ATV

Category: Lajme

  • Gjermani, futet në fuqi ligji për shtetësinë dhe dyshtetësinë

    Gjermani, futet në fuqi ligji për shtetësinë dhe dyshtetësinë

    Në Gjermani futet më 27 qershor në fuqi ligji i ri për shtetësinë. Të huajt tani mund të bëhen gjermanë më shpejt. Po cilat janë kushtet?

    Pasaporta e kuqe me stemën gjermane është e njohur dhe shumë e dëshiruar. Nuk është çudi, kur dihet se qytetarët gjermanë gëzojnë liri pothuajse të pakufizuar udhëtimi, mund të jetojnë dhe punojnë në të gjithë BE-në, kanë të drejtë të votojnë në zgjedhje dhe mund të zgjedhin lirisht profesionin e tyre.

    Rruga për marrjen e kësaj pasaporte tani është thjeshtuar. Ligji i ri i Shtetësisë do të zbatohet në Gjermani nga 27 qershori 2024. Shumë nga rreth 12 milionë të huajt në Gjermani tani mund të aplikojnë për shtetësi gjermane.

    1. Rrugë e shpejtë drejt shtetësisë

    Pas pesë vitesh qëndrimi të ligjshëm në Gjermani, të huajt mund të aplikojnë për shtetësi gjermane. Kur është fjala për të ashtuquajturat “efektet e veçanta në integrim”, marrja e shtetësisë është e mundur edhe pas tre vjetësh. Këtë mund ta bëjë kushdo që mund të dëshmojë një nivel të lartë të njohurive gjuhësore (niveli C2 apo C1, që nënkupton aftësinë e komunikimit të rrjedhshëm), vullnetarizmi ose performanca veçanërisht e mirë në shkollë ose në punë. Deri tani, të huajt kanë mundur të aplikojnë për shtetësi vetëm pas tetë vjet qëndrimi në vend.

    Qeveria gjermane, e përbërë nga socialdemokratët, ekologjistët dhe liberalët, shpreson të rrisë numrin e njerëzve që marrin shtetësi dhe në këtë mënyrë të krijojë stimuj për integrim më të shpejtë. Deri më tani, shkalla e marrjes së shtetësisë gjermane ka qenë e ulët në krahasim me BE-në, por së fundmi është rritur. Opozita, e përbërë nga një pjesë e Alternativës për Gjermaninë (AfD) të ekstremit të djathtë dhe CDU/CSU-së konservatore, ka frikë se pasaporta gjermane tani mund të bëhet një “plehrë”.

    1. Të ardhura të nevojshme

    Parakushtet e mëparshme për marrjen e shtetësisë gjermane mbeten në fuqi. Prandaj, kushdo që dëshiron të marrë nënshtetësinë gjermane duhet të jetë ende në gjendje të mbajë veten, pra të ketë të ardhura të mjaftueshme financiare. Këtu rregullat madje do të shtrëngohen, kështu që ata me të ardhura të ulëta do ta kenë më të vështirë në të ardhmen të marrin shtetësinë gjermane.

    1. Nuk ka pasaportë për racistët dhe antisemitët

    Respektimi dhe sjellja sipas rendit themelor të lirë demokratik të parashikuar me Kushtetutë është tani i detyrueshëm për të gjithë aplikantët për shtetësi gjermane.

    Kjo në mënyrë specifike do të thotë se pasaportën gjermane nuk mund të marrin personat me qëndrime antisemite, raciste ose të tjera antihumane. Shtetësinë gjermane nuk mund të marrin as ata që nuk i respektojnë të drejtat e barabarta mes burrave dhe grave ose jetojnë në bashkësi poligame.

    1. Përgjegjësia e Gjermanisë që buron nga historia

    Në të ardhmen do të ketë gjithashtu një përkushtim ndaj përgjegjësisë së veçantë historike të Gjermanisë. Gjatë epokës naziste, Gjermania filloi Luftën e Dytë Botërore duke sulmuar Poloninë dhe vrau rreth gjashtë milionë hebrenj evropianë si pjesë e gjenocidit të organizuar nga shteti.

    Për këtë arsye, ata që marrin nënshtetësinë gjermane do duhet të deklarohen kur bëhet fjalë për mbrojtjen e jetës hebreje dhe ndalimin e zhvillimit të një lufte agresioni. Kushdo që nuk e ndan këtë pikëpamje, nuk mund të marrë dokumentat gjermane. Prandaj, katalogu i pyetjeve për provimin pranues do duhet të rregullohet.

    1. Pasaporta gjermane që i nënshtrohet revokimit

    Ata që kanë gënjyer gjatë procesit të marrjes së shtetësisë mund të humbasin shtetësinë gjermane brenda dhjetë vjetësh. Kështu ka qenë deri tani. Ndërsa tani, kushdo që nuk e ka kuptuar seriozisht angazhimin dhe përgjegjësinë historike të Gjermanisë do të humbasë pasaportën gjermane – për shembull nëse përhapë mesazhe të urrejtjes antisemite.

    1. Shtetësia e dyfishtë për të gjithë

    Ata që dëshirojnë të bëhen gjermanë prej tani nuk duhet të heqin dorë nga shtetësia e mëparshme. Kjo do të thotë se shtetësia e shumëfishtë është e mundur për të gjithë migrantët. Më parë, ishte menduar vetëm për shtetasit e vendeve të BE-së.

    Në këtë mënyrë, qeveria gjermane dëshiron t’ua lehtësojë pozitën njerëzve që kanë ndjenja të ngushta me vendin e tyre të origjinës. Qeveria e arsyeton këtë vendim me qëndrimin se faktorë të tillë si njohja e gjuhës, arsimi dhe përkushtimi ndaj demokracisë janë më të rëndësishëm për integrimin sesa një pasaportë tjetër.

    1. Përfitimet për punëtorët mysafir (gastarbeiter) dhe punëtorët me kontratë në RDGJ

    Rregulla më pak të rrepta zbatohen për njerëzit nga gjenerata e të ashtuquajturve punëtorë mysafirë që erdhën në Gjermaninë Perëndimore midis 1955 dhe 1972, si dhe për “punëtorët me kontratë” të RDGJ-së në Gjermaninë Lindore. Kjo është për të nderuar kontributin e tyre të rëndësishëm në zhvillimin e Gjermanisë.

    Për këta persona si dëshmi e njohjes së gjuhës, mjafton të komunikosh lehtësisht në gjermanisht në jetën e përditshme. Përveç kësaj, ata nuk duhet të bëjnë testin e shtetësisë (Leben in Deutschland).

    1. Fëmijët mund të bëhen gjermanë më shpejt

    Fëmijët e prindërve të huaj marrin nënshtetësinë gjermane nëse njëri prind ka banuar ligjërisht në Gjermani për më shumë se pesë vjet. Më parë, kjo ishte e mundur vetëm pas tetë vjetësh. Sipas studimeve, fëmijët me rrënjë të huaja janë më të suksesshëm në shkollë dhe në punë sa më herët të marrin nënshtetësinë gjermane.

    Megjithatë, rregullorja e re nuk zbatohet në mënyrë retroaktive. Kjo do të thotë se do të përfitojnë vetëm fëmijët e lindur pas 27 qershorit 2024. (DW)

  • Policia boliviane e arreston liderin e grusht shtetit të dështuar

    Policia boliviane e arreston liderin e grusht shtetit të dështuar

    Forcat e Armatosura të Bolivisë u tërhoqën nga pallati presidencial në La Paz të mërkurën në mbrëmje dhe policia e arrestoi gjeneralin në krye të një grusht shteti të dështuar.

    Të mërkurën gjatë ditës, njësi ushtarake, të udhëhequra nga gjenerali Juan Jose Zuniga, ishin mbledhur në sheshin qendror Plaza Murillo, ku ndodhen pallati presidencial dhe Kongresi.

    Presidenti bolivian Luis Arce e dënoi tentim-puçin dhe i bëri thirrje popullit për mbështetje.

    “Sot, vendi po përballet me një përpjekje për grusht shtet. Ne i bëjmë thirrje popullit bolivian të mblidhet sot. Ne kemi nevojë që populli bolivian të organizohet dhe të mobilizohet kundër grusht shtetit dhe në të mirë të demokracisë”, tha presidenti Luis Arce nga pallati presidencial.

    Më vonë, ushtarët, së bashku me një varg automjetesh ushtarake, u tërhoqën nga sheshi, duke i dhënë fund rebelimit pas vetëm tri orëve.

    Qindra mbështetës të Arces u mblodhën pastaj në sheshin pranë pallatit, duke valëvitur flamuj bolivianë, duke kënduar himnin kombëtar dhe duke brohoritur.

    Pas tërheqjes së ushtrisë, policia e arrestoi gjeneralin Juan Jose Zuniga, pasi prokurori i përgjithshëm nisi një hetim.

    Ministri qeveritar Eduardo del Castillo tha se përveç Zunigas, u arrestua edhe ish- zëvendësadmirali i marinës, Juan Arnez Salvador.

    “Cili ishte synimi i këtij grupi? Synimi ishte rrëzimi i autoriteteve të zgjedhur në mënyrë demokratike”, tha Del Castillo për gazetarë pas arrestimeve.

    Më vonë të mërkurën, ministri i Mbrojtjes Edmundo Novillo tha se “gjithçka është nën kontroll tani”.

    I rrethuar nga shefat e rinj të ushtrisë, të emëruar nga Arce, Novillo theksoi se Bolivia e përjetoi një “grusht shtet të dështuar”.

    Përpjekja për puç ndodhi në një kohë kur vendi po përballet me tensione dhe me grindje politike mes Arces dhe dikur aleatit të tij, ish-presidentit majtist, Evo Morales, për atë se kush duhet ta kontrollojë partinë në pushtet. Bolivia po përballet gjithashtu me një krizë të madhe ekonomike.

    Mospajtimet e tyre kanë bërë që Qeveria të mos jetë në gjendje ta luftojë krizën ekonomike. Për shembull, aleatët e Morales në Kongres ia kanë pamundësuar vazhdimisht Arces të marrë borxh për ta luftuar krizën.

    Arce dhe Morales kanë luftuar për të ardhmen Lëvizjes për Socializëm të Bolivisë, e njohur si MAS, para zgjedhjeve të vitit 2025.

  • Sot diplomojnë kadetët e FSK-së

    Sot diplomojnë kadetët e FSK-së

    Sot ushtrisë së Kosovës do t’i shtohen edhe një numër i ushtarëve.

    Nga ora 09:45 do të nis ceremonia e betimit të kadetëve të gjeneratës së 2024-tës, të Forcës së Sigurisë së Kosovës.

    Aty, do të marrin pjesë drejtuesit e Ministrisë së Mbrojtjes dhe të FSK-së.

    Ky organizim mbahet në kazermën “Adem Jashari” në Prishtinë.

  • Kuvendi mban seancën plenare, i reaguan BE dhe gazetarët

    Kuvendi mban seancën plenare, i reaguan BE dhe gazetarët

    Kuvendi i Kosovës sot mban seancën e radhës në të cilën janë paraparë të shqyrtohen 32 pika të rendit të ditës, ndër to edhe projektligji për Zyrtarët Publikë, Komisionin e Pavarur për Media dhe atë për Këshillin Prokurorial për të cilët ka reaguar edhe Bashkimi Evropian. E lidhur me projektligjin për Komisionin e Pavarur për Media, disa herë kanë reaguar organizatat e gazetarëve.

    Seanca e cila nis në orën 10:00, kësaj radhe do të mbahet në sallën 506, për shkak të punimeve në sallën e seancave të Kuvendit.

    Bashkimi Evropian ka shprehur zhgënjimin për tre projektligje që janë planifikuar për leximin e dytë në Kuvendin e Kosovës të enjten, duke deklaruar se draftet nuk kanë përfshirë rekomandimet që synojnë përputhjen e tyre me standardet evropiane dhe praktikat më të mira.

    Bëhet fjalë për projektligjin për Zyrtarët Publikë, Komisionin e Pavarur për Media dhe atë për Këshillin Prokurorial. Para seancës, përfaqësues të Asociacionit të Gazetarëve të Kosovës, do të mbajnë ehde një konferencë për media.

    Ndërkohë, BE-ja theksoi se Komisioni për Administratë Publike, Qeverisje Lokale, Media dhe Zhvillim Rural nuk ka marrë parasysh këshillat e gjera të ofruara nga BE-ja gjatë procesit të hartimit.

    Udhëzimet e BE-së theksonin përputhjen e ligjit me parimet e meritës, të mbështetura nga një opinion i veçantë i Komisionit të BE-së. Çështje kyçe, si ndikimi në pozicionet menaxheriale dhe procedurat e rekrutimit, promovimit dhe performancës në shërbimin civil, mbeten të paadresuara.

    Projektligji ruan dispozitën kontroverse ‘viti zero’, që kërkon që shërbimi civil aktual dhe zyrtarët publikë në menaxhimin e ulët dhe të mesëm të fillojnë mandatin e parë të shërbimit të tyre, duke kundërshtuar një vendim të Gjykatës Kushtetuese të vitit 2023. BE-ja paralajmëron se kjo dispozitë rrezikon profesionalizimin dhe stabilitetin e shërbimit civil.

    BE-ja gjithashtu ngriti shqetësime për Projektligjin mbi Komisionin e Pavarur të Mediave, duke vënë në dukje se nuk reflekton shumicën e rekomandimeve nga një Opinion Ligjor i Këshillit të Evropës. Këto rekomandime adresojnë çështje kritike, përfshirë kompetencat dhe financimin e Komisionit, procedurat e zgjedhjes dhe afatet e shërbimit për anëtarët e tij, dhe proporcionalitetin e sanksioneve. Ndërsa pranojnë disa ndryshime të rëndësishme në rregullimin e medias, BE-ja theksoi nevojën për rishikime të mëtejshme për të përmirësuar qartësinë ligjore dhe përputhjen me standardet e BE-së dhe Këshillit të Evropës.

    Në lidhje me Projektligjin për ndryshimin dhe plotësimin e Ligjit për Këshillin Prokurorial të Kosovës, BE-ja shprehu keqardhje që Kosova nuk ka kërkuar një opinion të mëtejshëm nga Komisioni i Venecias, pavarësisht ndryshimeve të rëndësishme që parashikojnë një strukturë të re institucionale për emërimin e anëtarëve jo-profesionistë, përfshirë Komisionin e Parazgjedhjes. BE-ja përsëriti rekomandimin e saj të fortë për të rikonsultuar Komisionin e Venecias dhe shprehu shqetësim se këshillat e saj për rritjen e pluralizmit dhe pavarësisë së Komisionit të Parazgjedhjes janë injoruar.

    BE-ja theksoi se këto projektligje janë thelbësore për rrugën e Kosovës drejt anëtarësimit në BE. Përputhshmëria me standardet evropiane do të jetë vendimtare në vlerësimin e përparimit nga Komisioni i BE-së në raportin e zgjerimit. BE-ja apeloi Kuvendin që të rishqyrtojë edhe një herë ndryshimet e propozuara për të siguruar që këto projektligje të përputhen me standardet e BE-së dhe evropiane duke adresuar komentet dhe rekomandimet e mëparshme. Ligjet e drejta dhe të drejta, të përputhura me standardet evropiane dhe ndërkombëtare, janë thelbësore për mbajtjen e sundimit të ligjit në shoqëritë demokratike dhe për sigurinë dhe mbrojtjen e qytetarëve, deklaroi BE-ja.

    Rendi i ditës

    1. Miratimi i procesverbaleve të seancave të mëparshme,

    2. Deklarimet jashtë rendit të ditës,

    3. Pyetjet parlamentare,

    4. Votimi i Projektligjit nr.08/L-309 për ratifikimin e Marrëveshjes së financimit, për programin e parë për “Financimin e politikave zhvillimore për efektivitetin fiskal, konkurrueshmërinë dhe rritjen e gjelbër”, në mes të Republikës së Kosovës e përfaqësuar nga Ministria e Financave, Punës dhe Transfereve dhe Asociacionit Ndërkombëtar për Zhvillim,

    5. Votimi i Statutit të Universitetit të Prishtinës “Hasan Prishtina” në Prishtinë,

    6. Votimi në lexim të dytë i Projektligjit nr.08/L-212 për shëndetin riprodhues dhe fertilizim të asistuar mjekësor,

    7. Votimi në parim i Projektligjit nr.08/L-266 për gjendjen civile,

    8. Votimi në parim i Projektligjit nr.08/L-300 për provimin e maturës shtetërore,

    9. Votimi në parim i Projektligjit nr.08/L-296 për të huajt,

    10. Shqyrtimi i dytë i Projektligjit nr.08/L-277 për Sport,

    11. Shqyrtimi i dytë i Projektligjit nr.08/L-264 për Rininë

    12. Shqyrtimi i dytë i Projektligjit nr.08/L-265 për regjistrin e pronarëve përfitues,

    13. Shqyrtimi i dytë i Projektligjit nr.08/L-256 për falimentimin,

    14. Shqyrtimi i dytë i Projektligjit nr.08/L-225 për Agjencinë e Inteligjencës dhe Sigurisë së Mbrojtjes,

    15. Shqyrtimi i dytë i Projektligjit nr.08/L-261 për mbrojtje nga zjarri,

    16. Shqyrtimi i dytë i Projektligjit nr.08/L-267 për letërnjoftimin,

    17. Shqyrtimi i dytë i Projektligjit nr.08/L-274 për Shërbimet Private të Sigurisë,

    18. Shqyrtimi i dytë Projektligjit nr. 08/L-249 për ndryshimin dhe plotësimin e Ligjit nr.06/L-056 për Këshillin Prokurorial të Kosovës,

    19. Shqyrtimi i dytë Projektligjit nr. 08/L-272 për ndryshimin dhe plotësimin e Ligjit nr. 06/L010 për noterinë, i ndryshuar dhe plotësuar me Ligjin nr. 08/L-149,

    20. Shqyrtimi i dytë Projektligjit nr. 08/L-289 për Komisionin e Pavarur të Mediave,

    21. Shqyrtimi i dytë Projektligjit nr.08/L-262 për ndryshimin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin nr. 05/L- 031 për procedurën e përgjithshme administrative, faza e dytë,

    22. Shqyrtimi i dytë Projektligjit nr.08/L-294 për ndryshimin dhe plotësimin e Ligjit nr.08/L-197 për Zyrtarët Publikë,

    23. Shqyrtimi i parë i Projektligjit nr.08/L-304 për bankat,

    24. Shqyrtimi i parë i Projektligjit nr.08/L-305 për ofruesin e shërbimeve të navigacionit ajror,

    25. Votimi për themelimin e Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti,

    26. Themelimi i Komisionit Hetimor Parlamentar për procesin e përllogaritjes së borxheve të kompanive ambalazhuese të ujit, si dhe mënyrën dhe bazën e shlyerjes së borxheve nga Ministria e Mjedisit, Planifikimit Hapësinor dhe Infrastrukturës,

    27. Votimi i Projekt-rezolutës për adresimin e gjetjeve të Raportit të Departamentit Amerikan të Shtetit-DASH,

    28. Shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës,

    29. Shqyrtimi i Projekt-rezolutës për adresimin e çështjes së emigrimit të qytetarëve nga Republika e Kosovës,

    30. Raportimi i Qeverisë së Republikës së Kosovës për progresin mbi zbatimin e Objektivave të Zhvillimit të Qëndrueshëm dhe reflektimin e Agjendës Transformuese të Kosovës në buxhet dhe politika qeveritare,

    31. Shqyrtimi i Programit Kombëtar për Integrim Evropian 2024-2028,

    32. Themelimi i Komisionit Ad-Hoc për përzgjedhjen e kandidatëve për dy (2) anëtarë të Bordit të Radiotelevizionit të Kosovës, prej tyre, një nga komuniteti shqiptar dhe një nga komuniteti serb.

  • ​Ja kush është spiuni i tretë i arrestuar brenda një muaji

    ​Ja kush është spiuni i tretë i arrestuar brenda një muaji

    Personi që është arrestuar mbrëmë në regjionin e Mitrovicës për spiunazh është Aleksandar Vlajiq, ish-polic i Kosovës dhe i njëjti i ka sulmuar zyrat e Komisionit Qendror të Zgjedhjeve në veri të vendit.

    Kështu thonë burime të KosovaPress-it, brenda Prokurorisë Speciale të Republikës së Kosovës. Përndryshe, prokuroria pas zhvillimit të hetimeve disa mujore në bashkëpunim me Agjencinë e Kosovës për Inteligjencë dhe Policinë e Kosovës – Drejtorinë Kundër Terrorizmit, sot në mbrëmje në regjionin e Mitrovicës ka arrestuar një person.

    Sipas Prokurorisë, i arrestuari A.V. dyshohet për kryerjen e veprës penale “Spiunazhi”, nga neni 124 të KPRK-së.

    “I njëjti me aktvendim të Prokurorit të Shtetit nga Prokuroria Speciale është ndaluar prej 48 orësh dhe për momentin nga Policia e Kosovës janë duke u kryer bastisje në banesën e të dyshuarit”, thuhet në njoftim.

  • ​Ndalohet një person nga regjioni i Mitrovicës për spiunazh

    ​Ndalohet një person nga regjioni i Mitrovicës për spiunazh

    Prokuroria Speciale e Republikës së Kosovës, pas zhvillimit të hetimeve disa mujore në bashkëpunim me Agjencinë e Kosovës për Inteligjencë dhe Policinë e Kosovës – Drejtorinë Kundër Terrorizmit, sot në mbrëmje në regjionin e Mitrovicës ka arrestuar një person.

    Sipas Prokurorisë, i arrestuari A.V. dyshohet për kryerjen e veprës penale “Spiunazhi”, nga neni 124 të KPRK-së.

    “I njëjti me aktvendim të Prokurorit të Shtetit nga Prokuroria Speciale është ndaluar prej 48 orësh dhe për momentin nga Policia e Kosovës janë duke u kryer bastisje në banesën e të dyshuarit”, thuhet në njoftim.

  • Kuvendi sot mban seancë, në rend dite 32 pika

    Kuvendi sot mban seancë, në rend dite 32 pika

    Kuvendi i Kosovës sot me fillim do ta mbajë seancën e radhës plenare.

    Sipas agjendës, deputetët do t’i trajtojnë 32 pika, në mesin e tyre edhe votimi i Projektligjit për shëndetin riprodhues dhe fertilizim të asistuar.

    Gjithashtu parashihet të ketë edhe votime të tjera si: votimi i Statutit të Universitetit të Prishtinës “Hasan Prishtina”; votimi i Projekt-rezolutës për adresimin e gjetjeve të DASH-it, Projekt-Deklarata për raportet e Kosovës me ShBA-në.

    Kjo seancë pritet të fillojë nga ora 10:00.

  • Parashikimi i motit për sot

    Parashikimi i motit për sot

    Instituti Hidrometeorologjik i Kosovës ka njoftuar se sot do të mbajë mot me diell dhe vranësira të dendura, të cilat gjatë ditës parashihen të sjellin riga shiu dhe shkarkime rrufesh.

    Sipas institutit, temperaturat minimale do të lëvizin ndërmjet 13-15 gradë Celsius, ndërsa maksimalet e ditës parashihen të lëvizin ndërmjet 26-29 gradë Celsius.

    “Do të fryjë erë nga drejtime i juglindjes me shpejtësi 1-7m/s”, thuhet në njoftim.

  • Ankesat për mbrojtje të ligjshmërisë

    Ankesat për mbrojtje të ligjshmërisë

    Përgatiti: Nora Luta

    Gjykata Kushtetuese i ka hapur rrugë asaj Supreme që në kërkesat për mbrojtje të ligjshmërisë nga Prokurori i Shtetit, të vendosë edhe në dëm të të pandehurit.
    Sipas Kushtetueses, Supremja mund të vendosë edhe në rastet kundër vendimit të formës së prerë për ndërprerjen e paraburgimit.

    “Bazuar në dispozitat e kontestuara të Kodit të Procedurës Penale, Gjykata Supreme, përmes kërkesës për mbrojtje të ligjshmërisë, mund të vendosë edhe në dëm të të pandehurit, nëse vendimi i kontestuar i formës së prerë, është “qartazi i papërshtatshëm ose i bazuar në gabim të rëndë”, thuhet në vendimin e Gjykatës Kushtetuese.

    Juristët thonë se kësisoj Supremja mund të vendosë edhe për rritje apo ulje të dënimit, apo ndaj të pandehurit.

    Por konsiderohet se në të ardhmen duhet të trajtohet edhe vendimi kundër hedhjes së aktakuzës.

    Ndërkohë, Gjykata në kërkesën drejtuar Kushtetueses kishte thënë ndër të tjera se Kodet e mëparshme të Procedurës Penale kishin lejuar paraqitjen e kërkesës për mbrojtje të ligjshmërisë, vetëm për caktim apo vazhdim të paraburgimit, por jo edhe për ndërprerje të tij.

    Por me Kodin e ri të Procedurës Penale, parashihet që të vendoset edhe në dëm të të akuzuarit.

  • Gjykata Kushtetuese rrëzon ligjin për byronë e konfiskimit të pasurisë

    Gjykata Kushtetuese rrëzon ligjin për byronë e konfiskimit të pasurisë

    Përgatiti: Arton Hamiti

    Gjykata Kushtetuese e ka shpallur të pavlefshëm në tërësi Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme.

    Ligji ishte miratuar në shkurt të 2023-tës dhe nga ajo kohë ndodhej për shqyrtim në Kushtetuese.

    “Gjykata ka vlerësuar si në kundërshtim me Kushtetutën vetëm pjesë të saktësuara të katër (4) neneve të Ligjit të kontestuar, përkatësisht nenet 2 (Fushëveprimi), 10 (Përbërja e Komisionit Mbikëqyrës dhe Kompensimi), 22 (Periudha e verifikimit të pasurisë) dhe 34 (Procedura në shkallën e parë) të tij, duke marrë parasysh natyrën dhe rëndësinë e tyre, dhe faktin që pa ndryshimin dhe plotësimin e të njëjtave nga Kuvendi, Ligji i kontestuar është i pazbatueshëm, bazuar në praktikën gjyqësore të Gjykatës, Ligji i kontestuar, në shërbim të parimit të sigurisë juridike, është shpallur i pavlefshëm në tërësinë e tij”, thuhet në vendimin e Gjykatës Kushtetuese.

    I menjëhershëm dhe i ashpër ka qenë reagimi i ministres së Drejtësisë, Albulena Haxhiu, e cila shkroi se byroja do të bëhet.

    “Pas 16 muajve, pra sot, kuptuam që Ligji është shpallur i pavlefshëm. 5 gjyqtarë nga 9 sa janë gjithsej, vendosën që Ligjin më të rëndësishëm në kuadër të pakos kundër korrupsionit e keqpërdorimit të detyrës zyrtare ta shpallin të pavlefshëm. Situata për ne është shumë e qartë, vullneti i qytetarëve për drejtësi po tentohet të përmbyset nga një grusht njerëzish që ende u shërbejnë dhe i kanë borxhe nomenklaturës së vjetër, por beteja jonë për reformë dhe shtet të së drejtës nuk do të ndalet. Byroja do të bëhet. Pasuria publike e shpërdorur e përvetësuar do të konfiskohet. Vullneti popullor do të jetësohet”, ka shkruar Haxhiu.

    Vendimi i Gjykatës Kushtetuese për rrëzimin e tërësishëm të Ligjit për Byronë Shtetërore për Verifikimin dhe Konfiskimin e Pasurisë, vlerësohet si vulë e dështimit të kësaj qeverie për reforma në drejtësi.

    Ndryshe, PDK-ja e pati kontestuar në tërësi ligjin, ndërsa ministrja e Drejtësisë, Albulena Haxhiu, kishte thënë se dërgimi i ligjit në Kushtetuese “ka qëllim zvarritjen e reformës në drejtësi”.

    Ligji parashihte rregullimin e mënyrës dhe procedurat e verifikimit dhe konfiskimit të pasurisë së fituar në mënyrë të pajustifikueshme dhe themelimin, organizimin dhe kompetencat e kësaj byroje.

    Ndryshe, Byroja e konfiskimit të pasurisë ka qenë një prej premtimeve kryesore të Lëvizjes Vetëvendosje.