Një operacion i madh i ndërmarrë nga Policia e Kosovës ka rezultuar me arrestimin e dy të dyshuarve për grabitjen e argjendarisë në Suharekë javën e kaluar.
Në këtë aksion ka pasur edhe shkëmbime të zjarrit mes Policisë së Kosovës dhe të dyshuarve.
Për pasojë një nga të dyshuarit ka mbetur i vrarë, ndërsa një polic është plagosur lehtë në këmbë.
Partia Socialdemokrate (PSD) ka mbajtur konferencë për medie, duke kërkuar lirimin e kryetarit Dardan Molliqaj dhe pesë aktivistëve të kësaj partie, raporton Ekonomia Online. Ata u arrestuar gjatë protestës së PSD-së në kundërshtim të vizitës së kryetares së Dhomave të Specializuara të Gjykatës Speciale, Ekaterina Trendafilova.
Anëtar i Kryesisë së PSD-së, Dren Kukaj, ka prezantuar me fotografi siç tha dhunën e përdorur nga Policia e Kosovës gjatë protestës. Sipas tij, në arrestimin e aktivistëve përveç policëve është përfshirë edhe një person i sigurimit privat të hotelit ku ka qëndruar Trendafilova.
Kukaj tha se nuk janë përdorur armë nga aktivistët, por nga Policia e Kosovës. Ai kërkoi prej Prokurorisë dhe Policisë që të merren për bazë faktet dhe të zbardhet e vërteta.
“Fillimisht asnjë zyrtar apo civilë, përjashtim gazetarëve dhe aktivistëve nuk është i lënduar. 6 aktivistë janë arrestuar, sot janë burg për arsyen e vetme që kanë protestuar. Pra ne dje vetëm kemi shpreh kundërshtimin tonë ndaj një gjykatë që e cilësojmë të padrejtë për arsyeje që tashmë janë të njohura”.
“Për atë që kemi marrë informata vepra për të cilën po dyshohet është përdorimi i armës të rrezikshëm kjo është vepër penale për të cilën ata dyshohet. Ajo cka është përdoruar prej anës protestave nuk janë përdoru armë. Mjete piroteknike ato që jenë petarda. Ato janë tymos që përdoren në ndeshje sportive atë zhurmë që e keni ndje këto nuk përbejnë armë. Nuk ka vepër penale, nuk janë përdor prej anës tonë armë. Frikën që e kem duam me nda me ju. Bombolat e gazit kanë qenë të përdoruara prej anës së Policës kundër protestuesve”.
“Këto pak informacione që e kemi është e qarta se moslirimi i tyre është i jashtëligjshëm. Të drejtën që e kanë për protesta ata sot janë në burg. Tjetër skandal është që të përfshirë në arrestimin e këtyre personave përveç Policëve është një person i sigurimit privat të Hotelit Sirius që i ka ndihmuar arrestimin e aktivistëve tanë. Policia nuk është dashtë më lejuar këtë. Me prej këtu i kërkojmë edhe Prokurorisë edhe Policisë të shikojnë faktet dhe t’i kuptojmë të drejtat që na takojnë neve dhe sa më parë të lirohen aktivistët tonë”.
Ndihmëssekretari amerikan i Shtetit për Çështje Evropiane dhe Euroaziatike, James O’Brien, në samitin e Organizatës për Siguri dhe Bashkëpunim në Evropë (OSBE), që po i zhvillon punimet në Shkup, i ka bërë thirrje Rusisë që t’i japë fund shkeljes së parimeve të OSBE-së.
“Unë shtoj zërin tim, me atë të kolegëve, të cilët i bëjnë thirrje Rusisë, që t’i japë fund shkeljes së parimeve bazë të kësaj organizate, por nuk jam i sigurt nëse ajo është ende e gatshme të na dëgjojë”, ka thënë O’Brien.
Ai ka theksuar se pavarësisht shteteve që janë përpjekur të bllokojnë punën e organizatës, OSBE-ja do të vazhdojë të funksionojë.
“Tani është zgjedhje e shteteve që janë përpjekur të bllokonin punën e kësaj organizate, për të parë gatishmërinë e tyre nëse do të qëndrojnë me komunitetin e civilizuar, bazuar në aktin final të Helsinkit, apo duan të vazhdojnë pengesat e tyre. OSBE-ja do të jetë mirë, prapëseprapë, por, ka rëndësi për ta të zgjedhin, nëse do të vazhdojnë të jenë me ne në këtë përpjekje”, ka deklaruar O’Brien./rel/
Grabitja e armatosur në argjendarinë “Diakos” që tronditi javën e kaluar suharekasit ishte planifikuar si në filma nga grupi prej katër personave, të cilët mbushën çantat me ari në vlerë të 250 mijë eurove dhe u zhdukën.
Sot njëri nga ta dyshohet se ka mbetur i vdekur në një përballje me Policinë, gjatë një operacion policor për kapjen e të dyshuarve për grabitjen e armatosur të argjendarisë në Suharekë, raporton Gazeta Sinjali.
Në aksion dyshohet se është plagosur edhe një zyrtar i Policisë së Kosovës, i cili është jashtë rrezikut për jetë.
Ndryshe, më 22 nëntor ka ndodhur një plaçkitje e armatosur në një argjendari në qytetin e Suharekës. Në tentativën për ta parandaluar plaçkitjen, është plagosur një polic i Kosovës në këmbë.
Nga ky incident, përveç një polici të plagosur, kishte mbetur edhe një tjetër i lënduar.
Zëvendëskryeministër i parë për Integrim Evropian, Zhvillim dhe Dialog, Besnik Bislimi, ka kërkuar nga Bashkimi Evropian t’i largojë masat ndëshkuese ndaj Kosovës, megjithëse vazhdoi t’i kualifikoi si pasoja për vendin.
Ai tha se Kosova ka marrë hapat e duhur për largimin e tyre, derisa tha se të njëjtat kanë ndikuar edhe në shkrimin apo vlerësimin e BE-së për Raportin për Kosovën gjatë vitit 2023.
“Masat e Komisionit Evropian karshi Kosovës janë ende në fuqi dhe besojmë që ka një mundësi që prezenca e këtyre masave ka pasur ndikim edhe në shkrimin e raportit apo vlerësimin që i është bërë Kosovës. Po ashtu masat që janë në fuqi bien ndesh me përpjekjet e rajonit për integrim të përshpejtuar në BE sidomos edhe me iniciativat e fundit, siç është plani i rritjes dhe ai për integrimin unik. Kosova ka bërë hapat e duhur, andaj është shumë i rëndësishëm që BE-ja së më shpejt t’i tërheq këto masa të cilat janë të kthyeshme dhe pa pasoja, në mënyrë që fokusi të kthehet në avancimin e integrimit evropian të vendit tonë”, theksoi Bislimi.
Në debatit parlamentar në Kuvend për këtë raport, Bislimi tha se janë disa arritje në segmentin e kritereve politike, drejtësisë, sundimit të ligjit dhe luftimin e korrupsionit që është dashur të vlerësohen më shumë.
“Sipas analizës sonë, janë disa arritje në segmentin e kritereve politike, më përkatësisht në fushën e qeverisjes, drejtësisë dhe sundimit të ligjit, por edhe luftimit të korrupsionit, të cilat është dashur të vlerësohen e të theksohen më shumë në këtë raport, meqë janë të arritura me shumë rëndësi për një shoqëri demokratike, dhe për më tepër, janë rekomanduar në vetë raportin e vitit të kaluar. Disa nga këto janë Ligji për qeverinë, Ligji për Prokurorinë e shtetit, funksionalizimi i Gjykatës Komerciale, rritja e ndjeshme e numrit të gjyqtarëve dhe prokurorëve dhe caktimi automatik i lëndëve ”, tha Bislimi.
Ai përmendi disa arritje që sipas tij janë vlerësuar në raportin e progresit, siç janë arritjet në ERA II, reformat në fushën e demokratizimit dhe unifikimi me politikën e jashtme të BE-së në raport më luftën në Ukrainë dhe sanksionet ndaj Rusisë.
“Procesi i anëtarësimit në Bashkimin Evropian duhet të jetë në plotëni i bazuar në meritokraci. Kosova beson në të ardhmen e vet evropiane dhe si shembull i demokracisë në rajon duhet t’i jepet mundësia që këtë të dëshmojë. Ne kemi bërë hapin tonë më 15 dhjetor të vitit të kaluar kryeministri ka dorëzuar aplikacionin për anëtarësim në BE. Tani jemi të gatshëm dhe presim që t’i përgjigjemi mijëra pyetjeve teknike që vijnë nga komisioni evropian në mënyrë që të vlerësohemi në formë objektive dhe merita”, theksoi ai.
Është hapur konventa e gjashtë e Industrisë së drurit për të cilën tema e këtij edicioni të Industrisë së drurit është konkueshmëria, eksporti dhe potenciali i Industrisë, përpunimit të drurit si industria me zhvillimin më dinamik në vend.
Me këtë rast, kompanitë vendore të përpunimit të drurit kanë ekspozuar produktet më të reja që prodhohen ne Kosovë dhe për të pranishmit do të prezantojnë edhe mënyrën e përpunimit të drurit deri në arritjen e modelit.
Kryeministri i Kosovës, Albin Kurti tha se industria e drurit ka potencial për të rritur ekonominë e vendit dhe shërbime që lidhen me industrinë në përgjithësi. Ai theksoi se përmes politikës industriale synojnë që deri në vitin 2030 të transformohet në një industri të integruar globale.
“Industria e drurit është njëri nga sektorët strategjik ekonomik të Republikës së Kosovës, ajo ka potencial për të rritur përfitimet e brendshme nga përdorimi i burimeve vendore, duke kontribuar edhe në themelimin e lidhjes në sektorë të tjerë si p.sh tekstilin, produktet metalike dhe shërbimet që lidhen me industrinë në përgjithësi, andaj unë jam i lumtur që sot po flasim për këtë sektorë që po krijon vende pune dhe është një shtytës i zhvillimit ekonomik social dhe mjedisor. Kjo industri është në zhvillim të vazhdueshëm por edhe në tregun e jashtëm ka kontribuar në rritjen e eksporteve, në përmirësimin e bilancit tregtarë të vendit tonë. Eksportet totale për dyer, dritare, mobilieri të drurit dhe ndërtesat e parafabrikuara në dy vitet dhe fundit në 2021 dhe 2022 dhe dhjetë muajt e vitit 2023 janë me vlerë 563 milionë euro, deri në fund të muajit dhjetor të 2023 presim të jenë rreth 600 milionë euro. 06:04 Kjo rritje padyshim ekonomike është rezultat i ndërmarrësis dhe suksesit të gjithë të deri tanishëm, ndërmarrësve tonë në industrinë e drurit me rritjen e eksporteve në Gjermani, Zvicër, Itali, dhe vendet e tjera në rajon e më gjerë. 08:16 Përmes politikës industriale synojmë që deri në vitin 2030 industria e Kosovës të transformohet në një industri më të integruar globalisht që është në gjendje të prodhojë produkte me vlerë të shtuar të lartë dhe të ofrojë punësim të denjë” tha Kurti.
Po ashtu, ministria e Industrisë, Ndërmarrësisë dhe Tregtisë, Rozeta Hajdari tha se Kosova ka potencial në sektorin e Industrisë. Ajo tha se MINT-i ka të projektuar politikën tregtare për t’i dalë në ndihmë sektorëve të prodhimit dhe vendit për tu zhvilluar ekonomikisht.
“Vendi ynë ka potencial të jashtëzakonshëm në shumë sektorë industrial e njëri nga ata është edhe industria e drurit që flet në shifra të suksesshme që i përmendi edhe Kryeministri Kurti, ne kemi politikën tonë tregtare dhe për më shumë eksport.20:23 Politika industriale i dedikohet mbështetjes në sektorin e prodhimit për të shpalosur potencialin e tij për të kontribuar në zhvillimin e përgjithshëm të vendit pra të jetë faktorë kryesor për zhvillim ekonomik, social dhe mjedisor dhe në zhvillimin e përgjithshëm të vendit në mënyrë sa më efektive. Ju njoftoj se tashmë kemi filluar me politikat e industrisë ku kemi paraparë edhe shumë fusha të intervenimit si dhe masa që do të përkrahim sektorin e prodhimit dhe përpunimit për integrimin e tyre në zingjirin global, rritjen dhe dizertifikimin e eksporteve përmirësimin e kualifikimit të fuqisë punëtore, digjitalizimin të përpjesëtuar dhe teknologjinë e përparuar. 21:34 Përmes fondeve të inovacionit do të përkrahen bizneset inovative ku qëllimi kryesor i fondit është që të jetë sa më shumë nxitje dhe mbështetje që rrjedhin nga ndërmarrësia e Kosovës. 22:08 Me këtë politikë synojmë zëvendësimin e importit, lehtësimin e tejshëm të tregtisë, dhe promovimin e eksporteve me qëllim që produktet me vlera të lartë të jene të integruara në zingjirin e vlerës” tha Hajdari.
Me këtë rast, kryetari i bordit të Shoqatës për Përpunimin e Drurit të Kosovës (SHPDK-së), Zenel Kelmendi tha se industria e drurit në Kosovë në vitet e fundit ka pasur një zhvillim të hovshëm në teknologji edhe në hapësirat përpunuese. Ai tha se synojnë për ura bashkëpunimi dhe produkte të cilësisë të lartë.
“Industria e përpunimit të drurit në Kosovë në dhjetë vitet e fundit ka pasur një zhvillim shumë të hovshëm si në investimin e teknologjisë ashtu edhe në hapësirat përpunuese dhe kulmuese, më këtë ofron një teren të mrekullueshëm për inovacion dhe produkte të cilësisë të lartë. Përmes kësaj konvente ne synojmë të ndërtojmë ura bashkëpunimi, të shkëmbejmë ide, të inspirohemi nga puna dhe suksesi i njëri tjetrit dhe me këtë jemi kufi serioz në tregun ndërkombëtarë” tha Kelmendi.
Konventa e gjashtë e Industrisë së drurit është organizuar me mbështetjen nga Ministria e Industrisë, Ndërmarrësisë dhe Tregtisë me mbështetje nga KIESA, qeveria gjermane përmes GIZ Kosova, FEGO përmes qeverisë së Suedisë dhe sponsorëve USAID/ ADrenica
Zëvendëskryeministri i Kosovës, Besnik Bislimi është përplasur me deputetët opozitarë në seancën e sotme të Kuvendit të Kosovës, sa i përket Raportit për Kosovën nga Bashkimi Evropian.
Bislimi tha se në raport vlerësohet hapja e vendeve të reja të punës dhe punësimi i 60 mijë qytetarëve. Ai tha se kjo shihet edhe në raportet e ATK-së, ku sipas tij 21 mijë të punësuar janë në sektorin e tregtisë, 10 mijë në prodhim, kurse 6 mijë në gastronomi.
“Shqetësimet që u ngritën për numrin e të punësuarve, këtë shifrën prej 60 mijë qe e prezantova unë është relativisht e lehtë të verifikohet. Ka tri mënyra, një prej tyre është të lexohet vet raporti për vendin, ku në faqen 63 thuhet se shkalla e papunësisë ka rënë shumë nga 19 në 11.8 për qind…21 mijë vende janë krijuar në tregti, 10 mijë në prodhim, 6 mijë në gastronomi. Pra vendet e reja të punës janë të definuara nga sektori nga vjen”, tha Bislimi.
Mirëpo këto të dhëna po i sheh si jo të besueshme, deputetja e PDK-së, Blerta Deliu. Sipas saj në bazë të raportit të TRUST-it, gjatë këtij viti ka 100 mijë punëtorë më pak sesa vitin e kaluar.
“Janë 100 mijë punëtorë më pak sipas TRUST-it në vitin 2023 sesa në vitin 2022, ndërkaq ju po flini për 60 mijë vende të reja të punës. Prandaj nuk përkojnë këto statistika pasi raportet zyrtare flasin për të kundërtën”, tha ajo.
Ndërkaq, deputetja e LDK-së, Valentina Bunjaku, tha se këto shifra janë për shkak të regjistrimit të punëtorëve në ATK për shkak të përfitimit të subvencioneve.
Ajo tha së Raporti për Kosovën është më i keqi ndonjëherë, sidomos në fushën e industrisë, tregtisë dhe ndërmarrësisë.
“Punëtorët janë regjistruar në kohën e pandemisë për shkak se kanë përfituar subvencione. Në shumë biznese nuk kanë pasuar punëtorë të regjistruar. Raporti i progresit për vitin 2023 është raporti më i keq që nga pas lufta, veçmas në industrinë, tregtinë dhe ndërmarrësinë”, tha ajo.
Deklaratat e Bislimit i kundërshtoi edhe shefi i Grupit Parlamentar të AAK-së, Besnik Tahiri, i cili tha se e vetmja rritje që ka ndodhur është ajo e çmimeve dhe inflacionit.
“Është e vërtet që ka pas rritje. Rritja e parë ka ndodhur te çmimet dhe inflacionit pasi janë dyfishuar çmimet. Rritja e dytë është se këtë vit është rritur dhuna, plaçkitjet dhe janë rritur standardet për veturat për rent a car”, tha ai.
Në mbrojtje të zëvendëskryeministrit Bislimi, doli deputeti i LVV-së, Armend Muja i cili tregoi në shifra ku bazohet hapja e vendeve të reja të punës.
“Kur ka ardhur kryeministri Kurti atë ditë qe ka bërë betimin këtu i ka gjetur 346 mijë të punësuar të regjistruar në ATK dhe 768 mijë jo aktiv. Deri në muajin e kaluar a e dini sa ka shkuar deri në shtator të vitit 2023 numri i të punësuar, është 411 mijë, pra kapërcim prej 65 mijë vetave”, theksoi Muja.
Sekretari i përgjithshëm i NATO-s, Jens Stoltenberg, ka deklaruar se Rusia në luftën në Ukrainë krahas qindra avionëve dhe mijëra tankeve, ka humbur më shumë se 300 mijë ushtarë.
Në një konferencë për media në përfundim të Takimit të Ministrave të Jashtëm të NATO-s, Stoltenberg theksoi se përgjatë dy ditëve kanë diskutuar një sërë çështjesh përfshirë Ukrainën, Kinën dhe Ballkanin Perëndimor.
Ai tha se kanë vlerësuar situatën në terren në Ukrainë dhe u shpreh se 50 për qind e rajoneve të marra nga Rusia janë rimarrë nga ushtria ukrainase.
Ukraina vazhdon ekzistencën e saj si një shtet sovran dhe kjo është fitorja më e rëndësishme, deklaroi Stoltenberg, i cili shtoi se Rusia ka pësuar humbje të mëdha në beteja dhe se ajo është dobësuar ekonomikisht.
Stoltenberg theksoi se Rusia në aspektin politik ka humbur ndikimin e saj jo vetëm në Ukrainë, por edhe në rajonet përreth saj në Kaukaz dhe Azinë Qendrore.
“Gjithashtu Rusia po bëhet edhe shumë më e varur ndaj Kinës. Moska çdo vit e më shumë po e hipotekon të ardhmen e saj tek Pekini. Në aspektin ushtarak Rusia ka humbur një pjesë të rëndësishme të forcave të saj konvencinale. Ka humbur qindra avionë, mijëra tanke dhe ka mbi 300 mijë humbje”, shtoi Stoltenberg.
Duke theksuar se Rusia ndodhet nën presion edhe në aspektin ekonomik, me rënie të të ardhurave të naftës dhe gazit, ku mbi 1.000 kompani të huaja kanë ndalur ose kanë zvogëluar aktivitetet e tyre në vend dhe ku 1.3 milion njerëz janë larguar nga Rusia vitin e kaluar, Stoltenberg tha se “Të gjitha këto, theksojnë se Putin ka bërë një gabim strategjik duke pushtuar Ukrainën”.
Pasi vuri në dukje se Rusia nuk duhet të merret lehtë, Stoltenberg tha se “Ekonomia e Rusisë ndodhet në bazën e një lufte. Putin ka një tolerancë të lartë kundër humbjeve. Objektivat e Rusisë në Ukrainë nuk kanë ndryshuar. Rusia para dimrit ka bërë grumbullim të madh raketor. Po shikojnë iniciativa të reja për të goditur rrjetin elektrik dhe infrastrukturën energjetike të Ukrainës. Po përpiqet ta lërë Ukrainën në errësirë dhe të ftohtë”.
Në debatin parlamentar për Raportin për vendin, deputetja e Lidhjes Demokratike të Kosovës (LDK), Rrezarta Krasniqi tha se Kuvendi është shndërruar në një makineri vulosëse, që sipas saj çështjet për të cilat do të duhej të kishte debat e argumente, kalojnë me procedurë të përshpejtuar dhe pa diskutime.
Ndërkaq, lidhur me Raportin e Progresit, Krasniqi potencoi se gjendja është edhe më e rëndë se ajo që është pasqyruar në këtë raport. Ajo kritikoi institucionet për mos angazhim më qëllimin e ndërmarrjes së veprimeve për të larguar masat nga Bashkimi Evropian.
“Derisa sot po diskutojmë për gjendjen e këtij raporti, gjendja jonë është edhe më e rëndë se ajo që është e pasqyruar në këtë raport. Kjo për faktin se kemi masa nga Bashkim Evropian për Kosovën. Gjithashtu është edhe më e rënduar së nuk shohim asnjë angazhim të institucioneve tona më qëllim të ndërmarrjes së veprimeve konkrete për të larguar masat e Bashkimit Evropian. Masat e BE, përfshijnë shumë të madhe monetare, prej 295 milionë euro e cila ndikon drejtpërdrejt në të ardhmen e qytetarëve tanë. Kosova vazhdon të mos angazhohet në avancimin e së ardhmes së saj evropiane…Këtë vit kemi një heshtje mbase janë lodhur nga leximi i shpejte i vitit të kaluar, prandaj këtë vit duhet më shumë kohë dhe po procedesojnë më ngadalë me lexim të raportit”, theksoi Krasniqi.
Deputetja Krasniqi theksoi se nga 104 ligjet e miratuara, 22 prej tyre janë miratuar me procedurë të shpejtë dhe mënyra të tjera, për çka tha se kjo është shndërruar në normalitet për mazhorancën.
“Ky raport mund të quhet si raport i faktimit të regresit, se kjo qeveri dhe ky pushtet janë kampion për regres…Nga 104 ligjet e miratuara, 22 ligje kanë qenë të miratuara me procedurë të shpejtë…Këto të gjetura tregojnë se Kuvendi është shndërruar në një makineri vulosëse ku të gjitha çështjet me të rëndësishme të cilat do duhej të kishte debat, argumente e kundër argumente kalojnë me procedurë të përshpejtuara, pa diskutime…sepse kështu është mësuar kjo mazhorancë”, theksoi Krasniqi.
Presidenca e Kosovës pret nga Këshilli Prokurorial i Kosovës (KPK) proces të ri për përzgjedhjen e Kryeprokurorit të Shtetit.
Bekim Kupina, këshilltar për Media i presidentes tha se të gjitha çështjet janë trajtuar në letrën/njoftimin e Presidentes, të datës 17 tetor.
“Të gjitha çështjet janë trajtuar në letrën/njoftimin e Presidentes, të datës 17 tetor. Presim nga KPK që t’i adresojë shkeljet procedurale të përmendura në atë letër, në një proces të ri”, tha Kupina për rtk.
Presidentja Vjosa Osmani, në një konferencë për media, kishte deklaruar se nuk e ka dekretuar Isufajn për kryeprokuror për shkak se kishin gjetur disa shkelje në proces.