Category: Lajme

Kryetari i Aleancës për Ardhmërinë e Kosovës, Ramush Haradinaj, ka kujtuar të rënët me rastin e Ditës së Dëshmorëve dhe Martirëve të Deçanit.

Haradinaj ka thënë se Deçani është burim i shumë patriotëve ndër breza.

“Dje në Lloqan, Carrabreg të Ulët e të Epërm dhe në Lumbardh, në nderim të dëshmorëve u organizua aksioni tradicional për dhurimin e gjakut, me moton “N’Carrabreg dhurohet gjak”, ndërsa sot në Ditën e Dëshmorëve dhe Martirëve të Deçanit, nderuam sakrificën e tyre sublime për liri. Deçani ishte historikisht në ballë të shumë proceve për lirinë e Atdheut, burim i shumë patriotëve ndër breza. Sot, i ringritur dhe duke u zhvilluar vazhdimisht, pavarësisht sfidave”, ka thënë Haradinaj.

Haradinaj ka shtuar se liria do të jetojë deri sa të kujtojmë ata që u sakrifikuan në themelet e saj.

“Liria do të jetojë deri sa të kujtojmë ata që u sakrifikuan në themelet e saj. Kujtimi i tyre është fryma që e mbartë lirinë përpara. Nderimi që i bëjmë ndaj tyre është një detyrë që nuk duhet të harrohet kurrë e duhet të përcillet tek secila gjeneratë”, është shprehur Haradinaj.

Me mesazhin “Shërbimet për fëmijët po mbyllen”, Koalicioni i OJQ-ve për Mbrojtjen e Fëmijëve – KOMF, ka kërkuar nga institucionet e vendit dhe komunat që të ndërmarrin masa në lidhje me shërbimet sociale pasi këto të fundit për shkak të mos mbështetjes institucionale po rrezikojnë të mbyllen.

Drejtoresha e KOMF-it Donjeta Kelmendi, ka kërkuar nga institucionet shtetërore që të hartojnë një plan për zgjidhjen e kësaj situate emergjente dhe hartimin e masave të përkohshme për funksionalizimin e shërbimeve sociale në kuadër të pakos për ringjallje ekonomike.

“Komunat të marrin masa të menjëhershme të përmbushin obligimet e tyre ligjore në mënyrë që të sigurojnë financim në këtë situatë emergjente për ofruesit e shërbimeve sociale për fëmijët dhe familjet në nevojë…Kërkojmë që qeveria të krijojë një masë të përkohshme për funksionalizimin e shërbimeve sociale në kuadër të pakos për ringjallje ekonomike. Thirrja jonë sot shkon edhe për Kuvendin dhe deputetët e Kuvendit të Kosovës. KOMF kërkon që në rishikimet e buxhetit këtë vit të dëgjohet zëri i deputetëve në Kuvend që të ndahet buxhet shtesë për mbrojtjen sociale dhe për shërbime sociale për mbrojtjen e fëmijëve”, tha Kelmendi.

Për koalicionin KOMF është e papranueshme fakti që shërbimet sociale për fëmijët po shkojnë drejt mbylljes dhe Kelmendi ka bërë thirrje se kjo duhet të jetë një emergjencë shtetërore për institucionet në vend.

“Jemi mbledhur këtu sot dhe jemi bashkë më prindërit e fëmijëve, përfitues të shërbimeve sociale, ofruesit e shërbimeve sociale dhe partnerët tanë, për të përçuar mesazhin që shërbimet sociale për fëmijët po mbyllen dhe ky duhet të jetë një alarm për komunat për qeverinë dhe për Kuvendin e Republikës së Kosovës”, tha ajo.

Ajo e përshkruar situatën tepër të rëndë duke pamundësuar ofrimin e shërbimeve për një pjesë të madhe të fëmijëve, pasi projektet ndërkombëtare kanë përfunduar.

“Ofruesit e gjendjes sociale janë në gjendjen më të rëndë në vitin 2024, duke pasur parasysh që në dhjetor 2023 për pjesën më të madhe të tyre të ofruesit të shërbimeve kanë përfunduar programet, të cilat kanë qenë në mbështetje të shërbimeve sociale të mbështetura nga donatorët ndërkombëtar”. 01:59 Kjo situatë në qoftë se vazhdon në mënyrën e njëjte edhe për muajt në vijim do të vijojë me mbyllje të tjera që mund të çojë në kolaps në fushën e mbrojtjes së të drejtave të fëmijëve dhe të përbëjnë precedent për shtetin e Kosovës”, ka thënë Kelmendi.

Koalicioni KOMF bën thirrje që shërbimet esenciale për fëmijë pa kujdes prindëror, shërbime për fëmijë viktima të dhunës, abuzimit dhe trafikimit, fëmijëve me aftësi të kufizuara të cilët kërkojnë mbështetje dhe trajtim, kanë nevojë për përkrahje institucionale.

Parlamenti i Spanjës i dha miratimin përfundimtar ligjit kundërthënës që amniston qindra separatistë katalonas, që ishin përfshirë në përpjekjen për shkëputje të Katalonjës më 2017.

Ligji u mbështetet nga Qeveria e koalicionit të krahut të majtë të Spanjës, dy parti separatiste katalonase dhe parti të tjera të vogla politike. Ligji mori 177 vota për, ndërkaq 172 deputetë nga Partia konservatore Popullore dhe ajo e ekstremit të djathtë, Vox, votuan kundër.

Nga amnistia mund të përfitojë ish-presidenti i rajonit të Katalonjës, Carles Puigdemont, i cili u largua në Belgjikë pas një përpjekjeje të dështuar për shkëputjen e Katalonjës nga Spanja, raporton Evropa e Lirë.

Nga ligji i ri mund të përfitojnë gjithashtu qindra njerëz të tjerë, duke përfshirë ish-zyrtarë të Qeverisë rajonale të Barcelonës, qytetarë të thjeshtë që morën pjesë në protesta dhe oficerë policie që u përfshin në parandalimin e referendumit të paligjshëm për pavarësi që u mbajt nga Qeveria e Puigdemontit.

Megjithatë, miratimi i këtij ligji nuk nënkupton që problemet ligjore të separatistëve, që evokuan për pavarësi, do të zgjidhen menjëherë.

Ligji ka të ngjarë të përballet me sfida ligjore dhe të shqyrtohet nga gjykatat më të larta, të cilat do ta zbatojnë atë rast pas rasti.

Ka ekspertë që vënë në dyshim kushtetutshmërinë e tij, sepse thonë se ligji do të krijonte pabarazi mes qytetarëve spanjollë, duke favorizuar një grup.

Që nga marrja e pushtetit në vitin 2018, kryeministri spanjoll, Pedro Sanchez, është fokusuar në uljen e tensioneve në Katalonjën verilindore dhe ka argumentuar se amnistia është thelbësore për këtë proces.

Megjithatë, amnistia ishte gjithashtu një domosdoshmëri politike për Sanchez, i cili pranoi të miratonte faljen për separatistë, pasi kishte nevojë për mbështetjen e ligjvënësve separatistë për miratimin e Qeverisë së re kombëtare në nëntor.

Ligji u miratua fillimisht nga Dhoma e Ulët e Parlamentit në mars.

Senati, në të cilin partitë e krahut të djathtë kanë shumicën, në fillim të këtij muaji vendosi veto, por Dhoma e Ulët e shtyu përpara ligjin.

Edhe pse amnistia është një temë që ka mbështetje në Katalonjë, Partia Popullore dhe Vox kanë organizuar protesta kundër ligjit në Madrid dhe qytete të tjera në mbarë Spanjën.

Ndërkaq, kritikë të amnistisë ka edhe në partinë e kryeministrit Sanchez.

Referendumi i pavarësisë u shpall i paligjshëm nga gjykatat në Spanjë dhe rezultoi në krizën më të rëdnë politike të Spanjës në dekada.

Kjo do të jetë amnistia më e madhe në Spanjë, që nga amnistia e përgjithshme krimet e kryera gjatë diktaturës së Francisco Francos më 1977.

Ky është gjithashtu ligji i parë i amnistisë i miratuar në Bashkimin Evropian që nga viti 1991, sipas këshillit kërkimor spanjoll, CSIC.

Në rastin e ish-krerëve të UÇK-së do të ftohen edhe 104 dëshmitarë për intervistim, thotë zëdhënësi i Dhomave të Specializuara të Kosovës në Hagë, Michael Doyle. Sipas tij, procesi i gjykimit është në mes dhe se nuk dihet kur do të përfundojë. Lidhur me ankesat për zvarritje të procesit, ai konsideron se gjyqtarët janë të përkushtuar për të siguruar që procedurat të jenë të shpejta.

Michael Doyle ka qëndruar të mërkurën në Prishtinë, ku ka informuar gazetarët për proceset gjyqësore në Hagë.

Në intervistën për KosovaPress, ai flet për ecurinë e gjykimit kundër ish-krerëve të Ushtrisë Çlirimtare të Kosovës.

“Më 6 maj, kryetari i trupit gjykues dha një përditësim për numrin e dëshmitarëve që kanë dëshmuar deri më tani. Pra, atëherë ishin 60 dëshmitarë, tani janë 68 dëshmitarë që sot kanë dëshmuar drejtpërdrejt në gjykatë, dhe 45 dëshmitarë të tjerë dëshmitë e të cilëve janë dorëzuar me shkrim dhe janë pranuar në prova nga gjykata. Gjyqtarët në këtë rast kanë pyetur gjithashtu palët për mënyrat për të përshpejtuar më tej procedurat për t’u siguruar se ato nuk janë vetëm të drejta, por edhe të shpejta. Prokuroria ka vlerësuar se do të thërrasë dëshmitarët e saj për të dëshmuar deri në prill të vitit 2025 dhe një pjesë e madhe e aktiviteteve në sallën e gjyqit së fundmi kanë qenë edhe diskutimet për ritmin e dhënies së dëshmisë nga dëshmitarët, sa dëshmitarë kanë mbetur”, deklaron ai.

Zëdhënësi i Speciales thotë se nuk dihet numri i saktë i dëshmitarëve që do të ftohen për intervistim, veçse përmend se prokuroria së fundmi ka thënë se planifikojnë të intervistojnë edhe mbi 100 dëshmitarë.

“Në fillim të kësaj jave, prokuroria tha se ata synojnë të thërrasin edhe 104 dëshmitarë të tjerë dhe gjithashtu në dosjet e fundit kanë thënë se do të ofrojnë ndryshime të mundshme në listën e tyre të dëshmitarëve në tetor të këtij viti. Pra, ne kemi 13 muaj në proces dhe jemi në mes të procesit të prokurorisë duke paraqitur dëshmitarët e saj…Është e vështirë të thuhet saktësisht. Në fillim të rastit, prokurorisë iu kërkua të jepte një vlerësim të numrit të dëshmitarëve. Vlerësimi fillestar ishte mbi 300, që më pas u reduktua në rreth 190 në total që është thënë në gjykatë, dhe tani informacionet më të fundit janë sërish se rreth 68 dëshmitarë kanë dëshmuar live, 45 dëshmitarë kanë dhënë dëshminë e tyre me shkrim dhe prokuroria së fundmi ka thënë se planifikojnë të thërrasin edhe 104 dëshmitarë të tjerë për të dëshmuar në gjykatë”, shton ai për KosovaPress.

Në intervistën për KosovaPress, Doyle thekson se vështirë është të përcaktohet edhe kur do të përfundojë gjykimi në rastin kundër ish-krerëve të Ushtrisë Çlirimtare të Kosovës.

“Është shumë e vështirë të vlerësohet koha e përgjithshme e gjykimit sepse pasi prokuroria të përfundojë me rastin e tyre, atëherë ekipet mbrojtëse do të kenë mundësinë të kërkojnë lirimin nga akuzat dhe të presin ndonjë rezultati të kësaj. Atëherë ekipet e mbrojtjes do të fillonin të thërrisnin dëshmitarët e tyre për të dëshmuar në emër të të akuzuarve, dhe ne ende nuk e dimë se sa dëshmitarë do të thërrasë mbrojtja”, thekson ai.

Ish-kryetari i Kuvendit të Kosovës, Kadri Veseli ka kërkuar që procesi të jetë i drejtë. Në njërën nga seancat e Dhomave të Specializuara në Hagë, ai ka thënë se gjykimi duhet të bëhet në kohë të arsyeshme dhe në përputhje me Kushtetutën e Kosovës.

Megjithatë, zëdhënësi Michael Doyle thotë se gjyqtarët janë të përkushtuar për të siguruar procedura të shpejta.

“Ajo që mund të them është se gjatë vitit të kaluar gjyqtarët e trupit gjykues kanë ndërmarrë hapa, duke përfshirë organizimin e seancave të veçanta, nxjerrjen e urdhrave ose miratimin e masave të caktuara me synimin për të siguruar që gjykimi të vazhdojë sa më shpejt që të jetë e mundur. Kështu, në shkurt, gjyqtarët thirrën një seancë të posaçme për të dëgjuar se si në thelb mund të përshpejtohej prezantimi i çështjes së SPO-së përmes veprimeve nga të dyja palët. Pra, ajo që unë do të thoja është se gjyqtarët janë shumë të përkushtuar për të siguruar që procedurat të jenë sa më të shpejta të jetë e mundur”, përfundon ai.

Gjykimi ndaj ish-krerëve të Ushtrisë Çlirimtare të Kosovës ka filluar më 3 prill të vitit 2023. Ish-krerët e UÇK-së po gjykohen për krime të pretenduara të luftës dhe po mbahen në qendrën e paraburgimit në Hagë që nga nëntori i vitit 2020./kp

Shtetet kyçe të BE-së të cilat janë të involvuara edhe në procesin e dialogut të lehtësuar nga Brukseli kanë qenë të palëkundura në kushtëzimin e tyre që Kosova duhet të bëjë progres të dukshëm sa i përket themelimit të Asociacionit të Komunave me Shumicë Serbe nëse Prishtina zyrtare dëshiron të marrë përkrahje për anëtarësimin në Këshill të Evropës. Kryeministri Albin Kurti ka refuzuar ta çojë Draftin e BE-së në Kushtetuese duke e humbur kështu mundësinë që Kosova të anëtarësohet në KiE gjatë majit.

Por, çfarë nënkupton për besueshmërinë në mes Kosovës dhe aleatëve një raport i tillë i kushtëzuar e ku letrat me nënshkrime e zotime s’kryejnë më punë tek ndërkombëtarët.

Lidhur me këtë ka folur profesori dhe analisti amerikan, Daniel Serwer. Ai ka thënë se më raportin e kryeministrit të Kosovës me evropianët dhe amerikanët ka mungesë të besimit dhe efektivitetit.

Serwer thotë se është një gabim shumë i madh fakti që amerikanët dhe evropianët insistojnë në krijimin e Asociacionit të Komunave me Shumicë Serbe, duke qenë se është prioriteti kryesor i Beogradit në dialog e në ndërkohë Kosova s’përfiton asgjë.

“Të gjithë të interesuarit duhet ta rilexojnë marrëveshjen e Brukselit të vitit 2013, ku kërkohet jo vetëm Asociacion por gjithashtu edhe njohja nga Beogradi e vlefshmërisë së Kushtetutës së Kosovës në të gjithë territorin e saj, pjesëmarrjen e serbëve në institucionet e Kosovës dhe mos interferimin në rrugën e Kosovës drejt BE-së. Beogradi asnjë nga këto kërkesa nuk i ka përmbushur”, ka thënë Serwer për Express.

I pyetur nëse mendon se Kosova do ta implementojë ndonjëherë Draftin e BE-së, meqë Kurti ishte në gatishmëri të dështojë anëtarësimin në KiE dhe të mos e çojë në Kushtetuese, Serwer shprehet se s’sheh rrugë përpara për Asociacionin pa të paktën njohje de fakto të Kosovës nga Serbia.

“Nuk shoh se si Asociacioni mund të ecë përpara pa njohjen de facto nëse jo de jure të Kosovës nga Serbia”, ka potencuar Serwer.

Serwer për Express ka folur edhe për ofertën e minutave të fundit të bërë nga kryediplomatja Donika Gërvalla për Asociacionin me qëllim të marrjes së përkrahjes së aleatëve për KiE dhe për mos koordinimin me presidenten e Kosovës. Profesori amerikan thotë se çështja e koordinimit është punë për ata që janë të përfshirë dhe shton se mendon se Kosova duhet ta përgatis një draft që do ta konsideronte të pranueshëm, me kusht që Beogradi përmbush detyrimet e Marrëveshjes së Brukselit të vitit 2013.

“Unë mendoj se Kosova duhet të përgatisë një draft që do ta konsideronte të pranueshëm, me kusht që Beogradi të përmbushë detyrimet e tij sipas marrëveshjes së Brukselit të vitit 2013”, ka potencuar Serwer.

Pasi kushtëzimi për KiE dështoi, Serwer thotë se e vetmja mënyrë për ta bindur Kosovën që të lëviz përpara me themelimin e Asociacionit, është që të bindet Beogradi të kryejë obligimet e veta.

Serwer, i pyetur nëse mos krijimi i Asociacionit do të krijojë hapësirë për rikthimin e idesë së korrigjimit të kufijve në rast të një rikthimi potencial të ish-presidentit Trump në Shtëpinë e Bardhë thotë se me apo pa Asociacion, ideja e shkëmbimit të territoreve do të rikthehet përsëri nëse Trump rizgjidhet president.

“Nuk kam dyshim se ideja e shkëmbimit të tokave do të lindë përsëri nëse Trump rizgjedhet, pavarësisht nëse ka apo jo hapa drejt Asociacionit”, ka përfunduar Serwer.

Këshilli i Bashkimit Evropian (BE) ka dhënë dritën e gjelbër për nënshkrimin e një marrëveshjeje me Serbinë, e cila do të mundësojë vendosjen e patrullave nga Agjencia Evropiane e Rojave Kufitare (FRONTEX) për kontrollin e kufijve, edhe brenda territorit të Serbisë në veprime të përbashkëta për kontrollimin e migrimit ilegal.

Serbia ndodhet në të ashtuquajturën “Rrugë Ballkanike”, e cila, pavarësisht rrethojave, kamerave të vëzhgimit dhe patrullave të përbashkëta kufitare, është rruga e dytë më aktive e migrantëve, sipas raporteve të FRONTEX-it.

BE-ja ka njoftuar se Këshilli e ka miratuar këtë vendim të enjten në Bruksel.

“Marrëveshja do t’u mundësoj BE-së dhe Serbisë që të organizojnë operacione të përbashkëta që do të përfshinin FRONTEX-in dhe gardën kufitare të Serbisë. Kjo, po ashtu, do të thotë se ekipet menaxhuese kufitare të FRONTEX-it mund të dislokohen në Serbi. Ato do t’i ndihmojnë Serbisë për të menaxhuar valët e migrimit, të veprojë kundër imigrimit të paligjshëm dhe të luftojë kundër krimeve tejkufitare”, thuhet në njoftimin e Këshillit të BE-së.

BE-ja edhe deri më tash ka pasur një marrëveshje bashkëpunimi me Serbinë për këtë çështje, por ajo mundësonte veprimet e FRONTEX-it vetëm në kufijtë e vendeve të BE-së me Serbinë. Marrëveshja e re do të mundësojë vendosjen e FRONTEX-it brenda territorit të Serbisë.

FRONTEX është agjencia e BE-së përgjegjëse për zbatimin e menaxhimit të integruar evropian të kufijve, funksionimin efektiv të kontrollit kufitar në kufijtë e jashtëm të BE-së në koordinim me autoritetet kombëtare të shteteve anëtare të BE-së dhe vendeve të Shengenit (Islanda, Zvicra, Lihtenshtajni dhe Norvegjia).

Agjencia është përgjegjëse për menaxhimin e kufijve, sigurinë e brendshme brenda BE-së dhe menaxhimin e migracionit, duke përfshirë një politikë efektive të kthimit, duke ruajtur lëvizjen e lirë të personave brenda unionit dhe respektimin e plotë të të drejtave themelore.

Bashkimi Evropian tashmë ka marrëveshje të tilla me disa vende fqinje, si me Moldavinë, Maqedoninë e Veriut, Malin e Zi dhe Shqipërinë.

Për Bashkimin Evropian marrëveshjet me vendet fqinje për t’i mundësuar FRONTEX-it të veprojë në territorin e tyre, janë identifikuar si të domosdoshme për të penguar që ato të jenë rrugë transiti për imigrimin masiv ilegal për në vendet e BE-së.

E ashtuquajtura “Rrugë Ballkanike” që ndiqet nga migrantët, vazhdon të jetë shqetësuese për BE-në, e cila ka për qëllim që numri i imigrantëve ilegal që kalojnë përmes saj drejt BE-së, të zvogëlohet.

Për shkak të numrit të madh të imigrantëve ilegalë që kalojnë përmes Ballkanit Perëndimor, Sllovenia ka suspenduar zbatimin e rregullave të Schengenit në kufirin me Kroacinë dhe ka vendosur kontrollet kufitare në atë pikë kalimi.

Pos bashkëpunimit me FRONTEX-in, BE-ja pret nga vendet e rajonit që t’i përshtaten dhe politikës së vizave të BE-së për qytetarët e vendeve të treta. Kjo ka për qëllim parandalimin e futjes me lehtësi të imigrantëve pa viza në ndonjë vend të Ballkanit Perëndimor dhe kalimin ilegal në vendet e BE-së, si në Kroaci apo Hungari.

BE-ja pret që vendet e Ballkanit Perëndimor të bashkëpunojnë në menaxhimin e përbashkët të imigrimit, pasi qytetarët e tyre gëzojnë mundësinë e lëvizjes pa viza në vendet e bllokut./REL/

Në Komisionin parlamentar për Shëndetësi pati diskutime mes pozitës dhe opozitës, ku kjo e fundit kritikoi qeverinë aktuale për rritjen e varfërisë në Kosovë.

Anëtari i komisionit nga Partia Demokratike e Kosovës, Bekim Haxhiu u shpreh i zhgënjyer pas publikimit të listës së çmimeve të barnave, ngase sipas tij vërehet shtrenjtimi i tyre.

Haxhiu potencoi se rritja të çmimit të barnave ndikon drejtpërdrejtë edhe në rritjen e varfërisë së qytetarëve.

Ndërkaq, lidhur me këtë është kundërpërgjigjur anëtari i këtij komisioni nga Lëvizja Vetëvendosje, Haxhi Avdyli, për çka tha se qeveria aktuale në këto tri vite e gjysmë ka treguar se është shumë e interesuar për zvogëlimin e varfërisë.

“Rritjen e çmimeve e cila ka ndikuar drejtpërdrejt edhe në rritjen e varfërisë. Sa e sa kohë që ne e monitorojmë këtu, ligjin për shërbime sociale…Për këtë na tregon shumë edhe ligji tjetër, të cilin ne e kemi votuar si Kuvend, ligji për rregullimin e çmimeve të produkteve medicinale me të cilin qëllimi dhe synimi i të gjithëve ka qenë që me këtë ligj të ulen çmimet e barnave dhe të ketë një unifikim të çmimit të barnave në nivelin e Republikës së Kosovës. Mirëpo, i zhgënjyer me atë që kam parë pas publikimit të listës së çmimeve të barnave, ku barnat të cilat sot janë në treg me pakicë, në listën e çmimeve dalin shumë më shtrenjtë sesa që janë në treg me pakicë…Rritja të çmimit të barnave ndikon drejtpërdrejtë edhe në rritjen e varfërisë së qytetarëve”, tha Haxhiu.

Avdyli potencoi se qeveria me vendime e përkrahje direkte ka ndikuar në eliminimin e formave të varfërisë.

“Kjo qeveri në këto tri vite e gjysmë ka treguar se është shumë e interesuar për zvogëlimin e varfërisë, me vendime direkte me përkrahjen direkte me materiale lehona, me përkrahjen direkte të fëmijëve, pastaj me Superpunën, me përkrahjen e të rinjve, me produkte të veçanta ka ndikuar drejtpërdrejtë në eliminimin e formave të varfërisë që është objektivi i parë…Meqenëse kolegu Bekim e dha një vështrim për këtë qeveri, jo për këtë raport, ne mund të themi që edhe përkrahja që është bërë përmes subvencioneve, granteve në bujqësi ka qenë si asnjëherë më parë”, tha Avdyli.

Në kuadër të Komisionit për Shëndetësi i cili u thirr për të vlerësuar përmbushjen e Objektivave të Zhvillimit të Qëndrueshëm nga Ligjin për Shërbime Sociale dhe Familjare, diskutimi mes deputetëve pozitë dhe opozitë ka vazhduar.

Lidhur me atë se qeveria ka punuar në zvogëlimin e varfërisë, deputeti Haxhiu mohoi një gjë të tillë, për çka tha se politika e kësaj qeverie është që të varfërojnë qytetarët me shtrenjtimin e energjisë elektrike dhe produkteve.

“Me ia shtrenjtua rrymën i nderuari Haxhi, qytetarëve mbi 100 për qind edhe me iu dhanë qytetarëve 1 herë nga 100 euro nuk është politikë për zhvillim të qëndrueshëm por është lëmoshë për qytetarët. Sepse, sipas asaj që po e shoh, politika e qeverisë është që të varfërojnë qytetarët me shtrenjtimin e energjisë dhe produkteve”, tha Avdyli.

Ndërkaq, para anëtarëve të këtij komisioni raportoi eksperti, Fitim Mulolli i cili potencoi se Ligji për Shërbime Sociale dhe Familjare zë vend të rëndësishëm për realizimin e objektivave sepse, derisa shton se raporti i vlerësimit i përmbush rreth 11 targete.

Ai tha se janë 169 targete për t’u përmbushur në të gjitha fushat, derisa shtoi se qëllimi është që gradualisht deri në vitin 2030 të përmbushen sa më shumë këto objektiva.

“Edhe Këshilli për zhvillim të qëndrueshëm si organ koordinues i këtyre objektivave, ka bërë mjaft aktivitete për të parë se ku po qëndron Kosova dhe për t’u munduar të rrisë vetëdijen e institucioneve së pari, rreth përmbushjes së këtyre objektivave. Në këtë drejtim ligji për shërbime sociale dhe familjare zë vend goxha të rëndësishëm për realizimin e këtyre objektivave sepse, siç e thotë raporti vlerësimi i përmbush rreth 11 targete. Pra, janë 169 targete për të gjitha fushat, e të gjitha fushat e të gjitha aspekteve që duhet të mbulohen institucionet e çdo shteti, në këtë rast edhe të Republikës së Kosovës. Ky ligj me mjaft sukses (përmbushi) rreth 11 prej tyre plus rreth 3 targete të fushës së arsimit, ndonëse nuk është fushë prioritare të mbulohet, prapë i prek ato. Qëllimi është gradualisht që deri në vitn 2030 të përmbushen sa më shumë këto objektiva”, tha Mulolli.

Projektligji për Komisionin e Pavarur të Mediave (KPM), ka qenë sërish shkak i përplasjes ndërmjet deputetëve të opozitës dhe mazhorancës në Komisionin për Administratë Publike, Pushtet Lokal, Media dhe Zhvillim Rajonal, raporton EO.

Pakënaqësia ka nisur nga deputeti i Partisë Demokratike të Kosovës, Isak Shabani, i cili tha se në projektligj nuk janë marrë parasysh rekomandimet e ekspertes së Këshillit të Evropës.

Sipas tij, në përmbajtjen e tanishme është kapja e jo liria e mediave.

“Mund të them që ky projektligj nuk është i dëshirueshmi. Edhe në memorandumin që na është dërguar thuhet që ligji do të përafrohet me standardet e Këshillit të Europës, por rekomandimet e ekspertes nuk janë marrë parasysh. Edhe shoqëria civile ka ngritur shumë shqetësime. Nuk e di nëse në Kuvendin e Kosovës ka pasë më shumë komente për një projektligj se ky”, ka thënë ai.

“Qëllimi nuk është që të ketë liri të mediave por është qëllimi i kapjes. Unë nuk do të marrë pjesë në votimin e këtij projektligji”, ka shtuar tutje deputeti Shabani.

Kryetari i KPM-së, Jeton Mehmeti përmendi nenin 42, rreth pronësisë së mediave që sipas ndërkombëtare tregon për ofrimin e transparencës për media.

“Mendojmë se tri elemente duhet t’i kushtohet vëmendje këtij neni: obligimet qe kanë të licencuarit, kemi kërkuar qe brenda ligjit të ketë transparencë për të licencuarit në lidhje me emrat e pronareve të drejtpërdrejtë”.

Lidhur me propozimet e KPM-së, deputeti i pushtetit, Besim Muzaqi tha se duhet shtuar edhe diçka e re në amendamentin e projektligjit.

“Mendoj se është një çështje që duhet të përfshihet në ketë amendament, me qellim qe pronaret përfitues të mos jenë kushdo që fondet e tyre tu kalojnë përmes arkave fiskale, sepse dihet qe këto i ‘shpërlajnë’ mjetet e disa kompanive të cilat i shfrytëzojnë mediat, andaj propozoj e kam një paragraf t’i shtohet këtij amendamenti, pasi mendoj se kjo e plotëson atë: Në shërbim te pluralizmit medial pronarët përfitues nuk bëjnë te jenë ata qe financat e tyre kapërcen përmes të ashtuquajturave parajsës fiskale”, tha Muzaqi.

Presidentja e vendit, Vjosa Osmani, ka njoftuar se Delfin Pllana është emëruar si ambasador i Kosovës në Hungari.

Osmani u shpreh e bindur se Pllana do të vazhdojë t’i forcojë lidhjet mes Kosovës dhe Hungarisë.

“I shprehi urimet e mia të mira ambasadorit të emëruar Delfin Pllana, teksa mori detyrën e tij të re si Ambasador i Republikës së Kosovës në Hungari”.

“Unë jam e bindur se ai do të vazhdojë të forcojë lidhjet midis vendeve tona dhe të thellojë lidhjet midis popujve tanë”, shkroi Osmani.