Category: Lajme

Gazetari serb në Kosovë, Branislav Krstic, në një prononcim për ATV-në, tha se kryetarët aktualë në veri do ta vazhdojnë mandatin e tyre, pasi që sipas tij, qytetarët e komunitetit serb në këtë pjesë të Kosovës nuk do t’i përgjigjen votimeve për shkarkimin e kryetarëve aktualë.

Ai tha se i gjithë ky proces është një lojë politike si nga ana e Serbisë ashtu edhe nga ana e Kosovës.

“Shfaqje lojërave politike edhe nga ana e Prishtinës zyrtare, kuptueshme edhe nga ana e Beogradit zyrtar. KQZ-ja edhe Qeveria, me siguri që kanë bërë hulumtime dhe e kanë kuptuar që pa një marrëveshje politike, me subjektet politike, ky proces nuk do të kalojë”, tha Krstic. /atvlive.tv

Kryetari i KQZ-së, Kreshnik Radoniqi, i ka ftuar qytetarët në Veri që të dalin të votojnë pro ose kundër largimit të kryetarëve aktualë, raporton EO.

“Qendrat e votimit janë të hapura dhe vazhdojnë të presin qytetarët me të drejtë vote. Sipas të dhënave që kemi pranuar nga komisionet komunale të zgjedhjeve në këto katër komuna numri i qytetarëve që kanë votuar deri në orën 11 është: në Leposaviq kanë votuar 46 votues. Në Zybin Potok 7 votues, në Zveçan asnjë votues dhe në Mitrovicën e veriut 32 votues”, ka thënë Radoniqi.

Radoniqi ka ftuar qytetarët që ta shfrytëzojnë të drejtën e tyre për të votuar.

“Në emër të KQZ-së, i ftoj të gjithë qytetarët e komunave Leposaviq, Zubin Potok, Zveçan dhe Mitrovicë e Veriut që ta shfrytëzojnë të drejtën e tyre për të marrë pjesë në procesin e votimit dhe të deklarohen nëse janë për apo kundër largimit nga funksioni të kryetarit të komunës së tyre”, tha Radoniqi.

Zëvendësdrejtori i Policisë për rajonin e Veriut, Veton Elshani, në një lidhje të drejtpërdrejt në ATV, tha se situata e sigurisë në veriun e vendit është e qetë.

“Situata e sigurisë me mbarë veriun e vendit është e qetë. Në fakt, edhe në ditët paraprake ne nuk kemi pasë ndonjë informacion që do të ketë ndonjë zhvillim këtu, për ditën e votimit, ndërsa sikurse edhe për një ngjarje tjetër të rëndësishme apo interesante që është për neve, ne punojmë plane të operative policore, të cilat i përshtaten situatës”, tha Elshani.

Ai tha se, edhe në rast se mund të ketë ndonjë veprimtari kriminale, në veri të vendit ka policë të mjaftueshëm që të reagojnë.

“Ne kemi pasë policë të mjaftueshëm nëpër qendrat e votimeve në kohë të caktuara. Në fakt që nga dje kemi qenë të angazhuar, vazhdojmë të jemi edhe sot. Nuk ka diçka për me theksu situata duket e qetë. Nuk kemi informacion që mund të ndodhë diçka. Po në rast se vjen deri tek ndonjë veprimtari kriminale apo diçka të tillë, ne kemi policë të mjaftueshëm në këtë vend që të reagojnë”, tha Elshani. /atvlive.tv

Ministri i ministrisë së Administrimit të Pushtetit Lokal, Elbert Krasniqi vizitoi qendrën e votimit në fshatin Soqanicë të Leposaviqit.

Në konferencën për media nga fshati Soçanicë e Leposaviqit, Krasniqi ka thënë se Lista Serbe, e cila ka bërë thirrje për bojkotim të procesit zgjedhor të së dielës për shkarkimin ose jo të kryetarëve të komunave veriore, i shohin institucionet vetëm për vete dhe jo për qytetarët.

“Lista Serbe dëshiron ta ketë monopolin mbi politikën e serbëve në Kosovë. Ata i shohin institucionet vetëm për vete dhe jo për qytetarët. Ata vazhdojnë t’i kenë ulëse të rezervuara për komunitetin serb në Kuvend dhe mos t’i përfaqësojnë interes të qytetarëve, mirëpo t’i marrin pagat e Kuvendit”, ka thënë ai.

Derisa u ka bërë thirrje qytetarëve të kësaj zone që të marrin pjesë në votim, Krasniqi ka njoftuar se procesi deri tani po shkon në rregull.

“Unë sot fillova t’i vizitoj disa prej hapësirave ku po organizohet votimi i pyetjes se a do të duhet të largohet kryetari i komunës nga funksioni ose jo, një proces i filluar vitin e kaluar në gusht kur filluam si ministri që të hapim mundësinë që qytetarët të deklarohen rreth pakënaqësisë së tyre për kryetarët në funksion. Udhëzimi administrativ e ka hapur mundësinë që përmes peticionit të parashtrohet me 20 për qind të votuesve të një qyteti ku ata e kanë iniciuar këtë peticion. Sot është hapur gjithçka në rregull dhe po shohim si po shkon procesi. Qeveria e Kosovës e ka pasur detyrën dhe mandatin që të mundësojë që qytetarët që dëshirojnë të shprehin pakënaqësinë e tyre ta bëjnë me të drejtën që u garantohet përmes Ligjit për Vetëqeverisje Lokale. Detyrë e jona ka qenë ta bëjmë këtë mundësi që qytetarët ta shprehin vullnetin e tyre. Detyrë e shtetit ka qenë edhe organizimi i procesit, pjesa tjetër i mbetet qytetarëve”, është shprehur ai.

Zoran Stojanoviq kryesues i Komisionit Komunal Zgjedhor në komunën e Leposaviqit ka thënë se gjithçka po shkon sipas planit. Ai ka theksuar se ka pasur probleme të vogla që janë tejkaluar shpejt, raporton Ekonomia Online.

“Çdo sen është duke shkuar në bazë të planit. Komuna e Leposaviqit ka pozitë gjeografike me territor shumë të madh ka diku rreth 550 kilometra katror dhe për shkaqe teknike nuk kemi arritë me i hapë. Por kemi arrit prap me ia dalë. Shkolla në Leposaviq e kemi pasur një inspektim me 5 prill por pas 5 prillit me një bojkot nuk na është lejuar me i hapë. Pse nuk është lejuar kanë thënë se i kemi disa aktiviteteve shkollore, nuk dihet çfarë aktivitete. Deri tash në ora 11 i kemi informatae para.

Ndërsa Selim Mehmeti nga komuna e Novo Bërdës ka treguar se risi është se kësaj here do të votohen 10 kandidatë.

“Risi kemi që do të votohen 10 kandidatë. Trajnimi për kamera është mbajt kemi dhënë edhe udhëzues, KQZ-ja është duke e bë të pamundurën me siguru rrymë, ne jemi këtu tërë kohën”, ka thënë Selimi.