Category: Lajme

Nënkryetarja e Partisë Demokratike të Kosovës (PDK), Vlora Çitaku, e ka quajtur debakël politik dhe diplomatik për Qeverinë Kurti, heqjen e vizave për shtetasit e Kosovës që kanë pasaporta të Serbisë.

“Pra, pasaportat e lëshuara nga strukturat paralele të Serbisë paskan marrë sot vulë legjitimiteti nga B.E. Çfarë debakli politik dhe diplomatik për Qeverinë Kurti. Ja ku e sollën Kosovën sjelljet infantile dhe aventureske të kësaj kaste udhëheqëse”, ka shkruar Çitaku në Facebook.

Këshilli i Bashkimit Evropian ka miratuar të hënën rregulloren që u lejon edhe serbëve të Kosovës që bartin pasaporta të lëshuara nga Drejtoria Koordinuese në Beograd, t’u hiqen vizat sikurse të gjithë rajonit të Ballkanit Perëndimor.

Sipas njoftimit, vendimi pritet t’i prekë rreth 18 mijë banorë serbë të Kosovës që i posedojnë këto dokumente.

Rregullorja hyn në fuqi në ditën e 20-të pas botimit në Fletoren Zyrtare të BE-së.

Një 75-vjeçar nga Kosova ka vdekur në plazhin e Velipojës, pasi ka pësuar atak kardiak.

Sipas Policisë së Shtetit, ngjarja raportohet të ketë ndodhur rreth orës 13:00.

“Rreth orës 13:00, shtetasi kosovar M. S., 75 vjeç, duke u larë në det, dyshohet se ka pësuar arrest kardiak dhe si pasojë ka humbur jetën”, thuhet në njoftimin e policisë.

Grupi hetimor ka dalë në vend të ngjarjes dhe po vijon punën për sqarimin e plotë të rrethanave të rastit.

Kryeparlamentari Glauk Konjufca priti sot në takim drejtorin ekzekutiv të organizatës Balkan Green Foundation (BGF), Agron Demi, me të cilin nënshkroi marrëveshje bashkëpunimi për mbështetjen e shërbimeve hulumtuese dhe analitike në Kuvend përmes Drejtorisë së Përgjithshme për Institutin Parlamentar.

Qëllimi i kësaj marrëveshjeje është krijimi i një platforme bashkëpunimi në hulumtime dhe analiza që ndihmojnë Kuvendin e Kosovës në formulimin e politikave dhe ligjeve që promovojnë zhvillimin e qëndrueshëm.

Sipas marrëveshjes, BGF do të mbështesë Drejtorinë e Përgjithshme duke kryer hulumtime dhe analiza për politika të gjelbra dhe zhvillim të qëndrueshëm, për të mbështetur deputetët dhe organet e Kuvendit në procesin ligjbërës, mbikëqyrës dhe përfaqësues, si dhe do të angazhohet në fushata edukuese dhe promovuese për të rritur ndërgjegjësimin për kujdesin ndaj mjedisit.

Balkan Green Foundation gjithashtu do të ndajë informacione dhe njohuri të marra nga hulumtimet dhe fushatat e tyre me Drejtorinë e Përgjithshme dhe organet e Kuvendit, si dhe do të bashkëpunojë në ngritjen e kapaciteteve hulumtuese dhe analitike, në shkëmbim të përvojave dhe në zhvillimin e platformave të diskutimit.

Sipas marrëveshjes, Drejtoria e Përgjithshme për Institutin Parlamentar ndan të dhëna dhe informacione relevante me BGF-në për të lehtësuar hulumtimet dhe analizat, mundëson shpërndarjen e studimeve të BGF-së, si burime të klasifikuara zyrtare mbi politikat e zhvillimit të qëndrueshëm, siguron ndarjen të dhënave për nismat hulumtuese të ndërmarra nga BGF që ndërlidhen me Kuvendin, si dhe ndan ekspertizë dhe burime njerëzore për të mbështetur zbatimin e nismave të përbashkëta.

Testimi i mësimdhënësve është temë që po diskutohet herë pas herë por tash e një kohë të gjatë. Ideja ka ardhur nga Ministria e Arsimit, por është kundërshtuar nga Sindikata e Arsimit.

Lidhur me këtë KosovaPress, ka bërë anketën se “A duhet të testohen mësimdhënësit?”, në të cilën kanë votuar 282 persona, e prej tyre shumica, ose 211 persona ose 73.78 përqind, kanë votuar pro testimit, kurse, 73 persona ose 25.52 përqind kanë kundërshtuar testimin e mësimdhënësve.

Ndërkohë, janë vetëm dy persona janë përgjigjur se nuk e dinë.

E komentet rreth kësaj çështje kanë qenë më të ndryshme. Agron Ademi ka shkruar se në fillim duhet të testohet Ministrja e Arsimit, pastaj profesorët e Universitetit e në fund mësimdhënësit.

Kurse, Renda Cakaj Morina ka shkruar se nuk duhet të testohen pasi mbesim pa mësimdhënës.

E Nesim Halili ka shkruar se duhet të testohet kryeministri Albin Kurti dhe Qeveria sepse mësimdhënësit janë testuar kur kanë diplomuar.

“Mos i nënçmona mësimdhënësit por edukoni fëmijët që t’i përmbahen rregullave të shkollës, të shkojnë në mësim me libra e fletore dh jo si vagabonta me duar në gjepa”, ka thënë ai.

Orhan Laloshi ka shkruar se patjetër që duhet të testohen, por vetëm ata ose ato mësuese që janë edhe 5 vite para pensionit të mos dalin në test.

Ditët e fundit të muajit korrik në Kosovë po shënojnë sukses në fushën e kulturës dhe artit.

Ceremonia hapëse e ekspozitës “A thua ëndërr ishe ti”, ka hapur edicionin e katërt të Festivalit Ndërkombëtarë të Operës Rame Lahaj, ku arti pamorë dhe ai muzikorë bëhen një.

Në këtë ekspozitë janë shfaqur kryevepra nga Rasim Merlaku, vepra të artistëve më të mirë të Kosovës, një pjesë e të cilëve nuk janë tashmë në mesin tonë. Inspirimi i titullit të ekspozitës është marrë nga kënga e grupit të njohur Minatori “A thua ëndërr ishe ti” i cili ndërlidhet me simbolikën dhe poetikën që ka kjo ekspozitë.

Karakteristikat e veçanta të kësaj ekspozite këtë vit janë simbolet e fshehta të emocioneve si nostalgjia dhe dashuria.

Se kjo ekspozitë është një hap drejt zhvillimit të tregut të artit në Kosovë e thotë kuratorja e ekspozitës, Arta Agani.

Agani, ka thënë për KosovaPress-in se ekspozita është shumë me rëndësi për vendin dhe audiencën pas sipas saj është rast i rrallë kur arti muzikorë dhe pamorë bëhen një.

“Kjo është hera e dytë që hapet ekspozita në kuadër të festivalit Rame Lahaj, Festivali Ndërkombëtarë të Operës. Për neve është shumë me rëndësi, për vendin tonë në përgjithësi, për audiencën tonë sepse është një rast që përzihen arti muzikorë me artin pamorë e që është rast mjaft i rrallë… Për mua personalisht artet duhet të shkrihen në një rang tjetër dhe ato janë drejtimet në të cilat po shkon bota sot”, ka thënë Agani.

Sipas saj, ekspozita do të shënoj histori për artin e Kosovës, pasi që është hera e parë që ekspozohet një koleksion privat.

“Mendoj që do të shënoj në njëfarë forme histori, se është hera e parë që ekspozohet një koleksion privat mjaft signifikant, prej gati 500 veprash prej të cilave janë përzgjedhur “kremi”, që mendoj se do ta nxit tregun e artit në Kosovë, i cili është ekzistencë por në përmasa shumë të vogla, mund të themi edhe nonekzistencë”, është shprehur ajo.

Përveç se janë vepra të tetë artistëve të njohur, prej të cilëve shumica nuk janë më në mesin tonë, veprat e tyre rikthehen me një pikëpamje më ndryshe.

“Shumica prej tyre më nuk janë në mesin tonë, shembull profesor Rexhep Ferri ka ndërruar jetë para dy tre muaj dhe është një rikthim në veprat e tyre me një pikëpamje paksa ndryshe, sepse në këtë koncept në mënyrën se si janë të radhitura veprat në këtë ekspozitë, janë referuar simboleve të fshehta të emocioneve si nostalgjia, dashuria e të tjera. Nëse i shohim me atë pikëpamje, atëherë kemi me pa një ndërlidhje në mes të të gjitha këtyre veprave të cilat në shikim të parë janë shumë të ndryshme… Titulli i ekspozitës është lidhur shumë me simbolikën dhe poetikën që e ka kjo ekspozitë jo vetëm titulli por edhe teksti”, ka shtuar ajo.

Ekspozita do të qëndrojë e hapur për publikun nga data 22 korrik deri më 31 korrik nga ora 12:00 deri 19:00. Ndërsa koncerti i operës do të mbahet në sheshin “Skënderbeu” në Prishtinë. /kp

Udhëheqësit evropianë shprehën të dielën mendimet e tyre për vendimin e presidentit amerikan Joe Biden për të mos kandiduar në zgjedhjet e ardhshme presidenciale dhe i dhanë lamtumirën.

“Unë e respektoj vendimin e Presidentit Biden dhe mezi pres që ne të punojmë së bashku gjatë pjesës së mbetur të presidencës së tij”, tha kryeministri britanik Keir Starmer në X.

“Unë e di se, siç ka bërë gjatë gjithë karrierës së tij të jashtëzakonshme, ai do ta ketë marrë vendimin e tij bazuar në atë që ai beson se është më e mira për popullin amerikan,” shtoi ai.

Kryeministri spanjoll Pedro Sanchez shkroi në X: “Gjithë admirimin dhe njohjen time për vendimin e guximshëm dhe dinjitoz të presidentit @JoeBiden”.

“Falë vendosmërisë dhe udhëheqjes së tij, SHBA-ja e kapërceu krizën ekonomike pas pandemisë dhe sulmit serioz në Kapitol dhe ka qenë shembullore në mbështetjen e saj për Ukrainën përballë agresionit rus të Putinit”, tha ai.

“Një gjest i madh nga një president i madh që ka luftuar gjithmonë për demokracinë dhe lirinë,” vuri në dukje Sanchez.

Simon Harris, kryeministri i Irlandës, postoi një deklaratë me shkrim në X, duke falënderuar Biden për “udhëheqjen e tij globale” dhe “miqësinë”.

Duke përmendur se “bota ka ndryshuar” që nga koha kur Biden mori detyrën, Harris tha se presidenti i SHBA “ka qenë një zë i arsyes, multilateralizmit efektiv dhe zgjidhjeve të përbashkëta”.

“Joe Biden, në të gjitha postet që ka mbajtur, ka qenë gjithmonë një zë i palëkundur dhe punëtor i pasionuar për paqen në ishullin e Irlandës dhe vendi ynë i detyrohet atij një borxh të madh për këtë”, theksoi ai.

Më tej Harris i uroi suksese çiftit Biden dhe familjes së tyre, duke shtuar: “Mezi pres të punoj me ju për pjesën e mbetur të Presidencës suaj”.

Kryeministri i Polonisë Donald Tusk i bëri thirrje Bidenit në X: “Ju keni marrë shumë vendime të vështira falë të cilave Polonia, Amerika dhe bota janë më të sigurta dhe demokracia më e fortë”.

Petr Fiala, kryeministri i Republikës Çeke, gjithashtu shkroi në X: “Është padyshim vendimi i një burri shteti që i ka shërbyer vendit të tij për dekada”.

“Është një hap i përgjegjshëm dhe personalisht i vështirë, por është edhe më i vlefshëm,” tha ai, duke vënë në dukje: “Po i mbaj gishtat e kryqëzuar për SHBA-në që një president i mirë të dalë nga konkurrenca demokratike e dy kandidatëve të fortë dhe të barabartë”.

Kandidatura e Biden ka qenë në qendër të vëmendjes pas performancës së tij të zymtë kundër ish-presidentit Donald Trump në një debat presidencial në fund të muajit të kaluar.

Duke u përballur me presionin në rritje, Biden, 81 vjeç, tha në një letër se ka qenë “nderi më i madh” i jetës së tij të shërbejë si president.

“Dhe ndërsa synimi im ka qenë të kërkoj rizgjedhjen, besoj se është në interesin më të mirë të partisë sime dhe të vendit që unë të tërhiqem dhe të fokusohem vetëm në përmbushjen e detyrave të mia si President për pjesën e mbetur të mandatit tim”, shtoi ai./AA/

Detaje të reja rreth masakrës në Kroaci kanë dalë në dritë. Dyshohet se një oficer i policisë ushtarake në pension vrau pesë persona – hyri në shtëpi dhe qëlloi me pistoletë nënën e tij, tre banorë dhe një punonjës.

Siç ka marrë vesh jozyrtarisht Jutarnji, sulmuesi ka lindur në vitin 1973 dhe përndryshe është një ish-mbrojtës kroat. Ai hyri me armë në shtëpinë e të moshuarve dhe qëlloi pesë persona.

Gjithsej tetë persona kanë mbetur të plagosur – pesë janë të vdekur, një është në gjendje kritike, dhe dy janë jashtë rrezikut për jetën.

Pas kësaj vrasësi ka ikur, por policia e kapi shumë shpejt pranë kafenesë Daruvarac.

Sipas dyshimeve, sulmuesi sipas Jutarnji pasi kreu masakrën, hyri në kafene dhe porositi një pije.

Policia Bjelovar-Bilogor bëri një njoftim të shkurtër për masakrën në Daruvar.

“Sot, më 22 korrik, në orën 10:10 në policinë Bjelovar-Bilogor është raportuar se një person ka vrarë dhe plagosur disa persona në një banesë për të moshuar dhe të pafuqishëm duke përdorur armë zjarri”, thuhet në njoftimin e policisë.

Personi që është i lidhur me krimin është nën mbikëqyrjen e policisë. Në vendin e ngjarjes, sipas policisë, hetimet po kryhen nga zëvendësprokurori i qarkut në Bjelovar.

Nga ditët e tij si Senator i Shteteve të Bashkuara, deri në mandatin e tij si zëvendëspresident dhe si President, Joe Biden gjithmonë ka mbrojtur lirinë, pavarësinë dhe demokracinë e Kosovës. Kështu e ka kujtuar presidentja e Kosovës punën e Biden gjatë viteve të tij në pozita shtetërore.

Pas largimit nga kandidatura e tij për president të Amerikës, Osmani thotë se mirënjohja e popullit të Kosovës ndaj tij, do të mbetet gjithmonë e thellë.

“I urojmë Presidentit Biden një vazhdim të suksesshëm të mandatit të tij dhe gjithë të mirat për të dhe familjen Biden në vitet në vijim”, ka shkruar Osmani në X.

Osmani ka shpëputur një pjesë të videos nga fjalimi me video nga Presidenti Biden pasi ajoi vet i dha Medaljen Presidenciale Beau Biden (pas vdekjes) në 2021.

From his days as a U.S. Senator to his tenure as Vice President, and now as President, @POTUS @JoeBiden has always championed Kosovo’s freedom, independence and democracy. The gratitude of the people of Kosovo will always remain profound.

We wish President Biden a successful… pic.twitter.com/0gra8y2ii9

— Vjosa Osmani (@VjosaOsmaniPRKS) July 22, 2024

Presidenti amerikan, Joe Biden, ka njoftuar të dielen se do të tërhiqet nga gara për zgjedhjet presidenciale të nëntorit.

Ai përmes një deklarate të lëshuar në rrjetet sociale, ka thënë se beson që tërheqja nga gara është në interesin më të mirë për Partinë Demokratike dhe SHBA-në, në mënyrë që të fokusohet tërësisht në kryerjen e mandatit që ka aktualisht.

“Ka qenë nderi më i madh i jetës sime që të shërbej si president”, ka thënë Biden.

Deputetja e Lëvizjes Vetëvendosje, Arbëreshë Kryeziu-Hyseni, thotë se themelimi i Asociacionit të komunave me shumicë serbe nuk është në qendër të planit të zbatimit të Marrëveshjes Bazë të Brukselit dhe aneksit të Ohrit, i cili i është dorëzuar Kosovës së fundmi nga emisari i Bashkimit Evropian për dialogun, Miroslav Lajçak. Megjithëse, zëvendëskryeministri, Besnik Bislimi konfirmoi se kanë dërguar shtatë faqe komente për këtë plan, deputetja e mazhorancës është pesimiste se do të ketë progres në këtë drejtim, për shkak siç thotë qasjes dekonstruktive të Serbisë dhe mosnënshtrimit të marrëveshjes.

Kryeziu-Hyseni, e cila është edhe kryetare e Komisionit parlamentar për politikë të jashtme dhe diasporë, thotë për KosovaPress, se Asociacioni s’do të jetë elementi kyç i zbatimit të planit të marrëveshjes, mirëpo në dokument duhet trajtuar të gjitha pikat radhazi për të mbërritur te pika e shtatë ku flitet për vetëmenaxhim.

“Nëse do të ishte Asociacioni qendra e dokumenteve deri më tani do të kishim dërguar draftin, do të kishim marrë opinionin e Gjykatës Kushtetuese dhe do të kishte filluar implementimi i Asociacionit. Krejt arsyeja pse jemi në një situatë të tillë është se Kosova s’pranon që Asociacioni të vendoset në qendër të cilido diskutim që lidhet me procesin e dialogut, pasi nuk është Asociacioni qendra. Dokumenti kryesor është marrëveshja bazike dhe ne duhet t’i përmbahemi kësaj duke trajtuar të gjitha pikat radhazi që janë pjesë e këtij dokumenti për të mbërritur aty ku quhet vetëmenaxhim. Mirëpo ne nuk do të nxjerrim Asociacionin në qendër të cilido diskutim, pasi sikur të kishim bërë këtë gjë Asociacioni tashmë do të ishte harruar dhe dialogu do të kishte marrë fund”, thekson ajo.

Sipas saj, progres në dialog do të ketë vetëm kur Serbia të nënshkruajë marrëveshjen dhe të tërheq letrën e ish-kryeministres, Ana Bërnabiq që i kishte dërguar BE-së, ku thuhet se Serbia zbaton marrëveshjen vetëm pjesërisht.

“Mund të ketë progres nëse Serbia e tërheq letrën e Bërnabiqit që është dërguar në vitin e kaluar dhe të thotë se është pjesë e dialogut. Ne nuk e kemi të qartë nëse Serbia është apo jo pjesë e dialogut. Ata praktikisht kanë hequr dorë nga dialogu përmes letrës së ish kryeministres. Mund të kishte progres nëse do të kishte qasje pak më konstruktive të Serbisë në këtë drejtim. Nëse ata do të quanin vetën pjesë të dialogut e para gjë që do të bënin është të pranojnë marrëveshjen bazike dhe të njëjtën kohë të nënshkruanin për të kaluar te plani i sekuencimit. Nuk e di tash si do të mund të kalojmë te plani i sekuencimit kur po flasim për një shtet që është palë në dialog, por nuk e pranon dialogun dhe marrëveshjen bazike dhe kundërshton gjithçka që derivon prej këtyre dy dokumenteve shumë të rëndësishme. Nëse marrëveshja bazike nuk pranohet nuk e di si mund të kalohet te plani i veprimit ose si të përcaktohen hapat e sekuencimit tani e tutje”, shton deputetja e mazhorancës.

Deputetja Kryeziu-Hyseni kërkon nga Bashkimi Evropian që të ketë një pozicion të qartë sa i përket refuzimit të vazhdueshëm të Serbisë të Marrëveshjes Bazë të Brukselit dhe aneksit të Ohrit.

“Është mirë që kjo të qartësohet prej vet Bashkimit Evropian në mënyrë që të kemi një pasqyrë më të qartë sesi do të rrjedhë procesi i dialogut tani e tutje. Natyrisht se do të ketë takime në nivel të kryenegociatorëve sepse ideja është që të shtyhet procesi përpara dhe të lëvizë. Ka një kohë që ka mbetur në gjendje të palakueshme sidomos për neve si një shtet demokratik që synojnë t’i bashkohemi strukturave euro-atlantike. Megjithatë ne po bëjmë përpjekje që të japim krejt forcën tonë, konstruktivtetin tonë në mënyrë që të nxjerrim rezultate konkrete, por nuk e di sa mund të ketë mundësi përderisa pjesë e dialogut është një palë që bllokon gjithçka. Prandaj duhet të qartësohet pozicioni i Serbisë dhe pozicioni i Bashkimit Evropian karshi palëve në mënyrë që të dihet si të ecim tutje”, deklaron ajo.

Duke folur për anëtarësimin e Kosovës në Këshill të Evropës, ajo është optimiste se kjo temë do të rikthehet në agjendë në takimin e radhës të Ministrave të Punëve të Jashtme të KiE-së.

“Nuk mendoj se Kosova ka dështuar (për anëtarësim në Këshill të Evropës). Besoj se i kemi plotësuar të gjitha kriteret që kanë qenë të kërkuara prej vet Këshillit të Evropës në mënyrë që ne të bëhemi anëtarë të KiE-së. Kriteri i fundit ka ardh krejt në momentet e fundit dhe ka qenë e padrejtë një veprim i tillë që është karshi neve pasi s’përkon fare as me raportin që është bërë prej Këshillit të Evropës dhe diskutime të tjera që kanë qenë në nivel të brendshëm të KiE-së. Ky veprim është bërë qëllimshëm në mënyrë që Kosova të mbahet jashtë pasi ne nuk po pranojmë që të dërgojmë një draft të hartuar nga Lajçak për opinion në Gjykatën Kushtetuese. Dua të besoj shumë se çështja e Kosovës do të rikthehet në takimin e Këshillit të Ministrave dhe ata do të votojnë pro, pasi ata tashmë e kanë një rekomandim të Asamblesë Parlamentare që kanë votuar pro anëtarësimit të Kosovës”, thekson Kryeziu-Hyseni.

Krahas këtyre, Kryeziu-Hyseni konsideron të domosdoshme largimin e masave ndëshkuese ndaj Kosovës.