Category: Lajme

Komuna e Mitrovicës së Veriut organizon sot një takim dhe bashkëbisedim me qytetarë, aktivistë të shoqërisë civile dhe përfaqësues të mediave lokale me temën “Bashkëpunimi ndëretnik, këshillim komunal për siguri në bashkësi, bashkëpunimi në mes të institucioneve dhe shoqërisë civile”.

Aty, veç kryetarit Erden Atiq, do të marrin pjesë edhe Ministri i Pushtetit Lokal, Elbert Krasniqi, zëvendësdrejtori i Policisë për veriun, Veton Elshani dhe zyrtarë nga Ministria e Punëve të Brendshme.

Lidhur me këtë takim, dje, Kryeministri Albin Kurti tha se aty pritet të diskutohet për përfitimet nga hapja e Urës së Ibrit.

Ai i ka ftuar qytetarët serbë që të marrin pjesë në këtë diskutim, në të cilin ai ka thënë se do të diskutohet për përfitimet që qytetarët do të kenë nga hapja e Urës së Ibrit.

Takimi është paraparë të nis nga ora 11:00 dhe mbahet në Kuvendin Komunal të Mitrovicës së Veriut.

Shtetet e Bashkuara të Amerikës. Matthew Miller, zëdhënësi i Departamentit të Shtetit, në konferencën e mbrëmshme ka thënë se ndihen të shqetësuar me vendimet e pakoordinoruara të Qeverisë së Kosovës.

“Jemi të shqetësuar me vendimet e vazhdueshme të pakoordinuara nga lidershipi i Kosovës. Ne besojmë se ato i rrezikojnë mundësitë të cilat e ndihmuam Kosovën që t’i krijojë”, tha Miller sot para mediave.

Tutje ai ka thënë se këshilla e SHBA-ve ndaj Kosovës është rikthimi në angazhimin konstruktiv me aleatët ndërkombëtar.

“Do ta inkurajonim qeverinë e Kosovës të kthehet në angazhim të afërt dhe konstruktiv me ShBA-në, BE-në, NATO-n dhe me partnerët tjerë të afërt ndërkombëtarë të Kosovës dhe e kemi bërë atë të qartë, siç po e bëj tani publikisht, ia kemi bërë të qartë qeverisë edhe privatisht”, potencoi zëdhënësi Miller.

Miller ndër të tjera përmendi edhe mbështetjen që Kosova e ka pasur nga shteti amerikan në procesin e shtetndërtimit.

“Nëse e shikoni rrëfimin që nga pavarësia e Kosovës, ShBA-ja e ka mbështetur fuqishëm integrimin e saj të plotë në komunitetin ndërkombëtar si demokraci sovrane e multietnike. Por, për ta realizuar këtë vizion, që është vizion të cilin edhe ne e ndajmë, ne kemi bashkëpunuar me liderët e vazhdueshëm politikë të Kosovës në masa që forcojnë paqen dhe prosperitetin brenda ndërsa avancojmë Kosovën në këtë rrugë euro-atlantike në të cilën jeni pajtuar”, ka thënë ai.

Miller gjatë konferencës për media u pyet nga një gazetare për qëndrimin e SHBA-ve pas ngjarjes së mbylljes së postave, duke thënë se “edhe sa vija të kuqe do t’i shkel kryeministri Kurti pa ndonjë pasojë?”. Përgjigja fillestare e Miller ishte se nuk do ta spekulojë të ardhmen.

Qendra Kombëtare për Menaxhim Kufitar ka bërë një përditësim të ri mëngjesin e së enjtes mbi gjendjen aktuale në pikëkalimet kufitare për hyrje-dalje nga Kosova.

Sipas përditësimit të ri, pritjet më të gjata për dalje nga Kosova janë aktualisht në Merdarë, ku shkojnë pritjet deri në 2 orë, me kolonë 1200 metra.

Pritjet tjera më të gjata janë te Dheu i Bardhë deri në 30 minuta, me kolonë 100 metra.

Ndërkohë pritjet për të hyrë në Kosovë në të gjitha pikëkalimet kufitare nuk janë më shumë se 10 minuta.

Një rast i rëndë ka ndodhur sot në fshatin Zllakuqan të Lipjanit, ku një person 57-vjeçar është vrarë pasi është sulmuar me një mjet të mprehtë dhe për pasojë ka humbur jetën.

Përveç tij, i plagosur ka mbetur edhe një person tjetër.

Lajmin e ka konfirmuar edhe Policia e Kosovës.

“Rreth orës 13:00, policia ka marrë informatën për një vrasje  që ka ndodhë  në fshatin Zllakuqan të Lipjanit. Menjëherë pas marrjes së informatës policia ka dalë në vendin e ngjarjes  dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen.

Bazuar në informacionet e para janë ngritur dyshimet se një mosmarrëveshje mes disa personave ka rezultuar me plagosjen e  rëndë të dy personave, dyshohet me mjet të mprehtë thikë. Njëri nga personat e lënduar ka vdekur, ndërsa i lënduari tjetër është dërguar për tretman mjekësor.

Vdekjen e viktimës mashkull, rreth 57 vjeç, e ka konstatuar ekipi mjekësor në QKMF në Magure. Aktualisht hetuesit policor në koordinim me prokurorinë, po ndërmarrin veprimet hetimore për për ndriçimin e plotë të rastit,ndërkohë që dy persona të dyshuar janë arrestuar.”

Para pak kohe ka përfunduar tubimi i serbëve në Mitrovicën të Veriut, ku serbët dolën për të protestuar ndaj vendimit të Qeverisë së Kosovës për hapjen e Urës mbi lumin Ibër.

Për protestën ka reaguar kryeministri Albin Kurti, i cili i ka falënderuar institucionet e sigurisë që garantuan mbarëvajtjen e qetë të saj.

Tutje, kryeministri njoftoi se komuna e Mitrovicës së Veriut nesër prej orës 11:00, në hapësirat e Kuvendit Komunal, organizon takim dhe bashkëbisedim me qytetarë, aktivistë të shoqërisë civile dhe përfaqësues të mediave lokale me temën “Bashkëpunimi ndëretnik, këshillim komunal për siguri në bashkësi, bashkëpunimi në mes të institucioneve dhe shoqërisë civile”.

Ai u bëri ftesë bashkëqytetarëve të komuniteti serb që të marrin pjesë në diskutim në të cilin do të njoftohen mbi përfitimet nga hapja e urës dhe të shprehin shqetësimet e tyre.

“I ftoj bashkëqytetarët tanë të komunitetit serb që të marrin pjesë në këtë diskutim të përbashkët në të cilin do të mund të njoftohen mbi përfitimet nga hapja e urës dhe të shprehin shqetësimet e tyre të cilat do të trajtohen nga përfaqësuesit tanë institucionalë dhe institucionet e vendit. Për shumë gjatë Ura e Mitrovicës mbi Ibër na ka mbajtur në distancë. Asaj padrejtësisht i është dhënë epiteti i ndasisë dhe marrëdhënieve jonormale. Urat na bashkojnë, e bashkë le ta bëjmë atë simbol të normalizimit”, ka shkruar më tej kryeministri Kurti.