ATV

Category: Lajme

  • Ardian Hajdaraj do ta udhëheqë Këshillin Prokurorial vetëm deri në vitin 2026

    Ardian Hajdaraj do ta udhëheqë Këshillin Prokurorial vetëm deri në vitin 2026

    Përgatiti: Nora Luta

    Vetëm dy vjet do të jetë në krye të Këshillit Prokurorial të Kosovës, prokurori nga Peja, Ardian Hajdaraj. Kaq do të zgjasë edhe mandati i zv.kryesueses Jehona Grantolli, ndonëse ligji parasheh mandat trevjeçar.

    Neni 11 i Ligjit për KPK-në përcakton që përzgjedhja e tyre në këto pozita, nuk e zgjat mandatin e tyre si anëtar të Këshillit.

    Monitorues të shoqërisë civile presin që udhëheqësia e re të jetë më transparente dhe bashkëpunuese, në rrugën drejt reformës në drejtësi.

    Ndërkohë nga Zyra e Komunikimit me media në KPK, kanë thënë se Hajdaraj për shkak të angazhimeve dhe agjendës, nuk mund të deklarohet, por në një përgjigje me shkrim, kanë theksuar se KPK-ja mbetet e përkushtuar për çdo iniciativë që është në funksion të sistemit të drejtësisë.

    “Në Takimin e 241-të, të mbajtur më 30 janar 2024, ka nxjerrë Vendim për emërimin e Grupit punues për hartimin dhe finalizimin e legjislacionit që rrjedh nga Deklarata e Përbashkët e Zotimit. Pra, KPK-ja ka caktuar pesë (5) përfaqësues nga radhët e KPK-së për grupin punues, siç e parasheh Deklarata e Zotimit. KPK-ja, thekson se në këtë dokument janë evidentuar sfidat dhe shqetësimet tona dhe në këtë aspekt, KPK-ja mbetet e përkushtuar për të dhënë kontribut në iniciativat ligjore dhe për çdo iniciativë tjetër që është në funksion të fuqizimit të mekanizmave të brendshëm dhe të jashtëm të sistemit të drejtësisë, natyrisht, duke respektuar rolin e saj, që nga faza e konceptimit dhe e zhvillimit deri në finalizimin e këtyre nismave ligjore, në mënyrë që të afirmohet e drejta kushtetuese për pavarësinë e KPK-së dhe Prokurorit të Shtetit si dhe përgjithësisht të sistemit prokurorial”, tha Bedri Gashi, U.D. udhëheqës i Njësisë për Komunikim Publik.

    Kryesuesi i ri i KPK-së është zgjedhur në fund të janarit, pasi Jetish Maloku përfundoi mandatin. Hajdaraj mori shumicën e votave në këtë pozitë, pas tërheqjes nga gara të Veton Shabanit dhe Jehona Grantollit.

    Sipas ligjit aktual, anëtarët e KPK-së qëndrojnë në detyrë për një mandat pesëvjeçar, pa të drejtë rizgjedhjeje.

  • Kërkesa e Kurtit për nënshkrim të marrëveshjes në OKB, vullnet politik, jo mundësi reale

    Kërkesa e Kurtit për nënshkrim të marrëveshjes në OKB, vullnet politik, jo mundësi reale

    Përgatiti: Fatlum Jashari

    “Përkundër ofertave të mia të përsëritura, z.Vuçiq ka refuzuar të nënshkruajë, e ftoj të nënshkruajë këtu, sot, menjëherë, duke theksuar rolin krucial të Kartës së OKB-së në këtë marrëdhënie. Ky akt simbolik do të demonstronte përkushtimin e tij për marrëdhënie paqësore me Kosovën”, ka thënë mbrëmë kryeministri Albini Kurti në fjalimin e tij në Këshillin e Sigurimit të OKB-së.

    Mbledhja e Këshillit të Sigurimit të OKB-së ishte ngjarja e radhës, në të cilën kryeministri Abin Kurti këmbënguli në nënshkrimin e marrëveshjes bazë dhe shtojcës me Serbinë.

    Krahas kritikave për mënyrën e zbatimit të rregullores së BQK-së, përfaqësuesja e SHBA-së sqaroi se Brukseli është vendi për diskutimet në kuadër të dialogut Kosovë-Serbi.

    “Për të qenë e qartë, dialogu i lehtësuar nga BE-ja duhet të jetë kanali për zgjidhjen e këtyre çështjeve që lidhen me normalizimin e marrëdhënieve, jo Këshilli i Sigurimit i Kombeve të Bashkuara”, tha ambasadorja e SHBA-së, Linda Thomas-Greenfield.

    Ajo kritikoi Kosovën në raport me mënyrën e zbatimit të rregullores së BQK-së.

    Javën e kaluar, zëvendëskryeministri Besnik Bislimi tha se nënshkrimi i marrëveshjes dhe deponimi në OKB, është parakushti i parë për zbatim.

    Pasi theksoi se dialogu Kosovë – Serbi është çështje e BE-së në aspektin ligjor, profesori Kadri Kryeziu vlerësoi se kërkesa e Qeverisë është e parealizueshme.

    “Jo, nuk ka nevojë që marrëveshjet të përfundojnë në OKB, sepse janë marrëveshje ndërkombëtare të karakterit evropian dhe janë shtetet evropiane që po ndihmojnë që të arrihet një marrëveshje e përgjithshme, kështu që nuk ka sens që këto çështje të shkojnë në Këshillin e Sigurimit të OKB-së”, tha Kryeziu.

    Teksa përmendi faktin se BE-ja dhe SHBA-ja i vlerësojnë ligjërisht obliguese marrëveshjen dhe shtojcën, politologu Fidan Ukaj këmbënguljen e Kosovës e lidh me atë që e cilësoi qasje destruktive të Serbisë në dialog.

    “Edhe pse nuk ishte një mbledhje e thirrur për nënshkrim apo rreth marrëveshjes, mendoj se tregon ma shumë një gatishmëri të Kosovës, e po ashtu një mosbesim ndaj palës tjetër, duke e ditur se kryeministrja serbe Brnabic ka dërguar një letër në adresë të BE-së, në të cilët tregon se nuk është e gatshme t’i zbatojë të gjitha pikat e marrëveshjes, por që do të ketë selektim”, tha Ukaj.

    Më 2010, Asambleja e Përgjithshme e OKB-së miratoi një rezolutë e cila njeh opinionin këshillëdhënës të GJND-së për ligjshmërinë e shpalljes së pavarësisë së Kosovës dhe BE-në si lehtësues të procesit të dialogut.

  • Pas 9 vjetësh mosfunksionalizimi, Komuna e Prishtinës ka ndarë 121 mijë euro për renovimin e pushimores për pensionistët

    Pas 9 vjetësh mosfunksionalizimi, Komuna e Prishtinës ka ndarë 121 mijë euro për renovimin e pushimores për pensionistët

    Përgatiti: Pranvera Krasniqi

    Me këto pak fjalë përshkruan përditshmërinë e tij si pensionist. Hajrullah Gashi, 77 vjeç, nga Prishtina, thotë se vuan në mungesë të një pushimoreje, për të kaluar kohë me bashkëmoshatarët.

    “Tërë ditën këndej nuk kemi as vend adekuat ku të qëndrojmë, kushte minimale…”, tha Hajrullah Gashi, pensionist.

    Njësoj si Hajrullahu mendojnë edhe pensionistë të tjerë.

    “Ne nuk kemi punë tjetër, të paktën të kemi një vend se ku ta kalojmë kohën, të luajmë shah apo ndonjë aktivitet tjetër”, tha Sabit Gashi, pensionist.

    Por para 9 vjetëve, një qendër e tillë ishte funksionale, ndonëse larg kryeqytetit.

    Përderisa punimet nuk zhvilloheshin, brenda objektit kishin zënë vend qentë endacakë.

    “Unë banoj fare pranë këtij objekti. Për vite me radhë nuk është investuar këtu asnjëherë, madje herë pas here ka qen endacakë, ka qenë pa dyer fare…”, tha Sefer Ademaj, banor.

    Pavarësisht se janë në dijeni për dinamikën e punimeve, drejtoresha për mirëqenie sociale në Prishtinë, Adelina Sahiti, thotë se qendra do të funksionalizohet në fund të vitit 2024.

    VOX: Adelina Sahiti, drejtoresha për Mirëqenie Sociale në Prishtinë
    “Punimet nuk kanë shkuar sipas pritshmërisë tonë, por tashmë jemi duke e përcjellë edhe më tutje, sepse e kemi pa në çfarë gjendje ka qenë, shpresojmë shumë që të përfundojë në fund të vitit”, tha drejtoresha për Mirëqenie Sociale në Prishtinë, Adelina Sahiti.

    Për renovimin e qendrës që parasheh qëndrim ditor pa pagesë për pensionistë, komuna e Prishtinës ka ndarë 121 mijë euro, 61 mijë për punimet e vrazhda dhe 60 të tjera për inventari.

    Derisa nata në këtë pushimore deri para 9 vjetëve ka kushtuar 10 euro të cilat mbulohen nga Komuna e Prishtinës, ende nuk dihet se sa do jetë çmimi pas hapjes.

  • Pas prishjes së koalicionit mes PDK-së dhe LDK-së në Prishtinë, puna në komunë më sfiduese

    Pas prishjes së koalicionit mes PDK-së dhe LDK-së në Prishtinë, puna në komunë më sfiduese

    Përgatiti: Krenare Mulliqi

    Funksionimi i Kuvendit Komunal në Prishtinë nuk do të jetë i lehtë pas vendimit të Partisë Demokratike për të prishur koalicionin me Lidhjen Demokratike, pas dy vjetëve bashkëqeverisje.

    Derisa asambleja do të funksionojë njësoj, sipas kryesuesit të kuvendit, Pëllumb Bajqinovci, megjithatë do të mungojnë votat për t’i çuar projektet përpara.

    Edhe sipas monitoruesve të qeverisjes lokale, puna e ekzekutivit në Prishtinë nuk do të jetë fare e lehtë.

    Sipas tij, ka vetëm një zgjidhje se si do të veprohet në këto rrethana.

    Shfuqizimi i vendimit për këmbimin e pronave në Badoc bëri që Partia Demokratike e Kosovës të shkëputë koalicionin me Lidhjen Demokratike. PDK-ja kishte gjithsej 5 drejtori atë të Sportit e Kulturës, Bujqësisë, Arsimit dhe Drejtoria për Shërbime Publike.

  • Pas tri ditëve grevë, punëtorët teknikë të shkollave në Prishtinë i janë kthyer punës

    Pas tri ditëve grevë, punëtorët teknikë të shkollave në Prishtinë i janë kthyer punës

    Përgatiti: Sara Shehu

    Kështu dukeshin hapësirat e shkollave në kryeqytet deri të enjten, pasi rreth 160 punëtorë teknikë hynë në grevë nga e hëna për shkak të pagave të ulëta.

    Por, të premten ata i janë kthyer punës, pasi Sindikata e Pavarur e Sektorit Privat ka arritur një marrëveshje me komunën e Prishtinës.

    Fahrie Aliu, njëra prej 12 punëtoreve teknike në shkollën fillore “Naim Frashëri”, tha se për tri ditë që nuk kanë punuar, objekti i shkollës ishte mbushur me mbeturina.

    “Sa s’kemi punu, shkollën e kish mbulu papastërtia, ndërkohë si ju kemi kthy punës shkolla është pastru siç po e shihni. Ne jemi të kënaqur që sindikata ka arritur marrëveshje me komunën e Prishtinës për rritje të rrogave, tani po presim zbatimin e marrëveshjes”, tha Aliu.

    Ndërkohë, Kryetari i Sindikatës, Jusuf Azemi, tha se zyrtarët komunalë janë pajtuar rreth kërkesave të punëtorëve, megjithëse deri në fillim të javës së ardhshme nuk do të japin detaje.

    “Realisht të gjitha kërkesat që i kemi parashtruar Komunës së Prishtinës me kënaqësi i kanë pranuar të gjitha dhe unë nuk mundem të jap tani një shifër të pagesës deri ditën e hënë, sepse ashtu i kanë kriteret Komuna e Prishtinës. Të hënën pasdite në momentin kur publikohet, unë mund t’iu jap gjithçka në detaje. Përndryshe, të gjitha kërkesat që ia kemi parashtruar Komunës së Prishtinës i kanë parë të arsyeshme. Prioritet ka qenë rritja e pagës të punëtorëve teknikë që janë paguar direkt nga Komuna e Prishtinës. Kjo ka qenë ajo, sepse punëtorët ndihen të degraduar, derisa këta kanë marrë një pagë 230-270 euro”, tha Azemi.

    Edhe përfaqësuesit komunalë kanë konfirmuar për ATV-në, se tashmë i kanë në fokus kërkesat e punëtorëve teknikë, derisa pritet fuqizimi i bashkëpunimit ndërmjet qeverisjes lokale dhe punëtorëve.

  • Prokuroria Speciale as pas gati dhjetë muajve nga arrestimi, nuk ka ngritur aktakuzë ndaj Krasniqit

    Prokuroria Speciale as pas gati dhjetë muajve nga arrestimi, nuk ka ngritur aktakuzë ndaj Krasniqit

    Përgatiti: Arton Hamiti

    Gati dhjetë muaj nga arrestimi, Prokuroria Speciale akoma nuk ka ngritur aktakuzë ndaj Nagip Krasniqit, i suspenduar nga pozita e kryeshefit të Korporatës Energjetike të Kosovës.

    Në lidhje me rastin, Prokuroria u tregua e rezervuar në përgjigjen dërguar ATV-së.

    “Ju njoftojmë se Prokuroria Speciale është duke punuar në mënyrë intensive lidhur me këtë rast, në këtë fazë të procedurës nuk mund të japim të dhëna të cilat i kërkoni ju, andaj kërkojmë mirëkuptim nga ana juaj”, thuhet në përgjigjen e Prokurorisë Speciale.

    Teksa, KEK-u është duke funksionuar me ushtrues detyre të kryeshefit ekzekutiv, që nga muaji prill, duke shkelur afatet ligjore ende nuk ka shpallur konkurs të ri.

    Në gusht të vitit të kaluar, Bordi i Drejtorëve të KEK-ut kishte njoftuar se nuk do ta shkarkojë Krasniqin e as nuk do të shpallë konkurs për kryeshef të ri, “pa një vendim nga organet e drejtësisë, apo pa krijimin e rrethanave të cilat Bordi do t’i konsiderojë të domosdoshme për të sjellë një vendim meritor”.

    Sidoqoftë, sipas ligjit të punës, gjatë kohës së largimit të përkohshëm nga puna, Nagip Krasniqit i takon e drejta e kompensimit në pagë në lartësi prej 50%.

    Përkthyer në shifra, për afro 10 muaj, duke i qenë i pezulluar, llogaritet se Krasniqi mori rreth 17 mijë euro, pasi siç mëson televizioni jozyrtarisht kryeshefi ekzekutiv i KEK-ut, paguhet afro 3500 euro në muaj.

    Ndërkohë, moshapja e konkursit konform afateve ligjore, sipas Zekirja Shabanit ndodh për shkak të politizimit të Bordit në ndërmarrjen kryesore energjetike në vend.

    Nagip Krasniqi ishte arrestuar më 19 Prill nën dyshimet për keqpërdorim të detyrës zyrtare, ushtrim të ndikimit dhe konfliktit të interesit.

  • Rregulli për qese te plastikes pa logo, nuk po respektohet

    Rregulli për qese te plastikes pa logo, nuk po respektohet

    Përgatiti: Benita Zeneli

    Qeset e plastikës janë bërë me pagesë.

    Mirëpo, edhe pse Udhëzimi administrativ i Ministrisë së Mjedisit parasheh që ato të jenë pa logo të biznesit, një gjë e tillë nuk po respektohet. Ndërkohë ka markete të cilat vazhdojnë të japin qese pa pagesë.

    “Shumica e bizneseve kryesisht pemëtaritë japin akoma pa pagesë dhe disa prej tyre i shesin në favor të tyre me logo të tyre, gjë e cila nuk është e pëlqyeshme por meqenëse ky udhëzim nuk parasheh gjoba, atëherë të gjitha bizneset e shfrytëzojnë këtë vakum të shesin produkte dhe të bëjnë marketing”, tha Alban Hyseni, ambientalist.

    Sipas Hysenit, udhëzimi administrativ duhet të plotësohet.

    “Duhet të kthehet edhe një herë në shqyrtim dhe të jetë rekomandues edhe këshillues, por edhe sanksionues… për keqpërdorimet e këtij udhëzimi… të jetë sa më i zbatueshëm dhe më efikas”, tha Hyseni.

    Megjithatë, qytetarët thonë se ka biznese që kanë filluar ta respektojnë udhëzimin administrativ për qese.

    “5 centë po e paguaj, por në marketin që unë shkoj, janë pa logo, qese të thjeshta të bardha. Besoj që është në rregull”, thotë një qytetar.

    “Kështu është edhe në perëndim duhet me qenë qeset me pagesë. Ka markete që nuk kanë logo, por shumë prej tyre e shesin qesen dhe e kanë logon në qese”, thotë një tjetër qytetar.

    Udhëzimi administrativ për ndalimin e qeseve të plastikës me logo, ka hyrë në fuqi nga 29 shtatori. Ndryshe, Kosova është vendi i fundit në rajon në të cilin qeset e plastikës për një përdorim, janë bërë me pagesë për konsumatorët.

  • Kryediplomati Hasani: Do të vazhdojmë t’i themi Kosovës që të koordinohet me aleatët, jemi bashkë përballë kërcënimeve

    Kryediplomati Hasani: Do të vazhdojmë t’i themi Kosovës që të koordinohet me aleatët, jemi bashkë përballë kërcënimeve

    Ministri i Jashtëm i Shqipërisë, Igli Hasani, duke cituar ambasadoren amerikane në OKB mbrëmë gjatë Këshillit të Sigurimit që ka kërcënime të vazhdueshme që vijnë nga jashtë Kosovës, tha se s’mjafton që sulmi terrorist në Banjskë të dënohet, por duhet të sigurohet që ai të mos ndodhë më.

    “Siç e theksoi ambasadorja e SHBA-së në OKB, Linda Thomas-Greenfield, dje në takimin e Këshillit të Sigurimit të OKB-së, se ka “kërcënime akute ndaj sigurisë dhe stabilitetit që vijnë nga jashtë Kosovës”. Nuk mjafton vetëm të dënojmë Banjskën. Ne duhet të sigurohemi që kjo të mos ndodhë më kurrë”.

    Kryediplomati shqiptar përsëriti qëndrimin e vendit të tij që qëndron me Kosovën dhe kërkoi nga udhëheqësit e saj të koordinohet me aleatët.

    “Ndërsa qëndrojmë në krah të Kosovës në parandalimin e çdo kërcënimi të jashtëm, Shqipëria do të vazhdojë t’i nënvizojë udhëheqjes së Kosovës rëndësinë e koordinimit të ngushtë me aleatët e saj kryesorë”.

  • Të paktën 22 të vrarë nga sulmet izraelite në Gazë

    Të paktën 22 të vrarë nga sulmet izraelite në Gazë

    Të paktën 22 persona janë vrarë, përfshirë gra dhe fëmijë, në katër sulme ajrore izraelite më 9 shkurt në pjesën qendrore të Rripit të Gazës dhe në qytezën jugore, Rafah, që gjendet në kufi me Egjiptin, thanë dëshmitarët dhe zyrtarët spitalorë.

    Sulmet goditën një ndërtesë banimi në Rafah, duke vrarë tetë persona, dhe një çerdhe të shndërruar në strehimore për personat e zhvendosur në qytetin Zuvaida – në Gazën qendrore – ku u vranë pesë persona të tjerë. Ndërkaq, në një sulm në Deir al-Bala u vranë nëntë njerëz.

    Mbi gjysma e popullsisë prej 2.3 milionë banorësh e Gazës kanë ikur për në Rafah, duke respektuar urdhrat për evakuim të lëshuar nga Izraeli, para zgjerimit të ofensivës së tij tokësore. Urdhrat për evakuim tani mbulojnë dy të tretën e territorit të enklavës së vogël, e cila është rrethuar.

    Edhe në zonat ku strehohen banorët, sikurse është Rafah, Izraeli vazhdimisht ka kryer sulme ajrore, pasi ka argumentuar se po sulmon caqet e Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian. Izraeli mban përgjegjës grupin radikal palestinez për numrin e lartë të viktimave civile, duke thënë se Hamasi operon brenda zonave civile. Të enjten, presidenti amerikan, Joe Biden, tha se Izraeli po kryen një luftë “të tepruar”.

    Trupat tokësore izraelite ende janë të përqendruara në qytetin e Han Junisit, që gjendet në veri të Rafahut, por kryeministri Benjamin Netanyahu, vazhdimisht ka paralajmëruar gjatë kësaj jave se Rafahu do të jetë synimi i radhës, duke krijuar panik në mesin e qindra mijëra personave të zhvendosur.

    Paralajmërimet e Netanyahut kanë alarmuar po ashtu Egjiptin, i cili ka thënë se çdo operacion tokësore në zonën e Rafahut, apo ndonjë zhvendosje e madhe përtej kufirit, do të minonte traktatin 40-vjeçar të paqes që ka me Izraelin.

    Lufta mes Izraelit dhe Hamasit u nxit pasi grupi radikal palestinez kreu sulm në jug të Izraelit më 7 tetor, duke vrarë afër 1.200 persona, shumica civilë, dhe duke rrëmbyer afër 250 të tjerë. Në Gazë, si pasojë e ofensivës izraelite, janë vrarë mbi 27.000 palestinezë, janë zhvendosur shumë të tjerë dhe çereku i popullsisë është në prag të urisë./rel/

  • Aksion protestues simbolik: Të akuzuarit për dhunë, s’duhet të kenë vend në klubet futbollistike, suspendojeni Solomin

    Aksion protestues simbolik: Të akuzuarit për dhunë, s’duhet të kenë vend në klubet futbollistike, suspendojeni Solomin

    Fourth Wave sot ka mbajtur një aksion protestues në sheshin e Klinës për të dënuar qëndrimin skandaloz të klubit futbollistik “Dukagjini”. Bëhet fjalë për futbollistin Solomon, i cili kërkohet nga Interpol për veprën penale “Dhunim” ndaj të dashurës së tij. Poashtu, ai u arrestua nga Policia e Kosovës për mosrespektimin e rregullit për tu lajmëruar cdo tre muaj në Polici.

    Pavarësisht situatës, ajo që na duket vërtet e tmerrshme është mbështetja e palëkundur e shprehur nga presidenti i klubit të futbollit, i cili me guxim deklaroi: “Do të qëndrojmë pranë tij deri në fund”.

    Kjo deklaratë nuk është vetëm një akt solidariteti por një përforcim i një mendësie që i jep përparësi reputacionit të një individi mbi sigurinë dhe mirëqenien e të tjerëve. Duke qëndruar pranë Solomonit, kryetari i klubit të futbollit dërgon një mesazh të rrezikshëm, se veprat penale si dhunimi mund të justifikohen dhe madje të miratohen për sa kohë që kryesi i veprës ka një status të caktuar.

    Protesta jonë e sotme nuk ishte thjesht akt revolte, por thirrje për veprim. I bëjmë thirrje klubit të futbollit “Dukagjini” që të tërheqin deklaratën e tyre dhe ta përjashtojnë Solomonin.

    Ne refuzojmë të mbyllim sytë përballë një sistemi që mbron abuzuesit në kurriz të viktimave dhe do të vazhdojmë të flasim kundër padrejtësisë e t’i mbajmë përgjegjës autorët.