Nga ora 09:00, do të filloj Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit që në rend të ditës janë pesë pika, si dhe Komisioni për Arsim, Shkencë, Teknologji, Inovacion, Kulturё, Rini dhe Sport e cila në rend të ditës ka tri pika
Komisioni për Arsim, Shkencë, Teknologji, Inovacion, Kulturё, Rini dhe Sport mblidhet në ora 09:30, dhe në rend të ditës janë tri pika.
Ndërsa nga ora 10:00 do të filloj Komisioni hetimor parlamentar në lidhje me rastet e dhunës seksuale dhe dhunës në familje e cila në rend të ditës ka katër pika për diskutim.
Po ashtu edhe Komisioni për Mbikëqyrjen e Financave Publike mblidhet në ora 10:00 dhe në rend të ditës ka tri pika.
Sot do të vazhdojë procesi gjyqësor ndaj Pjetës Shalës në Gjykatën Speciale në Hagë.
Seanca nis në orën 09:30 dhe pritet të përfundojë rreth orës 16:00.
Sipas aktakuzës, Pjetër Shala ishte anëtar i Ushtrisë Çlirimtare të Kosovës (‘UÇK’) i stacionuar në Kukës, Shqipëri.
Ai akuzohet për krime të luftës të ndalimit arbitrar, trajtimit mizor, torturës dhe vrasjes së paligjshme.
Krimet për të cilat akuzohet Shala dyshohet se u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej UÇK-së. Sipas aktakuzës, viktimat e këtyre krimeve ishin të gjithë shtetas të RFJ-së dhe persona të cilët nuk merrnin pjesë aktivisht në luftime.
Të mërkurën një grabitje e armatosur ka ndodhur në një argjendari në Suharekë rreth orës 15:45, ku si pasojë një polic u plagos dhe një tjetër u lëndua gjatë aksionit.
Policia e Kosovës ka dhënë detaje të rastit, duke njoftuar se me të marr informatën për një rast grabitje e armatosur”, patrulla më e afërt është nisur në atë drejtim, duke mbërri shumë shpejt në vendin e ngjarjes.
“Të dyshuarit ishin të maskuar dhe të armatosur. Posa patrulla policore ka mbërri në vendin e ngjarjes të dyshuarit kanë shtënë me armë zjarri në drejtim të policisë, me atë rast një zyrtar policor është plagosur lehtë nga arma e zjarrit, ndërsa një tjetër zyrtar policor është lënduar gjatë aksionit”, thuhet në njoftim.
Policia njofton se ndërkohë kanë mbërri në vendin e ngjarjes edhe përforcime të tjera policore dhe se nga të dhënat e para dyshohet se ishin katër të dyshuar.
“Të dyshuarit janë larguar nga vendi dhe policët iu janë vënë pas, gjatë rrugës të dyshuarit kanë vendosur pengesa të ndryshme dhe kanë arrit që të arratisën”, vijon njoftimi i Policisë së Kosovës.
Drejtoria Rajonale e Policisë në Prizren në bashkëpunim edhe me drejtoritë tjera rajonale thonë se janë angazhuar me tërë kapacitetin e tyre për zbardhjen e rastit konkretisht identifikimin, lokalizimin dhe arrestimin e të dyshuarve.
“Ftojmë gjithashtu të gjithë qytetarët që kanë çfarëdo informacioni që mund të na ndihmon në kapjen e kryesve të këtij rasti të kontaktojnë policinë”, thuhet mes tjerash në njoftimin e Policisë së Kosovës.
Drejtori i Policisë në Prizren, Faton Aliu, ka dhënë detaje shtesë në lidhje me grabitjen e armatosur në Suharekë.
Ai ka bërë të ditur se nga ky incident përveç një polici të plagosur, ka mbetur edhe një tjetër i lënduar.
“Grabitësit kanë plagosur një polic. Kanë dëmtuar veturën e Policisë. Kanë arritur të marrin një sasi të arit në argjendari, pronari i lokalit nuk është i lënduar. Në këtë rast ka pasur shkëmbim zjarri në mes Policisë e grabitësve, edhe një polic që ka gjuajtur në drejtim të grabitësve është i lënduar në krah, por jo si pasojë e armës së zjarrit”, ka thënë Aliu.
Ai ka thënë se të dyshuarit kanë qenë të maskuar, kanë pasur armë të gjata me vete dhe një veturë hiri që rezulton të jetë me targa të vjedhura.
“Janë katër persona të dyshuar që ishin të pajisur me arma të gjata, vetura ngjyrë hiri, me targa 01, që ka rezultuar të jetë e vjedhur diku në Prishtinë. Nuk kemi identitet të tyre ende”, ka vijuar ai.
Presidentja e Kosovës Vjosa Osmani ka takuar ambasadorin e SHBA-së në Kosovë, Jeffrey Hovenier.
Në njoftimin e Presidencës thuhet se në takim Osmani dhe Hovenier kanë diskutuar për zhvillimet e fundit në vend e rajon, procesin e dialogut dhe situatën e sigurisë në vend.
Në njoftim po ashtu thuhet se presidentja Osmani nënvizoi edhe njëherë rëndësinë e bashkëpunimit të ngushtë me SHBA-të, për të fuqizuar prezencën e Republikës së Kosovës në arenën ndërkombëtare.
“Presidentja e Republikës së Kosovës, Vjosa Osmani priti në takim të rregullt ambasadorin e Shteteve të Bashkuara të Amerikës, Jeffrey Hovenier me të cilin bisedoi për zhvillimet e fundit në vend e rajon, procesin e dialogut dhe situatën e sigurisë në vend. Presidentja Osmani nënvizoi edhe njëherë rëndësinë e bashkëpunimit të ngushtë me SHBA-të për të fuqizuar prezencën e Republikës së Kosovës në arenën ndërkombëtare”, thuhet në njoftimin e Presidencës.
Një person është arrestuar nën dyshimin për hedhjen e një mjeti shpërthyes që lëndoi dhjetë persona në një treg të kafshëve në Prizren.
Rasti ndodhi në mëngjes rreth orës 5. Me të dalë në vend të ngjarjes Policia në bashkëpunim me Prokurorinë Themelore në Prizren fillimisht identifikuan tre të dyshuar, por me zhvillimin e hetimeve, Policia njoftoi se dy persona ishin kryes të veprës që u cilësua si “shkaktim i rrezikut të përgjithshëm”.
Autoritetet ende janë në kërkim të personit të dytë të dyshuar, ndërkaq të arrestuarit R.M., i lindur në vitin 1982, nga Gjilani, i është shqiptuar masa e ndalimit prej 48 orësh.
Sipas Policisë, rasti ndodhi pas një mosmarrëveshjeje mes tregtarëve.
“Rreth orës 4.50, kemi pranu se ka një plagosje në tregun e kafshëve. Njësitë relevante kenë dalë menjëherë, 9 persona kanë marrë plagë si pasojë e hedhjes se granatës, 9 persona fillimisht janë dërgu në trajtim mjekësor për trajtim mjekësor, ndërkohë më vonë edhe një qytetar tjetër ka pësuar lëndime dhe ka marrë trajtim mjekësor. Nga hetimet e para bëhet e ditur se fillimisht këtij rasti i ka paraprirë një zënkë e çastit, pastaj një përleshje, pastaj një nga të dyshuarit ka hedhur granatën”, tha zëdhënësi i Policisë në Prizren, Vesel Gashi.
Njëkohësisht, të lënduarit janë jashtë rrezikut për jetë, tha shefi i repartit të Emergjencës në Spitalin e Prizrenit, Hekuran Veçgishti, përmes një përgjigje me shkrim për ATV-në.
Megjithatë, pesë prej tyre janë dërguar në QKUK për trajtim të mëtutjeshëm.
“Bëhet fjalë për pesë pacientë të lënduar nga një mjet plasës, me ç’rast kanë pësuar lëndime dy nga ta në regjionin e qafës, dhe në ekstremitetet e sipërme dhe të poshtme, dy të tjerë kanë pësuar lëndime në regjionin e toraksit dhe në regjionin e ekstremiteteve. Gjendja e tyre e përgjithshme, duke u bazuar në parametrat vitalë është stabile. Njërit pacient i është vendosur dreni torakal, momentalisht është duke u trajtuar në Kirurgjinë Torakale, ndërsa pacienti tjetër tani do të vendoset në Kirurgjinë Torakale, dhe pacientët e tjerë janë më të lehtë dhe sipas të gjitha gjasave do t’i lirojmë në shtëpi pas ekzaminimeve shtesë”, tha Avdush Bajgora, mjek kujdestar në QKUK.
Sipas burimeve të ATV-së, të lënduarit janë nga komuna e Podujevës, ndërkaq motivet janë ende duke u hetuar, njoftoi Policia.
Karikatorin e pati të mbushur me tetë fishekë. Me revole, S.J., të martën u nis drejt ndërtesës së Komisionit të Pavarur për Miniera dhe Minerale. Shënjestër e tij ishte inspektorati.
“Roja ka arritur t’ia marrë gurin për ta evituar rrezikun. Kur roja ia merr gurin ai i ka thënë se ka armë. Realisht është frikësuar roja dhe ai e ka nxjerrë armën… ka filluar me kërcënime, sharje e fyerje dhe ka pyet: “a dalin nga këtu inspektorët e minierave, sepse unë e di tani çfarë bëj”, tha Naim Sejdiu, kryeinspektor në KPMM.
I menjëhershëm ka qenë intervenimi i policisë, duke e arrestuar të dyshuarin dhe duke e dërguar në mbajtje.
“Është arrestuar i dyshuari mashkull kosovar, pasi ka ekspozuar një armë-pistoletë dhe ka kryer veprën e lartcekur. Njësitet policore në vendin e ngjarjes gjatë kontrollit të të dyshuarit, kanë gjetur dhe kanë konfiskuar një pistoletë me karikator dhe 8 fishekë. Pas intervistimit, me vendim të prokurorit, i dyshuari është dërguar në mbajtje”, thuhet në njoftimin e Policisë.
Për ta zbardhur rastin, që u cilësua si shkaktim i rrezikut të përgjithshëm dhe posedim i paautorizuar i armës, gjatë ditës hetuesitë policorë morën video-incizimet e kamerave të objektit.
Kryeinspektori Sejdiu thotë se S.J. është bashkëpronar i një kompanie gurëthyesi, që ka aplikuar për licencë për shfrytëzim dhe aktivitete të veçanta, por që nuk e ka marrë aprovimin e KPMM-së.
“Ndërmarrja “Javor – F” sh.p.k me pronar F.J., S.J., Pejë, ka dy kërkesa në KPMM, njëra është licencë për shfrytëzim, ndërsa tjetra është për leje për aktivitete të veçanta. Aplikacioni në KPMM është bërë më 23.01.2020, sipas aktvendimit të Bordit, i është refuzuar kërkesa për licencë shfrytëzimi për arsye që kërkesa ka qenë në kundërshtim me Ligjin për Miniera. Leja për aktivitete të veçanta është në proces, por në mungesë të bordit… por, nëse nuk ka leje të shfrytëzimit nuk e di çfarë i duhet leja për aktivitete të veçanta, ku e merr materialin”, tha Sejdiu.
ATV-ja ka kontaktuar me pronarin e kompanisë në fjalë, Fatlind Javori. Ai mohon se S.J. është bashkëpronar në ndërmarrjen e tij, derisa thotë se në momentin e kërcënimit me armë, i dyshuari ishte në gjendje të rënduar mendore.
“Nuk është as pronar as nuk ka të bëjë me këtë kompani. Ai ka punuar në kompani vetëm diku dy vjet. Ai ka qenë nën ndikim të alkoolit dhe ka probleme psikike. Ka qenë invalid i luftës dhe ka plagë. Ka dëshmi, ia kanë dërguar edhe një avokat, ka pasur terapi te psikiatri dhe nuk e ka aplikuar. I ka ardhur momenti kinse që e kanë ndalë në rrugë me kamion për leje apo diçka. Nuk ka të bëjë asgjë me kompaninë tonë”, thuhet në përgjigjen e pronarit të “JAVORI – F” SH.P.K, Fatlind Javori.
KPMM-ja, sipas kryeinspektorit, nuk ka informata se firma në fjalë ka operuar ilegalisht. Kryeinspektori Sejdiu thotë se zyrtarë të KPMM-së janë kërcënuar nga anëtar të familjes Javori, edhe në vitin 2018.
Kur u shtua interesimi i qytetarëve të komunitetit serb për t’u pajisur me pasaportë të Kosovës, Komisioni Evropian doli me një propozim të ri.
Propozimi që udhëtimi në zonën Schengen me pasaporta të Zyrës Koordinuese të Ministrisë së Brendshme të Serbisë të lejohet, nga serbët e veriut po konsiderohet si veprim pozitiv.
Kritikat se kjo është shkelje e sovranitetit dhe ndikon në integrimin e serbëve, i kundërshtojnë organizatat e shoqërisë civile në Mitrovicë të Veriut.
“Shumë shqiptarë mendojnë se do të ndalojë integrimin e serbëve, por tashmë shumë qytetarë serbë kanë tashmë letërnjoftimin e Republikës së Kosovës, dhe në një mënyrë apo tjetrën disi qytetarët serbë janë të integruar në sistemin kosovar, dhe është e drejta e tyre e zgjedhjes nëse do…”, tha Aleksandar Sljuka nga Iniciativa e Re Sociale.
Ata thonë se qytetarët serbë po hasin në vështirësi gjatë procedurës për marrjen e nënshtetësisë kosovare.
“Duhet të kemi parasysh se shumë qytetarë tanë në veri kanë probleme ta marrin nënshtetësinë kosovare, andaj nëse do të rregullohej kjo çështje do të ishte shumë mirë. Që nga viti 2009 serbët që jetojnë në Kosovë dhe kanë pasaportat e Zyrës, nuk kanë të drejtë lëvizjeje të lirë, andaj peticioni i disa OJQ-ve të Kosovës ishte diskriminues. Mungonte shumë sensibilitet ndaj serbëve dhe e njëjta vlen edhe për Qeverinë. Ne konsiderojmë se do të duhej shfrytëzuar të gjitha përparësitë që serbët në Kosovë i kanë bazuar në ligj përfshirë edhe dyshtetësinë”, tha Stefan Veljkoviq nga Partia Demokratike Serbe.
Por disa qytetarë ende nuk janë përcaktuar.
Të martën, 21 organizata të shoqërisë civile përmes një letre dërguar Komisionit Evropian, kanë kërkuar që ky propozim të tërhiqet. Ndaj këtij propozimi reagoi edhe zv.kryeministri Besnik Bislimi, duke thënë se ai u bë pa u konsultuar me Qeverinë, si dhe paraqet shkelje të sovranitetit.
Vetëm në tre muajt e fundit, me pasaporta të Kosovës janë pajisur mbi 500 qytetarë të katër komunave të banuara me shumicë serbe.
Pas shkrepjes së kësaj fotografie, sekretari i përgjithshëm i NATO-s, Jens Stoltenberg, iu bashkua në një takim udhëheqësve të katër shteteve anëtare të NATO-s, nga Ballkani Perëndimor.
Stoltenberg bashkë me kryeministrin e Shqipërisë, Edi Rama, atë maqedonas, Dimitar Kovaçevski, Zoran Millanoviq nga Kroacia dhe kryeministrin e Malit të Zi, Millojko Spajiq, diskutuan gjerë e gjatë për situatën e sigurisë në Ballkan.
Ndonëse, situatën e sigurisë në rajon e vlerësoi të brishtë, Stoltenberg përjashtoi mundësinë e një kërcënimi ushtarak.
“Ky rajon është shumë i rëndësishëm për NATO-n dhe ka arsye për brengosje. Shohim kërcënime për ndarje në Bosnjë e Hercegovinë, gjendje të brishtë të sigurisë në Kosovë dhe ngecje të bisedimeve mes Beogradit dhe Prishtinës. Ndërkaq, shtete autoritare si Rusia po rrezikojnë integritetin demokratik me kërcënime kibernetike”, tha Stoltenberg.
Meqë një ditë më parë në Beograd, shefi i NATO-s kishte kritikuar presidentin e Serbisë për grumbullimin e forcave ushtarake përgjatë kufirit me Kosovën, Edi Rama kishte një propozim.
“Theksova edhe sot, në këtë takim, domosdoshmërinë e rritjes së numrit të forcave të NATO-s në Kosovë dhe domosdoshmërinë për ta garantuar kufirin mes Kosovës dhe Serbisë, i cili faktikisht është jashtë kontrollit dhe i cili në shërbim të aktiviteteve ilegale, të trafikut të armëve, të drogës, të aktiviteteve të cilat më pastaj ngatërrohen edhe me aktivitetin politik, me sfonde ultranacionaliste, që shkakton devijime të rënda, siç ishte devijimi në Banjskë”, tha Rama.
Por, për rrugën drejt paqes, sipas Stoltenbergut, i nevojshëm është themelimi i Asociacionit.
“Dialogu mes Prishtinës dhe Beogradit është thelbësor në rrugën e tyre drejt paqes dhe prosperitetit. Propozimet e fundit për themelimin e Asociacionit të komunave me shumicë serbe në Kosovë mund të jetë hap me rëndësi përpara. Është koha që të kapërcehen konfliktet rajonale”, tha Stoltenberg.
Vizita e Stoltenbergut në Shkup ishte e fundit në kuadër të turneut ballkanik, me ç’rast vizitoi edhe Kosovën.
Pas më shumë se një muaj prej kur ATV-ja raportoi se pesë zyrtarë policorë e fituan rastin në Gjykatë për pagën e 13-të, ky numër është rritur edhe më shumë.
Për 33 ditë edhe 75 zyrtarë policorë të tjerë, i kanë marrë katër paga të 13-ta, pasi fituan në gjykatë rastin kundër Qeverisë.
Madje, që kur Gjykata Supreme iu dha të drejtë policëve në kërkesat e tyre për pagën e 13-të, mbi 1 mijë policë të tjerë kanë ushtruar padi brenda vetëm 1 muaji.
Sipas juristëve, mundësitë janë reale që si rezultat i mendimit juridik të Gjykatës Supreme në favor të tyre, të gjithë policët do t’i marrin paratë për 4 paga të 13-ta.
Opinioni i Supremes u bazua në Udhëzimin Administrativ mbi Marrëdhënien e Punës për vitet 2018-2021.
Vetëm pagat e 13-ta për punonjësit e Policisë së Kosovës do t’i kushtojnë më shumë se 20 milionë euro buxhetit të shtetit.
Zyrtarëve policorë, Gjykata Supreme iu dha të drejtë edhe në pagën jubilare me rastin e pensionimit dhe shtesat sipas përgatitjes shkollore.
Qeveria i shkeli dy ligje kur i propozoi Kuvendit shkarkimin e një prej anëtarëve të bordit të Organit Shqyrtues të Prokurimit, për shkak të tenderit për Insulina të Ministrisë së Shëndetësisë.
Shkarkimi i Kimete Gashit, u bë pa ndonjë vendim nga gjykata kompetente, siç e kërkon ligji mbi të cilin është krijuar “Gjykata e Tenderëve”.
“Procedura e shkarkimit të anëtarit të fundit del të jetë e pazakontë, ngase as ligji sektorial pra LPP-ja në kuadër të të cilit funksionon OSHP-ja e as ligji që përcakton mënyrë e funksionimit të kësaj agjencie nuk e parashohin një procedurë të tillë të shkarkimit”, tha Dardan Gashi nga Demokraci Plus.
“LPP-ja si ligj themelues nuk ia njeh Qeverisë të drejtën e shkarkimit të anëtareve të KRPP-së ose në këtë rast OSHP-së, me anë të një vendimi, por parasheh që çështjen mund ta dërgojnë në gjykatën kompetente”, tha Ardit Gashi nga Demokracia Plus.
Teksa ligjshmëria e vendimit për shkarkimin e Kimete Gashit, është duke u trajtuar në Gjykatën Kushtetuese, bordi i OSHP-së mbeti me vetëm 3 anëtarë pas dorëheqjes së Agon Ramadanit.
Për shkak të vonesave në trajtimin e ankesave qindra miliona euro kanë mbetur të bllokuara.
Ditë më parë, ATV-ja raportoi se tenderi i Ministrisë së Shëndetësisë për ndërtimin e QKMF-së në Drenas, në vlerë prej 3 milionë eurosh, është duke u trajtuar në OSHP.
Ndryshe, Organi Shqyrtues i Prokurimit kishte mbetur pa bord për një periudhë kohore prej afërsisht 15 muaj. Bordi i ri ishte emëruar nga Kuvendi në qershor të vitit të kaluar.
