ATV

Category: Lajme

  • Krejt çka deklaruan Kurti, Vuçiq dhe Borrell pas përfundimit të takimeve

    Krejt çka deklaruan Kurti, Vuçiq dhe Borrell pas përfundimit të takimeve

    Një ditë më parë krerët evropianë dhe përfaqësuesi i lartë i Bashkimit Evropian, Josep Borrell kanë takuar ndaras kryeministrin e vendit, Albin Kurti dhe presidentin e Serbisë, Aleksandar Vuçiq në përpjekje për të rënë dakord lidhur me dokumentin e propozuar për zbatimin e marrëveshjes së Bazë e që përmbante edhe një draft për Asociacionin e komunave me shumicë serbe.

    Në këtë takim të pranishëm ishin kancelari gjerman, Olaf Scholz, presidenti francez, Emmanuel Macron, kryeministrja italiane, Giorgia Meloni, përfaqësuesi i Lartë i BE-së, Josep Borrell dhe presidenti i Këshillit Evropian, Charles Mishel.

    Kryeministri Albin Kurti pas takimit me liderët evropianë në Bruksel, ka thënë se është i gatshëm të nënshkruajë marrëveshjeve me Serbinë, e cila garanton zbatimin e tyre, që përfshinë edhe draftin evropian për Asociacionin.

    Sipas një komunikate të Qeverisë së Kosovës, presidenti i Serbisë, Aleksandar Vuçiq ka refuzuar të nënshkruajë marrëveshje me Kosovën dhe ka kërkuar që t’i pranohet një letër anësore, me të cilën praktikisht i zhbën tri parime të Marrëveshjes Bazë, të Aneksit të Zbatimit, si dhe të draftit të propozuar nga pesë emisarët më 21 tetor, 2023.

    Kurti theksoi që, pas sulmit të agresionit të 24 shtatorit, në Zveçan, prioritet për të është siguria në Kosovë, në veçanti siguria e kufirit me Serbinë, meqë nga ana tjetër erdhën paramilitarët të cilët kryen sulm terrorist e kriminal duke vrarë e plagosur policë të Kosovës. Që kjo të mos përsëritet kurrë më, nevojiten sanksione dhe ndëshkim për Serbinë.

    “Hetimet për grupin paramilitar e terrorist të sponsorizuar nga Serbia, duhet të përcaktojnë saktë se kush krejt çka bëri dhe si e ekzekutoi këtë akt agresioni, ndërkohë që nuk ka më dilema as te faktorët ndërkombëtarë mbi fajtorin”, shtoi ai.

    Grupi paramilitar terrorist i Millan Radoiçiqit dhe përgjegjësit e tjerë duhet të ekstradohen në Kosovë, ku do të kishte një gjykim të drejtë dhe fer, aq më tepër kur dihet se sistemi i drejtësisë në Kosovë dhe proceset gjyqësore monitorohen nga Misioni i Bashkimit Evropian për Sundimin e Ligjit, EULEX.

    Për progresin demokratik dhe ekonomik të saj, Kurti tha që Kosova e meriton statusin e vendit kandidat për BE, pra edhe bashkimin e pesë shteteve të mbetura të Bashkimit Evropian me shumicën prej 22 sosh, në njohjen e pavarësisë së Kosovës.

    Ndërkaq siguria e kufijve për Kosovën, bashkë me sigurinë kolektive në rajonin e Ballkanit Perëndimor, ngritën cilësisht nëpërmjet Marrëveshjes për Partneritet për Paqe me NATO-n drejt anëtarësimit të Kosovës në aleancën veri-atlantike. Në fund të takimit, Kryeministri Kurti tha se pranimi nënkupton nënshkrim, vetëm nënshkrimi nënkupton pranimin dhe garanton zbatimin.

    Ndërkaq, presidenti i Serbisë, Aleksandar Vuçiq ka deklaruar para mediave se Serbia nuk mund ta pranojë anëtarësimin e Kosovës në OKB.

    Ai tha se megjithatë janë të gatshëm të pranojnë propozimin për Asociacionin.

    Vuçiq tha se propozimi që ka marrë nga të dërguarit perëndimorë, i referohet ekskluzivisht formimit të Asociacionit, por se nuk mund të flasë për detajet, sepse marrëveshja është e tillë që të mos flitet.

    “Ne jemi plotësisht të gatshëm për formimin e Asociacionit në përputhje me propozimet që i kemi marrë”, u tha ai gazetarëve.

    Por, theksoi Vuçiq, Serbia “nuk mund ta pranojë anëtarësimin e Kosovës në Kombet e Bashkuara apo pavarësinë e Kosovës” – hapa që, në njëfarë mënyre, i kërkon Marrëveshja Bazë.

    “Serbia ka thënë qartë se dëshiron që të gjitha marrëveshjet të zbatohen, nga ajo bazë e vitit 2013 e deri te ato më vonë në Bruksel dhe Ohër, dhe ne gjithmonë kemi theksuar vetëm një gjë, e cila dihet – ajo është se Serbia nuk mund të pranojë anëtarësimin në OKB dhe as pavarësinë e Kosovës”, tha Vuçiq.

    “Nuk u bë fjalë për nënshkrim apo mosnënshkrim të ndonjë gjëje”, por “për zbatimin e asaj që është nënshkruar dikur, apo që është rënë dakord ndërkohë”, tha presidenti serb.

    Ai shtoi se askush në takime nuk i ka përmendur “sanksionet kundër Serbisë”, që do të lidheshin me sulmin në Banjskë.

    E pas përfundimit të të gjitha takimeve, Josep Borrell përmes një video-adresim theksoi se Kosova dhe Serbia nuk qenë të gatshme të pajtohen me njëra tjetrën në rrugën drejt normalizimit të marrëdhënieve ndërmjet tyre.

    Borrell, tha se janë shumë të shqetësuar për ngërçin në dialog ndërmjet Kosovës dhe Serbisë dhe se sulmet e fundit terroriste të 24 shtatorit janë dënuar sërish nga Bashkimi Evropian në takimet që kanë pasur me përfaqësuesit e Kosovës dhe Serbisë.

    Sipas tij, e vetmja rrugë për të ecur përpara është normalizimi i raporteve mes Kosovës dhe Serbisë.

    “Për këtë normalizim ekziston një pengesë e madhe e ai është Asociacioni i komunave me shumicë serbe”.

    Borrell thotë se për të kaluar këtë pengesë, palëve u është bërë një propozim evropian për themelimin e Asociacionit e cili sipas tij është “shumë serioz dhe i balancuar”.

    “Për t’i nxitur palët që të arrijnë një marrëveshje ne së bashku paraqitëm një propozim evropian serioz e të balancuar për themelimin e Asociacionit të komunave me shumicë serbe dhe ngulëm këmbë që palët të shfrytëzojnë këtë mundësi, që do të ishte një hap i madh përpara për normalizimin e marrëdhënieve dhe për të shmangur një episode të tjera dhune”.

    “Për fat të keq palët nuk qenë të gatshme të pajtohen për këtë pa parakushte, që ishin të papranueshme për palën tjetër”, tha ai duke nënvizuar se përpjekjet do të vazhdojnë por pa dhënë ndonjë njoftim se kur mund të vazhdojnë bisedimet”, ka deklaruar tutje Borrell.

    Ndryshe, më 21 tetor të dërguarit amerikanë dhe evropianë në Prishtinë e Beograd u dorëzuan palëve një dokument për zbatimin e marrëveshjes, pjesë e së cilës ishte edhe, siç thanë zyrtarët në Bruksel, “një propozim bashkëkohor evropian për statutin e Asociacionit të komunave me shumicë serbe”, që është edhe pika më e vështirë e procesit të bisedimeve Kosovë – Serbi.

    Kosova dhe Serbia kanë arritur Marrëveshjen Bazë për normalizimin e marrëdhënieve në muajin shkurt në Bruksel, ndërsa për Aneksin e Zbatimit të saj janë dakorduar në muajin mars në Ohër.

    Në asnjërin prej dokumenteve, palët nuk i kanë vendosur nënshkrimet. Kurti tha se edhe atëkohë ka qenë i gatshëm të nënshkruajë./Telegrafi

  • ​Mosha kur njerëzit fitojnë më së shumti para

    ​Mosha kur njerëzit fitojnë më së shumti para

    Vitet tuaja kur e arrini kulmin e fitimit të parave mund të jenë më afër se sa mendoni. Sipas kompanisë kërkimore të pagesave PayScale, punëtorët që punojnë me orar të plotë me diplomë të Bachelor priren të fitojnë më shumë para në të 40-at dhe 50-at e tyre.

    PayScale zbuloi gjithashtu se kur fitoni më shumë gjatë karrierës varet nga gjinia juaj: Rritja e pagave për gratë e arsimuara në kolegj ndalon rreth moshës 40 vjeçare. Për burrat e arsimuar në kolegj, pagat vazhdojnë të rriten edhe për një dekadë dhe arrijnë kulmin në fillim të të 50-ave.

    Edhe në Amerikë ekziston dallimi në fitimin e pagave për gjininë mashkullore dhe femërore. Të diplomuarit e gjinisë mashkullore fitojnë më shumë nga fillimi: Ata sjellin në shtëpi një pagë mesatare prej 50,700 dollarë në moshën 22 vjeçare, ndërsa koleget e tyre të gjinisë femërore fitojnë 39,500 dollarë në vit, pra një diferencë prej 11,200 dollarë.

    Nga mosha 22 deri në 33 vjeç, paga e grave në fakt rritet pak më shpejt se e burrave. Megjithatë, një ndryshim ndodh në moshën 34 vjeçare, kur rritja e të ardhurave të grave fillon të ngadalësohet dhe ajo e burrave mbetet e qëndrueshme.

    Deri në moshën 41-vjeçare, gratë e arsimuara në kolegj shohin kulmin e pagave të tyre në rreth 61,000 dollarë. Ndërkohë, meshkujt vazhdojnë të shohin rritje deri në moshën 53 vjeç, në të cilën pikë ata fitojnë rreth 95,000 dollarë.

    “Hendeku më i vogël në pagat e papërpunuara ndodh në moshën 25 vjeçare (me burrin që punon që fiton 10,600 dollarë sesa gruaja tipike që punon) dhe është më e madhe në moshën 54 vjeç (kur burri t fiton 32,800 dollarë më shumë se gruaja),” raporton Payscale.

    Arsyeja kryesore që burrat vazhdojnë të kenë rritje të pagave më vonë në karrierën e tyre sesa gratë “është zgjedhja e punës”, thotë kryeekonomistja e PayScale, Katie Bardaro për CNBC Make It. “Punët që janë më të zakonshme për meshkujt priren të kenë rritje më të gjatë të pagave reale”, si pozicionet e zhvilluesve të softuerit dhe inxhinierisë, thotë ajo. “Ndërsa punët që janë më të zakonshme për gratë – mësueset, punonjësit e kujdesit shëndetësor, punonjësit socialë, punonjësit e administratës, etj. priren të kenë rritje më të shkurtër të pagave reale”, shton tutje ajo./AkademiPune

  • Prokuroria: Aktgjykimi dënues kundër Salih Mustafës duhet të mbetet në fuqi

    Prokuroria: Aktgjykimi dënues kundër Salih Mustafës duhet të mbetet në fuqi

    Prokurori Cezary Mihailzcuk është shprehur se aktgjykimi dënues ndaj Salih Mustafës duhet të mbetet në fuqi, dhe ky vendim duhet të merret për bazë me arsyetimin se është i mbështetur në prova të besueshme.

    Në Dhomat e Specializuara në Hagë të enjten është mbajtur seanca e apelit në çështjen e ish-komandantit të Ushtrisë Çlirimtare të Kosovës, Salih Mustafa.

    Ish-komandant “Cali” në dhjetor të vitit 2022 u dënua me 26 vjet burgim për tre akuza për krime lufte, përfshirë ndalimin arbitrar dhe torturimin e të paktën gjashtë të burgosurve, dhe vrasjen e një të burgosuri.

    Në fjalën e tij, prokurori Mihailzcuk mes tjerash ka theksuar se Salih Mustafa ka pasur mundësinë të përdorë një gjykim të drejtë dhe t’i kundërshtojë akuzat në fjalë dhe të paraqesë dëshmi.Ai ka deklaruar se aktgjykimi dënues ndaj Mustafës duhet të mbetet në fuqi pasi është mbështetur në prova të besueshme.

    Në lidhje me argumentet e mbrojtjes së Mustafës për objektet në fshatin Zllash, prokurori Mihailzcuk theksoi se krimet janë kryer brenda një kompleksi të Zllashit.

    Aktakuza kundër Mustafës u konfirmua më 12 qershor 2020 dhe versioni i fundit u bë publik më 28 shtator 2020.

    Aktakuza e ngarkon Mustafën me përgjegjësi penale individuale dhe përgjegjësi penale si epror për krimet e kryera nga disa anëtarë të UÇK-së kundër personave të ndaluar në kompleksin e ndalimit në Zllash, në regjionin e Gollakut.

    Sipas aktakuzës, afërsisht midis 1 prillit 1999 dhe rreth fundit të prillit 1999, Salih Mustafa dhe disa ushtarë, policë e roja të UÇK-së patën të njëjtin qëllim të përbashkët të marrjes në pyetje dhe keqtrajtimit të të ndaluarve në kompleksin e ndalimit në Zllash.

    Salih Mustafa akuzohet për ndalim arbitrar, torturë dhe vrasje e paligjshme.

    Mustafa u arrestua dhe u transferua në njësinë e paraburgimit të Dhomave të Specializuara të Kosovës më 24 shtator 2020.

    Në paraqitjen e tij të mëtejshme, më 28 tetor 2020, Mustafa u deklarua i pafajshëm për të gjitha pikat e aktakuzës.

    Gjykimi filloi më 15 shtator 2021 me deklaratat hyrëse të Prokurorit të Specializuar dhe të përfaqësueses së viktimave.

    Aktgjykimi u shpall më 16 dhjetor 2022, kur trupi gjykues e shpalli Mustafën fajtor për krimet e luftës – ndalimit arbitrar, torturës dhe vrasjes së paligjshme dhe e dënoi me 26 vjet burgim.

    Në këtë çështje morën pjesë 8 viktima brenda një grupi të vetëm (Grupi 1).

    Shqiptimi i urdhrit për zhdëmtimin e viktimave u bë më 6 prill 2023.

    Trupi gjykues urdhëroi Mustafën të paguajë një shumë prej 207 mijë euro si kompensim për dëmin e shkaktuar ndaj viktimave të krimeve për të cilat është shpallur fajtor.

  • Zjarri brenda një shtëpie në Gjakovë, vdes një person

    Zjarri brenda një shtëpie në Gjakovë, vdes një person

    Një shtëpi është përfshirë nga zjarri në Gjakovë, ku si pasojë ka vdekur një person.

    Sipas raportit 24 orësh të Policisë së Kosovës me vendim të prokurorit trupi i pajetë i viktimës është dërguar në IML për obduksion.

    Rasti ka ndodhur gjatë mbrëmjes së enjtes.

  • BE-ja i vazhdon sot diskutimet për Kosovën dhe Serbinë

    BE-ja i vazhdon sot diskutimet për Kosovën dhe Serbinë

    Këshilli Evropian do të diskutojë sot për marrëdhëniet mes Kosovës dhe Serbisë gjatë ditës së dytë të samitit të Bashkimit Evropian (BE), pas një dite të ngjeshur me takime të shumta por të pafrytshme mes udhëheqësve të këtyre dy vendeve me liderët e BE-së të enjten në Bruksel.

    Presidenti i Këshillit Evropian, Charles Michel, tha në një konferencë të enjten pasmesnate se Këshilli nuk diskutoi dje për marrëdhëniet mes dy vendeve ballkanike, duke shtuar se “ne e mbështesim normalizimin e raporteve dhe shtensionimin [e situatës]. Për këtë do të diskutojmë nesër [e premte] në takimin e Këshillit”.

    Gjatë takimit të sotëm të Këshillit, liderët e BE-së pritet ta shprehin shqetësimin e thellë të tyre për situatën e sigurisë në veri të Kosovës, ta dënojnë sulmin e 24 shtatorit ndaj Policisë së Kosovës në veri, të kërkojnë që përgjegjësit të sillen para drejtësisë dhe që Serbia të bashkëpunojë plotësisht në hetimin e rastit. Po ashtu, Kosovës dhe Serbisë do t’iu kërkohet t’i zbatojnë të gjitha detyrimet të tyre nga dialogu pa vonesa dhe pa parakushte.

    Presidentja e Komisionit Evropian, Ursula von der Leyen, tha se Komisioni është duke e pritur rezultatin e hetimeve rreth sulmit në Banjskë të Zveçanit – për të cilin Kosova e lë fajtore Serbinë – kur u pyet për akuzat se Komisioni nuk ka qëndrim të baraspeshuar, pasi mori masa ndaj Kosovës në fillim të këtij viti, por jo edhe ndaj Serbisë, e cila e mohon përgjegjësinë për sulmin e muajit të kaluar.

    “Do të jem shumë e shkurtër në përgjigje, hetimet janë duke u zhvilluar dhe kemi thënë disa herë se kur të përmbyllen hetimet, ne do të vendosim për të ndërmarrë masa dhe çfarë lloj masash”, tha ajo.

    Kryeministri i Kosovës, Albin Kurti, dhe presidenti i Serbisë, Aleksandar Vuçiq, u pritën të enjten në takime të ndara nga liderët e Gjermanisë, Francës, Italisë, si dhe nga shefi i politikës së jashtme të BE-së, Josep Borrell, dhe përfaqësuesi i posaçëm i BE-së në dialogun Kosovë-Serbi, Mirosllav Lajçak.

    Takimet, e cilësuara si përpjekje për të ringjallur dialogun për normalizimin e marrëdhënieve, mbaruan pa ndonjë pajtim mes palëve.

    Sipas udhëheqësve të BE-së, arritjen e pajtimit e penguan kushtëzimet që paraqitën palët.

    Pas takimeve, Kurti tha se vetëm nënshkrimi i marrëveshjeve me vendin fqinj, garanton zbatimin e tyre, ndërsa presidenti serb Vuçiq këmbënguli në zbatimin e “asaj që është nënshkruar”.

    Shefi i politikës së jashtme të BE-së, Josep Borrell, i cili ndërmjetëson bisedimet për normalizimin e marrëdhënieve Kosovë-Serbi, tha se marrëveshja mes tyre nuk ishte e mundur, sepse “parakushtet e njërës palë ishin të papranueshme për tjetrën”.

    Ai konfirmoi se temë e diskutimeve në Bruksel ishte propozimi i ri i diplomatëve perëndimorë për statutin e Asociacionit të komunave me shumicë serbe në Kosovë, i cili u prezantua në Prishtinë dhe në Beograd më 21 tetor.

    “Palët nuk ishin të gatshme të bien dakord për të pa parakushte, e që janë të papranueshme për palën tjetër. Në fund, ne kërkojmë që palët të angazhohen sinqerisht në procesin e normalizimit”, tha Borrell.

    Sipas tij, kjo “mund të bëhet vetëm në kuadër të dialogut, sepse është e vetmja mënyrë për të përparuar në rrugën evropiane”.

    “Ne do të vazhdojmë të insistojmë dhe të punojmë për të arritur një marrëveshje. Por sot, për fat të keq, nuk ishte e mundur”, tha kryediplomati evropian./REL

  • Ambasadori i Kosovës në Bruksel: Kurti e pranoi pakon e plotë të BE-së, Serbia refuzoi

    Ambasadori i Kosovës në Bruksel: Kurti e pranoi pakon e plotë të BE-së, Serbia refuzoi

    Ambasadori i Kosovës në Bruksel, Agron Bajrami, është shprehur se kryeministri Albin Kurti e ka pranuar pakon e plotë të Brukselit.

    Ai ka thënë se fatkeqësisht, Serbia e refuzoi atë.

    “Kryeministri i Kosovës, Albin Kurti sot pranoi pakon e plotë të Brukselit, të propozuar nga të dërguarit e BE-së dhe SHBA-së, propozoi nënshkrimin e menjëhershëm, si dëshmi përfundimtare do të ketë respektim dhe zbatim të plotë të të gjitha pjesëve të marrëveshjeve, të mëparshme dhe të reja. Fatkeqësisht, Serbia refuzoi”, shkroi ai.

    Pa ndonjë përparim, Kosova dhe Serbia përmbyllën edhe një maratonë takimesh të enjten në Bruksel.

    Sipas udhëheqësve të BE-së, arritjen e pajtimit e penguan kushtëzimet që paraqitën palët.

    Siç deklaroi Borrell, pas takimeve në Bruksel, palët nuk arritën të pajtoheshin pasi tha se secila kishte parakushte që nuk i pranonte pala tjetër.

    “Jemi shumë të shqetësuar nga ngërçi i procesit të normalizimit ndërmjet Kosovës dhe Serbisë dhe sulmet e fundit terroriste që i kemi dënuar sërish në takimin që kemi pasur sot veçmas me kryeministrin Kurti, së bashku me presidentin Macron, kancelarin Scholz dhe kryeministren Meloni, dhe më pas me presidentin Vuçiq, për të diskutuar situatën, për të sqaruar edhe një herë se e vetmja rrugë përpara është dialogu”, tha Borrell.

    Përfaqësuesi i Lartë i Bashkimit Europian Josep Borell ka folur për herë të parë edhe rreth propozimit të Pesëshes për draft-statutin e Asociacionit të cilin e sollën më 21 tetor në Prishtinë. Duke e përmendur si pengesë, Borrell tha se BE ka bërë një propozim serioz dhe te balancuar për Asociacionin e Komunave me Shumicë Serbe.

    Shefi i diplomacisë evropiane tha se kanë insistuar që palët ta shfrytëzojnë këtë rast, që siç tha ai, që do të ishte hap i madh përpara drejt procesit të normalizimit.

    “Është një pengesë e madhe e që është themelimi i Asociacionit të komunave me shumicë serbe në veri të Kosovës. Në mënyrë që të ndihmohen palët për të arritur marrëveshje, bashkë kemi prezantuar një propozim serioz evropian dhe të balancuar për ta themeluar këtë asociacion dhe kemi insistuar që palët ta shfrytëzojnë këtë rast që do të ishte hap i madh përpara drejt procesit të normalizimit dhe të shmangen spiralet e reja të dhunës”, ka thënë ai.

    Qeveria e Kosovës pas takimeve ka konfirmuar, se edhe vetë kryeministri Albin Kurti, është shprehur i gatshëm të nënshkruajë marrëveshjet e Brukselit dhe të Ohrit, përfshirë edhe draftstatutin e Asociacionit të komunave me shumicë serbe, të prezantuar nga diplomatët-euroatlantikë javën e shkuar.

    Megjithatë, sërish nuk ka pasur nënshkrime të palëve, pasi siç ka thënë Qeveria e Kosovës në një komunikatë për media të enjten pas takimeve në Bruksel, një gjë e tillë është refuzuar nga Serbia.

    Sipas Kurtit, “pranimi do të thotë nënshkrim, dhe nënshkrimi garanton pranimin dhe zbatimin.”

    “Pavarësisht ofertës sime, Serbia refuzoi të nënshkruajë marrëveshjen dhe draftin e 21 tetorit. Përkundrazi, kërkoi një letër anësore që do të anulonte 3 parime të Marrëveshjes Bazë, Aneksin dhe propozimin e 21 tetorit. Pranimi do të thotë nënshkrim, dhe nënshkrimi garanton pranimin dhe zbatimin.”, ka thënë Kurti.

  • Borell konfirmon se s’ka marrëveshje mes Kosovës e Serbisë, thotë se palët kishin parakushte

    Borell konfirmon se s’ka marrëveshje mes Kosovës e Serbisë, thotë se palët kishin parakushte

    Shefi i Bashkimit Evropian për Politikë të Jashtme dhe Siguri, Josep Borrell, është deklaruar shkurt pas takimeve që kishte me kryeministrin e Kosovës, Albin Kurtin dhe presidentin e Serbisë, Aleksandër Vuçiq.

    Borrell ka thënë se palët nuk ishin të gatshme që të pajtohen për Marrëveshjen Bazë, duke shtuar se kishin parakushte.

    Ai po ashtu ka thënë se synojnë t’i afrojnë palët edhe drejt marrëveshjes, përfshirë edhe Asociacionin.

    ”Dhe veprimet terroriste që i kemi dënuar sërish që sot jemi takuar me kryeministrin Kurti dhe pastaj me presidentin Vuçiq për të diskutuar për situatën dhe për të shpjeguar se rruga e vetme përpara është normalizimi përmes dialogut dhe se BE kërkon normalizim marrëdhëniesh midis dy vendeve dhe kemi pasur një pengesë të madhe që ka të bëjë me formimin e Asociacionit në Kosovë dhe në mënyrë që t’i afrojmë palët drejt një marrëveshje, ne propozuam në propozim të balancuar, evropian për Asociacionin dhe insistuam te palët që të marrin këtë rast që do të ishte hap i madh përpara”.

    ”Për fat të keq, palët nuk ishin të gatshme të pajtohen me këtë pa parakushte që ishin të papranueshme nga pala tjetër dhe në fund, ne kërkuam palët që seriozisht të angazhohen në procesin e normalizimit që mund të bëhet vetëm nëpërmjet dialogut, sepse është mënyra e vetme të avancojnë në rrugën evropiane, ne do të vazhdojmë të angazhohemi për arritjen e një marrëveshjeje, por sot për fat të keq, nuk ishte e mundur pa parakushte nga njëra palë që ishte e papranueshme nga pala tjetër”, ka thënë Borrell.

  • Vuçiq me version ndryshe pas takimit me liderët e BE-së: Nuk bëhej fjalë për nënshkrim, por për zbatim

    Vuçiq me version ndryshe pas takimit me liderët e BE-së: Nuk bëhej fjalë për nënshkrim, por për zbatim

    Presidenti i Serbisë, Alaksandar Vuçiq, pas takimit me liderët e BE-së në Bruksel, u tha gazetarëve se në këtë takim, nuk bëhej fjalë për nënshkrim të ndonjë marrëveshjeje, por për zbatim të marrëveshjes së Ohrit, njofton gazetarja e ATV-së, Teuta Arifaj, drejtpërdrejt nga Brukseli.

    “Nuk bëhej fjalë sot për nënshkrim të marrëveshjeve, sepse ato çështje u kryen në Ohër e para Ohrit. Atëherë u nënshkrua nga te gjitha palët. Kjo duhet përmbushur, por nuk është përmbushur asnjë marrëveshje tash e 10 vjet”, u tha Vuçiq gazetarëve.

    Ai shtoi se është i gatshëm të nënshkruajë gjithçka, përpos njohjes së Kosovës.

    “Unë jam i gatshëm të nënshkruaj gjithçka, përpos asaj që De Facto a De Juro çon në njohje të Kosovës. Ketë vazhdimisht po ua them. Nuk behët fjalë për nënshkrim, por zbatim”, tha Vuçiq.
    Ai foli edhe sanksionet, duke thënë se askush nuk i ka përmendura atij sanksione kundër Serbisë. /atvlive.tv

    Më shumë detaje i gjeni në emisionin CONTEXT në ATV, ku do të ketë edhe lidhje direkte nga Brukseli, nga gazetarja Teuta Arifaj.

  • Nis ndërtimi i bulevardit të ri në Vushtrri

    Nis ndërtimi i bulevardit të ri në Vushtrri

    Përgatiti: Sara Shehu

    Në qytetin e Vushtrrisë është vënë gurthemeli për rregullimin e bulevardit.

    Për këtë projekt, i cili konsiderohet një nga investimet më të mëdha në qytet, kryetari i komunës, Ferit Idrizi, tha se kanë ndarë afro tre milionë euro.

    “Është një investim kapital që mbërrin vlerën afër tre milionë euro që është sheshi i qytetit, ku do të jetë me të gjitha komponentët dhe standardet që kërkohen nga qytetarët”, tha Idrizi.

    Tutje, Idrizi ka bërë të ditur se në kuadër të projektit do të investohet edhe në rritjen e numrit të parkingjeve, ngaqë kjo ka qenë një telash i kamotshëm për qytetarët.

    “E kemi vlerësuar si projektin më të rëndësishëm për arsye se sheshi i qytetit do të lidhë edhe pjesë tjera dhe do të lidhet edhe tregu i qytetit, ku do të hapë perspektivë për të gjitha bizneset që janë këtu. Arsyeja pse kemi dashur të kemi edhe parkingun nëntokësor këtu, është pikërisht që këto biznese që janë afër këtu, të kenë qarkullim sa më të madh. Do të lidhë edhe Kalanë e Qytetit”, tha Idrizi.

    Një projekt të tillë po e mirëpresin edhe vushtrriasit.

    “E përgëzojmë komunën për këtë projekt, është i qëlluar, urojmë më të mirat se ky projekt ka qenë i nevojshëm. Ndërkohë, urojmë të bëhet zgjidhje edhe për njerëzit që punojnë këtu në shesh”, tha Enver Pushkolli, qytetar.

    Sipas zyrtarëve komunalë, ndërtimi i bulevardit të qytetit pritet të përfundojë në vitin e ardhshëm.

  • Policia e Kosovës do ta paditë qeverinë për mosekzekutimin e shtesave

    Policia e Kosovës do ta paditë qeverinë për mosekzekutimin e shtesave

    Përgatiti: Kenare Mulliqi

    Që nga muaji shkurt zyrtarët policorë të Kosovës janë duke e pritur Qeverinë ta bëjë ekzekutimin e shtesave të rrezikshmërisë në punë, ashtu siç iu takon me ligj, megjithatë as pas nëntë muajve nuk do t’i marrin ato.

    Kështu të paktën thonë në Sindikatën e Policisë së Kosovës.

    Për këtë arsye, kjo Sindikatë ka vendosur ta paditë shtetin, për mosekzekutimin e shtesave, të cilat u premtuan se do t’i marrin në formë retroaktive.

    Kryetari Imer Zeqiri thotë se janë në përgatitje e sipër të padisë.

    Televizioni ka pyetur Ministrinë e Financave dhe atë të Punëve të Brendshme, nëse ekzekutimi i shtesave për nëntë muaj punë do të bëhet shpejt dhe nëse kjo do të realizohet në mënyre retroaktive, por këto dy institucione kanë zgjedhur të mos përgjigjen.

    Megjithatë, në emër të tyre foli deputeti i Lëvizjes Vetëvendosje, që është edhe anëtar i Komisionit për Siguri, Mefail Bajqinovci, i cila tha se policët do t’i marrin shtesat për rrezikshmëri brenda këtyre dy muajve.

    Por, as Bajqinovci nuk e di nëse zyrtarët policorë do t’i marrin paratë e shtesave të gjitha përnjëherë.

    Veç policëve, shtesa që nga maji shkurt nuk kanë marrë as punëtorët e sektorit publik, puna e të cilëve llogaritet me rrezikshmëri sipas Ligjit për Paga.