Category: Lajme

Rusia kreu sulme ajrore në Ukrainë mëngjesin e së enjtes dhe i bombardoi vendbanimet civile në rajonin lindor të frontit, Donjeck, duke e vrarë në person dhe duke i plagosur 14 të tjerë, thanë zyrtarët ushtarakë dhe rajonalë.

Vrasja ndodhi në qytetin industrial Toretsk, ndërsa të plagosurit janë banorë të Memrisk, Selidovo dhe Komar, tha në Telegram guvernatori rajonal Vadym Filashkin.

Ushtria ukrainase raportoi se Rusia e sulmoi Ukrainën me gjashtë raketa lundruese dhe me 23 dronë mëngjesin e së enjtes.

Mbrojtja ajrore ukrainase i rrëzoi pesë prej raketave dhe të gjithë dronët e lëshuar mbi objektivat në Ukrainë, tha ushtria.

Dy dronë u shkatërruan në rajonin lindor Herson të enjten, tha guvernatori rajonal Oleksandr Prokudin, duke shtuar se një person u vra dhe 16 u plagosën, përfshirë dy fëmijë, nga bombardimet ruse të mërkurën.

Në rajonin jugor Dnipropetrovsk, Rusia kreu sulm masiv me artileri në qytetin Nikopol, tha guvernatori rajonal Serhiy Lysak në Telegram.

Shkolla dhe çerdhe u dëmtuan nga ky sulm, sipas tij. Ai nuk raportoi për viktima.

Ndërkohë, Ministria e Mbrojtjes e Rusisë, tha se shtatë dronë ukrainas u rrëzuan nga kundërajrorët rusë, katër prej tyre në rajonin Tver, dy mbi rajonin e Moskës dhe një mbi rajonin Belgorod.

Sota raportoi, bazuar në dëshmitë e dëshmitarëve, se një sulm me dron ndodhi në Redkinski në Uzinën Eksperimentale në rajonin Tver, ku prodhohet karburanti për avionë. Kjo fabrikë është sulmuar në të kaluarën nga dronët.

Ukraina, infrastruktura energjetike e së cilës është sulmuar vazhdimisht nga Rusia, në muajt e fundit i ka sulmuar vazhdimisht objektet për prodhimin e karburantit brenda Risisë, kryesisht rafineritë e naftës./REL/

Lidhja Demokratike e Kosovës do të mbajë sot konferencë për media.

Konferenca do të mbahet nga ora 13:00, në objektin e Kuvendit të Kosovës.

Nuk është bërë e ditur tema e konferencës.

Auditorja e Përgjithshme, Vlora Spanca, në një konferencë për medie, ka shpalosur rezultatet e auditimit për Pasqyrat Vjetore Financiare (PVF) të institucioneve publike të nivelit qendror, atyre të nivelit lokal dhe ndërmarrjeve publike për vitin 2023, raporton Ekonomia Online.

Spanca ka deklaruar se nga 115 raporte të auditimit, 85 prej tyre janë të Organizatave Buxhetore, 13 të ndërmarrjeve publike dhe 8 auditime të performancës dhe teknologjisë së informacionit.

“Kemi kryer auditimin dhe publikuar gjithsejt 115 raporte të auditimit. Prej tyre, 85 raporte të auditimit për PVF-të Organizatave Buxhetore (OB), 13 të ndërmarrjeve publike dhe 8 auditime të performancës dhe teknologjisë së informacionit. Gjithashtu në kuadër të planit janë audituar edhe 9 projekte të donatorëve. Nga këto auditime janë dhënë 40 opinione të kualifikuara, 63 të pamodifikuar, dhe 4 opinione të kundërta. Prej 47 Organizatave Buxhetore të nivelit qendror kemi dhënë 36 opinione pozitive dhe 11 opinione të kualifikuara që do të thotë që cilësia e raportimit financiar në disa aspekte nuk ka qenë e drejtë dhe e vërtet”, tha Spanca.

Ajo foli edhe për auditimin në nivelin lokal, përfshirë komunat në veri.

“Sa i përket auditimeve të kryera në nivelin lokal, ju njoftojmë se për 38 komunat e audituara, përfshirë këtu edhe katër komunat në pjesën veriore të Kosovës kemi dhënë 15 opinione pozitive dhe 23 opinione të kualifikuara. Për Komunën e Prishtinës dhe Vushtrrisë kemi dhënë konkluzion të kundërt”, shtoi Spanca.

Po ashtu, në vazhdën e përmbushjes së planit, Spanca tha se kanë kryer auditime dhe publikuar raporte edhe për 12 ndërmarrje publike dhe RTK-në si medium publik.

“Këtë vit janë tri ndërmarrje publike që auditohen për herë të parë nga ZKA, si Trepça Sh.A, KOSTT SH.A. dhe K.R.U. “Hidrodrini” SH.A. Bazuar në rezultatet e auditimit, ZKA ka dhënë opinion të kualifikuar për gjashtë NP, për katër të tjera kemi dhënë opinione të kundërta, si dhe për tri të tjera opinion pozitiv pra të pamodifikuara. Gjetjet kryesore me ndikim në opinion të auditimit tek ndërmarrjet janë: mosrivlerësimi i pasurive, mangësi në regjistrin e pasurive, mosprovizionim i llogarive të arkëtueshme tregtare, mbivlerësim i llogarive të arkëtueshme, mungesë e të dhënave të plota për grantet, mosprezantim i saktë i pasqyrës së rrjedhës së parasë dhe nënvlerësimi i të hyrave nga shitja”, tha Spanca.

Plani i auditimit për sezonin 2023-2024 u tha se do të përfundojë më 31 gusht të këtij viti.

Ish-drejtori i hulumtimeve në Institutin GAP, Agron Demi, ka kritikuar Lëvizjen Vetëvendosje për shkelje të zotimeve.

Për këtë, ai përmendi premtimet e VV-së para ardhjes në pushtet, e cila thashmë po e përfundon mandatin pa e funksionalizuar sistemin e votimit elektronik, e që një gjë të tillë ua pamundëson qytetarëve të shohin se si kanë votuar përfaqësuesit e tyre në Kuvend.

“Kjo i bjen me gjujtë gurin e me fsheh dorën”, tha Demi.

Deputetët e Lidhjes Demokratike të Kosovës, Partisë Demokratike të Kosovës dhe Aleancës për Ardhmërinë e Kosovës, kanë lëshuar sallën ku po mbahet seanca e Kuvendit të Kosovës, pasi nuk kaluar porozitet e tyre që të heqin nga rendi i ditës dhe të kthehen në komisione tri projektligjet e kontestuara nga Bashkimi Evropian dhe përfaqësuesit e mediave.

Bëhet fjalë për projektligjin për Zyrtarët Publikë, Komisionin e Pavarur për Media dhe atë për Këshillin Prokurorial.

Bashkimi Evropian ka shprehur zhgënjimin për tre projektligje që janë planifikuar për leximin e dytë në Kuvendin e Kosovës të enjten, duke deklaruar se draftet nuk kanë përfshirë rekomandimet që synojnë përputhjen e tyre me standardet evropiane dhe praktikat më të mira.

Deputetët e Kuvendit të Kosovës kanë votuar kundër propozimit të deputetit të Lidhjes Demokratike të Kosovës, Driton Selmanaj për heqjen nga pika e rendit të ditës të projektligjit për Komisionin e Pavarur të Mediave, i cili theksoi se është kundër rekomandimeve të Bashkimit Evropian.

Pas këtij votimi kundër të 50 deputetëve, Selmanaj tha se LDK e sheh të paarsyeshme që të jetë pjesë e një seance ku votohet kundër rrugës integruese të Kosovës në BE.

“LDK e sheh të panevojshme që të jetë e kësaj katrahure për vendin që dikush voton kundër standardeve të BE-së”, tha ai.

Deputetët e Listës Serbe pak minuta pas fillimit të seancës plenare, kanë lëshuar sërish sallën plenare. Deputeti nga LDK-ja, Driton Selmanaj deklaroi se salla alternative ku po mbahet sot seanca ‘do të mbahet mend që është shfrytëzuar për dy raste të veçanta’.

Sipas tij, një herë ka qenë kur është përdorur gaz lotsjellës dhe sot për vazhdimin e mandatave të Listës Serbe. Pas deklarimit të tij, dhjetë deputetët e Listës Serbe janë larguar nga salla ku po vijon seanca në kushte të jashtëzakonshme.

Deputeti Driton Selmanaj tha se shfrytëzimi i kësaj salle do të mbahet mend për dy raste.

“Në historinë e parlamentarizmit tonë do të mbahet mend që dy herë kjo sallë është shfrytëzuar për të mbajtur seancë plenare. Rasti i parë është gazi lotsjellës dhe rasti i dytë është për t’iu vazhduar Listës Serbe mandatet, sepse rrezikonin që të humbnin mandatet”, deklaroi ai.

Prokuroria Themelore në Prizren ka ngritur aktakuzë kundër të pandehurve H.Z., dhe R.Z., për shkak se në bashkëkryerje kanë kryer veprën penale “Vrasja” e mbetur në tentativë.

Sipas aktakuzës, më datë 10.05.2024 rreth orës 18:51min në rrugën “Tranisiti i Ri” në lagjen Arbana të Prizrenit, saktësisht në një auto servis, me dashje fillojnë kryerjen e veprës penale të vrasjes ndaj të dëmtuarit J.B., të cilën nuk e përfundojnë, në atë mënyrë që pas një mosmarrëveshje paraprake lidhur me servisimin e një veture që kishte ndodhur një ditë më parë, në mes të pandehurit H.Z., dhe të dëmtuarit J.B.

“Derisa i dëmtuari J.B i njëjti ishte duke punuar në brendësinë e një automjeti në punëtorinë e tij, për një moment paraqiten të pandehurit H.Z., dhe R.Z., të cilët pa ndërruar asnjë fjalë derisa i dëmtuari ndodhej brenda veturës dhe në pozicion të pa mbrojtur, të pandehurit nxjerrin thikat dhe me të njëjtat e godasin disa herë të dëmtuarin, në pjesën e qafës dhe në regjionin e veshit të majtë derisa e vërejnë dëshmitarin Sh.B., i cili hyn në mes për të penguar sulmin e mëtejmë. I dëmtuari si rezultat i plagëve të marra me mjet të mprehtë, në pjesë vitale të trupit, përfundon në Spitalin Rajonal të Prizrenit “Prim.Dr.DautMustafa”, me lëndime të përshkruara sikurse në Akt ekspertimin mjeko-ligjor. Ndërkaq, të pandehurit me veturën e tyre të markës “Mercedes Benz 220C”, pas kryerjes së krimit largohen nga vendi i ngjarjes dhe deri më datë 11.05.2024 bëhen të pa arritshëm për organet e ndjekjes.”, thuhet në njoftim.

Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprën penale për të cilën akuzohen të shpallen fajtorë dhe të dënohen sipas ligjit.

Sot në kazermën “Adem Jashari” diplomuan 16 oficerë të rinj të gjeneratës së vitit 2024 të kadetëve të rinj të Forcës së Sigurisë së Kosovës.

I pranishëm në këtë ceremoni ishte Ministri i Mbrojtjes, Ejup Maqedonci, i cili duke uruar kadetët e rinj, tha se qershori i ngjarjeve të rëndësishme historike për liri e pavarësi po përmbyllet këtë vit me shtimin e dhjetë oficerëve të rinj të FSK-së.

Maqedonci tha se ky vit jubilar dallon nga vitet tjera për shkak të pozicionit ku gjendet ushtria e Kosovës, për çka përmendi investimet mbi 200 milionë dhe numrin e ushtarëve dhe oficerë të rekrutuar.

Ai shtoi se Ushtria e Kosovës po ecën me hapa të shpejtë drejt zhvillimit me kapacitete të plota si ushtri profesionale.

“Qershorin e ngjarjeve të rëndësishme historike, luftës për liri e pavarësi po e përmbyllim këtë vit duke i shtuar radhëve të FSK-së edhe dhjetë oficerë të rinj. Përvjetori i çlirimit këtë vit përtej simbolikës si vit jubilar dallon nga vitet e tjera për shkak të stadit në të cilin gjendet sot ushtria e Kosovës. Më rritjen në 2 për qind të GDP-së të Bruto Produktit vendor të ndarë për ushtrinë me mbi 200 milionë investime në këto 3 vitet e fundit dhe mbi 1800 ushtarë e oficerë të rinj të rekrutuar. Ushtria e Kosovës me hapa të shpejtë po ecën drejt zhvillimit me kapacitete të plota si ushtri profesionale dhe multi-etnike. Ëndrrën e të gjithë atyre që sakrifikuan për lirinë sot po e jetësoni ju kadetë. Me diplomimin tuaj si oficerë po ndërtoni shtylla të rëndësishme të ushtrisë, andaj nuk kam se si ta fshehë krenarinë që ndjej për ju”, tha Maqedonci.

Ndërkaq, duke vlerësuar profesionalizmin e pjesëtarëve të FSK-së, Maqedonci tha se bashkëpunimi i me shtetet aleate është si rezultat i këtyre vlerave.

Maqedonci gjithashtu falënderoi familjarët për mbështetjen ndaj kadetëve, duke thënë se ai nuk ka asgjë që e bën më krenar se sa të shoh rritjen dhe zhvillimin e Ushtrisë së Republikës së Kosovës.

“Ju pjesëtarët e FSK-së në vazhdimësi po tregoni profesionalizëm në çdo garë e trajnim ndërkombëtar. Bashkëpunimi i qëndrueshëm që kemi krijuar me shtetet partnere është si rezultat i vlerave që përfaqësojmë… Dimë çka besojmë dhe çka angazhohemi, luftojmë vetëm për paqen ashtu siç të parët tanë, Komandanti Legjendar Adem Jashari, dëshmorët dhe veprimtarët e kombit e bënë para nesh. Për fund, dua t’u uroj diplomimin dhe dijeni se keni përkrahjen e popullit dhe gjithmonë do të keni përkrahjen time. Në këtë rast falënderoj familjarët tuaj për mbështetjen që iu kanë dhënë. E di që nuk është e lehtë mbështetja e një kadeti në zhvillimin e tij profesional, është jetike dhe instrumanetale për suksesin në vazhdim. Nuk është e lehtë as pesha e uniformës që bartni, por pikërisht përball vështirësive vlerësohet madhështia e njeriut. Nuk ka asgjë që vlerësoj më shumë se sa betimi juaj për t’iu përkushtuar atdheut. Nuk ka asgjë që më bën më tepër krenar se të jem këtu sot e të shoh ushtrinë e Republikës së Kosovës teksa rritet e zhvillohet”, tha Maqedonci.

Kurse, Komandantja e Qendrës për Studime Universitare, që ka për qëllim të mëshirojë kadetët-oficerët me vlera ushtarake, Majore Mimoza Gudeci në ditën e saj e fundit si komandante e kësaj qendre, ndau tri mësime me kadetët e sapo diplomuar.

Ajo tha se detyra, nderi dhe atdheu janë fjalë që duhen të kujtohen gjithmonë në mënyrë që çdo veprim e vendim i tyre do të jetë i drejtë dhe i mirë.

“Porosia ime e parë për ju kadet është që asnjëherë mos harroni qëllimin tuja, qëllimi që përbëhet nga tri fjalë që keni dëgjuar më së shpeshti gjatë trajnimit 4 vjeçar në QSU, ka qenë dhe është i përbërë nga tri fjalët, detyra, nderi dhe atdheu. Sot para juve unë kërkojë nga të gjithë ju nga sot e deri në ditën e fundit kur do të pensionoheni të mbani mend këto tri fjalë, ky është qëllimi i shërbimit tuaj dhe nëse ju para çdo vendimi dhe veprimi, do t’i mbani mend këto tri fjalë, atëherë çdo veprim dhe vendim i juaji do të jetë i drejt, i mirë dhe profesional…QSU dhe unë jam krenare me atë që keni arrit të bëheni sot, një zonjushë dhe 15 zotërinj, të cilët do të udhëheqin Forcën e Sigurisë së Kosovës me shembullin më të mirë. Kjo është ajo që presim të gjithë“, tha ajo, duke shtuar se kadetët që të jenë vetvetja në vendime të vështira dhe të punojnë në mënyrë ekipore, duke respektuar varësit e tyre.

Në këtë ceremoni, shpërblimi “Kadet i dalluar në rrugëtimin 4-vjeçar” iu nda, Atdhe Ahmetit, i cili në emër të klasës 2024, tha se janë falënderues ndaj familjes dhe instruktorëve të cilët ngjallen një shpirt luftarak te kadetët që të ngritin vlera ushtarake.

“Në çdo hap të rrugëtimit tonë ne ishim krah i fort i njëri tjetrit, bashkë gjithçka ka qenë e arritshme, miqësia dhe besnikëria që ne kemi krijuar gjatë këtyre 4 viteve na bëjnë të pathyeshëm përball çdo vështirësie. Le të kujtojmë se forca më e madhe për ne është dashuria për atdheun. Ky vend pati burra e gra që kur pati më së shumti nevojë i dolën Zot, e atyre ne u jemi gjithmonë mirënjohës“, tha ai.

Në fund kadetët e rinj kanë pranuar diplomat e tyre.

Me kërkesë të Komisionit për Çështje të Sigurisë, Projektligji për Agjencinë e Intelegjencës dhe Sigurinë e Mbrojtjes është kthyer për raport plotësues në komision. Për këtë kanë votuar 69 deputetë për, katër kundër dhe asnjë abstenim. Kryetari i Komisionit për Çështje të Sigurisë, Bekë Berisha ka kërkuar që ky projektligj të kthehet në komision, meqë theksoi se si i tillë nuk duhet të miratohet.

Kryetari i Komisionit për Siguri, Bekë Berisha tha se deputeti i Lëvizjes Vetëvendosje, Enver Dugolli ka “kontrabanduar me propozim-amendamentet”. Ai ka propozuar që kjo nismë legjislative të kthehet në Komisionin për Siguri, teksa shtoi se do të jetë problem për shtetin.

“Projektligji për Agjencinë e Inteligjencës dhe Sigurisë së Mbrojtjes ka më shumë se një vit që është në procedurë në shqyrtim në Komisionin për Çështje të Sigurisë dhe Mbrojtjes. Por qëllimisht shqyrtimi i tij ka kaluar çdo limit kohor dhe kjo është bërë qëllimshëm nga kryesuesi i grupit punues, deputeti Enver Dugolli, të cilit ja kemi dhënë në mirëbesim me udhëheq këtë grup, po ashtu nga përfaqësuesit e Ambasadës Amerikane i është konfirmuar se përmbajtja e projektligjit të miratuar në qeverinë është në dakordim të plot me ta, si ligj fillimisht. Ndërsa, në anën tjetër zotëri Dugolli në mënyrë klandestine ka kontrabanduar dhe ka propozuar propozim-amendamente të cilat nuk janë rezultat i grupit punues por një rezultat i një rrethi të tij të brendshëm”, deklaroi ai.

Teksa përmendi amendamentet e ndryshuara, Berisha theksoi se humb kuptimi i agjencisë.

“Ky projektligj me këto amendamente nuk duhet të miratohet. Sepse do të cenojë sigurinë kombëtare, mes tjerash do të cenojë bashkëpunimin në këtë fushë dhe me partnerët tonë. Me theks të veçantë amendamenti numër 1, ndryshimi i titullit të projektligjit, ky agjencion e ka mandat jo vetëm veprimtarinë e intelegjencës por edhe të sigurisë në fushën e mbrojtjes. Nëse hiqet termi ‘dhe sigurisë’ do të cenohet dhe do të kufizohet mandati dhe veprimtaria e kësaj agjencie…Amendamenti numër 32 është propozuar që të ulet grada e drejtorit të agjencisë nga e gjeneralit në atë të kolonelit, kjo nuk duhet të ndodhë sepse në njërën anë po avancohet drejtoria aktuale për intelegjencë dhe siguri në Ministrinë e Mbrojtjes dhe po bëhet Agjenci për Intelegjencë dhe Siguri të Mbrojtjes, në anën tjetër po ulet apo degradohet grada e udhëheqësit të kësaj agjencie”, shtoi ai.

Shefja e Grupit Parlamentar të Lëvizjes Vetëvendosje, Mimoza Kusari-Lila theksoi se si LVV deklarohemi pro që ky projektligj të kthehet në komision.

“Nuk qëndrojnë të gjitha ato pretendime të cilat zotëri Berisha, kryetari i komisionit, i përmendi. Grupi Parlamentar i Lëvizjes Vetëvendosje ka dakordimin që ky projektligj të kthehet në komision në mënyrë që të ketë harmonizimin edhe dakordimin bashkë me partnerët të cilët janë pjesë e diskutimit për temën e sigurisë dhe intelegjencës. Dhe nuk ka pasur të bëjë me dispozitat të cilat ai i përmendi një nga një, që janë krejtësisht një tematikë tjetër. Prandaj ne si Grup Parlamentar deklarohemi që sot ky projektligj të kthehet në komision, jo të tërhiqet nga sponzorizuesi, në këtë rast t’i kthehet Qeverisë së Kosovës, por të jetë në komision dhe në kuadër të komisionit pastaj të trajtohet më tutje për ndjeshmërinë dhe rëndësinë që e ka”, deklaroi Kusari-Lila.

Edhe deputeti i Partisë Demokratike të Kosovës, Rashit Qalaj tha se ky projektligj duhet të kthehet në komision.

“Është mirë që ky projektligj të kthehet në komision edhe pse mendoj që është shumë më mirë që të tërhiqet nga sponsorizuesi dhe të startojmë prapë për shkak të shumë çështjeve të cilat janë devijuar rrugës nga projektligji fillestar. Dhe nuk ka nevojë që të jesh shumë njohës i sigurisë dhe të shohësh tendencat të cilat janë reflektuar me amendamentet që janë bërë nga grupi punues. Qëndrojnë ato të cilat i tha zotëri Bekë Berisha, për shkak se vërehet shumë lehtë që është një konflikt, mos të them një luftë në mes të dy institucioneve kryesore të vendit”, theksoi ai.

Kritika për përmbajtjen aktuale të projektligjit pati edhe deputeti i Lidhjes Demokratike të Kosovës, Anton Quni.

“Me Projektligjin për Agjencionin e Intelegjencës dhe Sigurisë së Mbrojtjes, ideja është që drejtoria të avancon në agjencion. Do të thotë del nga organogrami i përgjegjësive të sekretarit dhe kalon në përgjegjësinë e ministrit të Mbrojtjes, kryeministrit dhe presidentit. Me këtë avancim, me kalim nga drejtoria në agjencion do të thotë janë politikat e veçanta, kadrovike, autorizimeve… tani nga kolegu ynë Enver Dugolli janë propozuar disa amendamente që janë shumë paradoksale. Një ndër to është që me rritjen e përgjegjësisë së organizatës ulet grada, rangu i atij që do të udhëheq me agjencionin. Drejtorinë e udhëheq një gjeneral, kurse agjencionin në të ardhmen mund ta udhëheq një kolonel”, u shpreh ai. /kp

Kryeministri i Shqipërisë, Edi Rama ka postuar një fotografi ku ka shkruar se autostrada e kategorisë A të Bashkimit Evropian, Thumanë-Kashar, loti i parë i korridorit Blu, do të hapet të dielën 30 qershor në 19:00 për qarkullimin e automjeteve.

Thumanë-Kashar është i aks i kategorisë A, ku shpejtësia e lëvizjes do të jetë 130 kilometra në orë, duke ofruar gjithashtu kushte të larta sigurie.

Hapja e këtij aksi për qarkullimin e automjeteve do të lehtësojë ndjeshëm fluksin e trafikut.

Ndërkohë të gjithë drejtuesit e automjeteve do të kenë të drejtë të zgjedhin rrugët e shpejtësisë mbi 130 kilometra në orë me pagesë, apo rrugët dytësore të cilat do të jenë të disponueshme pa asnjë lloj pagese.