Category: Lajme

Përgatiti: Benita Zeneli

Opozita po e konsideron të gabuar përfshirjen e përdorimit të dinarit si temë në procesin e dialogut Kosovë-Serbi.

Të martën, përfaqësues të dy vendeve u takuan në Bruksel, me ftesë të ndërmjetësuesit nga Bashkimi Evropian, Miroslav Lajcak, për të folur për rregulloren e Bankës Qendrore, mirëpo nuk u arrit asnjë marrëveshje.

Për këtë zhvillim, deputeti i Aleancës për Ardhmërinë e Kosovës, Besnik Tahiri, po e kritikon qeverinë.

“Problemi qëndron se kjo qeveri do të thotë i nxjerr disa tema pa kurrfarë nevoja që pastaj kthehen në tema që e pengojnë ecjen e Kosovës përpara dhe në veçanti e pengojnë Kosovën në rrugëtimin e vet në formësimin dhe forcimin e subjektivitetit të vet ndërkombëtar. Kjo ka ndodhur, pra nuk duhet diskutohet dinari askund mirëpo duhet të trajtohet me partnerët tanë Kosovë për me u gjet një zgjidhje”, tha Tahiri.

Ndryshe vlerëson deputeti i pushtetit, Driton Hyseni, që thotë se në takim, guvernatori Ahmet Ismaili vetëm i ka dhënë sqarimet e nevojshme për rregulloren që e njeh vetëm euron si valutë zyrtare në Kosovë.

“Unë mendoj që është qartësuar me vizitën që zyrtarët e Bankës Qendrore të Kosovës që e kanë bërë në Bruksel. Guvernatori i Bankës Qendrore e dha njoftimin lidhje me të gjitha sqarimet që ka pasur nevojë të diskutohen me të gjitha palët e interesuara në Bruksel në lidhje me lehtësirat që Banka Qendrore e Kosovës ka ofruar për të gjithë qytetarët në pjesën veriore të Kosovës me qëllim që ata të mos kenë as një vështirësi sa i takon qasjes në shërbimet bankare”, tha Hyseni.

Ndërkohë të shtunën Presidenti i Serbisë Aleksandër Vucic, në një konferencë është shprehur i bindur që Banka Qendrore e Kosovës nuk do ta ndryshojë rregulloren, andaj ka thënë se në vazhdim do të marrë siç u shpreh, “vendime të ndryshme” për të gjetur mënyra se si të dërgohen pagesat te qytetarët serbë të Kosovës.

Më shumë detaje i gjeni në Edicionin Qendror të lajmeve në videon më poshtë:

Përgatiti: Benita Zeneli

Nga e hëna në Qendrën Kryesore të Mjekësisë Familjare në Prishtinë, do të fillojë vlerësimi multidisiplinar për fëmijët.

Ky shërbim përfshin vlerësimin e aftësive të përgjithshme, komunikuese, si dhe psiko-sociale, që mund të kushtojë rreth 150 euro, por i cili do të ofrohet falas. Këtë do ta bëjë një ekip i përbërë nga psikologë, logopedë dhe ergoterapistë.

Kontrollet e tilla po mundësohen përmes bashkëpunimit të drejtorisë së shëndetësisë në Prishtinë dhe shoqatës “Autizmi”.

“Ata e ofrojnë stafin ndërse ne do ta ofrojmë hapësirën në QKMF. Vlerësimi i tyre tregon çfarë problemi ka dhe përveç kësaj ne kemi bërë një marrëveshje me kolegj privat që ofron shërbime logopedike që ata me na ofruar për 6 muaj një logoped i cili do të punojë në QKMF dhe do të jap shërbime falas ndërkaq edhe vlerësimi do të jetë falas”, tha drejtori i Shëndetësisë në Komunën e Prishtinës, Izet Sadiku.

Për një vlerësim të tillë duhet fillimisht të bëhet termin përmes linjës telefonike.

“Numri telefonik është 038220841 të gjithë munden me u lajmërua. Nuk do të thotë që fëmijët e tyre kanë problem por çdo hezitim që e kanë le të vijnë me bo një kontroll dhe mund të i ndihmojnë”, tha Sadiku.

Iniciativa po vlerësohet pozitive. Sociologu, Jeton Brajshori, thotë se ka shumë fëmijë që kanë nevojë për këto kontrolle, mirëpo shumë prindër hezitojnë, për shkak të kushteve ekonomike.

Vlerësimi multidisiplinar për fëmijët e kryeqytetit do të zgjasë një muaj.

Më shumë detaje i gjeni në Edicionin Qendror të lajmeve në videon më poshtë:

Përgatiti: Pranvera Krasniqi

31 gjoba janë shqiptuar ndaj farmacive nga Inspektorati Farmaceutik vetëm në dy muajt e parë të këtij viti. Kjo përbën 10 gjoba më shumë se në periudhën e njëjtë të vitit të kaluar.

Parregullsia më e shpeshtë në të cilën kishin hasur gjatë inspektimeve, thuhet të jetë shitja e barnave, përkatësisht antibiotikëve, pa recetë mjekësore.

“Varësisht nga shkeljet e takuara janë marrë masa komfort dispozitave ligjore në fuqi: për dhënie të produkteve pa recetë të mjekut në mesin e të cilave hyjnë edhe antibiotikët, për produkte ilegale, mungesë farmacisti përgjegjës apo zëvendësues, si dhe për parregullsi të tjera”, thuhet në njoftimin e Inspektoratit Farmaceutik.

Farmacisti Arbnor Alidemaj thotë se pacientët që kërkojnë barna pa recetë, e kanë detyrë t’i këshillojnë që fillimisht të konsultohen me mjekun.

“E kemi qendrën afër këtu, u themi të shkojnë të konsultohen me mjekun mandej me rekomandim të tyre t’i marrin barërat”, tha Alidemaj.

Mirëpo vlerëson se shumica e qytetarëve janë të vetëdijshëm për këtë. Sipas tij, pa udhëzim të mjekut, kërkohen barëra më të thjeshta.

“Rrallë aty këtu, zakonisht vetëm ilaçet pak ma të thjeshta…paracetamol…”, tha Alidemaj.

Gjatë vitit 2023, inspektorati kishte shqiptuar 249 gjoba ndaj farmacive.

Përpos gjobave, Inspektorati Farmaceutik, për procedura të tjera ligjore, këto lëndë i dërgon në Odën e Farmacistëve të Kosovës, për marrjen e masave ligjore ndaj stafit profesional farmaceutik.

Më shumë detaje i gjeni në Edicionin Qendror të lajmeve në videon më poshtë:

Përgatiti: Armand Hoti

Me njërën dorë, po e nget veturën, e me tjetër po e përdor telefonin. Në raste tjera nëpër kryeqytet, shihen vozitës që nuk e kanë vendosur rripin e sigurisë.

Këto janë disa nga shkeljet e rregullave të trafikut, për të cilat, policia në dy javët e fundit shqiptoi mbi 27 mijë gjoba në gjithë Kosovën.

Eksperti i komunikacionit, Nol Dedaj, thotë se ngasësit e automjeteve nuk janë vetëdijesuar fare ndër vite.

“Nuk është ndonjë ndryshim i madh për shkak se ne llogarisim që çdo ditë në Kosovë ipen rreth 1000 apo 1500 gjoba, kjo nuk po ndryshon për vite të tëra pra dhjet apo 15 vite është thuajse një mesatare e njëjta”, tha Dedaj.

Madje, pak ditë më parë dikush u dërgua edhe në paraburgim pasi me veturë, goditi për vdekje një të ri në Prishtinë. Kurse deri më tash, gjatë këtij viti, ka ndodhur tetë aksidente me fatalitet.

Me projektligjin e ri për rregullat e trafikut rrugor, që u miratua javën e kaluar, do të ashpërsohen gjobat për shkelësit e rregullave.

Mosvendosja e rripit do jetë e dënueshme me gjobë prej 150 eurosh. Kurse për ata që përdorin telefonin gjatë vozitjes, do shqiptohet gjoba prej 100 eurosh, nëse kjo ndodhë për herë të parë.

Krahas dënimeve, Dedaj propozon të punohet më shumë në edukimin e vozitësve.

“Së pari, askund në botë nuk ke ligj për rregullat e komunikacionit, sepse rregullat vendosen në bazë të ligjeve. Kjo varret më shumë nga menaxhimi i trafikut, dhe nga masat edukative dhe jo ndëshkuese, tek atëherë do shihnim rezultate më të mira”, tha Dedaj.

Sipas të dhënave zyrtare, 88 raste të vdekjes si pasojë e aksidenteve në trafik u shënuan në vitin 2023.

Më shumë detaje i gjeni në Edicionin Qendror të lajmeve në videon më poshtë:

Ndërmarrja publike lokale ‘Trafiku Urban’ ka dalë me një sqarim lidhur me rastin e një gruaje, që vdiq pas alivanosjes në një autobus urban në Prishtinë mesditën e së shtunë.

Nga kjo ndërmarrje përmes një komunikate për media kanë bërë me dije se tashmë të ndjerës i është ofruar ndihma e parë dhe se janë njoftuar menjëherë ekipet emergjente.

“Me datën 02.03.2024 në autobusin e linjës 3C, rreth orës 12:13, stafi i autobusit ka njoftuar se ka ndodhur një rast në autobus ku është alivanosur një qytetare. Në bazë të videoincizimeve të nxjerra nga kamerat e autobusit dhe raportit të punëtorëve që ishin në autobus, vërehet se qytetarja në fjalë ka hyrë në autobus së bashku me një qytetare tjetër nga dera e parë dhe është ulur në karrigen e parë në anën e djathtë të autobusit në krah me derën e hyrjes”, thuhet në njoftimin e ndërmarrjes.

“Pasi që është ulur, qytetarja alivanoset dhe konduktori reagon menjëherë, duke ofruar ndihmë dhe njoftuar shërbimin e ndihmës së shpejtë, të cilët kanë arritur për 4 minuta në vendngjarje”.

“Vlen të theksohet se në kohën e ndodhjes së ngjarjes, autobusi ka qenë i ndalur në stacion, në të cilin kanë qenë prezentë rreth 17 qytetarë!”, thuhet ndër të tjera në njoftim.

Policia e Kosovës përmes raportit 24-orësh ka njoftuar se një grua ka vdekur mesditën e së shtunës pas alivanosjes në një autobus urban të Prishtinës.

Në njoftim thuhet se mjeku në QKUK ka konstatuar vdekjen e viktimës.

“Prishtinë / 02.03.2024 – 12:26. Viktima femër kosovare është dërguar në QKUK pasi që, ishte alivanosur në një autobus urban dhe më pas mjeku ka konstatuar vdekjen e viktimës”, thuhet në njoftim.

Trupi i viktimës është dërguar për obduksion në Institutin e Mjekësisë Ligjore.

Një stuhi masive po godet disa pjesë të Kalifornisë dhe Nevadës në Shtetet e Bashkuara perëndimore.

Stuhia e borës ka mbyllur rrugët kryesore, ka mbyllur vendpushimet e skive dhe ka lënë dhjetëra mijëra shtëpi pa energji elektrike, shkruan BBC, transmeton KosovaPress.

Stuhia ishte veçanërisht e rëndë në rajonin malor të Sierra Nevada, ku era thuhet se arriti shpejtësinë 305 km/h (190 mph).

Njerëzit janë paralajmëruar për një “rrezik të lartë deri në ekstrem orteku” atje, duke përfshirë zonën më të madhe të Liqenit Tahoe.

Një hartë e ndërprerjeve të energjisë elektrike tregon më shumë se 33.000 njerëz në Nevada dhe gati 24.000 në Kaliforni pa energji elektrike.

Zonat malore u goditën më keq nga stuhia.

Deri në 3 metra borë pritej në lartësi më të larta, tha të shtunën një meteorolog i Shërbimit Kombëtar të Motit të SHBA-së, gje qe mund të krijojë “shqetësim kërcënues për jetën” për njerëzit që jetojnë pranë liqenit Tahoe.

Parku Kombëtar Yosemite u mbyll të premten dhe vizitorëve iu kërkua të largoheshin deri në mesditë. Parku do të qëndrojë I mbyllur të paktën deri të dielën pasdite, dhe mundësisht edhe më gjatë në varësi të kushteve të motit.

Ndersa disa pjesë të tjera të Shteteve të Bashkuara vazhdojnë të përjetojnë mot ekstrem. Zjarret po shpërthejnë në Teksas, ku zjarrfikësit po përpiqen të frenojnë flakët masive mes kushteve të vështira atmosferike.

Numri i nxnësve që kanë kërkuar dokumentet për të migruar jashtë vendit në gjysmë vjetorin e parë të këtij viti shkollor dhe vetëm dy muaj pas liberalizimit të vizave, ka arritur në 267. Megjithatë, numri më i madh raportohet se është i mësimdhënsve.

Janë afër 600 mësimdhënës të cilët janë larguar jashtë vendit, e ku ka nga ata që dalin edhe pa e lajmëruar largimin nga puna. Ndërsa, nxënsit po kërkojnë flet kalimet me arsyen për bashkimi familjar dhe shkollim në një shtet tjetër.

Nga drejtuesit e Sindikatës së Arsimit dhe disa drejtor të shkollave, kjo gjendje nëpër shkolla po konsiderohet shqetësuese, madje ata theksojnë se nëse vazhdon ky fluks i largimit të nxënësve dhe mësimdhënësve, shkolla në vend do të mbesin të zbrazura.

Vetëm në shkollën fillore “Mihal Grameno”, në Fushë-Kosovë, kanë kërkuar flet-lëshim 75 nxënës dhe një mësuese.

Drejtori i kësaj shkolle, Ismet Gashi tha se këto fletë-lëshime për të lënë shkollën, nuk janë të fundit.

Sipas tij, edhe një numër tjetër i nxënësve janë në pritje të dokumenteve për t’u larguar nga shkolla.

Po ashtu, edhe drejtoresha e shkollës fillore “Gjergj Fishta”, Supije Zhitia ka treguar se numri i nxënësve ka rënë dhe se kanë pasur disa kërkesat për fletë-kalime me arsyetimet për bashkim familjarë jashtë vendit.

Ndërkaq, se shkollat do të mbesin edhe pa mësimdhënës e thotë nënkryetarja e Sindikatës së Arsimit, Vjollca Shala.

Shala tha se liberalizimi i vizave është një rrugë e hapur për të ikur mësimdhënësit.

E Ministria e Arsimit, Shkencës dhe Teknologjisë, në një përgjigje me shkrim, kanë treguar se numri i nxënësve të cilat kanë kërkuar dokumentet e tyre për t’u larguar nga shkolla është 267.

“Numri i nxënësve të larguar nga institucionet para universitare (publike dhe private) në gjysmë vjetorin e parë të këtij viti shkollor ishte 267. Kurse, në vitin shkollor 2022/2023, ky numër ishte 388”, kanë shkruar MASHT-i./kp

Kryeministri i vendit, Albin Kurti, në Romë ka marrë pjesë në hapjen e fushatës së Partisë Evropiane të Socialistëve dhe Demokratëve për zgjedhjet evropiane që do të bahen më 9 qershor në 27 vendet anëtare të BE-së.

Kurti tha se hapja e fushatës u bë me fjalët “Roma na e përkujton se asnjë ëndërr nuk mund të rritet pa njerëz ambiciozë dhe asnjë ambicie nuk mund të mbijetojë pa guxim. Kjo është arsyeja pse ne kujdesemi për Bashkimin Evropian. Për ne Evropa do të thotë paqe, zhvillim dhe përparim”.

“Kjo fushatë zgjedhore mbahet nën moton “Evropa që e duam: sociale, demokratike dhe e qëndrueshme”. Këto zgjedhje evropiane nuk janë të rëndësishme vetëm për socialdemokratët e Evropës”.

“Nga rezultati i këtyre zgjedhjeve varet demokracia evropiane dhe vlerat tona të përbashkëta: drejtësia shoqërore dhe sundimi i ligjit, kushtet e dinjitetshme të punës dhe luftimi i varfërisë, të drejtat e njeriut dhe barazia gjinore, beteja kundër regjimeve autoritare dhe mbrojtja e mjedisit, solidariteti dhe paqja panevropiane. Në thelb të këtyre vlerave të përbashkëta qëndron një premisë: respekti ndaj qytetarëve në mbarë Evropën”.

Tutje, kreu i qeverisë citoi sërish presidentin e PES-it, Stefan Lofven, i cili kishte thënë se “këto janë zgjedhjet më të rëndësishme që nga viti 1979”.

“Për këtë detyrë madhore, për drejtimin e fushatës zgjedhore, para fjalimeve përmbyllëse nga kancelari gjerman Olaf Scholz dhe sekretarja e Partisë Demokratike Italiane, Elly Schlein, u miratua në mënyrë unanime manifesti i PES-it si dhe z. Nicolas Schmit si kandidati i përbashkët i PES-it”, shkroi Kurti.

Më 3 mars 1931 një akt i Kongresit shpalli këngën “The Star Spangled Banner” himn kombëtar të Shteteve të Bashkuara të Amerikës (ShBA).

Kënga ishte tepër e dëgjuar për shumë dekada me radhë para se të merrte këtë status. Teksti i saj ishte shkruar nga Francis Scott Key gjatë bombardimeve britanike të kështjellës Fort McHenry në Baltimorë të shtetit Maryland, më 1812.

Autori i tekstit ishte vetë dëshmitar i bombardimeve. Mëngjesin pas sulmit, Key u frymëzua kur pa flamurin me 15 yje të valojë ende mbi fortesë.

Flamuri tregonte se fortesa nuk ishte dorëzuar dhe se ishte e gatshme të vazhdonte qëndresën. Flota britanike më pas u largua duke i dhënë kështu fund rrezikut për Baltimorën.

Fjalët e poemës së Key u kombinuan më vonë me muzikën e një kënge britanike që ishte shumë e dëgjuar në Shtetet e Bashkuara duke krijuar kështu atë që tani është himni kombëtar amerikan. /kp/