Category: Lajme

Kandidatja për deputete nga radhët e LDK-së, Hykmete Bajrami ka falënderuar të gjithë qytetarët që votuan Lidhjen Demokratike të Kosovës dhe besuan te kjo parti.
Përmes një postimi në Facebook, Bajrami theksoi po ashtu se mosdalja në votime është një mesazh i qartë për secilin, e që sipas saj është protestë qytetare.

Bajrami shtoi se abstenimi i qytetarëve është thirrje për reflektim dhe llogaridhënie se pse Kosova erdhi në situatën ku mbahen zgjedhje për të shkuar përsëri në zgjedhje.

“Pa asnjë dyshim, shumë qytetarë ndëshkuan partinë që kishte 51 për qind, e cila e keqpërdori, përbuzi dhe nuk e zbatoi vullnetin e popullit. Njëkohësisht, edhe neve na thanë qartë se duhet më shumë punë, më shumë seriozitet dhe më shumë përkushtim që të na shohin si zgjidhje”. “Secili e ka kuptuar se tri palë zgjedhje u mbajtën jo për shkak të mospajtimeve: nëse duhet të prodhojmë apo të importojmë energji, jo sepse nuk u pajtuam për programe zhvillimore, por sepse tema qendrore u bë: kush ku do të ulet. Përfundimisht, është koha të mendojmë përtej karrigeve”, ka shkruar ajo.

Ish-deputetja tha se rezultati i këtyre zgjedhjeve është thirrje për reflektim sepse, sipas saj, “nëse duam të jemi të sinqertë me veten, qartazi diku ia kemi huqur”.

“Lidhja Demokratike e Kosovës është më shumë se një palë zgjedhje, më shumë se një rezultat dhe më shumë se një episod politik, andaj duhet reflektim i thellë për tu rikthyer më e fortë. Faleminderit!”.

Këshilli Gjyqësor i Kosovës (KGJK) ka caktuar datat për mbajtjen e proceseve zgjedhore për përzgjedhjen e anëtarëve të rinj të këtij institucioni nga gjykatat themelore të vendit, raporton Ekonomia Online.

Në mbledhjen e KGJK-së, kryesuesi Rrustem Thaqi njoftoi se është miratuar vendimi për organizimin e zgjedhjeve për kandidatin e nominuar nga Gjykata Themelore në Prishtinë.

“Për kandidatët e nominuar në Gjykatën Themelore në Prishtinë, anëtarë të Këshillit Gjyqësor të Kosovës, që do të mbahet në Gjykatën Themelore në Prishtinë me datën 16 qershor, ditë e marte, me fillim nga ora 13:30. Aprovohet lista e gjyqtarëve që kanë të drejtë vote në Gjykatën Themelore në Prishtinë. Aprovohet forma e fletëvotimeve për raundin e parë dhe eventualisht raundin e dytë që do të përdoret në procesin e zgjedhjes së kandidatit të nominuar në Gjykatën Themelore në Prishtinë. Aprovohet forma e raportit të komisionit që do të përdoret në raundin e parë dhe eventualisht në raundin e dytë në procesin e zgjedhjes së kandidatit të nominuar për anëtar të KGJK-së nga Gjykata Themelore në Prishtinë. Aprovohet forma e raportit të zyrtarit të autorizuar nga Sekretariati i KGJK-së që do të përdoret në procesin e zgjedhjes së kandidatit të nominuar nga Gjykata Themelore në Prishtinë. Dhe vendimi hyn në fuqi me datë 9 qershor 2026”, tha Thaqi.

Sipas kalendarit të miratuar, procesi i zgjedhjes së anëtarëve të KGJK-së do të vazhdojë edhe në gjykatat e tjera themelore.

Në Gjykatën Themelore në Gjilan, zgjedhjet do të mbahen më 17 qershor duke filluar nga ora 10:00, ndërsa po atë ditë në Gjykatën Themelore në Ferizaj procesi do të nisë nga ora 14:00.

Më 18 qershor, zgjedhjet do të zhvillohen në Gjykatën Themelore në Mitrovicë nga ora 10:00 dhe në Gjykatën Themelore në Pejë nga ora 14:00.

Ndërkaq, në Gjykatën Themelore në Prizren procesi zgjedhor do të mbahet më 19 qershor, me fillim nga ora 11:00.

Pas përfundimit të proceseve zgjedhore në nivel të gjykatave themelore, tubimi i fundit do të mbahet më 23 qershor nga ora 13:00, ku pritet të finalizohet përzgjedhja e anëtarëve të rinj të Këshillit Gjyqësor të Kosovës.

Tregjet më të shtrenjta të banesave në Evropë janë përqendruar kryesisht në një numër të vogël qytetesh në Zvicër dhe Luksemburg, sipas të dhënave të reja nga Global Property Guide. Raporti tregon se Cyrihu mban vendin e parë në kontinent, me çmime mesatare që arrijnë mbi 18,000 euro për metër katror.

Ja 10 tregjet më të shtrenjta të banesave në Evropë, të renditura nga vendi i dhjetë në të parin.

10) Stokholm: Çmimi mesatar 8,380 €/m²

Kryeqyteti suedez hap renditjen e 10 vendeve të para me një nga rikuperimet më të qarta të pronave në Evropë. Stokholmi kombinon disa nga standardet më të larta të jetesës në Evropë me një nga tregjet e saj më të kufizuara të strehimit.

Çmimet mesatare të apartamenteve janë 8,380 euro për metër katror, duke u rritur me 7.2% gjatë vitit të kaluar dhe 17.0% gjatë dy viteve.

9) Kopenhagen: Çmimi mesatar 8,405 €/m²

Kryeqyteti danez, është gjithashtu tregu me rritjen më të shpejtë në 10 vendet e para. Çmimet mesatare të apartamenteve janë 8,405 euro për metër katror, një rritje prej 14.3% gjatë vitit të kaluar dhe 24.0% gjatë dy viteve – rritja më e fortë e regjistruar nga çdo qytet në këtë renditje.

8) Oslo: Çmimi mesatar €9,332/m²

Kryeqyteti i Norvegjisë, i vendosur në krye të fiordit të Oslos, qyteti përzien arkitekturën moderne nordike me disa nga të ardhurat më të larta familjare në kontinent.

Çmimet mesatare të apartamenteve janë 9,332 euro për metër katror, një rritje prej 6.3% gjatë vitit të kaluar dhe 14.0% gjatë dy viteve.

7) Amsterdam: Çmimi mesatar €9,437/m²

Distrikti i kanalit të Amsterdamit i shekullit të shtatëmbëdhjetë është bërë një nga adresat më të shtrenjta të banimit në Evropë.

Çmimet mesatare të apartamenteve janë 9,437 euro për metër katror, një rritje prej 13.0% gjatë vitit të kaluar dhe 19.2% gjatë dy viteve.

6) Paris: Çmimi mesatar €9,490/m²

Parisi mbetet një nga tregjet e pronave më të njohura në botë. Megjithatë, ndryshe nga shumica e qyteteve në këtë renditje, çmimet po bien.

Çmimet mesatare të apartamenteve janë 9,490 euro për metër katror, një rënie prej 0.3% gjatë vitit të kaluar dhe 7.3% gjatë dy viteve, duke e bërë Parisin performuesin më të dobët në dhjetë vendet e para.

5) Bernë: Çmimi mesatar 9,952 €/m²

Berna është tregu më i përmbajtur i luksit në Zvicër.

Kryeqyteti federal, i famshëm për qytetin e vjetër të listuar në UNESCO, është më pak i shtrenjtë nga katër qytetet zvicerane në këtë renditje, megjithëse çmimet mbeten afër 10,000 euro për metër katror.

4) Qyteti i Luksemburgut: Çmimi mesatar 10,941 €/m²

Luksemburgu, vendi më i pasur i Evropës sipas PBB-së për frymë, është gjithashtu shtëpia e një prej tregjeve më të shtrenjta të banesave në kontinent.

Çmimet mesatare të apartamenteve janë 10,941 euro për metër katror, një rënie prej 0.9% gjatë vitit të kaluar dhe 6.9% gjatë dy viteve.

3) Luzern: Çmimi mesatar 12,066 €/m²

Luzerni, qyteti zë një nga vendet më spektakolare në Evropë, aty ku Liqeni i Lucernës takohet me kodrat e Alpeve.

Çmimet mesatare të apartamenteve janë 12,066 euro për metër katror, 7.3% më shumë se vitin e kaluar.

2) Gjenevë: Çmimi mesatar 16,819 €/m²

Pozicioni i Gjenevës pranë kryesimit të renditjes pasqyron kërkesën e qëndrueshme nga një nga tregjet më të pasura të punës në Evropë. Çmimet mesatare të apartamenteve janë 16,819 euro për metër katror, 3.4%.

1) Cyrih: Çmimi mesatar 18,229 €/m²

Cyrihu mbetet qyteti më i shtrenjtë në Evropë për prona banimi, me çmime mesatare apartamentesh prej 18,229 eurosh për metër katror.

Vazhdon numërimi i votave për kandidatët për deputetë. Lidhja Demokratike e Kosovës pa përfshirë votat e diasporës ka siguruar 20 mandate në legjislaturën e re.

Në mesin e më të votuarve në LDK, sipas rezultateve të deritashme është Ukë Rugova.

Djali i ish-presidentit Rugova ka marrë deri tani afro 6 mijë vota, kur janë numëruar 20% e tyre.

Edhe legjislaturën e kaluar, Rugova ishte ndër më të votuarit në LDK.

Një person është gjetur pa shenja jete në shtëpinë e tij në Gjakovë.

Sipas Policisë, rreth orës 07:20 është raportuar se një burrë i lindur në vitin 1940 ishte gjetur nga familjarët pa shenja jete në banesën e tij.

Pas marrjes së njoftimit, në vendin e ngjarjes kanë dalë njësitë përkatëse policore dhe ekipi i emergjencës mjekësore, të cilët kanë konstatuar vdekjen e tij.

“Rreth orës 07:20, jemi njoftuar se një person i gjinisë mashkullore, i lindur në vitin 1940, ishte gjetur nga familjarët pa shenja jete në shtëpinë e tij në Gjakovë. Menjëherë në vendin e ngjarjes kanë dalë njësitë përkatëse policore dhe ekipi i emergjencës mjekësore të cilët kanë konstatuar vdekjen e tij”, njofton policia.

Lidhur me rastin është njoftuar prokurori i shtetit, në konsultim me të cilin është inicimin rast “hetim i vdekjes”, përderisa trupi i pajetë i viktimës do të dërgohet për ekzaminim mjekoligjor.

Prokuroria Speciale e Kosovës, në bashkëpunim me Policinë e Kosovës, është duke zhvilluar një operacion të gjerë kundër krimit të organizuar në disa lokacione të vendit.

Sipas një njoftimi të përbashkët të Prokurorisë Speciale dhe Policisë së Kosovës, aksioni po realizohet nën monitorimin e Prokurorisë Speciale dhe në bazë të urdhëresës së lëshuar nga Gjykata Themelore në Prishtinë.

Bëhet e ditur se operacioni lidhet me dyshimet për trafikim ndërkombëtar të substancave narkotike dhe përfshin hetime për veprat penale “pjesëmarrja ose organizimi i grupit kriminal të organizuar”, “blerja, posedimi, shpërndarja dhe shitja e paautorizuar e narkotikëve”, si dhe “pastrimi i parave”.

27 vjet më parë, më 9 qershor 1999 u nënshkrua marrëveshja ushtarako-teknike e Kumanovës, me të cilën u pa fundi i luftës Kosovë, dhe dorëzimi i Serbisë.

Me këtë marrëveshje, Serbia ishte detyruar të tërhiqte të gjitha forcat e saj policore dhe ushtarake nga Kosova.

Marrëveshja e Kumanovës, ndërmjet NATO-s dhe RFJ-së, hyri në fuqi më 11 qershor 1999. Atë e nënshkruan Michael Jackson, komandanti i parë i KFOR-it në Kosovë, dhe ish-shefi i Shtabit të Armatës serbe, gjenerali Nebojsha Pavkoviq, i akuzuari i Hagës për krime lufte dhe gjenocid.

Ndër të tjera në marrëveshje parashihej:

c) që nga Kosova të largohen të gjithë personat dhe organizatat me aftësi militare duke përfshirë armatën e rregullt dhe forcat e marinës, civilë të armatosur, paramilitarë, forcat ajrore, garda kombëtare, policia kufitare, rezervistët, policia ushtarake, shërbimet informative, MUP-it, policia lokale, speciale, antirebeliste, antiterroriste dhe çdo grup i përcaktuar kështu nga KFOR-i.

d) u caktua një zonë sigurie ajrore 25 kilometra përtej kufirit të Kosovës

e) u caktua një zonë 5 kilometrash përtej kufirit me RFJ-në që nuk guxonte të vendosen armatimet e rënda dhe ushtria, përveç ushtarët kufitarë.

Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.

Sekretari i përgjithshëm i NATO-së, Havijer Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi rezolutën 1244, ku u dërguan 37.200 ushtarë të KFOR-it nga 36 shtete.

Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.

Me hyrjen e NATO-s, në Kosovë ka nisur edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore. Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës.