Themelore në Prishtinë.

Aktakuza ndaj Konjufcës ishte ngritur nga Prokuroria Themelore në Prishtinë më 3 shkurt 2017. Sipas prokurorisë, ai, në cilësinë e deputetit, kishte përdorur gaz lotsjellës gjatë mbledhjes së Kuvendit më 10 gusht 2016, duke pamundësuar zhvillimin normal të seancës.

Sipas përshkrimit në aktakuzë, si pasojë e përdorimit të gazit lotsjellës, pjesëmarrësit në sallë ishin detyruar të ndërprisnin qëndrimin dhe të largoheshin nga ambientet e Kuvendit.

Policia e Kosovës për 24 orë ka shqiptuar 2 mijë e 401 gjoba trafiku.

Në raportin e policisë bëhet e ditur se brenda 24 orëve janë shënuar 32 aksidente trafiku me dëme materiale dhe 20 aksidente me të lënduar.

Tutje, bëhet e ditur se për 24 orë, policia ka arrestuar 9 persona dhe 7 janë dërguar në mbajtje.

Në 24 orët e fundit është regjistruar 1 aksident me fatalitet.

Një ekip specialistësh të IShP-së nga Tirana ka mbërritur në terren, ku po kryen hetimin entomologjik dhe depistimin në vatër, me qëllim identifikimin e mushkonjave që mund të transmetojnë virusin dhe marrjen e masave të nevojshme për kontrollin e tyre, shkruan Euronews.al.

Rasti i konfirmuar i përket një 72-vjeçari nga Korça, i cili ndodhet aktualisht në Spitalin Rajonal të Korçës, ku po merr trajtimin mjekësor. I moshuari banon në qytetin e Korçës dhe dyshohet se është pickuar nga një mushkonjë gjatë qëndrimit në një lulishte, ku kalonte një pjesë të konsiderueshme të ditës.

Pas shfaqjes së shqetësimeve shëndetësore, 72-vjeçari iu drejtua spitalit, ndërsa analizat laboratorike konfirmuan infektimin me virusin e Nilit Perëndimor.

Ndërkohë, specialistët e ISHP-së po kryejnë kontrolle në zona të ndryshme të qarkut të Korçës për të evidentuar praninë e mushkonjës bartëse të virusit dhe për të përcaktuar masat që duhet të ndërmerren për frenimin e përhapjes së saj.

Në kuadër të hetimit dhe masave parandaluese, ekipet e specializuara po kryejnë edhe depistimin në vatër. Në zonat ku konstatohet prania e mushkonjave, pritet të ndërhyhet me dezinfektim dhe trajtime të posaçme.

Ethet e Nilit Perëndimor transmetohen te njerëzit kryesisht përmes pickimit të mushkonjave të infektuara. Në shumicën e rasteve, infeksioni mund të kalojë pa simptoma ose të shfaqet me temperaturë, dhimbje koke, dhimbje muskujsh, të përziera dhe të vjella.

Në rastet e rënda, virusi mund të prekë sistemin nervor dhe të shkaktojë komplikacione serioze.

Autoritetet shëndetësore vijojnë monitorimin në terren, ndërsa hetimi i ISHP-së pritet të përcaktojë shkallën e pranisë së mushkonjës bartëse në zonë dhe masat që do të ndërmerren për parandalimin e rasteve të tjera.

Një rast i dyshuar i falsifikimit të dokumentit është raportuar mbrëmjen e së martës në Aeroportin Ndërkombëtar të Prishtinës “Adem Jashari”.

Sipas njoftimit të policisë, gjatë kontrollit të dokumenteve personale dhe të automjetit, i dyshuari ka prezantuar një patentë shoferi të lëshuar nga një shtet tjetër, për të cilën dyshohet se është e falsifikuar.

Me urdhër të prokurorit, dokumenti është konfiskuar për procedura të mëtejshme, ndërsa i dyshuari është liruar dhe rasti do të trajtohet në procedurë të rregullt.

Presidenti ukrainas, Volodymyr Zelenskyy, i ka kërkuar Kinës që të luajë një rol më të fuqishëm diplomatik në përpjekjet për t’i dhënë fund luftës së Rusisë kundër Ukrainës dhe për ta sjellë Moskën në tryezën e negociatave.

Zelenskyy i bëri këto komente teksa falënderoi liderët ndërkombëtarë për urimet me rastin e 35-vjetorit të pavarësisë së Ukrainës, të shënuar më 24 gusht. Mesazhi drejtuar presidentit kinez, Xi Jinping, mori rëndësi të veçantë për shkak të rolit që Pekini mund të luajë në përpjekjet diplomatike për përfundimin e konfliktit.

Duke iu referuar marrëdhënieve mes dy vendeve, Zelenskyy theksoi se pavarësia është një vlerë e panegociueshme për ukrainasit dhe për të gjitha kombet sovrane.

“Ne mbështetemi në bashkëpunim të mëtejshëm dhe në Kinën që luan një rol të fortë diplomatik për t’i dhënë fund luftës së Rusisë kundër vendit tonë. Paqja mund të jetë arritja jonë e përbashkët”, shkroi presidenti ukrainas.

Zelenskyy falënderoi gjithashtu Xi Jinping për urimet me rastin e Ditës së Pavarësisë së Ukrainës, duke vlerësuar marrëdhëniet mes dy vendeve, të ndërtuara mbi bazën e respektit të ndërsjellë.

Administrata e presidentit amerikan, Donald Trump, ka pezulluar terminet për viza për aplikantët në mbarë botën.

Vendimi është pjesë e një fushate të vazhdueshme të Qeverisë amerikane për ashpërsimin e politikave të emigracionit gjatë mandatit të dytë të udhëheqësit republikan në Shtëpinë e Bardhë, transmeton Radio Evropa e Lirë.

Një zëdhënës i Departamentit amerikan të Shtetit tha se ka nisur një iniciativë për trajnimin e stafit në të gjitha ambasadat dhe konsullatat amerikane në mbarë botën dhe se terminet për shërbimet e vizave do të përshtaten për t’iu mundësuar punonjësve pjesëmarrjen në trajnim.

Trump ka ndjekur një politikë për dëbimin e emigrantëve dhe ashpërsimin e politikave të emigracionit, e cila përfshin revokimin e vizave dhe vizës së njohur si Green Card, si dhe refuzimin e aplikimeve për një sërë arsyesh, përfshirë qëndrimet politike dhe protestat propalestineze kundër fushatës ushtarake të Izraelit, aleatit të SHBA-së, në Gazë.

Ai argumenton se kjo fushatë synon përmirësimin e sigurisë së brendshme. Megjithatë, masat e ndërmarra nga administrata amerikane janë përballur me disa pengesa ligjore.

Ditë më parë, një gjykatë në SHBA rrëzoi një vendim të administratës Trump që pezullonte lëshimin e vizave për migrantët nga 75 shtete – përfshirë nga Kosova – duke thënë se një politikë e tillë përbënte tejkalim të kompetencave ligjore të sekretarit amerikan të Shtetit, Marco Rubio.

Departamenti i Shtetit nuk dha detaje për trajnimin që do të realizojë apo edhe afatet se kur do të mbahet, vetëm tha se ky trajnim synon t’i ndihmojë zyrtarët konsullorë të përjashtojnë aplikantët që vlerësohet se mund të bëhen të varur nga përfitimet publike në SHBA, si dhe të sigurojë që vlerësimi i aplikantëve për viza të bëhet “në mënyrë gjithëpërfshirëse dhe të njëtrajtshme”.

Pezullimi i termineve për viza u raportua fillimisht nga Financial Times, që tha se aplikantët për viza imigruese që kishin intervista të caktuara në ambasadat dhe konsullatat amerikane kishin pranuar email-e ku njoftoheshin se takimet e tyre po riplanifikoheshin dhe se do të njoftoheshin më vonë për një datë të re.

Trump gjatë fushatës presidenciale për mandatin e dytë në Shtëpinë e Bardhë premtoi se do të dëbonte miliona migrantë pa dokumente dhe administrata e tij ka ndërmarrë një sërë veprimesh që kur ai u kthye në Shtëpinë e Bardhë, masa që synojnë përshpejtimin e dëbimeve dhe uljen e numrit të kalimeve të paligjshme kufitare./REL

Një grua dyshohet se në vazhdimësi ka pësuar dhunë psikike dhe fizike nga bashkëshorti i saj.

Sipas raportit 24 orësh të Policisë së Kosovës bëhet e ditur se ngjarja ka ndodhur më 20.08.2026 rreth orës 23:00, në Skenderaj.

Tutje bëhet e ditur se viktima pas trajtimit mjekësor bashkë me fëmijët është dërguar në strehimore, ndërsa i dyshuari është sjellë në stacion dhe pas intervistimit është liruar në procedurë të rregullt.

“Skenderaj / 20.08.2026 – 23:00. Dyshohet (raportohet 25.08.2026) se në vazhdimësi viktima f/k ka pësuar dhunë psikike dhe fizike nga bashkëshorti i saj i dyshuari m/k. Viktima pas trajtimit mjekësor bashkë me fëmijët është dërguar në strehimore, ndërsa i dyshuari është sjellë në stacion dhe pas intervistimit, me urdhër të prokurorit është liruar në procedurë të rregullt”, thuhet në raport. /Telegrafi/

Irani dhe Omani kanë rënë dakord për krijimin e një korridori të përkohshëm lundrimi në Ngushticën e Hormuzit, pas një takimi në Teheran mes ministrit të Jashtëm të Omanit, Badr al-Busaidi, dhe homologut të tij iranian, Abbas Araghchi.

Në një deklaratë të përbashkët, dy vendet, të vendosura në anët e kundërta të kësaj ngushtice strategjike, njoftuan se kuadri i propozuar përfshin një rrugë të përbashkët të përkohshme për trafikun e anijeve, si dhe angazhimin për pastrimin e minave nga rruga ujore.

Deklarata shtoi se negociatat teknike do të vazhdojnë, me synimin për krijimin e një korridori të përhershëm detar dhe arritjen e një marrëveshjeje mbi administrimin e ardhshëm të ngushticës.

Zëvendësministri i Jashtëm iranian, Kazem Gharibabadi, deklaroi për televizionin shtetëror se është arritur një mirëkuptim për një rrugë të përkohshme, përmes së cilës trafiku nga Gjiri i Omanit drejt Gjirit Persik do të kalojë tërësisht nëpër ujërat iraniane, ndërsa rruga dalëse do të kalojë pjesërisht nëpër ujërat iraniane dhe pjesërisht në ujërat territoriale të Omanit.

Ai shtoi se negociatat pritet të zgjasin nga 30 deri në 60 ditë, me synimin për të arritur një marrëveshje për një rrugë të re të përhershme dhe të qëndrueshme.

Ngushtica e Hormuzit ka qenë një pikë kyçe e tensioneve në rajon. Para se Shtetet e Bashkuara dhe Izraeli të sulmonin Iranin më 28 shkurt, rreth një e pesta e naftës së tregtuar globalisht kalonte përmes kësaj rruge ujore.

Ende nuk dihet nëse Uashingtoni do ta pranojë marrëveshjen e re të arritur mes Teheranit dhe Muskatit.

Ndërkohë, presidenti iranian dhe zyrtarë të tjerë të lartë kanë zhvilluar bisedime me një delegacion pakistanez, i cili u largua nga Teherani të martën pas diskutimeve për ringjalljen e negociatave që synojnë t’i japin fund konfliktit mes Iranit dhe SHBA-së, sipas ushtrisë pakistaneze.