Category: Lajme

Me afrimin e sezonit veror dhe paralajmërimet për temperatura të larta, Komuna e Prishtinës ka nisur përgatitjet për menaxhimin e situatave të mundshme emergjente, ndërsa Brigada Profesionale e Zjarrfikësve thotë se është në gatishmëri për t’u përballur me rritjen e numrit të zjarreve fushore dhe pyjore.

Drejtori për Siguri dhe Emergjenca në Komunën e Prishtinës, Lulzim Fushtica për Ekonomia Online tha se përgatitjet kanë nisur më herët se vitet e kaluara, duke marrë parasysh paralajmërimet globale për një verë më të nxehtë.

“Ne si kryeqytet edhe këtë vit kemi filluar shumë më herët përgatitjet për sezonin e verës. Edhe pse ende nuk kemi ndonjë parashikim zyrtar nga Instituti Meteorologjik, paralajmërimet në nivel global tregojnë se mund të kemi temperatura më të larta se vitin e kaluar. Para dy javësh kemi mbajtur takimin e parë të grupit punues për përgatitjet verore, ku kanë marrë pjesë të gjitha institucionet relevante, përfshirë Brigadën Profesionale të Zjarrfikësve, Policinë e Kryeqytetit, Emergjencat Mjekësore dhe drejtoritë komunale. Kemi filluar hartimin e planit operativ duke u bazuar në përvojën e vitit të kaluar, kur u përballëm me një numër të madh zjarresh fushore dhe pyjore”, tha Fushtica.

Ai shtoi se përgatitjet janë bërë në aspektin e personelit, pajisjeve dhe koordinimit institucional, në mënyrë që reagimi të jetë sa më efikas në rast nevoje.

“Shpresojmë që të mos kemi situata të ngjashme me ato të vitit të kaluar, por pavarësisht kësaj ne do të jemi të gatshëm për t’u ofruar ndihmë qytetarëve. Duhet pasur parasysh se gjatë verës kryeqyteti përballet edhe me fluks më të madh të qytetarëve dhe bashkatdhetarëve nga diaspora, prandaj kapacitetet tona do të jenë të angazhuara maksimalisht”, deklaroi ai.

Fushtica konfirmoi se ekipet mjekësore emergjente do të rikthehen në sheshet e kryeqytetit në periudhat me temperatura ekstreme, ndërsa mbështetje do të ofrojnë edhe zjarrfikësit dhe policia.

“Ekipet e emergjencave mjekësore do të vendosen sipas nevojës në sheshet e kryeqytetit. Po ashtu, Brigada Profesionale e Zjarrfikësve do të jetë e angazhuar jo vetëm për intervenime, por edhe për shpërndarjen e ujit kur paraqitet nevoja. Policia do të shtojë patrullimet dhe do të krijohen ekipe rezervë. Në këtë proces janë përfshirë edhe Shoqata Vullnetare e Zjarrfikësve dhe Shpëtimit, kështu që të gjitha kapacitetet që i kemi në dispozicion janë mobilizuar për sezonin veror”, u shpreh ai.

Duke folur për kapacitetet e zjarrfikësve, Fushtica tha se brigada është pajisur me mjete shtesë dhe së shpejti do të ketë në dispozicion edhe një automjet të ri.

“Brigada Profesionale e Zjarrfikësve i ka pajisjet dhe mjetet e nevojshme. Muajin e kaluar kemi pranuar si donacion rreth tetë tonë të produktit Trident, një shkumë speciale për fikjen e zjarreve. Gjithashtu, gjatë kësaj jave pritet të arrijë edhe kamioni i ri sulmues, i blerë nga drejtoria jonë në vlerë prej rreth 350 mijë eurosh. Me këto investime rriten ndjeshëm kapacitetet operative të brigadës”, tha ai.

Ndërkohë, zëvendëskomandanti i Brigadës Profesionale të Zjarrfikësve të Prishtinës, Abdusamed Shkodra, tha se rritja e temperaturave zakonisht shoqërohet me shtim të zjarreve në hapësira të hapura.

“Me ngritjen e temperaturave rritet edhe numri i zjarreve fushore dhe malore. Duke u bazuar në përvojën e viteve të kaluara, brigada përgatitet me kohë për këtë sezon. Më 28 maj kemi marrë pjesë në një takim koordinues të organizuar nga Drejtoria për Siguri dhe Emergjenca, ku kanë qenë të përfshira të gjitha institucionet relevante. Janë bërë koordinimet e nevojshme dhe mund të them se jemi të gatshëm për t’u përballur me sfidat që mund të sjellë kjo verë”, deklaroi Shkodra.

Ai tha se gjendja me pajisje është e kënaqshme, por pranoi se brigada vazhdon të përballet me mungesë të personelit.

“Sa i përket pajisjeve qëndrojmë mirë, edhe pse gjithmonë ka hapësirë për përmirësime. Vitin e kaluar kemi pranuar 30 zjarrfikës të rinj, megjithëse disa prej tyre më pas e kanë lënë punën. Krahasuar me vitet e mëparshme jemi në situatë më të mirë, por ende kemi mungesë të stafit. Nëse i referohemi standardit prej një zjarrfikësi për 1.500 banorë, atëherë kryeqytetit i mungojnë afërsisht edhe 50 zjarrfikës”, tha ai.

Shkodra theksoi se sfidat më të mëdha paraqiten kur disa raste emergjente ndodhin njëkohësisht, duke vështirësuar prioritizimin e intervenimeve.

“Vështirësi ka gjithmonë, veçanërisht në terrene të papërshtatshme ose kur kemi disa raste njëherësh. Në situata të tilla sfida kryesore është caktimi i prioriteteve. Qytetarët duhet të kuptojnë se nëse nuk ndërmerren masa fillestare për parandalimin apo kontrollimin e zjarrit, atëherë bëhet shumë më e vështirë që të gjitha kërkesat të trajtohen në kohë, pavarësisht numrit të stafit apo pajisjeve që kemi në dispozicion”, tha ai.

Zëvendëskomandanti i zjarrfikësve u bëri thirrje qytetarëve, e veçanërisht bujqve, të shmangin djegien e mbetjeve pas korrje-shirjeve.

“Dua t’u bëj apel të gjithë qytetarëve, sidomos bujqve, që të mos i djegin mbetjet pas korrje-shirjeve. Kjo praktikë dëmton tokën, shkatërron mikroorganizmat, ndot ambientin dhe paraqet rrezik serioz për përhapjen e zjarreve. Shumë nga intervenimet tona gjatë verës lidhen pikërisht me raste të tilla që dalin jashtë kontrollit. Përveç se është e dëmshme, kjo praktikë është edhe e ndaluar me ligj dhe sanksionohet. Prandaj kërkojmë nga qytetarët të jenë vigjilentë dhe të shmangin përdorimin e zjarrit aty ku nuk është i domosdoshëm”, shtoi Shkodra.

Komisioni Qendror i Zgjedhjeve të dielën në mëngjes, ka përditësuar të dhënat e fundit nga progresi i arritur pas gjashtë ditë pune pas ditës së zgjedhjeve të 7 qershorit.

Pas përmbylljes në Qendra Komunale të numërimit të votave të kandidatëve për deputetë dhe numërimit të fletëvotimi nga votimi në përfaqësi diplomatike, KQZ është në fazën e fundit të numërimit të fletëvotimeve.

Aktualisht, në Qendrën e Numërimit dhe të Rezultateve është duke u bërë numërimi i fletëvotimeve që i takojnë votimit jashtë Kosovës, përkatësisht votimit përmes postës dhe pas tyre do të numërohen edhe fletëvotimet nga votimi me kusht dhe nga votimi i personave me nevoja të veçanta.

Në një përgjigje me shkrim, zëdhënësi i KQZ-së, Valmir Elezi ka shpjeguar se deri në përfundim të ditës së shtunë janë numëruar 36 kuti votimi, në të cilat janë vendosur zarfet me fletëvotime pas aprovimit të tyre nga shërbimi votues i KQZ-së.

Ai ka sqaruar se “sipas procedurave, zarfet që supozohet se përmbajnë fletëvotime, pas procesit të vlerësimit janë sistemuar në kuti votimi sipas komunave prej nga vijnë votuesit e regjistruar. Deri në këtë kohë, janë përgatitur dhe regjistruar në platformën e rezultateve 156 kuti votimi. Të tjera kuti votimi do të shtohen në këtë platformë derisa të përmbyllet procesi i vlerësimit të të gjitha pakove të tërhequra nga kutitë postare të KQZ-së”.

Ndërkaq, sa i përket procesit të vlerësimit të pakove me fletëvotime nga votimi përmes postës, të cilat janë tërhequr nga KQZ nga 23 kutitë postare në shtete të ndryshme, Elezi ka thënë se ky proces po shkon drejt fundit. Nga këto kuti postare, KQZ ka tërhequr më shumë se 85,700 pako të supozuara me fletëvotime, pjesa më e madhe e të cilave, deri më tani, janë vlerësuar nga shërbimi votues i KQZ-së dhe numërimi i disa prej tyre është në zhvillim e sipër.

“Deri në përfundim të ditës së shtunë (13 qershor 2026) në procesin e vlerësimit janë përfshirë 75,590 pako, prej të cilave janë aprovuar 72,746, ndërkaq janë refuzuar 2,844”, tregoi Elezi.

Sipas KQZ-së, arsyeja më e shprehur se përse janë refuzuar këto pako është sepse në 2,571 raste mungon dëftesa e regjistrimit, një dokument me të dhëna unike, që votuesi i regjistruar e pranon nga KQZ. Po ashtu, arsyet e tjera, më pak të shprehura, lidhen me rastet kur në një pako janë përfshirë më shumë se një fletëvotim ose më shumë se një person (177), kur votuesi ka dërguar pakon nga një shtet tjetër nga ai ku ishte regjistruar për votim (21), kur në pako është gjetur vetëm dëftesa e regjistrimit pa fletëvotim (27), kur ka munguar pulla apo vula postare (5), si dhe me një rast kur fletëvotimi është shtypur. Sipas të dhënave të KQZ-së, janë evidentuar edhe 42 zarfe të dërguara gabimisht.

Gjatë ditës së hënë, më 8 qershor, është përmbyllur procesi i tërheqjes së pakove me fletëvotime që i takojnë votimit jashtë Kosovës, përkatësisht votimit përmes postës. Tërheqja e pakove me fletëvotime është bërë nga kutitë postare të KQZ-së në 22 shtete të ndryshme si dhe nga kutia postare e KQZ-së në Kosovë. Nga 23 kuti postare, janë tërhequr më shumë se 85,700 pako të supozuara me fletëvotime, pjesa më e madhe e të cilave, deri më tani, janë vlerësuar nga shërbimi votues i KQZ-së./KP

Drejtori i komanduar i Policisë së Tiranës, Oliger Torba dhe Ermal Haxhiu, drejtor për Kufirin dhe Migracionin, kanë dalë në konferencë për mediat, për bilancin e punës në muajin maj dhe dy javët e para të qershorit.

Në pak javë, ata thanë se janë evidentuar 1436 raste të ndryshme të veprave penale, ndërsa janë zbuluar 92.6% e tyre.

Sipas tyre, janë realizuar 58 operacione në fushën e narkotikëve, armëmbajtjes pa leje, goditjes së lojërave të fatit apo prostitucionit. U veçuan 4 fazat e operacionit “Zonat”, ku janë goditur rrjetet e shpërndarjes së lëndës narkotike, sidomos pranë shkollave.

“Në pranga kanë përfunduar 46 persona me rrezikshmëri të lartë shoqërore, kryesisht me tendencë në fushën e narkotikëve dhe krimeve kundër personit”, shkruan KlanTV.

Ish-ministri i Punëve të Jashtme, Petrit Selimi ka thënë se raportet në mes Kosovës dhe Shteteve të Bashkuara të Amerikës nuk kanë qenë asnjëherë në një pikë kaq të ulët siç janë tani.

Selimi, deklaroi se Kosova po merr mesazhe të njëpasnjëshme nga qeveria amerikane që kjo e fundit nuk është në rrugë të mirë.

“Marrëdhëniet mes Kosovës dhe SHBA-së kurrë në historinë moderne të Kosovës nuk kanë qenë në pikë më të ulët, ne mund ta zbukurojmë, ne mund të pretendojmë diçka tjetër, por e vërteta është brutale. Kosova është ende në procesin ku i është suspenduar dialogu për marrëveshje strategjike, SHBA-të kanë dërguar ambasadorë në shumë shtete tjera në Ballkan, por jo në Kosovë. Ambasadorja amerikane apo ushtruesja e detyrës, pak ditë para zgjedhjeve, del me një mesazh të qartë, një editorial, ku thotë që Kosovës po i ikën treni në investimet energjetike amerikane në Ballkan, pra kemi mesazhe pas mesazheve, nga qeveria amerikane që nuk jeni në rrugë të mirë dhe Kosova nuk është në rrugë të mirë. Është shumë me rëndësi. që mos ta mashtrojmë vetveten dhe kjo nuk është rezultat vetëm i ngjarjeve në Amerikë, por është rezultat edhe i sjelljeve tona në Kosovë”, tha ai për eo.

Selimi shprehu shqetësim edhe rreth stafit të pakët në Ambasadën e Kosovës në Uashington.

“Tash e katër vite, ambasada jonë në Uashington ka më pak staf se ajo në Sofie apo në Tiranë, vlerësojeni se a është normale që një shtet si Kosova t’i ketë vetëm dy, tre diplomatë në Uashington tash e pesë vite”, tha ai.

Ish-ministri Selimi ka folur edhe për pjesëmarrjen e ulët të qytetarëve në zgjedhjet e së dielës duke thënë se zgjedhjet e shpeshta ndikuan në mospjesëmarrje.

“Tri palë zgjedhje brenda një viti, megjithatë ishte e tepërt dhe ky mesazh u tha qartë edhe nga qytetarët. Besoj që edhe një temë tjetër ishte prezente në vendimin e qytetarëve mos me dalë, se kriza ekonomike, kriza shoqërore që po e krijon një amulli qytetare, një krizë edhe në besimin që kemi ndaj institucioneve ka rezultuar në pjesëmarrje më të ulët”, u shpreh Selimi.

Ish-shefi i misionit të OSBE-së në Kosovë, Daan Everts, ka kritikuar ashpër Gjykatën Speciale.

Ai ka bërë me dije se kjo gjykatë është turpi i drejtësisë.

Në konferencën “Urat e kujtimeve” organizuar nga “Liria ka emër” dhe KIPRED, ish-diplomati holandez ka thënë se themeli e këtij tribunali janë tejet të dyshimta.
“Ky tribunal është një turp i drejtësisë. Themeli i tij është tejet i dyshimtë, mandati i tij shumë selektiv, mënyra e veprimit e diskutueshme dhe akuzat të sforcuara. Nëse këto procese përfundojnë me dënime, pasojat do të jenë të rënda, jo vetëm për marrëdhëniet ndërmjet Serbisë dhe Kosovës, por edhe për perceptimin e aktorëve ndërkombëtarë dhe për praktikën e së drejtës penale ndërkombëtare.”, ka thënë ai.

Ai ka vlerësuar se kjo gjykatë është duke e penguar edhe normalizimin e raporteve në mes të Kosovës dhe Serbisë.

“Fatkeqësisht, 25 vjet më vonë, nuk jemi më afër një marrëdhënieje të normalizuar ndërmjet Serbisë dhe Kosovës. Ndër shumë faktorët që e pengojnë këtë është edhe e ashtuquajtura Dhomë e Specializuar e Kosovës, e cila po gjykon katër ish-udhëheqës të shquar të UÇK-së, të cilët më pas u bënë figura të rëndësishme politike në Kosovën e pasluftës, për krime lufte dhe krime kundër njerëzimit.”, është shprehur ai.

Kryetari i Skenderajt, Sami Lushtaku, është deklaruar lidhur me vdekjen e ish-komandantit të UÇK’së, Sahit Jasharit.

Lushtaku, në lidhje direkte në Frontal në T7, ka thënë se ai, asnjëherë s’e ka menduar se do ta varroste Sahitin Jasharin.

‘’Ka pas momente të vështira, edhe para luftës edhe gjatë luftës, asnjëherë nuk e kam mëndu që unë kam me varros Sahitin, asnjëherë, por ja që vdekja është padrejtë shumë herë. Ajo që kemi kalu me Sahitin, vërtetë, sa është vështirë e dhimbshme, por është edhe krenare’’, ka thënë Lushtaku

Policia e Kosovës, ka njoftuar se në Viti, një qytetare ka dorëzuar në stacionin e PK’së, një portofol me dokumente dhe para.

Në njoftimin e PK’së, shtohet se, policia ka dërmarrë veprimet e nevojshme operative, ku pas verifikimit të dokumentacionit në bazë të procedurave të rregullta ligjore, është arritur të identifikohet dhe të kontaktohet pronari legjitim, të cilit i janë kthyer të gjitha gjërat e humbura.

Postimi:

Dorëzohet në polici portofoli me dokumente dhe para të gjetura

Gjilan, 12 qershor 2026

Më datë 12.06.2026 në Stacionin Policor në Viti është paraqitur një qytetare e ndërgjegjshëm, e cili ka njoftuar se kishte gjetur një portofol. Brenda portofolit ndodheshin dokumente personale, karta bankare si dhe një sasi e parave të gatshme.

Pas pranimit të portofolit, zyrtarët policorë nga Njësiti i Sektorit të Stacionit Policor në Viti menjëherë kanë ndërmarrë veprimet e nevojshme operative, ku pas verifikimit të dokumentacionit në bazë të procedurave të rregullta ligjore, është arritur të identifikohet dhe të kontaktohet pronari legjitim, të cilit i janë kthyer të gjitha gjërat e humbura.

Drejtori Rajonale e Policisë në Gjilan shpreh falënderimin për qytetaren në fjalë. Ky rast dëshmon edhe një herë se bashkëpunimi i ngushtë dhe besimi i ndërsjellë ndërmjet qytetarëve dhe Policisë së Kosovës është shtylla kryesore e sigurisë dhe mirëqenies në komunitet.