Category: Lajme

Në Gjykatën Themelore në Prishtinë ka filluar seanca për rastin e plagosjes që ndodhi në muajin mars mes Sekiraqëve dhe Capave.

I akuzuari, Shkumbin Sekiraqa, djali i Salih Sekiraqës, është paraqitur në gjykatë me jelek antiplumb. /atvlive.tv

Në seancën e së martës në Gjykatën Themelore në Gjakovë, prokurorja Ardita Beqiraj-Hyseni në fjalën përfundimtare ka kërkuar dënimin e të akuzuarit Fidan Mati, kurse mbrojtësi i tij, avokati Korab Bokshi kërkoi lirimin e Matit.

Në këtë rast, Fidan Mati akuzohet se në cilësinë e zyrtarit policor ka marrë 100 euro nga e dëmtuara A.F., të cilën e kishin ndaluar për tejkalim të shpejtësisë, raporton “Betimi për Drejtësi”.

Prokurorja Beqiraj-Hyseni tha se pas mbajtjes së seancave të kësaj çështjeje dhe administrimit të provave, ka ardhur në përfundim se është vërtetuar që i akuzuari Mati ka kryer veprën penale e cila i vihet në barrë.

Ajo kërkoi që t’i falet besimi i plotë deklaratave të dëshmitarëve dhe të dëmtuarës, të cilat i cilësoi të ligjshme dhe të besueshme.

Beqiraj-Hyseni i propozoi gjykatës që të akuzuarin ta shpall fajtor dhe si rrethanë rënduese ta marrë dashjen, faktin se i njëjti është person zyrtar dhe prishjen e imazhit të Policisë së Kosovës, ndërsa si rrethanë lehtësuese ta marrë sjelljen korrekte gjatë shqyrtimit gjyqësor, si dhe në fund propozoi që gjykata t’i shqiptojë edhe dënim plotësues.

Ndërsa, avokati Bokshi tha se i mbrojturi i tij nuk e ka kryer veprën penale për të cilën akuzohet, se provat janë të pamjaftueshme dhe se ato nuk janë të besueshme.

Në fund i propozoi gjykatës që ta aplikojë parimin “in dubio pro reo” dhe ndaj të mbrojturit tij të merret aktgjykim lirues.

Në seancën e mbajtur më 4 shtator 2024, i akuzuari Mati ishte deklaruar i pafajshëm.

Ndryshe, Prokuroria Themelore në Gjakovë më 6 nëntor 2023, ka ngritur aktakuzë ndaj të pandehurit Fidan Mati, të cilin po e akuzon se në cilësinë e zyrtarit policor në Stacionin Policor në Gjakovë, në mënyrë të drejtpërdrejtë ka kërkuar dhe pranuar të holla në mënyrë që të mos veprojë në pajtim me detyrën e tij zyrtare.

Në aktakuzë thuhet se zyrtari policor Flamur Frrokaj e kishte ndaluar automjetin të cilin po e drejtonte A.F. dhe e kishte njoftuar të njëjtën se e kishte tejkaluar shpejtësinë nga 50km/h ku ishte duke vozitur në 80km/h, dhe se asaj duhet t’i shqiptohet gjobë 300 euro dhe t’i konfiskohet patentë shoferi për 6 muaj.

Sipas aktakuzës, e dëmtuara njofton zyrtarin policor se jeton jashtë vendit- në Zvicër dhe kërkon nga zyrtari policor mos t’ia marrë patentë shoferin, ku i njëjti e drejton të dëmtuarën të shkojë tek kolegu i tij, i pandehuri Mati i cili ishte në veturën e policisë.

Në aktakuzë thuhet se e dëmtuara kur afrohet tek automjeti i policisë, i pandehuri Mati ia kërkon 300 euro, teksa e njëjta ishte përgjigjur se 300 euro nuk i ka por vetëm 100. Ai ishte pajtuar me këtë shumë të të hollave dhe e udhëzon që këto të holla t’i fut në librezë dhe mos ta vërejë askush.

Gjthnjë sipas aktakuzës, e dëmtuara shkon në veturën e saj. i merr 105 euro dhe i vendos në librezë, më pas ia jep të pandehurit Mati, ndërsa pasi ai i pranon këto të holla, ia kthen librezën duke mos i dhënë asnjë dëshmi-dokument, për këtë lloj pagese.

Për këtë, i akuzuari Mati po ngarkohet se ka kryer veprën penale “Marrja e ryshfetit” nga neni 421, par 1. të Kodit Penal.

Komisioni Për Administratë Publike, Pushtet Lokal, Media dhe Zhvillim Rajonal, ka diskutuar për rrëzimin e ligjit nga Gjykata Kushtetuese për Komisionin e Pavarur Mbikëqyrës për Shërbyesit Civil, raporton EO.

Ligji u procedua për shpallje nga presidentja pa nenet 2,6,7, 8,9,10,11, të cilat janë shpallur në kundërshtim nga Gjykata Kushtetuese.

Kryetari i këtij komisioni, Valon Ramandani, ka kërkuar që në përputhje me aktgjykimin, të përgatitet teksti i ligjit për ndryshim.

“Kërkohet nga komisioni funksional që në përputhje me aktgjykimin të përgatisë tekstin e ligjit për ndryshim, sipas procedurave të përcaktuara në rregulloren e Kuvendit”.

Sipas deputetit të PDK-së, Isak Shabani, ky ligj në kundërshtim me Kushtetutën ka pasur qëllim marrjen e kompetencave nga Këshilli Prokurorial.

Krahas kësaj, Shabani ka kërkuar të flitet edhe për dorëheqjet e Bordit të RTK-së.

“Ka vonesa të pakuptueshme me fillimin e komisioneve. Sot është thirrur mbledhja vetëm me një pikë të rendit të ditës edhe pse kemi pasur edhe pika për të diskutuar. Ky ligj është në kundërshtim me Kushtetutën. E dimë që qëllimi i atij ligji ka pasur me marrë shumë kompetenca nga Këshilli Prokurorial, kjo e ka vërtetuar që kërkesa e grupit parlamentar ka qenë e arsyeshme. Kemi miratuar projektligj në kundërshtime me Kushtetutën e Republikës. Në muajin korrik kemi kërkuar kryetarit që me u mbajt një mbledhje me bordin e RTK-së në lidhje me shqetësimet në opinion. Ky shqetësim është jashtëzakonisht i madh, kemi dorëheqje të anëtarëve të bordit”.

Ndërsa, për vonesat, Ramadani ka thënë se nuk mund të ketë mbledhje pa nisur sesioni i Kuvendit.

“Së paku në disa çështje duhet të hulumtohet, nuk ke drejtë me thirrë në komision përveçse nëse ke 40 nënshkrime. Nuk kemi drejtë me kërkuar mbledhje derisa fillon sesionin. Dje ka filluar komisioni, jemi në mbledhjen e parë që po mbahet dhe është mirë që të shikohet rregullorja. Kushdo që ka nënshkrime ne jemi të gatshëm me thirr në raportim.

Deputeti i LDK-së, Agim Veliu, ka thënë se disa herë kanë tërhequr vërejtjë se komisioni ka tentativë për shkelje të Kushtetutës, por zëri i opozitës nuk është dëgjuar.

“Kjo mbledhje është thirrur si mbledhje e rregullt, por më intereson me ditë a ka të drejtë në mbledhje të tilla deputeti me ngrit edhe një çështje tjetër gjatë gjithë procesit e kemi tërhequr vërejtjen se komisioni ka tentativë për shkelje të Kushtetutës, por prapë se prapë nuk është dëgjuar zëri i opozitës, sot jemi në humbjen e kohës, shumë lehtë me procedurë me projektligj nga ky komision pa shkelje”, ka thënë Veliu.

Ndërsa, deputeti i PDK-së, Mërgim Lushtaku, ka thënë se kjo qeveri ka mbi 10 shkelje kushtetuese e se “pikërisht me këtë aktgjykim, Vetëvendosje me prapaskenë, Dejona Mihali ka dashur të kap këto institucione”.

“Është fundi i mandatit të kësaj qeverie, secili jemi përgjegjës për punët dhe angazhimet dhe për shkeljet kushtetuese. Kjo qeveri që ka ardhur me stupc në krahë ka kundërshtuar qëllimshëm Kushtetutën, ka mbi 10 shkelje kushtetuese. Pikërisht me këtë aktgjykim, Vetëvendosje me prapaskenë, Dejona Mihali ka dashur të kap këto institucione. Ne po duhet të kthehemi prapa me keqardhje, duhet të kthehemi nga tre-katër herë me një ligj vetëm për t’iu bindur që keni bërë shkelje kushtetuese”, ka thënë Lushtaku, raporton EO.

nstituti Demokratik i Kosovës(KDI) e ka vlerësuar të dobët sesionit pranveror të Kuvendit të Kosovës. Sipas tyre, në këtë sesion ka dështuar mbikëqyrja parlamentare ndaj ekzekutivit, si dhe ka vazhduar trendi i mungesës së kuorumit në seanca plenare. Në anën tjetër potencuan se zgjedhjet e caktuara më 9 shkurt 2025, pritet të ndikojnë në performancën e sesionit vjeshtor të Kuvendit.

Hulumtuesja në KDI, Violeta Haxholli, në konferencë për medie të martën, tha se mazhoranca gjatë sesionit pranveror ka miratuar 36 projektligje nga të cilat vetëm 1 për qind janë të agjendës legjislative të vitit 2024.

“Gjatë sesionit pranveror, Kuvendi ka shfaqur mangësitë e zakonshme. Seanca të cilat janë zhvilluar apo kanë përfunduar në mungesë të kuorumit, deputetë të cilët kanë munguar kanë pamundësuar përfundimin e seancave, mbikëqyrje e ulët dhe pak ligje në krahasim me sesionet e kaluara… Vetëm tre projektligje nga ato që janë miratuar në sesionin pranveror janë të agjendës së qeverisë të vitit 2024. Më pak se 1 për qind e agjendës legjislative të këtij viti është përmbushur, ndërkaq rreth 99 për qind të kësaj agjende mbetet për trajtim gjatë sesionit vjeshtor. Nga projektligjet e miratuara 20 prej tyre janë marrëveshje ndërkombëtare ndërkaq janë 15 projektligje dhe një projekt-kod që rregullojnë tema dhe çështja të ndryshme…Sa i përket rolit mbikëqyrës të Kuvendit, ky rol nuk është përmbushur kënaqëshëm përgjatë këtij sesioni. Vlen të theksohet se gjatë kësaj periudhe deputetët nuk kanë ftuar asnjëherë për raportim kryeministrin. Nuk është organizuar ndonjë interpelancë ndaj kryeministrit apo ministrave”, tha ajo.

Ai theksoi se zgjedhjet e caktuar parlamentare më 9 shkurt 2025, do të ndikojnë në performancën e sesionit vjeshtor të Kuvendit, megjithatë kërkoi nga deputetët që të jenë të përgjegjshëm.

“Zgjedhjet do të ndikojnë shumë në performancën e sesionit vjeshtor, megjithatë duke pasur parasysh se kanë mbetur shumë pika të pa trajtuara nga sesioni pranveror siç e keni pa edhe seanca e kësaj të enjte është me pika të bartura. Deputetët duhet t’i kushtojnë një vëmendje më të madhe këtyre përfundimit të këtyre pikave. Krahas fushatës zgjedhore që do të karakterizojë këtë sesion duhet të tregohet një nivel më i lartë i përgjegjshmërisë së deputetëve”, shtoi ai.

Krahas këtyre, Haxholli kërkoi rol më proaktiv të kryeparlamentarit Glauk Konjufca për shqiptimin e sanksioneve në rastet kur deputetët apo ministrat shkelin rregullat e Kuvendit.

Ajo theksoi se në sesionin pranveror në Kuvend ka pasur 525 mungesa, apo 24.3 për qind e deputetëve kanë munguar./KP/

Sekretari amerikan i Shtetit, Antony Blinken, pritet të mbështesë Ukrainën teksa mbrohet prej pushtimit rus, kur të nisë një vizitë në Londër, më 10 shtator, për t’u takuar me kryeministrin britanik, Keir Starmer, dhe zyrtarë tjerë britanikë.

Blinken, po ashtu, pritet të deklarohet edhe për luftën në Gazë, dhe paktin AUKUS për mbrojtje, në mes të Uashingtonit, Londrës dhe Kanberras.

Mirëpo, raportimet e fundit se Irani e ka furnizuar Rusinë me raketa balistike me rreze të shkurtër, nënkuptojnë që Shtetet e Bashkuara dhe Britania e Madhe do të synojnë të rrisin koordinimin ndaj veprimeve që disa i shohin si përforcim të përpjekjeve të Moskës për luftën në Ukrainë.

E përditshmja amerikane, Wall Street Journal dhe disa media tjera amerikane kanë cituar burime anonime të kenë thënë se raketat iraniane janë transferuar në moment kyç, në luftën 36 mujore të Rusisë në Ukrainë.

Presidenti ukrainas, Volodymyr Zelensky, dhe disa vende anëtare të NATO-s kanë inkurajuar mbështetjen e Kievit, dhe heqjen e kufizimeve, se si dhe kur forcat ukrainase mund t’i përdorin armët e Perëndimit në konflikt.

Bashkimi Evropian ka thënë më 9 shtator se ekziston informacion kredibil, i siguruar prej aleatëve, që Irani ka dërguar raketa balistike me rreze të shkurtër në Rusi, për t’i ndihmuar në luftë, andaj blloku evropian është zotuar për përgjigje “të shpejtë”.

Kremlini nuk i ka kundërshtuar direkt akuzat për sigurim të armëve prej Iranit, dhe ka folur për bashkëpunimin me Teheranin “në fushat më të ndjeshme”, derisa Irani i ka kundërshtuar ashpër sugjerimet.

“Ne kundërshtojmë ashpër pretendimet për rolin e Iranit në eksportim të armëve për njërën palë në luftë”, ka thënë zëdhënësi i Ministrisë së Jashtme të Iranit, Nasser Kanani, në një konferencë për media.

Zëdhënësi i Departamentit amerikan të Shtetit, Vedant Patel, ka thënë se Shtetet e Bashkuara janë “të alarmuara nga raportimet për transferim të armëve iraniane në Rusi”./REL

Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka thënë se kanë iniciuar një nismë për mbledhjen e nënshkrimeve për ndryshimin e skemën pensionale në vend, raporton EO.

Sipas tij, kjo nismë ka për qëllim që punëtorëve të arsimit viteve te 90-ta t’u llogariten si vite kontributdhënëse, ndërsa është i bindur në mbledhjen e mbi 10 mijë nënshkrimeve.

“Duke respektuar qëndrimet e përfaqësueseve të SBAShK-ut që nga çerdhet e deri në universitet, kemi ardhur me një përfundim të fillojmë me një nismë me mbledhjen e nënshkrimeve nga anëtarësia jonë por edhe nga qytetarët që t’i drejtohemi Kuvendit të Kosovës që të ndërrojnë pjesën e ligjit për skemën pensionale. Kohëve të fundit me ndryshimin e bërë janë mohuar te drejtat e punëtorëve të arsimit”, ka thënë Jasharaj, teksa shpreh bindjen se ligjvënësve do t’u dërgohen më shumë se 10 mijë nënshkrime.

“Kjo nismë ka për qëllim që t’i kthehet e drejta që e ka bërë vet parlamenti punëtorëve të arsimit viteve te 90-ta që këto vite te jenë vite kontributdhënëse që të marrin pensionin e plotë që do të ndihmonte jo vetëm punëtorëve të arsimit po të gjithë sektorët publike, që të arrijnë kriterin për 15 vite. Jam i sigurt se jo vetëm 10 mijë po shumë më shume nënshkrime do të mblidhen për nja afat shumë të shkurtër dhe do t’ia dërgojmë organeve përgjegjëse”, ka thënë Jasharaj.

Tre persona kanë mbetur të lënduar në një aksident trafiku që ka ndodhur këtë të martë, rreth orës 07:11 në rrugën Carralevë-Duhël.

Aksidenti ndodhi në mes të një autobusi dhe një kamioni, ku autobusi është rrotulluar në krahë.

Sipas zëdhënësit të Policisë së Kosovës për rajonin e Prizren, Shaqir Bytyqi, zjarrfikësit kanë intervenuar për të nxjerrë pasagjerët nga autobusi.

Ndërsa, të lënduarit janë transportuar në Qendrën e Mjekësisë Familjare (QKMF) në Suharekë për ndihmë mjekësore.

“Sot më datë 10.09.2024, rreth orës 07:11 është raportuar për një aksident trafiku në rrugën Carralevë-Duhël. Në aksident janë të përfshirë një autobus dhe një kamion. Si pasojë e aksidentit së paku tre persona kanë pësuar lëndime të lehta trupore dhe janë transportuar për në emergjencë në QKMF në Suharekë”, ka thënë Bytyqi.

Policia ka mbërritur në vendngjarje dhe është duke hetuar shkaqet e aksidentit.

Sipas një njoftimi të kompanisë së linjës së autobusëve në fjalë, thuhet se pasagjerë kanë qenë familjarët e pensionistëve kaçanikas që po udhëtonin nga Kaçaniku në drejtim të bregdetit shqiptar.

Ndërkohë, pasagjerët tashmë janë transportuar me një autobus tjetër dhe janë nisur për në bregdetin shqiptar.

Në ditën botërore të parandalimit të vetëvrasjeve, organizata “Linja e Jetës”, ka dorëzuar në Kuvendin e Kosovës, peticionin për projekt-ligjin për parandalimin e vetëvrasjes me 13 mijë e 361 nënshkrime të mbledhura nga qytetarët e Kosovës.

Sipas, kryetarit të “Linjës së Jetës”, Bind Skeja kjo shënoj një arritje të jashtëzakonshme në trajtimin e vetëvrasjes në Kosovë, duke filluar për herë të parë procesin e hartimit të politikave, të cilat sipas tij preokupim kryesor e kanë reduktimin e vetëvrasjeve nëpërmjet trajtimit të dinjitetëshm të qytetarëve.

Edhe pse nuk u prit nga Kryetari i Kuvendit, Glauk Konjufca, kjo për organizatën tregon një qasje jo serioze.

“Kemi përfunduar peticionin për projekt-ligjin për parandalim të vetëvrasjes me 13 mijë e 361 nënshkrime nga qytetarët e Republikës së Kosovës. Kjo shënon një arritje të jashtëzakonshme në trajtimin e vetëvrasjes në Kosovë, duke filluar për herë të parë procesin e hartimit të politikave, të cilat preokupimin kryesor e kanë reduktimin e vetëvrasjeve nëpërmjet trajtimit të dinjitetshëm të bashkëqytetareve tonë… Fatkeqësisht nuk jemi pritë nga Kryetari i Kuvendit, Konjufca, apo nga dikush i kabinetit të tij siç parashihet në rregullore. Kjo për neve me fillim na tregon një qasje jo serioze por shpresojmë se nuk është përfaqësuese për procesin e plotë”, ka thënë Skeja.

I pyetur për statistika të vetëvrasjeve në Kosovë, të marra nga Policia e Kosovës, Skeja ka shtuar se nuk i konsideron të besueshme statistikat e PK-së, për shkak se nuk ka mekanizma për t’i monitoruar.

Skeja, ka theksuar se ka pasur raste kur personat që kanë vdekur nga overdoza nuk janë trajtuar si vetëvrasje edhe pse qëllimi ka qenë i tillë.

“Nuk është që i konsiderojmë shumë të besueshëm statistikat e policisë, për shkak se nuk është që ka mekanizma për t’i monitoruar, të gjitha janë të regjistruara me dorë. Ka pasur edhe raste që kemi kuptuar personat që kanë vdekur nga overdoza, nuk janë regjistru si vetëvrasje edhe pse qëllimi ka qenë i tillë”, ka theksuar ai.

Nëpërmjet këtij peticioni, “Linja e Jetës”, kërkon një ligj që rregullon shërbimet klinike për parandalim të vetëvrasjes, integrimin e parandalimit të vetëvrasjes në objektiva institucionale, shërbime dhe mbështetje sociale jo-klinike, mekanizma për reduktimin e qasjes ne mjete vetë lënduese dhe rregulla të tjera. /kp

Një grua në Gjakovë ka raportuar se djali i saj është larguar nga shtëpia dhe nuk ka njohuri për vendndodhjen e tij.

Nëna ka kërkuar ndihmën e policisë për gjetjen e djalit të saj.

“Ankuesja femër kosovare ka njoftuar se viktima mashkull kosovar, djali i saj është larguar nga shtëpia dhe nuk dihet për vendndodhjen e tij”, thuhet në njoftimin e PK-së.

Instituti Demokratik i Kosovës (KDI) e ka vlerësuar të dobët sesionit pranveror të Kuvendit të Kosovës.

Sipas KDI-së, në këtë sesion ka dështuar mbikëqyrja parlamentare ndaj ekzekutivit si dhe ka vazhduar trendi i mungesës së kuorumit në seanca plenare.

Hulumtuesja në KDI, Violeta Haxholli, në konferencë për medie të martën, tha se mazhoranca gjatë sesionit pranveror ka miratuar 36 projektligje nga të cilat vetëm 1 për qind janë të agjendës legjislative të vitit 2024.