Category: Lajme

Përgatiti: K. Mulliqi & T. Arifaj

Shteti i fundit që ia njohu pavarësinë, i është mirënjohës Kosovës për përkrahjen dhe solidaritetin derisa po përjeton ditët më të errëta që nga themelimi, para 75 vjetëve.

“Jemi falënderues për përkrahje që kemi marrë nga Kosova, presidentja, kryeministri, ministrat, partitë politike në pushtet e opozitë dhe shoqëria civile. Kemi pranuar mesazhe të shumta në forma të ndryshme me përkrahje e solidaritet. Për fat të keq shumë kosovarë ende e mbajnë mend tragjedinë e tyre”, tha ambasadorja e Izraelit në Kosovë, Tamar Ziv.

Tash e dy javë, Izraeli është përfshirë në konfliktin më të ashpër në disa dekada kundër terroristëve të Hamasit, si pasojë e të cilit u vranë më shumë se 1400 izraelitë. Ambasadorja e këtij shteti në Kosovë, Tamar Ziv thotë se lufta nuk ka të bëjë asgjë me palestinezët, ngase edhe ata po vuajnë.

“Dua të them se kjo betejë nuk është kundër palestinezëve sepse ata përdoren nga terroristët. Palestinezët… mua më vjen keq edhe për ata sepse janë viktima të këtyre terroristëve dhe po përdoren si mburojë në mënyre që Izraeli të fajësohet siç ndodhi rasti i qartë me spitalin në Gaza. Spitalin e goditi një raketë e terroristëve por, propaganda e fajësoi Izraelin. Ky është një shembull se si ata vrasin popullin e vet. Për fat të keq në çdo konflikt pësojnë civilët por kjo luftë nuk është kundër palestinezëve por terroristëve”, tha Ziv.

Që nga 7 tetori, ambasadorja Ziv thotë se jeta nw Izrael është gjithçka përpos normale, derisa ditët vazhdojnë mbi parimet si kujtimi për të vdekurit, shpëtimi i pengjeve dhe uniteti.

“Situata është shumë e vështirë, njerëzit gradualisht po e kuptojnë nivelin e këtij sulmi terrorist që ndodhi. Trupat ngadalë po identifikohen e familjarët po njoftohen për vdekjen e tyre. Çdo ditë po mbajnë funerale dhe i gjithë vendi është i tronditur e në traumë, është situatë e pikëlluar. Por, ky sulm terrorist ka shërbyer në mënyrë që ne të bashkohemi dhe më duhet të them se përgjatë 2 javëve të shkuara nuk ka më ndarje në mes nesh, thjesht të gjithë jemi izraelitë që po e luftojmë Hamasin dhe Xhihadin Islamik”, tha Ziv.

Në shtetin prej rreth 9 milionë banorë, pothuajse të gjithë njohin dikë që është vrarë, zhdukur apo mbahet peng.

“Kjo nuk është vetëm betejë e Izraelit por e botës. Fakti që presidenti amerikan dhe kryeministri britanik por edhe liderë të tjerë erdhën në Izrael përgjatë këtyre ditëve për të shprehur përkrahjen dhe solidaritetit, mendoj se tregon që në botë ka pajtim se organizatat si HAMAS e ISIS nuk do të duhej të ekzistonin”, tha Ziv.

Derisa familjet druajnë për fatin e të dashurve të tyre, qoftë të përfshirë në luftime apo të rrëmbyer, Izraeli ka hyrë në atë që Associated Press e përshkroi si luftë për mbijetesën e shtetit.

Më shumë detaje i gjeni në Edicionin Qendror të lajmeve në ATV, në videon më poshtë:

Bernë, 21 tetor (Nefail Maliqi) – Nesër qytetarët zviceranë do të zgjedhin parlamentin e ri. Në këto zgjedhje me zviceranët për një muaj rresht ishin në fushatë edhe 30 kandidatë shqiptarë nga pothuajse secila parti politike që garojnë për ulëse në Këshillin Kombëtar, pra për deputet. Për dallim nga vitet e mëparshme, ky është numri rekord i kandidatëve shqiptarë. Tashmë gati të gjitha mbi 5 milion zarfet me fletëvotime kanë arritur përmes postës te Komisioni Qendror i Zgjedhjeve në 26 kantone, njofton gazeta zvicerane në shqip Canton27.ch.

Në Zvicër jetojnë dhe veprojnë 300,000 shqiptarë, prej të cilëve mbi 100 mije posedojnë pasaporta zvicerane

Gjatë vizitës së fundit të kryeministrit të Republikës së Kosovës, Albin Kurti, në Zvicër, pas takimit me presidentin e konfederatës helvetike, së bashku me ministër Hajrulla Çeku, në Ambasadën e Kosovës në Bern, kanë takuar kandidatët shqiptarë në zgjedhjet federale të 22 tetorit, të cilët i kanë uruar fitore dhe suksese në fushatën zgjedhore dhe ditën e votimit.

Sot në Zvicër jetojnë dhe veprojnë 300,000 shqiptarë, prej të cilëve mbi 100 mije shqiptarë nga gjitha viset e Ballkanit, janë të natyralizuar, dmth. që posedojnë pasaporta zvicerane, që më shumë se gjysma e tyre kanë të drejtë vote.

Përderisa migracioni i italianëve në Zvicër kishte nisur menjëherë pas Luftës së Dyte Botërore në vitet e 50-ta, ata sot kanë disa deputetë dhe politikanë në institucionet e larta shtetërore. Kurse, shqiptarët nga Ballkani, sidomos kosovarët, kanë filluar të migrojnë pak më vonë drejt Zvicrës në vitet e 70-ta për arsye të njohura, të politikave diskriminuese dhe presionit nga regjimi serb.

Ndryshe Ueli Leuneberger, themelues i Universitetit Popullor në Gjenevë dhe “ambasador” i shqiptarëve në Zvicër, për TV ATV ka thënë se “Është koha që një kandidat nga komuniteti shqiptar të ulet në Parlamentin zviceran në Bernë.”

Është një gjë evidente, që nuk mund ta fshehim se Partitë politike në Zvicër në prag të zgjedhjeve, përmes këtyre kandidatëve me origjinë nga Ballkani, kanë interesa dhe synime për të tërhequr votat e shqiptarëve, duke ditur numrin e tyre të madh në territorin e konfederatës helvetike.

Sidoqoftë, komuniteti shqiptarë si shembull i integrimit në Zvicër e meritojnë të kenë jo vetëm pasaportat helvetike, por edhe deputetët e tyre në Bernë.

Deputeti i Lëvizjes Vetëvendosje, Mefail Bajqinovci ka vizituar sot Mitrovicën e Veriut, Zubin Potokun dhe Zveçanin.

Ai ka thënë se këto qytete po jetojnë një realitet të ndryshuar pozitivisht, si rezultat i vendosmërisë së shtetit për të sjellë ligjshmëri.

“Ende ka punë për të bërë por ne nuk kemi plan me u ndalë! Kosova nuk ndahet as nga brenda aq më pak nga jashtë” ka shkruar Bajqinovci.

Ky është postimi i plotë i tij:

Një vizitë në fundjavë, siç shihet në pikë të ditës me mikun tim Sefin, në veriun e Mitrovicës, Zveçanit dhe Zubin Potokut, në një realitet krejtësisht të ndryshuar pozitivisht, si rezultat i vendosmërisë së shtetit për të sjellur ligjshmërinë në çdo cep të Republikës së Kosovës.

Ende ka punë për të bërë por ne nuk kemi plan me u ndalë! Kosova nuk ndahet as nga brenda aq më pak nga jashtë.

Një zjarr ka shpërthyer në veriperëndim të Korfuzit të shtunën, në zonën midis fshatrave Agios Stefanos dhe Avliotes, tha Brigada e Zjarrfikësve e Greqisë.

Banorët morën një urdhër evakuimi përmes numrit të urgjencës 112, pasi zjarri thuhet se po afrohej me shpejtësi drejt shtëpive të qytetarëve dhe po kërcënonte edhe hotelet në zonë.

Rreth 32 zjarrfikës me 16 makina zjarrfikëse janë duke luftuar me flakët. /AMNA

Tashmë gati tri ditë lagjet e Prishtinës që furnizohen me ujë nga liqeni Badocit nuk janë duke përdorur ujin e ujësjellësit as për pije e as për gatim, për shkak se IKSHPK-ja ka bërë të ditur se në analiza të ujit është paraqitur vlera e lartë e manganit dhe deri në pastrimin e ujit, gjë e cila pritet të ndodhë ditëve të ardhshme, nuk rekomandohet për përdorim.

Qytetarët i janë përmbajtur këtij njoftimi dhe disa nga ata po blejnë ujë për pije e disa të tjerë po furnizohen edhe me ndihmën të cilën i ka mundësuar Kompania Rajonale e Ujësjellësit KRU Prishtina duke shpërndarë ujë me autobot.

Qytetari nga Prishtina i cili jeton në lagjen “Bregu i Diellit”, Francesk Perkola tha për KosovaPress se po blen ujë vazhdimisht në treg derisa të rregullohet pastrimi i liqenit të Badovcit.

“Lagjja jonë furnizohet prej Badovcit, nuk jemi duke përdor ujin e pijes qe tri-katër ditë, me ujësjellës. Po furnizohemi me blerje në treg, deri në momentin që informohemi nga KRU ne do të furnizohemi me ujë që e blejmë në tregun tonë. Shpresoj se rregullohet, po presim” tha Perkola.

Edhe Selvet Dovelani u shpreh e shqetësuar për gjendjen e krijuar, pasi ajo nuk po mundet as të përgatisë ushqim.

“Gati pesë ditë ashtu diçka që më kanë dërguar mesazh edhe po marrim ujë për pije për diçka, për të pastruar diçka. Nuk ki çka të pastrosh kur nuk përgatit diçka. Megjithëse unë e kam vluar ujin për vete dhe e kam lënë mu ftohë për pirje, por tash po e blej”, u shpreh Dovelani.

Po ashtu, edhe Naser Veliu tha se po blenë ujë për pije deri në pastrimin e ujit nuk do ta përdorin as për zierje.

“Qe tri ditë ujësjellësi na ka njoftuar që nuk duhet të përdoret uji për pije dhe për zierje për arsyeje se kanë dalë vlera të larta të manganit. Na kanë njoftuar dhe nuk jemi duke e përdor, komplet kjo lagje. Po e blejmë ujin me bidonë dhe po furnizohemi këtë mënyrë derisa ujësjellësi ka një raport tjetër për neve”, tha Veliu.

Ndërsa qytetari Muhamet Metaj tha se vazhdimisht blejnë ujë dhe nuk e përdorin ujin e ujësjellësit pasi e konsideron se është vazhdimisht i papastër.

“Nuk e përdorim ujin e qytetit se frikësohemi që është i ndotur dhe duhet pastruar, duhet të ketë pastrim qyteti, por ne nuk kemi mundësi të kryejmë pagesa. Ujin pak më shtrenjtë, po e blejmë ujin e pijshëm. E dëmshme se dikush nuk ka mundësi se më mirë për ta blerë,” tha Metaj.

Ndryshe, Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve të cilët furnizohen nga Fabrika e ujit në liqenin e Badovcit që të mos përdoret uji për pije dhe përgatitje të ushqimit, pasi që analizat e mostrave të ujit në rezultatet laboratorike kanë treguar se ka vlera të rritura të manganit.

Ndërkohë që KRU Prishtina nuk i ka bërë të ditur zonat të cilat mund të përdorin ujin e pijes, duke thënë se pastrimi i ujit do të ndodhë ditëve të ardhshme, IKSHPK ka njoftuar zonat, të cilat nuk duhet ta përdorin ujin për pirje e as për zierje:

Qyteza e Graçanicës, fshatrat e Graçanicës që furnizohen nga ITUP Badovc, përveç fshatrave që furnizohen nga NJOU Lipjan, Ajvalia komplet, lagjet Veterniku, lagjet 038 dhe të gjitha tjerat që gravitojnë në brezin Graçanicë – Prishtine, lagjet Qendresa, Qendresa Home, Swiss Village, fshati Preoc, Cagllavicë, rruga “Behar Begolli”, “Richard Holbrooke”, Qendra “Albi Mall”, rruga “Shkupi”, “Holger Petersen”, “Malush Kosova”, objektet individuale nga rruga “Malush Kosova”, deri te “kisha në Matiçan”.

Po ashtu janë edhe zonat në drejtim të zonës industriale drejtimi për Lipjan, lagjja Qershia, lagjja NIC, zona afër Xhamisë në Veternik, Matiçan drejtimi nga Pallati i Drejtësisë, fshati ndërkombëtar, Mati rruga “Muharrem Fejza” me të gjitha rrugicat, drejtimi deri te QKUK, rruga “Enver Maloku”, objektet në lagjen Kodrina, objektet Tregtia, Iliria Building, objektet e Standardit (Sociale), dhe objektet e kyçura direkt ne linjat magjistrale Badovc Prishtinë, rruga “Ferat Dragaj”, “Hajrullah Abdullahu”, “Hilmi Rakovica”, “Vllezërit Gervalla”, “Afrim Zhitija”, “Armend Daci”, “Dervish Rozhaja”, “Thimi Mitko”, pjesa e zonës “te Xhambazët”, rruga “Sali Nivica”, “Norbert Jokl”, “Thimi Mitko”, objektet banesore në Bregun e Diellit, zonat Qendër dhe zonat tjera afër Qendrës Tregtare në brezin rrugor “Xheladin Rekaliu” deri te kryqëzimi i rrugës te Konviktet, zonat afër shkollës “Ismail Qemali”, rrugët “Mehmet Gradica”, “Hyzri Talla”, “Qamil Bala”.

Ambasadori i Gjermanisë në Kosovë, Jorn Rohde, tha se takimi i sotëm ndërmjet kryeministrit Albin Kurti me pesëshen diplomatike nënvizon angazhimin e palodhshëm për zgjidhje të qëndrueshme.

“Mbledhja e sotme e Përfaqësuesit të Lartë të BE-së Miroslav Lajçak dhe përfaqësuesve nga Gjermania, Franca, Shtetet e Bashkuara dhe Italia, së bashku me kryeministrin Albin Kurti, nënvizon angazhimin e palodhshëm për zgjidhje të qëndrueshme dhe në këtë mënyrë përshpejtimin e integrimit të plotë në familjen euroatlantike”, ka shkruar Rohde.

Rreth 100,000 njerëz marshuan sot në Londër në mbështetje të Palestinës, duke bërë thirrje për përfundimin e menjëhershëm të luftës.

Marshimi filloi në Marble Arch përpara se të shkonte në Whitehall dhe të përfundonte në Sheshin e Parlamentit.

Policia Metropolitane vlerësoi se deri në 100,000 njerëz i ishin bashkuar protestës që nga ora 14:00 me orën lokale, duke rritur vlerësimin e tyre të mëparshëm prej 70,000.