Category: Lajme

Presidenti i Serbisë, Aleksandër Vuçiq po e keqpërdorë buxhetin e Serbisë duke i paguar serbët e Kosovës që të votojnë për SNS-në.

Burime të KosovaPress-it, bëjnë të ditur se serbët e Kosovës që votojnë për SNS-në, janë duke marrë nga 20 euro për derivate dhe një meditje modeste.

“Atyre u janë premtuar edhe nga 80 euro për çdo votë që e japin për SNS-në”, ka thënë i njëjti burim.

Në Serbi sot po mbahen zgjedhjet parlamentare, ndërsa edhe serbët nga Kosova kanë ushtruar të drejtën e tyre për të votuar atje.

Shefja e Grupit Parlamentar të Lëvizja Vetëvendosje, Mimoza Kusari- Lila, ka reaguar për aksidentin e rëndë në Prizren, ku vdiqën tre të rinj.

Ajo ka thënë se këto vdekje të shkaktuara nga papërgjegjësia dhe veprimi i jashtëligjshëm në trafik mbrëmë, thërrasin për veprime të menjëhershme dhe masa të ashpëra nga organet kompetente.

“Lordi Syla, Molos Delija dhe Nue Bibaj janë viktimat e fundit të aksidentit tragjik mbrëmë në autostradën “Ibrahim Rugova”. Ata humbën jetën nga papërgjegjësia e tjerëve deri sa kishin dalë të shikonin garat me vetura të cilat jashtë ligjit ishin organizuar në autostradë.”

Ajo ka thënë se organizimet e tilla duhet të ndalen rreptësisht dhe të merren masa të ashpra.

Kusari- Lila i ka shprehur ngushëllime familjeve dhe miqve të të ndjerëve.

Postimi i plotë:

Tri vdekje të shkaktuara nga papërgjegjësia dhe veprimi i jashtëligjshëm në trafik mbrëmë, thërrasin për veprime të menjëhershme dhe masa të ashpëra nga organet kompetente.

Lordi Syla, Molos Delija dhe Nue Bibaj janë viktimat e fundit të aksidentit tragjik mbrëmë në autostradën “Ibrahim Rugova”. Ata humbën jetën nga papërgjegjësia e tjerëve deri sa kishin dalë të shikonin garat me vetura të cilat jashtë ligjit ishin organizuar në autostradë.

Organizime dhe veprime të ngjajshme, duhet rreptësisht të ndalen dhe masa të ashpëra të ndërmiren menjëherë.

Lordi, Molosi dhe Nue nuk mund të kthehen më në jetë, por të gjithë duhet angazhuar që jetë tjera të shpëtohen.

Ngushëllime familjeve Syla, Bibaj dhe Delija dhe gjithë miqve të djemve të ndjerë!

Një numër i madh personash kanë marrë pjesë në edicionin e tetë të mini-maratonës humanitare “Vrapo Babadimër”, e cila organizohet çdo dhjetor në Prishtinë.

Qëllimi kryesor i kësaj ngjarjeje është rritja e donacioneve për t’i ndihmuar familjet e varfra në Kosovë me rastin e festave të fundvitit dhe ndihma për fëmijët e Onkologjisë-Pediatri.

Në këtë event, pjesëmarrës ishin mijëra vrapues, të cilët vrapuan me kostumet e Babadimrit.

4.8 për qind është pjesëmarrja e qytetarëve të Preshevës në votim.

Kryesuesi i Komisionit Komunal Zgjedhor të Preshevës, Alban Mehmeti njoftoi se deri në këtë kohë kanë shfrytëzuar të drejtën e votës mbi 2000 mijë qytetarë.

“Në Preshevë deri në orën 12:00, kanë votuar 2100, apo 4.8 për qind e qytetarëve”, tha Mehmeti.

Në Preshevë të drejtë vote kanë 43 mijë e 500 votues. Në këtë komunë votohet në 38 qendra të votimit.

Tre persona humbën jetën nga një aksident që ndodhi në autostradën “Ibrahim Rugova”.

Viktimat dyshohet të kenë qenë duke e shikuar një garë mes veturave, njëra prej të cilave e humb kontrollin dhe godet shikuesit anash rrugës.

Pas kësaj ngjarje, po kërkohet ashpërsim i madh i dënimeve në komunikacion.

Avokati Arianit Koci ka shkruar në rrjete sociale se gjendja është e jashtëzakonshme.

“Në një shtet ku prej 10 shoferave së paku tetë janë me telefon në dorë në ndonjë pjesë të vozitjes, ndodhin tragjeditë si ajo në autostradë afër Prizrenit. Madje, edhe shoferat e autobusave urban flasin në telefon gjatë vozitjes. Jo rrallë, i kam parë edhe policët me telefon në dorë në lëvizje me vetura zyrtare. Toleranca sistematike e kundërvajtjeve, e krijon kulturën e interaksionit kriminal në komunikacion. Kjo gjendje pastaj e determinon tragjedinë që ka ndodhur mbrëmë ku kanë mbetur të vdekur tre të rinj!”, ka shkruar Koci.

“Prandaj, urgjentisht duhet shpallur gjendjen e jashtëzakonshme në komunikacion. Të fillohet me aplikimin e ashpër të dënimeve. Sot menjëherë!”, ka shkruar avokati.

Deputetja e VV-së, Fitore Pacolli, ka bërë të ditur se me Ligjin e ri dënimet do të jenë shumë më të ashpra.

“Ligji i ri për Rregullat në Trafik do të ketë dënime shumë më të ashpra sesa Ligji aktual në fuqi. Në tre majorin e parë të vitit 2024 do ta kemi Ligjin e ri për Rregullat në Trafik. Aksidenti i mbrëmshëm në autostradën “Ibrahim Rugova” ku humbën jetën 3 të rinj tregon se sa e nevojshme është që të ashpërsohen dënimet në komunikacion”, ka shkruar deputetja.

“Ju njoftoj se Komisioni për Mjedis, Ushqim, Bujqësi, Planifikim dhe Zhvillim tashmë ka përfunduar hartimin e Ligjit të ri për Rregullat në Trafik. Bashkë me Policinë e Kosovës dhe Ministrinë kemi punuar me muaj të tërë në hartimin e Ligjit të ri. Ne e kemi përfunduar hartimin e draft ligjit dhe i njëjti do të votohet të martën në Komision. Ligji i ri do të ketë dënime shumë më ashpra në krahasim me ligjin aktual që është në fuqi”, ka thënë ajo.

Nata e kaluar ishte e kobshme për tre persona. Lordi Syla, Molos Delija dhe Nue Bibaj, dyshohet të kenë qenë duke përcjellë një garë mes veturash në autostradën “Ibrahim Rugova”.

Njëra nga veturat e ka humbur kontrollin dhe ka goditur shikuesit, ku humbën jetën Syla, Delija dhe Bibaj.

Nacionale ka mësuar se shoferi i veturës i cili është arrestuar, është familjar tejet i afërt i tashmë të ndjerit Lordi Syla.

I ndjeri sipas informatave jozyrtare, kishte shkuar për ta përcjellur garën mes familjarit të tij dhe shoferit të një veture tjetër.

Gazeta Nacionale nga burimet e veta ka mësuar gjithashtu se viktima Lordi Syla, është vëlla i avokatit të njohur, Leutrim Syla. Leutrimi është avokat me emër, dhe merr pjesë në konferenca e emisione të ndryshme televizive lidhur me sistemin e drejtësis

Kurse, vëllai tjetër i Lordit, është Ali Syla, polic i Kosovës. Kjo mund të shihet edhe nëpër fotografi të ndryshme në rrjete sociale. Edhe polici Syla është gjithashtu figurë e njohur për punën e tij në Policinë e Kosovës.

Babai i Lordit, Muhamet Syla, ishte luftëtar i Ushtrisë Çlirimtare të Kosovës.

Kandidati për deputet në Kuvendin e Serbisë, Shaip Kamberi, ka votuar sot në Preshevë.

Pas votimit, ai para mediave ka thënë se është optimist se do të arrijë të zgjedhet deputet edhe për një mandat.

Kamberi është duke kandiduar me listën “Beteja politike e shqiptarëve vazhdon – Shaip Kamberi”.

Ekipi i ATV-së është nisur drejt Preshevës për të raportuar rreth zgjedhjeve në Preshevë, mirëpo nuk u është lejuar hyrja në territorin e Serbisë, për arsye se gazetari Arton Hamiti është nga Likoci i Skenderajt.

Atij i është mbajtur letërnjoftimi nga policia serbe më shumë se një orë, pa asnjë sqarim.

“Gazetar nga Likoci? Çka i bjen Skenderaj”, ishte pyetja e vetme që policët serbë i kanë bërë gazetarit Hamiti.

Pas më shumë se një ore, gazetarit Hamiti i është kthyer letërnjoftimi ku bashkë me ekipin e ATV-së kanë vazhduar drejtë Preshevës për të raportuar për zhvillimet e fundit nga zgjedhjet që po mbahen atje.

Kryeshefi i ngrohtores “Termokos”, Fisnik Osmani, ka thënë se kanë instaluar matësit e energjisë dhe alokaorët në mbi 16 mjë njësi banimi.

Osmani, theksoi se me instalimin e valvulave termostatike, termokokave dhe alokatorëve në radiatorë, këto familje nga sezoni i ardhshëm do të faturohen me mënyrën e re të kalkulimit, përmes së cilës ato do të mund të paguajnë aq sa kanë shpenzuar.

“Deri më sot, kemi instaluar matësit e energjisë dhe alokatorët në mbi 16000 njësi banimi. Me instalimin e valvulave termostatike, termokokave dhe alokatorëve në radiatorë, këto familje nga sezoni i ardhshëm do të faturohen me mënyrën e re të kalkulimit, përmes së cilës ato do të mund të paguajnë aq sa kanë shpenzuar”, shkroi Osmani.

“Duke kontrolluar shpenzimet, kursehet energjia, krijohet një ambient i rehatshëm i jetesës dhe rrjedhimisht ruhet ambienti. Aktualisht po bëjmë testimin e sistemit, i cili po jep rezultate të jashtëzakonshme në funksion të kursimit të energjisë! Termokos, po i jep kuptim Prishtinës së gjelbër!”.

Ndarja buxhetore e Qeverisë për komunat e Kosovës në vitin 2024, ka nxitur reagim nga drejtuesit e komunave të pozitës dhe opozitës. Ndërsa, komuna e Shtimes me kryetarin Qemajl Aliu nga Lëvizja Vetëvendosje kanë vlerësuar se nuk kanë asnjë pa kënaqësi për ndarjen buxhetore. Sipas, kryetarit Aliu, buxheti është ndarë në mënyrë të barabartë për të gjitha komunat dhe se opozita në mungesë të kauzave po merret me buxhetin e Shtimes.

Aliu në një intervistë për KosovaPress, tha se si komunë kanë përkrahje të plotë nga qeverisja qendrore, pasi kanë pas nevojë për shkak se kjo komunë ka mbetur mbrapa në krahasim me komunat e tjera.

“Kam parë që është bërë edhe lajm kjo ndarja buxhetore dhe nuk është se më vjen shumë mirë që të tjerët po merren e buxhetet e të tjerëve. Ju e dini që Qeveria e Kosovës vetëm këtë vit për komunat buxhetin e ka rritur me 240 milionë euro, është e mjaftueshme për secilën komunë që buxheti që është dhënë me këtë rritje të kryhen punët mirë për secilën komunë dhe qytetarët e Kosovës. Si po duket në mungesë të agjendave tjera tash kur opozita mbetet pa kauzë merret edhe me buxhetin e Shtimes…Komuna e Shtimes është ndër komunat më të varfëra në Kosovë, kjo si pasojë e një qeverisje që të kaluara që nuk e ka pas në fokus zhvillimin dhe përparimin e komunës tonë dhe tash më në fund është një qeverisje lokale por që e ka edhe mirëkuptimin e qeverisjes qendrore, për të bërë pak më shumë për Shtimen por jo për diskriminim pozitiv por thjeshtë për barazi sepse në raport me komunat tjera ne jemi mbrapa”, u shpreh Aliu.

Aliu tha se qeverisja paraprake e Shtimes, e udhëhequr nga Partia Demokratike e Kosovës, nuk kanë arritur të realizojë asgjë për komunën, dhe se sot po kujdesen për të penguar zhvillimin e saj.

“Ka kujdestarë të tillë, sidomos deputetët të PDK-së që mirë që e kanë lënë për 20 vite në këtë situatë të pazhvilluar Shtimen, tash kujdesen për të penguar, atëherë kur dikush dëshiron me zhvilluar. Kjo më duket aspak korrekte dhe aspak humane njerëzore, mirëpo qytetarët e Shtimes le të shohin se cilin për veprimin tyre”, shtoi Aliu.

Kryetari i Shtimes, Aliu shtoi se Komuna e Shtimes ka shumë kërkesa dhe nevoja të paplotësuara dhe se buxheti i ndarë për të është minor, por se janë rrugës për të zgjidhur problemet e kësaj komune.

“Për gjendjen në të cilën komuna e Shtimes për nevojat edhe kërkesat që ka ky buxhet është minor dhe i pamjaftueshëm por jemi rrugës të mbarë për të zgjidhur çështje dhe shumë probleme , nuk dua me dal përtej komunë së Shtimes ne jemi të fokusuar por këta kritikoj po nisen nga premisat e tyre sepse këtë standard ata e kanë përdorur jo zyrtarisht kolegët e mi kryetarë e kanë pranuar në tavolina ku takohemi që aq shumë u dhanë qeveritë e kaluara sa që ju kanë shpenzuar rrugët dhe nuk kanë pasur çka me asfaltuar, kjo nuk po ndodhë në qeverinë Kurti edhe pse po tentohet me u etiketuar si e tillë. … Ka komuna që edhe autostrada kanë shtruar në mes qytete me katër korsi, ndërsa në Komunën e Shtimes ka akoma rrugica ku qytetarët ecin në baltë kjo është pabarazi dhe në emër të kësaj pabarazie normal që kemi mirëkuptimin nga qeveritë edhe të ministrive që të ketë më shumë për Shtimen që së paku të jemi të pabarabartë me komunat përreth me Lipjanin, Suharekë dhe Ferizajn”, tha Aliu. /kp

Policia ka dalë me raport për vrasjen në Gjilan.

Në raport thuhet se është arrestuar një person pasi dyshohet se e ka goditur viktimën me thikë.

Vdekjen e ka konstatuar mjeku kujdestar në Gjilan, ndërsa trupi i pajetë është dërguar në IML.

I dyshuari është dërguar në mbajtje.

“VRASJE- Gjilan 16.12.2023-21:00. Është arrestuar i dyshuari kosovar pasi që i njëjti dyshohet se me një mjet të mprehtë-thikë ka goditur viktimën mashkull kosovar, të cilit i ka shkaktuar lëndime vdekjeprurëse. Viktima është dërguar në QE-Gjilan, ku mjeku kujdestar ka konstatuar se viktima është pa shenja jete. Me vendim të prokurorit trupi i pa jetë i viktimës është dërguar në IML për obduksion, ndërsa i dyshuari është dërguar në mbajtje. Rasti duke u hetuar.”