Category: Lajme

Prezencën e njësive të specializuara të ushtrisë serbe në afërsi të kufirit të Kosovës, përkatësisht në afërsi të fshatit Banje të Zubin Potokut, kryeministri i Kosovës, Albin Kurti e ka konsideruar pretekst nga ana e Serbisë për të shkaktuar provokime të qëllimshme. Lidhur me këtë, drejtori i Institutit Octapus, Agim Musliu ka deklaruar se veprimet e tilla provokojnë reagimet e palës së Kosovës. Ai tha se institucionet shtetërore të Kosovës duhet të ngritin kapacitetet e nevojshme për siguri të Kosovës.

Muslia ka përmendur edhe deklaratën e fundit të presidentit të Serbisë, Vuçiqit për të cilën tha se duhet të konsiderohet si një paralajmërim për situata të tilla. Sipas tij, Serbia do të vazhdojë të inskenojë incidente të ndryshme për të nxitur reagim, por se asnjëherë nuk guxon të ndërhyjë ushtarakisht sepse vet ajo e di që KFOR-i dhe NATO janë në Kosovë.

Eksperti i sigurisë, Musliu thekson se Republika e Serbisë është e përgatitur edhe me stërvitje ushtarake, të cilat janë të dedikuara për Kosovën.

“Në vazhdën e luftës së Serbisë, respektivisht të Rusisë në Ballkan, kjo është një lëvizje e radhës, një provokim i radhës edhe pse marrëveshjet ndërkombëtare që nga Kumanova e tutje e thonë të kundërtën që ushtria apo policia serbe nuk guxon të afrohet në kufi të Republikës së Kosovës dhe të zhvillojë patrullime apo çfarëdo aktiviteti tjetër policorë. Sidomos kjo stërvitje dhe në afërsi të kufirit me Kosovën dhe veprimet operative të cilat mund të rrezikojnë edhe qetësin edhe sigurinë e Republikës së Kosovës. Ne mund të shohim këtë si provokim i radhës, sepse siç e dimë Republika e Serbisë ka vendosur rreth 48 baza rreth kufirit të Kosovës ushtarako-policore e herë pas herë edhe në stërvitje ushtarake të cilët janë të përpiluara ekskluzivisht vetëm për Kosovën, një agresion i heshtur i padeklaruar në krahasim me Kosovën. Kjo i paraprin edhe deklarata e presidentit të Serbisë, Vuçiqit, i cili ditë më parë tha që “Ne do e presim momentin e volitshëm që të reagojmë”, dhe kjo lënë të nënkuptohet se e presim momentin e caktuar që të kthehen në Kosovë me forcë, me ushtri, polici dhe me instrumentin e dhunës që e posedojnë”, tha Musliu.

Po ashtu, Musliu shtoi se institucionet shtetërore të Kosovës duhet të ngritin kapacitete me pajisje ushtarake dhe teknike, si dhe duhet të përdoret një diplomaci agresive dhe faktike ndaj veprimeve serbe dhe ruse, kundrejt Kosovës.

“Sidomos në Kosovë ku mund të parashohim në një fazë, ndoshta edhe në një kohë të pacaktuar por afër mund të përdoret elementi i brendshëm i Serbëve të Kosovës që të nxitet një konflikt i vogël apo të inskenohet incidente të ndryshme ku do të marrin pjesë serbët lokal të ndihmuar edhe tendencën e fundit në Banjskën e 24 shtatorit nga njerëzit të stërvitur apo pjesëtarë të organizatave terroriste nga Serbia. 05:11 Unë nuk besoj që Serbia do të ndërhyjë ushtarakisht sepse e di që KFOR-i dhe NATO janë në Kosovë dhe nuk do të konfrontohet edhe me NATO-në, por muajve të fundit është një kampanjë kundër NATO-së prej Serbisë dhe Rusisë. 06:13 Mund të përdoret diçka e ngjashme, mund të inskenojnë incidente të ndryshme, për atë arsyeje institucionet e Kosovës nuk guxojnë të neglizhojnë por të punojnë në preventimin e këtyre veprimeve. ….Në aspektin e brendshëm duhet të ngritin kapacitetet e nevojshme për siguri të Kosovës dhe të sofistikohen më tutje dhe në teknike dhe pajisje. Duhet edhe një diplomaci më agresive jashtë kufijve të Kosovës për t’i bindur ose faktuar qendrat e vendimmarrjes që Serbia dhe Rusia vazhdojnë luftën hibride ndaj Kosovës dhe ato duhet të faktohen”, thekoi Musliu.

Kryeministri i Kosovës, Kurti ka shkruar në Facebook se ky afrim i automjeteve të tyre ushtarake në kufirin e Kosovë, nuk është normal dhe se të njëjtit po vëzhgohen nëse do të përpiqen të kalojnë atë.

Kryetari i Bordit të Zyrës së Rregullatorit të Energjisë (ZRrE), Ymer Fejzullahu ka deklaruar se nuk kanë pranuar propozimin e KEK-ut për rritjen e tarifave, por që nuk tregoi nëse do të ketë rritje ose jo.

“Çmimi i KEK-ut për rritje nuk është marrë parasysh. ZRRE ka marrë çmimin aktual të gjenerimit. Të hyrat e operatorëve në vlerë prej 399.6 milionë euro do të përfshihen në tarifat e konsumatorëve. Ne jemi duke i shqyrtuar propozimet e operatorëve dhe pastaj do të vendosim”, tha ai.

Faturat e rrymës në Kosovë mund të shtrenjtohen edhe këtë vit, KEK konfirmon se ka propozuar rritje

 

Ambasadori i Shteteve të Bashkuara të Amerikës në Prishtinë, Jeffrey Hovenier, ka kërkuar sot nga Kosova të zbatojë të gjitha zotimet që i ka marrë në kuadër të dialogut, pasi sipas tij, kjo është rruga e vetme për integrim në institucionet evropiane dhe euro-atlantike.

Diplomati amerikan në konferencën me temën “Hartimi i Rrugës së Kosovës: 25 vjet pas operacionit të Forcave Aleate dhe Kërkimit për Anëtarësim në NATO” të organizuar nga Këshilli i Ambasadorëve të Kosovës, theksoi se pret nga Qeveria e Kosovës të punojë në partneritet me SHBA-në.

“Për Kosovën, siç e dini mirë të gjithë, urgjenca e integrimit evropian dhe euroatlantik është e qartë, është mjeti për të garantuar sigurinë, prosperitetin, liritë demokratike që dëshironi për fëmijët dhe nipërit tuaj. Është gjithashtu thelbësore për të avancuar stabilitetin e sigurisë në rajon. Por në këtë kontekst më duhet gjithashtu të përsëris atë që unë dhe zyrtarë të tjerë amerikanë kemi thënë vazhdimisht. Rruga e vetme, dhe me e vetmja, nënkuptoj e vetmja rrugë për integrimin e Kosovës në institucionet evropiane dhe euroatlantike është përmes dialogut të lehtësuar nga BE-ja. Nuk ka rrugë tjetër. Dhe konkretisht mirëbesimi dhe zbatimi i plotë i të gjitha zotimeve që ka marrë Kosova në kuadër të dialogut. Kjo nuk është e negociueshme”, tha ai.

Ai potencoi se populli amerikan ka qenë dhe është krenar të qëndrojë krah për krah me popullin e Kosovës.

“Ne presim nga kjo qeveri e Kosovës, ashtu siç kemi pritur nga qeveritë e mëparshme të Kosovës, të punojnë në partneritet me ne, ndërsa ne vazhdojmë në përpjekjet tona për të ndërtuar një rajon të qëndrueshëm, të begatë, multietnik dhe të sigurt të Ballkanit Perëndimor. Dhe gati 25 vjet më parë, ose 25 vjet që nga operacioni i forcave aleate në çlirimin e Kosovës, populli i Shteteve të Bashkuara është, ka qenë dhe do të jetë krenar të qëndrojë krah për krah me popullin e Kosovës ashtu siç keni ndërtuar, po ndërtoni dhe vazhdoni të ndërtoni nga themeli një demokraci sovrane të pavarur multietnike. Ne jemi po aq të përkushtuar sa kemi qenë ndonjëherë në partneritet me ju, për të siguruar që çdo individ në Kosovë të mund të jetojë në kushte dinjiteti, lirie dhe sigurie pa marrë parasysh përkatësinë etnike apo rrethanat”, tha Hovenier.

Sa i përket anëtarësimit në NATO, Hovenier tha se rruga e zgjerimit është të binden aleatët për atë që Kosova i sjell Aleancës Veri-Atlantike.

“Rruga drejt zgjerimit të NATO-s është të bindni aleatët për atë që i sillni Aleancës. Askush nuk hyn në NATO për shkak të së drejtës. Ju hyni në NATO sepse keni bërë reformat e nevojshme dhe keni vendosur politikat e duhura në dy sfera; ka një sferë ushtarake, a është ushtria juaj e përgatitur dhe e aftë për të përmbushur funksionet e një ushtrie të NATO-s. A jeni NATO i ndërveprueshëm dhe a jeni i aftë? Dhe ka një sferë politike. A po silleni si një aleat? A kemi të njëjtat vlera? A mund të jemi të sigurt me ju si aleat? A jemi të përgatitur të themi se të rinjtë dhe të rejat nga Varshava ose Council Bluffs, Iowa, Nju Jorku ose Roterdami janë të përgatitur të vënë jetën e tyre në linjë për t’ju mbrojtur. Unë thjesht do të them se këto janë çështje të rëndësishme me të cilat duhet të merren qeveritë. Ato kanë qenë sfiduese për qeveritë e tjera, do të jenë sfiduese për Qeverinë e Kosovës. Jam i bindur se mund të vazhdojmë ta avancojmë së bashku këtë vizion dhe së bashku të sigurojmë dinjitet dhe siguri për të gjithë popullin e Kosovës dhe për rajonin më të gjerë,” tha diplomati amerikan.

Duke folur për fushatën 78-ditore të NATO-s për të dëbuar forcat e kasapit Sllobodan Millosheviq nga Kosova dhe për t’i dhënë fund spastrimit të tyre etnik, Hovenier tha se mbeten të përkushtuar që lufta në Kosovë 25 vjet më parë të mos përsëritet kurrë.

“Dua të rikonfirmoj përkushtimin tonë për të siguruar që ngjarjet e tmerrshme që ndodhën në Kosovë 25 vjet më parë të mos përsëriten më kurrë. Ne mbetemi të përkushtuar për të mbështetur rolin e vazhdueshëm stabilizues të luajtur nga Forca e NATO-s në Kosovë. Ne e pranojmë dhe shprehim vlerësimin tonë për përkushtimin dhe sakrificat e KFOR-it këtu në Kosovë gjatë 25 vjetëve të fundit. Dhe ndërsa përkujtojmë trimërinë e atyre që qëndruan kundër spastrimit etnik, dhe atyre që vazhdojnë të ruajnë paqen sot, ne përsërisim këtë vizion të një Evrope tërësisht të lirë dhe në paqe. Ne e shohim stabilitetin dhe sigurinë në Ballkanin Perëndimor si çelësin për avancimin e këtij premtimi. Veçanërisht pas pushtimit të pamëshirshëm në shkallë të plotë të Putin në Ukrainë, ku po shohim shkatërrime dhe katastrofa të paimagjinueshme humanitare”, tha ai.

Në kuadër të këtij diskutimi ishte edhe ish-presidentja Atifete Jahjaga, e cila theksoi nevojën e anëtarësimit të Kosovës në NATO.

“Ambicia e Kosovës për anëtarësim në NATO merr një rëndësi edhe më të madhe. Shkelja flagrante e sovranitetit dhe integritetit territorial të Ukrainës nënvizon rëndësinë e sigurisë kolektive dhe nevojën për një aleancë të fortë dhe të bashkuar të NATO-s. Ndërsa Kosova ndjek ambicien e saj për anëtarësim në NATO, ne jemi të vetëdijshëm për sfidat e paraqitura nga akterët e jashtëm, që synojnë të minojnë stabilitetin në rajonin tonë…Pranimi i Kosovës në NATO jo vetëm që do të rrisë sigurinë tonë, por gjithashtu do të kontribuojë në përpjekjet më të gjera për të ruajtur paqen dhe stabilitetin në mbarë Evropën. Është e domosdoshme që të mbetemi vigjilentë, të vendosur dhe të bashkuar përballë kërcënimeve të jashtme, ndërsa përshkruajmë rrugën e Kosovës drejt një të ardhmeje më të sigurt dhe më të begatë brenda aleancës së NATO-s”, tha ajo.

Nga dhjetori 2023 deri në mars 2024, janë tërhequr nga qarkullimi dhe deponuar në BQK rreth dy milionë copë monedha prej 2 eurosh, monedha këto të deponuara nga bizneset dhe qytetarët në bankat komerciale.

Kështu ka njoftuar, Banka Qendrore e Kosovës (BQK), e cila gjithashtu ka bërë të ditur se së bashku me bankat komerciale kanë parandaluar hyrjen në sistemin financiar, duke i tërhequr nga qarkullimi rreth 47 mijë e 168 copë monedha prej 2 euro, të dyshuara si të falsifikuara.

“BQK-ja ka furnizuar ekonominë e Republikës së Kosovës përmes bankave komerciale me afër 6.75 milionë copë monedha euro plotësisht të reja të të gjitha denominimeve pa asnjë tarifë të aplikuar. Ky angazhim ka kontribuar në zvogëlimin e qarkullimit të monedhave false, ka lehtësuar identifikimin dhe ka ngritur ndërgjegjësimin e publikut për këtë çështje”, thuhet në njoftimin e BQK-së.

Ndërsa, numri i kartëmonedhave prej 500 euro të tërhequra nga qarkullimi dhe deponuara në Bankën Qendrore ka kaluar mbi 230,000 copë apo mbi 115 milionë euro.

“Në zbatim të masave rregullative, përmes Rregullores për Operacione me Para të Gatshme, sa i përket rregullimit të transportit ndërkufitar të monedhave me qëllim të parandalimit të futjes së parave të falsifikuara, personat fizikë dhe personat juridikë që nuk ushtrojnë veprimtari financiare, janë të obliguar që të bëjnë deklarimin e monedhave nëse bartin më shumë se 100 copë/njësi, pavarësisht që vlera e tyre është nën kufirin e deklarimit prej 10,000 (dhjetëmijë) euro”, thuhet në njoftim.

Instituti i Kosovës për Drejtësi, të premten, ka publikuar raportin “PRIORITETET – që vazhdojnë të mos arrihen”, duke thënë se Qeveria e Kosovës nuk e ka përmbushur planin legjislativ.

Ky raport, sipas njoftimit, është rezultat i monitorimit të drejtpërdrejt që IKD-ja i ka bërë Qeverisë së Kosovës gjatë vitit 2023. IKD-ja ka gjetur se 44 për qind e agjendës legjislative të vitit 2023 është bartje nga viti 2022.

Përqindja e ulët e përmbushjes, siç thotë IKD-ja, ka ardhur për shkak të ndryshimeve të shumta në planin legjislativ.

Përveç planit legjislativ, IKD-ja ka thënë se Qeveria ka dështuar të përmbushë planin edhe me miratimin e koncept-dokumenteve.

Mosefikasiteti i Qeverisë, siç thuhet në raportin e IKD-së, ka vazhduar edhe në Kuvend.

Instituti Demokratik i Kosovës (KDI), ka mbajtur sot konferencë për media, në të cilën janë prezantuar rezultatet e hulumtimit të opinionit publik, me theks këndvështrimet e qytetarëve të Kosovës mbi ecurinë e reformës në sektorin e drejtësisë, raporton EO.

Gjatë shpalosjes së të dhënave, Violeta Haxholli nga KDI, tha se përmes këtij sondazhi është synuar të kuptohen disa çështje, duke filluar me atë se si e shohin qytetarët qasjen e Qeverisë dhe subjekteve opozitare ndaj procesit të reformës në drejtësi, si i kanë parë vendimet e Gjykatës Kushtetuese rreth ligjeve të cilat tentojnë të reformojnë sistemin e drejtësisë dhe çfarë pritjesh kanë nga ky proces.

Në pyetjen drejtuar qytetarëve se si e vlerësojnë qasjen e Qeverisë ndaj Reformës në Drejtësi, 49% janë të mendimit se Qeveria me anë të reformës po synon fuqizimin e sundimit të ligjit, kundrejt 22% të qytetarëve që mendojnë se Qeveria me anë të reformës po synon ndërhyrjen në sektorin e drejtësisë. Ndërsa, 18% e tyre mendojnë se Qeveria po shpërfillë akterët e tjerë gjatë procesit të hartimit të ligjeve.

Kur kanë pyetur se cilat mund të jenë arsyet e subjektet opozitare për të dërguar ligjet e Reformës në Gjykatën Kushtetuese, 31% e tyre kanë thënë se opozita i ka dërguar ligjet në gjykatë për shkak të cilësisë së dobët të tyre, ndërsa 31% e tyre janë shprehur se kjo po bëhet për të shmangur mundësitë e ndërhyrjeve të Qeverisë në organet e drejtësisë. Në anën tjetër 25% e qytetarëve mendojnë se Opozita i ka dërguar ligjet në Gjykatë për shkak se ndjehet e kërcënuar nga Reforma në drejtësi, kundrejt 17% të tyre që mendojnë se me anë të këtij veprimi Opozita po pengon Reformën.

Në pyetjen se si i shohin qytetarët vendimet e Gjykatës Kushtetuese lidhur me ligjet e Reformës në Drejtësi, 54% e qytetarëve janë shprehur se aktgjykimet e Gjykatës janë të drejta, kundrejt 24% të tyre që i konsiderojnë vendimet si të padrejta. Ndërsa nuk kanë ofruar përgjigje 21% prej tyre.

Në fund, qytetarët janë pyetur edhe rreth pritjeve të tyre nga procesi i Reformës në Drejtësi, për çka 41% e tyre janë përgjigjur se presin që Reforma të fuqizojë sundimin e ligjit. Ndërsa, 30% e tyre se Reforma do të përmirësojë punën e Gjykatave dhe Prokurorive. Në anën tjetër, 28% e qytetarëve të anketuar nuk presin ndryshime nga Reforma në drejtësi.

Ky hulumtim i opinionit publik është realizuar me metodën e Omnibusit, në të cilin kanë marrë pjesë 1065 respodentë të moshës mbi 18 vjeç. Periudha e anketimit përfshin datën nga 4 deri me 15 mars 2024.

Kryetari i Partisë Demokratike të Kosovës, Memli Krasniqi, e ka akuzuar për mashtrim e degradim Qeverinë Kurti në trevjetorin e emërimit të saj.

Krasniqi ka postuar një video material përmes së cilës ka përmbledhur “disa nga aferat dhe skandalet e Qeverisë Kurti 2 në këto tre vjet”.

Krasniqi ka thënë se, mbi të gjitha, këto tre vjet kanë shpërfaqur natyrën mashtruese të kryeministrit Kurti dhe kabinetit të tij, “duke u sjell shumë dëme shtetit dhe qytetarëve”.

“Tri vjet degradim – korrupsion – nepotizëm. Tri vjet keqqeverisje – izolim – frikë. Tri vjet mashtrim!”, ka shkruar Krasniqi në Facebook.

Në samitin e BE, që mbahet sot në Bruksel qëndron një projekt tjetër në fokus: si të forcojë mbrojtjen Europa para konfliktit në Ukrainë.

Në një pikë janë të një mendimi krerët e shteteve e qeverive të BE. Armatosja me efekt kërcënues ndaj sulmeve potenciale do të kushtojë shumë para. Se nga vijnë mjetet këtu qëndrimet ndahen. Ideja e Spanjës dhe Francës që të merren borxhe të përbashkëta si në kohën e Covid 19, shihet me dyshim nga Gjermania. Por prioritet kanë ndihmat e furnizimet me armë për Ukrainën. Këtu u arrit ujdia që të përdoren fitime nga interesat e aseteve të ngrira ruse për ndihma dhe furnizimin me armë të Ukrainës. “Para së gjithash tani do të mundësojmë shpejt që të marrim fitimet nga asetet e ngrira ruse në BE. Dhe me një pjesë të parave do të ndihmojmë Ukrainën, edhe me mjete ushtarake.”

Samiti i BE i drejtoi të enjten apel të qartë Izraelit. Ai kërkohet që të ndalë menjëherë luftimet në Rripin e Gazës për të mundësuar arritjen e ndihmave humanitare. Më parë në samit pati një shkëmbim mendimesh me Sekretarin e Përgjithshëm të OKB-së, Antonio Guterres.

Afrim më i madh BE – Ukrainë

Para një viti shtetet e BE i premtuan Ukrainës se do ta furnizojnë me 1 milionë municione për ushtrinë në luftën mbrojtëse kundër Rusisë. Deri tani BE nuk e ka realizuar dot këtë premtim. Në Bruksel u morën një sërë masash të tjera financiare dhe politike. Në samitin e BE u arrit ujdia të enjten për financimin e furnizimit me armë të Ukrainës.

50 miliardë për buxhetin ukrainas

Për herë të parë u zhvillua edhe takimi i Këshillit të Asociiimit Ukrainë-BE, pas dhjetorit kur BE zyrtarisht bëri të ditur fillimin e negociatave të anëtarësimit. Në këtë instancë përgatiten hapa të tjerë deri në pranimin e negociatave të anëtarësimit. Kryeministri ukrainas, Denys Shmyhal paraqiti një plan reformash dhe për rindërtimin e Ukrainës. Presidentja e KE, Ursula von der Leyen bëri të ditur, se të mërkurën u lirua kësti i parë prej 4,5 miliardë eurosh nga 50 miliardë euro të instrumentit të ri të financimit të BE për vendin kandidat, Ukrainën. Deri në fund të vitit 2027 do të financohet kështu buxheti i Ukrainës. “Kjo është vendimtare për Ukrainën”, tha presidentja e KE, Ursula von der Leyen. “Jemi mirënjohës për këtë mbështetje”, u shpreh kryeministri ukrainas, Shmyhal. Mekanizimi i financimit me 50 miliardë euro për Ukrainën është çelës për stabilitet. “BE është tani në një gjendje alarmi, sepse edhe interesat e saj vitale janë në lojë”, tha Shmyhal.

Megjithatë BE ende nuk ra dakord, se kur do të fillojnë formalisht bisedimet e anëtarësimit me një konferencë qeveritare të 27 vendeve anëtare plus Ukrainën. Për këtë nevojitet vendimi unanim. Hungaria e ka shtyrë vazhdimisht procesin e anëtarësimit të Ukrainës.

Me interesat bankare ruse financohen armët për Ukrainën

Pas një vendimi parimor në shkurt nga krerët e shteteve dhe qeverive të BE-së, Komisioni i BE-së prezantoi edhe planin se si përfitimet nga interesat e aseteve të ngrira ruse në BE duhet të vihen në dispozicion të Ukrainës.

Bëhet fjalë për përfitimet e Rusisë nga interesi prej rreth tre miliardë euro në vit, të cilat krijohen nga aktivet e bankës shtetërore ruse në ofruesin belg të shërbimit financiar Euroclear. Asetet e bankës shtetërore ruse që arrinin pothuajse 200 miliardë euro janë ngrirë atje nga sanksionet e BE-së dhe nuk mund të tërhiqen apo transferohen më nga Banka Qendrore e Rusisë.

Bashkimi Evropian refuzon një konfiskim të plotë të këtyre fondeve, siç kërkohet nga Ukraina, për shkak të problemeve të mundshme ligjore dhe dëmtimit të besimit të investitorëve ndërkombëtarë në zonën e euros. Pas diskutimeve të gjata, shtetet e BE-së ranë dakord të konfiskojnë të paktën fitimet nga investimet ruse.

Që tani e tutje, këto do të paguhen në një buxhet të posaçëm, të ashtuquajturin “Facilimenti Evropian i Paqes”. Shtetet anëtare të BE-së e përdorin këtë fond për të financuar dërgesat e armëve në Ukrainë. Deri më tani, fondi përmban pesë miliardë euro nga kontributet e shteteve të BE-së.

Duhet të merren parasysh shqetësimet nga Banka Qendrore Evropiane se përdorimi i fondeve ruse nga Euroclear mund të çojë në vështirësi financiare për kompaninë private belge dhe në fund të fundit në një krizë të madhe financiare. Kjo i lejon Euroclear të mbajë një pjesë të të ardhurave nga asetet ruse si garanci për të financuar pretendimet nga investitorët e tjerë dhe procedurat e mundshme ligjore.

BQE ka frikë se bankat kineze ose investitorë të tjerë të mëdhenj mund të tërheqin aktivet e tyre nga Euroclear dhe, në rastin më të keq, kompania do të duhej të shpëtohej nga shteti belg. Kjo nga ana tjetër mund të çojë në një krizë financiare në zonën e euros.

Përveç kësaj, Rusia si kundërpërgjigje mund të konfiskojë asetet nga Euroclear. Rreth 33 miliardë euro nga ofruesit e shërbimeve financiare belge thuhet se kanë mbetur në Moskë. Me nxitjen e BQE-së, BE-ja dëshiron vetëm të tregtojë së bashku me vendet e tjera të industrializuara perëndimore në G7, sepse banka shtetërore ruse ka asete edhe në SHBA, Japoni dhe Britani të Madhe, megjithëse në një masë më të vogël.

Moska flet për “vjedhje”

Gjermania hoqi dorë nga rezistenca e saj ndaj këtij modeli. Belgjika ka njoftuar se do të transferojë në Ukrainë tatimin mbi kapitalin prej 25 për qind mbi fitimet ruse. BE-ja po hap terren me përdorimin e mundshëm të parave ruse për të financuar shitjet e armëve në Ukrainë.

Deri tani, konfiskimi i aseteve të huaja të bankave shtetërore ka ndodhur vetëm pas përfundimit të luftërave, për shembull pas Luftës së Parë të Gjirit të Irakut kundër Kuvajtit në 1991 ose pas përfundimit të Luftës së Dytë Botërore.

Reagimi nga Moska nuk vonoi. Zëdhënësi i Kremlinit, Dmitry Peskov tha se po shkatërrohet reputacioni i Perëndimit si një vend i sigurt për investime. “Dëmi është i pakundërshtueshëm. Njerëzit dhe shtetet që marrin vendime të tilla sigurisht që do të jenë objekt i ndjekjes penale për shumë dekada,” tha Peskov. Zëdhënësja e Ministrisë së Jashtme ruse foli për “banditizëm dhe vjedhje”.

Tarifat për produktet bujqësore nga Ukraina

Të mërkurën (20.03) vendet anëtare të BE-së ranë dakord të zgjasin importet pa taksa të mallrave nga Ukraina edhe për një vit. Megjithatë, për shkak të presionit të fermerëve protestues, disa produkte bujqësore, si mjalti, vezët, shpendët, sheqeri, misri dhe tërshëra, duhet të përjashtohen. Tarifat e importit në BE mund të paguhen sërish për këto produkte nga qershori nëse importet tejkalojnë sasi të caktuara, shkruan DW, transmeton KosovaPress.

Kryeministri ukrainas Denys Shmyhal ishte i kënaqur me vendimet, sepse Ukraina nuk do të arrinte gjithsesi kufijtë e sipërm të vendosur për produktet kritike. Kufiri i sipërm bazohet në vlerat mesatare për vitet 2022 dhe 2023. Mbetet për t’u parë nëse fermerët polakë që po bllokojnë kalimet kufitare për shkak të konkurrencës së lirë nga Ukraina mund të qetësohen./ DW

Ministria e Ekonomisë dhe Korporata Financiare Ndërkombëtare (IFC) kanë nënshkruar marrëveshjen për zhvillimin e ankandit të erës, në të cilën priten të dyfishohen kapacitetet e energjisë në Kosovë. Ministrja e Ekonomisë, Artane Rizvanolli ka thënë se ky projekt shërben në krijimin e një sektori më të sigurte të energjisë më rast të sfidave që mund të hasen në këtë drejtim. Derisa këtë vit e ka vlerësuar “si fantastik në aspektin e energjisë”.

Rizvanolli ka theksuar se me këtë projekt është paraparë të përfshihet edhe sektori publiko-privat, për çfarë tha se kjo në këtë mënyrë do të sigurohen që jo e tërë kostoja e ndërtimit të kapaciteteve dhe e tranzicionit energjetik, reflektohet në tarifa të konsumatorëve fundor në afat të mesëm.

Ajo po ashtu ka thënë se presin nga Kuvendi që në seancën e radhës të rregullt, të miratojë ligjin e parë të Kosovës për burime të ripërtritshme të energjisë.

“Po nënshkruajmë marrëveshjen për me Korporatën ndërkombëtare Financiare IFC për zhvillimin e ankandit të radhës të Republikës së Kosovës, ankandin tonë të parë të erës….Të gjitha këto janë hapa të rëndësishëm drejt realizimit të vizonit tonë si qeveri, dhe tanimë si shtet duke qenë se këtë e kemi të etabluar në strategjinë tonë të energjisë, që është krijimi i një sektori të energjisë që ofron siguri të furnizimit, është më i pastër dhe i qëndrueshëm, mbështetet në burime vendore për pavarësi energjetike… Ndërtimi i kapaciteteve të erës është shumë kompleks, andaj me përfundimin me sukses të këtij procesi, ne si shtet dëshmojmë përfundimisht që tranzicionin energjetik e kemi të arritshëm dhe për më tepër që jemi një partner serioz për zhvillueseve e projekteve, e investitorët që do të vinë të investojnë këtu. Kemi paraparë në këtë projekt, një komponent të partneritetit publiko-privat që është për herë të parë në projekte të tilla në rajon. Kjo na mundëson që të sigurohemi që si shtet kontribuojmë me investim në projekt dhe në këtë mënyrë sigurohemi që jo e tërë kostoja e ndërtimit të kapaciteteve dhe e tranzicionit energjetik reflektohet në tarifa të konsumatorëve fundor në afat të mesëm. Kjo është edhe një mënyrë e jonë për t’u siguruar që në rast të krizave që mund t’i përjetojmë më vonë në sektorin e energjisë, të kemi edhe një sasi të energjisë të prodhuar në pronësi publike, në mënyrë që të kemi më lehtë ndërhyrjen në treg në rast të krizave për të mbrojtur konsumatorët nga luhatjet e mëdha të tregut. Kriza e fundit na ka treguar se duhet të jemi të përgatitur për më të keqen edhe kur jemi në momentet më të mira”, tha Rizvanolli.

Në anën tjetër, edhe menaxheri Regjional, IFC, Nicolas Marquier deklaroi se ky projekt është i rëndësishëm për zhvillimin e sektorit energjetik në Kosovë.

“Ne tani jemi duke lëvizur përpara me një ankand të ri, që ka të bëjë me ankandin e parë të erës në Kosovë, që të dyfishojmë kapacitetet e energjisë në Kosovë, që do të përfshijë rreth 8 për qind të kërkesës së energjisë në Kosovë. IFC dhe sektori privat dhe Bankës Botërore, ne jemi një institucion më i madh në botë sa i përket financimit e sidomos për sektorin privat për t’u afruar ata në këto tregje të rëndësishme”, tha Marquier.