Category: Lajme

Ministrja e Arsimit, Shkencës, Teknologjisë dhe Inovacionit, Arbërie Nagavci, ka vizituar shkollën “Iliria” me rastin e fillimit të vitit të ri shkollor 2024/2025.

Ajo tha se procesi i fillimit të vitit të ri shkollor po shkon mbarë në të gjitha shkollat në Kosovë.

Krahas kësaj, ministrja Nagavci shtoi se deri tani s’ka pasur ndonjë parregullsi për subvencionimin e teksteve shkollore.

Me rastin e fillimit të vitit të ri shkollor, presidentja e Kosovës, Vjosa Osmani, ka dërguar një mesazh urimi për të gjithë nxënësit, prindërit dhe mësimdhënësit në vend.

Një person ka vdekur dhe pesë të tjerë janë plagosur si pasojë e të shtënave me armë zjarri mbrëmë në rrugën “Gazmend Zajmi” në Prishtinë.

Sipas raportimeve të T7, afër vendit të ngjarjes është gjetur një armë.

Policia ka bërë të ditur se të plagosurit po trajtohen në QKUK dhe janë nën masën e arrestit dhe me mbikëqyrje policore.

“VRASJE E RËNDË NË BASHKËKRYERJE /ARMËMBAJTJE PA LEJE – Rr. Gazmend Zajmi, Prishtinë /01.09.2024 – 22:04. Një mashkull kosovar ka mbetur i vdekur si pasojë e plagëve të pësuara gjatë të shtënave me armë ndërmjet dy grupeve. Vdekjen e viktimës e ka konstatuar ekipi mjekësor në vendin e ngjarjes. Po ashtu si pasojë e shkëmbimit të zjarrit kanë mbetur të plagosur edhe 5 të dyshuar meshkuj kosovarë, të cilët janë duke u trajtuar në QKUK nën masën e arrestit dhe mbikëqyrje policore. Përveç njësive policore në vendin e ngjarjes ka dalë edhe prokurori dhe zyrtarët e Institutit të Mjekësisë Ligjore që e kanë tërhequr trupin e pajetë për obduksion”, thuhej në raportin e Policisë.

Nxënësit dhe profesorët e gjimnazit “Xhevdet Doda” në Prishtinë, po protestojnë në ditën e nisjes së vitit të ri shkollor.

Kjo për shkak se ata nuk po duan ta mbajnë mësimin në objektin tjetër, atë të Gjimnazit Matematikor.

Protesta po mbahet para objektit të këtij gjimnazi.

Po ashtu nxënësit dhe profesorët kanë nënshkruar edhe një peticion.

Një furrë buke është përfshirë nga zjarri në fshatin Stanovc i Ulët në Vushtrri. Bashkë me të, janë djegur edhe një gjenerator, dy automjete një kombi.

Rastin në polici e ka lajmëruar një burrë i cili ka thënë se edhe fqinjit të tij i është përfshirë nga zjarri një depo e ushqimit të bagëtive.

“Në vendin e ngjarjes kanë dalë njësitë policore, zjarrfikësit dhe eksperti i zjarreve”, thotë policia në raport.

Një femër është dërguar në emergjencë nga familjarët e saj në Gjakovë pasi që e njëjta ka pësuar lëndime pasi dyshohet se është hedhur nga kati i dytë i shtëpisë.

Siç thotë policia në raport, sipas mjekëve viktima është jashtë rrezikut për jetë.

Rastin policia po e heton si “SHTYTJE NË VETËVRASJE OSE NDIHMË NË VETËVRASJE” dhe për të njëjtin në cilësi të provave materiale janë sekuestruar disa dëshmi.

Me vendim të prokurorit i cili ka qenë në vendin e ngjarjes është iniciuar rasti dhe mbetet në hetime.

Qendra Emergjente është bllokuar mëngjesin e së hënës nga forcat e shumta policore pas plagosjes së mbrëmshme në rrugën “Gazmend Zajmi” në lagjen “Aktash” në Prishtinë, raporton EO.

Siç raportohet, si pasojë e të shtënave një person ka vdekur dhe katër tjerë kanë mbetur të plagosur.

Gjithë konflikti dyshohet se lidhet me problemet që familja e Sekiraqës ka pasur në vazhdimësi me familjen Capat në Prishtinë të cilëve iu plagos një familjar para disa muajsh.

Shkolla Fillore dhe e Mesme e Ulët ‘Pavarësia’ në Prishtinë nuk do e fillojë procesin mësimor më 02.09.2024.

Sipas një njoftimi në rrjete sociale nga kjo Shkollë, mësimi do të fillojë më 09.09.2024.

Kjo për shkak se punimet ende nuk janë kryer në aneksin e ri të shkollës.

Punimet kanë kaluar afatin kohor të paraparë me kontratë. Në këtë shkollë për një kohë të gjatë u punua me tri ndërrime.

Çmimet e konsumit në muajin korrik shënuan një ngritje prej 2.2%. E rritja e këtyre çmimeve sipas ekonomistëve ka rënduar edhe jetesën e banorëve në Kosovë. Madje shumë prej tyre është dashtë të marrin kredi për dalje nga kriza.

Heqja e vizave ka ndikuar edhe në rritjen e çmimit të biletave të fluturimit.
Krahasuar me korrikun e vitit të kaluar këtë vit sipas të dhënave të Agjencisë së Statistikave biletat janë shtrenjtuar për 22%. E jo vetëm çmimet e biletave të fluturimeve edhe kafja, çaji, pijet alkoolike, lëndët djegëse shënuan rritje të çmimeve.

Por sipas profesorëve të ekonomisë, ky trend i ngritjeve të çmimeve p vazhdon tash e një kohë.

Madje gjendja është renduar sa qe për të dalë nga kriza shumë familja janë detyruar të marrin kredi.

Për profesorin, Mustafë Kadrijaj, për shkak të inflacionit të lartë jeta e qytetarëve në Kosovë është rënduar.

“Vetë fakti që Qeveria krekoset që ne po e mbushim arkën e shtetit përmes doganës kjo tregon qe ne kemi importin e lartë dhe në momentin qe e ki importin e lartë ti je i diktuar nga çmimet dhe inflacioni dhe për fat jo të mirë nga viti në vit po ka ndryshime e kjo po e rëndon jetën e qytetarëve e kur flasim për të hyra nuk kemi ndonjë përmirësim”, tha Kadrijaj.

Sipas ASK-së shkalla e inflacioni në Kosovë në muajin korrik ka shënuar vlerën 2.2%,krahasuar me muajin korrik 2023.

Policia bën me dije se protestat e mbajtura sot në dy lokacione në veri të Mitrovicës, kanë përfunduar të qeta.

Sipas njoftimit, policia thotë se ndonëse protestat kanë qenë të paparalajmëruara, sipas ligjit mbi tubimet publike, e njej të drejtën e qytetarëve për shprehen e lirë përmes tubimeve e protestave tq qeta.

Tutje bëhet e ditur se protestuesit janë shpërndarë rreth orës 08:45 ndërkaq policia ka vazhduar me detyrat e rregullta.

Njoftimi i plotë:

Policia e Kosovës, bazuar në informacionet e siguruara se në dy lokacione në Mitrovicë veri, do të mbahen protesta sot (02.09.2024) në orët e hershme të mëngjesit, me kohë ka ndërmarrë masat e nevojshme për ofrimin e sigurisë dhe ruajtjen e rendit e qetësisë publike, para, gjatë dhe pas përfundimit të protestave.

Policia e Kosovës, edhe pse protestat kanë qenë të paparalajmëruara, sipas ligjit mbi tubimet publike, e njeh të drejtën e qytetarëve për shprehjen e lirë përmes tubimeve e protestave të qeta, dhe sipas detyrës zyrtare angazhohet që të ofrojë siguri për të gjithë qytetarët, përfshirë edhe protestuesit, në mënyrë që mbarëvajtja e protestave të kalojë e qetë dhe pa incidente.

Rreth orës 08:45 protestat kanë përfunduar të qeta dhe protestuesit janë shpërndarë, përderisa njësitet policore kanë vazhduar me detyrat e rregullta policore.

Sot nis fillimi i vitit të ri shkollor.

Me këtë rast policia e Kosovës ka apeluar shoferët për kujdes maksimal kur kalojnë pranë shkollave.

Në njoftim, policia thotë se në zonat pranë shkollave dhe ku janë vendosur tabelat njoftuese si “Kujdes, shkolla” dhe “Këmbësorë,” është jetike që të gjithë të tregojnë kujdes maksimal.

“Në prag të fillimit të vitit të ri shkollor, Policia e Kosovës apelon për një përgjegjësi të shtuar nga të gjithë pjesëmarrësit në trafik. Në zonat pranë shkollave dhe ku janë vendosur tabelat njoftuese si “Kujdes, shkolla” dhe “Këmbësorë,” është jetike që të gjithë të tregojnë kujdes maksimal. Fëmijët janë më të brishtë dhe të paparashikueshëm në lëvizje, kështu që shpejtësia e ulët, vëmendja e lartë dhe respektimi i sinjalistikës rrugore mund të shpëtojë jetë. Këtë vit, veçanërisht kujdes të veçantë duhet të tregojmë për fëmijët që shkojnë në shkollë për herë të parë. Këta fëmijë janë më të pafajshëm dhe më të papërvojë në rrugë, ndaj është detyra jonë të sigurojmë që udhëtimi i tyre drejt shkollës të jetë sa më i sigurt dhe i mbrojtur. Le të fillojmë vitin shkollor me siguri për të gjithë”, thuhet në njoftimin e policisë.