Category: Lajme

Sekretari amerikan i Shtetit Anthony Blinken, pritet që ta vizitojë Shqipërinë më 16 shkurt.

Kështu raporton mediumi shqiptar Top Channel, sipas të cilit është duke u punuar në finalizimin e detajeve të kësaj vizite.

Vizita në Shqipëri e Blinkenit do të jetë e para, prej vitit 2021 kur ai mori drejtimin e diplomacisë amerikane.

Qëllimet e kësaj vizite nuk dihet, por thuhet se sekretari amerikan i Shtetit, vjen si një vlerësimin për Shqipërinë, si një aleate e SHBA-së dhe në NATO.

Vizita e Anthony Blinken, është e katërta e një sekretari amerikan në Shqipëri.

Ka hyrë në fuqi rregullorja e cila ua mundëson konsumatorëve të shkëpusin kontratat me operatorët kabllorë, për shkak të ndryshimit të njëanshëm të kushteve kontraktuale. Siç ka bërë të ditur Autoriteti Rregullativ i Komunikimeve Elektronike dhe Postare, përdoruesit kanë të drejtë të shkëpusin kontratat pa kosto shtesë.

ARKEP-i ka thënë se rregullorja është në përputhje me Kodin Evropian të Komunikimeve Elektronike dhe qëllimi kryesor i saj është fuqizimi i mëtutjeshëm i të drejtave të konsumatorëve. Për të gjitha rastet si, ndryshimi i njëanshëm i kushteve kontraktuale, funksionimi i dobët i shërbimit, apo shkeljeve tjera të kushteve kontraktuale nga ofruesi i shërbimit, konsumatori ka të drejtën e shkëputjes së parakohshme të kontratës.

Sipas ARKEP-it, përdoruesit duhet të njoftohen jo më vonë se 30 ditë para hyrjes në fuqi të ndryshimeve dhe duhet të informohen për të drejtën për shkëputje nëse nuk i pranojnë kushtet e reja.

“E drejta për shkëputjen e kontratës mund të ushtrohet brenda dy (2) muajve pas njoftimit të tillë. Ofruesit e shërbimeve duhet të sigurojnë që njoftimi të bëhet në mënyrë të qartë dhe të kuptueshme në një medium të qëndrueshëm (sms, e-mail apo përmes adresës postare)”, thuhet në nenin 10 të rregullores.

Në rregulloren e re është përfshirë edhe mundësia e shkëputjes së kontratës për shkak të funksionimit të dobët të shërbimit, pra nëse konsumatorët nuk marrin performancën siç bëhet e ditur në kontratë.

Rregullorja ka sqaruar se periudha e vendosur kur ofruesi i shërbimit mund të kërkojë kompensim për shkëputjen e parakohshme të kontratës (gjatë 9 muajve të parë kur kontrata është lidhur për 12 muaj, përkatësisht 12 muajt e parë kur kontrata është lidhur për 24 muaj), vlen vetëm për rastet kur janë përmbushur të gjitha kushtet e kontratës nga ofruesi i shërbimit.

Një ditë më parë, Ministria e Industrisë, Ndërmarrësisë dhe Tregtisë pas shqyrtimit të qindra ankesave të konsumatorëve lidhur me shërbimet e rrjetit kabllor, njoftoi se ka vendosur për t’i obliguar operatorët kabllorë që të largojnë kushtet e padrejta në kontratë, duke ua lejuar konsumatorëve të drejtën për shkëputje të kontratës në rast se operatori nuk i përmbushë obligimet sipas kontratës.

Sipas njoftimit të MINT-it, detyrimi që i vihet konsumatorëve me rastin e lidhjes së kontratës për të paguar pjesën e mbetur të saj edhe nëse ka ndryshuar përmbajtja e shërbimit/kanaleve, është në kundërshtim me ligjin.

Zëvendëskryeministri dhe ministri i Transportit të Italisë Matteo Salvini shprehu kënaqësinë të martën pasi presidentja e Komisionit Evropian Ursula von der Leyen njoftoi tërheqjen e një ligji të propozuar që synonte të pakësonte përdorimin e pesticideve në BE, mes protestave me traktorë nga fermerët në shumë pjesë të Evropës, duke përfshirë Italinë.

“Rrofshin fermerët, traktorët e të cilëve po e detyrojnë Evropën të kthejë mbrapshtë çmendurinë e imponuar nga shumëkombëshet dhe e majta”, tha Salvini, kreu i partisë së djathtë Liga.

Von der Leyen i tha Parlamentit Evropian në Strasburg se Rregullorja e Përdorimit të Qëndrueshëm (SUR), e cila synonte të zvogëlonte përgjysmë përdorimin e pesticideve deri në vitin 2030, po tërhiqej, duke thënë se ajo ishte “bërë një simbol i polarizimit”.

Megjithëse politikat e BE-së dhe Marrëveshja e Gjelbër, pjesë e së cilës është SUR, janë një faktor i madh në protestat e traktorëve, përfshihen edhe elementë të tjerë, si zemërimi i fermerëve për çmimet e larta të karburantit dhe vështirësitë me të cilat përballen shumë prej tyre, dhe pakënaqësia me disa politikat kombëtare.

Traktorë nga e gjithë Italia janë përdorur për të ardhur në Romë ditët e fundit dhe fermerët synojnë të organizojnë një demonstratë të madhe në kryeqytetin italian.

Kryeministrja italiane Giorgia Meloni tha të hënën nga Tokio se qeveria ka bërë gjithçka që është e mundur për të mbështetur fermerët dhe sektorin bujqësor.

“Ne jemi takuar gjithmonë me fermerët, një nga sektorët kryesorë të cilit i kushtojmë vëmendje,” u tha Meloni gazetarëve në kryeqytetin japonez.

Faktet, tha ajo, flasin vetë, duke përmendur “ligjet buxhetore përmes të cilave janë rritur burimet”, rinegocimin e planit kombëtar të rimëkëmbjes dhe qëndrueshmërisë pas Covid-it të financuar nga BE (NRRP) për të rritur fondet e disponueshme “nga 5 në 8 miliardë euro” dhe “përpjekja për të ofruar naftën”.

“Ne gjithmonë mund të punojmë për të bërë më mirë dhe më shumë, unë jam gjithmonë e gatshme të dëgjoj kërkesat”, përfundoi ajo.

Edhe ministri italian i Bujqësisë Francesco Lollobrigida përshëndeti njoftimin e von der Leyen.

Kryetari i Lidhjes Demokratike të Kosovës, Lumir Abdixhiku sot ka pritur në takim ambasadorin e Belgjikës në Kosovë, Gregoire Cuvelier.

Sipas njoftimit të LDK-së në Facebook, Abdixhiku dhe ambasadori Cuvelier diskutuan rreth zhvillimeve të fundit në Kosovë, dhe qëndrimet e LDK-së karshi këtyre zhvillimeve.

Abdixhiku ka falënderuar ambasadorin Cuvelier për përkrahjen e vazhdueshme të Belgjikës ndaj Kosovës, në proceset integruese të saj.

Zëvendëskryeministri Besnik Bislimi e priti në një takim ambasadoren e Kroacisë në Kosovë, Danijela Barisiq.

Në njoftimin e lëshuar nga Zyra e Kryeministrit thuhet se Kosova dhe Kroacia gëzojnë marrëdhënie të shkëlqyeshme, të cilat u riafirmuan dhe në takimin e sotëm.

“Bashkëpunimi mes dy shteteve tona dhe intensifikimi i marrëdhënieve ishin në fokus të diskutimit të zhvilluar. Palët biseduan më tej dhe mbi zhvillimet e fundit në vend dhe rajon”.

“Zëvendëskryeministri Bislimi e falënderoi ambasadoren për takimin, bisedën dhe bashkëpunimin e frytshëm e të vazhdueshëm”, thuhet në njoftimin e qeverisë.

10 pjesëtarë të Policisë së Kosovës kanë dhënë dorëheqje gjatë muajit janar. Mbi 5600 zyrtarë policorë kanë nënshkruar peticionin e Sindikatës së Policisë së Kosovës, i cili u shqyrtua sot në mbledhjen e Komisionit për të Drejtat e Njeriut. Këshu tha kryetari i sindikatës, Imer Zeqiri, i cili shtoi se janë mbi 4700 raste të lëndimeve gjatë kryerjes së detyrës zyrtare dhe se të njëjtit kanë mbetur me invaliditet të përhershëm.

Teksa foli për kushtet e policëve, kryetari i Sindikatës së Policisë së Kosovës, Imer Zeqiri deklaroi se ka numër të madh të dorëheqjeve të pjesëtarëve. Ai lexoi edhe deklaratën e një polici që ka dhënë dorëheqje ditëve të fundit, ku theksoi se paga jo e dinjitetshme, shtesat policore e rrezikshmëria janë disa nga arsyet.

“Të gjithë ata që po japin dorëheqje vullnetare, po e dëmtojnë vet institucionin e sigurisë, për shkak se të gjithë janë profesionist të dëshmuar në punë. Parandalimi i vetëm për dorëheqje është plotësimi i kushteve dhe mirëqenies në Policinë e Kosovës. Për këtë vit nuk kemi një statistikë të saktë, kemi diku rreth 10 pjesëtarë deri më tani, për muajin janar. Unë vetëm sa për kureshtje se pse shumica e zyrtarëve policor japin dorëheqje, unë e kam një dorëheqje që është dorëheqje taman origjinale, deklaratë e policit që e ka dhënë para disa ditëve”, deklaroi ai.

Ai shtoi se kërkesë e tyre mbetet që të krijohet një fond për të gjithë policët që kanë mbetur me aftësi të kufizuara.

“Kemi prej atyre rasteve që mbi 4700 raste të lëndimeve gjatë kryerjes së detyrës zyrtare, kemi zyrtarë policorë që kanë mbetur me invaliditet të përhershëm, kanë mbetur në karrocë dhe nuk kanë mundur dhe nuk kemi një fond. Njëra ndër kërkesat që ka rrjedhur pas peticionit është edhe kjo, që të krijohet një fond për të gjithë ata që kanë mbetur me invaliditet të përhershëm. Ata realisht e marrin një pagë prej Policisë, aq ka mundësi buxheti i Policisë për t’i ndihmuar, përndryshe nuk kanë përkujdesje shtetërore”, theksoi ai.

Para anëtarëve të Komisionit për të Drejtat e Njeriut, ai u shpreh se mosha mesatare e pjesëtarëve të Policisë së Kosovës është 47 vjeç.

Ndërkaq, anëtarja e Komisionit për të Drejtat e Njeriut, Fatmire Mulhaxha-Kollçaku tha se vet policia është dashur të bëjë presion për implementimin e Ligjit për Sigurimet Shëndetësore.

“Në këtë kuvend është miratuar shumë vite më herët Ligji për Sigurimet Shëndetësore, i cili sot e kësaj dite nuk zbatohet. Presioni i parë i cili është dashur edhe policia edhe gjithë qytetarët të bëjë karshi të gjitha qeverive të deritanishme është që sa më shpejt të zbatohet Ligji për Sigurim Shëndetësor, që i takon gjithë qytetarëve. Kemi fëmijë, kemi të rritur, kemi policë, kemi ushtarë, kemi mjekë, mësues, që kanë nevojë për shërbime shëndetësore. Mirëpo, shteti duhet ta rregullojë për gjithë qytetarët në mënyrë të barabartë dhe është dashur policia të bëjë presion të jashtëzakonshëm që sa më shpejt të krijohet fondi publik dhe të zbatohet ligji. Ky është dashur të bëhet debati publik ndër vite me qenë”, deklaroi ajo.

Më tej, ajo kërkoi nga Sindikata e Policisë së Kosovës që të mos ndikohen nga partitë politike.

Për këtë, reagoi edhe kryetari Imer Zeqiri, i cili tha se asnjëherë nuk ka ndodhur një gjë e tillë.

“Asnjëherë Sindikata e Policisë së Kosovës, po e them me shumë përgjegjësi, asnjëherë nuk ka qenë e ndikuar, as nuk ka krijuar simpati për asnjë subjekt politik në Republikën e Kosovës, në Kuvendin e Kosovës. Asnjëherë nuk ka marrë direktiva as prej partisë në pushtet e as prej partive opozitare, sepse jemi të vendosur që Sindikatën e Policisë së Kosovës dhe Policinë e Kosovës ta mbajmë a-politike. Sindikata e Policisë së Kosovës është a-politike. Asnjëherë në asnjë kërkesë që e kemi adresuar dhe në asnjë prononcim që e kemi bërë para mediave nuk kemi thënë se Sindikata e Policisë është kundër qeverisë. Çdo herë edhe sot po e them, Sindikata e Policisë së Kosovës, qeverinë e llogarit si partner për dialog”, u shpreh ai.

Kurse anëtarja e Komisionit për të Drejtat e Njeriut, Ariana Musliu-Shoshi kritikoi pushtetin, ku tha se që nga vera nuk janë dëgjuar kërkesat e sindikatës.

“Se sa është pushteti i gatshëm të ju takojë, mendoj që të gjithë ata që ju dëgjojnë por edhe ju e dini. Kanë kaluar plot gjashtë muaj nga dorëzimi i kësaj kërkese edhe tek sot e kanë gjetur kohën me ju taku. Kanë kaluar dy muaj kur ne e kemi caktuar kohën të ju takojmë dhe ka qenë data 3 tetor. Ne ju kemi dëgjuar, ne e dimë çka keni për të thënë. Ne e dimë me çka përballeni ju, sepse e kemi ngritur zërin në kuvend. Ne kemi ftuar seancë të jashtëzakonshme, pozita nuk ka marrë pjesë për të diskutuar për ju, në këtë komision kemi ardhur, pozita nuk kanë gjetur kohë për të ardhur. Kemi marrë iniciativë për pensionim të parakohshëm, pozita nuk e ka votuar”, kritikoi Musliu-Shoshi.

Në mbledhjen e Komisionit për të Drejtat e Njeriut u tha se shujta ditore e një polici të Kosovës është rreth tetë euro.

Ministri i Mbrojtjes së Rumanisë, Angel Tilvar, ka përjashtuar mundësinë e kthimit të shërbimit të detyrueshëm ushtarak në Rumani në mes të diskutimeve lidhur me masat që duhet të ndërmarrë ky shtet i NATO-s në rast se lufta e Rusisë kundër Ukrainës zgjerohet.

Rumania aktualisht ka 80.000 pjesëtarë profesionistë të ushtrisë dhe një trupë të rezervistëve. Ky shtet kishte anuluar shërbimin e detyrueshëm ushtarak më 2007, tre vjet pasi iu bashkua NATO-s në mars të vitit 2004.

Shefi i ri i ushtrisë rumune, gjenerali Gheorghita Vlad, javën e kaluar deklaroi për Radion Evropa e Lirë se shtetit duhet më mënyrë urgjente të miratojë një kornizë ligjore që do t’iu mundësonte vullnetarëve civilë që të ndjekin trajnime ushtarake. Kjo deklaratë la vend për spekulime në mesin e rumunëve se do të rikthehej shërbimi i detyrueshëm ushtarak.

“Rikthimi i shërbimit të detyrueshëm ushtarak është jashtë diskutimit, të paktën gjatë mandatin tim si ministër i Mbrojtjes. Unë e kam refuzuar këtë mundësi”, tha Tilvar për Euronews. “Aktualisht nuk ka diskutime për këtë çështje”.

Megjithatë, Tilvar konfirmoi se deklarata e gjeneralit Vlad se me Ministrinë e Mbrojtjes po diskutohet një ligj që do të rregullonte një program trajnimi ushtarak për vullnetarët nga mosha 18 deri në 35 vjeç. Ky legjislacion parasheh një pagesë për ata që e përfundojnë programin.

“Një shërbim i tillë vullnetar do të përmbushte nevojat për një forcë rezerviste, pasi që çdo shtet është i shqetësuar me sigurimin e një force njerëzore për një trupë rezerviste”, tha Tilvar.

Ai tha se ushtria rumune vitin e kaluar humbi 7.000 ushtarë profesionistë për shkak ose u pensionuan ose dhanë dorëheqje.

Megjithatë, Parlamenti i Rumanisë ka pak të ngjarë të diskutojë këtë për një ligj të tillë që do të rregullonte shërbimin vullnetar pasi që shteti është paraparë të mbajë zgjedhje lokale, parlamentare dhe presidenciale.

Tilvar u bëri jehonë deklaratave të bëra nga presidenti Klaus Iohannis, dhe kryeministri Marcel Ciolacu, duke siguruar publikun se Rumania nuk po përballet me një rrezik të menjëhershëm nga ndonjë sulm, duke rikujtuar se është shtet anëtar i NATO-s.

“Por, kjo nuk do të thotë se një shtet i fortë sikurse Rumania, anëtare e aleancës më të rëndësishme në histori, nuk duhet t’iu bashkohet ushtrive të tjera që po veprojnë kështu”, tha Tilvar.

Iohannis javën e kaluar deklaroi se Rumania “kurrë nuk ka qenë më e mbrojtur se tash, si anëtare e NATO-s”, ndërkaq Ciolacu tha se “nuk ka rrezik që Rumania të përfshihet tani në ndonjë luftë. Rumania kurrë nuk ka qenë më e sigurt”.

Pas nisjes së pushtimit rus të Ukrainës në shkurt të vitit 2022, NATO rriti trupat në Evropë dhe krijoi edhe tri grupe luftarake shumëkombëshe në Bullgari, Hungari, Rumani dhe Sllovaki./REL/

Çmimet e naftës u rritën pak në fillim të tregtisë të martën, ndërsa tregjet prisnin më shumë sinjale për ofertë, mes konfliktit në Lindjen e Mesme.

Nafta e papërpunuar ndërkombëtare Brent u tregtua me 78,19 dollarë për fuçi në orën 10:28 të mëngjesit sipas orës lokale (0728 GMT), një rritje prej 0,26% nga çmimi i mbylljes prej 77,99 dollarë për fuçi në seancën e mëparshme tregtare të hënën.

Standardi amerikan, ‘West Texas Intermediate’ (WTI), tregtohej në të njëjtën kohë me 72,97 dollarë për fuçi, 0,26% më shumë nga mbyllja e së hënës prej 72,78 dollarë për fuçi.

Frika nga përhapja e konfliktit në Lindjen e Mesme në vendet e tjera për të ndërprerë më tej rrugët e furnizimit mbështeti rritjen e çmimeve.

ShBA po kryen “sulme vetëmbrojtëse” kundër mjeteve shpërthyese sipërfaqësore pa ekuipazh (USV) në zonat e Jemenit të kontrolluara nga grupi Houthi.

Houthi-t kanë synuar anije mallrash në Detin e Kuq në pronësi ose të operuara nga kompani izraelite që transportojnë mallra drejt dhe nga Izraeli në hakmarrje kundër sulmit izraelit në Rripin e Gazës që nga 7 tetori.

ShBA-të gjithashtu kishin filluar sulmet ajrore të premten kundër Forcave Quds të Gardës Revolucionare Islamike të Iranit (IRGC) dhe milicive të mbështetura nga Irani në Irak dhe Siri, pasi një sulm vetëvrasës me dron vrau tre trupa amerikane në Jordani muajin e kaluar.

Investitorët po fokusohen gjithashtu në vizitën e Sekretarit të Shtetit të SHBA Antony Blinken në Lindjen e Mesme.

Blinken mbërriti në Arabinë Saudite të hënën si ndalesa e parë në turneun e tij të fundit rajonal si pjesë e përpjekjeve për të nxitur një armëpushim në Rripin e Gazës.

Turneu i tij do të vazhdojë deri më 8 shkurt dhe do të përfshijë gjithashtu Egjiptin, Katarin, Izraelin dhe Bregun Perëndimor të pushtuar. /Anadolu Agency/