Category: Lajme

Policia e Kosovës ka arrestuar një shtetas të Serbisë në pikën kufitare të Jarinjës pasi ka tentuar t’u japë ryshfet për të kaluar kufirin me kamion, përkundër që rimorkioja ishte me librezë të skaduar qarkullimi.

Sipas njoftimit, ai kishte tentuar të jepte një shumë të parave, e pas arrestimit, i dyshuari është dërguar në mbajtje.

Rasti është iniciuar si “dhënie e ryshfetit”.

Ministri i Bujqësisë, Faton Peci, ka bërë të ditur se është hapur aplikimi për grante në Programin për Zhvillim Rural.

Peci bëri të ditur se vlera e këtij granti është 24.6 milionë euro, ku do të mbështeten disa kategori.

“Këtij Programi do mbështeten sektorë të prodhimit, agro-përpunimit e zhvillimit rural me qëllim të ngritjes dhe zgjerimit të kapaciteteve të bujqve tanë”, tha Peci.

Tutje, ai bëri të ditur se thirrja për aplikim do të qëndrojë e hapur për 30 ditë nga dita e sotme.

Policia e Kosovës ka njoftuar se ka vdekur edhe një person nga sulmi me armë që ndodhi të dielën në Vushtrri.

Viktima e dytë po trajtohej në Qendrën Klinike Universitare të Kosovës, derisa gjendja e tij ishte e rëndë.

Policia ka njoftuar se me vendim të prokurorit trupi i pajetë i viktimës është dërguar në Institutin e Mjekësisë Ligjore për obduksion.

“Raportohet se mbrëmë në QKUK më Prishtinë, ka vdekur edhe viktima e dytë”, thuhet në njoftimin e Policisë.

Policia e Kosovës ka bërë me dije gjatë ditës së djeshme se numri i të arrestuarve për rastin në Vushtrri ka arritur në pesë.

Në rastin e së dielës që ndodhi pasdite në rrugën “Mehmet Konjuhi” në Vushtrri, mbeti i vrarë një person dhe dy të tjerë u plagosën.

Qeveria e Kosovës ka mbajtur mbrëmë mbledhje elektronike, në të cilën ka ndryshuar dhe plotësuar vendimin e Qeverisë, duke zgjatur afatin për regjistrimin me benefite financiare për pronarët e automjeteve me targat “PR”, “KM”, “PZ”, “GL”, “UR”, “PE”, e të tjera, deri me 1 dhjetor 2023.

Sipas Qeverisë, ky ndryshim vjen si rezultat i kërkesës së madhe të shënuar së fundmi për regjistrim të automjeteve me targa RKS.

“Vendim i ri, po ashtu parasheh që pas datës 1 dhjetor 2023, pronarët e mjeteve të pajisura me targat ilegale, nuk do të kenë më mundësinë që këto mjete t’i regjistrojnë me targa RKS, të hyjnë apo të qarkullojnë në dhe përmes territorit të Republikës së Kosovës”, thuhet në komunikatë.

Oligarku rus, Alexey Kuzmichev, është arrestuar dhe po merret në pyetje në Francë në lidhje me dyshimet për shmangie të tatimeve dhe pastrim parash, si dhe për shkeljen e sanksioneve ndërkombëtare, tha Zyra e Prokurorit për Financa më 31 tetor.

Një ditë më herët, autoritetet kanë kryer bastisje në shtëpinë e Kuzmichevit në Paris dhe në rajonin Var.

Kuzmichev vazhdon të jetë i ndaluar nga autoritetet dhe ende ndaj tij nuk janë ngritur akuza. Avokatët e tij ende nuk janë deklaruar për rastin.

Zyrtarët doganorë francezë vitin e kaluar konfiskuan jahtin “Le Pettie Ourse” të Kuzmichevit. Konfiskimi i jahtit prej 27 metrash ishte pjesë e sanksioneve të vendosura nga Bashkimi Evropian për shkak të lidhjeve të oligarkut me presidentin rus, Vladimir Putin.

Ky veprim nxiti një betejë ligjore midis autoriteteve dhe Kuzmichevit, i cili është një prej aksionarëve të bankës ruse, Alfa Bank.

Kuzmichev po ashtu në gusht të këtij u fut në listën e sanksioneve amerikane për shkak të pushtimit të paprovokuar rus të Ukrainës./REL/

Ndërmarrja Publike Banesore të martën ka përuruar “Muralin” ndërgjegjësues për kancerin e gjirit, me rastin e Muajit Rozë, raporton Ekonomia Online. Në ceremoninë e përurimit u tha se murali do të shërbejë si mesazh i fuqishëm i vetëdijesimit për kancerin e gjirit si dhe për rëndësinë e zbulimit të hershëm. Në të njëjtën kohë paraqet një formë të solidarizimit me personat që janë përballur dhe vazhdojnë të përballen me të si dhe familjet e tyre duke përhapur shpresë, forcë dhe mbështetje.

Nënkryetarja e Prishtinës, Donjeta Sahataçiu, tha se morali i dedikohet grave që i kanë mbijetuar kësaj sëmundjeje.

“Ne jemi bërë bashkë për Prishtinë dhe jemi bërë përballë kësaj sfide. Për ta lënë një trashëgimi siç është ky morali këtu në qendër të Prishtinës, si një shenjë për të gjitha gratë që e kanë tejkaluar këtë sfidë”, tha ajo.

Kryeshefi i Ndërmarrjes Publike Banesore, Artan Berisha, tha se murali nuk paraqet vetëm një vepër arti, por është simbol i shpresës, unitetit dhe forcës.

Sipas tij, kjo sëmundje mund t’i prek të gjithë, prandaj edhe murali është dëshmi e vendosmërisë sonë për t’u përballur me këtë sfidë.

“Sot, jemi mbledhur për të përuruar një iniciativë të NPB-së që tregon angazhimin ndaj një kauze të rëndësishme  ndërgjegjësimin ndaj kancerit të gjirit. Ky mural para nesh nuk paraqet vetëm një vepër arti, por është simbol i shpresës, unitetit dhe forcës”.

“Ai përfaqëson fuqinë e ndërgjegjësimit, edukimit dhe mbështetjes si dhe ndikimin që një komunitet mund t’a ketë kur është i bashkuar me një qëllim të përbashkët. Kanceri i gjirit na prek të gjithëve, drejtpërdrejt ose tërthorazi, dhe ky mural është dëshmi e vendosmërisë sonë për t’u përballur me këtë sfide”.

“Prandaj, përderisa përurojmë këtë mural, ne sot nderojmë guximin e të mbijetuarve dhe familjarëve të tyre, kujtojmë ata që i kemi humbur dhe shfaqim angazhimin tonë për të rritur ndërgjegjësimin dhe për të nxitur përparimin e vazhdueshëm në këtë drejtim”.

Katër persona janë arrestuar pasi që dje e kanë sulmuar një tjetër fizikisht në Dragash.

Në raportin 24 orësh të policisë thuhet se gjatë përleshjes është dëmtuar dera e hyrjes së një objekti.

Viktima ka pranuar tretman mjekësor. Me vendim të prokurorit të dyshuarit janë dërguar në mbajtje.

Nënkryetarja e Partisë Demokratike të Kosovës, Vlora Çitaku, e ka quajtur përndjekje dhe persekutim, bastisjen e ish-këshilltarit të Hashim Thaçit, Artan Behrami.

“Kjo nuk është drejtësi. Kjo është përndjekje. Persekutim. Dje Blerimi e Bashkimi. Sot Artani. Nesër nuk e di. Po ajo që po shihet sheshazi është që kjo është përndjekje politike”, ka shkruar ajo.