Category: Lajme

Në Korreticë të Epërme të Drenasit, një ditë pas zjarrit që kaploi Fabrikën e Plastikës te Parku i Biznesit, zjarrfikësit ende janë duke bërë intervenimet për të lokalizuar zjarrin, raporton gazetarja e ATV-së, Sara Shehu, nga vendi i ngjarjes.

“Sipas të dhënave zyrtare të Policisë nuk pati të lënduar. Brenda objekti të dëmtuar, ende vazhdon të ketë tym, ku zjarrfikësit me mjetet e tyre po vazhdojnë me intervenimin e tyre për të lokalizuar zjarrin, i cili deri më tani, ende nuk është shuar 100 për qind. Brigada e zjarrfikësve në Drenas kanë deklaruar se u duhen së paku edhe 3 deri në 5 orë e tërësishëm të zjarrit”, njoftoi gazetarja Shehu.

Kujtojmë se gjatë ditës së djeshme, pronari i Fabrikës së Plastikës, Arian Shabani, e ka konfirmuar për ATV-së se dëmet e shkaktuar nga zjarri kalojnë 10 milionë euro. /atvlive.tv

Më shumë detaje i gjeni në videon më poshtë:

Vizitën e sotme në selinë qendrore të NATO-s, Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, Donika Gërvalla e ka nisur me takimin me Ndihmës- Sekretarin e Përgjithshëm të NATO-s për Çështje Politike dhe Politika të Sigurisë, Ambasadorin z. Boris Ruge si dhe zv. Ndihmës Sekretaren e Përgjithshme për Operacione në NATO, Burcu San.

Ministrja Gërvalla shprehu falënderimin e saj ndaj NATO-s dhe strukturave të saj civile dhe ushtarake për mbështetjen e vazhdueshme për vendin tonë, duke u ndalur me theks të veçantë te bashkëpunimi ynë i shkëlqyer me KFOR-in dhe me NALT-in në Kosovë.

Duke marrë parasysh rolin që të dy drejtuesit dhe divizionet përkatëse e kanë në NATO, si shtylla me interes te veçantë, Ministrja Gërvalla theksoi edhe domosdoshmërinë e përparimit të proceseve integruese për Kosovën në NATO deri në anëtarësimin e plotë në këtë organizatë.

Ministrja Gërvalla tutje ka theksuar se Republika e Kosovës është e gatshme dhe e vendosur të fillojë dialogun dhe procesin e konkretizimit të marrëdhënieve tona, duke vënë në pah se Kosova si faktor kyç dhe i dëshmuar si kontributdhënëse për paqe dhe siguri në rajon dhe përtej i ka përqafuar vlerat euroatlantike, të cilat i ndan me aleatët, miqtë dhe partnerët e saj ndërkombëtarë.

Vëmendje e veçantë gjatë këtij takimi kanë zënë dhe aspektet politike dhe të sigurisë në Kosovë dhe rajon, duke nënvizuar obstruksionet dhe sulmet e vazhdueshme të Serbisë si dhe ndërhyrjet e vazhdueshme të influencave të huaja për destabilizim të Kosovës dhe rajonit, në veçanti asaj ruse në Ballkanin Perëndimor.

Ministri i Mbrojtjes, Ejup Maqedonci, ka njoftuar se Ushtria e Forcës së Sigurisë së Kosovës, të martën është furnizuar edhe me 15 kamionë multifunksionalë të firmës gjermane “RheinMetall”.

Siç ka theksuar ai, Qeveria kamionët i ka blerë nga Republika Federale e Gjermanisë dhe disa i kanë pranuar si donacion.

Sipas tij, këta kamionë janë ndër më modernët, multifunksional, të dizajnuar për operacione logjistike dhe taktike.

“Karakteristikat e reja të këtij kamioni të pastër ushtarak janë shumë mbresëlënëse. Falë sistemeve të ndryshme të asistencës, HX2 u ofron ushtarëve dhe mjedisit civil siguri më të madhe në përdorimin e përditshëm të automjeteve dhe garanton dukshëm më shumë mbrojtje në kabinë”, ka shkruar Maqedonci në Facebook.

Ai ka thënë se menaxhimi i flotës në këta kamionë gjithashtu bëhet më i thjeshtë dhe më efikas, ndërsa konfigurimi i përgjithshëm mundëson transportimin e municioneve në terrene të vështira.

“Forca e Sigurisë së Kosovës çdoherë e më e pajisur për të garantuar përmbushjen e misionit të saj kushtetues”, ka shkruar ministri Maqedonci.

Me 8 vota për dhe asnjë kundër Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit ka votuar Projektligjin për ratifikimin e marrëveshjes për pjesëmarrjen e Kosovës në programin e Bashkimit Evropian “Drejtësia”, raporton Ekonomia Online.

Për këtë pikë ka raportuar ministra e Drejtësisë Albulena Haxhiu, e cila tha ky program do ta forcoj demokracinë, lirit dhe të drejtat e njeriut.

“Së pari pjesëmarrja ka mundësuar që Kosova të përfitoj nga projekt e BE. Programi përfshin në avancimin e bashkpunikt gjyqësor ne çështje civile dhe çështje e tjera penale. Programi përfshin trajnime për gjyqatrët, po ashtu adreson forcimin e demokracisë, sundimin e ligjit dhe te drejtat themelore. Programi parasheh mbështejte të shoqërisë civile”, tha ajo.

Deputeti i LDK-së Driton Selmanaj, ka kërkuar nga ministrja që deputete të kenë të plotë programin e kësaj marrëveshje.

Të njëjtën kërkesë ka pasur edhe deputeti i AAK-së, Besnik Tahiri.

“Nuk e dimë cili është benefiti i drejtpërdrejt i kësaj marrëveshje, nuk kemi informata. Të vetëm informatë që kemi, janë ato që i dhatë ju. Na nuk po e dimë cili është kontributi i BE-së për me e dhënë votën”.

E ministrja tha se informatat do t’i marrin shumë shpejtë, veçse sugjeroi që informatat të  merren edhe në Google.

“Pajtohem që të jap informacione të tjera, por me një kërkim të thjeshtë në google. Secili shtet që e ka këtë program përfiton në aspektet të cilat unë i përmenda. Secili shtet e ka nënshkruar në këtë format që e kemi nënshkruar edhe ne. Nuk mund të ju jap sot të dhënat financiare që Kosova mund të përfitoj. Është e rëndësishme që Kosova ta ketë këtë marrëveshje”, tha tutje ajo.

Kjo marrëveshje u votua edhe nga deputet e LDK e AAK-së.

Ka vdekur sot në moshën 83-vjeçare gazetari dhe shkrimtari Bajram Sefaj.

Asociacioni i Gazetarëve të Kosovës (AGK) ka shprehur ngushëllime për ndarjen nga jeta të ish-gazetarit shumëvjeçar të “Rilindjes”.

“Asociacioni i Gazetarëve të Kosovës me pikëllim ka pranuar lajmin për vdekjen e gazetarit njëherësh shkrimtarit, Bajram Sefaj. Ai për shumë vite ka punuar si gazetar në gazetën Rilindja, por që ka qenë edhe korrespodent për disa media ndërkombëtare”.“Krahas gazetarisë, ai është marrë edhe me krijimtari letrare, dhe është autor i disa veprave letrare në tregime, prozë, poezi e publicistikë”.“Sefaj ka vdekur në moshën 83-vjeçare, siç njoftojnë familjarët pas një sëmundjeje. AGK-ja, i shpreh ngushëllime familjes, miqve dhe komunitetit”, thuhet në njoftim.

Komuna e Vushtrrisë dhe Ministria e Zhvillimit Rajonal, kanë nënshkruar marrëveshje bashkëpunimi në vlerë prej 329 mijë euro. Projekti do jetë shëtitorja afër “Urës së Gurit” në komunën e Vushtrrisë, raporton Ekonomia Online.

Nënshkrimi u bë ndërmjet kryetarit Ferit Idrizi dhe ministrit Fikrim Damka.

Kryetari Idrizi u shpreh i lumtur për arritjen e kësaj marrëveshjes për të cilën tha se arrin vlerën prej 329 mijë euro.

Ndërkaq ministri i Zhvillimit Rajonal, Fikrim Damka tha se kjo është hera e dytë që kjo ministri bashkëpunon me komunën e Vushtrrisë, duke thënë se është i lumtur për arritjen e kësaj marrëveshje që do ndihmoj në zhvillimin më të mirë të komunës së Vushtrrisë.

Damka shtoi se dikasteri i tij është e fokusuar në bashkëpunimet me qeverisjet lokale.

Presidentja Vjosa Osmani, sot ka pritur në takim lamtumirës ambasadorin jorezident të Bangladeshit, Mosharraf Hossain Bhuiyan, të cilin e ka falënderuar për angazhimin gjatë mandatit të tij.

Presidentja Osmani shprehu mirënjohjen e përzemërt për angazhimin e palëkundur të Bangladeshit për thellimin e marrëdhënieve dypalëshe me Kosovën dhe mbështetjen e vazhdueshme ndër vite.

Në këtë linjë, Presidentja Osmani shtroi nevojën e mbështetjes nga Bangladeshit për forcimin e pozitës së Kosovës në arenën ndërkombëtare.Në takim u diskutua edhe për mundësitë e shkëlqyera për nxitjen e mëtejme të marrëdhënieve ekonomike dhe tregtare, me theks të veçantë në industrinë e tekstilit, e cila është e zhvilluar në Bangladesh.

Në këtë kontekst, u diskutua edhe për mundësinë e organizimit të një forumi të përbashkët ekonomik si një mundësi e shkëlqyer për bizneset nga të dyja vendet për t`i eksploruar perspektivat e bashkëpunimit në të ardhmen.

Presidentja Osmani, në këtë takim, e ka njoftuar ambasadorin Bhuiyan edhe për edicionin e dytë të Forumit për Gratë, Paqen dhe Sigurinë, i cili do të mbahet më 15-16 prill të këtij viti dhe i cili është një mundësi e mirë për bashkëpunim dhe dialog të mëtejshëm.

Policia në Gjilan ka njoftuar se ka realizuar një operacion kontrolli në shtëpinë dhe objektet përcjellëse të dyshuarit A.Sh, 23 vjeçar, në kuadër të hetimit të rastit “Shkaktim i rrezikut të përgjithshëm” që ka ndodhur më 10 mars.

Gjatë kontrollit janë gjetur dhe konfiskuar 1 kilogram e 154 gramë substancë narkotike e llojit marihuanë.

Ai është arrestuar dhe është ndaluar për 48 orë.

“Njësiti i hetimeve të Stacionit Policor Gjilan, me datën 12.03.2024 në koordinim dhe leje të Prokurorisë Themelore në Gjilan, në kuadër të hetimit të rastit ‘’Shkaktim i rrezikut të përgjithshëm’’ i datës 10.03.2024 ka realizuar një operacion kontrolli në shtëpinë dhe objektet përcjellëse të të dyshuarit A.Sh. (viti i lindjes 2001, mashkull kosovar shqiptar) nga Gjilani. Gjatë kontrollit janë gjetur dhe konfiskuar 1 kilogram e 154.6 gramë substancë e dyshuar narkotike e llojit marihuanë, e cilat do të përdoren në cilësi të provave materiale për gjykatën. I dyshuari është arrestuar dhe me vendim të prokurorit të shtetit i është caktuar masa e ndalimit prej 48 orëve, ndërsa konform kompetencave lëndore rasti i referohet njësisë për hetim të narkotikëve në rajonin e Gjilanit.”, thuhet në njoftimin e Policisë.

Pesë persona, përfshirë tre fëmijë, vdiqën në perëndim të shtetit Illinois të ShBA-së, kur një autobus i nxënësve dhe një kamion u përplasën mes vete në një autostradë të hënën, thanë autoritetet.

Autobusi ishte duke udhëtuar drejt lindjes, kur e kaloi vijën e mesit në rrugën “Route 24” dhe doli në shiritat me kah të kundërt “për arsye të panjohur” dhe në vijën e kamionit që po transportonte rërë, tha zyrtari policor, Jody Huffman, në një konferencë për gazetarë.

Të dyja automjetet u kapluan nga zjarri pas përplasjes. Aksidenti ndodhi rreth orës 11:30 paradite në Rushville, rreth 95 kilometra në perëndim të qytetit Springfield, raporton agjencia “Associated Press”.

Të gjithë personat që ndodheshin në autobus – tre fëmijë dhe vozitësi – si dhe vozitësi i kamionit mbetën të vdekur.

“Nuk ka vërtet fjalë në këtë kohë që mund të thuhen. Kur keni humbje jete si kjo, është shkatërruese” – tha zyrtari policor në distriktin Schuyler, Bill Redshaw.

Shkaktari i aksidentit mbeti duke u hetuar të hënën pasdite.

Në Komisionin për arsim shkencë, teknologji, inovacion, kulturë, rini dhe sport ku është diskutuar për gjendjen e edukimit fizik, shëndetësor dhe sportiv të nxënësve në shkollat e të gjitha niveleve, përfaqësues të Fakultetit të Edukimit Fizik kanë kërkuar që të rritet numri i orëve në shkolla për lëndën e edukimit fizik.

Kjo sipas tyre është e nevojshme për shëndetin fizik dhe po ashtu në aspektin mendor të fëmijëve.

Aktualisht në Kosovë janë 2 orë në javë edukim fizik, ndërsa është thënë se në Kroaci i kanë 5 orë në javë.

Mungesa e aktivitetit të mjaftueshëm fizik dhe përdorimi i teknologjisë, sipas përfaqësuesve të Fakultetit të Edukimit Fizik, po ndikojnë në obezitetin e fëmijëve dhe po ashtu problemet tjera shëndetësore.

Musa Selimi, Dekan i Fakultetit të Edukimit Fizik dhe Sportit në UP, tha se situat e fëimjeve në këtë cështje është kritike dhe duhet të ndërmerren masa.

Ai tha se nga parametrat e matura gjendja tek fëmijët është shqetësuese.

Ai tha se dy orë edukatë fizike në javë në shkolla janë të pamjaftueshme dhe se orët në shkolla duhet të shtohen. Ai shtoi se nevojiten rreth 60 minuta në ditë aktivitet fizik për fëmijët.

“Arsyet pse kemi kërkuar këtë takim është nevoja që të ndryshojmë gjendjen kritike tek fëmijët tanë në edukim dhe sport. Ne parametra që kemi matur kemi ardhur ne përfundim që me vendin e rajoni jemi shumë larg. Në hulumtimin e fundit del që 40 për qind e përfomancën fizike, fëmijët tanë janë më pak të zhvilluar se të tjerët në rajon. Mendoj se është një situatë kritike. Kemi realizuar edhe një projekt nga ambasada amerikane dhe te dhënat na dërgojnë në një situatë kritike. Ne kemi ardhur që këtë hall që ka vite që e diskutojmë në mënyra të ndryshme në vend e takime të ndryshme por kemi hasur në vesh të shurdhër”, tha ai.