Sot mbushen 26 vjet kur më 25 maj 1998, forcat serbe hynë në Lybeniq të Pejës, duke vrarë e masakruan nëntë banorë të Lybeniqit, e më vonë edhe burrat e tjerë të fshatit.
Gjenocidi i kryer në këtë vendbanim ndaj popullsisë së pafajshme shqiptare më 25 maj 1998 dhe më 1 e 7 prill 1999, është njëri nga krimet me të mëdha që kanë kryer forcat policore, ushtarake e para ushtarake serbe në Kosovë.
Kryetari i Lidhjes së Historianëve të Kosovës “Ali Hadri” dega në Deçan, Shkodran Imeraj, ka thënë kohë më parë se drejtësia vendore dhe ajo ndërkombëtare kanë dështuar në ndjekjen dhe dënimin e autorëve të masakrave që u kryen në Lybeniq gjatë viteve 1998-1999.
Sipas Imerajt, gjenocidi që kryen forcat ushtarake, policore e paramilitare serbe në Lybeniq është gjenocidi më i madh që është kryer ndaj popullsisë shqiptare në historinë e fshatit Lybeniq.
Rrebeshe shiu dhe bubullima parashihen pasditen e sotme.
Vende-vende reshjet edhe mund të jenë paksa më intenzive. Temperaturat minimale zbresin në 9C e 11C, derisa ato maksimale arrinë deri në 24C e 25C.
Rrebeshe dhe bubullima do të ketë edhe të dielën.
“Ditën e diel rrebeshe më të shumta shiu dhe bubullima përfshinë edhe pjesë tjera të vendit, ndërkohë që temperaturat zbresin në 20C e 22C. Ditën e hënë mundësi për mot relativisht më stabil, me më shumë intervale me diell, e temperaturat sërish rriten në 23C e 24C. Nga dita e martë sërish mundësi për rrebeshe të shiut orëve të pasdites”, thuhet në njoftim.
Partitë opozitare e quajnë të paaftë dhe jo kompetente Qeverinë e Kosovës. Sipas tyre, ekzekutivi ka dështuar plotësisht në shumë aspekte e së fundi mosanëtarësimi në KiE dëshmon edhe një herë se sa e pa aftë është Qeveria aktuale, raporton Ekonomia Online.
Deputetja e Partisë Demokratike të Kosovës, Ariana Musliu-Shoshi për Ekonomia Online ka thënë se dështimi i anëtarësimit të Kosovës në Këshill të Evropës është dështim i kësaj Qeverie pasi sipas saj, nuk ka asnjë koordinim me aleatët.
Ajo ka thënë se në momentet e fundit kemi parë “lojëra” nga Qeveria duke thënë se po e dërgojmë një draft- statut tjetër.
“Kjo ka qenë pak a shumë e pritshme duke marrë parasysh faktin që si shtet nga kjo Qeveri nuk ka asnjë koordinim me aleatët tanë dhe nuk kemi asnjë mundësi praktike që të marrim votë. Nëse ne nuk kemi një koordinim me vendet mike e kemi parë si rrjedhojë kushtin i cili I është vendosur Kosovës. Nuk ka qenë i papritshëm ka qenë një ndër çështjet që është diskutuar në shumë takime prandaj është kërkuar veprim konkret nga kjo Qeveri që të marrë hapa konkret pra drejt dërgimit të Draftit të statutit të Asociacionit pra në Gjykatën Kushtetuese. Një hap i tillë ka munguar nga kjo Qeveri, përkundrazi në momentet e fundit kemi parë edhe lojëra që janë luajtur duke thënë që në një draft- statut tjetër po e bëjmë po e dërgojmë. Ajo ka qenë më shumë për konsum të brendshëm po fatkeqësisht ka pasur një kundër veprim edhe tek aleatët tanë të cilët sa i kanë acaruar me një veprim të tillë nëse mund të them dhe si rrjedhojë nuk kemi pasur asnjë mbështetje që ne të jemi në agjendë në këtë mbledhje dhe aq më pak të kemi vote. Prandaj vlerësoj që qasja e Qeverisë ndaj aleatëve tanë duhet të ndryshojë duhet që ne të lobojmë dhe të kemi bashkëpunim të tillë që masat t’i heken tanimë për Republikën tonë. Duhet që të punojmë shumë, të lobojmë që të jemi në agjendën e ardhshme të Komitetit të Ministrave dhe të jemi në koordinim të plotë me kërkesat e aleatëve tanë sepse është e vetmja mënyrë se si ne mund të arrijmë që të jemi në agjendë e mbi të gjitha dhe të kemi votën për”, ka thënë ajo.
Musliu-Shoshi tutje ka thënë se pa i marrë hapat që janë kërkuar dhe pa e dërguar draft- statutin e Acociacionit në Gjykatën Kushtetuese, ne kemi problem që të kemi një inciativë nga shtetet anëtare që të mbahet mbledhje urgjente. Ajo mendon se janë forcat politike të cilat vendosin se si do të ecet në këtë proces.
“Në Këshillin e Evropës është Komiteti i Minstrave ai i cili vendos. Komiteti i Ministrave e dimë që mbahet një herë në vit pra mbledhja e rradhës e Komitetit të Minsitrave është në maj të vitit 2025, deri atëherë proceduralisht mundet vetëm nëse thirret ndonjë mbledhje e jashtëzakonshme apo urgjente e një gjë e tillë duhet të merret si inaciativë nga ndonjë shtet anëtar, tu marr parasysh faktin që asnjëherë nga shtetet anëtare të KiE nuk ka shprehur përkrahje për Kosovën. Pa marrë hapa të prekshëm që janë kërkuar, pa e dërguar draft statutin e Acoacionit në Gjykatën Kushtetuese, ne kemi edhe problem që të kemi një inciativë nga shtetet anëtare që të mbahet mbledhje urgjente dhe kjo rrjedhimisht kjo na lë. Me vet faktin që diskutimi i radhës hapat konkret kur mund të merren dhe zhvillimet tjera të brendshme brenda për brenda Republikës sonë dhe politikës na dërgojnë në faktin që mbledhja e rradhës pra Komiteti i Ministrave të vitit 2025 do të jetë koha kur potencialisht edhe ne mund të jemi në agjendë, pra krejt kjo varet nga politikat e brendshme sepse e dimë që deri në maj të vitit 2025 edhe ne do të kemi zgjedhje brenda për Brenda. Pastaj janë forcat politike të cilat do të vendosin se si do të ecet në këtë proces”, ka thënë Musliu-Shoshi për Ekonomia Online.
Nga ana tjetër deputetja e Lidhjes Demokratike të Kosovës, Rrezarta Krasniqi është shprehur se kanë qenë shumë optimistë se do të anëtarësohemi në Këshillin e Evropës. Sipas saj presidentja, kryeministri dhe kryeparlamentari e kanë dërgu një letër te Dora Bajakonis, ku janë zotuar se do ta implementojnë Asociacionin mirëpo, sipas saj edhe kjo dështoi.
“Kemi pritur që të anëtarësohemi mirëpo ju e patë që është bërë kusht Asociacioni, për në KiE dhe atë nuk e kanë tregur krerët e shtetit sepse s’ka pasur aspak transparencë sa i përket proceseve integruese. Ndërsa ne e kemi parë që presidentja, kryeministri dhe kryeparlamentari e kanë dërgu një letër te Dora Bajakonis, ku janë zotu se do ta implementojnë Asociacionin sa i përket Marrëveshjes së Ohrit, mirëpo u pa që edhe kjo dështoi të gjitha proceset integruese të këtij vendi. Njeriu kryesor që ka dështu është pikërisht, Albin Kurti sepse ju e dini se nuk ka votuar atëherë demarkacionin në vitin 2016 kur është shtyer procesi i liberalizimit të vizave. Nuk e ka votuar Marrëveshjen e Stabiliizm Asociimit e shumë e shumë Marrëveshje tjera. Pastaj e humbi edhe mundësinë e artë që kishim të kalojmë në Këshillin e Evropës. Nuk besoj që do të jetë pikë në rend dite edhe një herë në këtë vit Kosova në KiE, sepse une e di që mbahen ato takime një herë në vit. Nëse këta vetëm e kanë Marrëveshjen që do ta implementojnë Acoacionin për këto ditët në vijim, mirëpo nuk besoj aspak”, ka thënë ajo për Ekonomia Online.
Në këtë lokal në qendër të Prishtinës, më 13 tetor të vitit 2014, ishte vrarë rojtari Rrahman Uka.
Të dyshuar për këtë vepër ishin Masar Gërdovci e Sherif Krasniqi, ndaj të cilëve rasti është kthyer disa herë në rigjykim.
Të premten për të katërtën herë, Gjykata e Shkallës së Parë, sërish i shpalli ata fajtorë, me 25 vjet burgim së bashku, për kryerjen e veprës penale vrasje në bashkëkryerje.
“Masar Gërdovci shpallet fajtor dhe dënohet me 18 vjet për veprën e vrasjes në bashkëkryerje. Sherif Krasniqi për vrasje në bashkëkryerje dënohet me 7 vjet burgim”, tha kryetari i trupit gjykues, Avni Sylaj.
Të akuzuarit nuk ishin të pranishëm që ta dëgjojnë vendimin e trupit gjykues, derisa avokatët mbrojtës, u shprehën të pakënaqur me dënimin e shqiptuar.
“Lënda është rikualifikuar, por vendimi është i njëjtë. Lënda kot po kthehet në rigjykim”, tha Naim Rudari, avokat i Masar Gëdovcit.
“Nuk është vërtetuar se i mbrojturi im e ka shkrepur armën. Vendimin do ta apelojmë”, tha Haxhi Millaku, avokat i Sherif Krasniqit.
Dy herët e para, lënda ishte gjykuar në drejtim të veprës penale për vrasje të rëndë. Në rigjykimin e tretë, lënda ishte rikualifikuar në “vrasje”, dhe të akuzuarit ishin dënuar po ashtu me 24 vjet burgim së bashku.
As afati shtesë prej njëjavësh nuk ishte i mjaftueshëm që qytetarët e komunitetit serb të katër komunave veriore t’i nënshtrohen procesit për regjistrimin e popullsisë.
Procesi u bojkotua nga komuniteti shumicë edhe në komunën e Zveçanit, për çka kryetari Ilir Peci nuk është aspak i kënaqur.
“Sa ka qenë afati i rregullt, ka pasur një numër shumë të vogël të qytetarëve serbë, mund të them që nëse krahasohet me 10 mijë banorë sa llogaritet t’i ketë Zveçani, janë regjistruar vetëm 6 prej tyre. Javën e fundit ua kemi mundësuar regjistrimin edhe këtu në objektin e komunës. Numri është rritur, por jo me një përqindje të madhe, nuk është numër aspak i kënaqur”, tha Peci.
Procesit të regjistrimit të popullsisë nuk i janë përgjigjur qytetarët e komunitetit serb në Zubin Potok.
“Mund të them që përgjigja e qytetarëve karshi këtij procesi ka qenë shumë e vogël, s’po them që ka qenë zero, mirëpo ka individë, mos të themi që ka pasur dhjetëra ose qindra që janë ardhë me këtë afat shtesë”, tha kryetari i Zubin-Potokut, Izmir Zeqiri.
Dy kryetarët shqiptarë thonë se fajin për bojkotimin e procesit nga pjesa dërrmuese e qytetarëve e ka shteti serb.
“Sigurisht, këtu ka ndërhy politika serbe dhe besoj që përfundimisht kjo është arsyeja. Janë largu edhe anketuesit serbë, kanë qenë 13 prej tyre”, tha kryetari i Zveçanit, Ilir Peci.
“Si duket akoma po është një ndikim i fortë i mekanizmave të Serbisë të themi te një pjesë e qytetarëve. Natyrisht thirrjes për bojkot po i përgjigjet një pjesë e madhe e qytetarëve”, kryetari i Zubin-Potokut, Izmir Zeqiri.
Më 5 prill, kur filloi regjistrimi, Lista Serbe kishte thënë se serbët nuk do të merrnin pjesë në procesin e regjistrimit të popullsisë.
Serbët nuk morën pjesë as në regjistrimin e popullsisë në Kosovë, në vitin 2011.
Për dallim nga paraqitja e parë në gjykatë më 14 korrik 2022, Dardan Krivaqa në seancën fillestare të rigjykimit nuk mbrohej nga jeleku anti-plumb.
Madje, nga refuzimi total në paraqitjen e parë të tij para gjykatësit, para dy vjetëve, për t’u deklaruar, tani Krivaqa tha se ndihet i pafajshëm ndaj akuzave për dhunim dhe vrasje.
I pafajshëm për akuzën e dhunimit dhe ndihmë në vrasje u deklarua edhe Arbër Sejdiu.
Ndërkaq, duke e vlerësuar aktakuzën hipotetike, avokati mbrojtës i Kirvaqës tha se prokurorisë vërtet i mungojnë provat.
Madje, avokati kërkoi ekzaminim special psikiatrik për të akuzuarin e parë Kirvaqën, që do të mbulojë periudhën që nga mosha 11-vjeçare e deri në ditën e vrasjes së Marigona Osmanit, me arsyetim se edhe ai ishte viktimë e dhunës seksuale dhe tentoi të vetëvritej.
Në nisje të procesit të rigjykimit u vendos që dëshmitarët të mos thirren në gjykatë, por vetëm të lexohen dëshmitë e tyre, ndërkaq pritet të ftohen ekspertë të rinj të mjekësisë ligjore.
Ndryshe, Gjykata Themelore e Ferizajt, më 4 gusht 2023, e ka dënuar me burgim të përjetshëm Dardan Krivaqën për vrasjen e Marigona Osmanit, ndërsa ishte liruar nga akuza për dhunim. Arbër Sejdiu ishte dënuar me 15 vjet burgim për ndihmë në vrasje. Edhe Sejdiu ishte liruar nga vepra penale e ndihmës në dhunim.
Por, Gjykata e Apelit me aprovimin e ankesës së Prokurorisë Themelore në Ferizaj dhe mbrojtjes së dy të akuzuarve, e ka kthyer çështjen në rigjykim.
Katër kosovarë përfunduan në pranga të policisë shqiptare në një aksion të së premtes.
Siç njoftoi policia e Shqipërisë, ata dyshoheshin për kontrabandë me armë.
Gjatë operacionit të titulluar “transportuesi 2” u sekuestruan 10 armë zjarri të llojit pistoletë, municion luftarak, 1 automjet dhe 5 telefona.
Policia e Shtetit tha se gjatë operacionit, në vend-parkimin e një terminali të autobusëve në Lundër, u kapën dhe arrestuan në flagrancë shtetasit B.K., 28-vjeçar, B.Sh., 20-vjeçar, E.Th., 25-vjeçar dhe M.K., 20-vjeçar, të gjithë banues në Kosovë.
Sipas autoriteteve, i dyshuari me inicialet B.K., shtetas i Kosovës, në autobusin që po drejtohej nga E.TH., kishte futur një çantë brenda së cilës u gjet armatimi.
Më pas, B. K., në bashkëpunim me M.K., kanë përcjellë nga pas autobusin që po i bartte këto mjete.
Siç njoftoi policia shqiptare, nga verifikimet e kryera ka rezultuar se armët e zjarrit ishin trafikuar në Tiranë, me qëllim shitjen në vlerat 1500-3000 euro.
Po nga verifikimet e kryera dyshohet se pronari i linjës së autobusëve, shtetasi E. Th., së bashku me shtetas të tjerë, ka trafikuar armë zjarri drejt Shqipërisë, në disa raste.
Banorët e lagjes Kalabria kanë protestuar para Komunës së Prishtinës. Ata kërkuan që plani rregullues për lagje të futej sot në rend të ditës.
Plani rregullues për këtë lagje parasheh transformimin urban të saj dhe rritjen e numrit të ndërtimeve të larta, derisa e kishte propozuar kryetari i Prishtinës, Përparim Rama. Por, sipas banorëve, plani nuk është publik dhe duan diskutim.
“Është stërzgjatur si plan duhet të jenë transparent kryetari duhet të na tregojë planin e tij”, thotë një banor.
“Nuk duhet të fshihen planet për lagjen duhet të jemi në dijeni edhe ne”, thotë një tjetër banor.
Pas protestës, derisa Kuvendi i Prishtinës u mblodh për seancë, në të morën pjesë edhe banorët e Kalabrisë të përkrahur nga opozita. Të gjithë kërkuan nga kryetari Rama të mbajë një seancë të jashtëzakonshme lidhur me këtë çështje, si dhe publikimin e planit.
“Po tentohet të ju shitet mjegull juve qytetarë, njësoj sikur neve, na është premtuar se plani i votuar në vitin 2021 duhej anuluar, si shkak i vendimit të Ministrisë dhe do të kthehej me ndërrime pas 6 muajsh, sot pas dy viteve nuk është plani as para jush as para Kuvendit. Na është dërguar me materiale të paqasshme, nuk e di pse po i fshehin dokumentet. Prishtina po trajtohet si zonë betonizimit dhe koeficiente për grupe të caktuara. Nga rrena dhe mashtrimi kanë shkuar deri në arrestim të qytetarëve”, thotë asambleisti i PDK-së, Leutrim Retkoceri.
“Ka ra koha e sharmit tënd, nuk të shitet më. Nuk i ki as gjysmën e asamblistëve tu. Qikaq seriozisht e merr ti Kalabrinë. Po vazhdon me majtë fjalime politike, ti as politikë nuk dinë me bë. Ti s’je tu ju bë zgjidhje, je tu folë për një projekt në hava, e nuk e dimë ku është ai program. Po folë për koeficienta, po ti e ke majtë 2 vjet, sepse ke bo pazare, kur tu kanë prishë pazaret aty tash të sulmojnë krejt”, tha asambleisti i LV-së, Gëzim Sveçla.
Megjithatë, Rama shprehu gatishmëri që një seancë e jashtëzakonshme për këtë çështje të mbahet javën e ardhshme.
“Prej fjalimeve e politikëbërje që po ndodh në këtë asamble, ne si kabinet po punojmë shumë. Jemi të gatshëm dhe mund ta bëjmë seancën e jashtëzakonshme javën tjetër me një pikë, atë të Kalabrisë, meqë nuk është futur në këtë seancë. Unë nuk e kam mendjen të bëjë politikë. Asnjëherë nuk u është cenuar ndërtimtarëve ta zhvillojnë Kalabrinë. Është mbrojtur e drejta e banorëve për të mos u betonizuar. Për këtë arsye e kemi analizuar, kemi diskutuar me qytetarët, vazhdojmë të diskutojmë. Po i mashtroni ju me politika, ne po punojmë, nuk ka pasur ndryshime të mëdha se sa sot, e kemi një plan e vizion, e ju e sabotoni tu i rrejtë njerëzit, kur bëhemi bashkë për të mira, tokën e Komunës i duhet unaza dhe qeveria nuk e financon e ju bëni politika, s’dini tjetër veç me fol e na bëjmë”, tha Rama.
Për planin e lagjes Kalabria në Kuvendin e Prishtinës u diskutua edhe më 8 maj, derisa edhe atëherë banorët kishin hyrë në sallë dhe kërcënuan se “do ta djegin Kuvendin” nëse nuk kalon në seancën e thirrur për sot.
Lidhur me këtë, kryetari i Prishtinës ka mohuar gjatë ditës se është kërcënuar pasi Policia në raportin 24 orësh, kishte njoftuar se ka arrestuar një person të dyshuar për kërcënim ndaj Ramës dhe kryesuesit të Kuvendit Komunal.
Në seancë erdhi, por kryeministrit Albin Kurti nuk iu desh të qëndrojë gjatë në sallë. Fare pak deputetë iu përgjigjën ftesës së AAK-së për të marrë pjesë në seancën në të cilën do të diskutohej rreth tre vjetëve të qeverisjes Kurti.
Pas dakordimit të grupeve parlamentare u vendos që seanca të shtyhet.
“Vërtetë nuk do të ishte mirë që kjo seancë të ndodhte me 40 deputetë të pranishëm. Është papërgjegjësi me pritë shumë gjatë, kështu që pritëm boll”, tha kryetari i Kuvendit të Kosovës, Glauk Konjufca.
Megjithatë, një ballafaqim i kryeministrit Kurti me opozitën, sipas shefit të grupit parlamentar të AAK-së Besnik Tahiri, do të ndodhë.
“Ka vetëm vonim, se shpëtim nuk ka prej ballafaqimit të kryeministrit me opozitën me gjitha këto tema. Debati do të ndodhë nuk ka qysh ikë, është i protokolluar në kryesi dhe kurdo që të jetë ai debat do të jetë ballafaqimi i të vërtetës dhe i një super-mashtrimi që ka ndodhur tash e tri vjet e gjysmë”, tha Tahiri.
Ndërkaq, PDK-ja tha se do ta përkrahë rezolutën e AAK-së në të cilën kërkohet dorëheqja e kryeministrit. Por, sipas shefit të grupit parlamentar të PDK-së, Abelard Tahiri, shpërndarja e Kuvendit duhet të ndodhë jo më larg se 30 maj.
“E humbasim mundësinë që qytetarët t’iu drejtohen kutive të votimit më datën 30 qershor apo 7 korrik, pra kjo është dita e fundit dhe ne nuk do t’i ndalim përpjekjet. Nuk jemi të interesuar të kemi shou të asaj dite kur do të përplasemi me fjalime për çështje të ndryshme politike, që tri vjet e gjysmë ne e kemi pasur ballafaqimin me këtë Qeveri dhe përtej shout mediatik që mund të prodhojë një seancë, përtej një cirku që mund të krijojë mendoj që më e rëndësishme është me i prodhu numrin e votave të mjaftueshme që janë 80 deputetë”, tha Tahiri.
Qeveria aktuale ishte betuar në mars të 2021-tës dhe tashmë ka hyrë në vitin e fundit të mandatit. Ndërsa, thirrja e kësaj seance u bë derisa po zhvillohen bisedime për mbajtje të zgjedhjeve të parakohshme parlamentare.
“Është paksa e paimagjinueshme të pritet shpërndarja e Kuvendit ku për debat të tri vjet qeverisje ka aq pak deputetë në sallë e lëre më të mendohet për një situatë, e cila do të nënkuptonte përfundimin e punës së legjislaturës së tetë, përderisa nuk janë kryer të gjitha pikat, ka shumë pak pika të patrajtuara, por gjithashtu jemi në dinamikën dhe ritmin e mirë të përmbushjes së agjendës legjislative”, tha deputetja e LV-së, Mimoza Kusari-Lila.
Pas vendimit për shtyrje të seancës datë e re për mbajtjen e saj nuk u caktua, por të hënën do të mbahet takim i kryesisë së Kuvendit, me ç’rast caktohet seanca e ardhshme dhe pikat e rendit.
Më shumë punë është kërkuar nga Kosova, për Strategjinë e Energjisë nëse vendi dëshiron të afrohet edhe më shumë drejt anëtarësimit në Bashkimin Evropian.
Në tryezën e organizuar nga Instituti i Prishtinës për Studime Politike me temën “Strategjia e Energjisë dhe rruga drejt se ardhmes energjetike të Kosovës”, mes tjerash u theksua edhe për politikat energjetike dhe harmonizimin e tyre me standarde evropiane.
“Institucionet e Kosovës e kanë miratuar strategjinë e energjisë të Republikës së Kosovës për 2022/31 me synimin e adresimit të furnizimit energjetik dhe sfidat që kanë të bëjnë me politikat energjetike dhe harmonizimin e tyre me standardet evropiane”, tha Leonora Kryeziu nga Instituti i Prishtinës për Studime Politike.
Gjatë prezantimit të “Strategjisë së Energjisë së Kosovës 2022-2031”, u tha se rruga drejt kësaj ka dy anët e medaljes.
“Kjo do të jetë sfiduese, por njëkohësisht është e domosdoshme për Kosovën…”, tha ambasadorja e Mbretërisë së Holandës, Carin Lobbezo.
Ndërsa, Anita Baraliu, ekonomiste e hulumtuese shkencore, tha se kjo strategji kërkon përkushtim maksimal për disa arsye.
“Strategjia e Energjisë përbëhet nga 5 objektiva kryesore, ato janë mjete të formuluara dhe tregojnë një progres të madh, në krahasim me Strategjitë e mëparshme”, tha Baraliu.
“Strategjia e Energjisë së Kosovës 2022-2031”, është miratuar më 8 mars të vitit të kaluar.
