Category: Lajme

Teksa GJKKO mori vendimin për caktimin e masës arrest shtëpie ndaj ish-kryeministrit, Sali Berisha në të njëjtën kohë kryeministri Edi Rama mbante konferencën e fundvitit.

Rama reagoi duke u shprehur se nuk është fitore e një partie arrestimi i dikujt, të cilësdo parti.

“‘S’kam asnjë koment, nuk merrem me dikë që është shpallur non grata nga SHBA e kam thënë qysh në krye të herës. Kurrë nuk është fitore e një partie arrestimi i dikujt, të cilësdo parti. Kjo është në parim, partitë fitojnë zgjedhje për të çuar përpara vendin dhe partitë nuk janë organizata luftarake që funksionojnë për të eliminuar kundërshtarët.

Kështu që nuk e shoh si një fitore të Partisë Socialiste apo si një fitore të Erionit apo Taulantit për këmbënguljen në detyrën e tyre.– tha Rama.

Pikat kufitare të Kosovës këto ditë të festave kanë qenë me kolona të gjata, shkak i ardhjes së mërgimtareve. Por, fluks të madh të udhëtarëve ka edhe në Aeroportin Ndërkombëtar të Prishtinës “Adem Jashari”.

Zëdhënësja e Aeroportit të Prishtinës, Valentina Gara ka thënë se presin që deri në fund të Vitit të Ri të arrijnë një shifër prej 3.4 milionë udhëtarësh, ndërsa vetëm sot janë planifikuar 81 fluturime.

Ajo beri të ditur se edhe në ditën e fundit të vitit janë planifikuar mbi 60 fluturime vajtje- ardhje.

“Ne kemi një trend të vazhdueshëm të rritjes së numrit të udhëtarëve. Gjatë sezonit të dimrit ky trend vërehet më së shumti me rastin e festave. Pra 34 janë në arritje me datën 31 dhjetor si dhe 35 në nisje po me datën 31 dhjetor”, ka thënë Gara për Zërin.

Ajo ka shtuar se Zvicra mbetet njëri ndër destinacionet me numrin më të madh të fluturimeve dhe udhëtarëve.

Tridhjetë e dy dronë ukrainas u rrëzuan mbi Rusi, njoftuan zyrtarët e Moskës, një ditë pasi një breshëri ajrore 18-orëshe në të gjithë Ukrainën vrau të paktën 32 civilë.

Dronët u panë në qiell mbi rajonet e Moskës, Bryansk, Oryol dhe Kursk të shtunën, tha në një deklaratë ministria e mbrojtjes e vendit.

Ai tha se të gjithë dronët ishin shkatërruar nga mbrojtja ajrore.

Sulmet ruse me dronë kundër Ukrainës vazhduan gjithashtu, me shtabin e përgjithshëm të forcave të armatosura të Ukrainës që raportuan se 10 drone Shahed të prodhuar nga Irani ishin rrëzuar në rajonet Kherson, Khmelnytskyi dhe Mykolaiv të shtunën.

Gjykata e Posaçme e Shkallës së Parë për Korrupsionin dhe Krimin e Organizuar (GjKKO) ka vendosur masën e arrestit në shtëpi për ish-kryeministrin Sali Berisha.

Prokurorët që po hetojnë Berishën për korrupsion pasiv në aferën “Partizani” kërkojnë që ish-kryeministri të ruhet edhe me polic në derën e shtëpisë e të ketë kontakt vetëm me personat që jetojnë me të në të njëjtën banesë.

Nën hetim dhe në masë arresti shtëpie për privatizimin e Partizanit është dhe dhëndri i Berishës, Jamarbër Malltezi i cili ndërtoi kulla mbi territorin e kompleksit sportiv.

Ministrja e Drejtësisë, Albulena Haxhiu, i ka reaguar menjëherë Kryeprokurorit të Prokurorisë Speciale, Blerim Isufajt, i cili për Gazetën Express, deklarimet e saj i quajti tendencë për të ndërhyrë në punën e sistemit prokurorial.

Haxhiu ka thënë se Isufaj duhet të përgjigjet se pse dha pëlqimin për tërheqjen e urdhër-arrestit ndaj Milan Radojiçiqit.

Sipas Haxhiut, po të mos hiqej urdhërarresti në vitin 2021, ndoshta nuk do të ndodhte sulmi terrorist në Banjskë.

“Në vend të reagimeve kundrejt deklarimeve tona, Blerim Isufaj, le të përgjigjet vetëm në pyetjen se pse u tërhoq urdhëarresti për kryekriminelin Radojçiq në vitin 2021? Po të mos hiqej fletarresti me 2021 ndoshta nuk do të kishte Bajnskë 2023. Mos të tentojë të ikë nga thelbi i çështjes!”, ka shkruar Haxhiu.

Zyra e OKB-së për Koordinimin e Çështjeve Humanitare (OCHA) vlerëson se të paktën 100.000 njerëz janë shpërngulur në Rafah, qyteti më jugor në Gaza, ditët e fundit ndërsa luftimet intensifikohen në Khan Younis dhe gjetkë.

Izraeli u ka thënë njerëzve që të largohen nga pjesët e Khan Younis, të cilin e sheh si një bastion të Hamasit.

OCHA thotë se fluksi i njerëzve e ka përkeqësuar mbipopullimin dhe ka bërë presion mbi burimet e kufizuara.

Ekziston gjithashtu shqetësim për një rritje të përhapjes së sëmundjeve në Gaza, ku disa familje duhet të lëvizin disa herë. /BBC

Kryeministri i Shqipërisë, Edi Rama, në konferencën e tij të fund vitit për media është pyetur për raportet që Shqipëria do të ketë me Serbinë përgjatë vitit 2024.

Edi Rama ka thënë se qëndrimi i shtetit shqiptar ka qenë shumë i qartë dhe s’ka pasur luhatje, qoftë kur ka kërkuar që Serbia të mos sanksionohet shkaku i qëndrimit ndaj Rusisë, qoftë edhe kur Tirana zyrtare ka konstatuar se Serbia ka bërë akt flagrant kundër të gjitha vlerave evropiane dhe të bashkëjetesës kur ka shpallur ditë zie për kriminelët e Banjskës dhe për vetë aktin e sulmit.

Rama ka thënë se Shqipëria ka kërkuar që Serbia të sanksionohet për aktin e terrorit në Banjskë dhe që Kosovës t’i hiqen masat, meqë Kosova e ka bërë hapin dhe s’ka sens që Kosovës t’i mbeten masat dhe Serbisë të mos i vendoset asnjë masë shtrënguese pas aktit në Banjskë.

“Për sa i përket marrëdhënies me presidentin e Serbisë, është marrëdhënie që  s’ka asgjë tjetër përveç interesit të Shqipërisë dhe të rajonit. Natyrisht është raport që s’më pengon mua dhe neve t’i themi të bardhës të bardhë dhe të zezës të zezë. Qëndrimi ynë ka qenë shumë i qartë dhe s’ka pasur luhatje. Qoftë kur ka qenë rasti për të thënë me zë të lartë se Serbia nuk duhej sanksionuar si rezultat i mos sanksionimit të Rusisë meqë kjo do të sillte pasoja të rrezikshme për rajonin, ashtu edhe kur Serbia bëri një akt flagrant kundër të gjithë vlerave evropiane dhe të bashkëjetesës me shpalljen e zisë për kriminelët e Banjskës si edhe për vetë aktin e terrorit në Banjskë. Kështu që kemi qenë shumë të qartë për këtë. Kemi kërkuar haptazi që Serbia duhet sanksionuar dhe Kosovës i duhen hequr masat shtrënguese, sepse Kosova tashmë e ka bërë hapin, që duhej ta kishte bërë me kohë, por e ka bërë. S’ka sens që Kosovës ti mbeten masat dhe Serbisë të mos i vendoset asnjë masë shtrënguese pas aktit në Banjskë”, ka thënë Rama.

Presidentja e Republikës së Kosovës, Vjosa Osmani, me rastin e ditës së veteranëve të UÇK-së, ka thënë se guximi, sakrifica dhe angazhimi i tyre i palëkundur meritojnë respektin tonë maksimal.

Osmani potencoi se në krye me kryekomandantin Adem Jashari dhe familjen e tij, ata kanë lënë gjurmë të pashlyeshme në historinë tona.

“Në Ditën e Veteranëve, shpreh mirënjohjen time të thellë për gratë dhe burrat trima të UÇK-së, të cilët i kanë shërbyer me vetëmohim luftës për lirinë e Republikës së Kosovës”, tha Osmani.

“Guximi, sakrifica dhe angazhimi i tyre i palëkundur meritojnë respektin tonë maksimal. Në krye me kryekomandantin Adem Jashari dhe familjen e tij, ata kanë lënë gjurmë të pashlyeshme në historinë tonë. Trimëria dhe sakrifica e tyre do të na frymëzojë përherë!”.