Category: Lajme

Kryeministri i Kosovës Albin Kurti ka thënë se ekipi i zëvendëskryeministrit të Kosovës Besnik Bislimi është duke punuar në komentet me shkrim mbi dokumentin e planit të sekuencimit të Marrëveshjes Bazë të Brukselit dhe aneksit të Ohrit. Kreu i ekzekutivit tha se do të dalin me njoftim sot ose më së largu gjatë ditës së nesërme për këtë rast.

Kurti fillimisht ka thënë se duhet të ketë respektim të marrëveshjes pasi sipas tij nuk mund të ketë zbatim të vërtetë e të qëndrueshëm nëse nuk ka respektim.

“Para se të kemi kërkesa për zbatim të marrëveshjes duhet të kemi respektim të marrëveshjes. Nuk do të mund të kemi zbatim të vërtetë as të qëndrueshëm nëse nuk kemi respektim të sinqertë dhe serioz. Serbia këtë nuk e ka bërë përkundër e ka shkelur për çdo javë prej që është pranuar ajo në shkurtin përkatësisht marsin e vitit të kaluar duke kulmuar me letrën e zonjës Bernabiq aso kohe kryeministre e Serbisë në mes të muajit dhjetor drejtuar 27-shes së Bashkimit evropian ku Serbia praktikisht u tërhoq nga marrëveshja duke thënë se nuk vijnë në konsiderim pavarësia për Kosovën ulësja në OKB dhe integriteti territorial. Ne insistojmë në respektim të marrëveshjes dhe zbatim të marrëveshjes. Për këtë gjë nevojitet nënshkrimi sepse nënshkrimi do të ishte garanci e sinqeritetit e seriozitetit, e mirëbesimit për zbatim të marrëveshjes dhe do të spostonte të gjitha ato shkeljet e mëhershme. Ekipi i zëvendëskryeministrit Besnik Bislimi është duke punuar edhe në këtë kohë që ne po flasim në mënyrë që ti përgjigjen Brukselit në mënyrë adekuate dhe të merituar e për këtë gjë sigurisht që do t’iu njoftojmë juve gjatë ditës së sotme ose më së largu nesër paradite”, tha Kurti.

Derisa për hapjen e urës kryesore të Ibrit, kryeministri Kurti tha se nuk është kundër askujt por për qytetarët dhe për mallrat e për kapitalin dhe sipas tij i ndihmon njerëzit në të dy anët e Ibrit pa dallim etnie.

“Ne patëm një takim përmbajtjesor konsultativ me 5 ambasadorë të QUINT-it dhe ambasadorin e BE-së me çast diskutuam për situatën e sigurisë në përgjithësi për zhvillimin e gjithmbarshëm të Kosovës e në veçanti për nevojën e hapjes së urës që është një marrëveshje e para shumë vjetëve në Bruksel nga dekada e kaluar. Natyrisht se askush nuk mund të thotë se kjo nuk është një gjë e mirë ose e drejtë por ne dëshirojmë që edhe të zbatohet ligji edhe të respektohet liria e lëvizjes por në të njëjtën kohë edhe të kemi paqe e siguri për të gjithë. Hapja e urës kryesore mbi lumin Ibër që ne e synojmë nuk është kundër askujt por është për qytetarët dhe për mallrat e për kapitalin, i ndihmon njerëzit në të dy anët e Ibrit pa dallim etnie gjithashtu edhe tregtinë ekonominë, bashkëpunimin. Janë edhe tri ura të tjera mbi lumin Ibër dhe të mbetet vetëm kjo urë e mbyllur për vetura nuk mendojmë që është në rregull. Ura e ka karakterin e baypass pasit pra ura është aty për të kaluar një lum, liqe apo greminë e tash nuk mund të kemi ura që janë baypass për një urë”, theksoi Kurti.

Sa i përket shfrytëzimit të liqenit të Ujmanit nga qytetarët, Kurti tha se policia po e bënë një punë të shkëlqyer dhe se situata është e sigurt dhe e qetë.

“Unë jam veç kryeministër dhe nuk mund ti di patrullat e policisë rrotull Ujmanit, në drejtim të Ujmanit apo kudo qoftë ne Kosovë…. Situata është e qetë, është e sigurt… qytetarët freskohen nëpër ato liqene të pakta që i ka Kosova dhe besoj që policia po bënë punë të shkëlqyeshme por ajo i ka vlerësimet e saj për situatën e sigurisë për rreziqet e mundshme dhe besoj që nga këto vite qytetarët janë ndarë të kënaqur nga vlerësimet e policisë”, përfundoi Kurti.

Kompania Rajonale e Ujësjellësit (KRU) “Prishtina” njofton se ka disa probleme teknike në pusin numër një te fabrika e Kronit në Fushë-Kosovë.

Pusi numër 1 furnizon direkt fshatin Bardhi i Madh, Grabovc dhe një pjesë të fshatit Pomozotin, edhe pse ekipi është dërguar, KRU “Prishtina” ka njoftuar problemi qëndron te një nga valvolat e pompës në Kroni.

“Siç kemi biseduar me shefin e fabrikës së Kronit, Nexhat Kabashin, problemi është te një nga valvulat e pompës. Shpresojmë që së shpejti do të gjendet një zgjidhje teknike”, ka njoftuar KRU “Prishtina”.

Ministria e Punëve të Jashtme dhe Diasporës ka apeluar tek qytetarët që të kenë kujdes gjatë kalimit nëpër Serbi ose t’i shmangin lëvizjet përmes territorit serb.

Ky reagim ka ardhur një incidenti që ndodhu në mesnatë në Serbi.

Përmes reagimit, MPJD ka shprehur shqetësim për pretendimet e Serbisë për vrasjen e një polici serb ku i dyshuar është një kosovar, shkruan Gazeta Insajderi.

“Ministria e Punëve të Jashtme dhe Diasporës përmes Zyrës Ndërlidhëse në Beograd po ndjek nga afër zhvillimet në lidhje me pretendimet e Ministrit të Brendshëm të Serbisë, Ivica Daçiq për një incident në magjistralen afër Loznicës në Serbi, ku pretendon që ka mbetur i vrarë një polic serb dhe i përfshirë në këtë rast sipas tij është një shtetas i Republikës së Kosovës.

Ministria e Punëve të Jashtme dhe Diasporës do të mbajë të informuar opinionin publik për këtë rast dhe apelon te mërgimtarët dhe qytetarët e Kosovës që të rrisin kujdesin gjatë kalimit nëpër Serbi dhe sipas vlerësimit të situatës të shmangin lëvizjen përmes territorit serb”, thuhet në njoftim.

Shoferi i automjetit në të cilin ndodhej i dyshuari për vrasjen e policit serb, në Loznicë të Serbisë, është arrestuar raportojnë mediat atje.

Sipas Ministrisë së Brendshme Serbe, i dyshuar për vrasjen e policit serb është Artan Hajrizi, 33 vjeçar, shtetas i Kosovës. Sipas raportimeve, në vendin e ngjarjes është gjetur një pasaportë e Kosovës dhe një letërnjoftim i Gjermanisë, transmeton Reporteri.net.

Prokuroria e Lartë Publike në Shabac ka njoftuar se shoferi i automjetit është ndaluar për 48 orë nën dyshimin për veprën penale “kalim ilegal i kufirit shtetëror dhe kontrabandë me njerëz”.

Forca të shumta policore janë në kërkim intensiv të autorit. Kërkimet sipas mediave serbe janë duke u bërë edhe me dronë.

Siç po raportohet të shtënat kanë ndodhur pasi autori ka refuzuar që policia ta kontrollojë çantën që ai e kishte me vete.

Siç raportohet, gjithçka nisi një orë pas mesnate kur efektivët e policisë, të cilët ishin në detyrë në një postbllok, ndaluan një taksi që u dukej e dyshimtë dhe në të cilën ndodhej autori.

Njëri prej policëve, siç thotë raportimi, i ka kërkuar njërit prej personave që ndodheshin në veturë t’u tregonte se çfarë ka në çantë.

Ai refuzoi dhe më pas qëlloi në drejtim të policisë.

Në mediat në Serbi, Artan Hajrizi është prezantuar si i burgosur, i cili dy javë më parë ka ikur nga një burg në Kosovë.

Ndërkohë, në disa media në Kosovë, ai po prezantohet si vëllai i Faton Hajrizit, i arratisur tash e disa ditë, e i cili është shpallur në kërkim nga Policia e Kosovës,

Loznica është afër kufirit mes Serbisë dhe Bosnjës. Detaje të tjera nuk janë bërë të ditura ende. Polici i vrarë është 34 vjeçar.

Një polic serb mbeti i vrarë dhe një tjetër u plagos sot në Loznicë të Serbisë. Sipas zyrtarëve serb i dyshuari për këtë rast është kosovari i arratisur nga burgu i Kosovës A.H.

Lidhur me këtë kanë reaguar nga Ministria e Punëve të Jashtme dhe Diasporës së Kosovë, duke apeluar për shmangie të lëvizjes përmes territorit serb.

“Ministria e Punëve të Jashtme dhe Diasporës do të mbajë të informuar opinionin publik për këtë rast dhe apelon te mërgimtarët dhe qytetarët e Kosovës që të rrisin kujdesin gjatë kalimit nëpër Serbi dhe sipas vlerësimit të situatës të shmangin lëvizjen përmes territorit serb”, thuhet mes tjerash në njoftim.

Mustafë Hajrizi, babai i Artan e Faton Hajrizit ka thënë se Artan Hajrizi nuk ndodhet në Kosovë por është në Gjermani

Aii ka thënë se Faton Hajrazi ka marrë pasaportën e vëllait të tij, Artanit, e cila nga autoritet serbe po pretendohet se është gjetur në Loznicë të Serbisë, ku u vra një polic serb.

“Fatoni i ka bërë ato punë, pasaportën e tij (Artanit) ia ka marrë, u shku në Gjermani atje ia ka marrë. Unë jam babai i tij.” – ka thënë ai fillimisht në një deklaratë për Nacionalen.

Pyetur se si është marrë kjo pasaportë, Mustafë Hajrizi deklaron se nuk kanë informacione rreth kësaj.

“Jo, jo. Qysh u shku nuk kemi informata, ia ka vjedh, se di hiç cka ka bërë, pasaportën e tij e ka pasë.”

Tutje, ai është shprehur se i biri, Artani, është në Gjermani duke punuar.

“Artani në Gjermani, t’u punu është që tetë vjet. Po po (kemi folë me të).” – tha ai.

Ai është pyetur edhe nëse ka qenë në dijeni se me kë ishte në veturë Faton Hajrizi, ku ai u përgjigj:

“Jo jo nuk di kurgjo, ai u kanë t’u punu atje, nuk kanë pushim as kerkun”.

Pirja e kafesë është një ritual i përditshëm për shumicën e njerëzve.

Megjithatë, ekzistojnë dy arsye pse duhet të bëni kujdes kur konsumoni kafe gjatë stinës së verës e sidomos kur temperaturat janë të larta e përvëluese.

Përkundër dobive që sjell pirja e kafesë, ekzistojnë dy rreziqe nëse e konsumoni gjatë muajve të nxehtë. Por cila janë ato?

Rreziku i dehidrimit

Dehidrimi është një disavantazh kur jemi tek kafeja, veçanërisht nëse e keni konsumoni gjatë muajve të ngrohtë.

Për shkak të vetive të saj diuretike, kafe mund të shkaktojë humbje të lëngjeve duke rritur prodhimin e urinës.

Për të reduktuar këtë rrezik, është thelbësore të qëndroni të hidratuar gjatë gjithë ditës duke pirë shumë ujë, veçanërisht nëse jeni duke shijuar kafe.

Mund t’ju rritet temperatura e trupit

Aftësia e kafesë për të rritur temperaturën e trupit në verë është një tjetër disavantazh.

Në ditët e ngrohta, kafeja mund të shkaktojë rritjen e temperaturës së trupit, duke ju bërë të ndiheni edhe më të nxehtë.

Për të qëndruar të qetë dhe të rehatshëm, mund të konsumoni kafe të ftohtë ose pije të tjera të ftohta në vend të kafesë së nxehtë gjatë verës. /Telegrafi/

Vetëm gjatë muajit maj, në Kosovë janë regjistruar 2 mijë e 300 lindje, njoftoi Agjencia e Statistikave të Kosovës.

Sipas të dhënave të Agjencisë së Statistikave të Kosovës (ASK) gjatë muajit maj kanë lindur 1 mijë e 212 meshkuj dhe 1 mijë e 88 femra.

“Në muajin maj 2024 janë regjistruar 2. 300 lindje. Prej këtyre lindjeve të regjistruara, 1. 212 lindje janë meshkuj dhe 1 088 lindje janë femra”, thuhet në raportin e ASK-së.

Zëvendëskryeministri i Serbisë, njëherësh ministër i Brendshëm, Ivica Daçiq, ka thënë se një zyrtar policor është vrarë në Lloznicë – qytetin perëndimor në Serbi, në kufi me Bosnje e Hercegovinën – në orët e para të së enjtes, ndërsa një tjetër është plagosur rëndë.

Policia serbe është në kërkim të sulmuesit.

Ministria e Brendshme e Serbisë ka thënë se në vendngjarje është gjetur një pasaportë e të dyshuarit, e lëshuar nga autoritetet e Kosovës, me emrin e Artan Hajzirit – i lindur më 1991 – dhe një dokument tjetër gjerman identifikimi.

E pyetur nga Radio Evropa e Lirë, ministria e Brendshme gjermane nuk e ka komentuar këtë rast.

Presidenti serb, Aleksandar Vuçiq, i ka dërguar telegram ngushëllimi familjes së policit të vrarë, të cilin e ka përshkruar si hero.

“Jam jashtëzakonisht i tronditur me lajmin për vdekjen e zyrtarit policor, Nikolla Kërsmanoviq, i cili është vrarë në një sulm tinëzar derisa ka qenë duke kryer detyrën e tij të vështirë”, ka thënë Vuçiq përmes një komunikate të lëshuar nga Presidenca serbe.

Kryeministri i Kosovës, Albin Kurti, ka thënë se nuk ka për të shtuar asgjë përveç asaj që është publike për këtë rast dhe që organet e sigurisë në Kosovë po grumbullojnë informacione.

Ai ka bërë thirrje që të mos politizohet ky rast.

“Autoritetet tona kompetente, Ministria e Punëve të Brendshme, Ministria e Punëve të Jashtme, Policia, do ta informojnë publikun për gjendjen aktuale se ku jemi dhe çfarë duhet bërë në të ardhmen. Edhe unë pres që të japin deklaratat e tyre profesionale, sepse ne besojmë se kjo çështje nuk duhet të politizohet, por të trajtohet si e tillë, nga pikëpamja e sigurisë, ligjore dhe profesionale”, ka thënë Kurti në një konferencë për media në mëngjes.

Ministria e Jashtme e Kosovës ka thënë se po ndjek nga afër zhvillimet përmes Zyrës së saj Ndërlidhëse në Beograd.

Çfarë tha Ministria e Brendshme serbe?

Sipas një deklarate të lëshuar nga Ministria e Brendshme, Daçiq ka thënë se rasti ka ndodhur rreth orës 00:55, kur zyrtarët policorë, teksa kanë qenë duke kontrolluar makinat në një pikë kontrolli në Lipniçki Shor, e kanë ndaluar një makinë të llojit Mercedes, me targa të Tutinit të Serbisë, në të cilën kanë qenë dy persona.

Sipas Ministrisë, njëri prej personave, më pas, ka shtënë me armë duke e goditur zyrtarin policor Nikolla Kërsmanoviq në gjoks, dhe zyrtarin policor Vjekosllav Illiq në shpatull, dhe më pas ka ikur.

Të dy zyrtarët policorë janë transportuar në Spitalin e Llozninës, dhe Kërsmanoviq ka vdekur prej plagëve të marra.

Në operacionet e kërkimit janë përfshirë dronë dhe helikopterë./rel