Category: Lajme

Pas takimit që ka zhvilluar Komisioni për Punë të Jashtme dhe Diasporë me ambasadorin e Republikës së Hungarisë në Kosovë, Bela Bozsik, kryetarja në këtë komision, Arbëreshë Kryeziu-Hyseni ka thënë se kanë diskutuar për disa çështje që Kosova të ndihmohet për të ecur përpara në agjendën e saj evropiane.

Ndërsa ka shtuar se kanë biseduar edhe për çështjen e anëtarësimit të Kosovës në Këshill të Evropës.

“Kemi diskutuar për raportet që Kosova ka me Hungarinë, por me theks të veçantë për atë që Hungaria tashmë e ka kryesimin e presidencës së BE-së, dhe sigurisht se brenda kësaj periudhe kohore sa ata e mbajnë kryesimin e presidencës synimi është që ne si Kosovë t’i shtymë përpara çështjet që konsiderojmë se janë me interes të shtyhen përgjatë kësaj periudhe kohore. Sigurisht kemi diskutuar edhe për çështjen e anëtarësimit të Kosovës në Këshill të Evropës dhe qëndrimet që deputetët që janë anëtarë të Këshillit të Evropës nga Hungaria kanë mbajtur në këtë proces dhe ideja është të gjendet një gjuhë e përbashkët me ta dhe t’i bëjmë ata të kuptojnë sa e rëndësishme është të votohet pro anëtarësimit të Kosovës, sepse këtu nuk kemi të bëjmë vetëm me një çështje që ka të bëjë specifikisht me Kosovën, por është shumë e rëndësishme që Kosova të bëhet anëtare e Këshillit të Evropës edhe për faktin se kjo ndikon shumë edhe në rritjen e stabilitetit në vendet e Ballkanit Perëndimor dhe më pas edhe në vet BE-në”, tha Kryeziu-Hyseni.

Kryeziu ka thënë se kanë dërguar një ftesë te homologu në Budapest dhe presin që deri në fund të këtij viti Komisioni për Politikë të Jashtme i Hungarisë të vizitojë Kosovën.

“Ne synojmë që të rrisim bashkëpunimin e mëtutjeshëm me Hungarinë edhe në nivelin ndërparlamnetar, prandaj kemi dërguar një ftesë tek homologu në Budapest dhe presim që Komisioni për Politikë të Jashtme i Hungarisë të vizitojë Kosovën deri në fund të këtij viti në mënyrë të intensifikojmë raportet nderparlamentare, por edhe të njëjtën kohë të ndërtojmë një bashkëpunim të mirëfilltë në mënyrë që deputetët të mund të shohin nga afër se sa e rëndësishme është që Kosova të ndihmohet për të ecur përpara në agjendën e saj evropiane”, ka shtuar ajo.

Dyert e Muzeut Kombëtar të Kosovës do të jenë të mbyllura për rreth një vit për vizitorët për shkak të renovimeve që do të fillojnë së shpejti, ndërkohë që aktivitetet dhe komunikimi me vizitorët do të vazhdojë në forma alternative.

Drejtoresha e Muzeut Kombëtar të Kosovës, Vjollca Aliu në një intervistë për KosovaPress tregon se renovimet, të cilat përfshijnë depo, laboratorë, sallat ekspozuese, zyrat e punës dhe hapësira e oborrit, do të fillojnë në një të ardhme të afërt dhe kapin koston prej rreth 3 milionë eurosh.

“Tanimë, të gjitha procedurat kanë përfunduar, nënkupton nënshkrimin e kontratës për caktimin e organeve mbikëqyrëse menaxherëve të kontratës dhe udhëheqësve të drejtpërdrejt dhe pritet shumë shpejtë të fillojë renovimi i ndërtesës së muzeut. Ndërtesa i nënshtrohet në tërësi renovimit dhe kjo nënkupton prej hapësirave të depove, laboratorëve, sallave ekspozuese dhe normalisht hapësirave të punës, zyrave ku qëndron stafi profesional dhe hapësira e oborrit… Secila pjesë e institucionit të muzeut e ka rëndësinë dhe peshën e vet. Nëse flasim për hapësirat e depove dhe laboratorëve mendoj që është esenciale për faktin që aty trajtohen dhe aty bëhet kujdesi ndaj fondit muzeor, tepër e rëndësishme…Kostoja, kontrata e nënshkruar është afërsisht tre milionë, është publike. Kurse sa i përket kohëzgjatjes është 10 muaj për fillim dhe përfundim të punimeve”, tha Aliu.

Megjithëse muzeu do të jetë i pa qasshëm për vizitorët gjatë rinovimit, Aliu thotë se janë duke shqyrtuar mundësitë për të mbajtur komunikimin me të interesuarit.

“Ne jemi duke e shqyrtuar mundësinë për të parë se cila do të jetë mënyra dhe forma e komunikimit me publikun, në momentin që institucioni i muzeut do të mbyllet dhe nuk do të jetë i qasshëm për vizitorët. Cilat do të jenë ato aktivitete tash nuk mund të them diçka, sepse ende nuk janë finalizuar dhe kërkojnë një procedurë të shqyrtimit dhe miratimit me këshillin drejtues të muzeut dhe me Ministrinë e Kulturës. Besoj që do të ketë diçka”, tha Aliu.

Aliu ka theksuar nevojën për rritjen e numrit të stafit në Muzeun Kombëtar të Kosovës.

“Mendoj se institucioni i muzeut ka nevojë për staf. Kjo është adresuar edhe në rregulloren që muzeu e ka përmbyllur dhe e ka dorëzuar në ministri sa i përket organizmit të brendshëm dhe sistematizimit të vendeve të punës. Është një numër i punëtorëve profesional, tekniku po ashtu edhe staf mbështetës që arrin në shifrën 100 punëtorë. Ndoshta mund të duket shumë, por në anën tjetër nuk mund të them që ky numër i punëtorëve duhet të plotësohen tani. Mendoj që në një periudhë tre deri në pesë vjet në një planifikim afatmesëm, ky numër duhet të plotësohet”, tha Aliu.

Drejtoresha e Muzeut Kombëtar të Kosovës thotë se ka pasur rritje të numrit të vizitorëve në gjashtëmujorin e parë të këtij viti.

“Ka pasur rritje këtë vit në krahasim me periudhën dhe vitin e kaluar në tërësi. Ka pasur ndryshime edhe sa i përket vizitorëve. Vitin e kaluar kemi pasur një numër të jashtëzakonshëm të diasporës. Këtë vit, po ashtu, ka pasur vizitorë edhe nga diaspora, por shquhet për turistë ndërkombëtarë. Sa i përket vizitorëve, nëse flasim për periudhën janar-qershor, flasim për një numër afër 8 mijë vizitorë. Kemi pasur një mbyllje të përkohshme për të rikujtuar defektin që kemi pasur në sistemin e alarmit në sallat ekspozuese. Ajo mbyllje duket se ka rezultuar me një numër cilësor në kuptimin e statistikave. Muaji korrik dhe gusht, çdo ditë, përjashto të hënën, numri i vizitorëve ka qenë mbi 100 vizitorë gjatë ditës”, tha ai./KP

Kryeparlamentari Glauk Konjufca deklaroi se kërcënimet e presidentit të Serbisë, Aleksandër Vuçiq nuk i bëjnë përshtypje. Ai theksoi se në veri të vendit janë prezente institucionet e sigurisë, për çka tha se nuk shqetësohen dhe frikësohen nga kërcënime e tij.

Para mediave, Konjufca theksoi se pas dorëheqjeve të serbëve nga institucionet, po të mos ishte LVV, veriu do të përfundonte në negociata. Ai foli edhe për aktakuzën për Banjskën, për çka u shpreh se ka “goditur në shenjë”.

Kryetari i Kuvendit të Kosovës, Glauk Konjufca deklaroi se kërcënimet e presidentit të Serbisë, Aleksandër Vuçiq nuk i bëjnë përshtypje.

“Të gjitha që i bëri janë në kundërshtim me Kushtetutën dhe diçka e cila nuk ekziston më. Strukturat paralele, tash gradualisht janë hequr prej Kosovës po vazhdojnë të hiqen edhe sot e kësaj dite. Mirëpo ajo substanca e tyre do të thoja se është hequr, kanë mbetur disa të tjera mirëpo në vazhdimësi nuk kemi pse të ngutemi shumë. Është në rrugë të mbarë ky proces dhe ky proces ka qenë i domosdoshëm për konsolidimin e kushtetueshmërisë dhe të shtetësisë së Kosovës dhe sovranitetit në atë pjesë të vendit. Ky është drejtim ynë. Tash Vuçiqi po tenton t’i ruajë ato që nuk i ka më. Edhe faktikisht po kërcënon Republikën e Kosovës përmes konferencës për shtyp. Mirëpo, ky është një kërcënim me thënë të drejtën nuk është se na bën shumë përshtypje. Ne nuk frikësohemi, nuk shqetësohemi sepse në atë pjesë të vendit janë institucionet e Kosovës, janë institucionet e sigurisë, janë institucionet politike, janë komunat që funksionojnë edhe është shansa e humbur e qytetarëve që kanë mendime të tjera”, u shpreh Konjufca.

Pas bojkotit të serbëve nga institucionet vendore, Konjufca shtoi se Kosova ka qenë para dy opsioneve.

“Unë jam i sigurt që po të kishte qenë opsioni i vjetër politik në Kosovë, do të kishim përfunduar në negociata, por kjo nuk ka qenë opsioni jonë, opsioni jonë është kushtetutshmëria me çdo kusht, qoftë edhe përmes përdorimit të organeve të sundimit të ligjit për të vendosur atje rendin dhe ligjin. Kosova do të përfundonte shumë keq nëse pas dhunës, pas kushtëzimeve dhe pas imponimeve, veriu i Kosovës do të përfundonte në negociata. Kjo nuk ka qenë opsion për Lëvizjen Vetëvendosje dhe për qeverisjen e Kosovës”, shtoi ai para mediave.

I pyetur se a pranon Kosova që në takimet në Bruksel të diskutohet për veriun, Konjufca tha se dialogu ka vdekur për këtë vit.

“Me këtë strukturë dhe në anglisht që thonë me këtë ‘set up’, unë kam vlerësuar që dialogu tashmë ka vdekur… ta shohim se çfarë po ndodhë në vitin 2025, për vitin 2024 nuk kemi çfarë të flasim”, shtoi Konjufca.

Sa i përket aktakuzës për sulmin terrorist në Banjskë, kryeparlamentari Konjufca tha se nuk duhet të ketë vonesa, ashtu siç shtoi ai, që ka ndodhur me përpilimin e kësaj aktakuze.

“Është një aktakuzë e cila mendoj që për nga definicioni i çështjeve që i ka ngritur, ka goditur në shenjë. Për arsye se ne këtë e kemi thënë përgjatë gjithë kohës. Synimi i grupit terrorist e para ka qenë aneksimi i një pjese të Republikës së Kosovës. Me këtë pretendim ka pasur njerëz edhe që kanë bërë shaka. Por kjo nuk është hajgare, është e vërtetë. E dyta, grupi terrorist e ka pasur mbështetjen e plot të Serbisë. Ky është pretendimi i dytë i aktakuzës. E treta dhe e katërta janë tentimi për të shkatërruar rendin kushtetues dhe sigurinë nacionale të Republikës së Kosovës. aty ishte shumë mirë e argumentuar edhe aspekti i kriminalitetit shumë të madh financiar që ka bërë ky grup terrorist, duke shpërlarë para dhe duke i vendosur krejt këto shpërlarje të parave dhe keqpërdorimeve të tenderëve në funksion të financimit dhe të krijimit të logjistikës së nevojshme për funksionalizimin e këtij grupi terrorist”, përfundoi ai./KP

Diellza Kukaj, kryetare e Aleancës së Gruas së Kosovës në Aleanca për Ardhmërinë e Kosovës tha se deklarata e Kryeministrit Albin Kurti për mbështetjen e grave në Kosovë është një përpjekje e radhës për të maskuar “dështimet e tij të mëdha lidhur me çështjet gjinore”.

Kukaj tha se sa i përket tregut të punës, gratë në Kosovë vazhdojnë të jenë një nga grupet më të diskriminuara. Shkalla e papunësisë së tyre sipas Kukaj është alarmuese dhe ka shumë pak përpjekje reale për të krijuar politika që nxisin pjesëmarrjen e tyre në ciklin ekonomik.

Reagimi i plotë i Diellza Kukaj:

Kurti asnjë fjalë për dhunën kundër grave!

Deklarata e Kryeministrit Kurti për mbështetjen e grave në Kosovë është një përpjekje e radhës për të maskuar dështimet e tij të mëdha lidhur me çështjet gjinore. Kur thotë se “gratë ngrihen, e gjithë shoqëria dhe kombi ngrihet me to”, a i referohet rritjes së dhunës ndaj grave dhe mungesës së drejtësisë për to? Gratë në Kosovë përballen me sfida të shumta që nuk mund të tejkalohen me fjalime të zjarrta, por kërkojnë veprime të qarta, konkrete dhe të qëndrueshme – diçka që, për fat të keq, qeveria juaj nuk e ka adresuar siç duhet.

Së pari, sa i përket tregut të punës, gratë në Kosovë vazhdojnë të jenë një nga grupet më të diskriminuara. Shkalla e papunësisë së tyre është alarmuese dhe ka shumë pak përpjekje reale për të krijuar politika që nxisin pjesëmarrjen e tyre në ciklin ekonomik.

-Vetëm 18% e grave janë aktive në tregun e punës, ndërsa pjesa tjetër mbetet e margjinalizuar dhe e përjashtuar nga mundësitë për përmirësim ekonomik.

-Mbi 65% e tregut joformal përbëhet nga gratë, të cilat mbeten të ekspozuara ndaj shkeljeve të të drejtave të punës, pagave të ulëta dhe jashtë çdo kompensimi të përfshirë në statistikat tuaja politike. Rrjedhimisht, pjesëmarrja e grave në vendimmarrje dhe në tregun e punës është ndër më të ulëtat në Evropë.

Së dyti, ndërhyrjet në mbrojtjen nga dhuna ndaj grave mbeten sipërfaqësore.

-Në katër vitet e fundit, janë vrarë mbi 20 gra nën këtë qeverisje. Këto gra, të pambrojtura nga sistemi, u vranë nga partnerët apo familjarët e tyre, ndërsa institucionet u treguan të paafta për t’i mbrojtur. Qeveria dhe institucionet nuk kanë ndërmarrë masa të forta për të ndalur këtë dhunë sistematike, dhe mbrojtja për gratë në rrezik është pothuajse inekzistente.

-Shtëpitë e strehimit janë të mbingarkuara, ndërsa politika për barazinë gjinore mbetet vetëm në letër.

Së treti, ndërsa qeveria merr merita për shtesat e lehonave, disa komuna, si Rahoveci, nën qeverisjen e Aleancës, kanë treguar më shumë përkushtim ndaj grave, duke ndarë deri në 500 euro nga buxheti komunal për gratë që lindin në QKMF. A nuk besoni se qeveria do të mund të bënte më shumë!!?

Përfaqësimi i grave në politikë, megjithëse përmendet si arritje, nuk është në përputhje me thelbin e barazisë. Po e dimë se, Simone de Beauvoir thotë se, gratë që arrijnë pushtetin pa sfiduar status quo-në nuk përfaqësojnë barazinë e vërtetë. Kryeministër, megjithse po përmend shifra të përfaqësimit të grave në legjislaturën tënde, sa prej tyre trajtojnë në mënyrë të efektshme çështjet reale të grave? Cilat janë arritjet konkrete? Sa prej këtyre grave janë duke punuar për të zgjidhur problemet e përditshme që gratë e Kosovës përballen? Ajo që mungon është një përkushtim real për t’i bërë gratë të ndihen të sigurta, të barabarta dhe me mundësi të vërteta për përparim.

Zoti Kryeministër, pabarazia gjinore në Kosovë është rrënjosur thellë në struktura shoqërore dhe ekonomike që kërkojnë më shumë se fjalë të bukura për t’u zhbërë.

Stoke City ka shkarkuar trajnerin Steven Schumacher pas humbjes të së shtunës nga Oxford United. Humbja 1-0 ishte humbja e tretë e sezonit për Potters në kampionat dhe i lë ata në vendin e 13-të në tabelë me vetëm dy fitore nga pesë ndeshjet e tyre.

Kjo i jep fund mandatit të 40-vjeçarit Schumacher si trajner i Stoke pas vetëm nëntë muajsh, pasi u largua nga Plymouth Argyle për të marrë detyrën në dhjetor. Drejtori sportiv i Stoke, Jon Ëalters tha se vendimi është marrë për t’i “shërbyer interesave afatgjata” të klubit, përcjellë KosovaPress.

“Si gjithmonë në futboll, këto vendime që janë të vështira”, theksoi Ëalters, përcjellë KosovaPress. Ish-trajneri i Creëe, Alex Morris dhe ish-kapiteni Ryan Shaëcross, i cili tani punon si trajner i Potters U-21, do të marrë drejtimin e ekipit deri në një vendim tjetër.

Kryeministri i Kosovës, Albin Kurti do të shkojë sot në Therandë.

Sipas njoftimit nga zyra e kryeministrit, ai do të marrë pjesë në hapjen solemne të përurimit të Shtëpisë së Kulturës “Ukë Bytyçi”.

Ngjarja nis në orën 18:30.

Gazetari ukrainas, Kostyantyn Grygorenko, së bashku me bashkëshorten, Svitlana Grygorenko, i bashkohen programit “Journalists in Residence – Kosovo”.

Asociacioni i Gazetarëve të Kosovës ka njoftuar se Grygorenko, të dielën në mbrëmje është mirëpritur në aeroportin e Prishtinës, nga drejtorja ekzekutive e AGK-së, Getoarbë Mulliqi, koordinatori i terrenit, Adem Sylejmani, asistentja e projekteve, Leonita Morina, si dhe përfaqësues të MPB-së, Bernardeta Palucaj Lekaj dhe Kushtrim Nreci, si dhe zyrtarë të Policisë së Kosovës.

“Asociacioni i Gazetarëve të Kosovës, që nga prilli 2022, e zbaton programin që u mundëson gazetarëve ukrainas që kanë ikur nga lufta, të vazhdojnë punën e tyre si gazetarë në Kosovë”.

“JiR – Kosovo, program i iniciuar nga European Centre for Press and Media Freedom ECPMF, implementohet nga Asociacioni i Gazetarëve të Kosovës, dhe mbështetet financiarisht nga Qeveria e Republikës së Kosovës dhe iniciativa Hannah Arendt”, thuhet në njoftimin e AGK-së.

Iniciativa CorrWatch* ka shprehur shqetësimin e thellë për mbyllje dhe mungesë të transparencës të Ministrisë së Financave, Punës dhe Transfereve (MFPT) dhe Ministrisë së Industrisë, Ndërmarrësisë dhe Tregtisë (MINT) në proceset e rekrutimit për këto pozita të larta drejtuese: Drejtor Ekzekutiv i Agjencisë së Regjistrimit të Bizneseve të Kosovës (ARBK) në kuadër të MINT, Sekretar i Përgjithshëm në MFPT, Drejtor Ekzekutiv në Agjencinë e Punësimit të Republikës së Kosovës, Drejtor Ekzekutiv në Agjencinë Qendrore e Prokurimit (AQP).

Përmes një komunikate për media, CorrWatch ka reaguar lidhur me mbylljen dhe mungesën e transparencës së MFTP për proceset rekrutuese për pozitën e Drejtorit të Përgjithshëm të Administratës Tatimore të Kosovës (ATK) dhe pozitën e Sekretarit të Përgjithshëm në MFPT.

“Monitorimi i shoqërisë civile në procese të rekrutimit është i garantuar edhe me legjislacionin në fuqi. Neni 48, paragrafi 7 i Ligjit Nr.08/L-197 për Zyrtarët Publik parasheh si në vijim: “Në procedura të rekrutimit për pozita të kategorisë lartë drejtuese në cilësinë e vëzhguesve mund të marrin pjesë përfaqësues nga shoqëria civile dhe sindikatat”, thuhet në komunikatë.

CorrWatch ka bërë kërkesë për monitorimin e këtyre pozitave por nuk jemi njoftuar për asnjërën fazë të procedurës për pozitat e lartëcekura. Në rastin e Drejtorit Ekzekutiv në Agjencinë e Punësimit, CorrWatch është njoftuar që njësia përgjegjëse është duke pritur përgjigje nga Ministri i MFPT.

“Për pozitën e Drejtorit ekzekutiv në AQP dhe Sekretarit të Përgjishëm në MFPT, CorrWatch nuk ka marrë asnjë përgjigje si dhe nuk është njoftuar për t’a monitoruar procesin. Në MINT janë përgjigjur se do të lejohet monitorimi vetëm në fazën e verifikimit paraprak. Megjithatë, edhe përkundër konfirmimit, CorrWatch nuk është ftuar për monitorimin e fazën e verifikimit paraprak. Mohimi i përfshirjes së shoqërisë civile nga MFPT dhe MINT është i kundërligjshëm, cënon garancitë e dhëna me ligj si dhe transparencën si njëra nga shtyllat kryesore të meritokracisë. Një praktikë e tillë rrezikon që këto procese të mbyllura të jenë subjekt i ndikimeve politike dhe personale, duke minuar kështu besimin e qytetarëve në institucionet publike. CorrWatch u bën thirrje Ministrive në fjalë që të zbatojnë ligjin dhe krijojnë mundësitë për qasje të hapur dhe të drejtë, ku monitorimi nga shoqëria civile të jetë i plotë dhe gjithëpërfshirës në të gjitha fazat e procesit të rekrutimit ashtu siç garantohet me ligj. Sinqerisht, GLPS, Instituti GAP & INDEP”, thuhet në këtë komunikatë.

Ivana Stradner, ekspertja e fushës së sigurisë dhe informacionit dhe vëzhguese e thellë e gjendjes në Ballkanin Perëndimor, ka komentuar deklaratën e fundit të presidentit serb, Alkesandar Vuçiq për rikthimin e shërbimit të detyrueshëm ushtarak në Serbi.

Stradner e ka quajtur këtë një hipokrizi të radhës të Vuçiqit si përpjekje për të tërhequr vëmendjen e perëndimit.

Përmes një postimi në “X” Stradner ironizoi situatën, duke përmendur se qytetarët serbë po bëjnë shaka në rrjetet sociale sesi do ta kundërshtojnë këtë urdhër.

“Një tjetër marrëzi e Vuçiqit teksa kërkon vëmendje nga Perëndimi. Është qesharake të lexosh komentet online – serbët po bëjnë shaka se si do ta kundërshtojnë këtë urdhër. Ndërkohë, njerëzit nacionalistë pro-Vuçiqit i dërgojnë fëmijët e tyre për të studiuar në Perëndim dhe në shkolla ndërkombëtare në Serbi”, ka shkruar Stradner.

Another Vucic’s nonsense as he seeks attention from the West. It’s funny to read comments online – Serbs are making hilarious jokes how they will disobey this order.

Meanwhile, nationalistic pro-Vucic people send their kids to study in the West and international schools in 🇷🇸. pic.twitter.com/CzGBI0OBWM

— Ivana Stradner (@ivanastradner) September 16, 2024