ATV

Category: Lajme

  • ​Shevchenko emërojet këshilltar i Zelenskyt

    ​Shevchenko emërojet këshilltar i Zelenskyt

    Andriy Shevchenko konsiderohet futbollisti më i mirë ukrainas i të gjitha kohërave dhe së fundmi ka drejtuar Genoan në Itali.

    Por, nga tani e tutje, ish-sulmuesi i Milanit do të jetë këshilltar politik i presidentit të Ukrainës Volodimir Zelensky, përcjellë KosovaPress.

    Shevchenko është një nga futbollistët më të famshëm në historinë e Ukrainës. Ai dikur luajti për klubet më të mira evropiane si AC Milan dhe Chelsea. Futbollisti u bë disa herë golashënuesi më i mirë në kampionatin italian, fitoi Champions League dhe Superkupën e Evropës.

    Shevchenko gjithashtu fitoi Topin e Artë në vitin 2004 dhe u votua si sulmuesi më i mirë i UEFA-s në vitin 2006.

  • Sveçla publikon edhe një dokument: Vërtetim që ushtria e Serbisë i ka dhënë grupit me rastin e dorëzimit të lansuesit të granatave

    Sveçla publikon edhe një dokument: Vërtetim që ushtria e Serbisë i ka dhënë grupit me rastin e dorëzimit të lansuesit të granatave

    Ministri i Punëve të Brendshme, Xhelal Sveçla ka publikuar edhe një dokument ku thotë se është vërtetim që ushtria e Serbisë i ka dhënë grupit me rastin e dorëzimit të lansuesit të granatave, që më pas u zu nga Policia e Kosovës në aksionin e 24 shtatorit.

    Sveçla ka shtuar se atë që e kanë deklartuar në vazhdimësi tash po e mbështesim edhe me fakte e dokumente.

    “Shtohen një pas një dëshmitë e lidhjes zyrtare mes shtetit të Serbisë dhe grupit terrorist që kreu vrasjen e policit Afrim Bunjaku dhe përgatitjen e aksionit kundër rendit kushtetues me qëllim destabilizimin e Republikës së Kosovës”, shkruan Sveçla.

    Shkrimi i plotë:

    Shtohen një pas një dëshmitë e lidhjes zyrtare mes shtetit të Serbisë dhe grupit terrorist që kreu vrasjen e policit Afrim Bunjaku dhe përgatitjen e aksionit kundër rendit kushtetues me qëllim destabilizimin e Republikës së Kosovës.

    Ky dokument është vërtetim që ushtria e Serbisë i ka dhënë grupit me rastin e dorëzimit të lansuesit të granatave, që më pas u zu nga Policia e Kosovës në aksionin e 24 shtatorit.

    Atë që e kemi deklaruar në vazhdimësi tash po e mbështesim edhe me fakte e dokumente të pakontestueshme se shteti i Serbisë mbështet këto grupe terroriste politikisht, financiarisht, logjistikisht.

  • Ky do të jetë fundi i Vuçiqit, sipas Limajt

    Ky do të jetë fundi i Vuçiqit, sipas Limajt

    Kryetari i Nisma’s Socialdemokrate, Fatmir Limaj, në emisionin CONTEXT në ATV, tha presidenti Vuçiq tani i ka ngarkesë ata që i ka dërguar në Kosovë.

    Sipas Limajt, fundi i Vuçiqit do të jetë, ose ky i fundit do ti likuidoi ata, ose ata do ta likuidojnë këtë.

    “Vazhdimisht ka politikë shantazhuese, prandaj Vuçiqi thotë unë nuk e njoh kurrë Kosovën, se karta e vetme që e mban në pushtet Vuçiqin është Kosova. Ekonominë e ka llom, politikën e ka llom, mediat i ka llom, demokracinë i ka llom, çdo send e ka llom në Serbi, kurrë Serbia nuk ka qenë më keq. Çka e mban Vuçiqin atje, vetëm karta nacionaliste, veç Kosova. Nuk përfundon ai punë me Kosovën sepse duhet me shku në shtëpi. Në fakt ata kurrë nuk përfundojnë në shtëpi, njerëzit e tillë, sepse nuk është duke e bërë punën dhe ka me pasë telashe me të vet. Sot i ka ngarkesë ata që i ka çun ë Kosovë, i ka ngarkesë. Ja ai ka me i likuidu ata, ja ata këto. Kështu përfundojnë këto situata, kur ju bëni martesë me krimin, ky është përfundimi i juaj, me nëntokën. S’ka qare pa përfundu kështu. /atvlive.tv

  • Zelensky thotë se trupat ukrainase po “përparojnë” në Donjeck

    Zelensky thotë se trupat ukrainase po “përparojnë” në Donjeck

    Presidenti ukrainas, Volodymyr Zelensky, tha se forcat ukrainase po bëjnë përparim kundër forcave ruse në rajonin lindor të Donjeckut, përderisa Moska ka kryer sulme të reja me artileri në rajonin jugor të Nikopolit dhe Hersonit gjatë natës, duke plagosur civilë dhe duke shkaktuar dëme nëpër shtëpi dhe infrastrukturë.

    “Po përparojmë në drejtim të Donjeckut”, tha Zelensky pas një konference online me zyrtarët e ushtrisë, duke shtuar se ai po ashtu u informua për situatën në rajonin pjesërisht të çliruar të Hersonit, që për muaj të tërë ka qenë cak i granatimeve ruse.

    “Rusët po vazhdojnë të terrorizojnë territoret që artileria e tyre mund të arrijë”, tha ai.

    Më herët gjatë 27 shtatorit, Oleksandr Prokudin, kreu i administratës ushtarake në Herson shkroi në Telegram se 12 persona janë lënduar në rajon si pasojë e granatimeve ruse.

    Në rajonin e Nikopolit, dy persona janë lënduar nga granatimet ruse tha kreu i administratës ushtarake, Serhiy Lysak.

    Shtabi i Përgjithshëm i ushtrisë ukrainase tha se forcat e këtij shteti po vazhdojnë operacionet sulmuese në drejtim të qytetit lindor të Bahmutit dhe në rajonin jugor të Melitopolit, duke shtuar se në total janë realizuar 26 beteja në 24 orët e fundit.

    Që kur u tërhoq nga marrëveshja për drithërat në korrik, Rusia ka shpeshtuar sulmet ndaj infrastrukturës në portet ukrainase në Odesa dhe Mikolajiv./REL/

  • Luftimi i korrupsionit mbetet sfidë për institucionet – kërkohet bashkëpunim i mirëfilltë

    Luftimi i korrupsionit mbetet sfidë për institucionet – kërkohet bashkëpunim i mirëfilltë

    OJQ “Aktiv” ka mbajtur konferencë për transparencën e administratës lokale në kuadër të projektit “Forcimi i transparencës dhe sundimit të ligjit në komunat serbe në Kosovë”, raporton Ekonomia Online.

    Tamra Geig, nga Byroja për Çështje Ndërkombëtare të Narkotikëve dhe Zbatimit të Ligjit, tha se ShBA-ja do ta vazhdojnë mbështetjen për Kosovën. Madje tha prioritet i ShBA-së mbetet bashkëpunimi për një Kosovë më të sigurt.

    “Siç e dini ShBA kanë qenë partner të Kosovës për më shumë se dy dekada dhe ne do të vazhdojmë me mbështetjen tonë. Ne po mundohemi t’i ngrijmë kapacitetet e shoqërisë civile në Kosovë. Ne e dimë që kjo do të forcoj institucionet e Kosovës dhe për këtë është shumë e rëndësishme kjo konferencë”.

    “Ne jemi të gjithë së bashku që të sigurohemi që komunitetet do të bashkëpunojnë për një Kosovë më te sigurt, kjo është prioritet edhe për ShBA-të”.

    Miodrag Miliceviq, drejtor ekzekutiv i OJQ “Aktiv”, shtoi se kanë hartuar një program për dixhitalizimin e raportimit kundër korrupsionit.

    “Ajo çfarë do doja të ndaja për ne është pikërisht çështje kyçe është aplikacioni “ABER” që është bërë në 6 gjuhë të ndryshme me agjencinë kundër korrupsionit, që mundëson dixhitalizimin e raportimit kundër korrupsionit”.

    Drejtori i Agjencisë për Parandalimin e Korrupsionit, Yll Buleshkaj, tha se prioritet kryesor mbetet trajtimi i barabartë i të gjitha rasteve.

    “Prioriteti ynë është që të kemi një trajtim të barabartë në të gjitha lokalitetet e Kosovës, këtu kemi pasur sfida, por jemi munduar që gjithmonë të iu ofrojmë bashkëpunim edhe me komunitetet jo-shumicë. Secili mandat i qeverisjes duhet të jetë i ndërlidhur me shoqërinë civile, për transparencë të plotë”, shtoi tutje Buleshkaj.

    Drejtori ekzekutiv në Institutin e Kosovës për Drejtësi (IKD), Ehat Miftaraj, tha se duhet punë më intensive në luftimin e korrupsionit. Ai kërkoi më shumë përfshirje të qytetarëve nga niveli lokal e ai qendror.

    “Si komunat si niveli qendror duhet te ketë më shumë bashkëpunim si me qytetarët edhe me institucionet. Prokurorët krejt punën e tyre e bazojnë në letra, sot ka mundësi të llojllojshme se si me luftuar korrupsionin, hetimet, përgjimet nuk ekzistojnë fare”, shtoi Miftaraj.

    “Si nga komunat ashtu edhe nga Qeveria duhet të ketë më shumë përfshirje të qytetarëve, publikut dhe grupeve të interesit. Transparenca dhe llogaridhënia nëse do të zbatoheshin në praktikë do të kishim me pak raste të korrupsionit

    Ismet Kryeziu, drejtor i Institutit Demokratik i Kosovës (KDI) tha se Kosova ka ende sfida në luftimin e korrupsionit, raporton EO.

    “Kosova edhe pse ka pasur një suksese, dhe ka bërë një hap tutje, megjithatë ka sfida në miratimin e politikave të ligjeve dhe në zbatimin e këtyre ligjeve që garantojnë transparencë”.

  • ​Murati: Jemi në proces të përcaktimit të shtesave të rrezikshmërisë për policët

    ​Murati: Jemi në proces të përcaktimit të shtesave të rrezikshmërisë për policët

    Ministri i Financave, Punës dhe Transfereve, Hekruan Murati, tha se janë në proces të përcaktimit të shtesave të rrezikshmërisë për policët.

    Në një konferencë për media pas mbledhjes së qeverisë, Murati tha se gjithmonë do t’iu qëndrojnë pranë atyre që i shërbejnë vendit.

    Këto deklarata Murati i ka bërë disa ditë pasi rreshteri policor Afrim Bunjaku humbi jetën nga një grup terrorist derisa po kryente detyrën e tij në Banjskë të Zveçanit.

    “Është një proces që ka të bëjë edhe me Ligjin e pagave në tërësi. Ka qenë një proces paksa më kompleks dhe më i komplikuar pasi bëhet fjalë për mbi 80 mijë zyrtarë publik, pra është një sistem i tërë që është dashur të reformohet. Ka shumë kategori të tjera që po trajtohen në vijimësi, qoftë nga MPB-ja apo MFT-ja. Tani jemi në proces të dakordimit dhe në proces të defenimit apo përcaktimit të të gjitha këtyre shtesave por edhe të kompetencave apo përgjegjësive që parashihen dhe plotësohen me ligj. Besoj se shumë shpejt do të kemi edhe përafrim të këtyre kërkesave apo gjërave në mënyrë që të sigurohemi që çdo gjë vjen në vendin e vet ashtu siç e parasheh ligji. Një gjë dua t’i siguroj qytetarët se shteti gjithmonë do t’iu qëndrojë pranë të gjithë atyre që shërbejnë për shtetin”, theksoi Murati.

    Ndërsa ministri i Kulturës, Rinisë dhe Sportit, Hajrulla Çeku, ka thënë se ende nuk kanë informacione zyrtare për rolin e klerikëve fetarë të Manastirit të Banjskës gjatë sulmit terrorist të 24 shatorit në veri.

    Ai tha se hetimi po zhvillohet ende nga institucionet e sigurisë dhe të drejtësisë, mirëpo në bazë disa publikimeve në rrjete sociale që menaxhohen nga zyrtarët e Kishës Ortodokse serbe është bërë një lloj përpjekje për t’u distancuar nga ato veprime.

    “Çështjet që i ngritët janë shumë legjitime dhe meritojnë përgjigje përfundimtare, të cilat besoj se do të merren pas hetimeve profesionale të hollësishme në lidhje me krejt çka ka ndodhur në atë moment nga ai sulm terrorist mbi Republikën e Kosovës. I gjithë informacioni që kemi janë disa publikime në rrjetet sociale të cilat menaxhohen nga klerikët ose zyrtarët e Kishës Ortodokse serbe ku është bërë një lloj përpjekje për t’u distancuar nga ato veprime. Megjithatë ajo çka jemi zotuar ne sot është që të mbrojmë monumentin sepse edhe ligjet tona dhe fakti që ai monument është i mbrojtur me ligjet e Republikës na obligon që të kujdesemi për strukturën fizike që është dëmtuar nga grupi terrorist në atë rast. Por unë nuk kam më shumë informacion dhe besoj se hetimet që po zhvillohen dhe pastaj procedura mëtutjeshme gjyqësore do t’i jap përgjigje këtyre dilemave që i kemi”, tha ai.

    Çeku në konferencë për medie pas mbledhjes së qeverisë, theksoi nevojën që objektet e kultit të mos përdorën për aktivitete kriminale, derisa tha se kanë mjete financiare për restaurimin e Manastirit të Banjskës pas dëmeve të shkaktuara nga sulmi terrorist më 24 shtator.

    “Ne si ministri për shkak të mandatit për mbrojtjen e trashëgimisë kemi komunikim të përhershëm gjithmonë me të gjithë pronarët, shfrytëzuesit dhe poseduesit e aseteve të trashëgimisë kulturore. Duhet pranuar që në të kaluarën jo gjithmonë kemi hasur në dyer të hapura nga klerikët e kishës ortodokse në Kosovë, mirëpo veprimet tona profesionale dhe ndërhyrjet që kanë ndodhur sivjet në tri kisha ortodokse në Kosovë në bashkëpunim me BE-në dhe UNDP tregojnë se kemi komunikim dhe kemi zotim. Ajo çka kemi thënë sot është se ne duhet të bëjmë maksimumin për t’i mbrojtur këto monumente, por duke artikuluar se objektet e kultit nuk duhet të përdoren për aktivitete kriminale”, shtoi Çeku./KosovaPress /

  • Shqipëria del kundër deklaratës së Bashkimit Evropian për dialogun Kosovë-Serbi

    Shqipëria del kundër deklaratës së Bashkimit Evropian për dialogun Kosovë-Serbi

    Shqipëria nuk ka dalë në mbështetje të deklaratës së BE për dialogun Kosovë-Serbi, të bërë nga shefi i Politikës së Jashtme të BE-së Josep Borrel më 19 shtator.

    Kjo është hera e parë që Shqipëria nuk është në të njëjtën linjë me Bashkimin Evropian në lidhje me dialogun Kosovë-Serbi, raporton Euronews Albania duke u thirrur në burime.

    Duke parë dhe zhvillimet e fundit, ku një efektiv i policisë së Kosovës u vra nga terroristët serbë, Shqipëria konsideron se qëndimet e BE-së në lidhje me dialogun, nuk janë të përshtatshme për situatën aktuale, pasi përgjegjësia nuk qëndron më tek Kosova.

    Në deklaratën e datës 19, pas dështimit të dialogut, Borrel u shpreh: “BE-ja u kërkon palëve të angazhohen në mënyrë konstruktive dhe me mirëbesim. Kjo nënkupton fillimin e zbatimit bazuar në propozimin e BE-së pa vonesa të mëtejshme, i cili gjithashtu përfshin detyrimin e të dyja palëve për të zbatuar plotësisht të gjitha marrëveshjet e dialogut të kaluar. Puna për themelimin e Asociacionit/Bashkësisë së Komunave me Shumicë Serbe duhet të fillojë pa ndonjë vonesë apo parakusht të mëtejshëm”.

    Pas takimit më 14 shtator, nga Bashkimi Evropian deklaruan se kryeministri i Kosovës, Albin Kurti, nuk ishte i gatshëm të ecë përpara me dialogun, ndryshe nga presidenti i Serbisë, Aleksandar Vuçiç, i cili “e ka pranuar propozimin e tyre” për zbatimin e Marrëveshjes bazë për normalizimin e marrëdhënieve Kosovë-Serbi. Borrell pas takimit të 14 shtatorit deklaroi se Kurti kishte këmbëngulur që fillimisht të formalizohet njohja de facto e Kosovës nga Serbia.

    Kurti në Bruksel tha se “kushtëzimi i Serbisë” për formimin e Asociacionit të komunave me shumicë serbe “është shndërruar në qëndrim të emisarëve të BE-së”. Kryeministri kosovar tha se në takim kishte paraqitur një plan të tij për zbatimin e marrëveshjes, por shtoi se ky propozim u refuzua nga blloku evropian dhe Beogradi.

    Më 18 shtator, Kurti tha se i dërguari i posaçëm i BE-së, Mirosllav Lajçak, gjatë takimit në Bruksel “u pozicionua” kundër Kosovës, duke e akuzuar atë se e ka “deformuar procesin duke mos u përqendruar në zbatimin e plotë dhe të hollësishëm, të menjëhershëm dhe të pakushtëzuar të Marrëveshjes Bazike dhe Aneksit të saj”.

  • Zëdhënësi i BE-së tregon se a do të ketë masa ndëshkuese ndaj Serbisë pas sulmit në Veri

    Zëdhënësi i BE-së tregon se a do të ketë masa ndëshkuese ndaj Serbisë pas sulmit në Veri

    Zëdhënësi i Komisionit Evropian Peter Stano tha se Bashkimi Evropian (BE) do të presë përfundimin e hetimeve të plota për sulmin terrorist të së dielës në fshatin Banjskë në veri të Kosovës, para se të marrë një vendim dhe konkluzione për çfarëdo mase dhe pasojë, duke mos dashur të komentojë pretendimet se disa shtete anëtare kanë kërkuar vendosjen e masave ndaj Serbisë.

    “Nuk është kompetencë ime të jap informacione nga bisedat konfidenciale dhe informacionin për mbledhjen e Komisionit për Politikë dhe Siguri të martën”, ka thënë Stano, shkruan N1.

    Stano ka theksuar se BE-ja ka thënë edhe më herët se masat e vendosura ndaj Prishtinës mund të zbatohen edhe për Serbinë, dhe kur shtetet anëtare të BE-së të marrin një vendim formal për to, kur dhe cilat masa, për çfarë arsye, do të shpallen publikisht.

  • Haradinaj pas takimit me Osmanin: Rreziku në veri vazhdon, të koordinohemi me aleatët

    Haradinaj pas takimit me Osmanin: Rreziku në veri vazhdon, të koordinohemi me aleatët

    Ish-kreu i Qeverisë, Ramush Haradinaj tha se rreziku për eskalim të situatës sërish në veri ekziston, raporton Ekonomia Online. Ai tha se përgjegjës për këtë situatë është Serbia dhe se për këtë duhet edhe një hetim ndërkombëtar.

    Haradinaj pas takimit me presidenten, Vjosa Osmani pohoi se për këtë çështje duhet të ketë një hetim ndërkombëtar. Madje kreu i AAK-së, tha se koordinimi me aleatët është i domosdoshëm në këtë fazë.

    Haradinaj tha se institucionet e sigurisë të vendit u treguan të suksesshme, por se të njëjtën duhet ta bëjënë edhe politikanët në pushtet.

    Ish-kryeministri tha se duhet që të kryhen edhe hetime për të vërtetuar atë që dihet se Serbia qëndron pas sulmit terrorist që vrau policin Afrim Bunjaku.

    “Biseda ishte kryesisht lidhur me situatën e sigurisë ne vend gjatë ditëve të fundit të ndërlidhura me sulmin terrorist që ndodhi më veri ku humbi jetën një epror i Policës së Kosovës. Kosova edhe në të kaluarën është përballur me situata të sigurisë. Kjo që ndodhi tani është e pastër terrorizëm. Është e logjikshme që të bashkëbisedohet në situata të tilla. Për shkaka se rreziku vazhdon edhe me tutje, është prezent rreziku”.

    “Duhet që të bëjmë kujdes që edhe vendimmarrësit politik ta kryejnë me sukses punë  e vete. Përballja me rreziqe e sigurisë nuk behet duke e bartur përgjegjësin vetëm te profesionistët, dihet ndihmesa politike edhe dihet një kurs politik i besueshme me aleatët. Serbia nuk e fsheh faktin se është sponzorisese, i ka stërvit dhe i ka dhënë udhëzimit këtij grupi terrorist. Është mirë që të zhvillimet një hetim që Serbia është faktorë, kjo dihet por të vërtetohet edhe nga hetuesit ndërkombëtar me mundësi të një gjykate”, tha ai.

    Haradinaj tha se një situatë e tillë është mjaft komplekse dhe se etapat që vijnë kërkojnë një koordinim të të gjithëve.

    “Askush nuk duhet të mungojë për të bërë pjesën e vet, askush në Kosovë. ne do ta kryejmë detyrën tonë në shërbim të vendit. Kemi nevojë për aleatët e sigurisë. Vetëm imagjinoni nëse aty në veri të mos ishte KFOR-i, ushtarët amerikanë. Pra, kini parasysh.  Është mjaft e mirëseardhur që e kemi KFOR-in atje, si dhe EULEX-in”.

  • Sveçla: Në mesin e të vrarëve në Banjskë edhe truproja e Vulinit

    Sveçla: Në mesin e të vrarëve në Banjskë edhe truproja e Vulinit

    Ministri i Punëve të Brendshme Xhelal Sveçla ka bërë të ditur identitetin e njërit nga terroristët e vrarë e që është Bojan Mijailoviq.

    Sveçla ka konfirmuar se Bojan Mijailoviq ishte truproja e shefit të BIA-s serbe, Aleksandar Vulin.

    “Aleksandar Vuçiq në sulmin e 24 shtatorit në Banjskë të Zveçanit: Milan Radojçiq, si nënkryetar i Listës serbe dhe truproja e Aleksandër Vulinit, shef i BIA-s. Të dy këta po ashtu të sanksionuar në listën e zezë të ShBA-ve. Të dy këta nga njerëzit më të afërt të presidentit të Serbisë.

    Këto fakte janë dëshmi tjetër se synimet e Serbisë ndaj Republikës së Kosovës nuk kanë ndryshuar aspak nga koha e regjimit të Millosheviqit, ish-ministri i Propagandës së atij regjimi, tash president i regjimit aktual në Serbi”, ka shkruar Sveçla ndër të tjera.

    Postimi i plotë:

    Dje përmes video-pamjeve dëshmuam prezencën e kryekriminelit dhe udhëheqësin e aksionit terrorist Milan Radojiçiq. Ndërkaq, sot është konfirmuar që njëri nga të vrarët që ishte po ashtu pjesëmarrës i atij akti është edhe Bojan Mijailoviq, trupëroja e shefit të BIA-s serbe, Aleksandar Vulin, në vizitën e tij në Republikën e Kosovës në vitin 2013.

    Shteti i Serbisë është këmbë e krye i përfshirë në këtë sulm terrorist me qëllim destablizimin e Republikës së Kosovës. Për këtë gjë tashmë ekziston edhe lidhja formale e strukturore e përfshirjes së Aleksandar Vuçiq në sulmin e 24 shtatorit në Banjskë të Zveçanit: Milan Radojçiq, si nënkryetar i Listës serbe dhe trupëroja e Aleksandër Vulinit, shef i BIA-s. Të dy këta po ashtu të sanksionuar në listën e zezë të ShBA-ve. Të dy këta nga njerëzit më të afërt të presidentit të Serbisë.

    Këto fakte janë dëshmi tjetër se synimet e Serbisë ndaj Republikës së Kosovës nuk kanë ndryshuar aspak nga koha e regjimit të Millosheviqit, ish-ministri i Propagandës së atij regjimi, tash president i regjimit aktual në Serbi. Edhe optimistët më të mëdhenj që deri tash e kanë gënjyer veten për ndryshimet në këtë shtet besoj janë bindur për të kundërtën këto ditë.

    Dua të shpreh edhe njëherë mirënjohje për qendresën e Policisë së Kosovës atë ditë dhe për profesionalizmin e pashoq, aksion në të cilin nuk është lënduar lënduar asnjë civil.