Një person është arrestuar dje në rrugën “Agron Rrahmani”, në Prishtinë, pasi që para dy viteve e kishte mashtruar viktimën mashkull kosovar, ku i kishte marrë një shumë parash për t’ia kryer disa shërbime në Komunën e Prishtinës.
Sipas Policisë, me vendim të prokurorit, i dyshuari është dërguar në mbajtje.
Autoriteti ruse në Krime kanë nxjerrë në shtije rreth 100 prona ukrainase, duke përfshirë një që i përket presidentit ukrainas, Volodymyr Zelensky.
Vladimir Konstantinov, kryetari i parlamentit të Krimesë, tha se asetet e shtetëzuara do të shiten së shpejti ndërsa autoritetet tashmë kanë organizuar tetë ankandet e para për pasuritë e biznesmenëve ukrainas.
Kontratat e shitjes arritën në më shumë se 815 milionë rubla (rreth 8 milionë euro), tha Konstantinov në aplikacionin e mesazheve Telegram, raporton skynews.
Kjo listë përfshin një apartament në Jaltë të blerë nga gruaja e Zelenskyt, Olena Zelenska në vitin 2013, tha ai.
Autoritetet ruse në Krime thanë në muajin shkurt se kishin shtetëzuar rreth 500 prona në Krime, duke përfshirë disa që u përkisnin politikanëve dhe biznesmenëve të lartë ukrainas.
Krimea, e njohur ndërkombëtarisht si pjesë e Ukrainës, kontrollohet nga Moska që nga viti 2014, kur Rusia aneksoi gadishullin e Detit të Zi, tetë vjet para pushtimit të saj në pjesën tjetër të Ukrainës.
Ndryshe, Vladimir Putin për ta financuar pushtimin e Ukrainës ka nxjerrë në shitje edhe vilat e ish-presidentit të Bashkimit Sovjetik, Josif Stalin. Çmimi fillestar i vilës që gjendet në Moskë është 400 milionë euro.
Në orët e para të së premtes, është arrestuar një grua në Ferizaj, pasi që e njëjta dyshohet se ka sulmuar fizikisht nënën e saj.
Sipas raportit 24-orësh të Policisë, viktima ka pranuar trajtim mjekësor.
“Me vendim të prokurorit, e dyshuara është dërguar në mbajtje”, thuhet në raport.
Një shtëpi është përfshirë nga zjarri dje në Skenderaj, si pasojë e shpërthimit të një bombol gazi.
Sipas Policisë, gjatë shuarjes së zjarrit, një zjarrfikës ka pësuar lëndime dhe ka pranuar tretman mjekësor.
Kurse, në fshatin Bajskë të Vushtrrisë, është djegur shtëpia e ankuesit mashkull kosovar, e cila dyshohet se është përfshirë nga flaka për shkak të problemeve teknike me energji elektrike.
Njësitet policore dhe zjarrfikësi kanë dalë në vendin e ngjarjes dhe kanë lokalizuar e fikur zjarrin.
Dështimi për të arritur një marrëveshje në takimin e së enjtes në Bruksel, ndërmjet kryeministrit të Kosovës, Albin Kurti dhe presidentit serb, Aleksandër Vuçiq mund të bllokojë procesin e dialogut, thonë analistët politikë. Sipas tyre, Kurti duhet të jetë më konstruktiv që të del nga ngërçi i krijuar për sekuencimin e zbatimit të marrëveshjes së Brukselit dhe të Ohrit, derisa kërkojnë edhe nga Bashkimi Evropian që të jetë më e balancuar në raport me dy palët. Ndërkaq, kreut qeveritar i sugjerojnë që të bëjë hapa përpara në lidhje me Asociacionin, por gjithsesi brenda kornizës ligjore dhe kushtetuese të vendit.
Njohësi i procesit të dialogut, Albinot Maloku, thotë për KosovaPress, se kryeministri Kurti nuk duhet bie në grackën e Serbisë dhe të bllokojë dialogun, pasi kjo i konvenon vetëm Vuçiqit.
“Bashkimi Evropian hapin e parë që do të duhej të kishte parasysh është që të jetë më e balancuar. Në këtë rrafsh qasja e kryeministrit Kurti dhe Qeverisë së Kosovës, do të duhej të ndryshoj, pasi praktikat e procesit të dialogut kanë pasur dallimet e veta. Shkuarja në një dialog që të ketë ngërçe ende, nuk i ndihmon Kosovës, duke parë ambiciet dhe nevojat e veta. Për Serbinë kjo është jashtëzakonisht e volitshme dhe për pasojë konsideroj se Kosova duhet të ketë një qasje më kreative sesa këto metodat e deritanishme, pasi nuk po e dhënë afektin e vet”, thotë ai.
Në anën tjetër, analisti politik, Artan Muhaxhiri, thotë për KosovaPress, se Bashkimi Evropian duhet të kërkojë garanci nga Serbia për zbatimin e marrëveshjes bazë me Kosovën.
Ai po ashtu thotë se Kosova duhet të bëjë hapin e madh që ta paraqes pozicionin e saj në raport me Asociacionin.
“Kosova nuk është treguar palë konstruktive në raport me Asociacionin sepse ka vite që Shtetet e Bashkuara të Amerikës dhe BE-ja, e lusin Kosovën që të ofrojë pozicionin e saj në raport me atë si e sheh Asociacionin, gjithsesi brenda kornizës kushtetuese dhe ligjore të Kosovës. Mirëpo ka pasur një bojkot dhe injorim të plotë të kësaj teme nga ana e Kosovës, prandaj kanë ardhur edhe presionet ndërkombëtare”, thekson Muhaxhiri.
Sipas tij, masat ndëshkuese të BE-së ndaj Kosovës, nuk do të largohen derisa të ketë një vendosmëri më të madhe të Kosovës për zgjedhjet në veri.
“Nuk mund të ketë largim të bllokadës dhe deeskalim, pa garanci të forta nga ana e Qeverisë së Kosovës për zgjedhjet në veri, për infrastrukturën dhe sigurimin e të gjitha mjeteve dhe lehtësimin e procedurës së (zgjedhjeve). Gjithsesi, edhe të garancive nga ana serbe për pjesëmarrje të pakicës serbe në këto zgjedhje në veri”, shton ai.
Të enjten në Bruksel janë takuar kryeministri i Kosovës, Albin Kurti dhe presidenti serb, Aleksandër Vuçiq, mirëpo pa arritur një rezultat për zbatimin e marrëveshjes bazë Kosovë-Serbi.
Kryeministri Albin Kurti, ka thënë se takimi në Bruksel s’ka pasur asnjë rezultat për shkak të kushtëzimit të Serbisë për themelimin e Asociacionit, para zbatimit të marrëveshjes së Brukselit dhe Ohrit.
Pas takimit me presidentin serb, Aleksandër Vuçiq, kreu qeveritar tha se gjatë këtij takimi ka propozuar plan të qartë për sekuencimin e zbatimit të marrëveshjes bazë, ndërkaq pas takimit nga ndërmjetësit e dialogut iu është dhënë një dokument dy faqësh të para, gjashtë muajsh, i cili nuk flet për zbatim të marrëveshjes, por kushtëzim të saj me themelimin e Asociacionit.
Për një dokument të tillë, Kurti tha se nuk ka qenë në dijeni, derisa kritikoi lehtësuesin e dialogut, Miroslav Lajçak se ka cenuar rolin e tij në dialog duke pranuar një kushtëzim të tillë para dakordimit të marrëveshjes së Ohrit.
Në anën tjetër, përfaqësuesi i Lartë i Bashkimit Evropian për Politikë të Jashtme e Siguri, Josep Borrell, ka akuzuar kryeministrin Albin Kurti se nuk është i gatshëm të ecë përpara për themelimin e Asociacionit të komunave me shumicë serbe.
Avokatët në vend i kanë quajtur të padrejtë dhe më shumë për spektakël bastisjet e fundit nga ana e EULEX-it në shtëpitë e familjarëve të ish-pjesëtarëve të UÇK-së. Arsye sipas tyre, janë pretendimet për të gjetur gjurmë të reja që ndikojnë në gjykim dhe në dëshmitarë.
Avokati Tomë Gashi, ka thënë se formimi i Gjykatës Speciale, nuk do të duhej të lejohej që nga fillimi.
Sipas tij, kjo fuqi ekzekutive i është dhënë Gjykatës Speciale nga vetë Kosova e deri sa të kemi një gjykatë të tillë, do të kemi edhe njësi policore të EULEX-it në vend.
“Kemi pasur disa bastisje dhe së paku në tri raste, ish-pjesëtarëve të Ushtrisë Çlirimtare të Kosovës, që kanë afërsi me ata që fatkeqësisht janë duke u gjykuar në Hagë, janë marrë në intervistim nga ana e EULEX-it dhe u janë konfiskuar telefonat. Mendoj që është fare e qetë, ata po pretendojnë se mund të gjejnë gjurmë të ndikimit në gjykime apo të ndikimit në dëshmitarë, respektivisht çështjeve të cilat janë të ndaluara, sipas tyre që është pengim i drejtësisë”, ka thënë Gashi për Ekonomia Online.
Ai ka thënë se duhet pritur rezultatet e ekspertizës, për të parë se çfarë kanë gjetur nga këto konfiskime, në mënyrë që të komentohen bastisjet.
“Do të bëhen ekspertiza se a po gjejnë fakte apo jo për çështje që ata pretendojnë se janë të ndaluara. Kjo situatë më së shumti është shprehur kinse nën ndikim të gjykimeve që po bëhen në Hagë, për të cilat nuk mund të flasim deri sa t’i shohim rezultatet, se çfarë do të gjejë ekspertiza në lidhje me konfiskimin e këtyre telefonave dhe pajisjeve të tjera”, u shpreh ai.
“Këto bastisje nuk janë të drejta, por ne ja kemi dhënë një fuqi me votimin e Gjykatës Speciale në gusht të vitit 2015. Kanë kaluar më shumë se 8 vite dhe jemi në një situatë ku i kemi dhënë fuqi ekzekutive Gjykatës Speciale dhe ajo përmes pjesëtarëve të policisë së EULEX-it po kryen çështje ekzekutive, të cilat më herët nuk kanë ndodhur. Deri sa të kemi Gjykatë Speciale, do të kemi edhe njësi të policisë së EULEX-it në Kosovë”.
I pyetur nëse këto bastisje po bëhen në mungesë të provave në Hagë, sipas deklaratave të disa analistëve vendas, Gashi ka thënë se ato janë konotacione politike e se askush nuk i di të gjitha provat që i posedon Prokuroria.
“Nuk mund të themi se çfarë prova ka Prokuroria Speciale në Hagë sepse askush nuk i di, përveç çështjeve të cilat ata i kanë bërë publike. Prokuroria e ka rolin kryesor që t’i paraqesë provat e saj”.
“Janë më shumë konotacione politike. Secili që e thotë këtë duhet të ketë një bazë. Megjithatë, deklarimet janë të lira sepse ne jemi shtet demokratik. Por duhet të themi se fatkeqësia është që nga votimi i Gjykatës Speciale kur e kemi deleguar një pjesë të sovranitetit juridik në Hagë, në një shtet krejtësisht tjetër”.
Deputetët e Kosovës, siç ka thënë Gashi, kanë votuar për një gjykatë pa ditur mirë se çfarë përmban ajo, e cila është një gjykatë “anti-kombëtare, anti-shqiptare, anti-Kosovës dhe anti-UÇK”.
“Është ironike, disa nga deputetët e Kosovës që e kanë votuar atë, thuajse nuk e kanë ditur se çfarë po votojnë dhe tani kanë kundërshtime me gjykimet që po mbahen atje”.
“Duhej ta dinim në atë kohë dhe mos ta lejonim formimin e Gjykatës Speciale, e cila në prizmin tim është anti-kombëtare, sepse kemi së paku edhe një person i cili po kërkohet nga Shqipëria, që është arrestuar që më shumë se një muaj e gjysmë dhe i cili po kërkohet të transferohet në Hagë. Pra, kemi një gjykatë anti-kombëtare, anti-shqiptare, anti-Kosovës dhe anti-UÇK”.
E për avokatin Ardian Bajraktari, këto bastisje janë si rezultat i disfatës që Prokuroria po e merr nga pala mbrojtëse.
Tutje, ai i ka quajtur spektakël dhe tendencë për ta mbajtur situatën e tensionuar në raport me Dhomat e Specializuara.
“Sa i përket çështjes së veprimeve të fundit të Dhomave të Specializuara, natyrisht që ato rezultojnë veprime spektakle të ndodhura në disfatë të vazhdueshme në procesin gjyqësor i cili po zhvillohet atje. Duhet të keni parasysh faktin që deri tash, të gjithë dëshmitarët që janë dëgjuar e propozuar nga ana e Prokurorisë dhe në këtë drejtim si rezultat i përgatitjes së mirë të palës mbrojtëse të njëjtit kanë arrit të ‘shpartallohen’ raportimet të mekanizmave ndërkombëtarë janë kryesisht të ardhur si rezultat i raporteve të Qeverisë së Serbisë. Andaj veprime të tilla janë tendencë për ta mbajtur situatën të tensionuar në raport me Dhomat e Specializuara, ndryshe janë veprime normale procedurale”, u shpreh ai.
Lidhur me këto bastisje, të premten kanë protestuar edhe organizatat e dala nga lufta e UÇK-së.
Gjatë ditës së kaluar, 24 përleshje luftarake u zhvilluan në frontet në Ukrainë ndërsa ushtria ukrainase pati sukses në rajonin e Zaporozhzhia dhe Donetsk.
Forcat e Armatosura të Ukrainës raportuan përparim në zonat Verbovoy dhe Novoprokopivka të rajonit të Zaporizhzhia, si dhe në distriktin Klishchiivka, i cili ndodhet jo shumë larg Bakhmutit në rajonin e Donetsk.
Ofensiva vazhdon në drejtim të Melitopolit, ku dje ukrainasit u shkaktuan rusëve humbje të konsiderueshme në fuqi punëtore dhe pajisje ndërsa i detyruan të tërhiqen nga pozicionet e pushtuara. Në Bakhmut u regjistrua përparimi i ukrainasve dhe operacionet e pasuksesshme të rusëve.
Përleshjet luftarake u zhvilluan gjithashtu në drejtim të Kherson, Maryink në Donetsk, Avdiiv, Marin dhe Shakhtyor dhe në dy vende në rajonin e Belgorodit.
Në Maryink në Donetsk dhe Siverskyi dhe Slobozhanskyi në rajonin e Belgorodit, situata është disi më e tensionuar, duke marrë parasysh forcat e mëdha ruse në atë zonë. Ndërsa në drejtimet e mbetura ku po zhvillohen konfliktet, ukrainasit mbajnë iniciativën, sulmojnë pushtuesit dhe kthejnë territorin. Veprimet e tyre synojnë ndjeshëm shkatërrimin e depove dhe furnizimeve të ushtrisë ruse.
Rusët gjithashtu kryen granatime në të gjithë Ukrainën dje, gjatë të cilave 59 sulme ajrore dhe 36 raketa u lëshuan nga raketahedhës të shumtë. Ukrainasit theksojnë se janë sulmuar si pozicionet e Ukrainës ashtu edhe objektet civile.
Sulmi ajror rus goditi vendbanimet në rajonet Chernihiv, Kharkiv, Luhansk, Donetsk dhe Zaporozhzhia dhe më shumë se 100 vendbanime u vunë nën zjarr artilerie.
Forcat e armatosura ukrainase njoftuan humbjet ruse që nga dje duke deklaruar se kanë shkatërruar katër tanke, 10 automjete të blinduara luftarake, 16 sisteme artilerie, 24 drone. Dje u vranë 350 ushtarë, ndërsa numri i përgjithshëm i ushtarëve rusë të vrarë llogaritet në 271.790.
Një aksident ka ndodhur mëngjesin e ditës së sotme në Rrugën e Kombit në afërsi të Rubikut.
Rreth orës 07:20, në aksin rrugor Rrëshen-Rubik, automjeti tip “Chevrolet” me drejtues shtetasin malazez M. F., është përplasur me automjetin tip “Benz” me drejtues shtetasin G. L. 56 vjeç, (efektiv policie pranë Komisariatit të Policisë Mirditë i cili sapo kishte lënë shërbimin dhe po kthehej në banesë).
Si pasojë e këtij aksidenti, ka humbur jetën punonjësi i policisë shtetasi G. L.
Ndërsa drejtuesi i automjetit tjetër shtetasi M.F., ndodhet në spital për ndihmë mjekësore.
Paraprakisht, dyshohet se shkaku i aksidentit rrugor ka qenë parakalimi i gabuar në shkelje të rregullave të qarkullimit i automjetit tip “Chevrolet” që drejtohej nga shtetasi M.F.
Grupi hetimor ndodhet në vendin e ngjarjes dhe nën drejtimin e Prokurorit, vijon hetimet për zbardhjen e plotë të rrethanave dhe shkakut të aksidentit. /euronews/
Përgatiti: Arian Hajdaraj
Minutat po kalonin, derisa Faton Klinaku qëndronte vetëm disa metra larg objektit të misionit EULEX, në pritje të bashkëluftëtarëve që i kishte thirrur për të protestuar, ndaj këtij institucioni dhe Zyrës së Prokurorit të Specializuar.
Pak para orës 12:00, veteranët edhe u mblodhën duke iu përgjigjur ftesës së ushtruesit të detyrës së kryetarit të OVL-UÇK-së, për t’i kundërshtuar bastisjet e kontrollimet e telefonave të ish-ushtarëve. Ndërkohë, Policia qysh më herët ishte mobilizuar.
Në protestë, u panë edhe anëtarë të Partisë Social Demokrate, të cilët veç tjerash sollën edhe një qese plot me telefona, që më vonë do t’iu shërbenin.
“ZPS-ja në Hagë, në mungesë të fakteve, vazhdon me filmat e saj. Kjo gjë kështu siç po bëjnë këta të panjohur për ne, po bëhet në shtetin tonë, sikur dikur në kohën e pushtuesit, dhe institucionet tona vetëm po heshtin. Kërkojmë që shteti të merret seriozisht me këtë dhe të mos lejojë që personat civilë, qofshin të ZPS-së apo EULEX-it, pa Policinë e Kosovës, të na hyjnë në shtëpi, sepse përndryshe do të ketë reagime të vazhdueshme të qytetarëve”, tha Klinaku.
Pas kësaj deklarate erdhi momenti i përdorimit të telefonave…
Për kryetarin e PSD-së, Dardan Molliqaj, aksionet e ZPS-së në kohën kur në pushtet është Lëvizja Vetëvendosje, nuk janë të rastësishme.
“Nuk është e rastësishme, kjo nuk ka ndodhë asnjëherë nga asnjë qeveri, kemi sulm të drejtpërdrejtë nga Dhomat e Specializuara për t’i shantazhuar ushtarët e UÇK-së dhe kemi heshtje dhe denigrim të dinjitetit të kategorive të dala nga lufta. Ky është një koordinim i dyanshëm i dëmshëm dhe i rrezikshëm për atë që ne e quajmë vlerën sublime të shteti të Kosovës, që është UÇK-ja”, tha Molliqaj.
Veprimet e zyrtarëve të ZPS-së, veteranët i krahasuan me ato të ish-regjimit.
“Janë duke bërë më keq se ish-regjimi. Me maska të hyjnë nëpër shtëpi për të marrë dokumentacione e telefona…”, tha Afrim Sogojeva, ish-luftëtar i Brigadës 114.
Sipas një ish-luftëtari të Brigadës 112, këto kontrolle shumë më lehtë do t’i pranonin nga Policia e Kosovës.
“Ne jemi çlirimtarë, e jo kriminelë… nuk ka nevojë me na i marrë telefonat në tavolinë… Por, më mirë është që me na kontrollu policia jonë, se këta të EULEX-it…”, tha Muhadin Demaj, ish-luftetar i Brigarës 112.
Duke filluar nga e marta, zyrtarët e Zyrës së Prokurorit Special bastisën banesën e dëshmorëve Bahri e Fahri Fazliu, shtëpinë e ish-luftëtarit Behar Berisha, i intervistuan dhe ua kontrolluan telefonat Rrustem Mustafës, Nait Hasanit dhe vëllait të Salih Mustafës.
Përgatiti: Arton Hamiti
Bashkimi Evropian ka mohuar pretendimet e kryeministrit Albin Kurti se vetëm ai ka paraqitur një propozim të sekuencuar për zbatimin e marrëveshjes për normalizimin e raporteve mes Kosovës dhe Serbisë.
Madje, propozimi që sipas BE-së është refuzuar nga pala kosovare, teksa është pranuar nga ajo serbe, tashmë është publik.
Zbatimi i planit të Bashkimit Evropian, sipas këtij propozimi, do të niste me Hapjen e negociatave për Statutin e instrumenteve për vetëmenaxhim të serbëve në Kosovë, që nënkupton Asociacionin e Komunave. Paralelisht, Serbia nuk do të insistonte në përdorimin e fusnotës, apo pjesëmarrjen e UNMIK-ut në forumet rajonale.
Pas përmbylljes se negociatave për Statutin e instrumenteve të vetëmenaxhimit, hapi i radhës, parasheh që palët të mos ndërhyjnë në punët e brendshme të njëra-tjetrës dhe të përmbahen nga çdo formë e dhunës.
Sipas BE-së, më vendosjen e mekanizmave të vetëmenaxhimit për serbët, ndërpriten strukturat e administruara nga duke u transformuar në instrumentet e vetëmenaxhimit. Kjo do të pasohej nga njohja e dokumenteve dhe simboleve shtetërore.
Hapi tjetër i radhës do të ishte marrëveshja për një udhërrëfyes të obligueshëm për zbatimin e obligimeve që dalin nga marrëveshjet e kaluara.
Formalizmi i statutit të Kishës Ortodokse të Serbisë në Kosovë” do ta përbënte veprimin e radhës, pasuar nga aranzhimet praktike për shkëmbimin e misioneve të përhershme. Serbia, pas kësaj, nuk do të kundërshtonte anëtarësimin e Kosovës në asnjë organizatë ndërkombëtare, ndërsa Kosova do të kompletonte procedurën e brendshme për mbrojtjen e objekteve kulturore dhe fetare serbe.
Po ashtu, sipas propozimit të BE-së, do të vendosej një grup i veçantë i punës, i udhëhequr nga Bashkimi Evropian, për zbatimin e neneve të marrëveshjes. Kurse, pas kësaj, do të pasonte organizimi i konferencës së donatorëve dhe përgatitja e projekteve nga palët.
Si veprim i fundit, parashihen negociatat për marrëveshjen ligjërisht obliguese për normalizimin gjithëpërfshirës të raporteve.
Kurse, udhërrëfyesi i sekuencuar për zbatimin e Marrëveshjes bazë për normalizimin e marrëdhënieve, i prezantuar nga kryeministri Albin Kurti, për dallim nga ai i Bashkimit Evropian, nis me Deklaratën për të Zhdukurit.
Në dy pikat e tjera behet fjalë për prezantimin e draftstatutit të Ekipit Menaxhues dhe atë të ndërmjetësit. Kryeministri ka propozuar që Josep Borrell, t’i ndajë Marrëveshjet me Sekretarin e Përgjithshëm të OKB-së ku të dyja palët janë pajtuar me parimet e përcaktuara në Kartën e Kombeve të Bashkuara.
Njohja e dokumenteve respektive dhe simboleve kombëtare, përfshirë pasaportat, diplomat, targat, vulat doganore janë në pikën e radhës së propozuar nga Kurti.
Themelimi i instrumentit të vetëmenaxhimit për serbët e Kosovës, në ketë propozim, është listuar si veprimi i katërmbëdhjetë.