Category: Lajme

Në një deklaratë qeveritare në Bundestag, kancelari gjerman, Olaf Scholz ka bërë të ditur se do të veprohet ashpër kundër antisemitizmit në Gjermani dhe glorifikimit të dhunës.

Kancelari gjerman, Olaf Scholz ka bërë të ditur se do të ketë veprime energjike dhe konsekuente të autoriteteve gjermane kundër antisemitizmit dhe glorifikimit të dhunës. Autoritetet nuk duhet të lejojnë demonstrata, në të cilat bërtiten parulla antisemitiste dhe bëhet thirrje për dhunë, tha kancelari Scholz në një deklaratë qeveritare në Bundestag. “Këtu kërkohet një qëndrim i qartë dhe ne e tregojmë këtë së bashku në Gjermani”, tha Scholz. “Antisemitizmi nuk ka vend në Gjermani.” Do të bëjmë gjithçka që të ngrihemi kundër tij, siguroi Scholz. Kjo vlen si për qytetaret e qytetarët, ashtu si edhe për ata me përgjegjësi politike. Bëhet fjalë që të respektohen ligjet dhe rregullat.

Scholz: Hamas të lirojë pengjet gjermane

Kancelari gjerman është shprehur edhe për qytetarët gjermanë të marrë peng nga organizata terroriste e Hamasit në Izrael dhe janë dërguar në Rripin e Gazës. Ai kërkoi edhe njëherë lirimin e menjëhershëm të tyre. Mesazhi ndaj Hamasit është i qartë. “Ata duhet të lirohen pa kushte .” Në plenumin e Bundestagut qëndronin të ulur të afërm të pengjeve.

Të mërkurën në mbrëmje në Berlin-Neukölln pati përplasje të dhunshme me policinë, pasi demonstruesit injoruan ndalimin e një mitingu pro-palestinez. Sipas të dhënave të policisë kundër forcave të tyre janë hedhur shishe dhe gurë si edhe mjete proteknike. Po natën e së mërkurës dy të panjohur kanë hedhur molotov në drejtim të sinagogës Kahal Adas Jisroel në Berlin. Këshilli Qendror i Hebrenjve në Gjermani bëri fjalë për një “atentat terrorist”, aty krahas sinagogës gjendet edhe një kopsht fëmijësh dhe shkollë hebreje. Prokuroria e Përgjithshme njoftoi të enjten, se ka filluar hetimet për përpjekjen për atentat ndaj sinagogës në Berlin. Autoritetet e argumentuan këtë me tensionimin e gjendjes së sigurisë për shkak të protestave propalestineze në kuadër të luftës mes Izraelit dhe organizatës terroriste të Hamasit.

Egjipti vendos të hapë kalimin kufitar me Rripin e Gazës

Ndërkohë Egjipti është treguar i gatshëm të lejojë kamionët me ndihma humanitare në Rripin e Gazës. “Për fillimin”, kreu i shtetit egjiptian, Abdel Fatah al-Sisi ka premtuar në një telefonatë me presidentin amerikan, Joe Biden do të lejohen 20 kamionë me ndihma që të kalojnë pikën kufitare në Rafah. Më pas mund të pasojnë furnizime të tjera me ndihma. Përfaqësues të Kombeve të Bashkuara do të merren me shpërndarjen e ndihmave. Presidenti amerikan, Joe Biden ka theksuar, se nëse organizata terroriste Hamas do të konfiskojë ndihmat, atëherë “ato do të ndalen”./DW

Ministri për Evropën dhe Punët e Jashtme, Igli Hasani, ka kryesuar takimin e posaçëm të formatit Arria të Këshillit të Sigurimit, ku me ftesën e Shqipërisë, Kosova përmes presidentes Vjosa Osmani ka mbajtur fjalën në tryezën më të lartë vendimmarrëse në botë.

Hasani theksoi se dhuna seksuale e lidhur me konfliktin është një krim lufte dhe mbetet një sfidë thelbësore e sigurisë globale, teksa nënvizoi se bota mund të mësojë shumë nga Kosova lidhur me këtë çështje.

“Vijmë nga një rajon (Ballkani Perëndimor) që në një të kaluar jo shumë të largët, ka qenë skenë e konflikteve të mëdha dhe vuajtjeve të shumta njerëzore, një realitet i zymtë që u pasqyrua dhe në raportimet e takimit të sotëm. Dhuna seksuale e shkaktuar nga konflikti përbën një shkelje të rëndë të vlerave të përbashkëta humane dhe nuk duhet, dhe nuk do të tolerohet si një nënprodukt i pashmangshëm i luftës. Përhapja marramendëse e akteve të tilla të neveritshme, ku vetëm në Kosovë numërohen mbi 20,000 gra dhe vajza që kanë duruar dhunën seksuale, ka lënë plagë të thella. Të patrajtuara në kohë, këto plagë kanë potencialin të pengojnë përpjekjet e rimëkëmbjes dhe rivendosjes së paqes dhe sigurisë së qëndrueshme. Për këto arsye bindëse, Shqipëria mbetet e palëkundur në angazhimin e saj për të mbrojtur dhe siguruar që zërat e të mbijetuarve të dëgjohen, që autorët të vihen para përgjegjësisë dhe, në fund të fundit, që drejtësia të shërbejë si themeli mbi të cilin ne mund të ndërtojmë një paqe të qëndrueshme, me kalimin e kohës”, tha ai.

Kryediplomati shqiptar në fjalën e tij, gjithashtu u ndal tek vajzat e gratë e rrëmbyera nga terroristët e Hamasit, të cilat po mbahen diku në Gaza në kushte të tmerrshme.

“Ne duhet të mendojmë edhe për ato gra të pafajshme që janë rrëmbyer nga terroristët e Hamasit dhe po mbahen diku në Gaza, në kushte të tmerrshme. Ne bëjmë thirrje për lirimin e tyre të menjëhershëm dhe pa kushte”, vijoi ai.

Derisa tha se dhuna seksuale vazhdon të përdoret si një taktikë lufte dhe terrori, ai shtoi se mosndëshkimi përjetëson kulturën e dhunës dhe minon përpjekjet për ta çrrënjosur atë.

“Duhet t’i japim përparësi parandalimit dhe llogaridhënies. Dhuna seksuale e shkaktuar nga konflikti është e parandalueshme dhe e dënueshme! Ka një lidhje të drejtpërdrejtë midis mosndëshkimit dhe ekzistencës këmbëngulëse të dhunës seksuale të shkaktuar nga konflikti. Sigurimi i llogaridhënies dhe dhënia fund e mosndëshkimit për shkeljet dhe abuzimet, duhet të jetë një prioritet për të gjithë ne, brenda dhe jashtë Këshillit. Mesazhi duhet të jetë i qartë: Nuk do ti shpëtojë drejtësisë, askush, që ka promovuar, përdorur ose ka në plan të përdorë dhunën seksuale si taktikë lufte”, tha ai.

Në takimin për “Parandalimin dhe reagimin ndaj dhunës seksuale të shkaktuar nga konfliktet”, ka folur edhe presidentja Vjosa Osmani, ku potencoi rastin e Kosovës, teksa vuri theksin në rëndësinë e llogaridhënies.

Deputeti i Lidhjes Demokratike të Kosovës, Avdullah Hoti, tha se Lëvizja Vetëvendosje, nuk dëshiron që të marrë pjesë e as të votojë rezolutën për fuqizimin e Policisë së Kosovës, sepse nuk dëshiron që opozita t’i marrë meritat, raporton Ekonomia Online.

Ai ka theksuar se kjo pikë nuk duhet të ishte çështje ballafaqimi midis pozitës dhe opozitës. Sipas Hotit, shtesat e rrezikshmërisë, sigurimi shëndetësor dhe pensionimi i parakohshëm nuk do të duhej të refuzoheshin.

“Është çështje ekzistenciale për 7,000 familje të policëve. Qysh ia shpjegon këtë policit që e çon në veri dhe shtesën nuk ia qet. Nuk ka kuptim kjo sjellje. Është shqetësuese që hyni në vitin e katërt të qeverisjes dhe keni menaxhuar me 8.63 miliardë. Ku kanë shkuar këto para?”.

“Seanca e sotme jep një pasqyrë jo të mirë për vendin, një seancë e thirrur nga opozita. Kjo nuk ka kuptim për ballafaqimin parlamentar. Nëse e shihni me kujdes, rezoluta e propozuar nga opozita është shumë parimore. Janë tri kërkesa shumë të arsyeshme dhe parimore të propozuara nga opozita. Por, ju nuk doni që opozita t’i marrë këto kredi – thënë në aspektin politik”.

Mazhoranca edhe herën e kaluar e ka bojkotuar seancën e jashtëzakonshme.

Senatorët amerikanë që kanë marrë pjesë në një informim të klasifikuar nga zyrtarët e lartë të mbrojtjes dhe zyrtarë të tjerë të administratës amerikane, janë informuar se Izraeli nuk ka qenë përgjegjës për shpërthimin në një spital në Qytetin e Gazës.

Shpërthimi ndodhi më 17 tetor dhe besohet se ka lënë të vdekur qindra persona. Në spitalin Al-Ahli, që u godit nga shpërthimi i fuqishëm, ishin të strehuar palestinezë dhe po trajtoheshin palestinezë të plagosur.

Izraeli për këtë sulm ka fajësuar grupin palestinez, Xhihadi Islamik, por ai ka mohuar përgjegjësinë.

“Vlerësimi i komunitetit të inteligjencës është se Izraeli nuk është fajtor për shpërthimin në spitalin në Gazë”, tha senatori Chuck Schumer, pasi doli nga ky takim. “Ata besojnë se ishte një raketë e lëshuar nga terroristët në Gazë”.

Senatori demokrat, Chris Murphy, tha se inteligjenca “është e vendosur” se ky nuk ishte një operacion izraelit.

Më vonë, përmes një deklarate të përbashkët, kryetari i Komitetit të Senatit për Inteligjencë, Mark Warner, senatori Marc Rubio, thanë se pasi kanë shqyrtuar vlerësimin e inteligjencës janë “të bindur se shpërthimi ishte rezultat i një lëshimi të dështuar të një rakete nga militantët terroristë dhe nuk ishte rezultat i një sulmi ajror izraelit”.

Militantët e Hamasit nisën sulmet ndaj Izraelit më 7 tetor, që çoi në një përgjigje të ashpër nga autoritetet izraelite, që kanë bombarduar pareshtur Rripin e Gazës.

Më 18 tetor, Izraeli, pas kërkesës së SHBA-së, është pajtuar që të lejojë dërgimin e ndihmës humanitare nga një pikëkalim që lidh Gazën me Egjiptin, për palestinezët në këtë territor.

Deputeti i PDK-së, Rashit Qalaj, ka kërkuar nga Kuvendi i Kosovës që ta miratojë rezolutën e propozuar nga ta për përmirësimin e kushteve në Policinë.

Përmes kësaj rezolute, PDK-ja kërkon që 15 ditë nga miratimi i saj të ndahen mjetet për shtesat e rrezikshmërisë për Policinë e Kosovës. Po ashtu, brenda 60 ditëve të miratohet projektligji për pensionim të parakohshëm të zyrtarëve policorë, kurse nga 1 janari 2024 të mbulohet pagesa e sigurimit, raporton Ekonomia Online.

Sipas kësaj rezolute kërkohet që policisë t’u kthehen shtesat, të bëhen me sigurim shëndetësor dhe të mundësohet dalja e tyre në pensionim të parakohshëm.

Ai ka përmendur aksionin e 24 shtatorit dhe suksesin e policëve në përballje me terroristët serbë. Ndaj sipas fjalët që janë thënë për këtë suksese, duhet të kthehen në vepra.

“Miratimi i saj do të ishte dëshmia më e mirë për përkushtimin ndaj policisë, kur puna e tyre na bënë krenarë të gjithëve”.

Ka nisur seanca e jashtëzakonshme e Kuvendit të Kosovës për shqyrtimin e Propozim-Rezolutës për mbështetjen urgjente financiare të Policisë së Kosovës.

Fillimisht deputeti i PDK-së, Rashit Qalaj ka prezantuar propozim Rezolutën për Policinë e Kosovës.

Në këtë seancë nuk po marrin pjesë Grupi Parlamentar i Vetëvendosjes.