Category: Lajme

Ministri i Punëve të Brendshme, Xhelal Sveçla, në Ditën Ndërkombëtare të Gruas tha se si Ministri “po punojnë” që gratë të jetojnë dhe veprojnë të sigurta, ndërsa për vrasjet ndaj grave zotohet se do t’i mbajnë përgjegjës autorët.

“Rezistenca dhe kontributi i vajzave dhe grave në historinë e popullit tonë mbetet shembulli më i mirë që secili prej nesh kemi para vetes”, ka thënë Sveçla.

Ai ka theksuar se si Ministri e Punëve të Brendshme, “jo vetëm sot por çdo ditë, po punohet që secila grua të jetojë e veprojë e sigurt në vendin tonë, ashtu që edhe secili vrasës mizor i vajzave e grave të sillet me shpejtësi para drejtësisë e të marrë dënimin e merituar.”

“Duke njohur pabarazinë që ka rënduar ndër vite ndaj vajzave dhe grave në punësim, synim i punës sonë mbetet të ngrisim të gjithë mekanizmat që të garantojmë pjesëmarrje të grave dhe vajzave brenda sektorit publik”, tha ai në një adresim.

Ministri i Brendshëm ka theksuar se sektorit të sigurisë i nevojiten edhe më shumë gra dhe vajza dhe kjo përbën prioritet për ta.

Gjithashtu, ai shtoi se vajzat dhe gratë që janë çdo ditë në uniformë kanë dëshmuar se shërbimi për qytetarët e për Republikën nuk ka gjini.

“Në këtë ditë të shënuar të 8 Marsit, shpreh mirënjohjen time të thellë për secilën vajzë e secilën grua që ka thyer çdo barrierë para saj. Para vetes kemi shumë sfida të cilat bashkëpunimi e bashkëveprimi si institucione e si shoqëri i tejkalon. Gëzuar sot dhe çdo ditë, nuk do të reshtim së punuari për barazi e drejtësi, mirëqenie e siguri”.

Mbi 300 raste të keqpërdorimit janë dërguar në Prokurori nga Zyra Kombëtare e Auditimit viteve të fundit por që nuk ka përfunduar asnjë proces. Kështu ka bërë të ditur auditorja e ZKA-së, Vlora Spanca, në panelin e mbajtur nga Instituti Demokratik i Kosovës me temën “Roli i institucioneve dhe agjencive të pavarura në garantimin e integritetit institucional”, raporton EO.

Spanca tha se gjatë vitit të kaluar, janë dërguar 51 raste të tjera por që nuk kanë evidencë se sa prej tyre janë në procese gjyqësore, pasi që sipas Spancës mekanizmi kthyes nga Prokurori i Shtetit nuk është funksional.

“Është për keqardhje që edhe pse bëjmë maksimum me prefesionalizëm sepse është punë e ndjeshme por me gjithë këtë mund nuk e arrin ndikimin e duhur. Nuk dimë se çka ndodh me rastet kur dërgohen tek prokuroria andaj kemi lidhur edhe marrëveshje. Ne kemi dërguar 300 raste gjatë viteve të fundit ndërkaq 51 raste vitin e kaluar, çështja është që ne duhet ta dimë mos po e ngarkojmë më shumë elemente Prokurorinë”, deklaroi Spanca.

Ndërkaq, drejtori i Zyrës për Regjistrimin, Certifikimin dhe Kontrollin Financiar të subjekteve politike, Besnik Buzhala tha se partitë që nuk e kanë deklaruar pasurinë janë dënuar me kusht, e mosdeklarimi me kohë parasheh dënim me gjobë dhe procedura tjera.

“Vendimet e Agjencisë janë respektuar, neve na është dashur të ballafaqohemi me pushtetin mirëpo shumica e institucioneve i kanë zbatuar. Ne bashkëpunojmë me prokurori, kemi takime e tryeza të shumta për raste ku kanë vendosur prokurorë të ndryshëm, këto i kemi koordinuar dhe mundohemi ta bëjmë më të mirën. Gjetjet tona ia raportojmë kuvendit”, u shpreh ai.

Agjencia e Statistikave të Kosovës (ASK) ka publikuar Statistikat e Hotelerisë për muajin Janar 2024, sipas të cilave del se më shumë vizitorë në hotele në janar 2024 sesa janari i një viti më parë.

Në janar 2024, numri i vizitorëve (vendorë dhe të huaj) në hotele ishte 77 295, prej tyre 42,1%, ishin vendorë dhe 57,8% ishin të jashtëm. Krahasuar me muajin janar të vitit 2023 (sa ishin
51 253 vizitorë) kishte rritje të numrit të përgjithshëm të vizitorëve në hotele për 50,8%.

Numri i net-qëndrimeve ishte 152 051, prej tyre 38,5% nga vendorët dhe 61,4% nga të huajt.

Numri i vizitorëve të brendshëm dhe net qëndrimet e tyre në hotele sipas rajoneve

Numrin më të madh të vizitorëve te brendshëm në hotele e kishte rajoni i Pejës me 19 472 vizitorë dhe më 33 080 net-qëndrime.

Numri i vizitorëve te jashtëm dhe net qëndrimet e tyre në hotele sipas shteteve prej nga vijnë

Sa u përket vizitorëve të huaj, krahasuar me periudhën paraprake (Janar 2023) ka rritje të vizitorëve për 50,8%. Në total, 77 295 vizitorë të huaj, nga të cilët numri më i madh ishte nga Shqipëri, Zvicra, Gjermania, Turqia etj.

Zëvendëskryeministri Besnik Bislimi nëpërmjet një shkrimi në X ka uruar Suedinë për anëtarësimin në familjen euroatlantike, NATO.

“Anëtarësimi i Suedisë në NATO si anëtari i 32-të, është dividend i sigurisë, bashkëpunimit dhe unitetit më të madh”, ka shkruar ai.

Tutje Bislimi ka thënë se vetëm me bashkim, bota demokratike jep shpresë për paqe.

“Vetëm së bashku, bota e bashkuar demokratike perëndimore, jep shpresa për paqe dhe prosperitet, duke kapërcyer kërcënimet dhe agresionet e përfaqësuara nga autokratë”, ka shkruar zëvendëskryeministri.

Presidenti ukrainas, Volodymyr Zelensky, viziton Turqinë më 8 mars për të biseduar me homologun e tij turk, Recep Tayyip Erdogan, për luftën kundër Rusisë, bashkëpunimin në fushën e mbrojtjes dhe sigurinë e eksporteve ushqimore ukrainase.

Presidenca ukrainase tha se dy udhëheqësit po ashtu do të bisedojnë për formulën për paqe prej 10 pikash të Kievit që synon t’i japë fund konfliktit, por edhe për lirimin e të gjithë të arrestuarve ukrainas dhe të dëbuarve, si dhe për sigurimin e stabilitetit ushqimor botëror përmes transitit të sigurt të drithërave ukrainase përmes Detit të Zi.

Formula për paqe e Ukrainës bën thirrje për tërheqjen e të gjitha trupave ruse nga Ukraina, rivendosjen e kufijve të shtetit të vitit 1991 pas rënies së Bashkimit Sovjetik dhe mbajtjen përgjegjëse të Rusisë për veprimet e saj. Më herët, Kremlini ka refuzuar kërkesa të tilla.

“Një vëmendje e veçantë gjatë vizitës do t’iu jepet projekteve të përbashkëta në sferën e mbrojtjes dhe industrisë”, tha Presidenca ukrainase përmes një njoftimi në Telegram, duke shtuar se Zelensky do të vizitojë një kantier detar ku po ndërtohen pjesë për Marinën ukrainase. Ai po ashtu do të takohet me përfaqësuesit e kompanive turke të mbrojtjes.

Presidenca turke tha se bisedimet do të përfshijnë edhe “diskutime të detajuara për rrjedhën e luftës Ukrainë-Rusi, për situatën aktuale sa i përket vazhdimisht të Marrëveshjes për korridorin e drithërave [në Detin e Zi] dhe përpjekjet për një paqe të qëndrueshme në rajon”.

Turqia, shtet anëtar i NATO-s, ka mbajtur raporte të mira me Moskën dhe Kievin dhe së bashku me Kombet e Bashkuara ka ndërmjetësuar një marrëveshje që i ka lejuar Kievit eksportimin e sigurt të drithërave nga portet e tij. Por, korrikun e kaluar Rusia u largua nga marrëveshja, e njohur si Nisma e Detit të Zi, pasi argumentoi se eksportet e saj ushqimore dhe të plehrave artificiale nuk gëzonin të njëjtat kushte.

Turqia ka synuar që të bindë Moskën që të kthehet në marrëveshje, por deri më tani Rusia ka refuzuar.

Pas takimit pasditen e së premtes, Erdogan dhe Zelensky do të mbajnë një konferencë për media.

Zelensky për herë të fundit kishte vizituar Turqinë në korrikun e viti të kaluar./REL/

Kompania Terra ka publikuar statistikat e performancës në media sociale për 20 profilet e politikanëve kosovarë që e kanë përformancën më të lartë në rrjetet sociale.

Profilet e politikanëve kosovarë janë vlerësuar në bazë të metrikave të ndryshme në Facebook, duke përfshirë numrin total të fansave/ndjekësve, numrin e postimeve, feedback-un mesatar për postim, dhe trendet në angazhimin e përdoruesve.

Prezenca në Facebook: Albin Kurti udhëheq me numrin më të lartë të reagimit te fansave në Facebook, që sugjeron një prezencë të fortë dhe potencial për një arritje të gjerë në platformë. Vjosa Osmani ndjek pas, me një bazë të madhe të fansave, që tregon një popullaritet dhe ndikim të lartë. Ramush Haradinaj është politikani i tretë me numrin më të lartë të reagimeve në Facebook, pasuar nga Përparim Rama në vendin e katërt dhe Mefail Bajqinofci zë pozitën e pestë si politikani me më së shumti reagime të fansave në Facebook. /atvlive.tv

Ministrja e Drejtësisë, Albulena Haxhiu, ka bërë homazhe te Memoriali Heroinat në nderim të jetës, veprës dhe sakrificës së shumë grave të Kosovës gjatë luftës së fundit 1998-99 kundër shtetit okupator, Serbisë.

Ajo ishte e shoqëruar nga nënkryetarja e Lëvizjes Vetëvendosje, Mrika Limani Myrtaj, nënkryetarja e Kuvendit, Saranda Bogujevci, si dhe deputetet e Republikës së Kosovës dhe aktiviste të Lëvizjes.

“Vuajtjet e të gjitha atyre grave që përjetuan tmerrin e dhunës seksuale kanë goditur zemrat e të gjithë neve, për të mos i harruar kurrë, dhe për të kërkuar drejtësi për krimet e shkaktuara ndaj tyre”, tha kryetarja e Gratë për Vetëvendosje, ministrja e drejtësisë, Albulena Haxhiu.

Kryeministri Albin Kurti ka reaguar pasi nënkryetares së Komunës së Zveçanit, Natasha Tomaniq, i janë djegur dy lokale në qendër të Zveçanit, duke thënë se kjo paraqet një akt terrorist e qyqar.

Ai në një postim në Facebook ka thënë se kjo po ndodh ndaj Tomaniq dhe serbëve që duan të pavarësohen nga Beogradi që i shantazhon.

“Pikërisht me 8 Mars, elemente kriminale në Zveçan zgjodhën e rizgjodhën dhunën, terrorin dhe sulmin, kësaj radhe ndaj pronës private, dyqanit të nënkryetares së Komunës së Zveçanit, Natasha Tomaniq. Ky duket të jetë “urimi” i tyre për 8 Mars për nënkryetaren Tomaniq dhe për të gjithë serbët që duan integrimin në Kosovë, çlirimin nga struktura kriminale që kërcënojnë dhe pavarësimin nga Beogradi zyrtar që i shantazhin”, ka shkruar Kurti.

Ai tha se ndaj serbëve të Kosovës që vazhdojnë të përballen me dhunën fizike e psikologjike dhe kërcënimet e vazhdueshme, “është mbështetja e inkurajimi për të plotësuar deri në fund vullnetin e tyre.”

Kurti shpreson që edhe ambasadorët e QUINT-it dhe shefi i Zyrës së BE-së, Tomas Szunyog ta dënojnë ashpër këtë akt kriminal, terrorist e qyqar.

Guvernatori i Bankës Kombëtare Bullgare (BNB) Dimitar Radev ka diskutuar me drejtoreshën menaxhuese të FMN-së Kristalina Georgieva mundësinë e emërimit të saj për një mandat të dytë dhe ajo tha se do të ishte e nderuar të emërohej, tha Radev në një deklaratë të publikuar në faqen e internetit të bankës qendrore të premten. Guvernatori i BNB është gjithashtu Guvernator i FMN-së për Bullgarinë.

“Kam pasur një bisedë telefonike me zonjën Georgieva në të cilën diskutuam mundësinë e nominimit të saj për një mandat të dytë në FMN dhe e pyeta nëse do të ishte e gatshme të vazhdonte të shërbente në postin e saj. Jam i kënaqur që thonë se ajo konfirmoi se do të ishte e nderuar ta bënte këtë, duke iu nënshtruar mbështetjes së anëtarësimit në FMN. Në këtë kontekst, autoritetet bullgare do të vazhdojnë konsultimet me partnerët e tyre evropianë për një pikëpamje të përbashkët rreth një nominimi të mundshëm në përputhje me procesin e FMN-së. zgjedhja e Drejtorit Menaxhues të institucionit,” tha Radev.

Guvernatori i BNB-së tha më tej se Kristalina Georgieva “ka fituar respektin dhe besimin e madh të vendeve anëtare të FMN-së gjatë viteve të mandatit të saj si Drejtoreshë Menaxhuese e Fondit”.

“Nën udhëheqjen e saj, FMN-ja ka mbështetur ekonominë globale me financime në shkallë të gjerë për afro 100 vende anëtare ndërsa ata u përballën me pandeminë COVID, luftën në Ukrainë dhe krizën e kostos së jetesës. Shumë nga kolegët e mi, guvernatorët e FMN, do të donte ta shihte atë të vazhdojë si drejtoreshë menaxhuese e institucionit për një mandat të dytë – një pikëpamje e shprehur edhe nga ministri i Financave i Francës Bruno Le Maire në kohën e takimit të fundit të G20 në Sao Paolo”. /BTA

Shefi i Zyrës së Bashkimit Evropian në Kosovë, Tomas Szunyog, ka reaguar pasi Komisioni Qendror i Zgjedhjeve caktoi datën për votimin për shkarkim të kryetarëve në katër komunat veriore.

Ai ka thënë se BE-ja e vlerëson procesin e verifikimit të nënshkrimeve nga KQZ-ja si dhe vendimin e sotëm.

Szunyog është shprehur se i mbetet KQZ-së të përgatitet për të krijuar kushte për votim të lirë e të drejtë.

“Tani është thelbësore që KQZ-ja të bëjë përgatitjet e nevojshme për të siguruar proces të qetë dhe të krijojë kushte për votim të lirë dhe të drejtë”, ka shkruar ai në platformën X.

Ai ka theksuar se “BE-ja është e gatshme të ofrojë mbështetje përgjatë këtij procesi”.