Një shtetase e Shqipërisë është arrestuar dje në Prishtinë, nën dyshimin se e njëjta ka kryer veprën penale ‘Trafikim me njerëz’.
“TRAFIKIM ME NJERËZ/ Prishtinë 09.02.2024-13:30. Është arrestuar e dyshuara femër shtetase e Shqipërisë, nën dyshimin se e njëjta ka kryer veprën penale të cekur si dhe është identifikuar një viktimë e supozuar e trafikimit”, thuhet në raportin policor.
Tutje, Policia njoftoi se me vendim të prokurorit e dyshuara është dërguar në mbajte.
Një e mitur, shtetase amerikane ka raportuar në polici se derisa ka qenë në rrugë, një person i panjohur me biçikletë duke e tërhequr me forcë e ka prekur në pjesët intime të trupit.
Ngjarja ka ndodhur në rrugën ‘Nexhip Dragaj’ në Mitrovicë, të premten.
“Nuk raportohet për të arrestuar, rasti në procedurë hetimore”, thuhet në raportin 24-orësh të policisë.
Rasti është cilësuar “Sulm seksual”.
Policia e Kosovës ka njoftuar se ka arrestuar një burrë në Janjevë, meqë i njëjti ka sulmuar fizikisht një doktoreshë në shenjë revolte për një dokument mjekësor, që me rregullat e mjekësisë nuk i lëshohet pacientit.
Me vendim të prokurorit, rasti vazhdon në procedurë të rregullt.
“SULM NDAJ PERSONIT ZYRTAR – Rr. Dardania, Janjevë 09.02.2024-17:45. I dyshuari mashkull kosovar e ka sulmuar fizikisht viktimën femër kosovare-doktoreshë në shenjë revolte për një dokument mjekësor i cili me rregullat e mjekësisë nuk i lëshohet pacientit. Me vendim të prokurorit, rasti vazhdon në procedurë të rregullt”, thuhet në raport.
Ndonëse arsimi në vend u përballë me grevë disa muajshe vitin e kaluar, një të tillë nuk e përjashton sërish kryetari i Sindikatës së Bashkuar të Arsimit, Shkencës (SBAShK), Rrahman Jasharaj, por që kësaj radhe po e quan “grevë të heshtur”, raporton Ekonomia Online.
“Greva e heshtur”, sipas Jasharajt, nënkupton mungesën e vullnetit të mësimdhënësve për shkak të pakënaqësive me Ligjin e Pagave. Nga ky vit, vlera e koeficientit është ngritur në 110 euro, por që nuk mjafton për mësimdhënësit.
Ai ka thënë se mësimdhënësit po humbin kohë duke u munduar ta gjejnë fajtorin për situatën aktuale. Kritika ka për pushtetin, me theks të veçantë ndaj ministres Arbërie Nagavci.
“‘Grevë të heshtur’ e kam quajtur kur mësimdhënësit dhe punëtorët tjerë në tërë sektorin publik janë të pakënaqur dhe nuk japin kontributin e duhur. Grevë e heshtur në arsim nënkupton kur mësimdhënësit i humbin disa minuta para orës mësimore hynë në debatet që hapen në sallat e arsimtarëve për pakënaqësi që nuk gjejnë zgjidhje, kryesisht në rastin konkret kur kryeministri, ministrja Nagavci as që duan të takohen me ne e të dëgjojnë hallet tona. Si rast më konkret i një rreziku për grevë të heshtur është pakënaqësia tejet e madhe, në arsim, polici, zjarrfikës me rastin e koeficientit nga 105 në 110 që është ironike”, deklaroi Jasharaj, duke thënë se paga këtë vit është ngritur vetëm 28 euro.
Krahas shqetësimit me paga, Jasharaj ka edhe një tjetër, atë të largimit të mësimdhënësve nga Kosova. Thotë se trendi i largimit të tyre në perëndim është i madh, pasi numri i tyre po rritet çdo ditë.
“Ne nuk kemi shifra të sakta sepse nuk kemi marrë drejtpërdrejt me këtë çështje por çka të nëpër komuna e dinë dhe të iu them se ne kur e morëm numrin prej 300 e që po rriten, kemi pritur që Drejtoria Komunale e Arsimit e MAShTI do kenë takime urgjente për të parë çka e pse po ndodh kur dihet se vitet e kaluar numri i atyre që kanë kërkuar pushim pa pagesë ka qenë minimal, jemi frikësuar shumë nga kjo rritje, pasi mund të kaloj në shprehi, e mund të ndodh që të kemi ikje të vazhdueshme dhe them se mësimdhënësit e Kosovës nëse zgjedhin rrugë të tillë nuk bëjnë mirë, mirëpo arsye kanë ngase janë të zhgënjyer”, u shpreh Jasharaj.
Hatërmbetje kanë edhe ndaj ministrit të Financave, Punës dhe Transfereve, Hekuran Murati, për të cilin thotë Jasharaj se si për inate e “mbajti fjalën” për të mos e ngritur koeficientin më shumë se 110 euro.
“Kanë pritur shumë nga Ligji i Pagave që i zhgënjeu, e edhe nga Qeveria se mos do e ngritë koeficientin e pagave së paku në 130 euro dhe si për inate e mbajti atë fjalën që e kishte thënë Murati në gjysmën e vitit të kaluar se ngritja do jetë nga 105 në 110 dhe kjo krijoi zhgënjim, jo për t’u pasuruar këta njerëz por për t’u përballuar më lehtë. E kur merren parasysh kushtet e tmerrshme në shekullin e 21-të, kolegët e mi bëjnë luftë për arsim cilësor me shkumësa, karshi kolegëve në shtetet e zhvilluara që ata punojnë me projektor e laptop me mësimdhënës të cilit figura e mësuesve lëndohet”, u shpreh tutje Jasharaj.
Ish-presidenti Donald Trump, kandidati kryesor republikan në garën presidenciale të vitit 2024, tha të premten se nëse rizgjidhej në krye të Shtëpisë së Bardhë do të shfuqizonte të gjitha kufizimet e armëve të miratuara nga Presidenti Joe Biden.
Duke folur para mijëra mbështetësve gjatë një takimi të organizuar nga Shoqata Kombëtare e Armëve (NRA), zoti Trump u zotua se do të anulojë një rregull që kufizon shitjet e aksesorëve të armëve dhe kufizime të tjera të vendosura nga administrata e Presidentit Biden.
“Sulmi i Bidenit ndaj pronarëve dhe prodhuesve të armëve do të përfundojë që gjatë javës së parë të rikthimit tim në detyrë, ndoshta që ditën e parë”, tha Trump gjatë fjalimit të mbajtur në Harrisburg, të Pensilvanisë.
Shoqata Kombëtare e Armëve mbështeti fort zotin Trump gjatë garës së vitit 2016 dhe gjatë gjithë administratës së tij, duke e përkrahur kur emëroi tre gjyqtarë konservatorë në Gjykatën e Lartë dhe kur miratoi një sërë masash të kërkuara nga lobi pro armëmbajtjes. Mes masave ishte edhe ai që i përcaktoi dyqanet e armëve të zjarrit si biznese thelbësore gjatë periudhës së pandemisë COVID-19, duke i lejuar këto biznese që të qëndronin hapur.
Zoti Trump, ndër të tjera, vuri në dukje se si i rezistoi trysnisë për të vënë kufizime për armët gjatë mandatit të tij në Shtëpinë e Bardhë nga 2017-2021.
“Gjatë 4 vjetëve të mandatit tim nuk ndodhi asgjë, edhe pse ndaj meje kishte trysni të madhe lidhur me armët. Ne nuk bëmë asgjë, nuk u dorëzuam”, tha Trump.
Lëvizja Vetëvendosje 17 vjet më parë organizoi protestë në shenjë kundërshtimi ndaj besimeve Kosovë-Serbi dhe pakos së Martti Ahtisaari-t, në të cilën si rezultat i ndërhyrjes së policisë rumune të UNMIK-ut mbetën të vrarë Arben Xheladini dhe Mon Balaj.
Në protestë morën pjesë mijëra vetë dhe ajo eskaloi në momentin që janë hequr rrethojat e vendosura në mes të sheshit.Ishte policia e rumune e UNMIK-ut ajo që reagoi në mënyrë të dhunshme duke përdorur edhe armë vdekjeprurëse. Përveç vrasjes së dy aktivistëve, kishte edhe shumë të plagosur.
KMDLNJ ka kërkuar drejtësi për viktimat e 10 shkurtit, si dhe ka kërkuar që Arben Xheladini dhe Mon Balaj të pranohen si viktima politike, të rehabilitohen dhe ta fitojnë statusin e merituar, ndërsa, familjet e tyre të fitojnë të drejtën që e gëzojnë familjet e viktimave civile të luftës.
Me rastin e shënimit të kësaj dite, Lëvizja Vetëvendosje do të organizojë një sërë aktivitetesh, si homazhe te varret e dëshmorëve Mon Balaj e Arben Xheladini, nderime te pllaka përkujtimore në sheshin “Nëna Terezë”, si dhe do të shfaqet një film dokumentar dhe do të mbahet një diskutim në Kinemanë “ABC”.
Agjenda për përvjetorin e 17-të të demonstratës së 10 shkurtit 2007:
12:30 – Homazhe te pllaka përkujtimore e dëshmorëve Arben Xheladini dhe Mon Balaj. (Bulevardi “Nënë Tereza”)
14:45 – Homazhe te varri i Mon Balajt në Besianë.
16:00- Shfaqja e dokumentarit të 10 shkurtit dhe diskutim. (Kinema “ABC”, Prishtinë)
Orkestra e Filarmonisë së Kosovës mban koncert. (Atelia e Pallatit të Rinisë dhe Sporteve Prishtinë, ora 20:00)
Tashmë është konfirmuar, sekretari i Shtetit, Antony Blinken do ta vizitojë javën tjetër Shqipërinë.
Përmes një komunikate për media, Departamenti amerikan i Shtetit ka konfirmuar këtë vizitë, më 14 shkurt.
Ndërkohë, në këtë komunikatë thuhet se “Shqipëria është partner kyç për stabilitet në Ballkan”.
“Sekretari i Shtetit Antony J. Blinken do të udhëtojë në Tiranë, Shqipëri dhe Mynih, Gjermani, nga 14-17 shkurt. Në Tiranë, Sekretari Blinken do të riafirmojë fuqinë e marrëdhënara me Shqipërinë, një partner kyç për stabilitetin në Ballkanin Perëndimor dhe një aleat i fortë në mbështetjen e sovranitetit dhe integritetit territorial të Ukrainës”, thuhet aty.
Rusia dhe Ukraina kanë kryer shkëmbim të pengjeve me ndërmjetësimin e Emirateve të Bashkuara Arabe (EBA).
Në një deklaratë të bërë nga Ministria e Jashtme e Emirateve të Bashkuara Arabe, thuhet se ndërmjetësimi lidhur me bisedimet për shkëmbimin e pengjeve mes Rusisë dhe Ukrainës ka treguar sukses.
Rusia dhe Ukraina kanë liruar 100 ushtarë në mënyrë reciproke, thuhet në deklaratën ku bëhet e ditur se ky është shkëmbimi i tretë i pengjeve që është kryer mes dy vendeve që nga fillimi i vitit.
Më tej në deklaratë vihet në dukje se mbështeten përpjekjet për të zgjidhur krizën me rrugë paqësore mes dy vendeve.
Ministria e Jashtme e EBA-së në një deklaratë të bërë më 4 janar njoftoi se mes Rusisë dhe Ukrainës është realizuar një prej shkëmbimeve më të mëdha të pengjeve që nga fillimi i luftës.
Emiratet e Bashkuara Arabe më 31 janar njoftuan edhe shkëmbimin e dytë të pengjeve të kryer mes Rusisë dhe Ukrainës falë përpjekjeve të ndërmjetësimit.
Përgatiti: Driton Sadiku
Komunat që patën perfomancën më të mirë, u shpërblyen nga Ministria e Administrimit të Pushtetit Lokal. 8 milionë e 300 mijë euro u dhanë për 11 komuna si përfituese të skemës.
“Ky rezultat shënon një arritje të rëndësishme në institucionalizimin dhe qëndrueshmërinë e sistemit të menaxhimit të perfomancës komunale dhe vetë granti përbën një hap të rëndësishëm për të siguruar se të gjitha komunat operojnë bazuar në një kornizë, strukturë të njëjtë”, tha ministri i Administrimit të Pushtetit Lokal, Elbert Krasniqi.
Derisa uroi komunat fituese, zëvendëskryeministri Besnik Bislimi tha se reformimi i administratës publike është pikënisje në rrugëtimin drejt BE-së.
“Nëse duam të avancojmë në rrugëtimin tonë drejt BE-së do të jetë shumë me rëndësi që të jemi të suksesshëm e të vendosur në reformimin e administratës publike, të vendosur në thjeshtësimin e qasjes së qytetarëve dhe bizneseve në shërbimet që kjo administratë ofron dhe një ulje të kostos, qoftë monetare apo në kohë në marrjen e këtyre shërbimeve”, tha Bislimi.
I pranishëm në ceremoni ishte edhe ambasadori i BE-së në Kosovë, Tomas Szunyog, i cili përshëndeti arritjet e komunave.
“Përmirësimi i efikasitetit të komunave të Kosovës është aspekt kyç i qeverisjes së mirë, gjithashtu një administratë publike transparente që funksionon mirë e përmirëson jetën qytetarëve dhe kontribuon në mirëqenien e tyre”, tha Szunyog.
Ndryshe 11 komunat që përfituan nga granti i perfomancës janë Rahoveci, Obiliqi, Skenderaj, Suhareka, Kaçaniku, Shtimja, Malisheva, Dragashi, Ranillugu, Parteshi dhe Peja.
Ndryshe, ky grand u jepet komunave që përmbushin detyrimet si qeverisje demokratike, menaxhim komunal e ofrim i shërbimeve për qytetarë.