Category: Lajme

Komisioneri i Bashkimit Evropian për Zgjerimin dhe Fqinjësinë, Oliver Varhelyi ka reaguar pas vendimit të Bankës Qendrore të Kosovës për të ndaluar përdorimin e dinarit serb.

Përmes një postimi në platformën X, Varhelyi shprehet se Komisioni Evropian shpreh keqardhje që ky vendim është miratuar pa konsultim paraprak duke pasur parasysh ndikimin që ky vendim mund të ketë në jetën e përditshme të serbëve të Kosovës.

“Pikëpamja e Komisionit për rregulloren e fundit të Bankës Qendrore të Kosovës e cila ishte caktuar të hynte në fuqi më 1 shkurt 2024: Komisioni shpreh keqardhje që ky vendim është miratuar pa konsultim paraprak duke pasur parasysh ndikimin që ky vendim mund të ketë në jetën e përditshme të serbëve të Kosovës”, shprehet ai.

Prokuroria Themelore në Mitrovicë, ka paraqitur kërkesë për caktimin e paraburgimit për të pandehurin L.P., zyrtar i Administratës Tatimore të Kosovës.

Sipas komunikatës së Prokurorisë, ndaj të pandehurit L.P. ekziston dyshimi i bazuar se ka kryer veprat penale “Keqpërdorimi i pozitës apo autoritetit zyrtar” nga neni 414 paragrafi 1, dhe “Kontrabandimi me mallra“ nga neni 311 paragrafi 1 të Kodit Penal të Republikës së Kosovës.

“Me datë 01 shkurt 2024 në rrugën magjistrale Leposaviq – Mitrovicë përkatësisht në fshatin Bistricë, i pandehuri L.P., është ndaluar nga policia në pikë kontroll, i njëjti ka qenë duke e drejtuar veturën zyrtare të Administratës Tatimore të Kosovës. Gjatë kontrollit në bagazh janë gjetur dy çanta me lloje të ndryshme të barnave me banderola të Serbisë, pa poseduar asnjë dokument përcjellës”, thuhet në komunikatë.

Seanca dëgjimore për caktimin e masës së paraburgimit ndaj të pandehurit pritet të mbahet pranë Gjykatës Themelore në Mitrovicë.

Kryetari i Komunës së Prishtinës, Përparim Rama, ka njoftuar se e ka shkarkuar Drejtorin e Shërbimeve Publike, Ilirik Musliu.

Si arsye për shkarkim, Rama e ka dhënë menaxhimin e mbeturinave, që ka thënë se është gjendje alarmante.

“Të gjithë jemi dëshmitarë të gjendjes aktuale alarmante në Kryeqytet lidhur me menaxhimin e mbeturinave. Si Kryetar i Kryeqytetit, tash e një vit kam kërkuar në vazhdimësi nga drejtoria përkatëse zgjidhje të kësaj situate alarmante dhe të papranueshme. Por, përkundër të gjitha këtyre kërkesave, gjendja jo që nuk është përmirësuar, por përkundrazi është përkeqësuar. Andaj, sot, kam marrë VENDIM për të liruar nga detyra Drejtorin e Shërbimeve Publike”, ka shkruar Rama.

“Për më tepër, ju njoftoj se, në cilësinë e Kryetarit të Kryeqytetit, kam bërë përpjekje duke krijuar një Task Force dhe kam ndarë buxhet shtesë për këtë drejtori dhe ndërmarrjen përkatëse, por përkundër kësaj mbështetje të vazhdueshme nuk ka pasur rezultate nga drejtoria në fjalë. Prandaj, kam vendosur që të ndërhyjë dhe të marrë përsipër zgjidhjen e kësaj situate”, ka shkruar tutje Rama.

Policia e Kosovës ka kërkuar ndihmë për identifikimin e një personi të dyshuar për kanosje, duke publikuar fotografinë e tij.

Policia thirr qytetarët që të raportojnë në numrin 129 për çdo informatë që mund të kenë për të.

“Njësiti i hetimeve të stacionit policor Qendra në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në identifikimin dhe arrestimin e personit që shihet në fotografi. I dyshuari kërkohet për përfshirje në një rast, Kanosje, që është raportuar në polici me datën 12.12.2023. Të nderuar, për çdo informatë që mund të çojë në identifikimin e personit apo vendndodhjes së saj, kontaktoni policinë në numrin e telefonit: 192”, thuhet në njoftimin e Policisë.

Kryetari i Komunës së Gjilanit, Alban Hyseni, ka marrë vendim për ndalimin e ekskursioneve të nxënësve jashtë shtetit.

Këtë vendim, kreu i Gjilanit tha se e ka marrë në bashkërendim të plotë me këshillin e prindërve të komunës.

“Substancat narkotike, pijet alkoolike, lëndimet e rastet e ndryshme si dukuri negative, si dhe shpenzimet e mëdha familjare ishin disa nga arsyet e konkluzionet e përbashkëta mes nesh dhe këshillit të prindërve. Do të shohim alternativat e aktiviteteve të tjera edukative e kulturore, në të mirë për të gjithë maturantët tanë!”, ka thënë kryetari Hyseni.

Postimi i plotë:

“Në bashkërendim të plotë me këshillin e prindërve të komunës, kemi marrë vendim për ndalimin e ekskursioneve jashtë shtetit. Substancat narkotike, pijet alkoolike, lëndimet e rastet e ndryshme si dukuri negative, si dhe shpenzimet e mëdha familjare ishin disa nga arsyet e konkluzionet e përbashkëta mes nesh dhe këshillit të prindërve. Do të shohim alternativat e aktiviteteve të tjera edukative e kulturore, në të mirë për të gjithë maturantët tanë!

Për pesë javë, policia e trafikut në Prizren, duke shfrytëzuar veturën inteligjente patrulluese, ka identifikuar 917 kundërvajtës në trafik, të cilëve edhe iu janë shqiptuar gjobat përkatëse dhe atë më së shumti për disa kundërvajtje të veçanta si: Tejkalim të shpejtësisë, skadim i afatit të regjistrimit si dhe përdorim i telefonit mobil gjatë ngasjes së mjetit.

Gjatë kësaj periudhe, policia ka sekuestruar 393 tabela të regjistrimit me afat të skaduar.

“Gjatë kësaj periudhe patrullat policore të Njësisë Rajonale të Rregullimit të Komunikacionit Rrugorë të Prizrenit përveç patrullimit me veturë inteligjente kanë pas edhe aktivitete të tjera dhe patrullime të shtuara me qëllim te krijimit të sigurisë në qarkullimin rrugore si dhe parandalimin e aksidenteve të trafikut”, thuhet në njoftimin e Policisë.

Kryeministri i Maqedonisë së Veriut Talat Xhaferi ka pritur sot në takim në Shkup eurodeputetin Ilhan Kjuçuk, raportues në Parlamentin Evropian për Maqedoninë e Veriut.

Xhaferi ka shkruar në Facebook se është i rëndësishëm mesazhi se zgjedhja e tij për kryeministër është sinjal i fuqishëm për rolin udhëheqës të Maqedonisë së Veriut dhe provë për një shoqëri të suksesshme multietnike.

“Me mbështetjen e miqve si Ilhani, anëtarësimi jonë në BE në vitin 2030 është synim real”, ka thënë Xhaferi.

Në takim u bisedua për progresin e shtetit në kontekstin e integrimeve evropiane të Maqedonisë së Veriut dhe situatën e brendshme politike para zgjedhjeve të ardhshme parlamentare dhe presidenciale.

Ka përfunduar aksioni në disa lokacione në rajonin e Pejës kundër veprimtarive të strukturave ilegale.

Lajmin e ka bërë të ditur zëdhënësi i Prokurorisë së Pejës, Shkodran Nikçi.

Sipas tij, Prokuroria dhe Policia ende janë duke e zhvilluar aksionin në disa lokacione të tjera.

“Aksioni është në zhvillim e sipër, por në disa rajone ka përfunduar aksioni. Prokurori i Shtetit bashkë me Policinë janë ende në terren mirëpo, pasi të përfundoj aksioni do të dalim me një njoftim zyrtarë”, ka thënë Nikçi.

Mirëpo, siç mëson Telegrafi nga burimet e saj disa persona të dyshuar aktualisht gjenden në stacionin policor dhe janë duke u intervistuar nga hetuesit policorë.

Gazetari gjerman i “Frankfurter Allgemeine Zeitung”, Michael Martens, ka thënë se vendimi i institucioneve të Kosovës për çështjen e dinarit është i drejtë, megjithatë ai ka pasur kritikë të ashpër për atë se si është paraqitur ai vendim, duke thënë se është shumë e lehtë për të venë në pikëpyetje motivet.

Martens ka shkruar për këtë çështje një artikull në gazetën prestigjioze gjermane FAZ, duke thënë se derisa dinari po largohet nga tregu, vështirë që dikush nga serbët lokalë është i përgatitur për një gjë të tillë.

“Dinari serb më parë ka qenë mjet i zakonshëm i pagesës në veri të Kosovës. Tani lejohet vetëm euro. Mbetet e paqartë se si serbët e Kosovës do të marrin paga, pensione apo përfitime sociale në të ardhmen”, thuhet në shkrimin e Martens në FAZ.

“Vendimi është i drejtë, por mënyra se si është marrë është një PR i tmerrshëm, duke e bërë të lehtë që të vendosen pikëpyetje për motivet”, ka shkruar në platformën X Martens ku edhe e ka shpërndarë artikullin e tij.

The decision is right, but the way it is carried out so far is a PR-disaster, making it easy to put the motives behind it into question: Some remarks on Kosovo's attempt to establish the € as the sole legal tender in 🇽🇰, as constitutionally mandated.https://t.co/ypQACqIG9I

— Michael Martens (@Andric1961) February 2, 2024