Category: Lajme

Kandidatja e PDK’së për deputete, Ganimete Musliu, tha se numrat në listën zgjedhore nuk janë të rëndësishëm derisa përballë kanë kundërshtarë politikë si Albin Kurti e Vjosa Osmani.

Për këta dy, Musliu tha se janë “të gatshëm të shkelin gjithçka për të përmbushur apetitet e tyre për pushtet”.

“Prandaj në këtë përballje, numri në listën zgjedhore nuk është ai që ka rëndësi. Ajo që ka rëndësi janë kauzat për mbrojtjen e demokracisë dhe shtetësisë së Republikës së Kosovës. Dhe sot, jam më e gatshme se kurrë të përballem me betejën që na pret. Zgjedhjet zgjasin një ditë, por pasojat e rezultateve të tyre mbeten për vite me radhë”, ka shkruar Musliu.

Ajo tha se kanë pasë edhe një bisedë me kreun e partisë, Bedri Hamza, për renditjen e kandidatëve në listë.

“Edhe pse, në pesë zgjedhje radhazi, vota e qytetarëve më ka renditur ndër 10 kandidatët më të votuar, unë kurrë nuk kam këmbëngulur në një numër, sepse pa punë të sinqertë dhe angazhim maksimal, një numër mbetet vetëm një numër. Për mua, beteja nuk ka qenë kurrë për numra, privilegje apo rehati politike. Beteja dhe angazhimi im gjithmonë kanë qenë, dhe mbeten, për besimin e popullit, dinjitetin e përfaqësimit dhe rrugën që i duhet Kosovës”.

Postimi i plotë:

Në ditët e tij më të vështira, Hashim Thaçi ngriti grushtin lart si simbol se vetëm të bashkuar mund të mposhtim çdo kundërshtar, çdo padrejtësi dhe çdo përpjekje për të njollosur të kaluarën, të tashmen dhe të ardhmen e këtij vendi.

Edhe në këto zgjedhje, ashtu si në ato të mëparshmet, ka pasur shumë interesim nga profesionistë dhe kuadro të fushave të ndryshme për t’u bërë pjesë e listës së PDK-së.

Kjo mbart një rëndësi të veçantë sepse, pavarësisht degradimit ekstrem të politikës në Kosovë, PDK vazhdon të mbetet adresa më serioze për njerëzit që besojnë në një Kosovë demokratike dhe duan të kontribuojnë në zhvillimin e saj.

Në një bisedë të sinqertë me Kryetarin Hamza, u diskutua edhe renditja e kandidatëve brenda 10-shes së parë të partisë.

Edhe pse, në pesë zgjedhje radhazi, vota e qytetarëve më ka renditur ndër 10 kandidatët më të votuar, unë kurrë nuk kam këmbëngulur në një numër, sepse pa punë të sinqertë dhe angazhim maksimal, një numër mbetet vetëm një numër.

Për mua, beteja nuk ka qenë kurrë për numra, privilegje apo rehati politike. Beteja dhe angazhimi im gjithmonë kanë qenë, dhe mbeten, për besimin e popullit, dinjitetin e përfaqësimit dhe rrugën që i duhet Kosovës.

Bazuar në këto bindje, edhe nëse nuk do të isha fare pjesë e listës, do të isha përsëri e gatshme të jepja maksimumin tim për Partinë Demokratike të Kosovës, sepse është partia e kauzave dhe vlerave më të mëdha të kombit dhe shtetit.

Për mua, politika nuk është thjesht një garë personale; është një mision, një përgjegjësi dhe një detyrim ndaj njerëzve që më kanë besuar gjatë viteve. Besimi dhe respekti nuk mund të blihen ose të imponohen. Ato fitohen përmes përkushtimit, mirënjohjes dhe përulësisë ndaj të gjithë atyre që vazhduan të më mbështesnin edhe kur emri im u shfaq nën numrin 81 në listë.

Prandaj, pavarësisht se vlerësohem shumë nga votuesit e PDK-së dhe vlerësohem nga institucionet monitoruese të Kuvendit si një nga deputetët më aktivë të partisë, edhe këtë herë kam pranuar me krenari dhe përgjegjësi numrin 12.

Jam plotësisht e vetëdijshme se po përballemi me kundërshtarë politikë si Albin Kurti dhe Vjosa Osmani të cilët nuk njohin as moral politik, as rregulla, as ligje, as kufizime, dhe që janë të gatshëm të shkelin gjithçka për të përmbushur apetitet e tyre për pushtet.

Prandaj në këtë përballje, numri në listën zgjedhore nuk është ai që ka rëndësi.

Ajo që ka rëndësi janë kauzat për mbrojtjen e demokracisë dhe shtetësisë së Republikës së Kosovës. Dhe sot, jam më e gatshme se kurrë të përballem me betejën që na pret.

Zgjedhjet zgjasin një ditë, por pasojat e rezultateve të tyre mbeten për vite me radhë.

Prandaj, me përulësi, i ftoj të gjithë mbështetësit, anëtarët dhe strukturat udhëheqëse të PDK-së dhe përtej tyre edhe të gjithë qytetarët e Republikës së Kosovës që të bashkohen në mënyrë që më 7 qershor të dalim fitimtarë për Kosovën dhe për demokracinë.

Partia Demokratike është e dëshmuar. Të gjitha sukseset e Republikës së Kosovës, qoftë në politikën e brendshme qoftë në atë të jashtme mbajnë vulën e PDK-së.

Kjo është fakt dhe unë jam krenare që jam pjesë e këtyre sukseseve.

Çmimi i naftës ka arritur nivele rekord në disa shtete të SHBA-së, duke shënuar një rritje të paprecedentë në tregun e energjisë.

Sipas AAA, të mërkurën është raportuar se çmimi mesatar i naftës ka arritur nivelet më të larta historike në katër shtete të Midwest-it: Wisconsin, Michigan, Illinois dhe Indiana.

Rritja e fundit lidhet me një kombinim faktorësh, përfshirë çmimet e larta të naftës së papërpunuar, ndërprerjet në disa rafineri dhe faktin se rafineritë po i japin përparësi prodhimit të karburantit për avionë në vend të naftës dhe benzinës.

Nafta është një komponent kyç i ekonomisë amerikane, pasi përdoret për traktorë, kamionë, autobusë, trena dhe anije. Për këtë arsye, rritja e çmimeve mund të ndikojë drejtpërdrejt në rritjen e kostos së transportit dhe ushqimeve, duke rritur çmimet për konsumatorët.

Në nivel kombëtar, çmimi mesatar i një gallon nafte ka arritur në 5.66 dollarë, një rritje prej rreth 60% krahasuar me vitin e kaluar. Ky nivel po i afrohet rekordit historik prej 5.82 dollarësh të regjistruar në qershor 2022.

Rritja është edhe më e theksuar në disa shtete: Indiana: +72% në 6.13 dollarë për gallon, Illinois: +74% në 6.13 dollarë për gallon, Michigan: +77% në 6.13 dollarë për gallon, Wisconsin: +82% në 5.87 dollarë për gallon, shkruan CNN.

Sfondi i panjohur pas shuplakës së Brigitte Macron ndaj presidentit francez, në maj 2025, që shkaktoi një debat global, zbulohet nga redaktori politik i revistës ‘Paris Match’, Florian Tardif, në librin e tij të titulluar “Një çift (pothuajse) perfekt”, për të cilin ai foli me më shumë se 70 burime, përfshirë Zonjën e Parë të Francës.

Në imazhet e kapura nga kamerat pas mbërritjes së Emmanuel Macron dhe gruas së tij në aeroportin e Hanoi, Vietnam, si pjesë e një turneu në Azi, kur dera e avionit ishte hapur, dy duar që i përkisnin Brigitte Macron u ulën mbi fytyrën e presidentit francez, ndërsa ai e kuptoi se kamerat i “kapën” ato, duke u përpjekur të përshëndeteshin në mënyrë të ngathët.

Sipas asaj që Tardif shkroi në libër dhe tha në një intervistë radiofonike, incidenti u shkaktua nga mesazhet me tekst në telefonin celular të Emmanuel Macron, që Brigitte Macron pa.

Sipas gazetarit francez, “ajo që ndodhi ishte se Brigitte Macron pa një mesazh nga një person i famshëm, aktorja iraniane Golfitech Farahani”.

Ai këmbëngul se bëri kërkime të gjera për të verifikuar këtë pretendim:

“E shkruaj emrin sepse kishte thashetheme që qarkullonin në Paris. Ajo që po shkruaj nuk është thashethem. E bëra të qartë në Elize se nuk është versioni i tyre.”

“Je shumë e bukur”

Tardif tha gjithashtu se “presidenti francez kishte një lidhje dashurie platonike me aktoren për disa muaj. Ma kishin thënë këtë vazhdimisht. Mesazhet që më treguan ishin mjaft të avancuara, të stilit “je shumë e bukur”, etj.”.

“Këto mesazhe çuan në tensione që përfunduan me grindjen private që u bë publike, pasi në një moment u krijua përshtypja se gjithçka ishte për shkak të një keqkuptimi – një keqkuptim veçanërisht serioz që kishte mbaruar. Përveç se nuk ndodhi kështu”, pohon gazetari i Paris Match.

Në intervistën e tij, gazetari francez tha se Pallati Presidencial Francez “u pendua” për taktikat e komunikimit që ndoqën pas episodit:

“Sot ata u penduan për reagimin e tyre sepse mund të kishin dhënë imazhin se Brigitte dhe Emmanuel Macron ishin një çift “normal” dhe jo një çift perfekt. Në fund të fundit, ky ishte rrëfimi që na jepnin që nga fillimi i mandatit të Macron”.

Kujtohet se kur u publikua videoja, reagimi i parë i Pallatit Élysée ishte se imazhet nuk ishin autentike, ndërsa më vonë një bashkëpunëtor i ngushtë i presidentit francez foli për një grindje të zakonshme për çiftet.

Më pas, edhe shoqëruesit e Macron vazhduan me një version të ri, duke komentuar se ishte një moment “kur presidenti dhe gruaja e tij po relaksoheshin për herë të fundit para fillimit të udhëtimit, duke luajtur”

I njëjti burim foli më pas për një moment shoqërie dhe ia atribuoi komentet negative kryesisht qarqeve miqësore me Rusinë../Figaro

Studentët shqiptarë të Fakulteteve Juridike nga të tri universitetet me mësim në gjuhën shqipe (UT, UNT dhe UEJL) kanë paralajmëruar protestën e dytë radhazi në mbrojtje të përdorimit të gjuhës shqipe në provimet shtetërore.

Përmes një njoftimi publik, ata bëjnë thirrje për mobilizim qytetar, duke caktuar tubimin për më 18 maj (e hënë), në ora 16:30, para Urës së Gurit në Shkup.

“Mos mungo, dil mbroje gjuhën!”, thuhet në thirrjen e studentëve, të cilët kërkojnë mbështetje më të gjerë për kauzën e tyre.

Papa Leo i XIV i ka akorduar Mohammad Hossein Mokhtarit, ambasadorit të Iranit pranë Selisë së Shenjtë, dekoratën kalorësiake “Kryqi i Madh i Urdhrit Papnor të Piut IX”, sipas certifikatës së datës 8 maj.

Bëhet fjalë për një nga nivelet më të larta të një prej dekoratave më të larta aktive papnore, e cila është themeluar në vitin 1847 nga Papa Piu IX dhe sot u jepet kryesisht diplomatëve të lartë dhe krerëve të shteteve.

Në tekst theksohet se një çmim i tillë nuk është i pazakontë, pasi sipas praktikës së Vatikanit, ambasadorëve rezidentë pranë Selisë së Shenjtë shpesh u jepet pas rreth dy vitesh shërbimi.

Mokhtari i kishte dorëzuar letrat kredenciale Papa Françeskut në dhjetor të vitit 2023, ndërsa certifikata e 8 majit është nënshkruar nga kardinali Pietro Parolin, sekretari i shtetit i Vatikanit.

Mediat shtetërore iraniane, përfshirë PressTV dhe West Asia News Agency, këtë veprim nuk e paraqesin si një vlerësim rutinë diplomatik, por si një sinjal politik nga papa amerikan për presidentin amerikan, Donal Trump në kohë lufte dhe tensionesh mes Uashingtonit dhe Teheranit.

Autori thekson se disa konservatorë amerikanë e kanë kritikuar vendimin në rrjetet sociale. Në të njëjtën kohë, përmendet se Trump më herët ka ashpërsuar retorikën ndaj Iranit, duke e vlerësuar armëpushimin me këtë vend si të paqëndrueshëm dhe duke lënë të hapur mundësinë e veprimeve të reja ushtarake.

Në tekst gjithashtu theksohet se Vatikani nuk po jep mbështetje politike apo morale për Republikën Islamike. Papa Leoni i XIV më herët ka dënuar vrasjen e protestuesve në Iran dhe ka deklaruar: “Kur një regjim, kur një vend, merr vendime që u marrin jetën padrejtësisht njerëzve, atëherë kjo është diçka që duhet dënuar”.

Sipas të njëjtit burim, diplomacia e Vatikanit e interpreton këtë dekoratë si pjesë të gjuhës së dialogut dhe ruajtjes së kanaleve të hapura të komunikimit, dhe jo si miratim të politikave të Teheranit. /Telegrafi/

Një situatë e rëndë shëndetësore në anijen turistike MV Hondius ka shkaktuar alarm ndërkombëtar, pasi pasagjerë amerikanë janë kthyer në Shtetet e Bashkuara pas një shpërthimi të dyshuar të hantavirusit. Sipas raportimeve, më 11 maj pasagjerët amerikanë u evakuuan dhe u kthyen në SHBA, pasi anija ishte përfshirë në një emergjencë shëndetësore që çoi në vdekje dhe raste të konfirmuara ose të dyshuara të infeksionit. Të paktën tre persona kanë humbur jetën, ndërsa 11 të tjerë janë vendosur në karantinë dhe nën monitorim mjekësor të rreptë. Pas ankorimit të anijes në Ishujt Kanarie, udhëtarët u transportuan me avionë ushtarakë dhe qeveritarë, ndërsa ekipet mjekësore në veshje mbrojtëse i shoqëruan deri në tokë në Tenerife.

Autoritetet kanë vendosur që pacientët të qëndrojnë në izolim për 42 ditë, sipas protokolleve të monitorimit për sëmundje infektive, ndërsa struktura mjekësore në Nebraska është angazhuar për ndjekjen e rasteve amerikane. Në këtë kontekst, në rrjetet sociale është rikthyer një teori e njohur që lidh ngjarjen me serialin e animuar The Simpsons, i cili prej vitesh është bërë objekt diskutimesh për “parashikime” të ngjarjeve reale.

Sipas këtyre pretendimeve, skenari i një shpërthimi virusal në një anije turistike nuk është i ri për serialin. Mbështetësit e teorisë kujtojnë se në një episod të vitit 2012 (Sezoni 23, Episodi 19), The Simpsons kanë paraqitur një situatë shumë të ngjashme: një anije turistike ku pasagjerët përballen me një emergjencë biologjike dhe një virus vdekjeprurës që përhapet me shpejtësi, duke shkaktuar panik dhe karantinë.

Në atë episod, gjatë një transmetimi emergjent, një figurë ushtarake paralajmëron pasagjerët për përhapjen e një virusi dhe kërkon që anija të mos lejohet të zbresë në port, ndërsa situata përshkruhet si një krizë globale shëndetësore. Përkrahësit e teorive konspirative theksojnë se ky skenar “i parashikuar” në 2012 ngjan çuditërisht me ngjarjet aktuale në MV Hondius.

Po ashtu, fansat e serialit kujtojnë se The Simpsons ka “parashikuar” më herët edhe ngjarje të tjera globale, si presidencën e Donald Trump, përdorimin e orëve inteligjente dhe teknologjinë e video-thirrjeve, duke e forcuar më tej mitin e “parashikimeve” të tij.

Megjithatë, ekspertët theksojnë se këto ngjashmëri janë rastësi narrative të një seriali satirik që shpesh përdor ekzagjerimin dhe skenarë futuristë, dhe jo parashikime reale të ngjarjeve botërore. Autoritetet shëndetësore ndërkohë vijojnë hetimet për të përcaktuar burimin e saktë të shpërthimit dhe për të garantuar sigurinë e pasagjerëve të tjerë të përfshirë.

Togeri i Policisë së Kosovës nga radhët e nacionalitet serb, Bojan Jevtiq, përmes platformës “WhatsApp” dhe “Telegram”, akuzohet se i ka dërguar BIA-s serbe dokumente zyrtare të klasifikuara që ndërlidhen me sigurinë kombëtare dhe rendin kushtetues të Kosovës.

Kështu është bërë e ditur në aktakuzën e redaktuar të Prokurorisë Speciale të ngritur ndaj Jevtiqit, ku thuhet se veprimet e pretenduara të tij kanë cenuar rëndë sigurinë kombëtare dhe rendin kushtetues, raporton Kosova Press.

“Nga një periudhë kohore e pacaktuar e deri më datë 17.07.2025, respektivisht deri në momentin e arrestimit të tij, i pandehuri [e redaktuar], në cilësinë e zyrtarit policor me gradën toger dhe në detyrën e Shefit të Sektorit të Operativës në Stacionin Policor Kufitar [e redaktuar], me dashje dhe në mënyrë të vazhdueshme, ka mbledhur, siguruar dhe transmetuar informacione dhe dokumente zyrtare të klasifikuara si ‘Konfidencial’ dhe ‘Sekret’, që ndërlidhen me sigurinë dhe rendin kushtetues të Republikës së Kosovës”, thuhet në aktakuzën për Bojan Jevtiqin.

Në aktakuzë po ashtu thuhet se me Jevtiqi, përveç dërgimit të mesazheve në “WhastApp” dhe “Telegram”, është takuar fizikisht disa herë në Beograd me zyrtarin e BIA-s me nofkën “Qira”.

Prokuroria Speciale po ashtu i ka propozuar gjykatës që Jevtiqit t’i ndalohet ushtrimi i funksioneve në administratën publike në kohëzgjatje prej 5 vjetëve, vazhdimin e masës së paraburgimit, konfiskimin e një arme, parave të gatshme në vlerë prej 2 milionë dinarë, 500 franga si dhe 7 mijë e 3 euro, si pasuri e fituar me kryerjen e veprës penale “Spiunazhi”.

Në një shtëpi të pa banuar janë gjetur dhe sekuestruar 297 fishekë dhe një uniformë me logo të Serbisë.

Sipas raportit 24 orësh të Policisë së Kosovës bëhet e ditur se rasti ka ndodhur të martën rreth orës 17:00, në Zubin Potok.

“Raportohet se në një shtëpi të pa banuar janë gjetur dhe sekuestruar 297 fishekë dhe një uniformë me logo të Serbisë”, thuhet në raport.

Tutje bëhet e ditur se rasti është duke u hetuar nga ekipet relevante policore.

Në 45-vjetorin e rënies heroike të Tahir dhe Nebih Mehës, Organizata e Veteranëve të Luftës së UÇK-së përkujtoi me nderim jetën, veprën dhe qëndresën e tyre.

Përmes një postimi në Facebook, OVL e UÇK-së tha se sakrifica e familjes Meha mbetet një nga simbolet më të fuqishme të rezistencës shqiptare.

“Sot, në 45-vjetorin e rënies heroike të Tahir dhe Nebih Mehës, OVL UÇK përkujtoi me nderim jetën, veprën dhe qëndresën e tyre të pavdekshme për liri dhe dinjitet kombëtar”.

“Sakrifica e familjes Meha mbetet një nga simbolet më të fuqishme të rezistencës shqiptare, frymëzim i përhershëm për brezat që luftuan dhe vazhdojnë ta duan atdheun me të njëjtin ideal. Lavdi”, thuhet në njoftimin e organizatës.