Category: Lajme

Kujtim Gashi nga Partia Demokratike e Kosovës (PDK), ka njoftuar se në zgjedhjet e 7 qershorit nuk do të jetë kandidat për deputet.

Shala shprehet se ajo që ndodhi pas zgjedhjeve të fundit në Prizren “ka lënë zhgënjim te shumë prej nesh. Ishte e rëndë të shihje se si mundi, besimi dhe angazhimi i aq shumë njerëzve u vendosën në pikëpyetje nga një proces që nuk u ndje i drejtë. Dhe kjo, padyshim, ka lënë gjurmë edhe tek unë personalisht”, shprehet Gashi.

“Për mua politika nuk ka qenë kurrë thjesht pozitë apo ambicie personale. Ka qenë marrëdhënie me njerëzit, besim i ndërsjellë dhe përgjegjësi ndaj secilit që më ka mbështetur në këtë rrugëtim. Prandaj, në këtë moment kam ndjerë se vendimi më i drejtë është të bëj një hap pas nga gara, por jo nga angazhimi”, është shprehur ai.

“Nuk po largohem. Nuk po dorëzohem. Thjesht po zgjedh që, në këtë periudhë, të kontribuoj ndryshe, me të njëjtin përkushtim dhe me të njëjtën dashuri për Prizrenin dhe Kosovën”, ka deklaruar Gashi.

Ai shprehet se edhe pse nuk do jetë kandidat, angazhimi i tij do të vazhdojë me të njëjtin intensitet.

Postimi i plotë:

“Dua të ju them zemërplotë, po kthehem në shtëpinë time”, është kjo fjalia e Vjosa Osmanit që nxiti brohoritje të shumta në tubimin që po e mbajnë në Prishtinë me Lumir Abdixhikun.

“Nuk ka fjalim që mundet me thënë me fjalë atë që po ndjej në këto momente, megjithatë do të provoj”, u shpreh Osmani e emocionuar para parkrahësve kur mori fjalën në “Tubimin e Bashkimit”.

“Motra e vëllezër, mirë se ju rigjeta”, u tha Osmani përkrahësve të saj.

Osmani tha se gjatë tërë vizitave të saj në terren e në çdo shtrëngim duarsh, ishte vetëm një zë “kthehu në shtëpi”.

“Dua të ju them zemërplotë, po kthehem në shtëpinë time. Këtu ku nisi ëndrra e përbashkët për Kosovën e lirë, të pavaruar e demokratike, e në miqësi të përhershme me SHBA-të” .

Ajo shtoi se kanë pasur mospajtime e dallime, por “disa lidhje nuk i këputë, as koha, as distanca e as politika.

“Ky bashkim është dëshmi që dijmë të jemi më të mëdhenjë se ndasitë tona”.

Video:

Kryetari i LDK-së, Lumir Abdixhiku ka nisur fjalimin në “tubimin e bashkimit të partisë” që po mbahet në Prishtinë.

Ai u shpreh se subjekti po hyn në një fazë të re me më shumë unitet dhe vendosmëri.

“Po vijmë kësaj here më të fortë, më të bashkuar, më të përkushtuar, me zemër të plotë dhe mendje të fortë… kjo është LDK-ja jonë”, tha Abdixhiku.

Teksa tha se kësaj rruge i ka hyrë së bashku me një grua të fortë dhe të pathyeshme.

“Në këtë rrugëtim jam bashkë me një grua të fortë e te pathyeshme – me Vjosa Osmanin”, tha kreu i LDK-së.

Ish-deputetja Albena Reshitaj ka deklaruar se më 7 qershor, qytetarët do ta ndëshkojnë kryeministrin në detyrë, Albin Kurti.

Reshitaj shtoi se populli do ta mbështesë ish-presidenten Vjosa Osmani.

“ Qytetarët do ta ndëshkojnë, dhe do ta ndihmojnë Albin Kurtin me ndëshkimin që do të ia bëjnë me votë. Sepse do të reflektojë dhe do ta kuptojë që Kosova është shtet demokratik”, tha ajo në Klan Kosova.

Lidhja Demokratike e Kosovës ka reaguar ndaj asaj që e ka quajtur “sulm i organizuar kibernetik” dhe “fushatë e koordinuar e manipulimit digjital” kundër komunikimit publik të kryetarit të saj dhe thirrjeve për Tubimin e Bashkimit.

LDK përmes një reagimi në Facebook pretendon se brenda pak minutash mijëra profile të dyshimta dhe llogari të automatizuara kanë ndërhyrë në mënyrë të sinkronizuar në rrjetet sociale, me synim deformimin e perceptimit publik dhe uljen artificiale të besueshmërisë së komunikimit politik.

Sipas LDK-së, këto veprime synojnë krijimin e një atmosfere refuzimi dhe polarizimi në opinionin publik, ndërsa paralajmëron se manipulimi digjital dhe propaganda e organizuar mund të jenë pjesë e strategjive të ardhshme zgjedhore.

Reagimi i plotë:

REAGIM PËR MEDIE

Lidhja Demokratike e Kosovës shpreh shqetësimin e saj të thellë për sulmin e organizuar kibernetik dhe fushatën e koordinuar të manipulimit digjital ndaj komunikimit publik të Kryetarit të LDK-së dhe thirrjes së tij për Tubimin e Bashkimit.

Brenda pak minutash, mijëra profile të dyshimta dhe llogari të automatizuara kanë ndërhyrë në mënyrë të sinkronizuar në platformat sociale, në një përpjekje të qartë për të deformuar perceptimin publik, për të ulur artificialisht besueshmërinë e komunikimit politik dhe për të krijuar atmosferë të rreme refuzimi e polarizimi.

LDK i bën thirrje qytetarëve të Kosovës që të jenë të vetëdijshëm se kjo pritet të jetë një nga strategjitë kryesore të fushatës së ardhshme zgjedhore: rrënimi i kredibilitetit përmes manipulimit digjital, propagandës së organizuar dhe ndërhyrjeve hibride në opinionin publik.

Kjo nuk është më një garë normale politike. Kjo është një përpjekje për ta zëvendësuar debatin demokratik me operacione psikologjike e propagandistike në hapësirën digjitale.

Lidhja Demokratike e Kosovës dënon ashpër çdo ndërhyrje të tillë dhe rithekson se vullneti qytetar nuk mund të manipulohet nga ushtri profilesh false, rrjete anonime apo mekanizma propagande.

Kosova ka nevojë për zgjedhje të lira, debat të ndershëm dhe standard demokratik; jo për luftë hibride kundër mendimit të lirë dhe organizimit politik opozitar.

Kandidati për kryeministër nga radhët e LDK-së, Lumir Abdixhiku, dhe kandidatja për presidente Vjosa Osmani, janë pritur me entuziazëm në “tubimin e bashkimit”.

Dyshja, që sonte për herë të parë po paraqiten si prirës së Lidhjes Demokratike të Kosovës për zgjedhjet e 7 qershorit, përshëndetën dhe u pritën ngrohtësisht nga simpatizantët.

E tubimi nisi me himnin kombëtar, për të vazhduar me pas me fjalimet.

Korporata Energjetike e Kosovës (KEK), ka njoftuar opinionin se Njësia A4 e TC Kosova A është rikthyer me sukses në operim.

Operimi ndodhi pas përfundimit të punimeve të riparimit në sistemin gypor të kaldajës dhe krijimit të kushteve të nevojshme teknike për startim.

KEK-j ka falënderuar gjithë punonjësit, ekipet profesionale të mirëmbajtjes mekanike.

Njoftimi i plotë:

Njoftim – Rikthimi në operim i Njësisë A4 të TC Kosova A

Korporata Energjetike e Kosovës (KEK sh.a.) njofton opinionin se Njësia A4 e TC Kosova A është rikthyer me sukses në operim, pas përfundimit të punimeve të riparimit në sistemin gypor të kaldajës dhe krijimit të kushteve të nevojshme teknike për startim.

Startimi i njësisë, në përputhje të plotë me standardet teknike dhe të sigurisë, është realizuar në orët e hershme të mëngjesit, ndërsa procesi i sinkronizimit është realizuar me sukses rreth orës 09:00.

KEK shpreh falënderim të veçantë për të gjithë punonjësit, ekipet profesionale të mirëmbajtjes mekanike dhe mirëmbajtjes elektrike për profesionalizmin, përkushtimin dhe gatishmërinë e treguar gjatë gjithë procesit të sanimit dhe rikthimit të njësisë në operim.

Këto angazhime dëshmojnë përkushtimin e vazhdueshëm të KEK-ut dhe stafit të TC Kosova A për sigurimin e stabilitetit dhe besueshmërisë së prodhimit me energji elektrike.

Me respekt,

Departamenti për Marrëdhënie

me Publikun dhe Komunitete

KORPORATA ENERGJETIKE E KOSOVËS

Abelard Tahiri, ish shef i grupit parlamentar të PDK-së, njoftoi se nuk do të jetë në listën e kandidatëve për deputetë në zgjedhjet parlamentare të 7 qershorit.

“Dëshiroj t’ju njoftoj se në zgjedhjet e 7 qershorit nuk do të jem në listën e kandidatëve për deputet të Republikës së Kosovës”, shkroi ai në një postim në Facebook.

Tahiri tha se do të jetë “pranë kryeministrit Bedri Hamza” dhe do ta mbështesë PDK-në.

“Do të jem pranë Kryeministrit Bedri Hamza, duke mbështetur Partinë Demokratike të Kosovës për të arritur fitoren e merituar, një fitore që do ta çojë Kosovën përpara në rrugën e saj euroatlantike dhe do të forcojë bashkëpunimin me Shtetet e Bashkuara të Amerikës dhe Bashkimin Evropian”.

“Shpreh mirënjohjen time të sinqertë ndaj çdo votuesi dhe përkrahësi të Partisë Demokratike të Kosovës për besimin dhe mbështetjen e tyre të vazhdueshme. Përkushtimi im ndaj vlerave demokratike dhe përmirësimit të shoqërisë vazhdon, edhe pa qenë pjesë e listës zgjedhore. Faleminderit nga zemra për çdo mbështetje dhe besim!”, shkroi Tahiri.

Ish-deputetja e LDK-së, Hykmete Bajrami i ka reaguar ministrit në detyrë të Bujqësisë, Armend Muja, pas deklaratave të tij lidhur me krizën në sektorin e qumështit.

Bajrami ka thënë se sektori i bujqësisë nuk ndihmohet me deklarata, por me masa konkrete mbështetëse nga Qeveria.

“Nuk ka ligjëratë që e ndihmon sektorin e bujqësisë. Qeveria duhet ta subvencionojë qumështin – krejt zinxhirin: fermerin, përpunuesin dhe tregtarin, deri në masën që qumështi vendor të bëhet konkurrues në treg në krahasim me atë të importuar”, ka shkruar ajo.

Sipas saj, dallimi i çmimit mes qumështit vendor dhe atij të importuar duhet të jetë deri në 20 centë për litër, në mënyrë që konsumatorët të zgjedhin produktin vendor.

Ajo ka kërkuar që këto masa të vazhdojnë deri në konsolidimin e sektorit të qumështit, duke shtuar se politika të ngjashme duhet të aplikohen edhe për produkte të tjera vendore.

Reagimi i Bajramit vjen pasi Muja deklaroi se sektori i qumështit po përballet me presione të jashtme dhe se ka tendenca për zëvendësimin e yndyrave shtazore me yndyra bimore dhe qumësht pluhur.

Ish-deputeti i AAK-së, Daut Haradinaj, ka reaguar ndaj protestës së fermerëve, të cilët derdhën qumësht në rrugë dhe lumenj si shenjë pakënaqësie.

“Është për keqardhje pamjet e derdhjes së qumështit në lumenj e në rrugë, e kjo për shkak të uljes së çmimit dhe mungesës së vizionit për t’i përkrahur prodhuesit vendorë”, tha Haradinaj.

Ai kritikoi edhe shpërndarjen e fondeve publike për OJQ-të e lidhura me pushtetin.

“Sot po mbizotëron lajmi i ndarjes së 350 milionë eurove për organizatat joqeveritare të afërta me pushtetin dhe në të njëjtën kohë, fermerët protestojnë për mos trajtim. Kjo nuk do koment”, shtoi ai.

Haradinaj kërkoi masa të menjëhershme dhe kujtoi taksën 100% ndaj produkteve serbe si model mbështetjeje për prodhuesit vendorë.