ATV

Category: Lajme

  • 84 kontrata me procedurë të negociuar vetëm për dy muaj

    84 kontrata me procedurë të negociuar vetëm për dy muaj

    Përgatiti: Arton Hamiti

    Për dy muaj, ministritë, komunat dhe institucionet e tjera publike kanë nënshkruar 84 kontrata përmes tenderëve të negociuar. Vlera e kontratave njëburimore që Autoritetet Kontraktuese nënshkruan gjatë prillit dhe majit është 6 milionë e 532 mijë euro.

    Për nga vlera e kontratave të nënshkruara me procedurë të mbyllur, vazhdon të prijë Korporata Energjetike e Kosovës. Vetëm kontrata për furnizim me ujë të përpunuar dhe ajo për sigurimin e objekteve i kanë kushtuar mbi 2.5 milionë euro.

    Monitorues të prokurimit shprehin shqetësim për numrin e madh të tenderëve të negociuar.

    “Këto kontrata ngërthejnë në vete mostransparencën këto kontrata kanë mungesë të llogaridhënies dhe si të tilla shpesh gjatë monitorimeve kemi vërejtur se autoritetet Kontraktuese kanë paguar më shtrenjtë për shërbime ose produkte sesa kur është ndjekur procedurë e hapur e prokurimit”, tha Valmir Ilazi nga INPO.

    Sipas Valmir Ilazit nga INPO, kjo praktikë bie në kundërshtim me Ligjin e Prokurimit Publik.

    Ajo çka është më shqetësuese është numri i madh i kontratave që janë punë shtesë. Këto kontrata siç e dimë janë me procedurë të negociuar sepse 10% e kontratës duhet të realizohet nga Operatori Ekonomik që e ka kryer shërbimin”, tha Ilazi.

    Gjatë vitit 2023, në nivel vendi përmes prokurimit janë lidhur 1097 kontrata, nga to 554 përmes procedurës së negociuar pa publikim për kontratë.

    Krahasuar me vitin 2022, ku vlera ishte 78 milionë, shuma e përgjithshme e kontratave të negociuara, gjatë vitit 2023 kishte arritur në mbi 116 milionë euro.

  • Degradimet në Drinin e Bardhë, ilegalët vs “Task Forca e Gjelbër”

    Degradimet në Drinin e Bardhë, ilegalët vs “Task Forca e Gjelbër”

    Përgatiti: Armand Hoti

    Gjurmët e nxjerrjes ilegale të rërës dhe zhavorrit, janë më se të dukshme në këtë pjesë të lumit Drini i Bardhë, në Rakovinë të Gjakovës.

    Dëmtimi i lumit vazhdoi edhe në pesë vitet e fundit, megjithatë nuk ka të dhëna publike për sipërfaqet e degraduara.

    “Degradimi i tërësishëm i pellgut të Drinit të Bardhë ka filluar gjatë viteve, dhe pothuajse nuk ka pasur asnjë masë gjatë këtyre viteve të pasluftës, ndonjë masë serioze për ta parandaluar gjithë atë degradim që është bërë atje”, tha Besnik Shabiu, ambientalist.

    “Task-forca e Gjelbër”, e themeluar para më shumë se një muaji nga Ministria e Mjedisit, aksionet e para ia dedikoi pikërisht pellgut lumor të Drinit të Bardhë.
    Kjo task-forcë ka shqiptuar edhe gjoba ndaj operatorëve të jashtëligjshëm.

    “Deri më tani janë zhvilluar disa aksione konkrete dhe kryesisht në pellgun e lumit Drini i Bardhë, sepse në atë lokacion kemi dëmtim dhe degradim më të madh të shtratit të lumit dhe tokave për rreth. Gjatë këtyre aksioneve janë shqiptuar 8 gjoba dhe po ashtu janë sekuestruar 7 pajisje të rënda motorike me të cilat është shkaktuar vepra penale dhe 3 seperacione të inerteve të lumit”, thuhet në përgjigjen nga Inspektorati i Ministrisë së Mjedisit.

    Ambientalisti Besnik Shabiu mirëpret angazhimin e “Task-forcës së Gjelbër”.

    “Edhe pse jemi vonë, megjithatë, aktivitete të tilla gjithmonë janë të mirëseardhura, po pyetjet që duhet t’u shtrohen institucioneve përkatëse janë se a është planifikuar ashtu siç duhet intervenimi”, tha Shabiu.

    Ndërkohë, ilegalët në Çifllak të Rahovecit tash po e shfrytëzojnë terrin për të evituar kapjen nga institucionet.

    Referuar Planit të Menaxhimit të Pellgut të Lumit Drini i Bardhë, degradimi i lumit më të gjatë në Kosovë, mes tjerash rrezikon habitatet e gjallesave, si dhe rritë potencialin për përmbytjen e tokave bujqësore.

  • Kurti e quan “montazh” bisedën e publikuar Kusari – Radojiçiq

    Kurti e quan “montazh” bisedën e publikuar Kusari – Radojiçiq

    Përgatiti: Haris Ademi

    Edhe pse tha se nuk e ka dëgjuar, kryeministri Albin Kurti e quajti të montuar bisedën telefonike mes shefes së grupit parlamentar të Lëvizjes Vetëvendosje, Mimoza Kusari-Lila, me ish-nënkryetarin e Listës Serbe, Milan Radojiciq, të publikuar një ditë më parë. Ndërsa, tha se partia e tij nuk mund të marrë masa ndaj Kusarit, meqë ajo nuk është anëtare e Vetëvendosjes.

    “Unë vetë nuk i kam dëgjuar, por qytetarët e dinë se kush ka bashkëpunuar me Radojiçiqin edhe e kanë shumë të qartë pse Radojiçiq ka ikur tash dhe pse dikur ishte në Kryeministri. Ajo është një situatë e montuar dhe Radojiçiq këtë muaj i bën 9 muaj që ndodhet i lirë në Serbi, trysnia do të duhej të ishte në Serbi që të ketë aktakuzë”, tha Kurti.

    Serbia, sipas Kurtit, është adresa edhe për trysninë ndërkombëtare, që të mos ketë tensione në rajon. Ndërsa, çështja e masave të Bashkimit Evropian ndaj Kosovës, tha se varet nga fushata zgjedhore në Bllok.

    “Unë besoj që heqja e këtyre masave që po vonohet ka të bëjë më shumë me dinamikat e brendshme të BE-së dhe sidomos me faktin që janë në fushatë zgjedhore për Parlamentin e ri Evropian, që mbahen me datën 9 qershor”, tha Kurti.

    Ai e quajti normal pozicionimin krah forcave politike në proceset jashtë Kosovës, siç i përkrahu dy kandidatë shqiptarë për kryetarë në Luginë të Preshevës.

    Ndërsa, nuk i cilësoi problem as mospajtimet me presidenten Vjosa Osmani, që javën e kaluar ishte e ashpër për mungesën e komunikimit për lëvizjet shtetërore para mbledhjes së Komitetit të Ministrave në Këshillin e Evropës, ku Kosova nuk u fut në agjendë.

    Këto deklarata, kryeministri i dha pas mbjelljes së pemës olimpike 2024, për nder të Ditës Botërore të Sportit dhe Ambientit.

  • 33 fëmijë me probleme në zemër do të operohen nga mjekët turq

    33 fëmijë me probleme në zemër do të operohen nga mjekët turq

    Përgatiti: Sara Shehu

    Një 15-vjeçare është njëra prej 6 fëmijëve, të cilët gjatë të martës iu nënshtruan intervenimeve kardio-kirurgjike pas problemeve që kishin në zemër.

    Ndërhyrjet u bënë nga një ekip i kardiokirurgëve dhe kardiologëve turq, të cilët do të qëndrojnë për 10 ditë në Kosovë për të kryer edhe 27 operime të tjera në Qendrën Klinike Universitare të Kosovës.

    Mjekët turq, të cilët po qëndrojnë në Kosovë në kuadër të misionit “Muntada Aid” thonë se qëllimi është t’iu dalin në ndihmë këtyre rasteve e njëkohësisht të trajnojnë mjekët kosovarë për të kryer në të ardhmen këto intervenime pa ndihmën e tyre.

    “Ne jemi këtu për të ndihmuar këta fëmijë me probleme të zemrës, ne i shërojmë përmes metodave tona. Misioni po shkon shumë mirë. Do t’i trajtojmë 33 raste. Fusha e shëndetësisë në Kosovë ka nevojë për ndihmën tonë”, tha Kabir Miah, menaxher “Muntada Aid”.

    “Me prezencën tonë mjekët e QKUK-së po trajnohen për këto raste, në mënyrë që në të ardhmen t’i realizojnë pa ndihmën tonë këto operacione”, tha drejtuesi i ekipit të mjekëve nga Turqia, Ibrahim Cansaran.

    Madje, për disa mjek turq ky nuk është misioni i parë.

    “Ky është misioni im i dytë në Kosovë, njerëzit janë shumë të mirë këtu, na lejojnë që t’ju dalim në ndihmë. Stafi i Kardiologjisë janë të profesionalizuar, kemi kontakt të mirë me ata”, tha Erman Cilsal, kardiolog pediatrik.

    Bashkëpunimin me mjekë të huaj e kanë mirëpritur edhe profesionistët shëndetësor të QKUK-së.

    “Çdo mision tek ne është me shumë benefite, pasi pacientët nuk kanë nevojë të dalin jashtë vendit për trajtim, kostoja është zero. Mjekët e Turqisë kanë mbrapa çdo mjek të QKUK-së si hije për ndihmë”, tha Ramush Bejiqi, pediatër dhe kardiolog.

    Intervenimet kardio-kirurgjike për 33 rastet po realizohen në Klinikën e Neurologjisë për shkak të aparaturave të reja dhe në një pjesë të Pediatrisë së vjetër.

    Ndryshe, ekipi mjekësor nga Turqia përbëhet nga kardiologë, kardiokirurgë, infermierë, anesteziologë dhe teknikë të anestezionit.

  • Opozita në Ferizaj: Komuna pagoi për asfaltin që nuk u shtrua

    Opozita në Ferizaj: Komuna pagoi për asfaltin që nuk u shtrua

    Përgatiti: Arian Hajdaraj

    Për shtrimin e kësaj rruge që të çon për te varrezat e fshatit Mirash të Ferizajt, ishte nënshkruar kontrata që në vitin 2021.

    Por, 2 vjet pas kryerjes së kontratës, këtu e as në 3 rrugica të tjera që ishin pjesë e kontratës, nuk është e shtruar asnjë centimetër asfalt.

    Sipas kryetarit të Degës së Lidhjes Demokratike të Kosovës në këtë komunë, Visar Azemi, komuna i ka kryer pagesat pavarësisht që punët nuk janë kryer.

    “Në këtë projekt me vlerë mbi 80 mijë euro, është paraparë edhe asfaltimi i rrugës së varrezave, dhe tri rrugica te Raqtë. Për këto rrugë, paratë janë paguar, por asfalti nuk është askund. Pra, nuk ka asfalt dhe nënshkrimet e pagesat janë kryer”, tha Azemi.

    Megjithatë, sipas drejtorit të infrastrukturës që më herët ishte pikërisht menaxher i kontratës në fjalë, projekti është ndryshuar në marrëveshje me banorët.

    “Projekti në fshatin Mirash është realizu i tëri. Por me kërkesë të banorëve, është bë ndryshim i projektit. Zëvendësimi i metrave të rrugëve është bë në rrugica të tjera. Të gjitha janë të vërtetuara me dokumente e gjeodetë”, tha drejtori i infrastrukturës në Ferizaj, Meriton Bajrami.

    Pavarësisht deklarimit të drejtorit të infrastrukturës, kryetari i fshatit Mirash, Taip Bytyqi, thotë se nuk ishte në dijeni për asgjë.

    “Ne kemi qenë të interesum që të shtrohet edhe kjo rrugë. Por nuk e paskam ditë që kjo deklarativisht është e shtrume siç po thotë opozita. Nëse është kështu, nuk ka ndodhë mirë, sepse organet përgjegjëse duhet të dalin para gjyqit për këtë punë”, tha Bytyqi.

    Sidoqoftë, banorët që jetojnë te rrugicat e tjera që ishin pjesë e kontratës, kërkojnë asfaltimin e tyre.

    Tenderin që e kishte fituar kompania “Gërlica”, rruga te varrezat kishte kushtuar afro 14 mijë euro.

  • Plani i hollësishëm për “Kalabrinë” mori dritën e gjelbër

    Plani i hollësishëm për “Kalabrinë” mori dritën e gjelbër

    Përgatiti: Kastriot Tahiri

    12 orë diskutime, përfshirë 2 orë me dyer të mbyllura, u nevojitën të hënën, që të miratohet plani i hollësishëm për lagjen Kalabria 2024 – 2032.

    Me këtë rast u plotësua edhe kërkesa e banorëve që protestuan para komunës, që koeficienti i pronave private të rritet nga 1.5, në 2.4.

    Ndërsa, vlera e koeficientit u ul nga 7 në 3, në pronën publike te Stacioni i Autobusëve.

    Kurse parku “Kalabria” u vlerësua me koeficient 1.25, ndërsa Hapësira e parkut “Botanika” me koeficient 1.0.

    Mirëpo, asamblistët e Partisë Demokratike nuk janë të kënaqur as me ndryshimet e bëra. Ata i thanë ATV-së në telefon, se qëndrimi i tyre mbetet i njëjtë me atë që u tha në seancën e së hënës.

    Sido që të jetë, marrëveshjen për miratimin e Planit rregullues për Kalabrinë, kryetari Përparmi Rama e cilësoi si arritje të madhe nga kryetari Përparim Rama.

  • A ka qenë më vështirë me hy në politikë apo me ndërru partinë? – Flet Doarsa Kica

    A ka qenë më vështirë me hy në politikë apo me ndërru partinë? – Flet Doarsa Kica

    Deputetja nga radhët e Lidhjes Demokratike të Kosovës (LDK), Doarsa Kica – Xhelili, para rrugëtimit të saj politik, ka punuar si avokate, për çka edhe ka kryer studimet jashtë vendit. Ajo në vitin 2021, e la profesionin e saj dhe i hyri politikës “kokë e këmbë” duke u bërë për herë të parë deputete, nga radhët e Lëvizjes Vetëvendosje si pjesë e Listës “Guxo”.

    Ekzistojnë raste të rralla të deputetëve të cilët nga deputetë të partisë në pushtet, kalojnë në opozitë, dhe Kica Xhelili e ndryshoi partinë, por ky veprim jokonvecional nuk e la atë pa u bërë  cak i komenteve dhe sulmeve (me fjalë) nga ish -partiakët e saj, por edhe nga qytetarët. Disa e quanin “turpi i kombit”, e të tjerët edhe “tradhtare”.

    Cila ka qenë më e vështirë për të, hyrja në politikë apo ndërrimi i partisë dhe si e përjetoi këtë të fundit, ajo foli ekskluzivisht në “LIBERO”.

    “…Gati si njësoj, por, momenti kur kam hyrë në politikë (për mu) ka qenë shumë i vështirë sepse po lija diçka shumë të rëndësishme që ishte avokatia. Përveç që po e lija profesionin e avokatisë për të cilin kisha përfunduar shkollime e përvojë e raste ndërkombëtare, isha duke negociuar partnershipin (pra rrugës për t’u bërë aksionare në atë firmë)…Ndërsa, ndërrimi i partisë ka qenë çështje e natyrshme, ka buruar… Kisha qenë në një grupim që mendon krejt ndryshe nga unë…”, deklaroi Kica Xhelili.

    Për më shumë informacione nga intervista e Doarsa Kica Xhelilit, klikoni në linkun e mëposhtëm:

  • Kurti për bisedën Kusari-Radojiçiq: S’e kam dëgjuar, ajo është një situatë e montuar

    Kurti për bisedën Kusari-Radojiçiq: S’e kam dëgjuar, ajo është një situatë e montuar

    Kryeministri i Kosovës, Albin Kurti, e ka quajtur situatë të montuar bisedën telefonike ndërmjet shefes së deputetëve të Lëvizjes Vetëvendosje me Milan Radojiqiçin.

    “Unë vetë nuk i kam dëgjuar, por qytetarët e dinë se kush ka bashkëpunuar dhe e kanë shumë të qarte pse Radojiçiqi ka ikur tash dhe nuk qëndron në qeveri. Ajo është një situatë e montuar dhe Radojiçiqi këtë muaj i bënë 9 muaj që është i lirë në Serbi”, u shpreh Kurti.

  • Nuhi Bytyçi nis dëshminë në gjykimin ndaj Thaçit dhe të tjerëve

    Nuhi Bytyçi nis dëshminë në gjykimin ndaj Thaçit dhe të tjerëve

    Pas përfundimit të dëshmisë së dëshmitarit të 70-të, në Dhomat e Specializuara të Kosovës (DhSK) në Hagë, ka filluar dëshminë dëshmitari i 71-të i Zyrës së Prokurorit të Specializuar, Nuhi Bytyçi në procesin gjyqësor ndaj ish-krerëve të Ushtrisë Çlirimtare të Kosovës (UÇK).

    Pyetjet për këtë dëshmitar i ka filluar prokurori Matt Halling, i cili në përmbledhjen e lexuar tha se dëshmitari ka qenë gazetar i cili ka mbuluar UÇK-në gjatë luftës, raporton “Betimi për Drejtësi”.

    “Dëshmitari 04411 ka qenë gazetar i cili ka mbuluar UÇK-në gjatë luftës. Ai ka bërë fotografi të elementeve ose momenteve të rëndësishme përfshirë edhe rolin në të cilin janë përfshirë të akuzuarit. Dëshmitari ka shkruar një libër rreth përvojës së tij të botuar në vitin 2019 që quhet “Libri i Luftës”, lexoi Halling.

    Dëshmitari Bytyçi pohoi se është autori i një libri të titulluar “Libri i Luftës”, në të cilin pasqyrohen përjetimet e tij gjatë kohës së luftës në Kosovë.

    Sipas kryetarit të trupit gjykues, Charles Smith dëshmia e këtij dëshmitari pritet të zgjasë rreth dy ditë, përkatësisht 11 orë.

    Ai tha se ZPS-ja ka paraparë 3 deri në 4 orë për pyetje, ndërsa mbrojtja e të akuzuarve rreth 7 orë e gjysmë për kundërpyetje.

    Deklaratat e dëshmitarit që rrjedhin nga seanca përgatitore me ZPS-në, u pranuan si prova materiale. Ndërsa, nëse libri i tij ai të pranohet tërësisht a po disa pjesë të tij mbeti që vendimi të merret pas pushimit me kërkesën e mbrojtjes së të akuzuarve pasi thanë që nuk e kundërshtojnë, por iu duhet konsultim mes vete për shkak të disa paqartësive.

    Pas pushimit, me vendim të trupit gjykues, u pranuan të gjitha faqet e përkthyera të këtij libri.

  • Vetëvendosje thyen heshtjen për audio-incizimin e Kusari-Lilës me Radojçiqin

    Vetëvendosje thyen heshtjen për audio-incizimin e Kusari-Lilës me Radojçiqin

    Zëdhënësi i Lëvizjes Vetëvendosje, Arlind Manxhuka ka thyer heshtjen e partisë së tij për audio-incizmin e shefes së grupit parlamentar të VV-së, Mimoza Kusari-Lilës me terroristin Milan Radojçiq.

    Ai ka thënë se trashëgimia e tyre (pushtetet e kaluara) nuk bëhet dot mëkat i Vetëvendosjes.

    “Trashëgimia e keqe e tyre nuk bëhet dot mëkat i yni. Ata që kanë bërë biznese, koalicione, qeveri e miqësi me Radoiçiqin nuk mund të na bëjnë gjyqin neve sot. Me neve Radoiçiq ikë maleve me bisht nën shalë, e nuk zë vend në karrigat e zyrës së Kryeministrit”, ka shkruar Manxhuka.

    “Kjo është sa për përkujtim për të gjithë korin kritikues e akuzues që i kemi dëgjuar dje e sot. Tjerat i gjykon më së mirë qytetari. Ai më së miri e di se ku ishte Lista Serbe dhe Radoiçiq para qeverisë sonë, dhe ku janë sot”, ka shtuar ai.