ATV

Category: Lajme

  • Kurti: Çlirimi e shpallja e pavarësisë ia kanë vlejtur fortë, do të kemi strategji për drejtësi tranzicionale

    Kurti: Çlirimi e shpallja e pavarësisë ia kanë vlejtur fortë, do të kemi strategji për drejtësi tranzicionale

    Kryeministri i Kosovës, Albin Kurti, ka thënë në mbledhjen e Qeverisë, se Kosova për herë të parë që prej çlirimit, do të ketë strategji për drejtësi tranzicionale, raporton EO.

    Kreu i ekzekutivit ka theksuar se kjo është një hap përpara për të realizuar përpjekjet e tyre në adresimin e planeve.

    “Për herë të parë pas përfundimit të luftës, Republika e Kosovës do të ketë Strategji për Drejtësi Tranzicionale. Populli i Kosovës ka kaluar nëpër sfida të mëdha, ka përjetuar dhimbje e vuajtje të pamatshme. Ky dokument strategjik është edhe një hap përpara në përpjekjet tona për të adresuar plagët e së kaluarës dhe për të ndërtuar një të ardhme më të drejtë për të gjithë qytetarët tanë. Miratimi i kësaj strategjie është vetëm hapi i parë. Zbatimi i saj kërkon përkushtim, bashkëpunim dhe mbështetje nga të gjithë ne. Përkushtimi i shfaqur në hartimin e kësaj strategjie, jam i bindur që do të vazhdojë edhe në zbatimin e saj”, tha Kurti.

    Me tutje, Kurti falënderoi aleatët e Kosovës që ndaluan okupimin serb të popullin të Kosovës gjatë viteve të 9o-ta.

    “Asnjëherë Nuk është mjaftueshëm për të shprehur mirënjohjet tona për të gjithë ata qe sakrifikuan për liri, lavdi iu jemi përjetësisht falënderues edhe aleatëve ndërkombëtarë. Ne mbledhje po vij nga takimi me William Walker, ky njeri i jashtëzakonshëm, ishte ai që ngriti zërin për padrejtësinë në vendin tonë”, theksoi shefi ekzekutivit.

    Kurti se angazhimi i tyre ishte katalizator që treguan përkushtimin e NATO-s, duke përmendur e falënderuar të gjithë gratë e burrat e OSBE-s në Kosovë, për afro 6 muaj.

    Kurti po ashtu përmendi edhe statistika në fushën e ekonomisë, duke thënë se vendi ka shënuar përmirësim 5 herë më të madh se në vitin 2000.

    “Ekonomia e vendit tonë sivjet do të jetë 5 herë me i madh se në vitin 2000, nuk po e krahasojmë me vitin 1999, kur ishte vit i kthimit të refugjatëve pas luftës, por po e krahasojmë me vitin, 2000. Pas më pak se 25 vjetëve ekonomia është rritur 5 herë në gjysmë. Ndërkaq krahasuar prej shpalljes së pavarësisë, është rritur brutoprofukti vendor gati tri herë me i madh se atë vit, kurse krahasuar me 4 vjet më herët, sivjet e kemi 50% më të lartë bruto-produktin vendor. Qytetarët gjithashtu janë me të lirë, shteti është më i pavarur dhe më i lirë se kurdo herë më parë, qeverisja po bëhet përherë e më e mirë, pra çlirimi, sakrifica gjithëkombëtare, shpallja e pavarësisë ia kanë vlejtur fortë edhe në aspektin e rritjes ekonomi edhe në aspektin e demokracisë qytetare”, tha Kurti.

  • Disa arsye pse boronicat janë ndër frutat më të shëndetshme në botë

    Disa arsye pse boronicat janë ndër frutat më të shëndetshme në botë

    Boronicat renditen në krye të listës për aftësitë antioksiduese, krahasuar me 40 lloje frutash të tjera.

    Studiuesit amerikanë kanë arritur në përfundimin se boronicat janë shumë efektive për të luftuar radikalet e lira, kolesterolin e lartë dhe infeksionet.

    Luftojnë plakjen

    Boronicat përmbajnë antioksidantë, të cilat luftojnë procesin e plakjes.

    Luftojnë kancerin

    Boronicat kanë në përbërje të tyre elementë, të cilët nxisin disa lloj enzimash të parandalojnë kancerin dhe rritjen e qelizave tumorale në rast të shfaqjes.

    Lehtësojnë diarrenë

    Në Suedi, boronicat e thata përdoren për të kuruar diarrenë te fëmijët. Ato vrasin bakterin E.coli, i cili lidhet shpesh me këtë infeksion.

    Rrisin përqendrimin dhe kujtesën

    Është provuar se ekstrakti i boronicës rrit përqendrimin, aftësitë për të koordinuar punët dhe kujtesën afatshkurtër. Antocianina, e cila i jep frutit ngjyrën blu, vepron si mbrojtës për neuronet.

    Janë të dobishme për shtatzëninë

    Boronicat janë një burim i acidit folik. Ato përmbajnë edhe vitaminë C, kalcium dhe disa elementë të tjerë të domosdoshëm për nënat shtatzëna. Gjithashtu, fibrat në përbërje të tyre ndihmojnë tretjen dhe jashtëqitjen.

    Reduktojnë rrezikun e sëmundjeve të zemrës

    Boronicat reduktojnë atë që njihet me emrin “kolesteroli i keq”, i cili ndikon në sëmundjet kardiovaskulare deri te ataku i zemrës.

    Parandalojnë infeksionet urinare

    Një element që gjendet te boronicat është provuar se ndikojnë pozitivisht te trakti urinar dhe reduktojnë rrezikun e infeksioneve. Ai sulmon bakteret që ngjiten te qelizat e mureve të traktit urinar.

  • ​Bislimi: Kosova e ka garën “600 metra me pengesa” për integrime, vendet tjera “400 metra sprint”

    ​Bislimi: Kosova e ka garën “600 metra me pengesa” për integrime, vendet tjera “400 metra sprint”

    Zëvendëskryeministri Besnik Bislimi deklaroi se pesë shtetet mosnjohëse janë pengesë për Kosovën që të marrë statusin e vendit kandidat në Bashkimin Evropian. Sipas tij, ka frustrim brenda Komisionit Evropian që nuk po arrihet konsensusi, për çka shtoi se janë këto vende të cilat nuk po arrijnë një gjë të tillë. Pas mbledhjes së Komisionit për Integrime Evropiane, ai theksoi se gara për Kosovën për anëtarësim në BE nuk është e njëjtë në krahasim me vendet e tjera të rajonit.

    Para mediave, zëvendëskryeministri Besnik Bislimi u shpreh se Kosova është më e përgatitur se secili vend i Ballkanit Perëndimor për të marrë statusin e vendit kandidat në Bashkimin Evropian.

    “Mosnjohësit nuk po lejojnë ende që të ndërtohet konsensusi brenda këshillit, i cili kërkon dërgimin e pyetësorit tek Komisioni Evropian, në mënyrë që të vlerësohen kapacitetet e Kosovës për të filluar procesin e integrimit, apo për të marrin statusin e kandidatit. Ka frustrim edhe brenda komisionit që ky konsensus nuk po arrihet edhe më tej, ne kemi insistuar shumë herë që konsensusi të gjendet në formën e njëjtë siç është arritur në vitin 2016 kur vendet anëtare janë pajtuar që të kenë divergjenca rreth njohjes së Kosovës, por jo të kenë unitet në mundësimin e ecjes së Kosovës rreth integrimit evropian. Procesi i integrimit liron më shumë fonde të Bashkimit Evropian, por kjo nuk do të thotë që shtyhet për shkak se ne veç jemi duke punuar në zbatimin e agjendës dhe rrjedhimisht jemi shumë më të përgatitur se sa secili vend i Ballkanit Perëndimor në momentin kur e ka marrë statusin e kandidatit”, deklaroi Bislimi.

    Megjithatë, Bislimi theksoi se ka zëra brenda Komisionit Evropian që nëse Kosova do të garonte në kushte të njëjta me vendet e tjera të rajonit, do të ishte vendi i parë që do të marrë statusin e anëtarit të plotë të BE-së.

    “Ka zëra brenda Komisionit Evropian të cilët besojnë që në rast se Kosova do të garonte në kushte të njëjta me vendet e tjera të rajonit, do të ishte mbase vendi i parë ose i dytë nga i gjithë Ballkani që mund të marrë statusin e anëtarit të plot të Bashkimit Evropian, por fatkeqësisht gara për Kosovën nuk është e njëjtë. Në qoftë se e shihni se gara e vendeve të tjera është një garë 400 metra me sprint, Kosova e ka 600 metra edhe me pengesa. Edhe ka njerëz edhe brenda komisionit të cilët na vendosin pengesa të vazhdueshme në këtë rrugëtim”, u shpreh ai.

    Tutje, Bislimi shtoi se Kosova i ka plotësuar të gjitha kriteret për anëtarësim në Këshillin e Evropës, por më pas ka pasur kërkesa të devijuara.

    “Kosova i ka plotësuar të gjitha kriteret që Këshilli i Evropës i ka kërkuar nga Kosova dhe Asambleja Parlamentare e Këshillit të Evropës ka thënë që Kosova e meriton të jetë anëtare e plot sepse i plotëson të gjitha kriteret. Pastaj ka pasur kërkesa që kanë devijuar nga kërkesat e Komisionit Evropian dhe të cilat janë refuzuar nga vet Asambleja Parlamentare e Komisionit Evropian, siç është kërkesa për dërgimin e draftit, i cili nuk përbën faktikisht as draft as dokument sepse nuk ka as nënshkrim e as nuk ka pronësi. Deri në momentin e tanishëm ka disa adresa që kanë thënë që ky është draft i joni. Ne nuk dërgojmë artikuj gazetash as opinione, as drafte të cilat nuk kanë autorësi e as pronësi në Gjykatën Kushtetuese por dialogu është pjesë e Marrëveshjes së Stabilizim Asociimit, i cili është dërguar nga qeveritë paraprake në momentin kur është dakorduar marrëveshja e Stabilizim Asociimit. Rrjedhimisht do të jetë pjesë e vlerësimit tonë, por nuk është diçka që e bllokon integrimin”, përfundoi ai. /kp

  • Bislimi: Serbia s’është pengesë për marrjen e statusit të vendit kandidat, por pesë shtetet mosnjohëse

    Bislimi: Serbia s’është pengesë për marrjen e statusit të vendit kandidat, por pesë shtetet mosnjohëse

    Zëvendëskryeministri i Kosovës, Besnik Bislimi, ka deklaruar se pengesë për marrjen e statusit të vendit kandidat nuk është Serbia por pesë shtetet mosnjohëse.

    Ai deklaroi të enjten pas raportimit në Komisionin për Integrim Evropian, se Kosova është e përgatitur për marrjen e këtij statusi, e siç u shpreh ai, aktualisht gjendet në një stad më të lartë, se të vendeve të tjera të rajonit.

    “Serbia nuk është pengesë për neve, Serbia ka problemet e veta me integrimet evropian, nuk ka kapituj të çelë për vite. Te ne pengesë më shumë janë 5 vendet mosnjohëse të cilët nuk po lejon ende që të ndërtohet koncenzuesi brenda Këshillit i cili kërkon dërgimin e pyetësorit tek Komisioni Evropian në mënyrë që të vlerësohen kapacitet e Kosovës për me filluar procesin e integrimit apo për të marr statusin e kandidatit. Ka frustrim edhe brenda Komisionit që ky konsensus nuk po arrihet edhe me tej”, ka thënë Bislimi para gazetarëve.

    Numri dy i Qeverisë ka thënë se Kosova ka një përparësi në krahasim me shtetet tjera që e kanë marrë statusin e vendit kandidat, pasi Kosova që nga viti 2016 është duke e zbatuar MSA-në.

    “Duhet ta keni të qartë, procesi i integrimit liron më shumë fonde të BE-së, por kjo nuk do të thotë se shtyhet se ne që jemi duke punuar në zbatimin e agjendës dhe rrjedhimisht jemi shumë më të përgatitur se secili vendi i Ballkanit Perëndimor në momentin kur e ka marr statusin e kandidatit. Ne jemi duke zbatuar Marrëveshjen e Stabilizim Asociimit (MSA) që nga viti 2016, para se me marr statusin e kandidatit. Kurse disa vende të tjera e kanë marr statusin e kandidatit vetëm tri javë pasi kanë filluar zbatimin e marrëveshjes së stabilizim asociimit, kjo na vendos neve në një pozitë shumë më të avancuar”, u shpreh Bislimi.

  • ​Wallker pas takimit me Kurtin: Kosova është një histori e jashtëzakonshme suksesi

    ​Wallker pas takimit me Kurtin: Kosova është një histori e jashtëzakonshme suksesi

    Ish-ambasadori i OSBE-së, William Walker, ka përfunduar takimin me kryeministrin e Kosovës, Albin Kurti.

    Ai pas këtij takimi ka përmendur se Kosova është histori e jashtëzakonshme suksesi.

    “Dua të them vetëm një të vërtetë, e cila është se Kosova është një histori e jashtëzakonshme suksesi. Në 25 vjet që keni kaluar, ju shqiptarët e Kosovës, kosovarët, keni bërë kaq shumë për ta bërë këtë një histori të jashtëzakonshme suksesi. Dhe dua që bota ta dijë se çfarë suksesi është Kosova. Dje kishit shumë vizitorë të ardhur nga vende të ndryshme dhe e panë suksesin e këtij vendi. Kështu që shpresoj që të gjithë të jeni shumë krenarë që jeni gazetarë, por edhe të jeni krenarë që jeni shqiptarë të Kosovës. Ju meritoni meritat për atë që është ky vend sot. Faleminderit”, shtoi Walker.

    Ai tha se kosovarët janë meritor për suksesin e Kosovës. Walker përmendi edhe sukseset e institucioneve të Kosovës.

    “Dje e di se u folën shumë fjalë duke i dhënë meritat NATO-s, duke i dhënë meritat disa prej akterëve të tjerë ndërkombëtarë që ishin këtu. Me meritë, por mendoj se e gjithë merita për atë që ka ndodhur gjatë Kosovës në 25 vitet e fundit i takon kosovarëve. Ju jeni përgjegjës për suksesin e këtij vendi. Kryeministri Kurti si dhe kryeministrat e mëparshëm, si dhe presidentët tuaj dhe të gjithë, dhe policia. Sapo fola me policët tuaj këtë mëngjes, ndërsa po dilja nga hoteli. Doja t’u tregoja se çfarë suksesi është Departamenti i Policisë së Kosovës. Po, ata marshuan në paradë dje. Po, e meritojnë, por besoj se nuk e kuptoni aq mirë sa unë se sa e mirë është Forca e Policisë suaj. E dini, unë vij nga Shtetet e Bashkuara, atje kemi shumë policë. Disa prej tyre janë të mirë, disa prej tyre nuk janë aq të mirë. Policia juaj është jashtëzakonisht e mirë. Pse? Sepse ata janë kosovarë dhe me të vërtetë po bëjnë një punë të mirë. Dhe kjo është e vërtetë në shumë pjesë të administratës, në shërbimin publik këtu. Është e vërtetë edhe për gazetarët tuaj. Më pëlqen të takohem me gazetarët e Kosovës, sepse ju jeni gjithmonë të respektueshëm, bëni pyetje të mira, raportoni saktë, raportoni atë që them unë”, tha Walker.

    Pas takimit më shumë se një orë me kryeministrin Albin Kurti, Walker tha se kishin një takim shumë produktiv. Derisa përmendi se nuk është zakon i tij të shkoj në takime me rroba të thjeshta.

    Derisa sot tha se ka ardhur me rroba të thjeshta nga Kalifornia si mik i Kosovës dhe kryeministrit Kurti.

    Më duhet të them, me gjithë sinqeritet, ishte një takim shumë shumë i mirë. Së pari, më lejoni t’ju them se zakonisht nuk vij i veshur kështu për të takuar një kryeministër. Duhet të kem veshur një kostum dhe kravatë. Por gjatë dy ditëve të fundit kishte shumë njerëz me kostume dhe kravata, kështu që unë vij me rrobat e mia të thjeshta nga Kalifornia, sepse vij këtu si mik i Kosovës, si mik i kryeministrit Kurti, si mik i mediave këtu. Më pëlqen të flas me ju dhe ju falënderoj për mundësinë për t’ju pershendetur. Nëse keni ndonjë pyetje, ose nëse doni të them edhe disa fjalë, unë kam pasur shumë përvojë me gazetarët në takimet e mia të mëparshme dhe detyra juaj është të jeni kritik, detyra juaj është t’i tregoni botës të vërtetën për atë që po ndodh”, shtoi ai. /kp

  • ShSKUK-ja hap konkurs për 67 mjekë specialistë

    ShSKUK-ja hap konkurs për 67 mjekë specialistë

    Shërbimi Spitalor Klinik dhe Universitar i Kosovës (SHSKUK) ka hapur konkurs për 67 mjek specialistë. Pozitat për mjekë specialistë janë të hapura në QKUK në Prishtinë, në Spitalin e Përgjithshëm në Pejë, Spitalin e Gjakovës, Spitalin e Prizrenit, Gjilanit, Ferizajit, Mitrovicë, dhe Vushtrri.

    Konkursi do të jetë i hapur nga data 11.06.2024 deri më 11.07.2024.

    Ndryshe ditë më parë  SHSKUK ka hapur konkurs dhe për 143 pozita të reja, për 130 infermierë, 8 teknikë dhe 5 fizioterapistë.

    Ndërkaq ditë më parë ministri i Shëndetësisë Arben Vitia kishte paralajmëruar se gjatë muajit qershor  do të hapet konkursi për punësimin e mbi 300 profesionistëve shëndetësor. Në mesin e tyre, do të jenë 80 specialistë e rreth 200 infermierë.

    “Investimet në infrastrukturë në QKUK dhe spitalet e përgjithshme po vazhdojnë me një intensitet të shtuar për t’i bërë ambientet më miqësore dhe praktike për pacient. Po investohet edhe në infrastrukturë, janë hapur shumë shërbime të reja. Edhe shërbime që deri tani nuk janë bërë. Vetëm në Gjinekologji pritet që të mundësohen tri shërbime të reja. Shërbimet që janë marr në sektorin privat dhe jashtë shteti, tani do të merren edhe në sektorin publikë. Në bashkëpunim me menaxhmentin e SHSKUK në muajin qershor do të hapet konkursi edhe për rreth 330 profesionistë shëndetësor. Do të punësohen rreth 80 specialist, dikund rreth 200 infermier që do të ndikojnë në përmirësimin e shërbimeve”, ka thënë ai.

    Konkursin e gjeni të plotë këtu.

  • Argjentina tronditet nga përleshjet për shkak të projektligjit për reforma

    Argjentina tronditet nga përleshjet për shkak të projektligjit për reforma

    Senati i Argjentinës e kaloi të mërkurën vonë një projektligj të presidentit Javier Milei për reforma ekonomike, duke nxitur protesta dhe përleshje mes demonstruesve dhe policisë në rrugët e Buenos Aires.

    Dhoma e lartë e Senatit ishte e ndarë gjatë votimit të projektligjit, por e kaloi atë përfundimisht me 37 vota për dhe 36 kundër, falë votës së kryetares së dhomës, zëvendëspresidentes Victoria Villarruel.

    Votimit i parapriu një debat maratonik dhe senatorët tani duhet të votojnë për secilin nen të projektligjit një nga një, i cili synon t’i rritë investimet duke i privatizuar subjektet shtetërore dhe duke stimuluar bizneset.

    Protestuesit hodhën gurë dhe dogjën vetura me koktej molotovi, ndërsa policia iu përgjigj duke përdorur gazlotsjellës dhe topa uji.

    Reformat përfshijnë ringjalljen e ekonomisë së vendit, shpalljen e një emergjence shtetërore ekonomike, uljen e pensioneve dhe dobësimin e të drejtave të punëtorëve.

    Projektligji kishte kaluar në dhomën e ulët në prill, por duhet të kthehet në votim pas ndryshimeve në Senat.

    “Sot, i kemi dy Argjentina”, tha Villarruel, teksa votoi në favor të reformave.

    “Një Argjentinë e dhunshme që ia vë zjarrin automjetit, hedh gurë dhe debaton për ushtrimin e demokracisë, dhe një Argjentinë tjetër me punëtorë, të cilët e presin me vuajtje dhe sakrificë ndryshimin për të cilin votuan”, tha ajo.

    Qeveria e Mileit nuk e gëzon shumicën në asnjërën prej dhomave të Senatit.

    Ky projektligj është çelësi për planet e Mileit për ta ndryshuar ekonominë e rrënuar të vendit, ku inflacioni ka arritur gati 300 për qind, dhe përfshin plane për t’i privatizuar ndërmarrjet publike, për t’i dhënë pushtet të veçantë presidentit dhe për të nxitur investime.

    Por, disa protestues druajnë se projektligji rrezikon ta rrisë papunësinë dhe çmimet e produkteve ushqimore.

    “Po luhet me jetën e qytetarëve argjentinas. Ne e kemi pirë këtë helm shumë herë: të kemi zero inflacion me zero aktivitete ekonomike”, tha lideri social dhe i protestave, Luis D’Elia, teksa mijëra njerëz protestuan kundër reformave.

    Zyra e Mileit e festoi kalimin e projektligjit.

    “Çfarë ndodhi sonte është triumf për popullin argjentinas dhe hapi i parë drejt kthimit të madhështisë sonë”, tha Zyra e presidentit në një komunikatë./REL/

  • Policia konfiskon drogë dhe para në Prishtinë, arrestohet një i dyshuar

    Policia konfiskon drogë dhe para në Prishtinë, arrestohet një i dyshuar

    Është arrestuar një person në Prishtinë, pasi që gjatë kontrollit në trup dhe në veturën e tij i janë gjetur dhe konfiskuar 6 qese me marihuanë, në peshë 5.4 gramë.

    Policia në raportin 24 orësh ka njoftuar se janë kontrolluar edhe dy lokacione ku janë konfiskuar drogë dhe para.

    “Me vendim të prokurorit është bërë kontroll në dy lokacione ku janë gjetur dhe konfiskuar: një sasi narkotikë e llojit marihuanë në peshë 102.5 gramë, 3.9 gram kokainë, një sasi e qeseve të zbrazëta, një peshore digjitale për matje, një telefon celular dhe 282 € kesh para”, thuhet në raport.

    Tutje, policia bën të ditur se i dyshuari me qëllim të shmangies së arrestimit dhe ndalimit, me veturën e tij e ka goditur veturën zyrtare të policisë duke i shkaktuar dëme materiale si dhe dy zyrtarëve policorë iu ka shkaktuar lëndime trupore.

    Në raportin e policisë bëhet e ditur se i dyshuari pas intervistimit është dërguar në mbajtje.

  • “Nuk ke folur asgjë, “Ti veç fol kotë” – Pozitë e opozitë përplasen gjatë raportimit të Bislimit në Komision

    “Nuk ke folur asgjë, “Ti veç fol kotë” – Pozitë e opozitë përplasen gjatë raportimit të Bislimit në Komision

    Deputetet e pozitës dhe opozitës janë përplasur në Komisionin për Integrime Evropiane, ku ishte duke raportuar Zëvendëskryeministri i parë për Integrim Evropian, Zhvillim dhe Dialog, Besnik Bislimi, raporton Ekonomia Online.

    Përplasje patën deputetja e Lëvizjes Vetëvendosje, Fjolla Ujkani me deputetet e Lidhjes Demokratike të Kosovës, Rrezarta Krasniqi dhe të Aleancës për Ardhmërinë e Kosovës, Time Kadrijaj.

    Deputetja e partisë në pushtet, Fjolla Ujkani kishte vërejtje që diskutimi është duke marrë kahje tjetër dhe nuk është diskutuar për atë që ftohet mbledhja e Komisionit e raportimet e zëvendëskryeministrit e të ministrave.

    “Mënyra edhe qasja qysh e keqpërdorni pozitën si kryetare e Komisionit ju po e bënë ftesën me ardhë zëvendëskryeministri me raportu vetëm për opozitën. Ky është niveli që po e sjellni ju debatin dhe këtu dua ta mbaj edhe unë. Duhet me lënë radhën me fol edhe të tjerët”, ka thënë ajo.

    E deputetja e AAK-së Time Kadrijaj, tha se deputetja Ujkani nuk është duke thënë asgjë.

    “10 minuta je duke fol, nuk ke folur asgjë. Ti veç folë kotë. Nuk fole asgjë hiq bëjë pyetje”, u shpreh ai.

    E me këtë rast fjalën deshi ta marr kryetarja e Komisionit, Rrezarta Krasniqi, por që pati kundërshtime nga deputetja Ujkani.

    Me pas të dy deputetet, Ujkani dhe Krasniqi, kanë debatuar në të njëjtën kohë, përderisa deputetja Krasniqi lexonte e-mailin e dërguar për raportim ndaj zëvendëskryeministrit.

  • ​Arrestohet një person për shitblerje të narkotikëve dhe sulm ndaj personit zyrtar

    ​Arrestohet një person për shitblerje të narkotikëve dhe sulm ndaj personit zyrtar

    Policia e Kosovës ka arrestuar një person me inicialet L.Sh, i dyshuar për veprën penale të shit-blerjes të narkotikëve.

    Prokuroria Themelore në Prishtinë, ka bërë me dije se në koordinim me Policinë e Kosovës kanë ndërmarrë veprime hetimore, me ç’ rast gjatë ditës së djeshme është realizuar plani i koduar “Përfundimi”, në rrugën “Kongresi i Drejtshkrimit” Prishtinë, rreth orës 18:00.

    Sipas prokurorisë personi është arrestuar për shkak të dyshimit të kryerjes së veprave penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” dhe “Sulmi ndaj personit zyrtar”, sipas KPRK-së.

    “I dyshuari me qëllim të shmangies nga arrestimi dhe ndalimi, me veturën e tij e ka goditur veturën zyrtare të policisë duke shkaktuar dëme materiale, si dhe dy zyrtarëve policor iu ka shkaktuar lëndime trupore, për çka edhe kanë marrë trajtimin e nevojshëm mjekësor”, thuhet në komunikatën e prokurorisë.

    Gjatë kontrollit në trupin dhe veturën e të dyshuarit sipas njoftimit janë gjetur një sasi e dyshuar narkotike e mbështjellur në qese. Ndërsa, pas zbatimit të urdhëresës për bastisje, e cila është bërë në dy lokacione, Prishtinë dhe Fushë Kosovë, si dhe kontrollit në veturën e të dyshuarit janë gjetur dhe sekuestruar: 6 qese me narkotik të llojit marihuanë në peshë 5.4 gram, marihuanë në peshë 102.5 gram, 3.9 gram kokainë, një sasi e qeseve të zbrazëta, një peshore digjitale për matje, një telefon celular dhe 282 euro.

    “I dyshuari ndodhet nën masën e ndalimit prej 48 orësh, derisa ndaj të njëjtit prokuroria do t’i ndërmerr veprimet e mëtejme ligjore. Ju njoftojmë se ky operacion është realizuar me sukses në saje të bashkëpunimit të ngushtë të Prokurorit të Shtetit me Policinë e Kosovës”, përfundon njoftimi.