Category: Lajme

Përgatiti: Driton Sadiku

Nxënësit e shkollave të mesme do të mund të mësojnë më shumë për historikun e institucioneve të sigurisë, qysh nga viti i ri shkollor, si pjesë e lëndës edukimi për siguri.

Ata do të njoftohen edhe me pajisjet që posedon ushtria, por edhe tema të tjera, siç njoftoi Ministria e Mbrojtjes në një përgjigje për ATV-në.

“Sillabusi parasheh 60 orë ku shumica janë teori, por një pjesë e temave janë edhe praktikë. Pjesa teorike përfshin historikun e institucioneve të sigurisë së Kosovës, Policisë, FSK-së, AME-së dhe AKI-së. Njohja e pajisjeve të FSK-së, armët për shkatërrim në masë, ndërtimi i ekipit, rekrutimi në institucionet e sigurisë, rreziqet nga inteligjenca artificiale, mbrojtja civile, epidemiologjitë dhe veprimet sanitare, si dhe mbrojtja e trashëgimisë kulturore”, thuhet në përgjigjen e Ministrisë së Mbrojtjes.

Përveç teorisë, lënda parasheh edhe pjesën praktike ku nxënësit do të praktikojnë leximin e hartave, mjetet eksplozive, edukimin fizik, ndërtimin e kampit, kërkim-shpëtimin etj.

Megjithatë, kërkohet që të ketë përgatitje sa më të madhe nga ana e Ministrisë së Arsimit.

Ministria nuk tregoi se si do të realizohet kjo lëndë, megjithëse jozyrtarisht televizioni mëson se pjesa teorike do të mbahet në shkolla, ndërkaq ajo praktike me raste në kazermat ushtarake.

Sidoqoftë, sipas Ministrisë së Mbrojtjes, ka mjaft ligjërues e instruktorë që do të mund ta ligjërojnë këtë lëndë.

Përgatiti: Kastriot Tahiri

Në tri projektet për punimet dhe rinovimin e stadiumeve, atij të Mitrovicës, të Gjilanit dhe të Gjakovës, Zyra e Auditorit gjeti parregullsi.

Po filloj me gjetjet e ZKA-së për Stadiumin Olimpik ‘Adem Jashari’ në Mitrovicë, MKRS-ja nuk kishte qenë në dijeni që nuk kishte vetëm një titullar të pronës, stadiumi ishte ndërtuar në disa pronat, që i përkisnin kompanive në kuadër të ndërmarrjes, “Trepça”. MKRS-ja nuk ka aplikuar për leje ndërtimore se nuk i plotëson kriteret për t’u pajisur me një leje të tillë. Kjo çështje nuk është zgjidhur ende. Po rinovohet për herën e tretë ky stadium”, tha deputetja e LV-së, Mirlinda Tishukaj-Sadiku.

Derisa tha se është çështje ditësh prej kur do të lëshohet leja për nisje të punimeve në stadiumin në Mitrovicë, Ministri i Kulturës, Hajrullah Çeku, foli edhe për shkëputjet e kontratave në disa projekte.

“Po e filloj me stadiumin e Gjilanit, ku ka ndodhur shkëputja e kontratës me operatorin, është bërë para se të bëhej raporti i auditimit. E kemi bërë analizën e gjendjes dhe kemi nisur procedurë të prokurimit, kemi ndarë 15 milionë euro dhe kemi bërë memorandum me komunën për hapjen e prokurimit. “Rasti më i komplikuar stadiumi Adem Jashari në Mitrovicë. Është çështje ditësh kur do të lëshohet leja përfundimtare para nisjes së punimeve”, tha Çeku.

Por, diskutimi në Komisionin për Mbikëqyrje të Financave publike, u përcoll me përplasje ndërmjet ministrit Çeku dhe deputetes së AAK-së.

“Ministër, a mund ta dimë qe sa jeni në mandat ju, sepse jeni në përfundim të mandatit tuaj, cilin stadium e keni nisur dhe e keni përfunduar? A mund ta di?”, tha deputetja e AAK-së, Albana Bytyqi.

“Unë për diçka jam rehat, pyetjes suaj më së miri mund t’i përgjigjem me këtë: Ministri i ardhshëm i sportit nuk do t’i ketë telashet që i kam pasur unë. Për fat të keq ai nuk do të jetë ministër në mandatin e ardhshëm”, tha ministri Çeku.

“Nuk ka lidhje deputete a jam a nuk jam. Edhe nëse jeni ju ministre e ardhshme e sportit, unë jam rahat me ju në këtë rast si ministre e ardhshme e sportit nëse do të jeni që telashet që unë i kam trashëguar ju nuk do t’i keni”, shtoi Çeku.

Megjithatë, Çeku tha se tashmë buxheti është i siguruar për të gjitha stadiumet, dhe se ato do të përfundohen deri në vitin 2025.

Kryeministri Albin Kurti, ishte sot për vizitë ngushëlluese te familja e profesorit të ndjerë, Kadri Metaj.

Në njoftimin e Zyrës së Kryeministrit thuhet se Kurti shprehu konsideratën e tij të lartë për kontributin e profesorit universitar Kadri Metaj në fushën e arsimit dhe të edukimit të brezave.

Shënimi i kryeministrit Kurti, në librin e kujtimeve:

“Prof. Kadri Metaj mësoi si të mendojnë shumë breza studentësh të cilët sot i kontribuojnë Kosovës dhe shoqërisë.

Me jetën e tij të intelektualit të angazhuar dhe profesorit të Filozofisë, në veprat e tij të shkruara që do të lexohen gjatë, e gjejmë në punët dhe rolin tonë si frymëzim që nuk shuhet.

Me mall dhe nderim”.

Kurti kishte marrë pjesë edhe në ceremoninë e varrimit të profesorit të ndjerë. Sot ai ishte i shoqëruar nga ministrja e Arsimit, Shkencës, Teknologjisë dhe Inovacionit, Arbërie Nagavci, ministri i Mbrojtjes, Ejup Maqedonci, dhe zëvendësministri i Drejtësisë, Vigan Qorrolli.

Prof. Kadri Metaj doktoroi në vitin 1987 në Universitetin e Prishtinës kurse në vitin 1979 u zgjodh asistent në degën filozofi-sociologji. Nga viti 1999 deri në pensionim ishte profesor i rregullt në Departamentin e Filozofisë, ku ligjëroi lëndët nga fushat e filozofisë.

Po ashtu ligjëroi edhe në Universitetin e Evropës Juglindore në Tetovë, në Universitetin e Shkupit dhe në Universitetin e Tetovës.

Disa nga veprat e tij janë: “Teoria estetike e Gjergj Llukaçit” botuar më 1990, “Filozofia politike” më 2003 derisa përktheu edhe disa vepra nga fusha e filozofisë dhe estetikës.

Një gjykatë federale amerikane vendosi se Donald Trump mund të përballet me gjykim nën akuzat se kishte komplotuar që të përmbyste rezultatin e zgjedhjeve presidenciale të vitit 2020, duke hedhur poshtë pretendimet e ish-presidentit se ai është imun nga ndjekja penale.

Ky vendim është i dyti në muajt e fundit që gjykatësit kanë hedhur poshtë argumentet e Trumpit për imunitet dhe gjykata se ai mund të ndiqet penalisht për veprimet e ndërmarra në kohën kur ishte në Shtëpinë e Bardhë dhe më prag të 6 janarit 2021, kur mbështetësit e tij sulmuan ndërtesën e Kongresit amerikan.

Ky vendim po ashtu hap rrugën për apele të tjera nga ish-presidenti republikan dhe kjo çështje mund të përfundojë në Gjykatën Supreme të Shteteve të Bashkuara. Gjykimi ndaj Trumpit, për akuzat që lidhen me përmbysjen e rezultatit zgjedhor, fillimisht ishte paraparë të mbahej në mars, por javën e kaluar u shty dhe gjykatësi i rastit ende nuk ka vendosur një datë të re.

“Për qëllimin e kësaj çështjeje penale, ish-presidenti Trump është shndërruar në qytetarin Trump me të gjitha mbrojtjet që gëzon çdo i pandehur tjetër”, tha paneli prej tre gjyqtarësh në Gjykatën e Apelit në Qarkun e Kolombias.

“Por, çdo imunitet ekzekutiv që mund ta ketë mbrojtur atë në kohën sa ka qenë president, më nuk e mbron atë nga ndjekja”.

Ky vendim, që pritet të apelohet nga Trumpi, hedh poshtë përpjekjet e tij për të shmangur një gjykim nën akuzuat se ai ka minuar demokracinë amerikane dhe transferimin e pushtetit, në kohën kur ai po konsolidon pozicionin e tij si kandidati kyç për të marrë nominimin për president nga republikanët.

Trump edhe fushatës zgjedhore dhe në mediat sociale vazhdimisht ka pretenduar se ka imunitet. Ai përmes një postimi më 18 janar tha se “të gjithë presidentët duhet të kenë imunitet të plotë presidencial apo autoritet. Vendosmëria e një presidenti të SHBA-së nuk duhet të hiqet kurrë”.

Çështja e imunitetit ishte trajtuar nga një gjykatë e qarkut në dhjetor, duke hedhur poshtë pretendimet e Trumpit. Vendimin e gjykatëses Tanya Chutkan, Trump e kishte apeluar.

Më 6 janar, mbështetësit e Trumpit sulmuan Kongresin amerikan në kohën kur po certifikohej fitorja në zgjedhje e Joe Bidenit. Të paktën nëntë presona vdiqën në Kongres gjatë ose pas trazirave të 6 janarit.

Trump vazhdimisht ka përsëritur pretendimet e tij të rreme se ai kishte fituar zgjedhjet më 2020 dhe i ka cilësuar si patriotë personat që sulmuan Kongresin.

Objektivat kryesore ndërmarrëse të Komisionit të Pavarur të Mediave për vitin 2024 përfshijnë monitorimin e transmetimeve televizive, mbrojtjen e qytetarit nga përmbajtjet e ndjeshme mediale, tregun e shëndoshë medial si dhe rritjen e transparencës së mediave të cilat janë të licencuara.

Kryetari i Komisionit të Pavarur të Mediave, Jeton Mehmeti tha se të gjitha këto objektiva specifike do të realizohen në bazë të rregulloreve të reja, të cilat do të hyjnë në fuqi gjatë këtij viti.

Mehmeti theksoi se për të zbatuar këto objektiva, KPM-ja ka kapacitet të mjaftueshëm. Ai tha se nëse në fund të vitit realizohet ky plan, situata televizive do të jetë më e mirë, si për qytetarët ashtu edhe për rritjen e transparencës së mediave.

“Kemi paraparë pesë objektiva strategjike, e para ka të bëjë me mbrojtjen e përdoruesit të mediave, mbrojtja e qytetarit, qoftë nga përmbajtjet e dëmshme të mediave me fokus mbrojtja e fëmijëve, respektimi i të drejtave të tyre, adresimi i shpejtë i ankesave të tyre dhe respektimi kodit te etikës. Kjo do të nënkuptonte shqyrtimin e disa rregulloreve që ne i kemi aktualisht apo edhe rregulloreve të reja që do të nxjerrim gjatë këtij viti. 44:14 Objektivi i dytë ka të bëjë me promovimin e një tregu të shëndoshë medial dhe kjo ka të bëjë me mbrojtjen e të licencuarve tonë nga pirateria e mbrojtjes mediale, luftimi i operatorëve ilegalë.44:37 Objektivi tre ka të bëjë më rritjen e transparencës së mediave të cilat ne i licencojmë dhe si hap të domosdoshëm e kemi parë edhe hulumtimin e tregut medial, informata të cilat janë të nevojshme për neve dhe publikun. 45:05 Objektiv të katërt kemi parë edhe shfrytëzimin efecientë të frekuencave që u përmend edhe më herët dhe ko nënkupton një koordinim më të mirë edhe me vendet fqinjëve dhe rishikimin e planit të frekuencave.46:36 Ky është një plan me objektiva specifike, e kemi diskutuar dhe analizuar dhe besoj që kemi kapacitet të mjaftueshëm, dhe në fund kur të zbatohet ky plan do të kemi një situatë më të mirë edhe në mbrojtjen e qytetarit dhe në mbrojtjen vet subjekteve të licencuara dhe rritjen e transparencës së mediave me të cilat ne i rregullojmë”, tha Mehmeti.

Ndërkaq, kryeshefi ekzekutiv i KPM-së, Faruk Rexhaj tha se monitorimi i mediave do të vazhdojë dhe se fokusi më i madh do të qëndrojë tek mediat televizive.

Rexhaj tha se gjatë këtij viti KPM-ja do të pajiset edhe me disa pajisje teknike të cilat do të mundësojnë monitorim të dyfishtë.

“Ne do të vazhdojmë më monitorim në çdo pjesë ku kemi operime ilegale dhe si të tillë në momentin që gjejmë shkelje KPM-ja do të ndërmarrë masa të nevojshme për ndaljen e kësaj forme të transmetimit. 23:06 Fokusi tek televizionet me program gjeneralistik, ndërsa nuk është që kemi pasur fokus tek monitorimi radiove, ndoshta në të ardhmen me rritjen e punëtorëve është diçka që duhet të krijohet edhe një grup që do të bëjë edhe monitorimin e radiove, por jemi të fokusuar tek televizionet. Sa i përket kapaciteteve, qeveria e Kosovës ka aprovuar disa projekte që kanë të bëjnë me digjitalizimin e këtyre pajisjeve, po ashtu edhe me zgjerimin e këtyre pajisjeve që mendoj se nëse shkon gjithçka mirë deri në fundvit do të kemi dyfishim të kapacitetit të pajisjeve të monitorimit në përgjithësi po ashtu edhe pajisjeve teknike për matjen e frekuencave digjitale”, tha Rexhaj. /kp

Dy projekte në vlerë prej 140 mijë euro, të cilat përfshijnë projektin për sigurimin e deponimit të mbeturinave në Restelicë të Dragashit dhe sigurimin e një radiografie në Qendrën e Mjekësisë Familjare në Mamushë, u nënshkruan sot përmes një ceremonie nga Ambasada e Japonisë dhe kryetarët e këtyre dy komunave.

Ambasadori i Japonisë në Kosovë, Keisuke Yamanaka tha se përmes këtij projekti, Komuna e Dragashit do të përkrahet për ndërtimin e Deponimit të Mbeturinave dhe vendosjen e kontenjerëve për grumbullimin e mbeturinave në fshatin Restelicë.

Ai shtoi se ky projekt do të përmirësojë shërbimin e grumbullimit të plehrave dhe do të kontribuojë për ta bërë qytetin më të pastër dhe më komod për të jetuar banorët e kësaj zone.

Yamanaka theksoi se me këtë projekt do të përfitojnë rreth 4700 banorë që jetojnë në këtë fshat.

Ndërkaq, në lidhje me donacionin për Komunën e Mamushës, Yamanaka potencoi se me nënshkrimin e këtij projekti, qytetarët e Mamushës nuk do të kenë nevojë më të udhëtojnë nëpër komuna të tjera për ta bërë radiografinë, ngase QKMF-ja do të pajiset me një aparat të tillë në kuadër të Grantit Ndihmës Japonez për Projektet e Sigurisë Bazike Njerëzore për vitin 2023.

Nga ky projekt për sigurimin e pajisjes me rreze X, pritet që të përfitojnë afro 1500 pacientë në vit.

Kryetari i Komunës së Dragashit, Bexhet Xheladini derisa falenderoi ambasadorin e Japonisë në Kosovë për këtë donacion, tha se kjo iniciativë nuk paraqet vetëm mbështetje financiare për këtë komunë, por është edhe një eksperiencë profesionale për të aplikuar praktikat më të mira të popullit japonez.

Xheladini potencoi se kjo mbështetje nga Japonia, nuk është e para për Dragashin, për çka përmendi se para pak kohësh, kanë pranuar katër kamionë e mjete të tjera për transportin dhe mbledhjen e mbeturinave, një pikë grumbullimi për ruajtjen e përkohshme të mbeturinave në fshatin Brod si dhe rregullimin e vendit të goditur nga orteku u borës në fshatin Restelicë.

Ndërkaq, kryetari i Komunës së Mamushës, Abdulhadi Krasniç tha se ky është nënshkrimi i projektit të parë mbështetës me Ambasadën e Japonisë, për çka shtoi se pret edhe përkrahje të tjera në fushën e arsimit, shëndetësisë dhe bujqësisë.

Ai shtoi se është kënaqësi që përmes këtij donacioni të kenë mundësinë të njoftohen nga afër me disiplinën dhe kulturën e njerëzve nga Japonia.

Gjatë kësaj ceremonie të nënshkrimit, u tha se Ambasada e Japonisë do të mbetet e përkushtuar për të mbështetur Kosovën në përpjekjet e saj për të zhvilluar vendin dhe për të përmirësuar jetën e njerëzve. /KP

Komisioni hetimor parlamentar në lidhje me rezervat shtetërore ka angazhuar tre ekspertë. Hilmi Jashari është angazhuar për fushën juridike, Hasim Krasniqi, në atë të prokurimit publik, ndërkaq, Lulzim Beqiri sa i përket financave, raporton EO.

Anëtarët e komisionit, në mbledhje të martën, u pajtuan unanimisht që nga shtatë kandidatët që kishin aplikuar të zgjidhen tre të lartcekurit.

Kryetari i komisionit, Rashit Qalaj bëri të ditur se grupi punues sipas mandatit ka mbajt takimin e pare me prezencë të dy anëtarëve duke shqyrtuar aplikimet.

Deputeti i Lëvizjes Vetëvendosje, Driton Hyseni, tha se e vlerëson punën e Grupit Punues.

Edhe deputetja e Lidhjes Demokratike të Kosovës, Valetina Bunjaku, u shpreh e bindur se nuk do dal ndonjë problem gjatë këtij miratimi.

“Unë pajtohem me këto propozime, grupi punues meqë kanë propozuar emrat është mirë që bashkërisht me i votu pasi nuk mendoj se do dal ndonjë problem”, deklaroi ajo.

Ndërkaq Hartimi i planit të punës u shtye për të hënën kur do jenë të pranishëm ekspertë të fushës, pa pjesëmarrje të mediave.

Presidenti i Serbisë, Aleksandar Vuçiq ka thënë se ka dërguar 15 letra për vende me ndikim të BE-së, SHBA-së, ashtu si në Kinë e Rusi për situatën me Kosovën.

Vuçiq tha në TV Happy se u ka thënë këtyre vendeve se Serbia do paqe dhe jo luftë.

“Ju gjithmonë mendoni se njerëzit e dinë, na takon ne t’i njohim ata, të përpiqemi të themi se ne duam paqe dhe stabilitet, se ne nuk duam luftëra, se ne nuk i bëmë ato”, tha ai.

Vuçiq tha se elitat politike të vendeve perëndimore do të përpiqen ta përshpejtojnë zgjidhjen e çështjeve ndërmjet Kosovës dhe Serbisë për shkak të zgjedhjeve presidenciale në SHBA dhe zgjedhjeve për Parlamentin Europian.

Sipas tij, elitat politike në Europë “po nguten”, pasi “vlerësohet se partia e gjelbër dhe e majta do të marrin më pak vota se sa kanë pasur deri më tani”.

Vuçiq po ashtu theksoi se Perëndimi po nxiton ta përshpejtojë zgjidhjen e çështjeve ndërmjet Kosovës dhe Serbisë sepse “nuk janë plotësisht të sigurt se Ukraina mund ta mposht Rusinë”.

“Meqë nuk janë të sigurt, ata e dinë se mund të ndodhë që dikush të dalë me një rrëfim për precedentët që janë arritur në Kosovë. Prandaj duhet futur Serbinë në atë hinkë dhe ta përfundojë atë histori”, tha Vuçiq.