Kryetari i Shtërpcës, Dalibor Jevtiq, që është edhe zyrtar i lartë i Listës Serbe duke folur për sulmin terrorist në Banjsë të Zveçanit të dielën e kaluar tha se Millan Radoçiqi “nuk na ka konsultuar neve as krerët e shtetit serb” për sulmet që kreu ndaj policisë kosovare.
Jevtiq vazhdon më tej të thotë se “Radoiçiq i ka qartësuar gjërat për çka është pyetur”, në një paraqitje televizive në Tv Pink, teksa vazhdoi të lartësojë figurën e tij për “respektin e madh” që Millan Radojçiq “gëzon në mesin e serbëve të Kosovës”.
Kushdo që ju thotë ndryshe po ju gënjen. Ai ka ende këtë (respekt të madh) edhe sot. Mund t’ju jap shembuj se sa shumë ka ndihmuar njerëzit që kanë jetuar vështirë”, ka thënë Jevtiq, siç citohet në artikullin që e ka shpërndar Lista Serbe në faqen e tyre në Facebook
Jevtiq thotë se “Radojiçiq përmes paraqitjes së tij publike dëshmoi se vendimi nuk ishte politik por i tij” dhe se “ata njerëz që vendosën këtë e bënë si pasojë e gjithçkaje që ka ndodhur që kur ka ardhur Albin Kurti në pushtet me rrezikun e jetëve të serbëve, veçanërisht në veri”.
Në përpjekje të plotësimit të detyrës së tij, që me propagandë të vjetër dhe të kot të Vuçiqit të “hedh hi në sy” zyrtarëve dhe opinionit amerikan, ambasadori serb në SHBA, Marko Gjuriq, ka pretenduar se në Kosovë ka vetëm dy “grumbullime serioze ushtarake” dhe se “asnjëra prej tyre nuk është ndonjë grumbullim ushtarak i trupave serbe”. E para, sipas propagandës së tij, është grumbullimi i “forcave speciale tepër të militarizuara dhe monoetnike të Kurtit”, dhe e dyta është “grumbullimi i gënjeshtrave dhe paragjykimeve ndaj serbëve të Kosovës dhe Serbisë të orkestruara nga Albin Kurti”.
Gjuriq ka shkruar në llogarinë e tij në rrjetin social “X” se në tokën “e pushtuar ilegalisht nga qeveria e Albin Kurtit janë ndërtuar tetë baza të reja për këto forca të militarizuara dhe monoetnike”, transmeton Paparaci.
“Ka vetëm dy “grumbullime serioze ushtarake” në Kosovë, por “asnjëra prej tyre nuk është grumbullim ushtarak i trupave serbe. Grumbullimi i parë i ri është grumbullimi i forcave speciale shumë të militarizuara dhe mono-etnike, i cili zgjatë tash e 20 muaj. Tetë baza të reja për këto forca janë ndërtuar në tokat e “sekuestruara ilegalisht” nga qeveria e Kurtit. Gjatë kësaj kohe, këto forca u angazhuan në 61 “sulme ilegale” dhe qëlluan 7 serbë të Kosovës dhe plagosi shumë të tjerë. Si rezultat i këtij grumbullimi, 11 për qind e serbëve në veri tashmë janë detyruar të shpërngulen në Serbi. Këtë komuniteti ndërkombëtar “nuk arriti të parandalojë. Pavarësisht mandatit të tyre ligjor dhe moral”, ka shkruar Gjuriq.
Një tjetër “grumbullim”, siç thotë ai, “po aq i keq” është grumbullimi i “gënjeshtrave, njëanshmërive dhe paragjykimeve ndaj serbëve të Kosovës dhe Serbisë, të orkestruara nga Kurti, por të cilave iu bashkuan ata që mezi prisnin rastin e parë për të konfirmuar stereotipet e vjetra, pa arritur të shikojnë më thellë dhe të shohin se rolet në Kosovë “kanë ndryshuar” që nga vitet e 90-ta”.
“Sa i përket “gjoja” grumbullimit të forcave serbe, e vetmja gjë që ekziston është tërheqja e forcave që kanë qenë atje prej vitesh – nga 7500 në minimumin historik prej 4000. Sepse ne jemi pala përgjegjëse, ajo që dëshiron paqen dhe përpiqet të shmangë gjakderdhjen e mëtejshme”.
Kryeministri i vendit, Albin Kurti, ka riprezantuar pamje të autoriteteve kosovare, të cilat dëshmojnë stërvitjet e terroristëve serbë, që vranë dhe kryen sulmin e 24 shtatorit në Bansjkë.
Ai thotë se këta terroristë ishin trajnuar katër ditë para sulmeve, në njërën prej bazave kryesore të Ushtrisë Serbe, Pasuljanske Livade.
Teksa të tjerat stërvitje, Kurti thekson se u zhvilluan në bazën e Kopaonikut.
I gjithë ky sulm i terroristëve serbë, kryeministri i Republikës së Kosovës, thotë se u bë nën mbështetjen dhe planifikimin e plotë të shtetit serb që drejtohet nga Aleksandar Vuçiq.
”Në foto: Terroristët që kryen sulmet janë trajnuar në Pasuljanske Livade, një nga bazat kryesore të Ushtrisë Serbe, ~4 ditë para sulmeve. Stërvitje të tjera u zhvilluan në bazën e Kopaonikut. Sulmet gëzonin mbështetjen dhe planifikimin e plotë të shtetit serb”.
Pictured: The terrorists who carried out the attacks trained in Pasuljanske Livade, one of the Serbian Army's key bases, ~4 days before the attacks. Other exercises took place in the Kopaonik base. The attacks enjoyed the full support & planning of the Serbian state. pic.twitter.com/eWp4dMsGee
Projekti në unazën e brendshme në kryeqytet që lidh rreth rrotullimin e lagjes “Arbëria” me atë në “Lakërishtë”, kishte nisur më 25 nëntor të vitit të kaluar, datë kur ishin dhënë edhe afate për përfundim.
“Pretendojmë ta përfundojmë përbrenda 90 ditëve, pra 90 ditë pune, tash jemi në fund të nëntorit kështu që me siguri që do të kemi pak problem me kohën”, kishte deklaruar Rama vitin e kaluar.
Ndonëse pas një viti, projekti i planifikuar të përfundoj për 90 ditë, është larg afateve kohore të parapara.
Qytetarët po kritikojnë zotimet për afate të tilla lidhur me projektet infrastrukturore.
“Jemi mësuar me premtime të tilla me afate që nuk po iu përmbahen”, thotë një qytetar.
“Që sa kohë është kështu vetëm po i neglizhojnë punët”, tha një qytetar tjetër.
Përmes një përgjigje me shkrim, nënkryetari i Prishtinës, Alban Zogaj thotë se punët kanë nisur pas dimrit të kaluar, ndërsa më pas kanë hasur në disa probleme teknike.
“Punimet kanë filluar, unë besoj që duke respektuar planin dinamik ne do ta përmbyllim këtë pjesën tjetër të projektit. Pra në komplet pjesën e parë kur kemi filluar ka dalë shumë ujëra nëntokësore, ka qenë frika se a mund të stabilizohet pjesa e trupit të rrugës me projektin ekzistues”, tha Zogaj.
Projekti për rrugën e gjatë 700 metra në vlerë mbi 1 milionë euro, sipas Zogajt përfundon në fillim të vitit të ardhshëm.
Edicionin Qendror të lajmeve në ATV e gjeni ën videon më poshtë:
“Race for the Cure Prishtina” është aktivitet që organizohet për të pestën herë me radhë në kryeqytet e që ka për qëllim rritjen e ndërgjegjësimit për parandalimin e sëmundjes së kancerit të gjirit.
Edhe këtë vit, qindra persona i janë bashkuar vrapimit i cili u zhvillua nga sheshi “Ibrahim Rugova”, në kryeqytet deri te rrethi i flamurit.
Sabije Maliqi, 66 vjeçare është njëra nga gratë e cila aktualisht është duke luftuar kancerin e gjirit. Ajo theksoi se e ka mjaft të vështirë trajtimin e sëmundjes, pasi sipas saj institucionet shëndetësorë nuk kanë kapacitete të mjaftueshme.
“Jam në luftë me këtë sëmundje, në natën e vitit të ri jam operu. Shyqyr zotit fëmija po më japin vullnet e jom qetu. Institucionet duhet me pas ma shumë kapacitete, se unë shumë harxhime kom pas për do ilaqe 250 euro. E unë pensioniste me 100 euro s’ki as qa bon s’të dalin për barna mos me kanë fëmijët”, tha Sabije Maliqi, qytetare.
Violeta Pirana, nga Organizata Joqeveritare “Renesanca”, tha se mbështetja për këto gra duhet të jetë gjatë tërë vitit.
“Nuk duhet të ndalemi vetëm në tetor, duhet të luftojmë edhe 11 muaj të tjerë, sepse numri është në rritje e sipër, nuk është koha që të rrijmë e koha të na merr, kemi mamografi, mjek onkologji, që këto sëmundje t’i luftojmë”, tha Pirana.
Teksa këto raste për shërim i drejtohen klinikës së Onkologjisë në QKUK, drejtori i klinikës, Ilir Kurtishi, tha se janë duke trajtuar një numër të madh të rasteve me këtë lloj të kancerit.
“Klinika e Onkologjisë është në ballë të kësaj sfide. Gjatë ditës trajtojmë mbi 350 pacientë që është numër rekord në rajon. Ne duhet ta ngrisim vetëdijen se shërim i kësaj sëmundje është verifikimi i hershëm”, tha Kurtishi.
Megjithatë Kryetari i Prishtinës, Përparim Rama, premtoi se me aktivitete të ndryshme, kryeqyteti në vazhdimësi do të jetë krah rasteve me kancer të gjirit.
“Jemi bërë bashkë kundër një beteje, kundër kancerit të gjirit, një sëmundje që ndan familje, kjo nuk është vetëm aspekti gjinor, nuk i prek vetëm femrat por edhe meshkujt, ne si kryeqytet po i hapim këto mundesi për të gjitha komunat e Kosovës. Beteja mund të fitohet dhe do ta fitojmë edhe të ardhmen, nuk do të ndalemi deri sa numri i vdekjeve nga kanceri i gjirit të jetë zero”, tha Rama.
Drejtoria e Shëndetësisë në Prishtinë, gjatë tërë muajit tetor, do të ofrojë mamografi falas në Qendrën Kryesore të Mjekësisë Familjare, atë të lagjes “Dardania” dhe në QMF “Veternik”.
Në shënim të muajit të kancerit të gjirit, disa autobusë të Trafikut Urban në Prishtinë janë ngjyrosur me ngjyrë roze dhe do të ofrojnë shërbime falas për gratë e prekura nga kanceri i gjirit.
Edicionin Qendror të lajmeve në ATV e gjeni ën videon më poshtë:
Zyrtarët e Shteteve e Bashkuara të Amerikës vazhdimisht kanë theksuar se themelimi i Asociacionit të Komunave me Shumicë Serbe, duhet të bëhet duke respektuar Kushtetutën e Republikës së Kosovës.
Pikërisht, amerikanët, sipas një deklarate të presidentes së Vjosa Osmani të para pak ditëve, duhet të jenë pjesë në përgatitjen e draft statutit të asociacionit të Komunave me Shumicë Serbe.
Sipas profesorit universitar, Arben Fetoshi, kryeministri Albin Kurti duhet të ketë komunikim të vazhdueshëm me zyrtarët amerikan, sa i takon çështjes së asociacionit.
“Ajo çka na duhet tani është një komunikim intensiv i kryeministrit Kurti me aleatët, me zotëri Escobar në radhë të parë për t’i siguruar garancionet që Asociacioni të mos jetë mekanizëm që e paralizon funksionimin e Kosovës. Ju e dini se kemi marrë vazhdimisht garanci nga ana e ShBA-së që Asociacioni të mos ketë kompetenca ekzekutive dhe asociacioni s’do të jetë nivel tjetër i pushtetit në Republikën e Kosovës dhe mbi këtë bazë qeveria jonë duhet të lëvizë në drejtim të draftimit të statutit të Asociacionit në përputhje me vizionin e prezantuar nga kryeministri në mënyrë që pastaj presioni të zhvendoset mbi Vuçiqin”, tha Fetoshi.
Duke përmendur domosdoshmërinë e themelimit të asociacionit për të arritur marrëveshjen finale, analisti Artan Muhaxheri, potencon se Kosova duhet të jetë konstruktive në këtë drejtim.
“Në momentin që pala kosovare do të dëshmohet si bashkëpunuese edhe këto presione do të largohen. Gjithsesi nuk duhet të harrohet në asnjë moment që Asociacioni është pjesë esenciale e marrëveshjes finale. Pa garantimin e situatës së pakicës serbe në Kosovë, pas arritjes së marrëveshjes finale, pas një lloj njohje të shtetit të Kosovës nga ana e Serbisë nuk mund të ketë asnjë mendim ose ide për përfundim të suksesshëm të dialogut”, tha Muhaxheri.
Kurse, deputetja nga radhët e partisë në pushtet, Fitore Pacolli, insiston se Serbia po tenton ta shtyjë përpara themelimin e asociacionit dhe të mos i zbatojë pikat e tjera të marrëveshjet së Ohrit.
“Tani kemi kushtëzimin nga Serbia e cila thotë Asociacioni fillimisht tani dhe për të tjerat shohim. Ne si qytetarë të Kosovës, si deputetë, si politikan kemi mjaft mësime nga e kaluara dhe e dina se çfarëdo hapa që marrin përfaqësuesit e Serbisë nuk munden me qenë hapa të drejtë dhe munden me pa situatën njëanshëm. Qëllimi i tyre është që të shtyjnë për Asociacion dhe hapat të tjerë të marrëveshjes të mos realizohen kurrë”, tha Pacolli.
Ndërkaq, pas takimit në Bruksel me presidentin e Serbisë Aleksandër Vuçiq, kryeministri Albin Kurti, kërkesën për themelimin e asociacionit, e ka quajtur kushtëzim të Serbisë i cili është kthyer në qëndrim të BE-së.
Edicionin Qendror të lajmeve në ATV e gjeni ën videon më poshtë:
Presidenti i Serbisë, Aleksandër Vuçiq ka deklaruar se numri trupave ushtarake serbe në afërsi të kufirit me Kosovën, është duke u zvogëluar.
“Vitin e kaluar kishim 14,000 njerëz pranë vijës administrative, sot kemi 7,500 dhe do ta reduktojmë në 4,000”, tha Vuçiq.
Duke folur për mediumin Finacial Times, presidenti Serb tha se shteti që ai udhëheq nuk synon konflikt, pasi sipas tij, kjo do ishte në dëm të Serbisë, në tavolinën e dialogut me Kosovën të lehtësuar nga Bashkimi Evropian.
“Pse do të ishte e dobishme për Beogradin? Cila do të ishte ideja? Të shkatërrohet pozicioni ynë që kemi ndërtuar për një vit? Ta shkatërrojmë atë brenda një dite? Serbia nuk dëshiron luftë. Serbia nuk do të përfitonte nga kjo sepse do të kërcënojnë pozicionin e saj në negociatat me Prishtinën nën ndërmjetësimin e BE-së”, deklaroi Vuçiq.
Eksperti i Sigurisë, Drizan Shala, thekson se tërheqja e trupave serbe në afërsi të kufirit të Kosovës është rezultat i presionit ndërkombëtar. Por, eksperti Shala nuk mendon që Serbia ka hequr dorë nga ambiciet e saj destabilizuese në veri të vendit.
“Nuk e ka hequr nga mendja tentativën e tij për të formuar formacione të caktuara diverzante në drejtim të insitucioneve të Kosovës”, tha Drizan Shala, ekspert i sigurisë.
Profesori universitar, Basri Muja shprehet se tërheqja e trupave ushtarake serbe, është taktik e Serbisë për ta paraqitur veten si palë që po ndikon në de-eskalimin e situatës.
Kurse profesori Muja pret që pozicioni të Serbisë në dialogun me Kosovën, të lehtësuar nga Bashkimi Evropian, të pësojë ndryshime.
“Mendoj që do duhet që të kemi një resetim të plotë të procesit, në atë mënyrë që të ketë një prrioritetizim të disa temave të caktuara dhe mendoj që disa tema nuk duhet të trajtoheshin fare”, tha Muja.
Ndërkaq, pozicionimi u ushtarëve serb pranë vijës kufitare me Kosovën është pritur me shqetësim nga ShBA-të dhe BE-ja, të cilët kanë kërkuar që Serbia të ndalë zhvendosjen e trupave të saj në atë zonë.
Edicionin Qendror të lajmeve në ATV e gjeni ën videon më poshtë:
Institucionet kosovare të Drejtësisë duhet të hetojnë sulmin terrorist në veri të vendit, si pasojë e të cilit mbeti i vrarë rreshteri i Policisë së Kosovës, Afrim Bunjaku.
Njohësit e Drejtësisë thotë se një hetim ndërkombëtar i këtij rasti do ishte pozitiv. Mirëpo, të parët që duhet të merren me hetimin e detajuar të sulmit të 24 shtatorit, sipas Drejtorit i Institutit të Kosovës për Drejtësi, Ehat Miftaraj, janë prokuroria dhe gjykata në Kosovë.
“Në radhë të parë institucionet e drejtësisë në Kosovë, me theks të veçantë prokuroria dhe gjykata duhet ta hetojnë, gjykojnë këtë rast, në mënyrë që të vërtetohet përgjegjësie e personave të cilët kanë qenë të përfshirë në këtë akt terrorist ndaj rendit kushtetues të Republikës së Kosovës, në anën tjetër një hetim ndërkombëtar nga ana e partnerëve të Kosovës, me theks të veçantë, shtetet mike, do të ishte i mirëseardhur për të hetuar ose për të kuptuar më çartë se cili ka qenë roli i Serbisë, i strukturave të Sigurisë në Serbi, për të mbështetur, këtë grup terrorist, i cili në njëfarë mënyre ka kryer akte terroriste, si duket qëllim ka pasur edhe cenimin e rendit kushtetues të Kosovës, por edhe paqen dhe sigurinë në këtë pjesë të rajonit”, tha Miftaraj.
Miftaraj thekson se zbardhja e rastit nga institucionet vendore të Drejtësisë, do ndikonte pozitivisht në paqen në Ballkan.
“Unë jam i sigurt që e vërteta do të zbulohet pas hetimit dhe gjykimit të personave të përfshirë nga ana e institucioneve të drejtësisë së Republikës së Kosovës, duke marrë për bazë përmasat e këtij rasti, ku është cenuar paqja dhe siguria e Kosovës e cila e drejtpërdrejtë ka ndikim edhe në paqen dhe sigurinë e Ballkanit dhe atëherë sigurisht që një hetim gjithëpërfshirës, ku do të përfshihen shtetet demokratike, do të kishte një ndikim më të madh dhe do të ishte mesazh edhe për Serbinë, por edhe për çdo shtet që synon që të destbilizoj një shtet tjetër, e përmes të cilës pastaj do të mund të destabilizoj i tërë Ballkani Perëndimor”, tha Miftaraj.
Kurse, një hetim ndërkombëtar, sipas Anton Nrecajt nga Qendra për Ndihmë Juridike dhe Zhvillim Regjional, mundë të iniciohet nga të gjitha palët e interesuara.
“Një iniciativë të tillë, mund ta bëjnë të gjitha palët e interesuara, kush më tepër se palë e interesuar mund të jetë edhe vet Qeveria e Republikës së Kosovës, mund të jetë poashtu edhe vetë Bashkimi Evropian, ku përmes Parlamentit Evropian të vendoset që të ketë një hetim ndërkombëtar ose një hetim në kuadër të bashkimit evropian se çfarë ka ndodhur në ditën e së dielës në Basnjkë të Veriut të vendit”, tha Nrecaj.
Ndërkaq, ndaj tre personave të dyshuar për sulmin terrorist në veri, është marrë masa e paraburgimit prej një muaji.
Edicionin Qendror të lajmeve në ATV e gjeni ën videon më poshtë:
Pothuajse tërë arsenalin e armëve që policia konfiskoi gjatë aksionit në Banjskë të Zvecanit, organet e rendit mund ta përdorin për nevoja të veta.
Sipas ish-kolonelit të FSK-së Arfim Veseli, një gjë e tillë mund të përsëritet, andaj gjithë ky armatim do i duhej shtetit tonë.
“Kodi i Procedurës Penale i konsideron si prova materiale të këtij grupi terrorist, mirëpo unë shpresoj që gjykata tona ta përfundojë ato dhe ato mjete t’u jepen në shfrytëzim organeve të sigurisë. Shumë do të dëshiroja që ato automjete t’u jepen Policisë sonë, gjegjësisht Njësisë Speciale, ndërsa municioni dhe pajisjet tjera ushtarake t’i jepen FSK-së. Uniformat që i kishin t’u japim djemve të Njësisë Speciale si dhuratë nga shteti serb dhe nëse kanë edhe të tjera le t’i sjellin ne i pranojmë të gjitha. I tërë armatimi është i ushtrisë dhe xhandarmërisë serbe dhe burimin e ka nga Rashka”, tha Veseli.
Madje sipas juristëve, për shfrytëzimin e armëve ushtarake, nuk nevojitet as përfundimi i procesit gjyqësor.
“Në bazë të asaj që kemi parë në vendin e ngjarjes janë gjendur dy kategori të mjeteve, të cilat janë përdorur qoftë për kryerjen e veprave penale apo të ngjashme dhe në këtë drejtim janë kategoria e parë, mjete luftarake armë dhe pajisje tjera e të cilat mund të shfrytëzohen nga ana e institucioneve. Këtë e përcakton dispozitat respektive të Kodit të Procedurës Penale, madje këto armë mund të konfiskohen edhe pa pas nevojë të pritet epilogu i procesit gjyqësor, përkatësisht fajësia apo pafajësia e të pandehurve”, tha Ardian Bajraktari, avokat.
Megjithatë, sipas Bajrakatarit, jo gjithçka që u konfiskua mund të përdorët menjëherë.
Për veturat e autoblindat duhet pritur përfundimin e procesit gjyqësor që më pas të mund të shfrytëzohen.
Edicionin Qendror të lajmeve në ATV e gjeni ën videon më poshtë:
