Partia Demokratike e Kosovës, ka njoftuar se sot do të mbajë konferencë për media.
Në njoftim thuhet se ngjarja do të fillojë nga ora 11:00 në selinë qendrore të kësaj partie.
Nuk është bërë se cila do të jetë tema që do të trajtohet gjatë kësaj konference.
Në Kuvendin e Kosovës këtë të martë do të mbahen mbledhjet e gjashtë komisioneve parlamentare.
Mbledhja e parë fillon në orën 09:30 me Komisionin Ad-hoc për përzgjedhjen e kandidatëve për anëtarë të Bordit të RTK-së, ku do të intervistohen kandidatët.
Ndërsa, Komisioni për Çështje të Sigurisë dhe Mbrojtjes fillon mbledhjen në orën 10:00, ku do të shqyrtohet projekt-rezoluta lidhur me Raportin e Punës së Agjencisë për Informim dhe Privatësi për vitin 2022.
Po ashtu, në orën 10:00 do të fillojë edhe mbledhja e Komisionit për Arsim, Shkencë, Teknologji, Inovacion, Kulturë, Rini dhe Sport.
Në orën 11:00 do të mbahen dy mbledhje të tjera nga Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, si dhe Komisioni për Ekonomi, Industri, Ndërmarrësi dhe Tregti, i cili do të shqyrtojë shpalljen e konkursit për zgjedhjen e “Kryesuesit të Komisionit Shqyrtues në Autoritetin Rregullator për Shërbimet e Ujit”.
Gjithashtu, Komisioni për Mbikëqyrjen e Financave Publike fillon takimin në orën 10:00, ku ndër të tjera do të diskutohet lidhur me rekomandimet e raporteve të shqyrtuara në komision.
Përgatiti: Fatlum Jashari
Rreshtimi me politikën e jashtme, të sigurisë dhe atë të mbrojtjes së Bashkimit Evropian, si kushte në rrugën e integrimin, ishin tema në takimin e ministrave të jashtëm të shteteve anëtare me gjashtë homologët nga Ballkani Perëndimor.
Para diskutimit jo-zyrtar në Luksemburg, ministrja Donika Gërvalla foli për rëndësinë e integrimit të rajonit në bllokun evropian, bazuar në vlera e parime.
“Duke e parë integrimin e të gjithë Evropës, e atyre shteteve që i qëndrojnë vlerave evropiane, që mbështesin parimet evropiane, nuk janë vetëm çështje politike, por janë çështje e më shumë sigurie në Evropë në kohët kur, në Evropë, po përballemi me agresionin rus ndaj Ukrainës, dhe kur një Bashkim Evropian më i fortë është përgjigje më e mirë për të reaguar ndaj sfidave të sotme dhe të së ardhmes”, tha Gërvalla.
Krahas fokusit te përmbushja e reformave të brendshme, ministri për punë të jashtme shtetit të fundit që iu bashkua BE-së, këshilloi homologët e tij nga rajoni për ndërtimin e fqinjësisë së mirë.
“Ballkani Perëndimor duhet të shërojë plagët e vjetra, në vend se t’i hapë ato apo të krijojë të reja. Vetëm duke zgjidhur gjërat në një mënyrë që krijon stabilitet politik dhe siguri brenda dhe jashtë, mund ndodh transformimi i qëndrueshëm dhe i pakthyeshëm. Ky është investimi dhe garancia më ë mirë për stabilitet afat-gjatë në rajon”, tha ministri për Punë të Jashtme i Kroacisë, Gordan Grlic-Radman.
Ndarja e rrugëve me Rusinë, në vlerësimin e krye-diplomates rumune është diçka që shtetet ballkanike duhet të bëjnë, për t’u anëtarësuar në BE.
“Ritheksojmë mbështetjen për perspektivën evropiane të Ballkanit Perëndimor. Por, duke pasur parasysh rritjen e aktivitetin malinje të Rusisë në Ballkanin Perëndimor, është e rëndësishme që partnerët tanë atje të rreshtohen plotësisht me politikën e përbashkët të jashtme dhe të sigurisë të BE-së”, tha ministrja për Punë të Jashtme e Rumanisë, Luminita Odobescu.
Në dhjetor të vitit 2022, Kosova aplikoi për anëtarësim në Bashkimin Evropian, por që tutje nuk pati lëvizje konkrete e as avancim.
Për Kosovën dhe Serbinë, normalizimi i marrëdhënieve ndërmjet tyre, është kusht kyç në rrugën drejt anëtarësimit në bllokun evropian.
Përgatiti: Nora Luta
Tri ditë pasi e aprovoi marrëveshjen për pranim të fajësisë, Gjykata Themelore e Prishtinës e ka dënuar Nenad Orlloviqin me një vit e tre muaj burgim për sulm ndaj pjesëtarëve të KFOR-it dhe të Policisë së Kosovës.
Orlloviqit, Gjykata për pjesëmarrje në turmë që kryen veprën penale huliganizëm i shqiptoi gjobën maksimale të propozuar nga PSRK-ja, 12 mijë euro.
Por Nenad Orlloviq, i njohur me nofkën “Rusi” dhe “Nemac”,do të qëndroj në burg vetëm edhe tre muaj, pasi atij do t’i llogaritet koha e kaluar në paraburgim, që nga 23 qershori i vitit të kaluar.
Orlloviq që e pranoi fajësinë, në seancën e mbajtur të premten e kaluar, për shqyrtimin e marrëveshjes me Prokurorinë Speciale, e mohoi para gjyqtares nofkën “Rusi” në të cilën thirret edhe në aktakuzë.
Por kishte përgjigjeje pozitive kur u pyet nëse është i pajtimit që dënimin me 6 muaj burg, ta paguajë në gjobë prej 10 mijë deri në 12 mijë euro.
Orlovic akuzohej për pjesëmarrje në protestën e 29 majit në Zveçan, dhe sulm ndaj pjesëtarëve të KFOR-it, dhe të Policisë së Kosovës.
Sipas aktakuzës ai me mjete të forta, mjete shpërthyese të improvizuara, si dhe me armë zjarri, bashkë me persona të tjerë kishte ushtruar dhunë të pakontrollueshme.
Mbi 90 pjesëtarë të KFOR-it kishin mbetur të lënduar.
Për pjesëmarrje në të njëjtën protestë, në shkurt të këtij viti është dënuar Radosh Petroviq e Dushan Obrenoviq, pasi të dy e kishin pranuar fajësinë dhe kishin arritur marrëveshje me PSRK-në.
Ndërsa në paraburgim nga java e kaluar është edhe Lazar Dejanovic, i cili sipas dosjes së PSRK-së, bashkë me të pandehur tjerë kanë marrë pjesë aktive në turmën e personave, me qëllim të kryerjes së veprave penale serioze, në atë mënyrë që përmes përdorimit të dhunës kanë tentuar të pengojnë vendosjen e rendit kushtetues të Republikës së Kosovës në katër komunat veriore të vendit.
Përgatiti: Pranvera Krasniqi
As drafti e as plani i veprimit për Menaxhimin e Rrezikut nga Vërshimet, nuk u publikua, të paktën deri të hënën.
Madje, as pas reshjeve të së dielës në disa komuna, ministria nuk ktheu përgjigje për ATV-në, përse Harta e Rrezikshmërisë nuk është përfunduar deri tash.
Ky projekt që kushton rreth 2.5 milionë euro, po konsiderohet shumë i nevojshëm nga gjeografët, për një varg arsyesh.
“Në secilin vend egziston kjo lloj harte, ish dash të përfundonte kohë më parë, aty do kishin qenë të paraqitura zonat ku vërshimet mund të jenë më dominonte…”, tha Faruk Foniqi nga Instituti për Studime Urbane dhe Planifikim Hapësinor.
Sipas Foniqit, me hartën e rrezikshmërisë, nuk do të parandaloheshin tërësisht dëmet e vërshimeve, por do të kishte menaxhim më adekuat.
“Ndryshimet klimatike nganjëherë mund të vijnë edhe befas por kur kemi një plan para vetës me parashikime, situata mund të menaxhohet për një përqindje të madhe më mirë, e mos të ketë dëme si këto të fundit…”, tha Foniqi.
Kritika ka edhe ambientalisti, Alban Hyseni.
“Ata kanë vetëm fjalë, premtimet në majë të gjyhës e puna askund hiq, qershorin vetëm e kanë përmendur kotë, përsëri ju e pat ju e pat çfarë rrëbeshes pat, sa dëmet…”, tha Hyseni.
Nga përmbytjet e qershorit të vitit 2023, një grua dhe djali i saj 5 vjeç, kishin humbur jetën në Pejë.
Ndërsa, dëme nga përmbytjet, në vlerë milionëshe, viteve të fundit ishin shkaktuar edhe në Mitrovicë, Vushtrri, Podujevë, Istog e Klinë.
Përgatiti: Armand Hoti
Të martën, në Parlamentin e Spanjës, pritet të hidhet për votim propozimi i partisë katalonase “Junts”, për njohjen e pavarësisë së Kosovës nga qeveria spanjolle.
Referuar propozimit të Juntsit, Spanja duhet ta njohë Kosovën, meqë Gjykata Ndërkombëtare e Drejtësisë në vitin 2010, ia pranoi si të ligjshme pavarësinë.
Në letrën e 5 qershorit dërguar parlamentit, “Junts” përmend se refuzimi i Spanjës për ta njohur Kosovën, është faktor destabilizues për Ballkanin Perëndimor, në konteksin aktual gjeopolitik.
Por Insistimi i partisë katalonase, sipas njohësit të politikës së jashtme, Emir Abrashi, nuk mjafton për t’ia sjell Kosovës njohjen e re.
“Është lajm i mirë që çështja e Kosovës, diskutohet edhe në institucione qendrore Spanjolle, megjithatë ne duhet të kemi parasysh se partia Junts është një parti goxha e vogël dhe nuk ka ndonjë peshë në nivel nacional në Spanjë”, tha Abrashi.
Abrashi thotë se angazhimi për njohjen e Kosovës, nuk bënë t’i lihet në dorë vetëm partisë nga Katalonia, që mbështet qeverinë spanjolle.
“Diplomacia kosovare duhet të punoj më aktivisht me Madridin zyrtar për ta bërë një ndarje mes çështjes së Kosovës dhe Katalunisë, për shkak se këto si tema janë të ndryshme. Përderisa katalonia është rajoni më i pasur në Spanjë, Kosova ka dalur nga një luftë gjenocidale me Serbinë dhe rrjedhimisht ka qenë i pamundur vazhdimi i bashkëjetesës me Serbinë”, tha Abrashi.
Edhe profesori i shkencave politike Basri Muja, nuk pret që iniciativa e Juntsit t’i lëviz marrëdhëniet zyrtare mes dy vendeve.
“Nuk do duhej që e gjithë barra t’i mbetej vetëm institucioneve qeveritare, do duhej që edhe parlamenti i Kosovës, diplomacia parlamentare është një mekanizëm shumë i fuqishëm…pastaj partitë politike, posaçërisht dy partitë e mëdha, do duhej të krijojnë kontakte raporte, të tentojnë t’i bindin partitë si motra”, tha Muja.
Pos Spanjës, Kosovën nuk e njeh as Sllovakia, Greqia, Rumania e Qipro, që janë vende anëtare të Bashkimit Evropian.
Njohësit Abrashi e Muja, konsiderojnë se Kosova duhet të luaj me kartën e lobimit.
Njohjen e fundit, Kosova e mori nga Izraeli, ku në shkurt të vitit 2021, dy vendet formalizuan marrëdhëniet diplomatike.
Përgatiti: Sara Shehu
Një ditë pas përmbytjes së disa lagjeve të kryeqytetit nga reshjet e mëdha të shiut, kryetari i Prishtinës, Përparim Rama bashkë me zyrtarët të tjerë komunal kanë dal në terren për të bërë vlerësimin e dëmeve të shkaktuara.
Rama tha se ka krijuar shtabin e krizës për menaxhimin e situatës në ditët në vijim, pasi parashihen reshje të ngjashme.
Sipas tij, problem kyç në kryeqytet është dizajnimi jo i duhur i pusetave.
“Disa prej lagjeve me vite të tera nuk kanë qenë të mirëmbajta, në pjesën e stacionit të autobusit e bëmë intervenimin e menjëhershëm. Dizajnimi i atyre pusetave nuk është i mjaftueshëm dhe për këtë biseduam ta bëjmë një projekt të ri për kanalizime”, tha Rama.
Drejtoria për Siguri dhe Emergjencë Lulzim Fushtica tha se komuna do ta bëjë vlerësimin e dëmeve.
“Janë shkuar thirrjet direkt, afro 100 thirrje në të gjitha thirrjet janë intervenuar. vlerësimi i dëmeve është aktiv dhe do të merremi me çdo lloj dëmi të qytetarëve. vetëm sasia e sotme 65 milimetra për metër i cili është sasi e ujit që bëhet për një muaj të tëre, është sasi e madhe”, tha Fushtica.
Reshjet e mbrëmshme të shiut kanë depërtuar edhe në Qendrën Klinike Universitare të Kosovës. Shërbimi Spitalor Klinikë Universitar i Kosovës ka njoftuar se sistemi i kanalizimit nuk ka pas mundësi të përballojë sasinë e ujit, i cili ka depërtuar në dysheme të disa klinikave, megjithatë nuk ka shkaktuar dëmtim të aparaturave mjekësore.
Përgatiti: Fatlum Jashari
Takimi i së mërkurës, në Bruksel, ndërmjet kryeministrit të Kosovës, Albin Kurti, dhe presidentit të Serbisë, Aleksandar Vucic, sipas deputetit të LV-së, Armend Muja, mund të qartësojë nëse ka ose jo marrëveshje ndërmjet dy shteteve.
Në këtë kontekst ai listoi shkeljet nga Serbia të dy dokumenteve të dakorduara në Shkurt dhe Mars të vitit të kaluar.
“Kosova është në një moment të definimit nëse vërtet ka marrëveshje sepse më 28 shkurt të vitit 2023 kemi pas një marrëveshje në Bruksel pasuar nga një aneks në Ohër dhe pastaj vit pas viti, masë pas mase Serbia ka paraqitur rolin e vet destruktiv dhe kjo ka ardhur në formë të disa veprimeve”, tha Muja.
Pa një kryeministër të ri, deputeti i Partisë Demokratike, Abelard Tahiri nuk pret diçka të re nga takimi i radhës i nivelit të lartë në dialogun e lehtësuar nga BE-ja.
“Vendit tonë i duhet një qeveri e re. Tash e dy vite e gjysmë produktet e kryeministrit Kurti në dialog i kemi pa është vetëmenaxhimi, marrëveshja e Brukselit e vitit 2022 dhe aneksi i Ohrit që janë jashtëzakonisht të dëmshme, është draft statuti i cili tash është në tavolinën e kryeministrit të Kosovës dhe nga bashkësia ndërkombëtare i kërkohet ta dërgoj në Gjykatën Kushtetuese”, tha Tahiri.
Krahas thirrjes që qeveria të jetë më e përgjegjshme në raport me dialogun dhe partnerët ndërkombëtar, deputeti i Lidhjes Demokratike, Armend Zemaj, pati kritika për mungesë transparence.
“Ekziston një rezolutë në fuqi që Qeveria duhet të raportojë para dhe pas çdo raundi të bisedimeve është tregues i qartë në atë që kemi pas vërejtje në vazhdimësi. Vet vizita e heshtur ose tentimi që të heshtet vizita e Lajçakut është prodhim i takimit Kurti-Vuçiq”, tha Zemaj.
Takimi i 26 Qershorit, Kurti-Vucic, nën lehtësimin e Përfaqësuesit të Lartë të BE-së, Josep Borrell dhe emisarit Miroslav Lajcak, do të jetë i pari në kuadër të dialogut pas sulmit terrorist paramilitar në Banjskë.
Më 18 Qershor, emisari Lajcak njoftoi se do të bëjë një vlerësim për nivelin e konstruktivitetit të Kosovës dhe Serbisë në dialog – si parakusht që ato të përfitojnë nga Plani 6-miliardësh i Rritjes – teksa është paralajmëruar që shpërndarja e fondeve të nisë muajin e ardhshëm.
Përgatiti: Armand Hoti
Lideri i partisë VMRO-DPMNE, Hristijan Mickoski, tashmë edhe zyrtarisht është kryeministër i Maqedonisë së Veriut.
Talat Xhaferi, i cili deri tash mbajti pozitën e kryeministrit teknik, ia zgjati dorën Mickoskit, duke ia dorëzuar kështu detyrën e shefit të ekzekutivit.
Xhaferi e uroi Mickoskin për detyrën e re, me ç’rast ia përmendi edhe nevojën për reforma cilësore, që do të përmirësojnë jetën e qytetarëve të Maqedonisë së Veriut.
Qeveria e re, do përbëhet nga partia fituese VMRO-DPMNE, koalicioni i partive shqiptare VLEN dhe socialdemokratët e lëvizjes ZNAM.
Gjashtë nga ministritë, udhëhiqen nga shqiptarët.
Zëvendëskryeministër i parë është Izet Mexhiti. Ai njëherësh është vënë edhe në krye të Ministrisë së Ekologjisë.
Arben Taravari, drejton Ministrinë e Shëndetësisë, ndërsa Besar Durmishi atë të Politikës Sociale, Demografisë e Rinisë.
Fatmir Limani është ministër i Ekonomisë dhe Punës, Arben Fetai, zv-kryeministër për Qeverisje të Mirë, kurse Orhan Murtezani, ministër i Euro-integrimeve.
Zgjedhjet e 8 majit, e quan Bashkimin Demokratik për Integrim, tw Ali Ahmentit, në ulëset e opozitës.
BDI ka akuzuar koalicioni VLEN se bashkëpunimi me partinë e Mickoskit, ka dëmtuar interesin e shqiptarëve të Maqedonisë së Veriut.
Kryeministri i Kosovës, Albin Kurti dhe presidenti serb, Aleksandar Vuçiq do të takohen të mërkurën në Bruksel.
Shefi i diplomacisë së Bashkimit Europian, Josep Borrell do t’i presë fillimisht ata, siç thuhet në një njoftim të BE-së.
“Presidenti i Serbisë Aleksandar Vuçiq dhe kryeministri i Kosovës Albin Kurti kanë konfirmuar pjesëmarrjen e tyre. Përfaqësuesi i Lartë dhe Përfaqësuesi Special i BE-së Miroslav Lajçak do të zhvillojnë takime të ndara me liderët nga ora 15:00, pasuar nga një takim i përbashkët trepalësh”, thuhet në njoftim.
BE thotë se në takime do të analizohet ajo që është arritur në dialog nën udhëheqjen e Borrell dhe “do të fokusohen në rrugën përpara”.
“Do të ketë deklarata për mediat nga Përfaqësuesi i Lartë përpara dhe në fund të takimeve në ndërtesën e EEAS”, thuhet në njoftim.