ATV

Category: Lajme

  • LDK mban sot mbledhjen e Këshillit të Përgjithshëm, pritet nominimi i kandidatit për kryeministër

    LDK mban sot mbledhjen e Këshillit të Përgjithshëm, pritet nominimi i kandidatit për kryeministër

    Lidhja Demokratike e Kosovës mban sot nga ora 12:00 mbledhjen e Këshillit të Përgjithshëm.

    Gjatë kësaj mbledhjeje pritet të dalin emrat e Vjosa Osmanit për presidente dhe të Lumir Abdixhikut për kryeministër.

    Ndërkohë, mbrëmë ka reaguar kryetari i LDK-së, Lumir Abdixhiku, i cili përmes një postimi në Facebook iu është drejtuar anëtarësisë së partisë, duke theksuar zotimin e tij për bashkimin e të gjitha grupeve brenda subjektit.

    Ai ka deklaruar se synon t’i bashkojë ata që kanë qëndruar në parti, ata që janë larguar, ata që kanë heshtur dhe ata që ende besojnë në LDK.

  • Policia: Kurti u kërcënua me jetë nga një adresë nga Kraleva e Serbisë

    Policia: Kurti u kërcënua me jetë nga një adresë nga Kraleva e Serbisë

    Policia e Kosovës ka bërë të ditur se Drejtoria për Hetimin e Krimit të Organizuar dhe Krimeve të Rënda ka pranuar në trajtim një informacion lidhur me një kanosje të drejtuar ndaj Kryeministrit në detyrë, Albin Kurti, e publikuar në rrjete sociale.

    Sipas njoftimit të Policisë, kanosja është adresuar përmes profilit të quajtur “Severna Brigada”, e njohur edhe si “Brigada e Veriut”, organizatë e shpallur terroriste nga institucionet e Republikës së Kosovës.

    “Drejtoria për Hetimin e Krimit të Organizuar dhe Krimeve të Rënda, më datë 08 maj 2026, ka pranuar në trajtim një informacion lidhur me një kanosje të adresuar ndaj Kryeministrit të Republikës së Kosovës, z. Albin Kurti, në rrjetet sociale nga profili i quajtur ‘Severna Brigada’”, thuhet në njoftim.

    Policia ka bërë të ditur se, në koordinim me Prokurorinë Speciale të Republikës së Kosovës (PSRK), janë ndërmarrë menjëherë veprime intensive hetimore, me mbështetjen edhe të Drejtorisë për Hetimin e Krimeve Kibernetike.

    “Në koordinim me Prokurorinë Speciale të Republikës së Kosovës (PSRK), menjëherë janë ndërmarrë veprime intensive hetimore, me mbështetjen edhe të Drejtorisë për Hetimin e Krimeve Kibernetike”, thuhet më tej.

    Nga hetimet e deritanishme është konstatuar se kanosja është publikuar përmes llogarisë në Facebook “facebook.com/severna.brigada.2025”, ndërsa sipas të dhënave të siguruara, postimi dyshohet se është bërë nga territori i Republikës së Serbisë, konkretisht nga qyteti i Kralevës.

    “Bazuar në të dhënat e siguruara, postimi është bërë nga territori i Republikës së Serbisë, konkretisht nga qyteti i Kralevës në Republikën e Serbisë. Me këtë rast janë identifikuar IP-adresa e përdorur dhe të dhënat personale të përdorura gjatë regjistrimit”, thuhet në njoftim.

    Policia e Kosovës thekson se hetimet po vazhdojnë dhe janë siguruar të dhëna shtesë që do të ndihmojnë në zbardhjen e plotë të rastit.

    “Nga analizat e kryera nga njësitë kompetente janë identifikuar të dhëna shtesë që mund të ndihmojnë në hetimin intensiv të mëtejshëm nga Policia e Kosovës dhe PSRK”, përfundon njoftimi.

  • Fundjavë me diell dhe vranësira të pjesshme

    Fundjavë me diell dhe vranësira të pjesshme

    Të shtunën mbi vendin tonë do të mbajë mot kryesisht i vranët, por me intervale të herëpashershme me diell.

    Gjatë orëve të ditës, siç ka njoftuar IHMK, vranësirat konvektive pritet që lokalisht të shoqërohen me riga shiu dhe shkarkime rrufesh, kryesisht në disa zona të kufizuara.

    Temperaturat minimale do të lëvizin ndërmjet 7–10°C, ndërsa maksimalet e ditës parashihen të lëvizin ndërmjet 16–19°C.

    Do të fryjë erë nga drejtimi i verilindjes dhe veriperëndimit me shpejtësi prej 1–11 m/s.

    Të dielën parashihet mot me vranësira të ndryshueshme dhe intervale më të gjata me diell, si pasojë e stabilizimit gradual të kushteve atmosferike.

    Temperaturat minimale do të lëvizin ndërmjet 6–9°C, ndërsa maksimalet e ditës pritet të arrijnë nga 19 deri në 22°C.

    Era do të fryjë e lehtë deri mesatare nga drejtimi i juglindjes.

    Kushtet agrometeorologjike gjatë fundjavës paraqiten përgjithësisht të favorshme për zhvillimin e kulturave bujqësore pranverore, sidomos për perimet dhe drithërat në fazat intensive të vegjetacionit.

  • Trump shpall armëpushim tre-ditor midis Ukrainës dhe Rusisë

    Trump shpall armëpushim tre-ditor midis Ukrainës dhe Rusisë

    Presidenti i ShBA-së, Donald Trump, njoftoi të premten në rrjetet sociale se do të ketë një armëpushim tre-ditor në luftën midis Rusisë dhe Ukrainës nga 9 maji deri më 11 maj për të shënuar fundin e Luftës së Dytë Botërore për rusët.

    Trump kishte thënë pas një telefonate me Putinin më 29 prill se një armëpushim i përkohshëm ishte në proces, shkruan Reuters.

    Putin njoftoi një armëpushim të ngjashëm vitin e kaluar që zgjati tre ditë, por nuk u ra dakord me Kievin.

  • Deklarata e Pavarësisë pas kauçit, OVL i reagon Bashës: Akt i poshtër, të nisin hetimet, u normalizua armiqësia ndaj themeleve të shtetit

    Deklarata e Pavarësisë pas kauçit, OVL i reagon Bashës: Akt i poshtër, të nisin hetimet, u normalizua armiqësia ndaj themeleve të shtetit

    Ish-deputetja e Vetëvendosjes, Adelina Grainca, ka publikuar sot një fotografi me ministrin në detyrë të Infrastrukturës, Dimal Basha, ku vëmendje ka marrë fakti se prapa kauçit në zyrën e Bashës shihet se është lënë për tokë Deklarata e Pavarësisë së Kosovës.

    Lidhur me këtë ka reaguar OVL-UÇK. Këta të fundit kanë thënë se fotografia e lënë mbrapa divanit, është ‘’rrëfim politik’’ dhe se, Deklarata e Pavarësisë ‘’përdhoset nga ministri i Qeverisë Kurti’’, përcjell Gazeta Express.

    ‘‘Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit’’, ka thënë mes tjerash OVL-UÇK.

    Postimi:

    Fotografia nga zyra e Dimal Bashës është rrëfim politik. Deklarata e Pavarësisë, e vulosur me sakrificë, gjak, burgime, mërgim dhe luftë, përdhoset nga ministri i Qeverisë Kurti.

    Basha nuk ka bërë thjesht një gabim protokollar. Ka shpërfaqur një vazhdimësi. Një njeri që dikur u vinte firmën shkrimeve që shpifnin kundër UÇK-së duke e quajtur kriminale, nuk mund të fshihet sot pas pakujdesisë kur simboli i shtetësisë së Kosovës nëpërkëmbet nën autoritetin e tij. I njëjti përçmim, veçse i inskenuar brenda institucioneve që ekzistojnë falë atyre që ai ka fyer.

    Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit.

    Organizata e Veteranëve të Luftës së UÇK-së, duke e dënuar këtë akt të poshtër, i kujton Qeverisë se pavarësia e Kosovës nuk është dekor. UÇK-ja nuk është material shpifjesh për oportunistët politikë që ndërtuan karrierë mbi varret e atyre që vetë i dënuan. Prokuroria e Shtetit duhet të nis hetimet. Basha duhet të sqarojë se në llogari të kujt i përdhos dokumentet me vlerë të posaçme shtetërore, e Kurti duhet të përgjigjet për kulturën antishtetërore që ka instaluar qëllimisht në qeveri.

  • Abdixhiku i drejtohet anëtarësisë: Do t’i bashkojë të gjithë, shtëpia e LDK’së do bëhet sërish një

    Abdixhiku i drejtohet anëtarësisë: Do t’i bashkojë të gjithë, shtëpia e LDK’së do bëhet sërish një

    Kryetari i Lidhjes Demokratike të Kosovës, Lumri Abdixhiku, përmes një postimi në rrjetin social në Facebook, i është ‘’zotuar’’ anëtarësisë së kësaj partie, se do t’i ‘’bashkojë të gjithë’’.

    Abdixhiku ka thënë se, ka ardhur koha që ‘’shtëpia’’ e LDK’së të bëhet ‘’sërish një’’.

    Postimi:

    Anëtarësisë së Lidhjes,

    Ju zotohem, do t’i bashkoj të gjithë.

    Ata që kanë qëndruar gjithmonë.

    Ata që janë larguar.

    Ata që kanë heshtur.

    Ata që ende besojnë.

    Sepse LDK-ja ka qenë gjithmonë më e madhe se secili prej nesh. LDK-ja ka qenë gjithmonë shtëpia e njerëzve të saj.

    Dhe koha ka ardhur që kjo shtëpi të bëhet sërish një.

  • Shukri Buja bën thirrje që Fatmir Limaj t’i bashkohet PDK: Kemi ndarë rrugëtim në momente kyçe,

    Shukri Buja bën thirrje që Fatmir Limaj t’i bashkohet PDK: Kemi ndarë rrugëtim në momente kyçe,

    Shukri Buja, nga Partia Demokratike e Kosovës, ka shprehur përkrahje për përfshirjen e Fatmir Limajt në listën e PDK’së për zgjedhjet e 7 qershorit.

    Buja, ka e cilësuar si të pakuptueshme qasjen e PDK’së, e cila, ka thënë ai, po hap dyert ‘’për këdo pa standarde të qarta politike’’, ndërsa po i mbyllen dyert për ata që kanë qenë pjesë e PDK’së.

    ‘’ Sot pranohen figura që deri dje e kanë sulmuar dhe fyer këtë parti, vetëm sepse sjellin vota. Ndërkohë, lihet anash bashkëpunimi me Fatmir Limajn dhe me struktura të NISMA Socialdemokrate, me të cilët kemi ndarë rrugëtim në momente kyçe të shtetndërtimit’’, ka thënë ai.

    Postimi:

    Të nderuara struktura, anëtarë dhe simpatizantë të Partisë Demokratike të Kosovës!

    Edhe në zgjedhjet e kaluara kam bërë thirrje që të merret seriozisht përfshirja e Fatmir Limajt në listën për deputet nga PDK dhe këtë kërkesë e përsëris sërish sot me ngulm të plotë.

    Nuk është e kuptueshme qasja që po ndjek Partia Demokratike e Kosovës, kur për hir të votave hapen dyert për këdo pa standarde të qarta politike dhe morale, ndërsa në të njëjtën kohë mbyllen dyert për ata që kanë qenë pjesë e rrugëtimit tonë politik dhe historik.

    Sot pranohen figura që deri dje e kanë sulmuar dhe fyer këtë parti, vetëm sepse sjellin vota.

    Ndërkohë, lihet anash bashkëpunimi me Fatmir Limajn dhe me struktura të NISMA Socialdemokrate, me të cilët kemi ndarë rrugëtim në momente kyçe të shtetndërtimit.

    Në kohë të vështira, nevojiten vendime më të qarta, më të drejta dhe me më shumë guxim politik.

    Koha e vendimeve të mëdha nuk duron llogari të vogla!

  • Kërcënimet e “Severna Brigada” ndaj kryeministrit, Selimi: E ndihmon Kurtin, po ndodh mes fushatës zgjedhore

    Kërcënimet e “Severna Brigada” ndaj kryeministrit, Selimi: E ndihmon Kurtin, po ndodh mes fushatës zgjedhore

    Sot, organizata terroriste serbe “Severna Brigada” ka publikuar një kërcënim me eliminim fizik të kryeministrit në detyrë, Albin Kurti.

    Lidhur me këtë, ka reaguar ish-kryediplomati, Petrit Selimi. Ky i fundit përmes një postimi në ‘’X’’, ka thënë se ky kërcënim ‘’vetëm sa e ndihmon’’ Kurtin.

    ‘’Në mes të fushatës zgjedhore në Kosovë, “organizata” sekrete serbe Severne Brigade dërgon kërcënime publike ndaj ish-kryeministrit të Kosovës, Kurti. Gjë që, natyrisht, vetëm sa e ndihmon Kurtin. E kjo më pas na çon te një ose dy pyetje të pakëndshme…’’, ka shkruar ai.

  • Kurti reagon për kërcënimet nga “Severna Brigada”: Tashmë i kemi shpallur organizatë terroriste

    Kurti reagon për kërcënimet nga “Severna Brigada”: Tashmë i kemi shpallur organizatë terroriste

    Kryeministri në detyrë i Kosovës, Albin Kurti, ka reaguar ndaj kërcënimeve të publikuara sot nga organizata “Severna Brigada”, duke thënë se ato janë dëshmi e karakterit terrorist të këtij grupi.

    I pyetur nga gazetarët lidhur me këto kërcënime, Kurti tha se pjesëtarët e kësaj organizate nuk kanë vend në Kosovë dhe se institucionet i kanë shpallur ata organizatë terroriste që në vitin 2023.

    “Po, ne i kemi shpallur ata organizatë terroriste më 29 qershor të vitit 2023 dhe këto kërcënime që i bëjnë ata janë veçse dëshmia më e re se janë ashtu siç i kemi shpallur dhe se nuk kanë vend në Republikën e Kosovës. Të gjithë pjesëtarët e të ashtuquajturave ‘Brigada Veriore’ janë kriminelë, janë terroristë, të cilët kanë bërë zullum në Kosovë në të kaluarën, por koha e tyre në Republikën tonë ka kaluar. Fatkeqësisht, ata janë të lirë dhe vazhdojnë që të kenë ndikim në Beograd”, tha Kurti.

    Ndërsa Organizata terroriste serbe “Severna Brigada” ka publikuar një kërcënim me eliminim fizik të kryeministrit në detyrë, Albin Kurti.

    Në mesazhin e publikuar nga kjo organizatë, thuhet:

    “Sa të lindë agimi mbi Kosovë, Albin Kurti do të jetë i vdekur”.

  • Emërimet e fundit të Kurtit, Cakolli me ironi: Kush po i shan ma shumë kundërshtarët, po del më me perspektivë

    Emërimet e fundit të Kurtit, Cakolli me ironi: Kush po i shan ma shumë kundërshtarët, po del më me perspektivë

    Kryeministri në detyrë, Albin Kurti, edhe ka vazhduar me emërime të tjera, ku sot ka emëruar Triera Kasumin, zëvendësministre të Ekonomisë.

    Lidhur me këtë ka reaguar Eugen Cakolli. Ky i fundit, ka ironizuar me emërimet e Kurtit, duke thënë se kushdo që po ‘’i shan më shumë kundërshtarët politikë, po dalin ma me perspektivë’’.

    ‘’Po e bon edhe ma interesant afatin kalimtar zgjedhor kjo puna e emërimeve nëpër pozita publike — kush po i shan ma shumë kundërshtarët politikë, po dalin ma me perspektivë. Merreni shtruar të nderuar, se mas zgjedhjeve, ku i dihet… mos po duhet me i fshi postimet ‘’, ka shkruar Cakolli.

    Ndryshe, Kasumi, ka reaguar për largimet që kanë ndodhur nga partia GUXO e të cilat janë bashkuar me Vjosa Osmanin, të cilat, sipas saj, largimi si ai i Haxhi Avdylit, Jeta Statovcit e Albena Reshitajt ngjanë me ato që kishin ndodhur në janarin e vitit 2018 nga LVV.

    “Për Partinë Guxo, vetëm 3 probleme më pak. Me datën 7 qershor, qytetari i mençur i kësaj Republike, jo vetëm emrat por edhe ‘’bëmat’’ do ju mbajë mend”, ka shkruar ajo.