ATV

Category: Lajme

  • ​Hovenier: Vashat e Kosovës ta bëjnë krenare vendin në Botërorin e hendbollit

    ​Hovenier: Vashat e Kosovës ta bëjnë krenare vendin në Botërorin e hendbollit

    Kombëtarja e Kosovës në Hendboll për grupmoshat U18 ka bërë histori duke e siguruar kualifikimin për në Kampionatin Botëror të Hendbollit që zhvillohet në Kinë.

    Për suksesin e tyre, ka shkruar në platformën sociale X edhe ambasadori i ShBA-ve në Kosovë, Jeff Hovenier.

    Ai ka thënë se kjo është një fitore historike për Kosovën dhe se pret që këto vajza ta bëjnë krenare këtë vend në Kampionatin Botëror që zhvillohet në muajin gusht, transmeton KosovaPress.

    Urime të ngrohta për ekipin e Kosovës për femra U-18 në hendboll dhe Federatës së Hendbollit të Kosovës për fitoren tuaj historike dhe kualifikimin në Kampionatin Botëror. Ju vazhdoni ta bëni Kosovën krenare!”, ka shkruar Hovenier në platformën X.

  • BQK-ja me anë të SMS-ve informon qytetarët mbi qasjen në llogari bankare dhe pranimin e mjeteve në euro

    BQK-ja me anë të SMS-ve informon qytetarët mbi qasjen në llogari bankare dhe pranimin e mjeteve në euro

    Banka Qendrore e Kosovës (BQK) ka njoftuar se me anë të mesazheve telefonike, ka njoftuar qytetarët për qasjen në llogari bankare dhe mundësitë për pranimin e mjeteve në llogaritë e tyre me euro.

    Kjo nismë është në kuadër të planit për zbatimin e lehtësuar të Rregullores për Operacione me Para të Gatshme

    “Banka Qendrore e Republikës së Kosovës në kuadër të Planit për zbatim të lehtësuar të Rregullores për Operacione me Para të Gatshme, njofton opinionin publik se përmes operatorëve është duke dërguar SMS te qytetarët për të informuar mbi qasjen në llogari bankare dhe mundësitë e pranimit të mjeteve në llogaritë e tyre në Euro.” – thuhet në njoftim.

    “Qytetarë të nderuar, Pranoni para përmes llogarisë bankare në Euro. Kurseni dhe këmbeni në cilëndo valutë. Hapni Llogari me Shërbime Bazike, pa tarifë të hapjes dhe të mirëmbajtjes. 080022255” – thuhet në përmbajtjen e mesazhit që po u dërgohet qytetarëve.

    Njoftimi i plotë i BQK-së:

    BQK-ja me anë të SMS-ve informon qytetarët mbi qasjen në llogari bankare dhe mundësitë e pranimit të mjeteve në llogaritë e tyre në Euro

    Banka Qendrore e Republikës së Kosovës në kuadër të Planit për zbatim të lehtësuar të Rregullores për Operacione me Para të Gatshme, njofton opinionin publik se përmes operatorëve është duke dërguar SMS te qytetarët për të informuar mbi qasjen në llogari bankare dhe mundësitë e pranimit të mjeteve në llogaritë e tyre në Euro.

    Po ashtu, BQK bën me dije se të gjithë ata qytetarë që ende nuk kanë llogari, mund të hapin një të tillë në njërën nga bankat, sipas Rregullores së BQK-së për qasje në Llogari Pagese për Shërbime Bazike, që për grupet e cenueshme e të skemave sociale nuk ka tarifë të hapjes e as të mirëmbajtjes, nga 1 janari 2024.

    Përmbajtja e plotë e SMS-it të dërguar:

    Qytetarë të nderuar, Pranoni para përmes llogarisë bankare në Euro. Kurseni dhe këmbeni në cilëndo valutë. Hapni Llogari me Shërbime Bazike, pa tarifë të hapjes dhe të mirëmbajtjes. 080022255

  • ​Kurti: Kosovës t’i jepet një shtysë e re drejt integrimeve evropiane, si përgjigje ndaj kërcënimeve të sigurisë

    ​Kurti: Kosovës t’i jepet një shtysë e re drejt integrimeve evropiane, si përgjigje ndaj kërcënimeve të sigurisë

    Kryeministri Albin Kurti, ka thënë se Kosovës duhet t’i jepet një shtysë e re drejt integrimeve evropiane, si përgjigje ndaj kërcënimeve të sigurisë që vijnë nga Serbia. Sipas kreut qeveritar, meqenëse Serbia nuk është e interesuar për anëtarësim në NATO dhe BE, ajo po kërkon të pengojë përparimin e tërë Ballkanit Perëndimor në strukturat evropiane.

    Kurti në konferencën “Diplomacia Parlamentare për Sigurinë Rajonale dhe Integrimin Euroatlantik”, kërkoi nga Bashkimi Evropian që ndaj Serbisë të përdorë qasje të njëjtë sikurse ndaj Rusisë.

    Siç tha Kurti, përparimi demokratik i Kosovës duhet të mbështetet nga BE-ja, duke i dhënë statusin e vendit kandidat dhe për anëtarësim në Këshillin e Evropës.

    “Meqenëse Serbia nuk është e interesuar në anëtarësimin në NATO dhe BE, ajo kërkon të pengojë përparimin e tërë rajonit. Bashkimi Evropian dhe NATO iu janë përgjigjur me të drejtë agresionit të Rusisë dhe kërcënimeve të sigurisë ndaj Evropës, jo duke përkledhur Putinin, por duke sjell Finlandën dhe Suedinë në NATO dhe duke iu dhënë statusin e kandidatit Ukrainës, Gjeorgjisë dhe Moldavisë. Kërcënimet e sigurisë ndaj Ballkanit Perëndimor duhet të adresohen në të njëjtën qasje duke i dhënë edhe Kosovës statusin e kandidatit në BE dhe anëtarësimin në Këshillin e Evropës”, tha Kurti.

    Kurti shtoi se gjatë dy vjetëve të qeverisjes së tij, Serbia solli katër herë ushtrinë e saj në kufi me Kosovën, sponsorizoi terroristë dhe se vazhdimisht shpërndanë gënjeshtra dhe narrativë të rremë për të justifikuar aktet agresive ndaj Kosovës dhe rajonit.

    “Ne këtu në rajonin tonë shohim se si regjimi autokratik në Serbi është nxitur prej pushtimit të Ukrainës nga ana e Rusisë. Në dy vitet e para të qeverisjes sonë ata katër herë e kanë sjell ushtrinë te kufiri jonë. Po ashtu, kanë sponsorizuar terrorizmin dhe kanë shpërndarë vazhdimisht gënjeshtëra dhe narrative të rrejshme për të përligjur veprat e tyre agresive ndaj Kosovës dhe tërë rajonit. Nuk mund të jemi të vetëkënaqur, nuk mund të marrim si të mirëqenë demokracinë apo përparimin tonë”, theksoi Kurti.

    Në anën tjetër, nikoqiri i kësaj konference, kryeparlamentari Glauk Konjufca tha se për Kosovën termi trans-atlantik është shumë i rëndësishëm, pasi vet liria dhe shtet-ndërtimi kanë ardhur nga koordinimi trans-atlantik.

    Andaj, sipas tij diplomacia vazhdon të jetë kyçe në marrëdhëniet ndërkombëtare, derisa edhe foli për rolin e diplomacisë parlamentare.

    “Për Republikën e Kosovës dhe popullin e Kosovës, termi trans-atlantik është shumë i rëndësishëm. Ne jemi dyshimtarë se pa funksionimin e trans-atlantikes do të kishte me qenë e vështirë edhe vet liria e Kosovës, po ashtu shtet-ndërtimi i Kosovës ishte një proces shumë i koordinuara trans-atlantik… Diplomaci parlamentare për ne do të thotë forcim i miqësive me parlamentet e vendeve mike, por edhe krijimi i miqësive të reja me deputetë dhe përfaqësues të vendeve që ende se kanë njohur Kosovën”, theksoi ai.

    Ndërkaq, drejtori i Friedrich-Ebert-Stiftung për Kosovë, Peter Hurrelbrink, tha se anëtarësimi në Bashkimin Evropian për Ballkanin Perëndimor, por edhe bashkëpunimi rajonal është shumë me rëndësi, por kjo kërkon një numër të madh reformash.

    “Është e rëndësishme që të diskutohet për sfidat në siguri, luftimin e krimit dhe korrupsionit, përfshirjen e shoqërisë civil dhe mediave në rolin primar dhe shumë reforma tjera që duhet të bëhen për të përmirësuar jetën e qytetarëve”, tha Hurrelbrink.

    Në kuadër të paneleve diskutuese, ishte edhe ish-ministri i Punëve të Jashtme të Shqipërisë, Ditmir Bushati, i cili tha se është shumë e vështirë të flitet për bashkëpunim ekonomik në rajon, pa horizontin e qartë dhe të përbashkët politik.

    “Kur Serbia që organizoi agresionin në Bajnska, në qarqet e politikave të BE-së kishte njerëz që mendonin se ndoshta Kosova është ajo e cila po e ekzagjeronte pak. Dhe vetëm dy-tre ditë më parë, kur revista Time raportoi në thelb për atë që ndodhi, njerëzit filluan të mendojnë se ‘ah ndoshta nuk ishte Kosova, ndoshta ishte Serbia’. Pra, ne duhet ta përballojmë këtë realitet ashtu siç është dhe duhet ta konsiderojmë procesin e zgjerimit si një proces gjeopolitik para së gjithash. Duhet të jemi të qartë me njëri-tjetrin se është shumë e vështirë të flasim për Bashkëpunim Ekonomik pa horizontin e qartë dhe të përbashkët politik. Pika ime e dytë është në lidhje me bashkëpunimin rajonal. Ne dëgjojmë gjithnjë e më shumë, dhe fatkeqësisht këtë e dëgjojmë edhe nga Komisioneri i Zgjerimit. Dua të them, ndoshta është hera e parë në histori që dëgjoj një Komisioner të Zgjerimit të flasë për rrugë, për rrugë të shpejta në rajon dhe nuk flet për sundimin e ligjit”, theksoi Bushati.

    Në panel ishte po ashtu edhe deputeti i Parlamentit Evropian, Lukas Mandl, i cili theksoi nevojën e bashkëpunimit dhe përafrimit të vendeve të Ballkanit Perëndimor.

    “Përafrimi i Ballkanit Perëndimor, bashkëpunimi mendoj se secila nga këto fjalë është kuptimplotë dhe tregon shumë…Flet për ndërtim të urave, jo fokusim në probleme por edhe tejkalim të problemeve duke ndërtuar urat drejtë zgjidhjeve. Po ashtu përmendet edhe bashkëpunimi, kjo është më domethënës pasi po jetojmë në një botë të konfrontimeve”, theksoi ai.

    Konferenca “Diplomacia Parlamentare për Sigurinë Rajonale dhe Integrimin Euroatlantik”, ka vazhduar punimet gjatë së hënës edhe me panele të tjera./kp

  • ​Begaj: Sulmi terrorist në veri tregoi se sa e brishtë është siguria në rajonin tonë

    ​Begaj: Sulmi terrorist në veri tregoi se sa e brishtë është siguria në rajonin tonë

    Konfrontimet politiko-ushtarake rrezikojnë të përshkallëzohen dhe të përhapen. Kjo u pa më së miri shtatorin e kaluar në sulmin terrorist të Banjskës, në Kosovë. Ai sulm tregoi se sa e brishtë është siguria në rajonin tonë dhe dëshmoi se ka ende aktorë lokalë, të cilët mundohen ta projektojnë të ardhmen nëpërmjet një të kaluare e cila nuk duhet të kthehet më.

    Kështu ka thënë presidenti i Republikës së Shqipërisë, Bajram Begaj në cermoninë e hapjes së bazës ajrore të NATO-s në Kuçovë, ku tha se rijetësimi i kësja baze ajrore shënon një kapitull të ri në historinë e mbrojtjes dhe sigurisë së vendit dhe të gjithë rajonit tonë.

    Kreu i Shtetit i shprehu mirënjohjen të gjithë aleatëve në NATO, veçanërisht partnerit strategjik, SHBA-së, për mbështetjen e paçmuar që i kanë dhënë Shqipërisë në rrugëtimin euroatlantik.

    “Detyrimet që rrjedhin nga anëtarësimi në NATO dhe nga procesi i anëtarësimit në BE janë natyrshëm edhe interesat strategjike të Shqipërisë. Baza ajrore taktike e NATO-s, e ngritur në Kuçovë, ku historia takohet me modernen, simbolizon një urë ku e shkuara dhe e tashmja bashkohen për të siguruar një të ardhme të sigurt. Ky zhvillim nuk është vetëm një arritje ushtarake, është simbol i qartë i angazhimit tonë për të mbrojtur vendin, dhe parimet e vlerat demokratike që ne, si aleatë të NATO-s, ndajmë së bashku”, shtoi ai.

    Sipas Presidentit, “Shqipëria dhe Kuçova nuk u zgjodhën rastësisht. Kjo dëshmon vlerësimin dhe besimin që aleatët kanë te Shqipëria, si një partnere e denjë dhe e përkushtuar. NATO nëpërmjet këtij investimi, tregon se Shqipëria ka një rëndësi strategjike për Aleancën. Është një investim për të forcuar kapacitetet, planet, burimet dhe infrastrukturën e aleancës”.

    Po ashtu, Begaj nënvizoi se “për Shqipërinë dhe Forcat tona të Armatosura, ky është një investim strategjik në fushën e sigurisë dhe të mbrojtjes, shumë i nevojshëm dhe i mirëpritur ndër vite”.

    “Ky investim merr një rëndësi të veçantë sidomos më kushtet kur siguria në hapësirën euroatlantike është e rrezikuar. Agresioni i paprovokuar i Rusisë ndaj Ukrainës, situata në Lindjen e Mesme dhe në rajone të tjera, terrorizmi, si dhe kërcënime të tjera përbëjnë sfida për interesat dhe vlerat që përfaqëson bashkësia euroatlantike. Konfrontimet politiko-ushtarake rrezikojnë të përshkallëzohen dhe të përhapen. Kjo u pa më së miri shtatorin e kaluar në sulmin terrorist të Banjskës, në Kosovë. Ai sulm tregoi se sa e brishtë është siguria në rajonin tonë dhe dëshmoi se ka ende aktorë lokalë, të cilët mundohen ta projektojnë të ardhmen nëpërmjet një të kaluare e cila nuk duhet të kthehet më”, theksoi ai.

    Në këtë situatë sigurie globale të paqëndrueshme, Kreu i Shtetit theksoi se “ne duhet të jemi gjithmonë të gatshëm për të mbrojtur veten, dhe për të kontribuar në Aleancë për garantimin e paqes, sigurisë, dhe stabilitetit”.

    Ndaj, sipas tij, “baza e Kuçovës ka një mision mbrojtës dhe shkurajues, një qendër e rëndësishme për operacionet e NATO-s, për të përballuar kërcënimet e sotme dhe të nesërme”.

    “Shqipëria do të vijojë të luajë rolin e saj konstruktiv në rajon e më gjerë. Rritja e buxhetit për mbrojtjen, modernizimi i forcave tona të armatosura, rritja e kapaciteteve mbrojtëse dhe fuqizimi i kapaciteteve njerëzore janë domosdoshmëri. Unë mbështes çdo nismë që qeveria ka ndërmarrë për mbështetjen sociale të personelit të Forcave të Armatosura sepse të jesh pjesë e Forcave të Armatosura nuk është vetëm një profesion, është krenari kombëtare, i shërben Atdheut dhe kauzës së lartë të paqes dhe sigurisë”, tha Presidenti Begaj.

  • Përparim Rama jep lajmin: Jemi gati për formimin e policisë së Prishtinës

    Përparim Rama jep lajmin: Jemi gati për formimin e policisë së Prishtinës

    Kryetari i Prishtinës, Përparim Rama thotë se janë në përfundim të strukturimit të policisë së kryeqytetit.

    Në një postim në Facebook ai ka bërë me dije se sot ka takuar drejtorin e Policisë për këtë çështje me të cilin e ka diskutuar mundësinë e realizimit të këtij projekti.

    Sipas tij, kjo do të rriste nivelin e sigurisë dhe mirëqenies për qytetarët e Prishtinës.

    Postimi i plotë i Përparim Ramës:

    Gati jemi me formimin e policisë së Kryeqytetit.

    Jemi në rrugë të mbarë për të finalizuar procedurat për Strukturimin e Policisë së Kryeqytetit, një hap tepër i rëndësishëm për të rritur sigurinë dhe mirëqenien në qytetin tonë.

    Sot, në një takim me udhëheqësit kryesorë të Policisë së Republikës së Kosovës, Drejtorin e Përgjithshëm, Gazmend Hoxha, Drejtorin e Policisë për Rajonin e Prishtinës, Basri Shabani dhe Drejtorin e Departamentit të Operacioneve në Polici, Arbnesh Ajvazin, diskutuam detajet për organizimin e drejtorisë së re e cila do të funksionojë në kuadër të Drejtorisë Rajonale të Policisë në Prishtinë.

    Gjatë takimit theksuam rëndësinë e bashkëpunimit të ngushtë mes Kryeqytetit dhe Policisë, veçanërisht për të adresuar sjelljet që dëmtojnë jetën publike, duke u fokusuar në intensifikimin e masave ndaj atyre që hedhin mbeturinat jashtë vendeve të caktuara dhe parkojnë mjetet e tyre duke penguar kompaninë “Pastrimi” të kryejë shërbimin, dhe ndaj atyre që parkojnë makinat në mënyra që pengojnë qarkullimin dhe qetësinë publike.

  • Bushati: Nuk është faji i Kosovës se Serbia udhëhiqet nga një regjim autokratik

    Bushati: Nuk është faji i Kosovës se Serbia udhëhiqet nga një regjim autokratik

    Në kuadër të konferencës “Urëzimi i Ballkanit Perëndimor” është mbajtur sesioni “Zgjerimi i BE-së për Ballkanin Perëndimor: Koha për përparim është tani!”

    Deputeti i Parlamentit Evropian dhe kryetari i Shoqatës së Miqësisë, Austriako-Kosovare, Lukas Mandl, tha se BE-së i mungon lidershipi për të zhvilluar vizionin që të integrohet Evropa.

    “Është detyrë e parlamentarëve të kritikojnë se pari KE-në, pastaj t’i motivojë të shkojnë në rrugën e duhur. Të ndërtohen urat rreth zgjidhjeve, kjo është më domethënëse, sepse jetojmë në një botë të konfrontimeve, kemi luftën e Rusisë, semitizimin etj”, tha Mandl.

    Ai deklaroi se është e rëndësishme që në një shtet të ketë barazi për të gjithë dhe të krijohet një mjedis i mirë jete, duke shtuar se në Kosovë duhet të ketë investime të mëdha.

    “Ne shtetin e së drejtës të ketë barazi për të gjithë, të krijohet një mjedis për investime, veçanërisht në Kosovë. Duhet të kemi shkëmbim të mallrave, arsim të zhvilluar, një element më të mirë demografik, të mos fokusohemi vetëm te historia, ne aspiratat, objektivat tona ne duhet të fokusohemi në të ardhmen, që do na shpie drejt ndërtimit të urave”, tha ai.

    Deputetja dhe anëtarja e Komisionit për Punë të Jashtme, Fitore Pacolli-Dalipi tha se Bashkimi Evropian, ende nuk ka arritur të kuptojë mësimet e duhura, ndërsa shtoi se po qëndron naiv.

    “Vullneti politik do të vijë pas atij ekonomik, kjo do vijë kur do kemi diskutime tjera që do na ndjek me vite, në një periudhë të vështirë që kemi hyrë. BE-ja ende nuk ka nxjerrë mësimet e duhura ose ka qenë naive, nuk mund ta kuptosh, ekziston vetëm një mënyrë që liderët nuk krijojnë ndryshime, t’i mbajnë shtetet e veta në një vend”, tha Pacolli.

    Deputeti i Parlamentit Evropian dhe kryetari i Shoqatës së Miqësisë, Austriako-Kosovare, Lukas Mandl tha se është detyrë e parlamentarëve të kritikojnë se pari KE-në, pastaj t’i motivojnë ata të shkojnë në rrugën e duhur.

    Jeton Zulfaj, këshilltari politik i kryeministrit Kurti tha se negociatat e Kosovës në raport me Serbinë e vendosin Kosovën edhe më shumë në duar të Serbisë.

    “Nuk kam shpresa për përmirësime tutje”, tha Zulfaj.

    Ish-ministri i jashtëm i Shqipërisë, Ditmir Bushati e ngriti si çështje situatën me të cilën Kosova po ballafaqohet me Serbinë dhe po ndëshkohet nga BE-ja si shkak i vendimeve nga shteti serb.

    “Njohja e dyanshme mes Kosovës dhe Serbisë të kushtëzohet me anëtarësim, njohja duhet të jetë në qendër, drejt përparimit tonë në BE. Për të qenë kandidat duhet ta kesh statusin, nëse ai kushtëzohet shkak i Serbisë në raport me Kosovën, këtu nuk është faji ynë se në Serbi është regjim autokratik”, tha ish-ministri i jashtëm.

    Sipas Bushatit, duhet të ketë të drejta njeriu, sundim ligji, fusha në të cilat Kosova po punon mirë, çdo tregues e tregon një pavarësi dhe kjo është mënyra se si duhet të shkohet përpara, krahasuar me rajonin.

  • ​Jasharaj: Dita e Mësuesit po vjen, por ajo po na gjen me sfida e halle shumë

    ​Jasharaj: Dita e Mësuesit po vjen, por ajo po na gjen me sfida e halle shumë

    Kryetari i SBAShK-ut, Rrahman Jasharaj, ka thënë se Dita e Mësuesit po e gjen Kosovën me sfida, pakënaqësi e halle shumë.

    Përmes një shkrimi për media, ai tha se në takimin me kryetarët e nivelit komunal sindikal e të Universiteteve do të duhej të mbretëronte atmosferë festive dhe të flitej me krenari për angazhimet e Qeverisë në shërbim të arsimit e punëtorëve arsimor, që nga çerdhet e deri në universitet dhe për dialogun e sinqertë për të gjitha sfidat e shqetësimet .

    Por siç tha ai, kjo atmosferë mungoi sepse dialogu me fajin e pushtetarëve vazhdon të mungojë.

    Shkrimi i plotë:

    Në takimin me kryetarët e nivelit komunal sindikal e të universiteteve do të duhej të mbretëronte atmosferë festive dhe të flitej me krenari për angazhimet e Qeverisë në shërbim të arsimit e punëtorëve arsimor , që nga çerdhet e deri në universitet dhe për dialogun e sinqertë për të gjitha sfidat e shqetësimet . Por kjo atmosferë mungoi sepse dialogu me fajin pushtetarëve vazhdon të mungojë. Ata vazhdojnë të sjellin vendime e të bëjnë veprime të dëmshme kokë me vete e pa u ulur e konsultuar me palët tjera. Kështu do të bëhet dhe pikë , vazhdojnë të deklarohen qeveritarët dhe ashtu edhe bëjnë. SBASHK-u në emër të punëtorëve arsimor kërkojë përmes shkresave që vlera e koeficientit të mos jetë ajo e paralajmëruara që në vitin e kaluar nga ministri Murati, po të jetë se paku 130 euro, por Qeveria nuk qau kokën për këtë kërkesë tonën dhe të sindikatave tjera, por vendosi për vlerën 110 duke bërë një ngritje ironike të pagës në arsim prej vetëm 28 euro dhe kjo shtoi edhe më pakënaqësitë e të punësuarve në këtë sektor dhe jo vetëm. Qeveria , pa u konsultuar me palët tjera , vendosi edhe për ndryshimet në Ligjin për skemat pensionale të financuara nga shteti dhe si për inat angazhohet të mohojë të drejtat e fituara të punëtorëve të arsimit dhe kështu, në vend që t’ua lehtësojë jetën pak pikërisht kur u duhet , pra me rastin e pensionimit, Qeveria ua vështirëson edhe më jetën atyre që me vite e dekada punuan në arsim sepse do të marrin pensione me të ulëta nga ato që ua garantonte ligji dikur.

    Qeveria nuk e bëri as Ligjin për sigurime shëndetësore e as nuk bëri ndonjë angazhim lidhur me kushtet e punës në shkolla. Nxënësit dhe mësuesit garën për dije në shekullin 21 vazhdojnë ta bëjnë me shkumës e shpuzë. Ata duan, por me këto kushte e me këtë qasje të Qeverisë ndaj arsimit, suksese të larta e të dëshiruara nga të gjithë ne nuk mund të arrihen.

    Dita e mësuesit dhe shkollës shqipe po vjen, por ajo po na gjen me sfida, pakënaqësi e halle shumë.

  • ​Perspektiva gjinore në ofrimin e kujdesit për sëmundjet kronike jongjitëse

    ​Perspektiva gjinore në ofrimin e kujdesit për sëmundjet kronike jongjitëse

    Më 4 mars të vitit 2024, ekspertët u takuan për të avokuar për përmirësimin e perspektivës gjinore në kujdesin shëndetësor. Në tryezën e rrumbullakët të organizuar në Gjakovë, profesionistë nga subjekte të ndryshme publike dhe të shoqërisë civile ngritën vetëdijen, posaçërisht, për sa i përket rëndësisë së perspektivës gjinore në parandalimin dhe menaxhimin e SJN-ve.

    Tryeza filloi me fjalim nga Mrika Aliu, specialiste e shëndetit publik me përvojë rajonale, e cila nënvizoi rëndësinë e integrimit të perspektivave gjinore në parandalimin dhe menaxhimin e SJN-ve. Sebahate Pacolli Krasniqi dhe Dr. Sevdie Spahiu nga Instituti Kombëtar i Shëndetit Publik prezantuan të dhëna nga viti 2022, duke i vënë në pah trendet specifike gjinore në SJN-të në Kosovë. Mark Kaqinari, Këshilltar i Lartë Ligjor në Institucionin e Avokatit të Popullit, theksoi ndikimin e thellë të aspektit gjinor në shëndetësi dhe të drejtat njerëzore, ndërsa Besim Kodra nga Shoqata për të Drejtat e Pacientëve në Kosovë, potencoi rëndësinë e garantimit të qasjes së barabartë në kujdes për të gjithë pacientët me SJN.

    Drejtori i Spitalit të Përgjithshëm të Gjakovës, z. Hilmi Shala, deklaroi: “Ta shfrytëzojmë këtë si një mundësi për të shqyrtuar ndikimin e thellë që mund të kenë përpjekjet tona të përbashkëta në shëndetin dhe mirëqenien e komuniteteve tona. Së bashku, ne mund të bëjmë shumë për një të ardhme ku integrimi gjinor në kujdesin shëndetësor të mos jetë vetëm një aspiratë, por realitet. Së bashku, ne mund të bëjmë ndryshime në jetët e atyre që janë të prekur nga sëmundjet jo ngjitëse, ashtu që ata të marrin kujdesin dhe vëmendjen që duhet t’u jepet”.

    Tryeza e rrumbullakët përfundoi me diskutim mbi hapat veprues për bashkëpunimin ndërmjet institucioneve publike, organizatave të shoqërisë civile (OSHC-ve), mediave dhe ofruesve të kujdesit spitalor. Pjesëmarrësit e angazhuar në diskutime shkëmbyen ide se si të promovojnë perspektivën gjinore në ofrimin e kujdesit për SJN-të dhe se si të nxisin bashkëpunimin në të gjithë sektorët.

  • ​Ndjehet jehona e avionëve të NATO-s në Kuçovë

    ​Ndjehet jehona e avionëve të NATO-s në Kuçovë

    Baza ajrore e Kuçovës sot është tërësisht e transformuar dhe e gatshme si një bazë e re taktike e NATO-s me një rëndësi që i tejkalon kufijtë e Shqipërisë. Kështu u tha në cermoninë e hapjes së bazës ajrore të NATO-s, në Kuçovë, e cila u tha se do të luaj një rol të rëndësishëm për t’iu përgjigjur kërcënimeve që vijnë nga kufiri lindor dhe jugor i aleancës.

    Ministri i Mbrojtjes së Shqipërisë, Niko Peleshi tha se kjo bazë është një prej investimeve më madhjore të NATO-s në Shqipëri dhe do të shërbej si një bazë ajrore taktike dhe operacionale.

    “Mbi këtë pistë, miku i fundit ka fluturuar 19 vite më parë. Erdhi koha që në Koçovë të ndjehet jehona e avionëve të NATO-s, mbrojtësve të gjinjëve tanë në dekadën më të kërcënuar të historisë moderne, të rajonit dhe të mbarë Evropës. Koçova do të shërbej si baza kryesore për forcat tona ajrore për të cilën vëmendja dhe investimi nuk do të rreshtin deri në krijimin e një flote dinjitoze në shërbim të mbrojtjes së popullit tonë dhe të aleatëve tanë. Helikopterët Black Hawk të siguruar me mbështetjen e partnerit tonë special, strategjik Shtetet e Bashkuara të Amerikës si dhe dronët Bajraktat të siguruar në bashkëpunim me Turqinë, për të nisur fluturimin nga kjo bazë “, tha ai.

    Shefi i shtabit të përgjithshëm i Forcave të Armatosura të Shqipërisë, Arben Kingji tha se me këtë projekt madhor të financuar nga NATO dhe qeveria shqiptare, po afrohet një vlerë e shtuar në infrastrukturën tonë të mbrojtjes, e cila riafiromon rëndësinë strategjike të Shqipërisë dhe përkushtimin e aleancës në garantimin e paqes dhe sigurisë në rajonin e Ballkanit Perendimor dhe më gjerë.

    “Kjo bazë do të ofroj infrastrukturë të avancuar për mjetet ajrore të aleancës, akomodim për trupat pjesëmarrëse dhe do të shërbej si qendër për aktivitetet e forcë tonë ajrore, dislokimin e forcave dhe mjeteve, zhvillimin e trajnimeve dhe stërvitjeve, qofshin këto në kuadër kombëtar, dypalësh, rajonal apo edhe në kuadrin e aleancës. Në një epokë të karakterizuar nga sfidat komplekse dhe dinamike të sigurisë, nevoja për një mbrojtje të qëndrueshme dhe bashkohore është bërë më e nevojshme që kurrë. Në këtë drejtim kjo bazë do të luaj një rol të rëndësishëm për t’iu përgjigjur kërcënimeve që vijnë nga kufiri lindor dhe jugor i aleancës“, tha ai.

    Menaxherja e përgjithshme e agjencisë së NATO-s, për mbështetje dhe prokurimet, Stejsi Kamins tha se të punonin me Shqipërinë dhe kontraktohet italian, patën mundësi që të ofrojnë punime me cilësi të shkëlqyer dhe materiale që përmbushin të gjitha standardet e NATO-s.

    “Koçova tashmë është një stacion modern për operacionet e NATO-s në Ballkanin Perëndimor, me përmirësime, me modernizime që përfshijnë renovimin e një kulle kontrolli, gjithashtu edhe një dhomë kontrolli të ri modernizuar dhe hapësira të cilat sigurojnë magazinimin dhe ndriçimin“, tha ajo.

    Komandanti i NATO-s gjeneral lejtnant Juan Pablo Sanchez De Lara deklaroi sot nga Kuçova se Shqipëria është më shumë se kurrë e gatshme të marrë përgjegjësi për të mbrojtur sigurinë dhe paqen.

    De Lara tha se përurimi i saj dëshmon se aleanca jonë, me një qasje 360 gradëshe është e angazhuar mjaft në rajon dhe se koalicioni merr në konsideratë angazhimin e Shqipërisë për sigurinë e NATO-s si e tërë.

    “Nga qendra jonë jemi tejet të angazhuar të mbrojmë qiejt e NATO-s. Shqipëria është integruar plotësisht në sistemin e mbrojtjes ajrore të NATO-s në 2018, si pjesë e përpjekjes së saj për të rritur ndërveprueshmërinë dhe integrimin me Aleancën Atlantiko-Veriore, me synim për të siguruar paqen dhe sigurinë ndërkombëtare”, tha zyrtari i NATO-s.

    De Lara u shpreh se përfshirja e Shqipërisë në mbrojtjen ajrore të NATO-s është simbol i kontributit të saj në këtë pjesë të Aleancës dhe kjo dëshmon unitetin dhe vendosmërinë e NATO-s, si po tregojmë aktualisht në rastin e sulmi të paligjshëm e pushtimit të paligjshëm rus në Ukrainë.

    Falë përpjekjeve që janë bërë shumë paraardhës tanë dhe nga autoritet shqiptare, theksoi ai më tej, mund të themi se Aleanca e NATO-s garanton në mënyrën më të mirë sigurinë e hapësirës ajrore.

    Ai shtoi se baza e Kuçovës do të jetë në përputhje me standardet e NATO-s dhe do të përmirësojë besueshmërinë, rezistencën dhe bashkëveprimin në kuadër të Aleancës.

    “Këto instalime ndihmojnë të kemi më tepër mundësi e gatishmëri ushtarake. Pikësëpari e mbi të gjitha, duhet të jemi e do të jemi të gatshëm jo vetëm për këtë, por edhe për planet dhe operacionet e NATO-s. Kjo do të kontribuojë në përpjekjen e përgjithshme të parandalimit dhe për të dëshmuar veprimin e pandalshëm të NATO-s për siguri e paqe”, u shpreh De Lara.

    Ai siguroi se veprimtaritë mbresëlënëse që janë zhvilluar këtu do të çojnë në rritje të kapaciteteve të NATO-s dhe Shqipëria do të jetë edhe më e sigurtë dhe më e mbrojtur brenda NATO-s.

    Kryeministri Edi Rama deklaroi sot se baza e re ajrore e NATO-s në Kuçovë i jep vendit tonë një rëndësi të re gjeostrategjike.

    Në ceremoninë e organizuar me rastin e hapjes së bazë ajrore të NATO-s në Kuçovë, Rama theksoi se tashmë ofrohet infrastrukturë moderne për flotën tonë të helikopterëve e dronëve të armatosur dhe avionët luftarakë të Aleancës.

    Rama nënvizoi se kjo bazë do të shërbejë edhe për të çuar në një tjetër nivel përgatitjen e aviatorëve tanë, ndërkohë që i jep vendit tonë një rëndësi të re gjeostrategjike.

    Kryeministri theksoi se baza ajrore e Kuçovës është sot është tërësisht e transformuar dhe e gatshme si një bazë e re taktike e NATO-s me një rëndësi që i tejkalon kufijtë e Shqipërisë.

    “Shqipëria gjendet në anën tjetër, duke mirëpritur me respekt aleatët e saj dhe partnerë, në një aleancë që është së pari aleancë vlerash për garantimin e paqes. Jam i lumtur që një punë e nisur prej kohësh, arriti të përfundojë. Këtu me ne janë miq, aleatë. Falënderoj ministrin e Mbrojtjes së Italisë, që ka ardhur me disa avionë me vete. Falënderoj miqtë turq, që për 3 dekada e mbajtën gjallë frymën e kësaj dekade. Një bazë, që është një tjetër element sigurie për rajonin tonë të Ballkanit Perëndimor, që e dimë është jo pak i rrezikuar nga Federata Ruse. Riaktivizimi i këtij aeroporti është vazhdim i rritjes së flotës sonë ajrore. Falënderoj banorët e zonës, për durimin që kanë treguar. Uroj që kjo bazë të sjellë për ta, mundësi të reja punësimi”, tha Rama.

    Kryeministri nënvizoi se riaktivizimi i këtij aeroporti ushtarak është njëkohësisht dhe pjesë e ripërtëritjes së mëtejshme cilësore të flotës tonë ajrore.

    “Dy helikopterët e rinj ‘Black Hawk’ si dhe dronët ‘Bayraktar’ janë pjesë e një rritjeje që do të vazhdojë”, tha ai.

    Kryeministri solli në vëmendje edhe pozicionimin e bazës së Kuçovës në kohën e perandorisë sovjetike.

    Kryeministri theksoi se “po të lexosh planin e deklasifikuar të luftës që qëndronte në sirtarët e Kremlinit lufta do të niste me bombardimin e Vjenës, Shtutgartit, Mynihut, Nurembergut, 2 bazave të NATO-s në Danimarkë, 3 bazave në Verona, Padova e Viçensa dhe pjesë e këtij operacioni do të ishin dhe avionët bombardues të bazës së Kuçovës”.

    Rama theksoi se sot jetojmë në një epokë tjetër dhe fatmirësisht Shqipëria gjendet në anën tjetër duke mikpritur me krenari dhe respekt aleatët dhe partnerët në një aleancë që është një aleancë vlerash në mbrojtje të paqes e demokracisë.

    Kryeministri falënderoi edhe miqtë dhe aleatët e paçmueshëm turq, të cilët për thuajse 3 dekada e mbajtën gjallë frymë e kësaj baze, e cila sot është tërësisht e transformuar dhe e gatshme si një bazë e re taktike e NATO-s, që i tejkalon kufijtë e Shqipërisë.

    Rama shprehu bindjen po ashtu se baza taktike e NATO-s të sjellë përpara mundësi të reja punësimi dhe mundësi të reja për të gjithë zinxhirin e shërbimeve duke ndikuar në ekonominë lokale.

  • ​IKD, FOL dhe INPO: KPK të shpallë sa më parë konkursin e ri për Kryeprokuror të Shtetit

    ​IKD, FOL dhe INPO: KPK të shpallë sa më parë konkursin e ri për Kryeprokuror të Shtetit

    Organizatat jo-qeveritare Instituti i Kosovës për Drejtësi, Lëvizja FOL, Iniciativa për Progres i bëjnë thirrje Këshillit Prokurorial të Kosovës që në përputhje me kompetencat që ka, pas mos dekretimit të kandidatit për Kryeprokuror të Shtetit nga Presidentja e Republikës së Kosovës, të shpallë konkurs të ri për përzgjedhjen e Kryeprokurorit të Shtetit.

    Reagimi i plotë:

    Organizatat jo-qeveritare Instituti i Kosovës për Drejtësi, Lëvizja FOL, Iniciativa për Progres i bëjnë thirrje Këshillit Prokurorial të Kosovës që në përputhje me kompetencat që ka, pas mos dekretimit të kandidatit për Kryeprokuror të Shtetit nga Presidentja e Republikës së Kosovës, të shpallë konkurs të ri për përzgjedhjen e Kryeprokurorit të Shtetit.

    Kosova është pa Kryeprokuror të Shtetit që nga prilli i vitit 2022. Kështu, tani po bëhet dy (2) vite që kur Prokurori i Shtetit funksionon me u.d. të Kryeprokurorit të Shtetit. Me këtë rast, duhet theksuar se nevoja për për të pasur Kryeprokuror të Shtetit nuk përjashton nevojën për një proces transparent dhe meritor për përzgjedhjen e Kryeprokurorit të Shtetit.

    Më 17 tetor 2023, Presidentja e Republikës së Kosovës ka njoftuar se nuk e ka dekretuar kandidatin e propozuar nga KPK për Kryeprokuror të Shtetit, duke e kthyer këtë proces në Këshillin Prokurorial të Kosovës. Fatkeqësisht, kur po bëhen pesë (5) muaj nga nxjerrja e këtij njoftimi nga Presidentja e Republikës së Kosovës, KPK ende nuk ka vepruar në drejtim të zhvillimit të një procesi meritor dhe transparent për përzgjedhjen e kandidatit për Kryeprouror të Shtetit. Veprimi i vetëm i tyre ka qenë ripropozimi, pa proces të ri konkurues, i emrit të njejtë për dekretim si Kryeprokuror të Shtetit.

    Kjo mënyrë e veprimit nga KPK shpërfaqë mungesë të vullnetit të tyre për të zhvilluar një proces transparent dhe meritor për përzgjedhjen e Kryeprokurorit të Shtetit. Duke abstrahuar mos zhvillimin e një procesi meritor, transparent dhe me integritet të pakontestuar.

    Nëse deri më 17 tetor 2023 KPK nuk ka pasur përgjegjësi për vonesat që janë krijuar në këtë proces për shkak se propozimi ishte tek Presidentja e Republikës së Kosovës, që nga kjo datë e tutje, KPK është institucioni i vetëm përgjegjës pse Kosova nuk ka Kryeprokuror të Shtetit.

    Në linjë me rekomandimet e dala nga vendimi i Presidentes së Republikës së Kosovës, gjetjet e koalicionit të OJQ-ve dhe thirrjeve të partnerëve ndërkombëtarë, KPK duhet të shpallë konkursin e ri për Kryeprokuror të Shtetit dhe të sigurojë një proces meritor dhe transparent, në mënyrë që emri i Kryeprokurorit të ri të Shtetit të dalë nga një proces me integritet të pakontestuar.

    Vendimi i Presidentes së Republikës së Kosovës konfirmoi gjetjet e kualicionit të OJQ-ve që monitoruan procesin e përzgjedhjes së kandidatit për Kryeprokuror të Shtetit. Sipas koalicionit të OJQ-ve, procesi i përzgjedhjes së Kryeprokurorit të Shtetit nuk ka siguruar meritokraci, objektivitet dhe se kandidatët nuk janë trajtuar në mënyrë të barabartë, çka sipas koalicionit ky proces është shoqëruar me shkelje të shumta të procedurave.

    Ndaj këtij procesi, kishte reaguar Ambasada Amerikane, ajo Gjermane dhe Zyra e Bashkimit Evropian në Kosovë, duke u shprehur të zhgënjyer me këtë proces. Duhet rikujtuar se integriteti i këtij procesi ishte cenuar qysh në fillim, pasi ishin tërhequr edhe nga monitorimi Ambasada Britanike, e cila ishte injoruar për dy muaj nga KPK dhe Kryeprokurori i Shtetit.

    Për më tepër edhe Raporti i Progresit për Kosovën për vitin 2022 ka theksuar zhgënjimin e ambasadave dhe shoqërisë civile për mungesën e drejtësisë, transparencës dhe parimeve të meritës në procesin e zhvilluar nga KPK.