Category: Lajme

Përgatiti: Arian Hajdaraj

Deputetët e Kuvendit do ta kenë mundësinë që së shpejti të votojnë pro ose kundër Ligjit për Kripto-valutat.

Siç merr vesh ATV-ja, ligji, pas kalimit në komisionin për ekonomi në fillim të muajit maj, pritet të hyjë në rendin e ditës në seancën e radhës.

Miratimi i një ligji të tillë po mirëpritet nga ekspertë të monedhave virtuale, por edhe ekonomistë, pasi, sipas tyre, ai pjesërisht mund edhe t’i mbrojë qytetarët nga skemat piramidale.

“Ka me pasë shumë benefite. Mashtrimet kanë me mujtë me u luftu edhe me u parandalu në masë të madhe. Kur ka legjislacion gjenden mashtruesit”, tha Labinot Sylejmani, ekspert i kriptovalutave.

“Është e mirëseardhur. I krijon disa rregulla për funksionimin brenda këtij biznesi. Është impakt edhe ekonomik. Këto transaksione bëhen të ligjshme”, tha Fidan Qerimi, profesor i ekonomisë.

Megjithatë, vonesat konsiderohen së kanë ndikuar negativisht, posaçërisht në aspektin e prodhimit.

“Është mirë që është ndërmarrë hapi, edhe pse është vonë, posaçërisht në aspektin e prodhimit të kripto-valutave, që ka mujtë me qenë profitabil, të cilat kanë mujtë me qenë të mira për disa familje edhe për disa familje, por edhe për shtetin nëse ishin tatuar”, tha Sylejmani.

“Vonesat në këtë ligj shkaktojnë impakt negativ në të hyrat e shtetit. Kanë ndodhur deri tash pa një rregull të caktuar nga shteti”, tha Qerimi.

Nismën për hartimin e një ligji të kripto-valutave e kishte ndërmarrë Kuvendi i Kosovës në verë të vitit 2021.

Vetëm në vitin 2023, Policia kishte konfiskuar më shumë se 1500 pajisje që shërbejnë për prodhimin e kriptovalutave. Vlera e të gjithave shkonte mbi 250 mijë euro.

Më shumë detaje i gjeni në Edicionin Qendror të lajmeve në videon më poshtë:

Përgatiti: Driton Sadiku

Ministria e Infrastrukturës nënshkroi memorandum bashkëpunimi në vlerë gjysmë milioni, me komunën e Novobërdës për disa projekte infrastrukturore.

Por, lista e projekteve për të cilat u ndanë këto para, sipas zyrtarëve komunalë nuk shkoi nga komuna, por nga zyrat e lëvizjes Vetëvendosje në Novobërdë.

Sipas nënkryetarit Bajrush Ymeri, kjo ministri asnjëherë nuk iu është përgjigjur kërkesave të tyre për plane infrastrukturore, tash e 3 vjet qeverisje.

“Kjo listë ka shku nga zyra e lëvizjes Vetëvendosje pa konsultime paraprake me komunën. Pra kërkesat tona, planet tona nuk janë marrë parasysh, por janë marrë parasysh kërkesat e Vetëvendosjes”, tha Ymeri.

Madje, edhe këto projekte nuk kanë shpresë që do të realizohen së shpejti, meqë shumica e parave do t’u jepen në dy vitet e ardhshme.

Sipas marrëveshjes, gjatë këtij viti Ministria do t’i financojë projektet vetëm me 92 mijë euro.

“Në marrëveshjen e mirëkuptimit që e kemi nënshkruar, shkruan se nga shuma totale prej 500 mijë eurosh do të ndahen vetëm 50 mijë për këtë vit, dhe pjesa tjetër për dy vitet e ardhshme pra 2025 dhe 2026”, tha Ymeri.

Njohës të qeverisjes lokale thonë se planifikimet e gjata rrezikojnë projektet.

“Nënshkrimi i memorandumeve për më shumë se një vit, respektivisht për një periudhë që kap edhe qeverisjen tjetër, pra qeverinë që mund të dalë nga zgjedhjet e ardhshme, pra është padrejtësi ku qeveria e re do të ngarkohej me zbatimin e këtyre memorandumeve. Realisht çfarë ndodh në praktikë me qeverisjen e re këto memorandume mbesin të pazbatuara ose ridestinohen, apo riorganizohet dhënia e këtyre mjeteve nga niveli qendror”, tha Qëndrim Arifi, njohës i qeverisjes lokale.

Sidoqoftë, nga Ministria e Infrastrukturës nuk treguan nëse lista e projekteve ka shkuar nga zyrat e Vetëvendosjes te ta, megjithatë nga Vetëvendosja në Novobërdë e mohuan të kenë ndikuar në përzgjedhje.

Memorandumi parasheh rregullimin e 10 rrugëve nëpër 10 fshatra të Novobërdës si dhe ndërtimin e dy urave.

Më shumë detaje i gjeni në Edicionin Qendror të lajmeve në videon më poshtë:

Përgatiti: Kastriot Tahiri

25 vjet më parë ndodhi masakra në burgun e Dubravës, që njihet si njëra ndër më të mëdhatë të regjimit serb të kryer ndaj shqiptarëve.

Për pesë ditë radhazi, brenda burgut u vranë 117 persona e u plagosën mbi 200 të tjerë.

Pak ditë para datës 19 maj, forcat serbe kishin filluar që të burgosurit që ishin në burgjet e tjera t’i sillnin në burgun e Dubravës, që të realizonin siç thuhet planin, për ta kryer masakrën.

“Është një datë ku përzihen ndjenja e krenarisë dhe dhimbjes, ishte e organizuar të ndodh diçka e tillë, se që nga prill kishin filluar t’i grumbullimi i të burgosurve nga burgjet e tjera në burgun e Dubravës. Që të realizohet më lehtë skenari, që e realizuan me datë 19,20,21,22, 23 dhe 24”, tha Bislim Zogaj, i mbijetuar i Masakrës së Dubravës.

I mbijetuari i masakrës, Bislim Zogaj, kujton tmerrin që e përjetoi, derisa i shihte shokët e tij, disa të vrarë e të tjerë të plagosur.

“Pata fatin që të kisha njohuri profesionale, dhe më duhej të vrapoja që t’iu jepja ndihmë të plagosurve, dhe në mesin e të plagosurve e të vrarëve, ka pas shumë që I kam njohur, e aq ma tepër disa që I kanë pasur plagët më të mëdha që ishte e pamundur t’i shpëtoja, e ishin castet më të rënda që nuk ja dëshiroj askujt t’i përjetojë”, tha Zogaj.

Derisa thotë se dihen iniciatorët, Zogaj pret ende të ngrihet një aktakuzë për këtë masakër.

“Është për të ardhur keq që nuk ka aktakuzë, ndaj atyre që kanë bërë këtë masakër. Edhe nëse nuk dihet fajtori kryesor që e ka ngre gishtin për ta bërë këtë masakër organizatorët dihen, ngase burgu ka qenë nën administrimin e ministrisë së drejtësisë së Serbisë, dhe besoj se nëse do të fillonte zingjiri nga ministria deri te drejtori I burgut do të diheshin edhe gardianët që kanë gjuajtur në drejtim të të burgosurve”, tha Zogaj.

Brenda burgut, gjendet një pllakë përkujtimore me emrat e të gjithë atyre që janë vrarë në këtë masakër. Ndërsa vitin e kaluar rrëfimet e të mbijetuarve u botuan në librin “Tmerri ka emër”.

Më shumë detaje i gjeni në Edicionin Qendror të lajmeve në videon më poshtë:

Përgatiti: Pranvera Krasniqi

Opozita parlamentare vazhdon të ketë qasje të ndryshme sa i përket shkuarjes në zgjedhje të jashtëzakonshme.

Lidhja Demokratike e Kosovës e konsideron favor ndaj kryeministrit Albin Kurti, votën pro shpërndarjes së Kuvendit, si hap i parë.

Deputetja e këtij subjekti opozitar, Hykmete Bajrami, thotë se Kurti duhet të japë dorëheqje.

“Ne absolutisht që jemi të gatshëm për zgjedhje të reja, po besoj që asnjë parti politike nuk është më e gatshme se Lidhja Demokratike e Kosovës…”, tha Bajrami.

Ish-kryetari i Lëvizjes Vetëvendosje, Visar Ymeri, ka kritika për opozitën që, sipas tij, nuk kanë qëndrim të përbashkët për mënyrën e shkuarjes në zgjedhje të reja.

Sipas tij, subjekti më i madh opozitar, Partia Demokratike, është më afër për këtë çështje me partinë në pushtet, Lëvizjen Vetëvendosje.

“Tashmë kryeministri Kurti aktualisht është më i interesuar që të shkojë në zgjedhje përmes shpërndarjes së Kuvendit, që është më e afërt me Partinë Demokratike të Kosovës në këtë qëndrim…”, tha Ymeri.

Nisma Socialdemokrate aktualisht nuk është pjesë e Kuvendit, por synon pushtetin në koalicion me Aleancën për Ardhmërinë e Kosovës. Kryetari i së parës, Fatmir Limaj, konsideron se kryeministri Kurti nuk ka asnjë projekt të vetin, këtë mandat.

“Me atë që kam parë unë nuk ka asnjë gjë që ka lëvizur, përveç harnimit të projekteve të mbetura që dikur ata i kanë sharë”, tha Limaj.

Të hënën, kryeministri Kurti takoi në darkë krytarin e PDK-së, Memli Krasniqi, me të cilin patën qëndrime të përafërta se duhet shpërndarë kuvendi, që të shkohet në zgjedhje. Një propozim të tillë, PDK mund ta bëjë në parlament, javën që po vjen.

Më shumë detaje i gjeni në Edicionin Qendror të lajmeve në videon më poshtë:

Përgatiti: Armand Hoti

Policia e Kosovës, nga e shtuna mori urdhër që ta ndalojnë Enver Sekiraqën, kudo që e shohin.

Por, i akuzuari për nxitje në vrasjen e Policit Triumf Riza në vitin 2007, ende nuk ka rënë në duart e autoriteteve të rendit.

Vendimi i Gjykatës së Apelit për ta paraburgosur Sekiraqën, nuk u ekzekutua, meqë Policia e Kosovës, nuk e gjeti atë në shtëpi as gjatë së premtes dhe të shtunën.

Avokatja mbrojtëse e Enverit, Kosovare Kelmendi, thotë se nuk di gjë për vend ndodhjen e klientit të saj. Megjithatë, Kelmendi thekson se ai nuk është arratisur.

“Unë personalisht nuk mund ta quaj dhe konsideroj arratisje për faktin se i njëjti ka qenë në liri dhe ai nuk ka qenë i obliguar ta pres në shtëpi një vendim të Apelit në cilindo variant. Tani, fakti që policia sot nuk e kanë gjetur në shtëpi, kjo nuk është kontestuese, por, a është arratisur apo për momentin nuk ka qenë në shtëpi dhe ka mundësi të kthehet apo paraqitet, unë ketë nuk e di meqë nuk kam informacion, meqë është fjala për 24 orët e para pas vendimit të Gjykatës se Apelit. Kjo mbetet të shihet tutje”, tha Kosovare KELEMNDI, avokate e Enver Sekiraqës.

Avokati Valdet Hoxha, thotë se nëse verifikohet se Sekiraqa është arratisur, atëherë kjo do të bartë pasoja ligjore për të akuzuarin.

“Nëse i njëjti ka qenë duke u mbrotjur në liri, pra nuk e ka pasur të kufizuar lirinë e lëvizjes, ndërsa nëse konfirmohet se i njëjti është arratisur, atëherë natyrisht që ai mendoj duhet t’i ketë menduar pasojat juridike dhe favoret ligjore në fazat e mëvonshme në vuatje të dënimit nëse aktgjykimi bëhet i plotëfuqishëm”, tha Hoxha.

Ministrja e Drejtësisë, Albulena Haxhiu kritikoi gjyqësorin të shtunën, për mostrajtim të çështjes me profesionalizëm.

Pas ankesës së Prokurorisë Speciale, Gjykata e Apelit, kishte vendosur ta kthente Sekiraqën në paraburgim, pasi Themelorja më 3 maj ia ndërpreu masën e arrestit shtëpiak duke e lënë të mbrohej në liri.

Në po këtë datë, Enver Sekiraqa, për herë të tretë pas kthimit të rastit në rigjykim u dënua me 25 vite burgim për nxitje në vrasjen e policit Triumf Riza.

Më shumë detaje i gjeni në Edicionin Qendror të lajmeve në videon më poshtë:

Ka përfunduar vizita e prindërve të ish-presidentit Thaçi në Qendrën e Paraburgimit në Hagë. Babai dhe nëna e Thaçit ishin sot për vizitë tek ai, pas dy vitesh kur e kishin takuar për herë të parë që nga dorëheqja dhe dërgimi i tij në Hagë.

Pas daljes nga Njësia e Paraburgimit të Dhomave të Specializuara, babai i ish-presidentit Thaçi u shpreh i lumtur që e pa sërish djalin e tij.

“Jemi të lumtun që na u dha rasti me ardh, me pa djalin tonë, Hashimin. Na ka marrë malli për të. Na merr malli, se jemi mësu me pa shpesh. Na mungon djali. Na mungojnë krejt shokët e tij. I mungojnë venit, Kosovës. Pa marrë parasysh që u kanë i nxanun me punë të shtetit, Hashimi gjithë ka gjetë kohë edhe ka ardh me na pa në Brojë. Se na pleq, i kemi ba do vjet, mezi po himë e po dalim në kamë tona. Ishalla nuk shkon gat e kthehen tanë, jo veç djali jonë, po krejt këta shokët këtu, kthehen n’shpi të veta, qaty ku kanë punu shumë për qat Kosovë mu ba e lirë e shtet i pamvarun. I presim na familja me u kthy sa ma shpejt, i pret krejt shqiptaria. Ata e kanë venin n’Kosovë e jo këtu”, ka thënë babai i ish-presidentit Thaçi, Haxhi Thaçi.

Ndryshe, vizita e parë dhe e vetme e prindërve të Thaçit në Hagë ishte më 8 qershor 2022. Pas kësaj periudhe të gjatë që nuk e kishin parë djalin e tyre, Haxhi Thaçi dhe Hyra Thaçi që po i afrohen moshës 90-vjeçare, sot sërish kanë marrë rrugën e largët nga Kosova drejt Hagës për t’u takuar dhe çmallur me djalin e tyre.

Nën masa të rrepta të sigurisë dhe me kufizime të shumta, Thaçi ishte lejuar në vitin e kaluar që t’i vizitonte dy prindërit e tij për disa orë në Kosovë, pas përkeqësimit të gjendjes së nënës së tij, e cila siç u pa edhe nga pamjet e sotme, me vështirësi të shumta edhe arrin të ec me këmbët e saj.

Pasnesër, më 21 maj, është një prej seancave më të rëndësishme të procesit gjyqësor në rastin ‘Thaçi dhe tjerët’, ku pritet të rishqyrtohet edhe kohëzgjatja e gjykimit dhe numri i dëshmitarëve të Zyrës së Prokurorit të Specializuar.

Komuna e Prishtinës ka njoftuar se sot është djegur një kontejner i mbeturinave.

Në njoftim thuhet se falë reagimit të qytetarëve është parandaluar djegia edhe e konejnerëve të tjerë.

Tutje theksohet se policia është në kërkim të autorëve.

“Ju lutemi qytetarë, keni kujdes mos i digjni kontejnerët”, thuhet në apelin e Komunës.

Ka vdekur ditën e shtunë ish-ushtari i Ushtrisë Çlirimtare të Kosovës, Mehmet Bylykbashi.

Më parë, i ndjeri kishte kërkuar ndihmë edhe për shërim.

Ndërsa lajmin për vdekjen e Bylkykbashit e kanë dhënë miq e familjarë.