Category: Lajme

Me 22 vota për dhe tetë abstenime, Fehmi Kupina është zgjedhur kryesues i Kuvendit Komunal të Prishtinës.

Votimi për zgjedhjen e kryesuesit u bë në rundin e tretë, pas dy dështimeve.

Ish-boksieri Besar Nimani është varrosur të enjten, pasi u vra të shtunën e kaluar në Bielefeld të Gjermanisë.

“Qindra shqiptarë të pranishëm në varrimin e boksierit Besar Nimani, i vrarë javën e kaluar në Bielefeld të Gjermanisë”, ka shkruar gazetari Arlind Sadiku.

Ai është varrosur në varrezat e myslimanëve në “Sennefriedhof”.

Përndryshe, policia gjermane ka nisur një operacion të madh për kapjen e të dyshuarve. Autoritetet kanë kërkuar ndihmë edhe nga qytetarët për arrestimin e autorëve. Bëhet fjalë për dy 33-vjeçarë, Ayman Dawoud Kirit dhe Hüseyin Akkurt.

Një ditë pas vendimit të Qeverisë për tokat e Manastirit të Deçanit, Emisari i Shteteve të Bashkuara të Amerikës, Gabriel Escobar, ka shkuar atje për vizitë.

Ai dje është takuar me Presidenten Osmani dhe krerët e opozitës.

Gabriel Escobar e ka vizituar sot edhe Manastirin e Deçanit.

Në ora 15:30, Escobar do të takohet me Kurtin në objektin e Qeverisë së Kosovës.

Deputet e Lëvizjes Vetëvendosje kanë lëshuar seancën e jashtëzakonshme, në të cilën po shqyrtohej Propozim-rezoluta për numrin e madh të kontratave njëburimore të nënshkruara gjatë mandatit të Qeverisë Kurti, raporton EO.

Shefja e Grupit Parlamentar të Vetëvendosjes, Mimoza Kusari-Lila, tha se grupi i saj ka vendosur që të lëshojë sallën e Kuvendit në seancën e thirrur nga opozita për kontratat njëburimore.

Ajo tha se seanca e ka humbur kuptimin e saj dhe kaloi në sharje e ofendime, duke iu drejtuar opozitës se nëse kanë fakte për hajni t’i dërgojnë në organet përgjegjëse.

Lëvizja Vetëvendosje po i konsideron false akuzat e opozitës për numrin e madh të kontratave njëburimore të nënshkruara gjatë mandatit të qeverisë Kurti.

Deputetja e mazhorancës, Arta Bajralia, tha se ka dhjetë muaj që raporti i auditimit për kontratat njëburimore është publik, derisa opozita ka thirrur seancë të jashtëzakonshme për këtë sot, në vend se të ketë seancë të rregullt dhe të votohen marrëveshjet ndërkombëtare.

“Ka dhjetë muaj që raporti është publik dhe nuk është thënë asnjë fjalë në lidhje me të dhe tani po e trajtojmë me një seancë të jashtëzakonshme, një raport që do të vinte gjithsesi në seancë të rregullt. Se kuptoj se ku është relevanca e kësaj seance dhe opozitë bërjes tuaj. Në vend që të kemi seancë të rregullt ku i trajtojmë dhe votojmë marrëveshjet ndërkombëtare, ku po presin 1 vit pa u votuar, ligjet dhe çështjet të tjera, por ju e keni te kauzat false të cilat po mundoheni t’i ndërtoni dhe të fatmirësisht nuk po iu funksionojnë”, tha ajo, në seancën e jashtëzakonshme në lidhje me kontratat njëburimore të ekzekutivit.

Sipas saj, nënshkrimi i kontratave njëburimore kanë qenë ndër vite, derisa më së shumti siç tha ajo ka pasur në vitin 2015, kur kryeministër ishte Isa Mustafa.

“Nëse e shikojmë numrin e kontratave njëburimore dhe aneks kontratave që nga viti 2008, atëherë duhet të kuptojmë se në vitin 2021 nuk ka pasur asnjë situatë të jashtëzakonshme, pasi përqindja e kontratave të negociuara në raport me të gjitha kontratat brenda vitit duke përfshirë të gjitha institucionet është 12 për qind. Ndërkaq, nëse i shohim ndër vite numri më i madh i kontratave të negociuara janë në vitin 2015, me 16 për qind, pikërisht në vitin kur zonja Bajrami ka qenë ministre e Tregtisë, ndërsa Isa Mustafa kryeministër”, theksoi ajo./kp/

Shefi i Grupit Parlamentar të Partisë Demokratike të Kosovës (PDK) Abelard Tahiri, ka deklaruar se nga hetimet që kanë bërë në shtatë institucione të vendit për dy vjet janë 220 kontrata që kapin vlerën e mbi 153 milion euro, për çfarë tha se ekzistojnë arsye të mjaftueshme që Kuvendi i Kosovës të themelojë një komision hetimor për kontratat një burimore të nënshkruara gjatë qeverisjes Kurti.

Ai poashtu ka thënë se KEK-u prin me nënshkrimin e këtyre kontratave.

“Ato që kanë qenë problematike gjatë kohës së qeverisjes Kurti janë dy lloj kontrata që janë burim i korrupsionit. Kur flasim për kontratat sekret, ne nuk dimë asgjë se çfarë ka ndodh, këtu përfshihen edhe çështja e rezervave shtetërore, blerja e armeve, e çështjeve tjera padyshim të rëndësishme, por për këto procedura nuk dimë asgjë, as vlerën e as llojin e produkteve që janë blerë. Këtu përfshihen edhe vaksinat gjatë vitit 2021, kundër COVID-19. Si GP në hulumtimi, që kemi bërë në shtatë institucione del se vlera totale për vitin 2022 dhe 2023 në këto institucione, del 153 milion e 889 mijë euro, pra janë 220 kontrata. Institucionet të cilat kanë nënshkruar këto kontrata prin KEK-u, me mbi 101 milion, pra ka nënshkruar 87 kontrata, apo më mirë me thënë nga Korporata kriminale energjetike e Kosovës… Ministria e Kulturës është më e çuditshmja, nuk e di ka kanë dalë këto 36 kontrata njëburimore në vlerë prej 2.4 milion euro, çka është dashtë të bëhet… Poashtu MPB i ka mbi 21 milion, pra 20 kontrata për dy vite”, ka theksuar Tahiri.

Në seancën e Kuvendit ku po diskutohet për tenderët njëburimor, Tahiri ka thënë se me aq sa kanë parë gjatë hulumtimit ka material të mjaftueshëm për prokurori.

“Në total për dy vjet kapin shumë mbi 153 milionë apo 220 kontrata. I përmenda vetëm shtatë institucione dhe kjo është më se e qartë që kemi një arsyeshmëri të mjaftueshme që ta nisim një komision hetimor për ta bërë një hetim për këto kontrata… Me aq sa kemi parë në hulumtimin tonë ka material të mjaftueshëm për prokurori. Hetimi parlamentar do t’i procedojë në prokurori të gjitha ato kontrata që shohim që ka arsyeshmëri të mjaftueshme, që ka elemente penale”, shtoi Tahiri.

Deputetja nga radhët e Lidhjes Demokratike të Kosovës (LDK), Hykmete Bajrami ka akuzuar qeverinë për nënshkrimin e mbi 1 mijë 800 kontratave njëburimore në vlerë prej mbi 240 milionë euro. Sipas saj, rreth një e treta e buxhetit të shtetit, shpenzohen përmes prokurimit publik.

Në seancën e jashtëzakonshme të Kuvendit, ku po diskutohet përshqyrtim Propozim-rezolutës për numrin e madh të kontratave njëburimore të nënshkruara gjatë mandatit të Qeverisë Kurti, deputetja Bajrami ka thënë se kjo qeveri e ka dëmtuar buxhetin e shtetit me këto kontrata.

“Sipas Komisionit Rregullativ të Prokurimit Publik gjatë këtij mandati qeverisës janë nënshkruar mbi 1 mijë 800 kontrata njëburimore në vlerë prej mbi 240 milionë euro. Rreth një e treta e buxhetit të shtetit, taksave dhe tatimeve që ju paguani në vendin tonë shpenzohen përmes prokurimit publik. Shpenzime këto që në vazhdimësi janë në rritje. Ligji i prokurimit publik, ky që është në fuqi me gjithë të metat që ka, bazohet në parimet e ekonomisë së tregut, efikasitetit, trajtimit të barabartë, jo diskriminimit, qëllimi tij është që të sigurojë mënyrë më transparente të shfrytëzimit të fondeve publike nga ana e institucioneve kontraktuese. Buxheti i shtetit dëmtohet me kontrata njëburimore sepse nuk merret vlerë për para, projekti kushton më shumë dhe kualiteti ka mundësi të mos jetë më i mirë. Për më tepër kjo është ndërhyrje e shtetit në ekonominë e tregut dhe ndikon në deformimin e konkurrencës së drejtë, e mbi të gjitha këto kontrata janë burim i korrupsionit…1803 kontrata, dhe kjo listë nuk është e plotë, sepse këtu nuk figuro fare tenderi për rezerva shtetërore i MINT prej 10 milion euro”, tha Bajrami.

Duke folur për kontratat njëburimore, ajo tha se Raporti për vendin i Komisionit Evropian ka treguar se në vitin 2022 janë nënshkruar gjithsej 10 mijë e 290 kontrata në vlerë prej 559 milionëve, për çfarë tha se një pjesë e konsiderueshme 20.8 për qind thuhet që janë dhënë përmes procedurave të negociuara pa publikim të kontratës, rreth 78 milionë euro.

“Kontratat me negocim të drejtpërdrejt edhe pse të lejuara në ligjin e prokurimit publik në kushte shumë specifike të përcaktuara në ligj gjatë këtij mandati po dalin që të jenë metodë e abuzimit me paranë publike dhe dëmtim i rënë i konkurrencës së drejtë në treg… Raporti për vendin i Komisionit Evropian, ky i fundit na jep statistika alarmante, dhe thotë që tregu i prokurimeve publike në Kosovë në vitin 2022 ishte 6.5 për qind e GDP-së. Sipas këtij raporti në vitin 2022 janë nënshkruar gjithsej 10 mijë e 290 kontrata në vlerë prej 559 milionëve. Një pjesë e konsiderueshme 20.8 për qind thuhet që janë dhënë përmes procedurave të negociauara pa publikim të kontratës, rreth 78 milionë euro”, shtoi ajo.

Ndërsa, ka thënë se në mesin e abuzueseve prin KEK-u me 43 milionë euro.

“Në mesin e abuzueseve prin KEK-u, e cila prej 340 milionëve ka 102 milionë kontrata të negociuara, janë gjithsej 112 kontrata. KEK-u ka negociuar 13 kontrata me të njëjtën kompani në vlerë prej 5.6 milionë euro me një kompani. Janë 43 milion euro të dhëna me kontrata të negociuara. E kemi Telekomin e Kosovës me 28 kontrata dhe 21 milionë kem mandej Shërbimin Klinik Spitalor të Kosovës me 52 kontrata, 3.5 milionë, Ministrinë e Arsimit me 41 kontrata, 10.2 milionë. Ne e dimë që ju nuk keni punuar asgjë, nuk keni arritur të përmbushni asnjë prej premtimeve, por janë edhe 881 milionë euro që kjo qeveri taksa dhe tatime e qytetarëve i ka dhënë me vendime të qeverisë dhe këto janë skema të abuzimit publik e korrupsionit që keni tentuar të blini paqe dhe të mirëmbani votën”, ka thënë ajo.

Vizitën në selinë e NATO-s, zëvendëskryeministrja Donika Gërvalla e përmbylli me një takim të posaçëm në një darkë pune me të gjithë Përfaqësuesit e Përhershëm të shteteve të rajonit, anëtarë të NATO-s, ku u rikonfirmua mbështetja për Kosovën, thuhet në komunikatën media.

Gërvalla shprehu mirënjohjen e thellë për mbështetjen e parezervë të gjithë Përfaqësuesve të Përhershëm të shteteve të rajonit në NATO për Kosovën në rrugën e saj euroatlantike.

Sipas komunikatës, Gërvalla ka ritheksuar përkushtimin dhe progresin e arritur në shumë fusha dhe angazhimin e palëkundur të Republikës së Kosovës për të ardhmen euroatlantike si dhe avancimin sa më të shpejtë të anëtarësimit tonë në NATO.

“Republika e Kosovës është dëshmuar në vazhdimësi si një partner i besueshëm dhe i rreshtuar krah aleatëve dhe partnerëve në NATO dhe Bashkimin Evropian, për paqen dhe sigurinë në rajon dhe Evropë”, tha Gërvalla.

Gërvalla tutje ka informuar përfaqësuesit e pranishëm rreth obstruksioneve, sulmeve dhe kërcënimeve të vazhdueshme të Serbisë kundër Kosovës, por edhe kundër paqes dhe stabilitetit në rajon dhe Evropë.

Në këtë takim të përbashkët, ku u takuan me Përfaqësuesit e Përhershëm të shteteve të rajonit, anëtarë të NATO-s, të Kroacisë, ambasadorin Mario Nobilo, të Turqisë, ambasadorin Zeki Levent Gumrukcu, të Sllovenisë, ambasadorin Andrej Benedejcic, të Bullgarisë, ambasadorin Nikolay Milkov, të Shqipërisë, ambasadorin Ilir Gjoni, të Maqedonisë së Veriut, ambasadorin Dane Taleski, të Greqisë, ambasadorin Ioannis Miltiadis Nicolaidis, dhe të Malit të Zi, u.d Maja Djurdjic, Gërvalla shoqërohej nga përfaqësuesi i Republikës së Kosovës për marrëdhëniet me NATO-n, ambasadori Astrit Zemaj dhe ambasadori i Republikës së Kosovës në Belgjikë, Luksemburg dhe Bashkimin Evropian, Agron Bajrami.

Kryetari i Lidhjes Demokratike të Kosovës, Lumir Abdixhiku, ka thënë se vendimet e Gjykatës Kushtetuese janë të pakontestuara dhe janë të zbatueshme.

Ai ka thënë se kryeministri Albin Kurti ka zgjedhur me vetëdije të plotë që në kauza të tilla të rrejshme të ndërtoj bazën për ardhjen në pushtet, por sipas tij, pas ardhjes në pushtet ka kuptuar se kauzat e rrejshme nuk qëndrojnë.

“Tani vendimet e Gjykatës Kushtetuese janë të pakontestuara dhe kur them të pa kontestueshëm nënkupton që edhe ato edhe janë të zbatueshme. Është shenjë e pjekurisë demokratike fillimisht për një shtet dhe shoqëri dhe ky ka qenë qëndrimi ynë i gjithhershme si LDK. Fatkeqësisht Kurti ka zgjedhur me vetëdije të plotë që në kauza të tilla të rrejshme të ndërtoj bazën për ardhjen në pushtet dhe tani në pushtet ka kuptuar se kauzat e rrejshme nuk qëndrojnë por gjithsesi ato janë të dëmshme. Pra ka ardhe në pushte me kauza të rrejshëm është pasoj e madhe për vendin, për stabilitetin politik e demokratik”, ka thënë ai.

Abdixhiku sa i përket takimit të mbrëmshme me Emisarin e ShBA-së për Ballkanin Perëndimor, Gabriel Escobar, ka thënë se në atë takim janë informuar për relacionet bilaterale mesë Kosovës dhe Serbisë.

Sipas tij, në atë takim u bë e qartë se marrëdhëniet mes SHBA-së dhe Kosovës nuk kanë qenë as një herë në nivel më të ulët se sa që janë sot.

“Sa i përket takimit të mbrëmshëm, ishte një takim informues mbi relacionet bilaterale mesë Kosovës dhe SHBA, për ta thënë më thjeshtë në atë që na u tha qartë dhe zëshme nuk kanë qenë as një herë në nivel më të ulët se sa që janë sot. Mungesa e bashkëpunimit të ngushte me aleatët tanë kryesor, me SHBA sjell pasoja për integrimin euroatlantik të Kosovës dhe kjo gjendje është shqetësuese për ne. Tani Kurti përfaqëson Qeverinë e Kosovës dhe këto pasoja patjetër se barten edhe në fatin e Kosovës. Por është obligim i gjithë nesh që të ruajmë dhe kultivojmë këto relacione se janë të domosdoshme janë të pa zëvendësueshme”, u shpreh ai.