Category: Lajme

Ish-komandanti i Ushtrisë Çlirimtare të Kosovës, Ramush Haradinaj ka kujtuar 27-vjetorin e nënshkrimit të marrëveshjes së Kumanovës, e cila shënoi tërheqjen e ushtrisë, policisë dhe paramilitarëve serbë nga Kosova, pas krimeve ndaj popullatës shqiptare të paarmatosur.

Përmes një postimi në Facebook, ish-kreu i Aleancës tha se lufta çlirimtare e UÇK-së, me kauzën e saj të drejtë, arriti të fitojë mbështetjen e shteteve demokratike dhe NATO-s, të udhëhequr nga SHBA, e cila për tre muaj bombardoi Jugosllavinë, regjimin gjenocidal të Millosheviqit.

Populli i Kosovës mbetet përjetësisht mirënjohës ndaj Amerikës dhe botës demokratike për lirinë dhe pavarësinë e vendit”, ka shkruar ai.

5 ditë nga zhdukja e 34-vjeçarit, Eglent Koçi, Policia e Tiranës ka një përgjigje. I riu dyshohet se është ekzekutuar nga shoku i ngushtë, Armand Shakaj.

Pas denoncimit nga familjarët paraditen e datës 4 qershor, policia u angazhua me vëzhgimin e kamerave të sigurisë, të cilat e sollën nga Sheshi Wilson drejt Bulevardit Zhan D’Ark, ku ai shkoi pranë lokalit të një miku të tij, nga ku nuk doli më.

Nga kontrollet e policisë në terren dhe pamjet e kamerave të sigurisë, policia ka gjetur prova që shtojnë dyshimet se 34-vjeçari është vrarë dhe se shoku i tij ka zhdukur trupin duke e transportuar me një makinë. Gjatë këtij momenti dëshmitar ka qenë edhe Enea Zyferi, i cili punonte kamarier në një bar në pronësi të autorit dhe që ndodhet pranë vendit të ngjarjes, i cili është arrestuar si bashkëpunëtor. Ndërsa për autorin, policia nuk ka asnjë gjurmë dhe e ka shpallur në kërkim.

Aktualisht, blutë po kryejnë kontrolle në rrethinat e Tiranës për gjetjen e trupit të të riut.

Gazetarja e Top Channel, Dorjana Bezat mëson se, për të fshehur gjurmët, Shakaj ka lëvizur motorin e viktimës nga zona ku ndodhi krimi drejt 5 Majit, ku u gjet dy ditë pas krimit.

34-vjeçari rezultonte i punësuar në një mobileri, por policia dyshon se ai ishte i përfshirë në aktivitetin e kriptomonedhave, që është një ndër pistat hetimore mbi të cilat është fokusuar policia. /Tch/

Pesë persona janë arrestuar në kuadër të operacionit policor të koduar “White Star”, i zhvilluar në disa lokacione të Kosovës, në bashkëpunim me Prokurorinë Speciale.

Operacioni është zhvilluar në Prishtinë, Pejë, Prizren, Viti dhe Drenas, nën mbikëqyrjen e institucioneve të drejtësisë dhe me urdhër të gjykatës kompetente.

“Operacioni policor është realizuar në disa lokacione nën monitorimin e Prokurorisë Speciale të Kosovës, në bazë të urdhrit të lëshuar nga Gjykata Themelore”, thuhet në njoftim.

Të arrestuarit janë ndaluar me vendim të prokurorit special për 48 orë, nën dyshimin për përfshirje në veprat penale të krimit të organizuar, trafikimit të narkotikëve dhe pastrimit të parave.

Sipas autoriteteve, ata dyshohen për “pjesëmarrja ose organizimi i grupit kriminal të organizuar; blerja, posedimi, shpërndarja dhe shitja e paautorizuar e narkotikëve; si dhe pastrimi i parave”.

Gjatë aksionit janë sekuestruar prova dhe pasuri të ndryshme, përfshirë armë, drogë, para të gatshme, automjete dhe pajisje elektronike.

Në njoftim thuhet se janë gjetur “6 armë; 239 fishekë; 25 telefona; 10 automjete dhe 1 motoçikletë; 7,595 euro para të gatshme; si dhe pajisje të ndryshme elektronike”.

Operacioni është mbështetur edhe nga partnerë ndërkombëtarë, përfshirë EUROPOL, si dhe autoritetet e Belgjikës, Francës dhe Holandës.

“Operacioni është mbështetur nga EUROPOL-i, autoritetet e Belgjikës, Francës dhe Holandës”, thuhet në njoftim, ku theksohet se veprimet janë monitoruar edhe nga përfaqësues ndërkombëtarë në terren.

Prokuroria Speciale dhe Policia e Kosovës kanë deklaruar se do të vazhdojnë me veprime të koordinuara për luftimin e krimit të organizuar dhe forcimin e sundimit të ligjit.

Zyra Kombëtare e Auditimit ka publikuar raportin për pasqyrat financiare vjetore të Shërbimit Spitalor dhe Klinik Universitar të Kosovës për vitin 2025.

Përmes këtij raporti, ZKA thekson se ka gjetur vlera jo të sakta të buxhetit të të hyrave në pasqyrën e ekzekutimit të buxhetit të institucionit.

Neni 14 i Rregullores MF Nr.01/2017 për Raportim Vjetor Financiar nga Organizatat Buxhetore specifikon që Pasqyra e ekzekutimit të buxhetit të përfshijë ekzekutimin e buxhetit dhe të prezantojë informata mbi buxhetin fillestar sipas Ligjit Vjetor të Buxhetit, buxhetin final sipas SIMFK-së, si dhe realizimin e buxhetit, duke përfshirë edhe krahasimin ndërmjet buxhetit final dhe realizimit.

Siç thuhet në raport, edhe pas kërkesës së ekipit të auditivit për korrigjimin e Pasqyrave Financiare Vjetore (PFV), te Hyrja e Parasë së gatshme, në vend të buxhetit fillestar dhe final për të hyrat tatimore, është prezantuar vlera e realizimit vjetor e këtyre të hyrave duke mos reflektuar ndryshimet e kërkuara.

Si rezultat, ZKA thotë se ekziston një diferencë prej 1,048,801 euro ndërmjet te hyrave te buxhetuara dhe vlerës se raportuar.

“Mangësitë e identifikuara kanë ndodhur si shkak i kontrolleve jo të duhura me rastin e përgatitjes dhe rishikimit te PFV-ve, si dhe mos zbatimit me përpikëri të kërkesave të rregullores për raportim financiar”, thuhet në raport, transmeton Klankosova.tv.

Ndikimi

Në raportin e ZKA-së potencohet se prezantimi jo i drejtë i informatave lidhur me buxhetin fillestar dhe final të të hyrave jo tatimore kanë ndikuar në nënvlerësimin e këtyre informatave në Pasqyrën e ekzekutimit te buxhetit në PFV, siç thuhet nga Auditimi, duke ndikuar në besueshmërine e pasqyrave financiare.

Rekomandimi

Ndër të tjera, Zyra Kombëtare e Auditimit ka kërkuar nga Bordi Drejtues dhe Drejtori i Përgjithshëm që të sigurojnë që Pasqyrat Vjetore Financiare (PVF) të mos dorëzohen pa iu nënshtruar më parë një rishikimi të detajuar nga menaxhmenti dhe zbatimit me përpikëri te kërkesave të rregullores për raportim financi.

Ambasada e Shteteve të Bashkuara në Prishtinë ka uruar Forcën e Sigurisë së Kosovës (FSK) për pjesëmarrjen e saj të parë ndonjëherë në aktivitetin ndërkombëtar “SOF Week 2026”, ku Kosova u përfaqësua përkrah vendeve aleate dhe partnere.

Në një postim të publikuar në rrjetet sociale, Ambasada Amerikane theksoi se pjesëmarrja e FSK-së në këtë ngjarje përfaqëson një hap të rëndësishëm në forcimin e partneriteteve ndërkombëtare dhe në avancimin e bashkëpunimit në fushën e sigurisë.

“Urime Forcës së Sigurisë së Kosovës për pjesëmarrjen e saj të parë në SOF Week 2026, duke përfaqësuar me krenari Kosovën përkrah vendeve aleate dhe partnere, ndërsa avancon bashkëpunimin, gatishmërinë dhe sigurinë e përbashkët”, thuhet në postimin e ambasadës.

Kryeministri i Shqipërisë, Edi Rama ka sulmuar influencerët dhe bloggerëve, të cilët prej ditësh mbështesin protestat masive për largimin e tij nga qeveria.

Në Konferencën e 3-të Kombëtare të Arsimit dhe Formimit Profesional, Rama tha se janë pikërisht influencerat që nxisin racizëm ndaj punonjësve të huaj, që vijnë dhe punojnë në Shqipëri.

Sipas kryeministrit Rama, këta persona nuk kanë nevojë për punë, ose punojnë në instagram duke reklamuar jetën e tyre luksoze.

“Nuk ka një vend në bregdetin shqiptar ku paga të jetë me e ulët se në Kroaci, nuk ka!

Cili është problemi? Problemi është që ata që nxisin racizëm ndaj punonjësve të huaj dhe ata që kujtojnë se punonjësit e huaj vijnë nga Filipinet si skllevër, ata nuk duan të punojnë dhe të marrin një pagë si në Greqi dhe Kroaci.

Ose nuk janë në nevojë për një punë, përkundrazi punojnë në Instagram dhe japin intervista sesi jeta e tyre modeste kushton 20 mijë euro në muaj.

Çështja është shumë e thjeshtë. Sa me lartë të jetë cilësia e sistemit të turizmit, aq më të larta do jenë pagat, sa më e ulët të jetë cilësia sistemit të turizmit, aq më të ulëta do jenë pagat. Sa më i lartë të jetë konsumi i atyre që vijnë për të shpenzuar në atë sistem aq më të larta do jenë të ardhurat. Zvicra që është një vend turistik gjithashtu është një vend shumë i shtrenjtë, por ka paga shumë të larta. Ka paga shumë të larta sepse ka mundësinë që të jetë e shtrenjtë sepse ka cilësi shumë të lartë”, tha Rama ndër të tjera.

Punëtorët e Radio Televizionit të Kosovës kanë protestuar të hënën para objektit të RTK-së, duke shprehur pakënaqësinë për mospagesën e plotë të pagave. Përfaqësuesit sindikalë kërkuan nga Bordi dhe Menaxhmenti që të sigurojnë menjëherë pagesën e plotë të pagave, ndërsa paralajmëruan vazhdimin e protestave dhe veprimeve të tjera sindikale nëse deri të premten nuk ofrohet një zgjidhje konkrete.

Në emër të tri sindikatave të RTK-së, Veton Rugova tha se protesta është organizuar për të mbrojtur dinjitetin e punëtorëve dhe të drejtën e tyre për paga të plota.

“Sot tri sindikatat e RTK-së janë bashkë për të protestuar për mospagesën e plotë të pagës nga RTK-ja. Kjo nuk është çështje e një grupi. Kjo është çështje e çdo punëtori që me mund dhe përkushtim ka dhënë kontributin e tij për këtë institucion. Ne sot jemi mbledhur këtu për të mbrojtur dinjitetin tonë si punëtorë.. Sot, pikërisht ata njerëz që kanë mbajtur RTK-në në këmbë, po përballen me pasiguri për pagat e tyre. Kjo është e padrejtë dhe e papranueshme. Pas çdo punëtori të RTK-së qëndron një familje. Paga nuk është luks. Paga është mjeti me të cilin mbajmë familjet tona dhe sigurojmë jetesën. Ne nuk kërkojmë privilegje. Nuk kërkojmë favore. Kërkojmë vetëm atë që na takon me ligj”, tha Rugova.

Ai theksoi se punëtorët nuk janë përgjegjës për krizën financiare në institucion dhe kërkoi llogaridhënie nga drejtuesit e RTK-së.

“Duhet të thuhet qartë: punëtorët nuk janë shkaktarë të kësaj krize. Ata nuk kanë menaxhuar financat, nuk kanë marrë vendime për buxhetin dhe nuk mund të paguajnë çmimin e gabimeve të të tjerëve. Prandaj, sot kërkojmë përgjegjësi nga ata që kanë pasur detyrimin ta drejtojnë dhe ta mbrojnë këtë institucion. Heshtja, vonesat dhe mungesa e veprimit nuk janë zgjidhje. Punëtorët meritojnë përgjigje dhe meritojnë paga. I bëjmë thirrje Bordit dhe Menaxhmentit që menjëherë të sigurojnë pagesën e plotë të pagave dhe të japin një përgjigje të qartë për punëtorët. Ne do të presim deri të premten për një reagim konkret dhe për zgjidhjen e kësaj situate.Por, le të jetë e qartë për të gjithë: nëse deri të premten nuk ka veprime konkrete nga Menaxhmenti dhe Bordi i RTK-së, atëherë nga e hëna do të vazhdojmë me protesta dhe veprime të tjera sindikale. Nuk do të ndalemi derisa të drejtat e punëtorëve të respektohen dhe derisa secili punëtor të marrë atë që i takon”, tha ai.

Mbështetje për protestën shprehu edhe kryetari i Asocacionit të Gazetarëve të Kosovës, Xhemajl Rexha, i cili kritikoi menaxhimin e situatës dhe trajtimin e mediumit publik.

“Është për keqardhje që është hera e sata herë që brenda një kohe të shkurtër punonjësit e RTK-së mbesin pa paga apo me vonesë. Këtë e shohim si mungesë e përgjegjësisë së menaxhimit së RTK. E ftojmë bordin dhe menaxhmentin qe të bëjnë të gjitha përpjekjet që situata si kjo të mos përsëriten, që të kujdesen që të paguhen për punën që bëjnë dhe të jenë transparent me punëtorët qe këto kriza si kjo të shmangen. Të gjitha problemet e fundit të RTK-së lidhen me mënyrën se si Qeveria e Kosovës e udhëhequr nga Kurti e ka trajtuar mediumin publik, me ndarjen të vetëm 8.9 milion euro nga thuajse 22 milion sa i takojnë. Kjo parti politike ka dashur që ta mbaje nën kontroll politik RTK-në dhe fatkeqësisht e ka arritur një masë të madhe ku së fundmi një pjesë e mirë, sidomos lajmeve qendrore janë shndërruar në elemente propaganduese për VV-në dhe RTK-në. I ftojmë kolegët e RTK në rast të presioneve që i dimë që ndodhin, politike brenda dhe do vazhdojmë t’i përkrahim deri në fund”, tha Rexha.

Gjykata Themelore në Prizren ia ka caktuar masën e sigurisë – arrest shtëpiak Adnan Demirit, komisionerit nga radhët e koalicionit Vakat.

Ish-kandidati për deputet dhe për asamblist, dyshohet për veprën penale “asgjësimi i dokumentit të votimit”.

Demiri dyshohet për rastin e shkëputjes nga blloku dhe fshehjes së gjashtë fletëvotimeve në fshatin Jabllanicë të Prizrenit të dielën.

Kryetari i koalicionit Vakat, Rasim Demiri, e ka konfirmuar për Kohën se i dyshuari Adnan Demiri nuk është familjar i tij dhe se është anëtar i Këshillit Drejtues të subjektit të tij politik.

Ndaj tij, Prokuroria Themelore në Prizren një ditë më parë ka kërkuar masën e paraburgimit.

Kryetari i Vakatit tha se nuk ka koment për arrestimin e anëtarit të partisë, pasi drejtësia duhet ta thotë fjalën e saj.

Koalicioni Vakat është subjekti më i votuar i komunitetit boshnjak në zgjedhjet e 7 qershorit me 3810 vota. /Koha

Trepça ka njoftuar se ka larguar përkohësisht nga puna pesë punonjës, në Njësinë Biznesore “Minierat me Flotacion Kishnicë dhe Artanë”.

Në njoftim shtohet se, vendimi është nxjerrë pas dyshimeve të bazuara se punonjësit në fjalë janë evidentuar si të angazhuar në punë gjatë ditëve të vikendit, ndonëse dyshohet se nuk kanë qenë të pranishëm në vendin e punës.

Postimi:

Me datën 09.06.2026, Kryeshefi Ekzekutiv i Trepça Sh.A. ka nxjerrë Vendimin me nr. prot. 5245 për largimin e përkohshëm nga puna të punonjësve:

1).F.Z.,

2).K.A.,

3).Z.A.,

4).A.G.,

5).M,Z.

punonjës në Njësinë Biznesore “Minierat me Flotacion Kishnicë dhe Artanë”.

Sipas këtij vendimi, punonjësit e lartcekur largohen përkohësisht nga puna duke filluar nga data 08.06.2026, deri në marrjen e vendimit nga Komisioni Disiplinor.

Vendimi është nxjerrë pas dyshimeve të bazuara se punonjësit në fjalë janë evidentuar si të angazhuar në punë gjatë ditëve të vikendit, ndonëse dyshohet se nuk kanë qenë të pranishëm në vendin e punës.

Për rrjedhojë, ekziston dyshimi se janë kryer shkelje të rënda të detyrave të punës, sipas nenit 10, paragrafëve 1.1, 1.5, 1.13, 1.19 dhe 1.26 të Rregullores për Përgjegjësinë Disiplinore dhe Materiale të Punonjësve të Trepça Sh.A.