Category: Lajme

Një projekt i Serbisë i ashtuquajtur “Projekt 5000”, sipas Qendrës Kosovare për Studime të Sigurisë, synon t`i forcojë forcat speciale serbe, duke e rritur numrin e tyre nga 1500 në 5000. Edhe njohësit e sigurisë, këtë projekt serb e shohin si forcim të luftës së tyre hibride.

Qendra Kosovare për Studime të Sigurisë ka publikuar një raport me titull: “Çka është “Projekti 5000” i Serbisë dhe pse duhet të jemi të shqetësuar”.

Sipas raportit, nisma “Projekt 5000” synon t’i forcojë forcat speciale serbe, duke e rritur numrin e tyre nga 1500 në 5000.

Ky raport shqyrton pasojat e tij të mundshme për paqen dhe stabilitetin rajonal. Njohësit e sigurisë, këtë projekt serb po e shohin si forcim të luftës së tyre hibride.

“Ky projekt është qysh moti është biseduar pra duke u thirr në atë se duhet reformuar Forcat e Armatosura përgjithësisht Sektorin e Sigurisë, duke i bërë këto Njësi Elite të lëvizshme operacionale për ndërhyrje, e kjo qon në aludim se këtu e ka një qëllim të zhvillimit të një lufte hibride ç’farë e kishte me grupin e Radojqiqit me 24 shtator. Pra, pasi që ai nuk ka një guxim të ndërhyjë me forcat e armatosura policie, ai shumë lehtë këto Njësi Elite i shndërron, vetëm ua heq shenjat të përkatësisë qoftë ato të shtetit, apo të përkatësisë së policisë, forcave të armatosura dhe të xhandarmërisë për ndërhyrje eventuale ç’farë e paralajmëroj me kërcënimin e vetë, ngase ai nuk ka të të drejtë të ballafaqohet, nuk ka guxim të ballafaqohet me NATO-n”, tha Nuredin Ibishi, analist.

“Projektin e publikuar sot e shoh real sepse është edhe ashtu, mirëpo edhe ne e kemi cekur përpara se kërcënimet nga Serbia kanë vazhduar, vazhdojnë e do të vazhdojnë dhe në të ardhmen. Çka është më e rëndësishmja ta ceku se është Aleanca NATO, po përforcohet dita ditës në Republikën e Kosovës dhe unë në aspektin e Sigurisë nuk shoh asnjë rrezik frontal e momental nga Serbia sepse është e pamundur në faktin se Kosova ka kapacitetet e saja të plota për reagim, ka aleancën e NATO-s dhe të gjithë shtetet mike që kujdesen për sigurinë e Republikës së Kosovës. Kërcënimet nuk do të ndalen, vigjilenca nuk ka alternativ”, tha analisti Arben Dashevci.

Raporti është rezultat i hulumtimit të ekspertëve të lartë në QKSS, i cili fton të gjitha palët që t’i shqyrtojnë gjetjet e raportit dhe t’i bashkohen dialogut për promovimin e një Ballkani Perëndimor të qëndrueshëm të orientuar drejt një të ardhmeje në BE dhe në NATO.

Zëvendësguvernatorja e Bankës Qendrore të Kosovës, Nesrin Shileku-Shala, ka deklaruar se angazhimi i BQK-së në përfshirjen financiare të grave ndërmarrëse është një investim për të ardhmen. Këtë e ka bërë të ditur në konferencën “Qasja në financa për gratë ndërmarrëse”, aktivitet i përbashkët i BQK-së me Asociacionin e Institucioneve Mikrofinanciare të Kosovës, raporton Ekonomia Online.

Zëvendësguvernatorja Shileku-Shala tha se një qasje të shumanshme ndaj përfshirjes financiare, BQK-ja po kontribuon një të ardhme më të ndritshme ekonomike për qytetarët e Republikës së Kosovës.

“Banka Qendrore e Republikës së Kosovës në kuadër të mandatit të saj kushtetues e ligjor, dhe përmes strategjisë së saj është e përkushtuar që të avancoj kornizën rregullative dhe infrastrukturën mbikëqyrëse me qëllim të harmonizimit me legjislacionin dhe politikat e Bashkimit Evropian dhe mbështetjes se nismave që rrisin qasjen në financa dhe qëndrueshmërinë”, deklaroi Shileku-Shala.

Sipas Zëvendësguvernatores, arritja e përfshirjes financiare dhe qasjes në financa për gratë kërkon një përpjekje kolektive.

“Sektori financiar, sidomos bankat, institucionet mikrofinancaire por edhe institucionet financiare jo-bankare ofrojnë mundësi, si dhe produkte e shërbime te cilat ju dedikohen grave ndërmarrëse. Gratë ndërmarrëse kanë nevojë për më shumë trajnime dhe aktivitete në këtë drejtim nga akterët e sektorit financiar dhe përtej. Kontributi i institucioneve të sektorit financiar do të duhej të ishte më i madh në edukimin e grave sa i përket edukimit dhe trajnimit për shërbimet dhe mundësitë financiare që do rriste edhe portfoliot respektive të institucioneve financiare, dhe do të kontribuonte pozitivisht edhe në shëndetin e përgjithshëm financiar të sektorit”, ka shtuar ajo.

Java Ndërkombëtare e Parasë është një fushatë vjetore botërore ndërgjegjësuese, e organizuar nga Organizata për Bashkëpunim dhe Zhvillim Ekonomik (OECD), e cila ka për qëllim që përmes aktiviteteve të informoj qytetarët që në moshë të hershme dhe gradualisht të fitojnë njohuritë, aftësitë, qëndrimet dhe sjelljet e nevojshme për të marrë vendime të shëndosha financiare dhe për të arritur mirëqenien dhe qëndrueshmërinë financiare.

Investim strategjik e quajti pjesëmarrjen e grave në Qasjen në financa për gratë ndërmarrëse, Shpend Nura, përfaqësues i Asociacionit të Institucioneve Mikrofinanciare të Kosovës (AMIK).

“Ne duhet të dimë se ka endë punë për të bërë, kjo kërkon faktor social, kulturor që përjetëson barazitë gjinore inkurajomë qeverinë, organizatat e akterë tjerë të kontribuojnë në qasjen financiare”, tha ai.

Presidentja e Republikës së Kosovës, Vjosa Osmani, ka pritur sot në takim Ndihmës Sekretarin për Byronë Ndërkombëtare për Narkotikë dhe Sundim të Ligjit të SHBA-ve, Todd D. Robinson, raporton EO.

Pas këtij takimi, Robinson e Osmani do të mbajnë konferencë për media.

Policia e Kosovës njofton se për 24 orë ka shqiptuar 2396 gjoba në trafik.

Sipas policisë, gjatë 24 orëve të fundit janë evidentuar disa aksidente në trafikun rrugor, prej të cilave 13 aksidente kanë qenë me lëndime, ndërsa 38 me dëme materiale.

Tutje, Policia bëri të ditur se gjatë kësaj kohe janë arrestuar 12 persona, 2 të tjerë janë dërguar në mbajtje, ndërsa dy persona në vuajtje të dënimit.

Policia e Kosovës ka njoftuar se një grua në Fushë Kosovë ka raportuar se pas një mosmarrëveshje verbale me bashkëshortin e saj është kërcënuar për postim të disa fotove intime.

“Ky i fundit kishte shkuar te familja e saj (në Ferizaj) dhe i kishte thënë se do ia postoj disa fotografi të papërshtatshme-intime të saj”, thuhet në raport të policisë.

Në njoftim është bërë me dije se palët pasi janë intervistuar dhe me vendim të prokurorit, janë liruar në procedurë të rregullt.

Një person në fshatin Grabovc të Zveçanit ka raportuar në polici se persona të panjohur kanë depërtuar me forcë përmes dritares në objektin e tij prej ku kanë vjedhur 350 euro para të gatshme si dhe DWR-në e kamerave në vlerë rreth 150 euro.

“Nuk raportohet për të arrestuar”, thuhet në raportin e policisë derisa rasti është në hetime.

Policia e Kosovës ka njoftuar se pas disa të shtënave me armë zjarri nga dy persona në fshatin Zjaq më Mitrovicë, në vendin e ngjarjes kanë gjetur dhe konfiskuar 91 copë gëzhoja.

Sipas policisë, njëri nga të dyshuarit është arrestuar dhe me vendim të prokurorit është liruar, ndërsa i dyshuari tjetër sipas policisë gjendet në arrati.

“Rasti në procedurë hetimore”, thuhet në raport të policisë.

Policia e Kosovës ka njoftuar se ka arrestuar një burrë nga Lipjani, pasi dyshohet se ka rrahur dy vajzat e tij të mitura.

Rasti ka ndodhur të mërkurën dhe është cilësuar si keqtrajtim apo braktisje e fëmijës.

“Është arrestuar i dyshuari mashkull kosovar nën dyshimin se i njëjti kishte rrahur dy vajzat e tij të mitura. Viktimat janë intervistuar në prezencë të punëtorit të Qendrës për Punë Sociale, ndërsa i dyshuari pas intervistimit me vendim të prokurorit, është dërguar në mbajtje”, thuhet në raportin e Policisë.

21 marsi që nga viti 1999, është shpallur nga UNESCO dita botërore e poezisë. Vendimi i marrë në kongresin e 30-të të kësaj agjencie, ka si objektiv kryesor mbështetjen e diversitetit linguistik përmes shprehjes poetike.

Në të njëjtën kohë, caktimi i një dite ndërkombëtare për poezinë është bërë edhe me qëllimin për t’i kthyer kësaj gjinie të letërsisë funksionin e saj të parë, traditën gojore.

Ndërsa në kohët antike, në Greqinë e lashta poemat e Homerit mësoheshin përmendësh nga aedët dhe recitoheshin kryesisht në ambiente publike tashmë duket se poezisë i ka humbur ky tipar i vet kryesor. Në këtë mënyrë UNESCO kërkon që përmes recitaleve të ndryshme, përmes takimeve poetike dhe mbrëmjeve artistike të krijojë një urë lidhjeje mes poezisë dhe formave të tjera të artit si teatri, kërcimi, muzika, piktura etj. e në të njëjtën kohë të mbështesë poetët e rinj, t’i promovojë ato dhe të krijojë një imazh tërheqës për poetin, që shpeshherë shihet si dikush që nuk është më në modë.

Dita botërore e poezisë është konceptuar si një ftesë për të reflektuar mbi fuqinë e gjuhës dhe zhvillimin e plotë të kapaciteteve kreative të secilit prej nesh. Për këtë arsye UNESCO bën thirrje për zhvillimin e aktiviteteve kulturore në nivel lokal e ndërkombëtar në institucione publike e private duke përfshirë këtu shkolla, bashki, muze, shoqata kulturore, shtëpi botuese etj. Para caktimit të 21 marsit, si dita botërore e poezisë, ishte 15 tetori që kremtohej në të gjithë botën me aktivitete të larmishme letrare, pasi ai përkonte me ditëlindjen e poetit epik romak, Virgjili. Në disa vende kjo traditë e të festuarit në muajin tetor vazhdon të ruhet ende.

Megjithëse shumë prej nesh e pëlqejnë poezinë, ose më mirë parapëlqejnë ta përdorin atë sidomos në komunikimin me personin e zemrës, poezia në ditët tona nuk lexohet më aq shumë sa vite më parë.

Nëse do t’i hidhnim një sy librave të hedhura në treg nga shtëpitë botuese volumi më i madh i veprave i përket romanit, pra prozës, ndërkohë që librat me poezi janë shumë më të rrallë. Kryesisht ato në masën më të madhe i përkasin letrarëve të rinj, që gjithnjë e nisin rrugën e letrave me vjershat e para të shkruara në kohën e adoleshencës. Nuk mungojnë edhe botimet nga emra tashmë të njohur në këtë lëmë, por që janë gjithnjë e më të pakta.