Category: Lajme

Bashkim Kastrati nga Instituti Hidrometerologjik i Kosovës ka bërë të ditur se maji i këtij viti ishte i dyti më i ngrohti në nivel global në të gjithë tokën dhe detin, sipas buletinit të fundit të Shërbimit të Ndryshimeve Klimatike Copernicus.

Sipas tij, Evropa përjetoi një kalim të shpejtë klimaterik nga kushtet më të freskëta se mesatarja në një valë nxehtësie jashtëzakonisht të hershme dhe intensive.

“Evropa përjetoi një kalim të shpejtë klimaterik nga kushtet më të freskëta se mesatarja në një valë nxehtësie jashtëzakonisht të hershme dhe intensive si në: Francë, Britani të Madhe, Irlandë dhe Portugali, që përjetuan majin e tyre më të nxehtë rekord”.

“Pjesë të mëdha të Evropës perëndimore, qendrore dhe lindore përjetuan kushte më të thata se mesatarja ndërsa në Turqi, Bullgari dhe Moldavi kishte përmbytje të gjerë”, shkroi ai.

Me ritmin aktual të punës në Qendrat Komunale të Numërimit, procesi i numërimit të votave për kandidatë nga vendvotimet e rregullta pritet të përfundojë më së largu të martën.

E niveli i numërimit në shkallë vendi ka arritur mbi 75 për qind, të mërkurën. Deri tani, procesi është përmbyllur në 18 komuna, kryesisht ato me numër më të vogël votuesish.

Në fazën përfundimtare të numërimit janë Leposaviqi, Kaçaniku, Skenderaj, Istogu, Klina dhe Rahoveci. E, në Prishtinë numërimi ka kaluar një të katërtën e votave, ndërsa në Prizren mbi 40 për qind.

Në Gjilan procesi i është afruar 50 përqindëshit, ndërsa në të gjitha komunat e tjera janë numëruar më shumë se gjysma e votave.

Me këtë dinamikë pune, e fundit numërimin e votave do ta përfundojë Prishtina – në fillim të javës së ardhshme.

Megjithatë kjo nuk nënkupton përfundim të të gjithë procesit numërues për shkak se ka edhe vota të tjera që numërimi ende nuk ka nisur.

“Bëhet fjalë për fletëvotimet nga votimi nga 30 përfaqësi diplomatike, ku kanë votuar 22 mijë e 414 qytetarë, pastaj fletëvotimet nga votimi me postë në 23 kutitë postare nga ku janë tërhequr më shumë se 85 mijë e 700 pako të supozuara me fletëvotime, pastaj fletëvotimet nga votimi me kusht i mundësuar në 52 vendvotime, ku janë evidentuar 8 mijë e 751 votues dhe fletëvotimet nga votimi i personave me nevoja të veçanta ku kanë qenë të regjistruar 3 mijë e 144 votues”, ka thënë zëdhënësi i KQZ-së, Valmir Elezi.

Elezi ka thënë se aktivitete po zhvillohen edhe në Qendrën e Numërimit dhe Rezultateve.

Deri në mëngjesin e së mërkurës janë verifikuar afër 7 mijë e 300 zarfe nga diaspora, prej tyre të vlefshme janë mbi 98 për qind.

“Nga pjesa më e madhe e pakove që janë sjellë në Kosovë, procesit të vlerësimit i janë nënshtruar më shumë se 7 mijë të tilla, prej të cilave janë aprovuar 7 mijë e 153, ndërkaq janë refuzuar 142. Arsyeja më e shpeshtë se pse janë refuzuar këto pak është se në 114 raste mungon dëftesa e regjistrimit”, ka thënë Elezi

Në QNR do të numërohen edhe afro 10 mijë fletëvotime që janë nga votimi me kusht dhe i personave me aftësi të kufizuara.

Pasi presidenti i Turqisë, Recep Tayyip Erdogan, i drejtoi kritikat më të ashpra Izraelit dhe e krahasoi Benjamin Netanyahu me Adolf Hitler, erdhi edhe një reagim i menjëhershëm dhe jashtëzakonisht i ashpër nga kryeministri izraelit.

Netanyahu nuk kurseu fjalët, duke e quajtur liderin turk diktator dhe duke e akuzuar për shkelje të rënda të të drejtave të njeriut, si dhe për mbështetje të terrorizmit.

“Diktatori antisemit Erdogan – i cili kryen gjenocid ndaj kurdëve, mbështet organizatën terroriste Hamas, shtyp popullin e tij dhe burgos kundërshtarët politikë – është personi i fundit që mund t’i japë leksione morale Shtetit të Izraelit”, deklaroi Netanyahu, raporton timesofisrael.

Në vijim të reagimit të tij, kryeministri izraelit hodhi poshtë të gjitha akuzat e Erdoganit për gjenocid në Gaza, duke theksuar se veprimet e vendit të tij janë legjitime.

“Shteti i Izraelit dhe IDF-ja (Forcat Mbrojtëse të Izraelit), si ushtria më morale në botë, do të vazhdojnë të ndërmarrin veprime të fuqishme kundër Iranit dhe aleatëve të tij”, shtoi Netanyahu.

Kjo përplasje e ashpër akuzash shënon një pikë të re të ulët në marrëdhëniet mes Ankarasë dhe Tel Avivit, të cilat prej muajsh janë në krizë të thellë për shkak të operacioneve ushtarake izraelite në rajon.

Ndërsa Erdogan bën thirrje për krijimin e një “fronti humanitar” për ndalimin e Izraelit, Netanyahu kundërpërgjigjet duke e zhvendosur fokusin te politika e brendshme turke dhe ndikimi rajonal i Iranit.

34-vjeçari Eglant Koçi paraditen e 4 qershorit doli nga banesa e tij për të ardhur një pallat në bulevardin “Zhan Dark” për të takuar shokun e tij Armand Shakaj.

Brenda zyrës Eglanti hyri, por nuk doli më. Në brendësi të të cilës policia gjeti gjurmë gjaku e mbetje biologjike që do t’i vlejnë hetimit.

Kati i dytë i këtij pallati ka disa njësi tregtare dhe korridoret janë me kamera të cilat kanë kapur 34-vjeçarin duke hyrë, por jo duke dalë. Armand Shakaj duket se ishte gjakftohtë në krim, pasi është kujdesur të fshehë gjurmët duke shkëputur kamerat në korridore.

Pas shkëputjes së kamerave të brendshme Shakaj urdhëroi kamerierin e lokalit të tij Enea Zyferin të shkëpuste energjinë elektrike, që kamerat të mos kapnin transportimin e 34-vjeçarit nga zyra drejt makinës së tij që qëndronte e parkuar jashtë pallatit.

Zyferiu u arrestua si bashkëpunëtor dhe këtë të mërkurë Gjykata e Tiranës e la në burg deri në përfundim të hetimeve.

Para gjykatës ai ka thënë se nuk ka dijeni për fatin e 34-vjeçarit pasi zbatoi vetëm urdhrat e pronarit. Ai i tha se do të transportonte një frigorifer.

Pas disa ditësh hetimesh intensive Policia e Tiranës arriti të gjente mjetin e autorit të dyshuar ku në bagazhin e tij u gjetën materiale biologjike që janë çuar për inspektim.

Me vlerë për hetimin është dhe motori i viktimës që sipas hetimeve autori i dyshuar pas krimit e ka çuar fillimisht tek tregu elektrik më pas në zonën e 5 majit ku dhe e sekuestroi policia.

Provat në zyrë, makinë motor janë çuar në laboratorin shkencor, i cili pritet të nxjerrë një përgjigje zyrtare./TCh

Komuna e Prishtinës ka njoftuar se pas përfundimit të një pjese të punimeve dhe riparimeve infrastrukturore në lagjen “Lakërishtë”, është bërë riorganizimi i qarkullimit të mjeteve motorike në rrugët “Hekurudha” dhe “Vicianum”, duke rikthyer qarkullimin në gjendjen e mëparshme.

Sipas njoftimit, rruga “Hekurudha” do të jetë me një kah të qarkullimit, duke filluar nga kryqëzimi me rrugën “Magjistralja M-2”, në drejtim të rrugëve “Tirana” dhe “Bekim Fehmiu”.

“Rruga ‘Vicianum’ do të jetë me një kah të qarkullimit, duke filluar nga kryqëzimi me rrugën ‘Ahmet Krasniqi’, në drejtim të rrugës ‘Magjistralja M-2’. Rrugët ‘Bekim Fehmiu’ dhe ‘Tirana’ do të vazhdojnë të jenë me dy kahje të qarkullimit”, thuhet në njoftim.

Komuna e udhëhequr nga Përparim Rama i arsyeton këto ndryshime me synimin për përmirësim të rrjedhës së trafikut, rritjen e sigurisë në komunikacion dhe pas përfundimit të punimeve infrastrukturore në lagjen “Lakërishtë”.

Andaj, Komuna u ka bërë lutje të gjithë pjesëmarrësve në trafik që të respektojnë sinjalistikën rrugore dhe të tregojnë kujdes të shtuar gjatë qarkullimit.

Biznesmeni Behgjet Pacolli ka reaguar ashpër ndaj debatit publik lidhur me çështjen “Delfos”, duke e cilësuar narrativën për këtë rast si “gënjeshtër të turpshme” që, sipas tij, ka krijuar huti në opinion dhe është përdorur si instrument për vendime gjyqësore të kundërligjshme.

“Delfos” është emër i një rasti/strukture biznesi që lidhet me një konflikt ligjor e komercial, jo një institucion apo koncept i vetëm juridik.

Përmes një postimi në Facebook, Pacolli ka deklaruar se këto veprime, përveç dëmit që i është shkaktuar kompanisë MABCO dhe interesave të tjera, kanë tentuar të cenojnë edhe rendin juridik dhe kushtetues të vendit.

Ai ka kërkuar që institucionet përgjegjëse të hetojnë dhe ndëshkojnë, siç u shpreh, “fenomenet e jashtëligjshme”.

Në reagimin e tij, Pacolli ka kritikuar gjithashtu mënyrën se si, sipas tij, çështja është trajtuar në diskursin publik dhe institucional, duke theksuar se për muaj me radhë janë qarkulluar pretendime dhe spekulime që më pas janë rikthyer në debat publik edhe pas vendimeve gjyqësore.

“Faktet ose janë të vërteta që në fillim, ose nuk janë fare”, ka thënë ai, duke shtuar se çështjet nuk mund të ndryshojnë vlerë juridike varësisht nga momenti kur ato artikulohen.

Pacolli ka ngritur shqetësime edhe për kufijtë e marrëdhënieve koncesionare dhe të drejtave pronësore, duke theksuar se askush nuk mund të disponojë të drejta që, sipas tij, nuk i takojnë ekskluzivisht.

Ai ka shtuar se gjykatat janë vendi ku faktet duhet të provohen, ndërsa ka paralajmëruar se kur debatet juridike shndërrohen në “alarme publike”, lindin dyshime mbi qëllimet reale pas tyre.

“Koha zakonisht i jep përgjigjet që politika përpiqet t’i fshehë”, ka deklaruar Pacolli.

Gjykata Themelore në Prishtinë ka njoftuar se ka caktuar seancën e shqyrtimit fillestar ndaj 21 personave të akuzuar për Masakrën e Reçakut, të cilët ndër të tjera ngarkohen me veprën penale të krimeve të luftës kundër popullsisë civile.

Gjykimi në mungesë do të zhvillohet ndaj të pandehurve: Obrad Stevanoviq, Radomir Markoviq, Krsmam Jeliq, Goran Radosavljeviq, Zhivko Trajkoviq, Bogoljub Janiçeviç, Milan Lekiq, Radomir Miliq, Dragan Djorgoviq, Branko Mladenoviq, Dragan Jasoviq, Momçilo Sparavalo, Darko Amanoviq, Srboljub Vujinoviq, Bozhidar Marinkoviq, Zoran Stanojeviq, Milan Josanoviq, Goran Petkoviq, Dragoslav Nikoliq, Çedomir Aksiq dhe Zvonimir Janiçijeviq.

Në një komunikatë për media bëhet e ditur se, sipas propozimit të Prokurorisë Speciale të Republikës së Kosovës, gjykimi në këtë çështje do të zhvillohet në mungesë të të pandehurve, pasi të njëjtit kanë qenë të paarritshëm deri në momentin e ngritjes së aktakuzës.

“Për këtë arsye, përmes këtij njoftimi ju bëhet thirrje të pandehurve, të lartcekur që të paraqiten dhe të dorëzohen para organeve të ndjekjes së Republikës së Kosovës. Gjithashtu, u bëhet thirrje të gjithë personave që posedojnë informacione relevante lidhur me vendndodhjen e të akuzuarve, që t’i komunikojnë këto informacione Policisë së Kosovës apo organeve tjera kompetente”, thuhet në njoftim.

Tutje, është bërë e ditur se seanca do të mbahet më 20 korrik në Gjykatën Themelore në Prishtinë.

Sipas aktakuzës, në periudhën 1998–1999, të pandehurit, në bashkëkryerje, si pjesëtarë të Ushtrisë së ish-Jugosllavisë, Brigadës “243 të Mekanizuar”, Armatës së III-të, e njohur si “Korpusi i Prishtinës”, si dhe pjesëtarë të Ministrisë së Punëve të Brendshme (MUP), kanë kryer edhe trajtim çnjerëzor, shkatërrim të pasurisë, dëbim masiv dhe spastrim etnik të popullsisë civile.

“Të pandehurit fillimisht e rrethuan fshatin Reçak nga vendet e quajtura ‘Pishat’, ‘Gështenjat’ dhe ‘Çesta’. Më pas, nga distanca e granatuan fshatin me mjetet ushtarake, kontrolluan shtëpi më shtëpi dhe ndanë burrat nga gratë dhe fëmijët, ku i detyruan të largohen nga fshati, ndërsa burrat e ndaluar i ekzekutuan”, thuhet në komunikatën e Prokurorisë.

Hetimet e prokurorisë kanë vërtetuar se të pandehurit kanë ushtruar dhunë fizike ndaj civilëve, duke i rrahur me kondakë armësh, shqelma, dru, zinxhirë dhe mjete të tjera të forta.