Policia e Kosovës, ka njoftuar se një person është arrestuar në Gjakovë, nën dyshimin se i ka shkaktuar dhunë psiqike nënës së tij.
Sipas policisë, i dyshuari me vendim të prokurorit është liruar në procedurë të rregullt.
“Është arrestuar i dyshuari mashkull kosovar, për arsye se kishte shkaktuar dhunë psikike ndaj nënës së tij. Me vendim të prokurorit pas inicimit të rastit i dyshuari është liruar në procedurë të rregullt”, thuhet në raportin e PK-së.
Një person ka raportuar në polici zhdukjen e vajzës së tij të mitur në Fushë Kosovë.
Sipas Policisë së Kosovës, rasti është raportuar dje, ndërsa bëhet e ditur se e mitura ishte larguar nga shtëpia një ditë më parë, më 12 maj, rreth orës 19:21, në rrugën “Bedri Pejani” në Fushë Kosovë.
Ankuesi, mashkull kosovar, ka deklaruar se familja nuk ka njohuri për vendndodhjen e vajzës së tij.
Policia ka iniciuar rastin dhe po vazhdon hetimet për gjetjen e të miturës.
“Rr. Bedri Pejani, Fushë Kosovë 12.05.2026-19:21. Me 13.05.2026 një mashkull kosovar, ka raportuar se vajza e tij e mitur është larguar nga shtëpia dhe nuk kanë njohuri për vend ndodhjen e saj. Rasti në procedurë hetimore”.
Policia e Kosovës ka njoftuar se ka arrestuar dy të mitur në Gjakovë, pasi që të njëjti janë kapur në flagrancë duke vjedhur.
Sipas Policisë, gjatë kontrollit tek i dyshuari është gjetur dhe sekuestruar një thikë.
Me vendim të prokurorit, të dyshuarit janë liruar në procedurë të rregullt.
Njoftimi i plotë:
Rr. UÇK, Gjakovë 13.05.2026 – 13:40. Janë arrestuar dy të dyshuar meshkuj kosovarë (të mitur) për arsye se të njëjtit janë kapur në flagrancë duke vjedhur. Gjatë kontrollit tek i dyshuari është gjetur dhe sekuestruar një thikë. Me vendim të prokurorit, të dyshuarit janë liruar në procedurë të rregullt.
Një person është arrestuar në fshatin Shahiq të komunës së Kamenicës, nën dyshimin për përfshirje në rastin e “Keqpërdorimit të pozitës apo autoritetit zyrtar” të mërkurën.
Policia gjatë patrullimit kanë ndaluar një kamion të drejtuar nga një mashkull kosovar, i cili ishte i ngarkuar me dru. Dyshohet se drutë po transportoheshin ilegalisht nga territori i Serbisë drejt Republikës së Kosovës.
Gjatë verifikimit e dokumentacionit përcjellës, dyshohet se zyrtari i Agjencisë së Pyjeve në mënyrë të kundërligjshme ka bërë damkosjen e druve dhe lëshimin e fletë përcjelljes.
Me vendim të prokurorit drutë i janë sekuestruar, ndërsa i dyshuari është arrestuar dhe dërguar në mbajtje.
Njoftimi i plotë:
“KEQPËRDORIM I POZITËS APO AUTORITETIT ZYRTAR
Fsh. Shahiq, Kamenicë 13.05.2026-NN. Policia gjatë patrullimit kanë ndaluar kamionin drejtuar nga një mashkull kosovar, të ngarkuara me dru-dyshohet se transportonte nga territori i Serbisë në Republikën e Kosovës. Gjatë verifikimit e dokumentacionit përcjellës, dyshohet se zyrtari i Agjencisë së Pyjeve në mënyrë të kundërligjshme ka bërë damkosjen e druve dhe lëshimin e fletë përcjelljes. Me vendim të prokurorit drutë i janë sekuestruar, ndërsa i dyshuari është arrestuar dhe dërguar në mbajtje. Rasti nën hetime”, thuhet në raportin 24-orësh të policisë.
Rreth 18 minatorë të Trepçës kanë mbetur të ngujuar në minierë. Kështu bëri të ditur kryetari i Sindikatës, Ibrahim Jonuzi.
Ai tha se prej 40 minatorëve, një pjesë prej tyre kanë arritur të dalin në këmbë.
“Mbi 40 minatorë kanë qenë të bllokuar, një pjesë prej tyre kanë arritur të dalin në këmbë, derisa sipas informacioneve diku rreth 18 vazhdojnë të jenë ende brenda, ata të cilët kanë qenë më të dobët me shëndet”, deklaroi Jonuzi.
Kryetari i Sindikatës shtoi se gjendja e përgjithshme e minatorëve është e mirë.
“Gjendja e përgjithshme e tyre është e mirë. Kemi komunikim me ta, por sa më tepër kohë që kalojnë brenda situata rëndohet. Kanë nevojë për furnizime, ushqim, ujë, sepse janë në rezerva të fundit”, th ai për Klankosova.
Sipas raportimeve, kjo ka ndodhur si pasojë e problemeve me rrymë .
Kryeministri në detyrë, Albin Kurti, do të marrë pjesë sot në një takim të Këshillit Ministror për Integrim Europian.
Zyra e Kryeministrit njoftoi se në takimin që do të mbahet në 13:30 në ndërtesën e Qeverisë “do të diskutohet mbi Zbatimin e Agjendës së Reformave në kuadër të Planit të BE-së për Rritje Ekonomike në Ballkanin Perëndimor”.
Ministria e Industrisë, Ndërmarrësisë, Tregtisë dhe Inovacionit (MINT) ka publikuar çmimet maksimale të lejuara për derivatet e naftës, të cilat do të vlejnë për datën 14 maj 2026.
Sipas njoftimit zyrtar, çmimi maksimal i naftës (dizelit) është caktuar në 1.59 euro për litër, ndërsa benzina do të shitet deri në 1.49 euro për litër. Ndërkaq, çmimi maksimal i gazit është përcaktuar në 0.76 euro për litër.
Autoritetet kanë bërë të ditur se këto çmime hyjnë në fuqi nga ora 10:00.
Mbrëmë gjatë bisedave sy më sy me qytetarë përmes platformës “HAJDE FOLIM”, ish-Presidentja e Kosovës, Vjosa Osmani, dha një nga deklaratat më të forta dhe më të drejtpërdrejta kundër propagandës politike që po qarkullon ndaj saj rreth një takimi të liderëve të Ballkanit Perëndimor me përfaqësues amerikan në Nju Jork.
Përballë një pyetjeje të një qytetari, Osmani zgjodhi të mos heshtë. Me ton të vendosur, ajo demaskoi publikisht secilin pretendim dhe i quajti “gënjeshtra të fabrikuara nga manipulues profesionistë”, duke mbrojtur jo vetëm integritetin e saj politik, por edhe dinjitetin e shtetit të Kosovës.
“Ne e kemi vetëm të vërtetën në anën tonë,” deklaroi Presidentja, duke iu referuar sulmeve që e kanë quajtur “tradhtare” për pjesëmarrjen e saj në një takim të organizuar nga zyrtarë të lartë amerikanë me liderët e Ballkanit Perëndimor për promovimin e potencialit investues të rajonit.
Osmani hodhi poshtë një nga një pretendimet që po qarkullojnë në publik.
Sipas saj, pretendimi se takimi ishte mbajtur fshehtë është plotësisht i pavërtetë, pasi aktiviteti ishte publikuar në Përmbledhjen e Presidencës zyrtarisht që në shtator, në kohën kur kishte ndodhur.
Ajo mohoi gjithashtu akuzat se ambasadori i Kosovës në SHBA nuk kishte qenë prezent, duke theksuar se ambasadori Ilir Dugolli dhe kabineti presidencial kishin marrë pjesë dhe kishin ndjekur të gjithë prezantimin për potencialin ekonomik të Kosovës.
Por reagimi më i fortë erdhi ndaj pretendimeve se takimi ishte organizuar nga gazetari Baton Haxhiu.
“Takimi ishte organizuar si tryezë SHBA–Ballkani Perëndimor dhe ishte ftuar nga Sekretari amerikan i Tregtisë, Scott Bessent, dhe ambasadori për misione të posaçme i Presidentit amerikan, Richard Grenell”, sqaroi Osmani, duke ironizuar propagandën që sipas saj po tenton të deformojë realitetin.
Presidentja rikujtoi se në atë forum morën pjesë liderë rajonalë të nivelit të lartë, përfshirë Presidentin e Shqipërisë, Bajram Begaj, ministra dhe përfaqësues nga Bosnja e Hercegovina, Mali i Zi dhe vende të tjera të rajonit.
Në përgjigjen e saj, Osmani ngriti edhe pyetjen që po dominon debatin publik: pse po sulmohet një takim zyrtar, publik dhe ndërkombëtar, ndërkohë që askush nuk jep përgjigje për takimet e mbyllura “me orë të tëra” me Presidentin serb Aleksandar Vuçiq dhe emisarin evropian Miroslav Lajçak?
“Aty nuk kishte dëshmitarë dhe as transkripte”, tha ajo, duke lënë të kuptohet se transparenca duhet të vlejë për të gjithë.
Në një deklaratë që pritet të rezonojë fuqishëm te qytetarët, Osmani kujtoi se ka përfaqësuar Kosovën në dhjetëra forume ndërkombëtare gjithmonë përballë në ballafaqim me armiqtë që kanë tentuar të mohojnë shtetësinë dhe të vërtetën e Kosovës.
“Kam mbrojtur Kosovën fort, me argumente, me dinjitet dhe pa u përkulur para askujt”, deklaroi ajo.
Mesazhi i saj përfundimtar ishte po aq politik sa edhe emocional: sipas Osmanit, sulmet nuk vijnë sepse Kosova është dobësuar e përfaqësuar keq, por pikërisht sepse është mbrojtur fort.
“Nëse ata kanë propagandën, ne kemi të vërtetën”, ishte fjalia që mbylli një nga reagimet më të forta politike të muajve të fundit me një mesazh që synon të mobilizojë qytetarët përballë manipulimit propagandues e denigrues dhe të rikthejë fokusin tek interesat shtetërore të Kosovës.
Vëllezërit e ish-presidentit të Kosovës, Hashim Thaçit, janë takuar me kreun e Nismës, Fatmir Limajn.
Këtë e ka bërë të ditur ish-këshilltari i Thaçit, Adil Behramaj.
Ai e ka përshkruar si “kafe mes miqsh”, me gishtin që njihet si simbol i fushatave të mëhershme të Thaçit.
Të hënën Partia Demokratike e Kosovës e ka diskuatuar kërkesën e Fatmir Limajt për të garuar në listën e saj. Pas mbledhjes së kryesisë kreu i PDK’së Bedri Hamza ka deklaruar para mediave se kjo parti e mirëpret kontributin, por kësaj radhe Limaj s’do të jetë pjesë e listës së PDK-së.
Kandidati i AAK-së për kryeministër, Ardian Gjini, ka thënë se Albin Kurti e filloi fushatën duke i kërkuar 60% të votave.
Gjini pyeti se çfarë po i duhen kaq vota Kurtit duke shtuar se “pse nuk po e tregon këtë”.
“Kur e ke një politikan që e nis fushatën, duke thënë se i kam pasur 51%, por po i dua 60% dhe nuk po tregon pse po i don, dhe nuk ka me i marrë, por edhe me i marrë qytetari po ta jep nuk ekziston për vetveten, por për vendin tënd e qytetarët tënd. Për çka po i don 60%, çka po do me bë. Kjo nuk është demokraci, nuk po dinë si me udhëheqë me shtetin, është totalisht gabim”, ka thënë ai.