Category: Lajme

Në mungesë kuorumi, Komisioni për Punë të Jashtme dhe Diasporë, nuk ka kaluar pikën e rendit të ditës që lejon heqjen e shpenzimeve për organizimin e Pritjes për përfituesit e Programit për Diplomaci Qytetare nga MPJD, raporton EO.

Për temat e këtij takimi, tregoi kryetarja e komisionit, njëherësh deputete e pushtetit, Arbëreshë Kryeziu-Hyseni.

“Ideja me i taku, me bisedu me ta se çka mund të bëjmë, pra me bë një pritje jo të zakonshme siç i presim delegacionet tjera. Pra me një lloj kokteji, ku njëjtin kohë bashkëbisedojmë me ta e i ndajmë qëndrimet tona”, tha ajo.

Por as në këtë komision nuk munguan përplasjet verbale ndërmjet pozitës e opozitës.

Deputetja e VV-së, Arbëreshë Kryeziu-Hyseni, tha se shpenzimet e këtij delegacioni do t’i mbulojë GP – VV-së.

“Nuk pati korum ne thjesht mund ta bëjmë një pritje të zakonshme për ta në komision meqenëse ka arsye të ndryshme të deputetëve të cilët nuk dëshirojnë t’i presin të rinjtë e diasporës që kontribuojnë profesionalisht në institucionet tona. Unë besoj që thjesht mund të organizojmë pritjen për ta sikurse edhe për delegacionet tjera. Në gjitha komisionet, në të gjithë delegacionet tjera që kemi në komision ndërkohë shohim cila do të jetë mundësia që përpos kësaj thjesht të ulemi me ta të pimë një kafe, të flasim besoj që ka shumë mundësi unë do ta marr përsipër të paktën që në emër të Grupit Parlamentar dhe komisioni ta bëjmë këtë dhe t’i ofrojmë diçka me shume se sa një kafe qe vjen prej bufesë, meqenëse opozita nuk e lejojnë një gjë të tillë sot”, u shpreh ajo.

Por me këtë konstatim të Kryeziu-Hysenit, nuk u pajtua deputetja e Lidhjes Demokratike të Kosovës, Doarsa Kica-Xhelili.

Madje, kësaj të fundit nuk iu lejua të marr as fjalën.

“Mbledhja është e mbyllur”, tha kryetarja e komisionit.

“Çështja e parë, nuk jemi opozitë por jemi LDK, e dyta unë marr vendime sido që ma merr mendja. Çështja e tretë kur nuk arrini me bind askënd s’kam nevojë me dhënë votën ti e ose dikush tjetër dhe çështja e katërt unë as nuk kam qenë në dijeni për çka u votua”, u shpreh deputetja e LDK-së.

Pas këtij diskutimi, mbledhja e këtij komisioni u mbyll.

Lëvizja FOL, me rastin e Ditës Ndërkombëtare të Sinjalizuesve, ka mbajtur diskutimin “FOL Hapur” për rëndësinë, efektivitetin dhe sfidat në zbatimin e Ligjit për Mbrojtjen e Sinjalizuesve, ku u theksua se numri i rasteve të raportimit të sinjalizimeve është shumë i vogël e njëra nga sfidat u cilësua te jetë te ndërmarrjet publike, për faktin se qëndrojnë jashtë domenit qeveritar, raporton EO.

Aty u tha se sfidë për sinjalizim është në sektorin privat, ndërsa e kundërta është në institucione publike.

Drejtoresha e Lëvizjes FOL, Megi Demolli-Nimani, tha se sinjalizimi krijon klimë të përshtatshme dhe rrit përgjegjësinë e qytetarëve.

Drejtori i Agjencisë për Parandalimin e Korrupsionit, Yll Buleshkaj, tha se sinjalizimi është i rëndësishëm për ta bërë punën më etike brenda dhe jashtë institucioneve, ndërsa veçoi faktin se shtimi i rasteve të raportimit të sinjalizuesve është shumë i vogël.

“Numri i sinjalizimeve nuk është i mirë edhe pse ka rritje, është shumë i ulet… të cilat nuk janë shumë por janë shumë më shumë për dallim nga vitet e kaluara. Në vitin 2022 kanë qenë 12 raste, këtë vit besojmë se do shkojë në rritje 50 për qind. Sfidë më e madhe është te ndërmarrjet publike, sepse janë të sektorit privat edhe pse ofrojnë shërbime në emër të publikut, këtu ka sfida më shumë se të institucionet”, tha ai.

Vesel Zhinipotoku nga Inspektorati i Punës, tha se nga eksperienca deri tash, ky ligj ka krijuar që të ketë mekanizma në krijimin e kompetencave në sektorin privat, në mbrojtjen dhe promovimin e të drejtave të të punësuarit.

“Inspektorati i Punës, jemi duke e vazhduar në mbrojtjen dhe promovimin që punëdhënësit të caktojnë zyrtaret kompetent në kuptimin që të punësuarit të kenë qasje, ku mund të adresojnë shkeljet”, tha ai.

Tutje shtoi, se Inspektorati i Punës është në fazën e krijimit të digjitalizimit, i cili pritet te ketë qasje pozitive ndaj punëtorit.

“Jemi në fazën e implementimit së sa punëdhënësit tanë po i zbatojnë mekanizmat që iu takojnë sipas këtij ligji. Krijimin një mekanizmi të tillë na ndihmon si institucione, ne marrim informata të përditshme për shkelje të të drejtave, krijimi i mekanizmit është një ndihmesë, për të kuptuar rëndësinë e të drejtave, jemi në fazën e krijimit të digjitalizimit ku do ta ngris nivelin e vetëdijes për të drejtat që duhet të mbrohen nga punëdhënësi”, tha ai Zhinipotoku.

Ndërsa, sa i përket, numrit të sinjalizimeve, në Inspektoratin e Punës, tha se me statistika nuk ka numra, megjithatë brenda ditës mund të jenë 20 deri në 30 sinjalizime.

“Brenda ditës 20-30 sinjalizime të jashtme që bëhen nga të punësuarit apo drejtpërdrejt qe bëhen më shkelje dhe të gjitha trajtohet me prioritet, shtylla kryesore është marrja e informatës nga sinjalizuesi”, tha Zhinipotoku.

Theksojmë se, Sinjalizimi është raportimi i parregullsive, shkeljeve, keqpërdorimeve ose cenimit të interesit publik në ambientin e punës, pavarësisht se a bëhet fjalë për sektorin publik apo privat.

Duke i raportuar keqpërdorimet dhe parregullsitë, sinjalizuesit ndihmojnë në zbulimin e veprimeve që dëmtojnë interesin publik, sigurinë, integritetin financiar dhe sundimin e ligjit.

Qendra Klinike Universitare e Kosovës (QKUK), ka njoftuar se përkundër reshjeve të dendura të shiut dhe pamundësisë së përpunimit të ujit nga rrjeti i ujrave të zeza, deri në këto momente nuk janë evidentuar dëmtime të aparaturave mjekësore dhe dëme të tjera materiale.

“Uji kryesisht ka depërtuar në dysheme të disa klinikave, por pas masave të menjëhershme aparaturat mjekësore nuk janë rrezikuar.

Sa i përket Klinikës së Pulmologjisë, uji është larguar nga bodrumi dhe rëntgeni statik është larguar, pa u dëmtuar.Ndërkohë, klinika ka Rëntgen mobil dhe shfrytëzon rëntgenet e Klinikës së Radiologjisë.

Puna është duke vazhduar edhe në klinikat tjera, kurse QKUK, nga dita e djeshme ka angazhuar të gjitha kapacitetet teknike dhe stafit shëndetësorë të klinikave, për të tejkaluar gjendjen pas reshjeve të shiut”, thuhet në njoftimin e QKUK-së.

Sipas tyre, fatmirësisht kjo gjendje është tejkaluar pa dëmtime të aparaturave dhe dëmeve të tjera të mëdha materiale.

Kryetari i komunës së Prishtinës, Përparim Rama ka lutur qytetarët që të shmangin përdorimin e automjeteve gjatë pasdites dhe sugjerojmë që institucionet publike dhe private të lirojnë punëtorët më herët nga puna, për të shmangur trafikun e rënduar në orët e pasdites meqë parashihen shira me intensitet të lartë sikur dje.

Rama ka shkruar në Facebook se pas reshjeve të dendura të shiut që ranë gjatë pasdites së djeshme, kanë dal në terren për të vlerësuar situatën dhe për të ndërhyrë në pikat kyçe, në mënyrë që të evitohen dëmet në raste të ngjashme.

“Pas konsultimeve me institucionet përkatëse, krijuam shtabin e krizës për menaxhimin e situatës në ditët në vijim, duke marrë parasysh parashikimet për reshje të ngjashme. Së bashku me zjarrfikësit , ekipet tona të emergjencës kanë ndërhyrë në 100 raste të lajmëruara nga qytetarët. Lutim qytetarët që të shmangin përdorimin e automjeteve gjatë pasdites dhe sugjerojmë që institucionet publike dhe private të lirojnë punëtorët më herët nga puna, për të shmangur trafikun e rënduar në orët e pasdites meqë parashihen shira me intensitet të lartë sikur dje.

Siguria e të gjithëve është prioriteti ynë kryesor prandaj jemi në terren në çdo kohë!

Për çdo problem, telefononi në numrat kujdestarë (pa pagesë) 080012233 dhe 080012244.

Komuna e Drenasit nderoi presidentin e Shqipërisë, Bajram Begaj duke i dedikuar titullin “Qytetar nderi i Komunës së Drenasit”, për kontribut të shquar për Republikën e Kosovës dhe qytetarët e saj.

Kryetari në këtë komunë, Ramiz Lladrovci derisa ka falënderuar presidentin Begaj për promovimin dhe fuqizimin e shtetit të Kosovës, ka nënvizuar se roli i tij edhe gjatë kohës së luftës ishte i madh.

“President Begaj jeni në komunën me performancën më të mirë komunale në nivel vendi me vite me radhë, me transparencë e llogaridhënie për vendime demokratike dhe barazi para ligjit, në komunën që i dha shumë kombit e shtetit në liri e shtet ndërtim, komunë me perspektivë dhe investime në zhvillim…Ky jetëshkrim i shkurtër i juaji lidhet me epokën më të ndritur të Kosovës dhe popullit të saj. Karriera juaj profesionale dhe ushtarake lidhet me epokën e luftës tonë çlirimtare dhe shtet ndërtimin e Republikës së Kosovës. Ju më së miri e njihni vullnetin e ushtarëve tanë që të shëroheshin sa më parë dhe të ktheheshin në vijat e frontit. Ju vlerësonit guximin e bijve tanë në rrugën për çlirimin e vendit, sepse njohët plagët dhe lotët tanë për më të dashurit tanë që nuk arritën të shohin Kosovën e lirë. Në duart tua shumë pacientë i hapën sytë, i trajtuat të plagosurit tanë, i ofruar shërim, shpresë e besim keni shëruar plagët e ushtarëve tanë baraz me armikun, mesin e tyre isha edhe unë…Ju çdo ditë po ngitni lartë çështjen e Kosovës në gjitha agjendat, brenda dhe jashtë saj. Me aleatët arritëm të fitojmë luftën, ndërsa tashmë lufta është të fitojmë paqen. Në po punojmë shumë për proceset integruese euroatlantike… Më shumë se kurrë na duhet unitet sepse jemi në shekullin tonë duke bërë pengesë e patejkalueshme për fqinjët që synojnë të na kthejnë në shekullin e kaluar”, ka thënë Lladrovci.

Duke folur për ata që dhanë shumë për liri, Lladrovci ka kujtuar edhe ish-krerët e UÇK-së, të cilët mbahen në Hagë.

Në anën tjetër edhe Presidenti Begaj, derisa ka falënderuar për titullin, ka theksuar se historia e Drenasit është histori krenarie, ndërsa ka thënë se qytetarët e saj kanë rol të rëndësishëm për gjithë vendin.

“Do doja që të ishin heronjtë e luftës dhe paqes që sot janë në Hagë që uroi të jenë sa më shpejtë afër vendit tyre, kanë dhënë shumëçka për këtë ditë, dhe nuk e meritojnë të jenë atje, nderimi parë shkon për ta…Është padyshim një nga momentet më të veçanta në jetën time. Drenasi është një vend me histori të pasur e zemër të madhe, ka luajtur rol të rëndësishëm në historinë e Kosovës. Kjo tokë ka lindur heronjtë që kanë luftuar me guxim për gjithë shqiptarinë. I kam ende të gjalla sakrificat që kaluat gjatë përballjes me agresionin serb. Si çdo shqiptar patriot edhe unë dhashë ndihmën time modeste si mik, ajo që kam bërë nuk ishte detyrë, por diçka që buronte prej shpirti e zemre…Ky titull është motivim për mua dhe kujtesë se sa e rëndësishme është të punojmë së bashku për të patur një të ardhme më të mirë për fëmijët tanë. Ne duhet me punë të palodhur e dashuri për atdheun, mund të ndërtojmë një Kosovë e Shqipëri shumë më të begatë e më të drejtë”, tha Begaj.

Ndërkaq, Begaj ka zhvilluar takim edhe në Qendrën për promovimin e të drejtave të grave në Drenas.

Ndërsa, do të bëjë homazhe në Gllanasellë, në të cilën do të vendosë kurora me lule.

Seanca e radhës e Kuvendit të Kosovës do të mbahet të enjten më 27 qershor.

Kështu ka bërë të ditur kryetari i grupit parlamentar të Partisë Demokratike të Kosovës, Abelard Tahiri i cili tha se mungesa e agjendës parlamentare e udhëhequr nga Lëvizja Vetëvendosje ka bërë që një kohë të gjatë mos të takohen pavarësisht që sipas tij kishim pika të tjera të cilat ishin në interes të opozitës.

Si pika kryesore që pritet të diskutohen në seancën e së enjtes, Tahiri ka përmendur projektligjin për Komisionin e Pavarur për Media dhe atë për Këshillin Prokurorial të Kosovës.

Tahiri tha se janë duke punuar me këshilltarët ligjor të PDK që ta shohim mundësin që projektligjin për Komisionin e Pavarur për Media ta dërgojnë në gjykatën kushtetuese.

Ai ka kundërshtuar këtë projektligj duke thënë se ka tendencë të qeverisë për kontrollimin e mediave online.

“Ajo çka do ta diskutoj me juve janë dy çështje të rëndësishme dhe mjaftë kritike për nga perspektiva jonë nga mënyra si i shohim ne. Është projektligji i Komisionit të Pavarur për Media i cili është në rend dite në seancën e ditës së enjte dhe është ligji për Këshillin Prokurorial të Kosovës. Këto dy projektligje paraqesin një shqetësim jashtëzakonisht të madh sidomos te projektligji i Komisionit të Pavarur për media ju e dini që tashmë ka pasur kritika të mjaftueshme edhe nga shoqëria civile poashtu edhe nga zyrtarë të BE-së në Kosovë dhe nga Këshilli i Evropës dhe mund të themi se prej rekomandimeve që kanë ardh nga Këshilli i Evropës, për standardet të cilat duhet të ketë një projektligj i tillë nuk janë përputh fare ose në masën më të madhe janë injoruar mund të themi lirish. Ky projektligj është një tendencë e kontrollimit të mediave online të cilin ne e kundërshtojmë”, tha ai.

Tahiri tha se kanë kërkuar edhe themelimin e një Komisioni Hetimor.

“Ju e dini që ka qenë një skandal jashtëzakonisht i madh në përllogaritjen e borxhit të ujit të kompanive, ambalazhuesve të ujit. Ne si grup parlamentar i PDK qysh prej periudhës kur këto fakte kanë dal në mediat e Kosovës kemi iniciuar themelimin e një Komisioni Hetimor. …… Komisioni Hetimor i bënë bashkë gjithë akterët dhe arrin me nxjerr një përfundim nëse vërtetë ministria e Planifikimit Hapësinor apo agjencitë që janë brenda kësaj ministrie kanë bërë shkelje kanë dëmtu buxhetin apo është një proces i rregullt apo këto pretendimet tona mund të mbesin vetëm në nivel të pretendimeve”, shtoi Tahiri.

Derisa për takimin e ardhëm për dialogun Kosovë-Serbi, tha se nuk presin se do të dal diçka jashtë temave që i ka prodhuar kryeministri Albin Kurti.

“Vendit tonë i duhet një qeveri e re. Tash e dy vite e gjysmë produktet e kryeministrit Kurti në dialog i kemi pa është vetëmenaxhimi, marrëveshja e Brukselit e vitit 2022 dhe aneksi i Ohrit që janë jashtëzakonisht të dëmshme, është draft statuti i cili tash është në tavolinën e kryeministrit të Kosovës dhe nga bashkësia ndërkombëtare i kërkohet ta dërgoj në Gjykatën Kushtetuese. Këtu nuk mund të presim që do të dal diçka jashtë këtyre temave që i ka prodhu Kurti në dialog. Normalisht unë nuk di për agjendën, unë nuk di për mënyrën se si është organizu, por ajo çka mund ta vlerësojë që komplet angazhimi në këtë takim të radhës do të jetë në temat që i ka prodhu Kurti këto dy vite e gjysmë”, tha ai.

Kryeministri i Kosovës, Albin Kurti, dhe presidenti i Serbisë, Aleksandar Vuçiq, do të takohen në Bruksel më 26 qershor, për të zhvilluar rundin e ri të dialogut për normalizim të raporteve, që ndërmjetësohet nga Bashkimi Evropian.

Kryeministri i Shqipërisë, Edi Rama, ka reaguar pak më parë për ndeshjen që do të zhvillohet sonte mes Shqipërisë dhe Spanjës.

“Askush nuk do ta besonte me mendje – me zemër tjetër punë – që në ndeshjen e tretë të grupit në EURO2024, Shqipëria do të ishte ende në lojë e që ndërkohë do të ishte e treta, jo e fundit në atë që është quajtur botërisht si “grupi i vdekjes”. Eksperienca shumë më e madhe e rivalëve në dy ndeshjet e para bëri të sajën kundër nesh, se përndryshe pozicioni ynë sot mund të kishte qenë edhe më i favorshëm. Po ky është futbolli dhe çdo pishman i sotëm është eksperiencë për të nesërmen”.

Rama ka thënë se sonte Shqipëria përballet me skuadrën më të frikshme të grupit që sipas tij është një mision që në letër është 100 për qind i pamundur.

Ai tha se lojëtarët nuk kanë çfarë të humbasin dhe se duhet ta shijojnë deri në fund.

“Sot përballemi me skuadrën më të frikshme të grupit në një mision që në letër është 100% i pamundur. Por topi është i rrumbullakët dhe në darkë të 12 lojtarët kuqezinj, ata në fushë dhe lojtari ynë i 12-të në shkallët e stadiumit, një ndër më fantastikët e këtij Europiani, nuk kanë absolutisht asgjë për të humbur, po vetëm duhet të luajnë e ta shijojnë deri në fund këtë moment magjik që kanë krijuar vetë”.

Rama ka shtuar se cilido qoftë rezultati, Kombëtarja do të dalë me kokën lartë e me një eksperiencë shumë të çmuar.

“Cilidoqoftë rezultati i ndeshjes me Spanjën, Kombëtarja jonë e re do të dalë me kokën lart e me një eksperiencë shumë të çmuar në nivelet më të larta sportive, e cila do t’i shërbejë që të rritet, të fitojë besimin dhe personalitetin e domosdoshëm për t’u përballur me sukses në sfidat e këtyre niveleve, duke na dhuruar të tjera kënaqësi të veçanta si kjo e EURO2024-ës”.

Lidhja Demokratike e Kosovës dhe Partia Demokratike e Kosovës, do ta dërgojnë në Gjykatën Kushtetuese Projektligjin për Komisionin e Pavarur për Media (KPM), raporton EO.

Ky paralajmërim u bë pas përfunditmit të mbledhjes së Kryesisë së Kuvendit, ndërsa seanca u caktua të jetë të enjten.

Deputeti i LDK-së, Armend Zemaj, tha se nëse ky projektligj nuk ndrysho atëherë do të dërgojnë në Gjykatën Kushtetuese.

Shefi i grupit parlamentar të PDK-së, Abelard Tahiri, tha se ky projektligj ka për qëllim kontrollin e mediave të pavarura.

Një ditë pas vërshimeve të së dielës, kryetari i Prishtinës, Përparim Rama, ka takuar institucionet e sigurisë, me ç’rast është duke u bërë edhe vlerësimi i dëmeve të shkaktuara nga vërshimet, raporton EO.

Dëmi llogaritet të jetë i madh, ndërsa Kryeqyteti ka premtuar ndihmë për të prekurit.

Në një konferencë për media të hënën, Rama tha se situata është e manaxhueshme, teksa fajtor i bëri destinimin e gabuar të pusetave.

“Patëm një takim të koordinuar me Policinë, Ujësjellësin dhe zjarrfikësit dhe disa kompani të tjera private që janë përgjegjës për menaxhimin e rrugëve. Patëm diskutim për një strategji të re ideja është që të jemi me koherent rreth qasjes të këtyre problematikave, po mundohemi t’i ndalojmë në mundësinë tonë si administratë e Kryeqytetit”, tha Rama, teksa bëri edhe një apel tek bizneset që t’i lirojnë më herët punëtorët e tyre.

“Dje kanë punuar deri në orët e vona në pjesë të ndryshme të kryeqytetit. Më herët e bëra edhe një kërkesë për institucionet publike dhe private, ju lutem që t’i lirojnë punëtorët më herët se në ora 16:00, për shkak të shirave të dendura dhe të mos ketë trafik”, tha Rama.

Ndërsa, fajtor për vërshime është edhe për shkak të dizajnimit të keq të pusetave e vjetërsia e tyre.

“Ne vetëm se kemi filluar intervenimet në rruge ‘B’ dhe ‘A’ dhe do të zgjidhet ky problem sepse ky problem është kah mot. Disa prej lagjeve me vite të tera nuk kanë qenë të mirëmbajta, në pjesën e stacionit të autobusit e bëmë intervenimin e menjëhershëm. Dizajnimi i atyre pusetave nuk është i mjaftueshëm dhe për këtë biseduam ta bëjmë një projekt të ri për kanalizime”.

E drejtori për Siguri dhe Emergjenca, Lulzim Fushtica tha se gjatë ditës së djeshme ka qenë një sasi e madhe e shiut dhe se dëmet janë të mëdha.

“Janë shkuar thirrjet direkt, afro 100 thirrje në të gjitha thirrjet janë intervenuar. vlerësimi i dëmeve është aktiv dhe do të merremi me çdo lloj dëmi të qytetarëve. vetëm sasia e sotme 65 milimetra për metër i cili është sasi e ujit që bëhet për një muaj të tëre, është sasi e madhe”, tha Fushica.